Ոստիկանության Իջևանի բաժնի ծառայողները, համագործակցելով Տավուշի մարզային վարչության ու բնապահպանության և ընդերքի տեսչական մարմնի աշխատակիցների հետ, հայտնաբերել են ածուխի երեք արտադրամաս, որոնցում արտադրված փայտածուխի վերաբերյալ համապատասխան փաստաթղթերը բացակայել են։ Իջևանում գործող մի արտադրամասում հայտնաբերվել են փայտածուխի պատրաստման տարաներ, 285 պարկ փայտածուխ և մի քանի խորանարդ մետր վառելափայտ։ Մեկ այլ արտադրամասում հայտնաբերվել են փայտածուխի պատրաստման տարաներ, 110 պարկ փայտածուխ, սղոցման թափոն։ Տավուշի մարզի գյուղերից մեկի արտադրամասում էլ հայտնաբերվել են փայտածուխի պատրաստման տարաներ, 1883 պարկ փայտածուխ և վառելափայտ։ Այս դեպքում ևս համապատասխան փաստաթղթերը բացակայել են։[ՀՀ ոստիկանություն]
Դիմում եմ ներկայացրել դադարեցնելու իմ լիազորությունները որպես վարչական շրջանի ղեկավար՝ իմ գիտելիքները, ուժն ու եռանդը ծառայեցնելով մեկ այլ ազգօգուտ գործում։ Արդյունավետ աշխատանք և հաջողություններ եմ մաղթում վարչական շրջանի նոր ղեկավարին։ [Աջափնյակ վարչական շրջանի ղեկավար Գևորգ Բաբայան]
ԿԸՀ-ը տեղեկացնում է, որ 2020 թվականի փետրվարի 17-ը ներառյալ հանրաքվե անցկացնելու մասին Ազգային ժողովի որոշման նախագծին դեմ կամ ձեռնպահ քվեարկած Ազգային ժողովի պատգամավորների կողմից «ՈՉ» քարոզչության կողմ ձևավորելու վերաբերյալ դիմում չի ներկայացվել։ Նման դեպքերում, «Հանրաքվեի մասին» Հայաստանի Հանրապետության սահմանադրական օրենքի 17-րդ հոդվածի 8-րդ մասի համաձայն՝ առնվազն 50 քաղաքացիներից բաղկացած խումբը կարող է դիմել Կենտրոնական ընտրական հանձնաժողով` «ՈՉ» քարոզչության կողմ գրացվելու նպատակով:[ԿԸՀ]
ՀՀ ԶՈւ գլխավոր շտաբը hորդորում է լրատվամիջոցների ներկայացուցիչներին, քաղաքական և հասարակական գործիչներին, փորձագետներին և «վերլուծաբաններին» զերծ մնալ բանակում մահվան դեպքերը շահարկելու, դրանցից անձնական և քաղաքական դիվիդենտներ քաղելու ապակայունացնող փորձերից, հասարակությանն էլ կոչ է անում ապատեղեկատվությունից խուսափելու և մանիպուլյացիաների չենթարկվելու համար հետևել պաշտոնական լրահոսին: [ՀՀ ԶՈՒ]
ՀՔԾ-ը կարճել է Հայաստանի նախկին նախագահ Սերժ Սարգսյանի թիկնազորի նախկին պետ, Պետական պահպանության ծառայության պետի նախկին առաջին տեղակալ Վաչագան Ղազարյանի և նրա կնոջ՝ Ռուզաննա Բեգլարյանի ընդհանուր քրեական գործը, որն առնչվում էր ինչպես հարկերից խուսափելուն, այնպես էլ ապօրինի հարստացմանը։ Վաչագան Ղազարյանի փաստաբան Արմեն Հարությունյանը հայտնեց՝ ապօրինի հարստացման մասով քրեական գործը կարճվել է հանցակազմի բացակայության պատճառով։ Տարիուկես տևած քննությունից հետո իրավապահները եզրահանգել են, որ Վաչագան Ղազարյանն ապօրինի չի հարստացել։ |azatutyun.am|
ՀՔԾ քննիչն առարկություն է ներկայացրել ԱԺ նախկին նախագահ Արա Բաբլոյանի եւ աշխատակազմի ղեկավարի նախկին տեղակալ Արսեն Բաբայանի գործով հսկող դատախազի ցուցումի դեմ: Դատախազությունը գտել էր, որ Բաբլոյանին պետք է մեղադրանք առաջադրվեր ոչ թե ՍԴ լիազորություններին տիրանալու, այլ պաշտոնեական լիազորությունները չարաշահելու համար, իսկ Բաբայանին՝ ոչ թե ՍԴ լիազորություններին տիրանալուն օժանդակելու, այլ դարձյալ պաշտոնեական լիազորությունները չարաշահելու համար: ՀՔԾ քննիչի առարկությունը քննարկման փուլում է: |armtimes.com|
