Կարգալույծ հռչակված Արման Սարոյանը (նախկինում` Գևորգ եպիսկոպոս) լիազորված չէ և չի կարող ներկայացնել Հայոց եկեղեցին ո՛չ կանոնական, ո՛չ իրավական և ո՛չ էլ բարոյական տեսանկյունից։ Այս մասին այսօր հայտարարություն է տարածել Մայր աթոռ սուրբ Էջմիածինը` անդրադառնալով ՀՀ վարչապետ Նիկոլ Փաշինյանի` 2026 թ. մարտի 27-ի որոշմանը։
Ըստ այդ որոշման` Արման Սարոյանը նշանակվել է «Ներման հարցերի քննարկման խորհրդակցական հանձնաժողովի» անդամ՝ որպես Հայաստանյայց առաքելական սուրբ եկեղեցու ներկայացուցիչ։
«Սույն նշանակումը, որը կատարված է առանց Հայ առաքելական եկեղեցու համաձայնության, անընդունելի է ու անօրինական, ինչպես նաև խախտում է ՀՀ օրենսդրությունը։ Պետական կամ որևէ այլ կառույցում Հայաստանյայց առաքելական սուրբ եկեղեցու ներկայացուցիչ կարող է նշանակվել միայն Մայր աթոռ սուրբ Էջմիածնի և Ամենայն հայոց կաթողիկոսի օրհնությամբ ու արտոնությամբ»,– ասված է Մայր աթոռի հայտարարության մեջ։
Մայր աթոռից ընդգծում են, որ վարչապետի այս քայլը հերթական ոտնձգություն է Հայոց եկեղեցու ինքնավարության և Ամենայն հայոց կաթողիկոսի կանոնական իրավասությունների նկատմամբ։
Սուրբ Էջմիածնից կոչ են անում պաշտոնական փաստաթղթից՝ ՀՀ վարչապետի որոշումից, վերացնել այդ տեղեկությունը։
