Արարատ Միրզոյան

ՀՀ արտաքին գործերի նախարար։ Այս պաշտոնին նա նշանակվել է 2021թ․ օգոստոսի 19-ին։

7-րդ գումարման Ազգային ժողովի նախագահն է։ «Քաղաքացիական պայմանագիր» կուսակցության վարչության անդամ։ Ծնվել է 1979թ․ նոյեմբերի 23-ին։ Մասնագիտությամբ պատմաբան է եւ պետական կառավարման, տեղական ինքնակառավարման մասնագետ։

2003-2005 թվականներին աշխատել է ՀՀ ԳԱԱ Հայոց ցեղասպանության թանգարան-ինստիտուտում՝ որպես կրտսեր գիտաշխատող: 2005-2007 թվականներին աշխատել է Հայաստանի ազգային արխիվում՝ որպես հասարակական-քաղաքական փաստաթղթերի բաժնի գլխավոր արխիվագետ։ 2007-2010 թվականներին աշխատել է «Էյչ-Էս-Բի-ՍԻ Բանկ Հայաստան» ՓԲԸ-ում: 2011-2012 թվականներին որպես վերլուծաբան՝ աշխատել է «Ռեգնում» միջազգային լրատվական գործակալությունում: 2012-2013 թվականներին աշխատել է Ընտրական համակարգերի միջազգային հիմնադրամում (IFES)՝ որպես ընտրողների իրազեկման ծրագրի համակարգող: 2012 թվականի հոկտեմբերից 2013 թվականի փետրվարն ընկած ժամանակահատվածում դասավանդել է ԵՊՀ-ում: 2013-2015 թվականներին եղել է «Հայաստանի զարգացման նախաձեռնություններ» (IDEA) հիմնադրամի «Ավրորա մրցանակ եւ 100 կյանք» նախաձեռնության հետազոտական խմբի ղեկավարը։ 2014-2017 թվականներին աշխատել է որպես Բազմակուսակցական ժողովրդավարության նիդեռլանդական ինստիտուտի (NIMD) քաղաքական կուսակցությունների եւ ռազմավարական պլանավորման փորձագետ։

Արարատ Միրզոյանը «Քաղաքացիական պայմանագիր» կուսակցության հիմնադիր անդամ է: 2016 թվականից հանդիսանում է «Քաղաքացիական պայմանագիր» կուսակցության վարչության անդամ: 2017 թվականի ապրիլի 2-ին «Ելք» կուսակցությունների դաշինքի թիվ 3 ընտրատարածքի տարածքային ընտրական ցուցակով ընտրվել է ՀՀ 6-րդ գումարման Ազգային ժողովի պատգամավոր: 2018 թվականին եղել է «Իմ քայլը» շարժումը նախաձեռնող խմբի անդամ: 2018 թվականի մայիսի 11-ին նշանակվել է ՀՀ առաջին փոխվարչապետ: 2018 թվականի դեկտեմբերի 9-ին կայացած արտահերթ խորհրդարանական ընտրություններում Երեւան քաղաքի Մալաթիա-Սեբաստիա եւ Շենգավիթ վարչական շրջաններն ընդգրկող թիվ 3 ընտրատարածքում լինելով «Իմ քայլը» դաշինքի ռեյտինգային թեկնածուներից մեկը՝ ստացել է 25 550 ձայն: 2019 թվականի հունվարի 10-ին ստացել է պատգամավորական մանդատը։

2019 թվականի հունվարի 14-ին տեղի ունեցած ՀՀ 7-րդ գումարման Ազգային ժողովի առաջին նիստի ժամանակ ընտրվել է ԱԺ նախագահ՝ 131 կողմ ձայնով:

Մենք դեմ ենք հակամարտությունները ռազմական ճանապարհով լուծելու փորձերին․ Արարատ Միրզոյանի ելույթը Մոսկվայում