Նիկոլ Փաշինյանի մոտ տեղի է ունեցել խորհրդակցություն, որի ընթացքում մանրամասն անդրադարձ է կատարվել վերջին շրջանում ԶՈՒ-ում տեղի ունեցած մահվան դեպքերի հանգամանքներին և պատճառներին: Պատասխանատուները զեկուցել են հարուցված քրեական գործերի ընթացքի մասին: Վարչապետն առաջնային է համարել ԶՈՒ-ում քրեական ենթամշակույթի և կարգապահության հետ կապված առկա խնդիրների լուծումը և ընդգծել կարգապահության մակարդակի շեշտակի բարձրացման ուղղությամբ հետևողական միջոցառումների իրականացման անհրաժեշտությունը՝ պատասխանատուներին տալով համապատասխան հանձնարարականներ:
Շենգավիթ վարչական շրջանի ղեկավարը գրություն է ներկայացրել ոստիկանություն, թե հիմնավոր կասկածներ են ի հայտ եկել, որ իր աշխատակազմի ենթակայությամբ գործող 21 մանկապարտեզներից մի քանիսում վարվող փաստաթղթերում կատարվել են կեղծ գրառումներ։ Պարզվել է, որ նշված մանկապարտեզներից 5-ում սննդի մուտքի և ելքի գրանցամատյաններում անհետացող թանաքով կատարվել են կեղծ գրառումներ։ Նախաքննությունը շարունակվում է: [ՔԿ]
Թլիկ համայնքի դպրոցի տնօրենը 2015 թ․ գյուղապետի կնոջը հրամանագրել է որպես դպրոցի գիշերային պահակ, սակայն կինը աշխատանքի չի ներկայացել և մինչև այս տարվա հունվար ամիսը ստացել է 2 միլիոն 700 հազար դրամից ավելի աշխատավարձ։ Նա մի քանի անգամ՝ տարբեր ժամանակահատվածներում, բացակայել է Հայաստանից։ Հարուցվել է քրեական գործ։ [Ոստիկանության Թալինի բաժին]
Իրավապաշտպան, «Իրավական ուղի» ՀԿ ղեկավար Ռուբեն Մելիքյանի փոխանցմամբ «Ոչ»-ի քարոզչական խումբ ձևավորելու համար մի խումբ իրավաբաններ և իրավապաշտպաններ վաղը կդիմեն ԿԸՀ։ Այս պահին անհրաժեշտ փաստաթղթերը հավաքելու գործընթացում են։ |pastinfo.am|
Այսօր Մոսկվայում մեկնարկող ռուս-թուրքական բանակցությունների հերթական փուլի շեմին Բաշար Ասադին հավատարիմ ուժերը շարունակում են առաջխաղացումը Սիրիայի հյուսիսում: Կիրակի օրը սիրիական բանակը նվազագույն կորուստներով կարողացել է գրավել Հալեպի նահանգի այն բնակավայրերը, որոնք դեռ գտնվում էին զինված ընդդիմության հսկողության ներքո: Այսպիսով Սիրիայի կառավարական ուժերը վերջնական հսկողություն են սահմանել ռազմավարական նշանակություն ունեցող M5 մայրուղու նկատմամբ, որը կապում է երկրի երկու խոշորագույն քաղաքները` Հալեպը և Դամասկոսը: |azatutyun.am| |azatutyun.am|
2005թ-ի դեկտեմբերին Արմավիրում անցկացվել են «Հոկտեմբերյանի ֆերոսպլավ գործարան» ՍՊԸ-ի գործունեությունը սկսելու վերաբերյալ հանրային քննարկումներ: Այս ընկերության ներկայացված ֆերոմոլիբդենի արտադրության աշխատանքային նախագծին բնապահպանության նախարարությունը տվել է շրջակա միջավայրի վրա ազդեցության փորձաքննական դրական եզրակացություն։ Եզրակացությունը հաստատել է տխրահռչակ նախարար, հանքատեր Վարդան Այվազյանը։ 2006թ-ին ընկերությունը կառավարության որոշումով ստացել է լիցենզիա։ 2013թ-ի հոկտեմբերին «Հոկտեմբերյանի ֆերոսպլավ գործարան» ՍՊԸ-ն սնանկ է ճանաչվել։ [ՀԲՃ-ն՝ Արմավիրի օդն աղտոտող գործարանի մասին]
