Ռուբեն Ռուբինյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, ԱԺ փոխնախագահ։

Ծնվել է 1990թ. մարտի 8-ին Երեւանում:

2012-2014թթ. ծառայել է ՀՀ զինված ուժերում:

2010թ. ավարտել է Երեւանի պետական համալսարանի միջազգային հարաբերությունների ֆակուլտետը: 2011թ.՝ Լոնդոնի համալսարանական քոլեջը (UCL): «Քաղաքականություն եւ անվտանգություն» մասնագիտացման մագիստրոս է: 2012թ.՝ Լեհաստանի Յագելոնյան համալսարանը: Եվրոպագիտության մագիստրոս:

2017-2018թթ. զբաղվել է գիտական գործունեությամբ: 2018թ. մայիս-2019թ. հունվար եղել է ՀՀ ԱԳ նախարարի տեղակալ:

«Քաղաքացիական պայմանագիր» կուսակցության հիմնադիր անդամ է, 2015-2017թթ.՝ վարչության անդամ:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, համապետական ընտրական ցուցակ): ԱԺ արտաքին հարաբերությունների մշտական հանձնաժողովի նախագահ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

2021թ. օգոստոսի 3-ին ընտրվել է Հայաստանի Հանրապետության Ազգային ժողովի նախագահի տեղակալ:

Ընդդիմության բացակայության պատճառաբանությունները ամոթալի են և ծիծաղելի․ Ռուբինյան
 |shantnews.am|

Ընդդիմության բացակայության պատճառաբանությունները ամոթալի են և ծիծաղելի․ Ռուբինյան |shantnews.am|

shantnews.am: Ազգային ժողովի նոր արտահերթ նիստ անցկացնելու մասին որոշումը ծանուցվել է միաժամանակ։ Այս մասին ԱԺ ամբիոնից հայտարարեց իմքայլական Ռուբեն Ռուբինյանը՝ հերքելով ԼՀԿ պատգամավորների պնդումները։ Վերջիններս նշում են, որ իրենց նիստից 5 րոպե առաջ են տեղեկացրել։ Ըստ այդմ՝ ԼՀԿ-ն հայտարարել է, որ չի մասնակցելու նիստին։ Ռուբինյանի խոսքերով՝ նման հրատապ նիստ անցկացնելու անհրաժեշտությունը պայմանավորված է նաև կորոնավիրուսի ստեղծած իրավիճակով։ «Հաշվի առնելով կորոնավիրուսի համաճարակի տեմպերը աշխարհում և Հայաստանում, զոհերի քանակը, արագ արձագանքման անհրաժեշտությունը, էս պատճառաբանությունները դառնում են ուղղակի ամոթալի և ծիծաղելի»,- ասաց Ռուբինյանը՝ հեռակա մեղադրելով ընդդիմադիր պատգամավորներին։ Նրա խոսքերով՝ ընդդիմությունը վերջին շրջանում իրեն անհասկանալի է պահում՝ օգտագործելով պոպուլիստական բոլոր այն հնարքները, որ մինչ այս չէր հասցրել կիրառել։
18:42 - 31 մարտի, 2020
Բրյուսելում քննարկվել է նաև Սահմանադրական հանրաքվեի հարցը. Ռուբեն Ռուբինյան |news.am|

Բրյուսելում քննարկվել է նաև Սահմանադրական հանրաքվեի հարցը. Ռուբեն Ռուբինյան |news.am|

news.am: Վարչապետ Նիկոլ Փաշինյանի՝ Բրյուսել այցի ընթացքում եվրոպացի գործընկերների հետ քննարկվել է նաև սահմանադրական հանրաքվեի հարցը: Այս մասին այսօր` մարտի 9-ին, Բրյուսելում լրագրողների հետ զրույցում ասաց ԵԽԽՎ-ում հայկական պատվիրակության ղեկավար, «Իմ քայլը» խմբակցության պատգամավոր Ռուբեն Ռուբինյանը: «Այսօր մեր ունեցած մեր բոլոր հանդիպումներում  մենք բնականաբար անդրադարձել ենք Հայաստանում տեղի ունեցող բարեփոխումների գործընթացներին եւ, ընդհանրապես, մեր երկրում տեղի ունեցող զարգացումներին եւ, բնականաբար, Սահմանադրական հանրաքվեն նույնպես քննարկվել է: Եւ մենք մեր բոլոր գործընկերներին ներկայացրել ենք գործընթացի նախապատմությունը, ներկան, նախանշված ապագան։  Պետք է ասեմ, որ մեր եվրոպացի գործընկերների մոտ առնվազն իմ նկատմամբ կա ընկալում, որ առկա խնդիրը Հայաստանում՝ կապված դատական համակարգի զարգացման անհրաժեշտության հետ, եւ ՍԴ շուրջ ստեղծված իրավիճակի լուծման  անհրաժեշտության  խնդրի ընկալումը կա»,- ասաց նա: Լրագրողի հարցին, թե ի  վերջո իրենք կարողացա՞ն իրենց եվրոպացի գործընկերների համար համոզիչ լինել, թե ինչու է  պետք անցկացնել հանրաքվե, Ռուբինյանը պատասխանեց, որ իրենք նպատակ չունեն  համոզիչ լինել եվրոպացիների համար, այլ ձգտում են համոզիչ լինել ՀՀ քաղաքացիների համար: «Մեր եվրոպացի ընկերների հետ շփումների ընթացքում մենք ներկայացնում ենք մեր դիրքորոշումը եւ պատմում ենք իրականությունը, եւ ես կարծում եմ, որ կա ընդհանուր ընկալում, որ կա խնդիր, եւ խնդիրը պիտի լուծվի, եւ որ մեր մոտիվացիան խնդիրը լուծելու դրական է» ,-ասաց նա: Անդրադառնալով մարտի 5-ին ՀՀԿ նախագահ, ՀՀ երրորդ նախագահ Սերժ Սարգսյանի այցին Բրյուսել, նա ասաց, որ հանրապետականները եւ Սերժ Սարգսյանը տարբեր երկրներ են մեկնում` իրենց իշխանությունը փնովելու համար.  «Հանրապետականները եւ Սերժ Սարգսյանը փորձում են մարդկանց համոզել, որ Հայաստանում հաստատվել է բռնապետություն, որտեղ ամեն ինչ շատ վատ է, ատելության մթնոլորտ է եւ այլն, բայց կարծում եմ, որ բանական մարդկանց համար դա բավական զվարճալի է»: Հարցին՝ արդյոք «Քաղաքացիական պայմանագիր» կուսակցությունը դիմել է ԵԺԿ–ին անդամակցելու համար, Ռուբինյանը պատասխանեց, որ որեւէ եվրոպական կուսակցության ընտանիքի անդամագրվելուն որոշում չկա։
20:59 - 09 մարտի, 2020
Ադրբեջանը չի ուզում հակամարտության խաղաղ հանգուցալուծում. Ռուբեն Ռուբինյան

