Հրապարակում ենք փաստերով վերլուծություն Գեղարքունիքի մարզի գյուղերի անմիջական հարևանությամբ ադրբեջանական զինված ուժերի անօրինական տեղակայումներից և անօրինական ամրացման աշխատանքներից մեկի վերաբերյալ: Նրանց հանցավոր արարքների ու ներկայության պատճառով ՀՀ գործարար ընկերությունը չի կարողանում օգտվել իրեն օրինական հատկացված 200 հա տարածքից, ապօրինաբար զրկվել է գործարարությամբ զբաղվելու իրավունքից, իսկ կրած վնասը, իր հաշվարկով, 5 միլիոն դոլար է: Քաղաքացիական բնակչությունը հայտնվել է ադրբեջանական զինված ծառայողների թիրախում. վտանգված, պարբերական գնդակոծություններով խաթարված է մարդկանց խաղաղ կյանքն ու անվտանգությունը։ [ՀՀ ՄԻՊ]

«Ես վստահ եմ` քարտեզները, եթե ոչ 100, ապա 99%-ով համընկնում են Վարչատարածքային բաժանման մասին օրենքով նկարագրված Հայաստանի Հանրապետությանը: Էդ օրենքով է նշված, որ Շուռնուխի վարչատարածքային սահմանը համընկնում է ՀՀ տարածքի եզրի հետ։ Անհրաժեշտ են այդ քարտեզների շուրջ քննարկումներ, և այնպես չէ, որ այդ քարտեզների օրինակից ՀՀ-ում չկա: Պարզապես, ՌԴ-ն որպես միջնորդ է հանդես գալիս այդ հարցում: [Նիկոլ Փաշինյանը՝ անդրադառնալով ՌԴ նախագահի արված հայտարարությանը, ըստ որի՝ Հայաստանն ու Ադրբեջանը կարող են լուծել սահմանային խնդիրները խորհրդային շրջանի քարտեզների հիման վրա] |hetq.am|

Այն, որ պատերազմի շեմին ենք, կարծում եմ, որ ՀՀ ղեկավարներին զեկուցվել է շատ պարբերաբար, օրինակ՝ մասնավորապես 2011-ի Կազանյան փաստաթղթի չստորագրումից հետո: 2018-ին իմ վարչապետ դառնալուց հետո էլ այդպիսի զեկույցները եղել են պարբերաբար, որ տեղեկություններ կան, որ Ադրբեջանը նախապատրաստվում է պատերազմի: Այս ամբիոնից Սերժ Սարգսյանն էլ ասել է, որ այդ պահից սկսած ցանկացած պահի պետք է սպասել պատերազմի։ [Նիկոլ Փաշինյան] |armenpress.am|

ԱԳ նախարար Արարատ Միրզոյանը ԱԺ-ում կառավարության հետ հարցուպատասխանի ընթացքում վերահաստատեց, որ Հայաստանի վարչապետի և Ադրբեջանի նախագահի միջև որևէ հանդիպում նախատեսված չէ։ Նա հավելեց, որ այս պահին, եւ, առհասարակ, քննարկվում են տարբեր ֆորմատներով տարբեր հանդիպումների առաջարկներ, եւ նման հնարավոր հանդիպումների արդյունքում կլինի համաձայնեցված որեւէ տեքստի հրապարակում։

ԱՄՆ-ն աջակցում է քայլերին, որոնք նպաստում են տարածաշրջանի երեք երկրների տնտեսական զարգացմանը, հայտարարել է Ադրբեջանում ԱՄՆ դեսպան Լի Լիցենբերգերը՝ մեկնաբանելով «զանգեզուրյան միջանցքի բացման» հարցը։ «Արագ տեմպերով վերականգնողական աշխատանքների իրականացումը շատ դրական է։ Խոսելով տարածաշրջանային տրանսպորտային միջանցքներից, տարածաշրջանային համագործակցության միջանցքներից` մենք ցանկանում ենք ասել, որ ԱՄՆ-ն շատ հետաքրքրված է տարածաշրջանային կապերի ստեղծման հարցով. դա կարող է լինել ցամաքային տրանսպորտ, երկաթուղային տրանսպորտ, օդային տրանսպորտ։ Վաշինգտոնը շարունակում է բանակցությունները կողմերի հետ, որպեսզի իր ներդրումն ունենա զարգացմանն ուղղված քայլերում»։|azatutyun.am|

Փաշինյանը ԱԺ-ում կառավարության անդամների հետ հարցուպատասխանին վերահաստատեց՝ Փայլասարի հատվածում որևէ դիրքային փոփոխություն չի եղել։ «ԱԱԾ սահմանապահ զորքերի հրամանատարը երեկ այս դահլիճում պատգամավորներին պարզաբանում է տվել և արձանագրել է, որ որևէ դիրքային փոփոխություն տեղի չի ունեցել։ Այս հատվածում սահմանապահ զորքերը ծառայություն սկսել են իրականացնել 2020-ի դեկտեմբերից: Եվ 2020-ի դեկտեմբերին ինչ դիրքերում եղել ենք, այսօր էլ շարունակում ենք մնալ»։ |armenpress.am|

Արագածոտնի մարզպետ կնշանակվի Արագածոտնի փոխմարզպետ, «Ազատամարտիկների դաշինք» միության անդամ, «Ապարան» ջոկատի հրամանատար Ռազմիկ Պետրոսյանը։ Այս մասին հայտնել է Պետրոսյանը: Նա նշել է, որ առաջարկն այսօր է ստացել ՀՀ վարչապետ Նիկոլ Փաշինյանից և համաձայնել է նշանակվել այդ պաշտոնում։ |factor.am|

«Մենք հուսով ենք, որ Իրանը խելամիտ կգործի։ Այդ դեպքում նա Ադրբեջանի հետ ոչ մի խնդիր չի ունենա։ Ոչ մի զիջում չի արվելու․ մենք կարող ենք ցանկացած տեսակի ապրանքաշրջանառություն իրականացնել Իսրայելի հետ: Մենք Իսրայելի հետ ունենք այնպիսի կապեր, ինչպես տարբեր այլ երկրների հետ, և դրանք ապագայում ևս շարունակվելու են»,- ասել է Էրդողանը Ադրբեջանից վերադարձի ճանապարհին։ Անդրադառնալով Իրանին նա նշել է, որ այս հարցերում երկրները չպետք է և չեն կարող ազդել միմյանց որոշումների վրա: |azatutyun.am|

Այժմ էլ Ադրբեջանը, խախտելով միջազգային մարդասիրական իրավունքը և նոյեմբերի 9-ի հայտարարությամբ իր ստանձնած պարտավորությունները, շարունակում է պատանդառության մեջ պահել հայ ռազմագերիներին և քաղաքացիական անձանց, և մենք խնդրում ենք, որ Սուրբ Հայրը՝ Սրբազան Քահանայապետը, իր աղոթքներում և իր հրապարակային ուղերձներում մշտապես շարունակի հիշել հայ ռազմագերիներին և շեշտադրել նրանց անհապաղ ազատ արձակման անհրաժեշտությունը։ [ԱԳ նախարար Արարատ Միրզոյանը Սուրբ Աթոռի փոխպետքարտուղար Էդգար Պենյա Պառայի հետ հանդիպմանը] |armenpress.am|

Արագածոտնի մարզպետ Դավիթ Գևորգյանն ազատման դիմում է ներկայացրել: Տեղեկությունը հաստատեց Արագածոտնի փոխմարզպետ Տիգրան Եղիազարյանը: Հարցին՝ ինչն է եղել ազատման դիմում գրելու պատճառը, Եղիազարյանը նշեց՝ կոմպետենտ չէ այդ հարցին պատասխանելու: |armtimes.com|