Հունիսի 7-ին ՆԳՆ-ում ստացվել է ահազանգ, որ Գյումրիի մի ընտրատեղամասի դիմաց քաղաքական ուժերից մեկի շտաբի ներկայացուցիչները ընտրակաշառք են բաժանում։ Այս մասին հայտնում են ՆԳՆ ոստիկանությունից։
«ՆԳՆ ոստիկանության օպերատիվ խմբերն անմիջապես մեկնել են նշված հասցե և ընտրակաշառք տալու կասկածանքով ձերբակալել և Քրեական ոստիկանության Շիրակի մարզային վարչություն են տեղափոխել երեք անձի։ Հայտնաբերվել են ընտրողների ցուցակներ։ Հանգամանքները պարզվում են»,- նշվում է տարածված հաղորդագրությունում։
Ավելի վաղ՝ «Ուժեղ Հայաստան» կուսակցության խոսնակը հայտնել էր, որ դիմակավորված անձինք Գյումրիում շրջափակել են «Ուժեղ Հայաստանի» գրասենյակը։
Ավելի ուշ «Առավոտ»-ը հայտնել է, որ Ոստիկանները վերադարձել են՝ նշելով, որ հսկողություն պիտի իրականացնեն դեպքի վայրում։ Նրանք ներս չեն թողել փաստաբան Արտուշ Հակոբյանին, որը հայտարարել է նման իրավունք չունեն, դեպքի վայրի հսկողություն կարող են իրականացնել տնից դուրս։ Փաստաբանն ահազանգել է ՄԻՊ։
«Ինֆոքոմը» Քննչական կոմիտեից եւ Հակակոռուպցիոն կոմիտեից փորձել էր դեպքի վերաբերյալ մանրամասներ ճշտել, սակայն պատասխան էր ստացել, որ նկարագրված դեպքի հետ կոմիտեներն առնչություն չունեն։
