Օգոստոսի 14-ին՝ ժամը 11․45-ին, ՆԳՆ 112 օպերատիվ կառավարման կենտրոն ահազանգ է ստացվել գողության վերաբերյալ․ մայրաքաղաքի «Վերնիսաժ» բացօթյա տոնավաճառի պահեստից տարել էին զարդեղենով ճամպրուկ։ Այս մասին տեղեկացնում են ՆԳՆ ոստիկանությունից։
Քրեական ոստիկանության Երևան քաղաքի վարչության սեփականության դեմ ուղղված հանցագործությունների դեմ պայքարի բաժնի ծառայողները շտապ մեկնել են դեպքի վայր։
«Պարզվեց, որ ժամը 9․35-ից 9․45-ն ընկած ժամանակահատվածում պահեստից գողացել էին 50 հազար դոլար արժողության արծաթե զարդեր։
Կենտրոն և Նորք-Մարաշ վարչական շրջանների քննչական բաժնում նախաձեռնվեց քրեական վարույթ։
Ձեռնարկված օպերատիվ-հետախուզական միջոցառումների արդյունքում Քրեական ոստիկանները պարզեցին, որ գողությունը կատարել է մայրաքաղաքի Ներքին Չարբախի 43-ամյա բնակիչը, որն էլ, ահազանգից ժամեր անց՝ ժամը 17․10-ին, հայտնաբերվեց իր տան մոտ, ձերբակալվեց և գողացված ճամպրուկով հանդերձ տեղափոխվեց վարչություն։
Նախաքննությունը շարունակվում է»,- նշված է ոստիկանության հաղորդագրությունում։
