44-օրյա պատերազմի ժամանակ Ջրականի 5-րդ ուսումնական գումարտակի վաշտի հրամանատար Հայկազ Գրիգորյանի գործով ռազմագիտական փորձաքննություն չի նշանակվի։ Հակակոռուպցիոն դատարանը, դատավոր Վարդգես Ստեփանյանի նախագահությամբ, մերժել է Գրիգորյանի պաշտպանի միջնորդությունը։

Պաշտպան Նորայր Նորիկյանը, հիշեցնենք, միջնորդել էր նշանակել ռազմագիտական փորձաքննություն՝ պատասխանելու համար մի շարք հարցերի, առանց որոնց, ըստ նրա, հնարավոր չէ գնահատական տալ Գրիգորյանի գործողություններին։ Միջնորդության դեմ առարկել էր հանրային մեղադրող Գեւորգ Ավետիսյանը։

Դատական տեղեկատվական համակարգից «Ինֆոքոմը» տեղեկանում է՝ միաժամանակ դատարանն անփոփոխ է թողնել Գրիգորյանի տնային կալանքը՝ դրա ժամկետը երկարաձգելով եւս 2 ամսով։ Նրա նկատմամբ ընտրված են նաեւ երկրից բացակայելու արգելք եւ 3 միլիոն ՀՀ դրամ գրավ խափանման միջոցները։

Հայկազ Գրիգորյանը մեղադրվում է 44-օրյա պատերազմի ժամանակ իշխանազանցության մեջ՝ այն բանի համար, որ նա զբաղեցրած դիրքերի պաշտպանությունն առկա ուժերով ու միջոցներով շարունակելու, ինչպես նաև ենթակա անձնակազմի բարոյահոգեբանական վիճակը բարձրացնելու փոխարեն, իր եւ ենթակա ստորաբաժանման կյանքն ու առողջությունը չվտանգելու անձնական շահագրգռվածությունից ու խմբային շահից ելնելով, չի կատարել իր ծառայողական պարտականությունները։ Մասնավորապես, ըստ մեղադրական եզրակացության, ավագ պետի կողմից նահանջ կատարելու հրաման կամ թույլտվություն չունենալու, անգամ նման արգելքի պայմաններում 13-րդ վաշտի անձնակազմին տվել է «նահանջ» հրաման՝ չսահմանելով նաև նահանջի ուղղություն և նոր բնագիծ, որպիսի պայմաններում վաշտը Կանոնադրությամբ չսահմանված զորաշարժ է կատարել դեպի խոր թիկունք և անզգուշությամբ առաջացրել մարտական առաջադրանքի խափանում և այլ ծանր հետևանքներ։

Գրիգորյանը, սակայն, այս մեղադրանքը չի ընդունել, պնդել է՝ ինքը չի փախել, այլ ինչքան կարողացել է, մնացել է տեղում, եւ երբ զգացել է, որ այլեւս հնարավոր չէ դիմակայել, փրկել է իր անձնակազմի կյանքը։

Նիստի ընթացքում հանրային մեղադրող Գեւորգ Ավետիսյանը միջնորդել է 3 ամսով երկարաձգել մեղադրյալ Հայկազ Գրիգորյանի նկատմամբ որպես խափանման միջոց կիրառված տնային կալանքի ժամկետը՝ նշելով, որ խափանման միջոցի իրավաչափության պայմանների էական փոփոխություն չի կատարվել, մասնավորապես, քրեական գործով ապացույցների հետազոտման ավարտ չի ազդադարվել: Ընդհակառակը՝ հետազոտման ենթակա ապացույցների ծավալը լրացվել է, և շարունակում է բարձր լինել մեղադրյալ Հայկազ Գրիգորյանի կողմից ապացուցման գործընթացին ապօրինի միջամտելու եղանակով գործի քննությանը խոչընդոտելու բարձր հավանականությունը, որը քննության ներկա փուլում կարող է չեզոքացվել տնային կալանք խափանման միջոցի շարունակական կիրառմամբ։

Մեղադրողի միջնորդության դեմ առարկել է մեղադրյալ Հայկազ Գրիգորյանի պաշտպան Նորիկ Նորիկյանը՝ նշելով, որ տեղի է ունեցել իր պաշտպանյալի նկատմամբ կիրառված խափանման միջոցի պայմանների էական փոփոխություն։ Մասնավորապես, քրեական գործով հիմնական դատալսումների ընթացքում հետազոտվել են ապացույցները, այդ թվում՝ հարցաքննվել են վկաները: Անդրադառնալով քրեական գործով հետազոտման ենթակա ապացույցների ծավալը լրացված լինելուն՝ Նորիկյանը հայտնեց, որ նշված խումբ ապացույցներն իրենց բնույթով այնպիսին չեն, որ մեղադրյալ Հայկազ Գրիգորյանը դրանց վրա որևէ ազդեցություն գործադրելու հնարավորություն ունենար: Պաշտպանի գնահատմամբ՝ մեղադրյալ Հայկազ Գրիգորյանի պատշաճ վարքագիծը քննության ներկա փուլում կարող է ապահովվել նաև վերջինիս նկատմամբ արդեն իսկ կիրառված այլընտրանքային խափանման միջոցների՝ գրավի և բացակայելու արգելքի միջոցով: Միևնույն ժամանակ դրանք անբավարար դիտարկելու դեպքում պաշտպան Նորիկյանը միջնորդել է համակցությամբ կիրառել նաև վարչական հսկողությունը։

Իր որոշմամբ դատարանն արձանագրել է, որ քննության ներկա փուլում դեռևս առկա է Հայկազ Գրիգորյանի կողմից ապացուցման գործընթացին ապօրինի միջամտելու եղանակով գործի քննությանը խոչընդոտելու հավանականությունը․ «Մասնավորապես, Դատարանը փաստում է, որ ապացույցների հետազոտման ավարտ չի ազդարարվել, և վարույթի մասնակիցները քննության սույն փուլում դեռևս կարող են հանդես գալ հետազոտման ենթակա ապացույցների ծավալը լրացնելու, այդ թվում՝ արդեն իսկ հարցաքննված անձանց լրացուցիչ հարցաքննելու միջնորդություններով: Ավելին՝ պաշտպանության կողմը հայտարարել է նման միջնորդություններով հանդես գալու մտադրության մասին»:

Հայկազ Գրիգորյանին վերագրվում է զինվորական ծառայության սահմանված կարգի դեմ ուղղված մեկ դրվագ առանձնապես ծանր ենթադրյալ հանցանքի կատարում, որի համար որպես պատիժ նախատեսված է ազատազրկումը՝ 6-12 տարի ժամկետով։

Միլենա Խաչիկյան