Ադրբեջանի ոստիկանությունը փետրվարի 16-ին բերման է ենթարկել ընդդիմադիր ուժերի 3 առաջնորդի ու 55 ակտիվիստի, որոնք եկել էին մասնակցելու «Մուսավաթ» ընդդիմադիր կուսակցության կողմից կազմակերպված բողոքի ակցիային՝ ընդդեմ մի շաբաթ առաջ երկրում կայացած խորհրդարանական ընտրությունների արդյունքների։ Բերման ենթարկվածների ցուցակում կային պատգամավորների թեկնածուներ, ինչպես նաև «Մուսավաթ»-ի նախագահ Արիֆ Հաջըլըն։ Բերման ենթարկվածների մի մասը բաց է թողվել, մնացածների գտնվելու վայրն անհայտ է։
ՀՀ քաղաքաշինության կոմիտեի նախագահ Վահագն Վերմիշյանի պաշտպան Մուշեղ Առաքելյանը Վերմիշյանին կալանավորելու մասին որոշումը բողոքարկել է։ Պաշտպանը նաև Վերմիշյանի նկատմամբ գրավ կիրառելու մասին միջնորդություն է ներկայացրել՝ գրավի չափը թողնելով դատարանի հայեցողությանը։ Ավելի վաղ դատարանը բավարարել էր Վերմիշյանին կալանավորելու մասին քննիչի միջնորդությունը։ |pastinfo.am|
Ոստիկանության պետի պաշտոնակատար Արման Սարգսյանի հրամանով ոստիկանության Վայքի բաժնի պետ Կարեն Սերոբյանն ազատվել է զբաղեցրած պաշտոնից եւ գրանցվել կադրերի ռեզերվում: Նրա փոխարեն նշանակվել է ոստիկանության Ջերմուկի բաժնի պետ Աշոտ Խաչատրյանը: Սարգսյանի հրամանով զբաղեցրած պաշտոնից ազատվել է նաեւ ոստիկանության Սպիտակի բաժնի պետ Սերգո Ավետիսյանը՝ անցնելով երկարամյա ծառայության թոշակի: Սպիտակի բաժնի պետ է նշանակվել ոստիկանության Մուշի բաժնի պետի տեղակալը: |armtimes.com|
Այսօր պաշտոնապես մեկնարկում է սահմանադրական հանրաքվեի քարոզարշավը, որը շարունակվելու է մինչև ապրիլի 3-ը։ «Այո»-ի քարոզչական կողմն ու շտաբը ձևավորվել են ՏԿԵ նախարար Սուրեն Պապիկյանի գլխավորությամբ։ ԱԺ պատգամավորների կողմից «Ոչ»-ի քարոզչության կողմ ձևավորելու ժամկետը լրանում է այսօր։ Խորհրդարանական ուժերից որևէ մեկը «Ոչ»-ի շտաբ ձևավորելու մասին չի հայտարարել։ Սահմանված ժամկետում քարոզչության կողմ չգրանցվելու դեպքում «Ոչ»-ի քարոզչության կողմ կարող է ձևավորել առնվազն 50 քաղաքացիներից բաղկացած խումբը: |shantnews.am|
58 տարեկան հասակում հանկարծամահ է եղել լուսանկարիչ Գերման Ավագյանը: Նա լուսանկարներ է ստեղծել Հայաստանի սոցիալական ներդրումների հիմնադրամի օրացույցի համար, Բաց հասարակության ինստիտուտի Վերսուս ստուդիայի հետ համատեղ ստեղծել «Արվեստը հայկական կալանավայրերում» օրացույցը, աշխատել տարբեր պարբերականների հետ: |armtimes.com|
Իմ սկզբունքային պատկերացումը հետևյալն է՝ հնարավոր չէ այս երկար տևած հակամարտությունը 1 կամ 2 քայլով լուծել, մեզ միկրոհեղափոխություննր են պետք, որ դրանք վերափոխենք մինի հեղափոխությունների, որից հետո իրոք բեկում ունենանք բանակցային գործընթացում։ Ինչու է սա միկրոհեղափոխություն, քանի որ ես Հայաստանի առաջին առաջնորդն եմ, ով ասում է, որ ցանկացած լուծում պետք է ընդունելի լինի նաև Ադրբեջանի ժողովրդի համար: Իսկ հիմա անցել է ավելի քան 1 տարի այդ հեղափոխությունից, ես ոչ միայն Հայաստանի միակ առաջնորդն եմ, այլև Հայաստանի և Ադրբեջանի առաջնորդներից միակն եմ, ով ասում է, որ ցանկացած լուծում պետք է ընդունելի լինի բոլոր կողմերի համար [Փաշինյանը` Մյունխենում Արցախի հարցով քննարկմանը] |tert.am|
Ադրբեջանը երկու անգամ համաձայնագրեր է ստորագրել Լեռնային Ղարաբաղի հետ․ առաջին անգամ 1994 թվականին, և դա հրադադարի համաձայնագիրն էր Հայաստանի, Լեռնային Ղարաբաղի և Ադրբեջանի միջև, պաշտպանության նախարարներն են ստորագրել այդ փաստաթուղթը։ Դրանից երեք ամիս անց վերահաստատել են, որ հրադադարը պահպանվելու է այնքան, մինչև կոնֆլիկտը ստանա քաղաքական լուծում։ [Փաշինյանը` Մյունխենում Արցախի հարցով քննարկմանը] |armenpress.am|
Մեզ պետք է հասկանալ՝ ինչու է ձևավորվել այսօրվա ստատուս քվոն, որովհետև երբ ԼՂ-ն փորձեց ինքնորոշման իր իրավունքից օգտվել, ռազմնական գործողություններ սկսվեցին ԼՂ հայերի դեմ, և նրանք հարկադրված եղան ինքնապաշտպանություն կազմակերպել: Նախագահ Ալիևը Շուշիի, ԼՂ մայրաքաղաք Ստեփանակերտի մասին խոսեց: Ստեփանակերտը տարիներ շարունակ Շուշիից ռմբակոծվում էր, և խաղաղ քաղաքացիները երկար ժամանակ ապրում էին ստորգետնյա կացարաններում, դա է ճշմարտությունը, հնարավոր չէ, որ անվտանգությունը որևէ մեկը զիջի, Ղարաբաղի պարագայում էլ դա անհնար է։ [Փաշինյանը` Մյունխենում Արցախի հարցով քննարկմանը]
Որպես Հայաստանի Հանրապետության վարչապետ` ես այս իրավիճակը համարում եմ ոչ միայն իմ պատասխանատվությունը՝ հանուն իմ երկրի անվտանգության, այլ նաև գիտակցում եմ իմ պատասխանատվությունը տարածաշրջանի անվտանգության համար, համաշխարհային գլոբալ անվտանգության համար, և առաջարկում եմ նախագահ Ալիևին այս իրավիճակն ընկալել որպես մեր երկուստեք անելիքը, այն է՝ ձևավորել հարատևելի խաղաղություն և կայունուն: Մեր պարտականությունն ու պարտքն է մեր ներդրումը ունենալ գլոբալ անվտանգության մեջ, և ես ձեզ հավաստիացնում եմ, որ ՀՀ-ն և ԼՂ-ն պատրաստ են դրան: [Փաշինյանը` Մյունխենում ԼՂ հարցով քննարկմանը] |armenpress.am|
Իոսիֆ Ստալինի անձնական որոշման հետևանքն է եղել, որ Արցախը հանձնվել է Ադրբեջանին։ Արցախը երբեք չի եղել անկախ Ադրբեջանի կազմում, այն միայն դրվել է Խորհրդային Ադրբեջանի տարածքի մեջ:
[Նիկոլ Փաշինյան] |shantnews.am| |shantnews.am|
Նարեկ Սամսոնյանը, գիտակցելով իր տրամադրած տեղեկատվության կեղծ լինելը, ՀՀ վարչապետի նկատմամբ կատարել է սուտ մատնություն՝ նրան վերագրելով պաշտոնեական լիազորությունները չարաշահելու՝ ՀՀ քրեական օրենսգրքի 308-րդ հոդվածի 1-ին մասով նախատեսված հանցագործության կատարում: Նրա նկատմամբ որպես խափանման միջոց է ընտրվել ստորագրությունը չհեռանալու մասին: [ՀՔԾ]
ՊԲ շտաբում քննարկել են վերջին շրջանում Արցախի զինված ուժերում տեղ գտած մահվան ելքով դեպքերին վերաբերող հարցեր:ՊԲ հրամանատար, գեներալ-լեյտենանտ Կարեն Աբրահամյանն, անդրադառնալով ստեղծված իրավիճակին, առանձին-առանձին վերլուծել է կատարված դեպքերը, խոսել դրանց առաջացման հավանական պատճառների և հետագա անելիքների մասին։ Վերջինս նշել է, որ , չնայած իրենց կողմից իրականացվող աշխատանքներին այդուհանդերձ, վերջին շրջանում տեղ գտած դեպքերը ցույց են տալիս, որ ինչ-որ բան ինչ-որ տեղ այնպես չի արվում։
ՀՀ վարչապետ Նիկոլ Փաշինյանը Մյունխենում հանդիպել է Հյուսիսային Մակեդոնիայի նախագահ Ստևո Պենդարովսկու հետ։ Փաշինյանն ընդգծեց, որ Հայաստանը, լինելով Եվրասիական տնտեսական միության անդամ, շահագրգռված է եվրոպական երկրների հետ հարաբերությունները զարգացնելու հեռանկարով:
Փետրվարի 15-ի ժամը 12.00-ի դրությամբ՝ Արցախի ԱԺ ընտրություններին մասնակցելու համար ընտրական ցուցակ են ներկայացրել 6 կուսակցություններ և կուսակցությունների մեկ դաշինք՝ Արցախի Պահպանողական կուսակցությունը` 16, «Միասնական հայրենիք» կուսակցությունը` 62, «Ազգային վերածնունդ» կուսակցությունը՝ 20, «Հայ Հեղափոխական Դաշնակցություն»-ը` 33, Արցախի Ժողովրդավարական Կուսակցությունը` 33, Արցախի «Արդարություն» կուսակցությունը` 35, «Ազատ Հայրենիք-ՔՄԴ » կուսակցությունների դաշինքը` 65 թեկնածուների ընդգրկմամբ: [ԱՀ ԿԸՀ]
Մյունխենի անվտանգության համաժողովի շրջանակում Կարմիր խաչի միջազգային կոմիտեի նախագահի հետ հանդիպմանը Ադրբեջանի նախագահ Ալիևը նշել է, որ անհրաժեշտ է փոխանակել Ադրբեջանում և Հայաստանում պահվող անձանց՝ «բոլորը բոլորի դիմաց» սկզբունքով: 2019-ի սեպտեմբերին Բաքուն հանդես էր եկել նույն առաջարկով, սակայն պաշտոնական Ստեփանակերտը մերժել էր առաջարկը, քանի որ առաջարկվում էր փոխանակել Հայաստանի քաղաքացիներին այնպիսի մարդկանց դիմաց, որոնք կատարել են լուրջ հանցագործություններ՝ ներառյալ անչափահասի սպանություն: |Factor.am|
ՀՀ ԱԺ մարդու իրավունքների պաշտպանության և հանրային հարցերի, պաշտպանության և անվտանգության հարցերի մշտական հանձնաժողովները սույն թվականի փետրվարի 18-ին` ժամը 11։00-ին, անցկացնելու են համատեղ աշխատանքային փակ քննարկում ՀՀ ԶՈՒ Գլխավոր շտաբի պետ՝ Արտակ Դավթյանի մասնակցությամբ։ [Անի Սամսոնյան]
Լեյտենանտ Հայկ Ասրյանի մահվան դեպքի առթիվ առաջին կայազորային քննչական բաժնում ՀՀ քրեական օրենսգրքի 110-րդ հոդվածի (ինքնասպանության հասցնելը) 1-ին մասով հարուցվել է քրեական գործ, կատարվում է նախաքննություն: Ձեռնարկվում են անհրաժեշտ քննչական և այլ դատավարական գործողություններ՝ դեպքի բազմակողմանի, լրիվ և օբյեկտիվ քննություն ապահովելու համար։ [ՔԿ]
ՀՀ վարչապետ Նիկոլ Փաշինյանի Գերմանիա կատարած աշխատանքային այցի երրորդ օրվա առաջին հանդիպումը կկայանա ԵԽ գլխավոր քարտուղար Մարիյա Պեյչինովիչ Բուրիչի հետ։ Վարչապետի՝ Գերմանիա կատարելիք այցի համատեքստում վերջին օրերին ամենաշատ քննարկվող թեման Ադրբեջանի նախագահ Ալիևի հետ հնարավոր հանդիպումն էր։ Այդ հանդիպումը, ըստ ամենայնի, կկայանա, այդ մասին նշված է Մյունխենի անվտանգության համաժողովի պաշտոնական կայքում։ Երկու երկրների ղեկավարները կմասնակցեն Լեռնային Ղարաբաղի հիմնահարցի վերաբերյալ քննարկմանը։ Այն տեղի կունենա փետրվարի 15-ին՝ Երևանի ժամանակով 20։30-ից մինչև 21:15-ը։ |armenpress.am|
Մարտի 31-ին անցկացվելիք համապետական ընտրություններին մասնակցելու համար ԱՀ կենտրոնական ընտրական հանձնաժողովն ստացել է Արցախի Հանրապետության նախագահի 11 թեկնածուների գրանցման փաստաթղթեր: ԱԺ ընտրություններին մասնակցելու համար ընտրական ցուցակ են ներկայացրել`
Արցախի Պահպանողական կուսակցությունը`16, «Միասնական հայրենիք» կուսակցությունը`62,
«Ազգային վերածնունդ» կուսակցությունը` 20, Ազատ Հայրենիք-ՔՄԴ կուսակցությունների դաշինքը` 65 թեկնածուների ընդգրկմամբ: [ԱՀ ԿԸՀ]
2019թ. Երևանում գրանցվել է հանցագործության 14961 դեպք, 2018-ի համեմատ դրանք ավելացել են 1894-ով կամ 14.5 տոկոսով: 2019թ. Երևանում արձանագրվել է սպանության 17 դեպք, 8 դեպքով կամ 32%-ով ավելացել են ավազակության դեպքերը։ 10 դեպքով կամ 2․3%-ով աճել են դիտավորությամբ առողջությանը վնաս պատճառելու դեպքերը։ [ՀՀ գլխավոր դատախազ Արթուր Դավթյանի գլխավորությամբ ամփոփվել է 2019-ին կատարած աշխատանքները]
Մի ընկերություն 2015-2017թթ․ ընթացքում մի շարք պայմանագրեր է կնքել Երևանի քաղաքապետարանի և մի հասարակական ոչ առևտրային կազմակերպության հետ։ Համաձայն Երևանի քաղաքապետարանի հետ կնքած պայմանագրի՝ ընկերությունը պետք է վերանորոգեր կենդանաբանական այգին և Էրեբունի վարչական շրջանի թաղապետարանի շենքի ու նույն վարչական շրջանի բազմաբնակարան շենքերի տանիքները։ Պարզվել է, որ ընկերությունը չարաշահել է պատվիրատուների վստահությունը և ծառայություններն իրականացրել մասնակի, Երևանի համայնքին պատճառվել է 17 մլն 680 հզր դրամից ավելի, իսկ հասարակական ոչ առևտրային կազմակերպությանը՝ 26 մլն 900 հզր դրամից ավելի վնաս։ [ՀՀ Ոստիկանություն]
ՀՀ ԱԱԾ հաղորդագրությամբ չի հիշատակվել կոնկրետ իրավագիտության ֆակուլտետի դասախոսի կողմից գումարներ ստանալու կամ ձերբակալվելու հանգամանքը, ինչը ցանկության դեպքում կարող է հաստատվել հաղորդագրության տեքստի կրկնակի ընթերցմամբ։ Հարկ ենք համարում նշել, որ ՀՀ ազգային անվտանգության մարմիններում վարույթն իրականացվում է ՀՀ քրեական դատավարության օրենսգրքի խստիվ պահպանմամբ և, հենց անմեղության կանխավակածի ինստիտուտի հանդեպ հարգանքից ելնելով, ծառայությունը ձեռնպահ է մնում առերևույթ հանցագործություններ կատարած անձանց հստակ պաշտոնները և այլ անհատականացնող տվյալները նշելուց։ ՀՀ ԱԱԾ քննչական դեպարտամենտում ՀՀ քրեական օրենսգրքի համապատասխան հոդվածներով հարուցած քրեական գործով ներկա պահին ձերբակալված անձինք չկան։ [ԱԱԾ պարզաբանումը՝ ԵՊՀ հայտարարության վերաբերյալ]
ՀՀ տարածքային կառավարման և ենթակառուցվածքների նախարար Սուրեն Պապիկյանի վերաբերյալ տվյալների մասին հրապարակումներն ուղարկվել են Հատուկ քննչական ծառայություն՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութերի նախապատրաստմամբ դրանցում պաշտոնատար անձանց կողմից անձնական գաղտնիք պարունակող տվյալները հրապարակելու հանցավոր արարքի առերևույթ առկայությունը ստուգելու նպատակով: Սուրեն Պապիկյանը դիմել էր ՀՀ ազգային անվտանգության ծառայության տնօրենին և ՀՀ ոստիկանության պետին՝ խնդրելով պարզել, թե ինչպես են իր անձնական տվյալները հասանելի դարձել որոշ լրատվամիջոցների: |tert.am|
ԲՀԿ-ն մշտապես կողմ է եղել ուղիղ ժողովրդավարության այնպիսի կարևորագույն գործիքին, ինչպիսին հանրաքվեն է, այդուհանդերձ, մենք չենք կարող մասնակցություն ունենալ իրավական առումով խոցելի այս գործընթացին։ Ակնհայտ է, որ այս գործընթացի հենց սկզբից իշխանությունը իրավական հարթությունից հարցը բացառապես տեղափոխել է քաղաքական հարթություն՝ խնդիրը վերածելով սև-սպիտակի կործանարար հակամարտության, մինչդեռ ԲՀԿ-ի համար մեր հասարակության մեջ ջրբաժաններ և բարիկադներ ստեղծելու գործելաոճը մշտապես եղել է անընդունելի։ Կուսակցության քաղաքական խորհուրդի բոլոր անդամների միաձայն որոշմամբ ԲՀԿ-ն չի մասնակցելու սահմանադրական փոփոխությունների անցկացման գործընթացին։ [Նաիրա Զոհրաբյան]
