azatutyun.am Իրանի դեմ ԱՄՆ նոր պատժամիջոցների նպատակն է «ստեղծել այնպիսի պայմաններ, որոնց պարագայում նրանք պատրաստ կլինեն նստել բանակցությունների սեղանի շուրջ», CNBC-ին տված հարցազրույցում հայտարարել է ԱՄՆ ֆինանսների նախարարը:
Մինչ այդ էլ լրագրողների հետ զրույցում Սքոթ Բեսենթն ասել է, որ Իրանը լուրջ է վերաբերվում ԱՄՆ պատժամիջոցներին և այժմ ագրեսիվ կերպով է պատասխանում, քանի որ տնտեսական կորուստներ է կրում դրանց հետևանքով։
«Կարծում եմ՝ նրանք ռազմական միջոցներ են ձեռնարկում, քանզի տնտեսական կորուստներ են կրում», – լրագրողներին նա ասել է Հյուսիսային Կարոլինայում G20-ի ֆինանսների նախարարների և կենտրոնական բանկերի կառավարիչների հանդիպման ժամանակ։
ԱՄՆ-ն անցած շաբաթվա սկզբին հայտարարեց, որ «տնտեսական նոր գրոհ» է սկսում Իրանի դեմ: Երեկ գիշերն էլ մոտ մեկ ամիս տևած հրադադարից հետո ԱՄՆ-ն և Իրանը հարվածներ են փոխանակել:
