ՀՀ կրթության, գիտության, մշակույթի և սպորտի նախարարության գրադարաններում ավարտին է մոտենում 5-14 տարեկան երեխանների և պատանիների համար նախատեսված «Ամառային դպրոց-ճամբար» ծրագիրը: Այս մասին տեղեկացնում են ԿԳՄՍՆ-ից:
Գրադարաններում կազմակերպվել են տարաբնույթ կրթական, մշակութային ծրագրեր, ստեղծագործական և ճանաչողական միջոցառումներ: Իրականացվել են արհեստագործական, մեդիագրագիտության, օտար լեզուների դասընթացներ, ընթերցանության, ինտերակտիվ և ստեղծագործական մրցույթներ, թեմատիկ զրույցներ և գրքերի քննարկումներ, ֆիլմերի դիտումներ, տիկնիկային ներկայացումներ, թատերախաղեր, էքսկուրսիաներ պատմամշակութային հուշարձաններ և այցելություն թանգարաններ:
«Ամառային դպրոց» ծրագրի շրջանակում Հայաստանի ազգային գրադարանի Գրատպության թանգարանը հյուրընկալել է 10 խումբ՝ 194 երեխա։
Այցերի ընթացքում երեխաները ծանոթացել են հայ գրատպության պատմությանը, գրքի ստեղծման և տպագրության գործընթացին՝ թանգարանային միջավայրում ստանալով նոր գիտելիքներ և տպավորություններ։ Երեխաները մասնակցել են նաև տարաբնույթ կրթական ծրագրերի և ստեղծագործական աշխատարանների։