«Արցախի ապագան» կուսակցության ղեկավար մարմինը որոշում է ընդունել նախագահական ընտրություններում Մասիս Մայիլյանին աջակցելու մասին։ Նման որոշման համար հիմք են ծառայել թեկնածուի պետական և դիվանագիտական աշխատանքի փորձառությունը, առաջադեմ գաղափարները և անբասիր վարքը։
Դավիթ Սանասարյանի և մյուսների գործով դատական նիստին մեղադրող դատախազ Գևորգ Սարգսյանը խնդրեց մերժել Սանասարյանի նկատմամբ քրեական հետապնդումը դադարեցնելու միջնորդությունը՝ այն որակելով անհիմն և խնդրելով մերժել: Սանասարյանի պաշտպանները միջնորդել էին դադարեցնել իրենց պաշտպանյալի նկատմամբ հարուցված քրեական հետապնդումը։ Պաշտպանների պնդմամբ՝ գործը պետք է քններ ՀՔԾ-ն և ոչ թե ԱԱԾ-ն: Դատավորը, խորհրդակցական սենյակից վերադառնալով, որոշեց ներկայացված միջնորդությունը մերժել: |factor.am|
Հայկ Մարությանը հայտարարել էր, որ զրուցել է ԿԸՀ նախագահ Տիգրան Մուկուչյանի հետ, որ ապրիլի 5-ին կայանալիք հանրաքվեի ժամանակ նաեւ մայրաքաղաքին վերաբերող հարց դրվի հանրաքվեի: Մուկուչյանը հայտնեց, որ հնարավոր չի լինի մայրաքաղաքին վերաբերող հարց դնել հանրաքվեի, քանի որ պետք է հաշվի առնվեն շատ կարևոր տեխնիկական հարցեր։ |armtimes.com|
Նիկոլ Փաշինյանը այսօր այցելել է Գերմանիայի առևտրաարդյունաբերական պալատ, որտեղ աշխատանքային նախաճաշի շրջանակում հանդիպում է ունեցել Գերմանիայի տնտեսության և էներգետիկայի դաշնային պետքարտուղար Թոմաս Բարայսի, Գերմանիայի առևտրաարդյունաբերական պալատի գործադիր տնօրեն, արտաքին տնտեսական հարցերով խորհրդի նախագահ Ֆոլքեր Թրայերի և պալատի ներկայացուցիչների հետ։ Փաշինյանը նշել է, որ ՀՀ կառավարությունը շահագրգռված է Գերմանիայի հետ տնտեսական փոխգործակցության զարգացմամբ ու գերմանական բիզնեսի ու կապիտալի` հայկական շուկայում ներգրավվածության ընդլայնմամբ: Կողմերը քննարկել են առաջիկայում համատեղ ծրագրերի իրականացման ուղղությամբ հնարավոր քայլերն ու ծրագրերը։
Այսօր՝ ժամը 16:00-ին, տեղի է ունենալու «Բարգավաճ Հայաստան» կուսակցության քաղաքական խորհրդի նիստ, որից հետո կուսակցությունը հանդես կգա հայտարարությամբ և կներկայացնի Սահմանադրության փոփոխությունների հանրաքվեի հետ կապված իր դիրքորոշումը։ [«Բարգավաճ Հայաստան» խմբակցության անդամ Իվետա Տոնոյան] |armenpress.am|
ՀՀ քաղաքաշինության կոմիտեի նախագահ Վահագն Վերմիշյանին առաջադրված՝ կաշառք ստանալու վերաբերյալ հարուցված քրեական գործով մեղադրանք է առաջադրվել ևս 6 անձի։ Դատարանի որոշման հիման վրա նրանցից 3-ի նկատմամբ խափանման միջոց է կիրառվել կալանավորումը 2 ամիս ժամանակով։ [ԱԱԾ] |24news.am|
Հանրաքվե նախաձեռնելու ողջ գործընթացը՝ իր բովանդակությամբ և ընթացակարգով, կոպտորեն հակասում է ՀՀ Սահմանադրությանը և «Ազգային ժողովի կանոնակարգ» սահմանադրական օրենքին, իսկ հարցի քաղաքական ենթատեքստը որևէ աղերս չունի իրավական պետություն կառուցելու և ժողովրդավարությունը ամրապնդելու ուղենիշների հետ: Մենք, արձանագրելով վերոգրյալը և չցանկանալով մասնակից դառնալ Նիկոլ Փաշինյանի և իր քաղաքական թիմի կողմից հասարակությունը կրկին պառակտելու կործանարար գործընթացին, հայտարարում ենք մեր որոշումը հակասահմանդրական հանրաքվեի քարոզարշավին որևէ ձևով չմասնակցելու վերաբերյալ: [ՀՀԿ]