ՀՀ ԱԺ նախագահ Արարատ Միրզոյանը ելույթ է ունեցել Մոսկվայում` «Պառլամենտարիզմի զարգացում» երկրորդ միջազգային համաժողովի բացմանը: Ելույթում նա, մասնավորապես, ասել է.«Հարգելի Վյաչեսլավ Վիկտորի, հարգելի պարոն Տոլստոյ, պարոն Լավրով,հարգելի գործընկերներ, տիկնայք և պարոնայք,նախ և առաջ թույլ տվեք շնորհակալություն հայտնել Ռուսաստանի Դաշնության Պետական դումայի նախագահ Վյաչեսլավ Վոլոդինին՝ համաժողովի աշխատանքներին մասնակցելու հրավերի համար, Կազմկոմիտեի նախագահ պարոն Տոլստոյին՝ ջերմ ընդունելության և միջոցառման հրաշալի կազմակերպման համար:Համոզված եմ, որ նման հեղինակավոր միջազգային համաժողովում մեզ սպասվում է խորհրդարանական համագործակցության առանցքային հարցերի շուրջ մտքերի կառուցողական փոխանակում: Պառլամենտարիզմի ինստիտուտն առանձնահատուկ դեր է խաղում պետական կառավարման համակարգում: Հենց խորհրդարանականներն իրավասություն ունեն ներկայացնելու քաղաքացիների շահերը, պաշտպանելու մարդու իրավունքները:Մեր փոփոխվող աշխարհում, բացի այդ դասական խնդիրներից, մեր առջև կանգնած են մարտահրավերներ, որոնք մենք՝ խորհրդարանականներս, կարող ենք լուծել մեր ռազմավարական գործընկերների և բարեկամների հետ միասին: Ուրախ եմ, որ այս համաժողովի շրջանակում քննարկվելու են այնպիսի հարցեր, ինչպիսիք են խորհրդարանների դերը կայուն խաղաղության և կայունության հասնելու գործում, պայքարը աղքատության և անհավասարության, կեղծ տեղեկատվության դեմ և այլն:Ժամանակակից աշխարհում պառլամենտարիզմի աճող դերը հատկապես վառ արտահայտվում է միջազգային հարաբերությունների բնագավառում, իշխանության և հասարակության միջև կայուն երկխոսություն հաստատելու ոլորտում: Անհնար է չհիշատակել պետական մարմիններում հաշվետվողականության ապահովման կարևորագույն մեխանիզմի մասին, ինչպիսին է խորհրդարանական մոնիթորինգը և վերահսկողությունը: Սակայն, թույլ տվեք հակիրճ անդրադառնալ միջխորհրդարանական դիվանագիտության նշված սկզբունքներից առաջինին:Միջազգային հարաբերությունների ժամանակակից համակարգում ակնհայտ է խորհրդարանական դիվանագիտության դերը: Աշխարհի երկրները միմյանց հետ սերտորեն կապված են բարդ, փոխկապակցված հարաբերություններով, որոնց արդյունքում դրանցից մեկում տեղի ունեցած որևէ իրադարձություն կարող է ուղղակիորեն կամ անուղղակիորեն ազդել այլ երկրների վրա: Ընդհանուր առմամբ, միջխորհրդարանական հաղորդակցման մեխանիզմներն այժմ ավելի քան երբևէ պահանջված են այնպիսի մարտահրավերների դեմ արդյունավետ հակազդելու համար, ինչպիսիք են ահաբեկչությունը, ծայրահեղականությունը, անհանդուրժողականությունը, անօրինական միգրացիան և կլիմայի փոփոխությունները:Միջխորհրդարանական համագործակցության շրջանակում միջազգային և տարածաշրջանային