azatutyun.am Ռուսաստանում անցած գիշեր ուկրաինական անօդաչուների հարձակումների հետևանքով հրդեհներ են բռնկվել Wildberries առցանց առևտրի ընկերության պահեստներում։ Հարվածների մասին տեղեկություններ կան Լենինգրադի և Տվերի մարզերից, ինչպես նաև Ղրիմից։
Լենինգրադի մարզի Նովոսարատովկա գյուղում այրվել է Wildberries-ի խոշոր պահեստներից մեկը։ Մարզպետ Ալեքսանդր Դրոզդենկոյի խոսքով՝ երեք մարդ է տուժել, նրանց բժշկական օգնություն է ցուցաբերվում։
Ընկերությունը հայտնել է, որ Սանկտ Պետերբուրգում գտնվող երկու լոգիստիկ համալիրների աշխատանքը ժամանակավորապես դադարեցվել է։
Ռուսական տելեգրամյան ալիքները գրել են նաև Տվերի և Սիմֆերոպոլի Wildberries-ի կենտրոններին հասցված հարվածների մասին։ Սիմֆերոպոլում աշխատակիցներին տարհանել են։
Ղրիմի Սուդակ քաղաքում, ըստ դեռևս չհաստատված տեղեկությունների, հարված է հասցվել նաև էլեկտրական ենթակայանի։ Դրանից հետո քաղաքում հոսանքազրկում է եղել, իսկ որոշ հատվածներում խափանվել է նաև ջրամատակարարումը։