Պաշտոնական Անկարան դատապարտել է Սիրիայի խորհրդարանի կողմից Հայոց ցեղասպանությունը ճանաչող բանաձևի ընդունումը: Թուրքիայի ԱԳՆ խոսնակ Համի Աքսոյը այս որոշումը սիրիական ռեժիմի բնույթը ներկայացնող ցայտուն օրինակ է համարել: Նա սիրիական իշխանություններին մեղադրել է տարիներ շարունակ սեփական ժողովրդին կեղեքելքու, միլիոնավոր մարդկանց տեղահանելու, քիմիական զենք կիրառելու մեջ, շեշտելով՝ այս որոշումն ի ցույց է դնում Սիրիայի իշխանությունների երկերեսանիությունը։ |azatutyun.am| |azatutyun.am|
ՊՊԳՎ Արմավիրի պահպանության բաժանմունքի նախկին պետ, պաշտոնաթող գնդապետը, որը ներկայումս աշխատում է ՊԵԿ-ի ներքին անվտանգության վարչությանում, 2013-ից 2018 թվականների ընթացքում տարբեր տնտեսվարող սուբյեկտների և ֆիզիկական անձանց հետ կնքած օբյեկտների պահպանության իրականացման վերաբերյալ պայմանագրերի շրջանակներում մի շարք պատվիրատուների հետ ձեռք է բերել բանավոր պայմանավորվածություն և ենթականերից մեկին հանձնարարել տնտեսվարողներից գանձել կանխիկ գումար։ Բացի այդ, ստորաբաժանման հաշվապահին հրահանգել է հաշվետվություններում կեղծ տեղեկություններ մտցնել և կազմել կեղծ փաստաթղթեր։ Այս ապօրինությունների հետևանքով յուրացվել է առանձնապես խոշոր չափերի՝ 46 միլիոն 455 հազար դրամ։[ՀՀ ոստիկանություն]
Հայաստանում մեծ փոփոխություններ են կատարվել։ Փոփոխություններ են կատարվում այսօր իրավական համակարգում։ Մենք համոզված ենք, որ դա դյուրին գործ չէ, և հաջողություն ենք մաղթում այդ գործում Հայաստանին։ Հոկտեմբերին Գերմանիայում կայացել է տնտեսական ֆորում, որը նոր էջ է բացել հայ-գերմանական հարաբերություններում։ [Անգելա Մերկել] |armenpress.am|
ՀՀ ազգային ժողովն առաջին ընթերցմամբ ընդունեց «Իմ քայլը» խմբակցության պատգամավորներ Նիկոլայ Բաղդասարյանի և Սոնա Ղազարյանի կողմից ներկայացված ՀՀ քրեական դատավարության օրենսգրքում լրացումներ և փոփոխություններ կատարելու մասին օրենքի նախագիծը օրենքի նախագիծը, որով առաջարկում են բարձրացնել երեխաների իրավունքների պաշտպանվածության մակարդակը: Նախագծով առաջարկվում է բարձրացնել անչափահասների իրավունքների պաշտպանվածության մակարդակը քրեական վարույթում և քրեական արդարադատության շրջանակում: Առաջարկվում է արգելել անչափահասների ներկայացուցիչ լինել այն անձանց, որոնք հանդիսանում են քրեական գործով դատավարության մասնակից: Առաջարկվում է անչափահասների մեկ օրվա հարցաքննության առավելագույն ժամկետը 6 ժամից նվազեցնել մինչև 4 ժամ: |armenpress.am|
Գերմանիան Հայաստանի մտերիմ բարեկամն ու գործընկերն է, և մենք զգում ենք այդ բարեկամության ուժը և՛ զգացական, և՛ գործնական առումներով։ Այսօր վստահությամբ կարող եմ արձանագրել, որ մեր բարեկամությունը հիմնված է ընդհանուր արժեքների վրա: Մենք մեծապես շահագրգռված ենք գերմանական ընկերությունների մուտքով Հայաստան: Ուրախությամբ պետք է փաստեմ, որ անցած տարվա մեր հանդիպումից հետո շոշափելի առաջընթաց ունենք գրեթե բոլոր պայմանավորվածությունների շուրջ: Անչափ ուրախալի է, որ KfW բանկի հետ ստորագրվել է Բեռլինում մեր կողմից տեխնոլոգիաների ուսուցման ԹՈՒՄՈ կենտրոն հիմնելու վերաբերյալ համաձայնագիր: Մեզ համար մեծ պատիվ է Գերմանիայի նման տեխնոլոգիական հսկա հանդիսացող երկին մեր առաջավոր փորձի փոխանցումը։ [Նիկոլ Փաշինյան] |armenpress.am|
