armenpress.am: ԱՄՆ նախագահ Դոնալդ Թրամփի վարչակազմի պաշտոնյաները Signal մեսենջերում բացված փակ խմբում սխալմամբ ավելացրել են լրագրողի, որի հետ կիսել են Եմենի հութիների օբյեկտներին հարվածներ հասցնելու մասին ծրագրերը։ Այս մասին հաղորդում է The Atlantic-ի լրագրողը, որն ավելացվել է խմբում։

«ԱՄՆ ազգային անվտանգության հարցերով ղեկավարներն ինձ ներառել են խմբային չաթում, որտեղ քննարկվում էին Եմենին ռազմական հարվածները։ Ես չէի կարծում, որ դա կարող է իրական լինել։ Այնուհետև ռումբերը սկսեցին ընկնել», - գրում է լրագրող Ջեֆրի Գոլդբերգը։ 

Լրագրողը նշում է, որ Եմենում հութիների օբյեկտների ռմբակոծումը տեղի է ունեցել մարտի 15-ին, ժամը 14:00-ին, սակայն ինքն այդ մասին իմացել է դրանից երկու ժամ առաջ, քանի որ պաշտպանության նախարար Փիթ Հեգսեթն այդ մասին հաղորդագրությամբ հայտնել է առավոտյան ժամը 11:44-ին։ Հաղորդագրութունում նշվել է հստակ տեղեկատվություն օգտագործվող զենքերի, թիրախների և հարվածների ժամանակագրության մասին։

Գոլդբերգը հայտնում է, որ մարտի 11-ին Signal-ում ընկերության հայտ է ստացել Մայք Ուոլցից, սակայն չի պատկերացրել, որ դա կարող է լինել հենց ինքը՝ Սպիտակ տան ազգային անվտանգության հարցերով խորհրդական Մայք Ուոլցը։ Սակայն մարտի 13-ին իրեն ներառել են Signal-ի խմբային չաթում, որում Ուոլցն իր տեղակալ Ալեքս Ուոնգին հանձնարարել է թիմ ձևավորել՝ համակարգելու ԱՄՆ-ի գործողությունները հութիների դեմ։

Գոլդբերգը նշում է, որ խմբում ներառված են եղել նաև օգտահաշիվներ, որոնք, ըստ ամենայնի, պատկանել են ԱՄՆ փոխնախագահ Ջեյ Դի Վենսին, պետքարտուղար Մարկո Ռուբիոյին, Կենտրոնական հետախուզական վարչության տնօրեն Ջոն Ռեթքլիֆին, Ազգային հետախուզության ղեկավար Թուլսի Գաբարդին, ֆինանսների նախարար Սքոթ Բեսենթին,Սպիտակ տան աշխատակազմի ղեկավար Սյուզի Ուայլսին և Ազգային անվտանգության խորհրդի այլ բարձրաստիճան պաշտոնյաների։ 

Սպիտակ տան պաշտոնյաներից մեկը հայտնել է, որ տեղի ունեցածի առնչությամբ կատարվում է հետաքննություն։ Թրամփն ինքը ասել է, որ տեղյակ չի եղել այդ ամենից։ 

Կոնգրեսի դեմոկրատական օրենսդիրները դատապարտել են տեղի ունեցածը՝ դա անվանելով ԱՄՆ ազգային անվտանգության և օրենքի խախտում, որը պետք է հետաքննվի Կոնգրեսի կողմից։ 

Պաշտպանության նախարար Հեգսեթը հերքել է խմբային չաթում պատերազմի պլանների քննարկումը։

«Ոչ ոք հաղորդագրություններ չի ուղարկել պատերազմի պլանների մասին։ Ես միայն այսքանը կարող եմ ասել այդ մասին», - Հավայիում պաշտոնական այցի ժամանակ ասել է նա լրագրողներին։

Գոլդբերգն ավելի ուշ CNN-ի հետ հարցազրույցում արձագանքել է Հեգսեթի այս մեկնաբանությանը։

«Ոչ, դա սուտ է։ Նա հաղորդագրությամբ ուղարկում էր պատերազմի ծրագրերը», - ասել է լրագրողը։

Ըստ չաթի սքրինշոթների, որոնք ներկայացրել է The Atlantic-ը, խմբի պաշտոնյաները քննարկել են, թե արդյոք ԱՄՆ-ն պետք է հարվածներ հասցնի, իսկ Վենսին ներկայացնող օգտատերը կասկածի տակ է դրել այն, որ ԱՄՆ-ի եվրոպացի դաշնակիցները, որոնք ավելի շատ են ենթարկվում տարածաշրջանում նավագնացության խափանումներին, արժանի են ԱՄՆ օգնությանը:

Առայժմ ոչինչ չի վկայում այն մասին, որ այս արտահոսքը կհանգեցնի աշխատակազմում փոփոխությունների։ Սպիտակ տան խոսնակ Քերոլայն Լևիթը Reuters-ին հայտնել է, որ նախագահ Թրամփը շարունակում է մեծապես վստահել իր ազգային անվտանգության թիմին, այդ թվում՝ խորհրդական Մայք Ուոլցին։