անվտանգության ամրապնդման նպատակով մեր ջանքերը պետք է ուղղված լինեն անվտանգության մարտահրավերներին և սպառնալիքներին հակազդող օրենսդրության ձևավորմանը, խորհրդարանական համագործակցության ակտիվացմանը, տարածաշրջանային խորհրդարանական կառույցների ամրապնդմանը և այլ միջազգային կազմակերպությունների հետ փոխգործակցության ընդլայնմանը:Այս համատեքստում կցանկանայի հատկապես ընդգծել Միջխորհրդարանական միության՝ հնագույն և ամենամեծ միջազգային հարթակի դերը, որի աշխատանքը հիմնված է իրավահավասար, բազմաճյուղ երկխոսության վրա: Միջազգային խորհրդարանական կազմակերպություններն ընդհանուր առմամբ միասնական օրակարգի առաջխաղացման և համատեղ որոշումների մշակման արդյունավետ հարթակներից մեկն են:Օգտագործելով այս հնարավորությունը՝ բոլոր հայ խորհրդարանականների անունից ուրախությամբ ուզում եմ ընդգծել այն փաստը, որ ռուսական պատվիրակությունը վերսկսել է իր աշխատանքը Եվրախորհրդի խորհրդարանական վեհաժողովում: Վստահ եմ, որ մեր պատվիրակությունների արդյունավետ և լավ համակարգված աշխատանքը կտա իր պտուղները: Մենք դեմ ենք հակամարտությունները ռազմական ճանապարհով լուծելու փորձերին և ողջունում ենք այն նախաձեռնությունները, որոնք նպատակաուղղված են կայուն խաղաղության հաստատմանը: Այս կապակցությամբ ընդգծեմ, որ մենք շարունակում ենք հանդես գալ Լեռնային Ղարաբաղի հակամարտության բացառապես խաղաղ կարգավորման օգտին` ԵԱՀԿ Մինսկի խմբի համանախագահ երկրների միջնորդական ջանքերի պարագայում` հիմնված միջազգային իրավունքի սկզբունքների և նորմերի, ՄԱԿ-ի կանոնադրության վրա: Խնդրի կարգավորումը պետք է հիմնված լինի Արցախի ժողովրդի անվտանգ և ազատ ապրելու անվիճելի իրավունքի հարգման վրա:Ցավոք, ռազմատենչ հռետորությունը և ռազմական գործողությունները վերսկսելու վտանգը խարխլում են նաև տարածաշրջանի անվտանգության և կայունության հիմքերը, ինչը հակասում է խաղաղ կարգավորման գործընթացին՝ դարձնելով ժողովուրդների խաղաղ գոյակցության հեռանկարներն ավելի դժվար հասանելի: Եվ այստեղ մենք կոչված ենք առաջատար դեր կատարել միջխորհրդարանական դիվանագիտության ոլորտում` խոսելով քաղաքացիների անունից և նրանց շահերի մասին:Համաժողովի հարգելի մասնակիցներ, կցանկանայի ևս մեկ անգամ արձանագրել, որ ամուր խաղաղության, անվտանգության և աշխարհի կայուն զարգացման հիմքը կարող է լինել միայն բաց և կառուցողական երկխոսությունը: Անհրաժեշտ են համատեղ ջանքեր միջպետական երկխոսության, փոխհամաձայնության և փոխզիջման մշակույթների համար: Հայաստանի Ազգային ժողովի պատգամավորները բաց են իրենց գործընկերների հետ փորձի փոխանակման թե՛ երկկողմ, թե՛ բազմակողմ ձևաչափերով:Շնորհակալություն ուշադրության համար»,-նշել է խորհրդարանի ղեկավարը:

12:54 - 01 հուլիսի, 2019

Արարատ Միրզոյանը ապատեղեկատվություն պարունակող հայտարարություն է արել Ազգային ժողովում |iravaban.net|

iravaban.net։ Ազգային ժողովի «Լուսավոր Հայաստան» խմբակցության անդամ Արման Բաբաջանյանը այսօր՝ հունիսի 25-ին, «Կոռուպցիայի կանխարգելման հանձնաժողովի մասին» օրենքում փոփոխություններ և լրացումներ կատարելու մասին» ՀՀ օրենքի նախագծի քվերակությունից առաջ ընթերցեց ՔՀԿ-ների հակակոռուպցիոն կոալիցիայի հայտարարությունը, որով կոալիցիան դատապարտել է նախագծով առաջարկվող փոփոխությունները: Ազգային ժողովի նախագահ Արարատ Միրզոյանը այսպես էր արձագանքել Արման Բաբաջանյանի կողմից ընթերցված հայտարարությանը. «Ինչ վերաբերում է Ձեր նշած հայտարարությանը, Ձեր նշած կազմակերպությանը, բնական է, որովհետև գործող չփոխվող մեխանիզմով պետք է ձևավորվի մրցութային հանձնաժողով և այդտեղ թեկնածու առաջադրելու իրավունք ունի նաև այդ ՀԿ-ն և այդտեղ այդ ՀԿ-ի նախագահի դուստրն է ներկայացված: Ամեն ինչ շատ կենցաղային է երբեմն»,-նշեց Արարատ Միրզոյանը: Նշենք սակայն, որ ԱԺ նախագահը մի քանի կոպիտ սխալներ է թույլ տալիս այս հայտարարությունը անելով: 1. Որևէ ՀԿ իրավունք չունի Կոռուպցիայի կանխարգելման հանձնաժողովի թեկնածու առաջադրել «Կոռուպցիայի կանխարգելման հանձնաժողովի մասին» օրենքի 11-րդ հոդվածի համաձայն՝ հանձնաժողովի անդամի պաշտոնում թեկնածուների ընտրության համար Ազգային ժողովի նախագահը ձևավորում է մրցութային խորհուրդ: Խորհուրդը պետք է կազմված լինի Սահմանադրական դատարանի նախագահի, Մարդու իրավունքների պաշտպանի, Ազգային ժողովի ընդդիմադիր խմբակցությունների, Հանրային խորհրդի և Փաստաբանների պալատի կողմից նշանակված մեկական անդամներից: Ազգային ժողովի ընդդիմադիր խմբակցությունների կողմից խորհրդի անդամը նշանակվում է համախոհությամբ: Խորհրդի կազմում ընդգրկվելու համար Ազգային ժողովի նախագահը դիմում է Սահմանադրական դատարանի նախագահին, Մարդու իրավունքների պաշտպանին, Ազգային ժողովի ընդդիմադիր խմբակցություններին, Հանրային խորհրդին և Փաստաբանների պալատին՝ յուրաքանչյուրի կողմից մեկական թեկնածու առաջադրելու համար։ Հանրային խորհուրդը թեկնածու է առաջադրում քաղաքացիական հասարակության ներկայացուցիչներից։ Հստակ երևում է, որ զեկուցողը «այդ ՀԿ» ասելով նկատի ուներ Հայաստանի ՔՀԿ-ների հակակոռուպցիոն կոալիցիայի կառավարման խորհրդի անդամ «Իրավաբանների հայկական ասոցիացիա» ՀԿ-ին, որը, ըստ վերը նշված օրենքի, մրցութային խորհրդում թեկնածու առաջադրել չէր կարող, քանի որ օրենքով նման իրավունք ասոցիացիային վերապահված չէ: Փաստ 1. ԱԺ նախագահը դիմել է պարզ մանիպուլյացիայի և ապատեղեկատվություն է ներկայացրել ԱԺ բարձր ամբիոնից, քանի որ Կոռուպցիայի կանխարգելման հանձնաժողովի անդամի պաշտոնում թեկնածուների ընտրության համար ձևավորված մրցութային խորհրդի անդամի թեկնածու առաջադրելու իրավունք «Իրավաբանների հայկական ասոցիացիա» ՀԿ-ն չի ունեցել: 2.«Այդ ՀԿ-ի նախագահի դուստրը» մրցութային խորհրդի անդամի թեկնածու է առաջադրվել Փաստաբանների պալատի կողմից Հայաստանի ՔՀԿ-ների հակակոռուպցիոն կոալիցիայի կառավարման խորհրդի անդամ «Իրավաբանների հայկական ասոցիացիա» ՀԿ-ի նախագահի դուստրը Փաստաբանների պալատի կողմից մրցութային խորհրդի անդամի թեկնածու առաջադրված, Փաստաբանների պալատի անդամ, փաստաբան Մարիամ Զադոյանն է: Նշենք, որ նշված 5 կառույցներից, որոնք կոռուպցիայի կանխարգելման հանձնաժողովի անդամի պաշտոնում թեկնածուների ընտրության նպատակով մրցութային խորհրդի կազմում խորհրդի անդամի թեկնածու առաջադրելու իրավունք ունեին, Փաստաբանների պալատը միակն էր, որը ընտրությունը կատարել է մրցութային սկզբունքով: Փաստաբանների պալատը 2018 թվականի մայիսի 21-ին հայտարարել է մրցույթի անցկացման մասին: Մրցույթին մասնակցելու հայտ ներկայացրած 8 թեկնածուից հարցազրույցին ներկայացել են 6-ը: Հարցազրույցն իրականացնող աշխատանքային խումբն, (Էմիլ Ամիրխանյան, Մանե Կարապետյան և Ծովինար Խաչատրյան) ամփոփելով հարցազրույցի արդյունքները, Մրցութային խորհրդի անդամի թեկնածուի հավակնորդ է ընտրել փաստաբան Մարիամ Զադոյանին և ներկայացրել ՀՀ փաստաբանների պալատի նախագահի հաստատմանը: Հայաստանի Հանրապետության փաստաբանների պալատի նախագահ Արա Զոհրաբյանի 29.05.2018թ. թիվ 224-Ա որոշմամբ փաստաբան Մարիամ Զադոյանը (արտոնագիր թիվ 1901) նշանակվել է Կոռուպցիայի կանխարգելման հանձնաժողովի անդամի պաշտոնում թեկնածուների ընտրության համար ձևավորված մրցութային խորհրդի անդամ: Փաստ 2. ԱԺ նախագահը դիմել է պարզ մանիպուլյացիայի և ապատեղեկատվություն է ներկայացրել ԱԺ բարձր ամբիոնից, քանի որ Մարիամ Զադոյանը Կոռուպցիայի կանխարգելման հանձնաժողովի անդամի պաշտոնում թեկնածուների ընտրության համար ձևավորված մրցութային խորհրդի անդամ չի առաջադրվել «Իրավաբանների հայկական ասոցիացիա» ՀԿ-ի կողմից: 3. Ի՞նչ կապ կա ՀՀ փաստաբանների պալատի և Հայաստանի ՔՀԿ-ների հակակոռուպցիոն կոալիցիայի միջև Ի պատասխան Իրավաբան.net-ի հարցման՝ փաստաբանների պալատից հայտնում են, որ պալատի կողմից անցկացված մրցույթի թեկնածուին առաջադրվել են 2 պահանջ։ Դրանք են՝ թեկնածուն պետք է լինի փաստաբան (հարցազրույցին չի կարող մասնակցել այն փաստաբանը, որը վերջին մեկ տարվա ընթացքում ենթարկվել է կարգապահական պատասխանատվության և տույժը մարված չէ), թեկնածուն պետք է ունենա հակակոռուպցիոն ոլորտում (պաշտպանության իրականացում կոռուպցիոն բնույթի հանցագործությունների շրջանակում, կոռուպցիային առնչվող խնդրիների գիտական ուսումնասիրություն, հակակոռուպցիոն բնույթի ծրագրերին մասնակցություն և այլն) առնվազն մեկ տարվա մասնագիտական փորձ:Նշված պահանջ-չափանիշները կազմվել են՝ ելնելով «Կոռուպցիայի կանխարգելման հանձնաժողովի մասին» ՀՀ օրենքի պահանջներից և Կոռուպցիայի կանխարգելման հանձնաժողովի պատշաճ ձևավորման և արդյունավետ գործունեության ապահովման անհրաժեշտությունից: Մասնավորապես, Պալատի թեկնածուն պետք է լիներ փաստաբան, քանի որ այդ պահանջը բխում է «Կոռուպցիայի կանխարգելման հանձնաժողովի մասին» օրենքի 11-րդ հոդվածի դրույթների իմաստից, որոնք, Պալատին մասնակից դարձնելով Կոռուպցիայի կանխարգելման հանձնաժողովի կազմավորման գործընթացին, նպատակ ունեն ապահովել փաստաբանության՝ որպես քաղաքացիական հասարակության կարևոր ինստիտուտներից մեկի ներգրավվածությունը կոռուպցիայի դեմ պայքարի գործընթացին: Միաժամանակ, հաշվի առնելով կոռուպցիայի դեմ պայքարի հանրային մեծ նշանակությունը և այդ պայքարի ինստիտուցիոնալ կարևոր բաղադրիչ հանդիսացող նշված հանձնաժողովի անդամների անհատական մասնագիտական և բարոյական որակների մեծ դերը հակակոռուպցիոն հանրային քաղաքականության մշակման և իրացման գործում, Պալատը բացառել է այն ընտրող մարմնում այն փաստաբանի մասնակցությունը, որը վերջին մեկ տարվա ընթացքում ենթարկվել է կարգապահական պատասխանատվության և տույժը մարված չէ: Պալատի կողմից թեկնածուներին առաջադրվել էր նաև հակակոռուպցիոն ոլորտում աշխատանքի առնվազն մեկ տարվա մասնագիտական փորձ: Թեկնածուների հետ կազմակերպվել է հարցազրույց, որի շրջանակներում փաստաբաններից յուրաքանչյուրը ներկայացրել է իր փորձառությունը հակակոռուպցիոն բնագավառում։ Մրցութային աշխատախումբը գնահատել է թեկնածուների գիտելիքները, հակակոռուպցիոն ոլորտի իմացությունը, կոռուպցիայի և դրա դեմ պայքարի անձնական-հոգեբանական վերաբերմունքը և տեսլականը, ինչպես նաև վերջիններիս մասնագիտական փորձը նշված ոլորտում, որպիսի հանգամանքների պարզմանն էլ ուղղված են եղել թեկնածուներին տրվող հարցերը: ՀՀ փաստաբանների պալատը մրցութային խորհրդի թեկնածուին ընտրելիս առաջնորդվել է թեկնածուի կողմից հակակոռուպցիոն ոլորտում (պաշտպանության իրականացում կոռուպցիոն բնույթի հանցագործությունների շրջանակում, կոռուպցիային առնչվող խնդրիների գիտական ուսումնասիրություն, հակակոռուպցիոն բնույթի ծրագրերին մասնակցություն և այլն) մասնագիտական փորձ ունենալու չափանիշով։ Փաստ 3. ՀՀ փաստաբանների պալատը չի հանդիսանում Հայաստանի ՔՀԿ-ների հակակոռուպցիոն կոալիցիայի անդամ և Կոալիցիայի ու Փաստաբանների պալատի միջև, որևէ իրավական կապ գոյություն չունի:

16:54 - 25 հունիսի, 2019