Ադրբեջանը չի ուզում հակամարտության խաղաղ հանգուցալուծում. Ռուբեն Ռուբինյան

Վարչապետի՝ ՄԱԿ-ի ամբիոնից հնչեցրած տրամաբանությունը ղարաբաղյան հակամարտության վերաբերյալ շատ պարզ է: Այս մասին ֆեյսբուքյան իր էջում գրել է ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը: «Կա հակամարտություն, հակամարտության վերաբերյալ տարվում են բանակցություններ: Հակամարտության հանգուցալուծումը կարող է լինել միայն խաղաղ ճանապարհով: Հակամարտության խաղաղ հանգուցալուծումը հնարավոր է միայն այն դեպքում, երբ կողմերը գալիս են համաձայնության: Հետևաբար՝ հակամարտության հանգուցալուծումը պիտի ընդունելի լինի Արցախի, վերջինիս անվտանգության երաշխավոր Հայաստանի և Ադրբեջանի ժողովուրդների համար:Եթե Ադրբեջանը չի ընդունում այս պարզ իրողությունը, սա նշանակում է, որ Ադրբեջանը չի ուզում հակամարտության խաղաղ հանգուցալուծում, հետևաբար չի ուզում հանգուցալուծում: Ավելին՝ ադրբեջանցի պաշտոնյաների ապակառուցողական, մերժողական ու ռազմատենչ հայտարարությունները, որ Ադրբեջանը պատերազմի միջոցով կարող է գրավել Արցախը, Ադրբեջանում տարվող պաշտոնական հակահայկական քարոզը հիանալի կերպով ցույց են տալիս, որ Ադրբեջանը չի ուզում հակամարտության հանգուցալուծում, բանակցություններում ազնիվ չէ և էլ ավելի ամրապնդում այն անբեկանելի փաստարկը, որ Արցախը չի կարող լինել Ադրբեջանի կազմում»,- գրել է Ռուբինյանը:
09:39 - 27 սեպտեմբերի, 2019
«Հարցը պիտի լուծվի տրամաբանության, փաստերի, կորուստների և ձեռքբերումների գնահատման և քաղաքական խոստումների կատարման հիման վրա և ոչ էմոցիաների»․ ԱԺ պատգամավոր Ռուբեն Ռուբինյան

«Հարցը պիտի լուծվի տրամաբանության, փաստերի, կորուստների և ձեռքբերումների գնահատման և քաղաքական խոստումների կատարման հիման վրա և ոչ էմոցիաների»․ ԱԺ պատգամավոր Ռուբեն Ռուբինյան

ՀՀ ԱԺ Իմ քայլը խմբակցության պատգամավոր Ռուբեն Ռուբինյանն իր ֆեյսբուքյան էջում գրառում է կատարել, որում մասնավորապես ասվում է․ « «Եվ մենք հիմա ստիպված ենք այլ ճանապարհով գնալ: Եվ ըստ էության մեզ պետք է միջազգային անառարկելի հեղինակություն ունեցող կազմակեպության եզրակացություն: Ընդ որում, կարծում եմ, երկու հարցի պատասխան պետք է ստանանք: Գոնե ինձ այս երկու հարցն է անհանգստացնում՝ ինչքանո՞վ է նախագիծն անվտանգ Սևանի համար և ինչքանո՞վ է անվտանգ Ջերմուկի ջրերի և ընդհանրապես ջրահավաք ավազանի համար: Այս պահին մենք ոչ դրական, ոչ բացասական, այսինքն՝ չեզոք պատասխան չունենք: Կարծում եմ՝ մենք պետք է համաձայնենք այն հարցի շուրջ, որ Ամուլսարի շարագործել-չշահագործելու հարցը կապված է հենց այս հարցի հետ: Եթե պարզվի, որ անվտանգ է Սևանի համար, Ջերմուկի ջրերի ու ջրահավաք ավազանի համար, մենք, հաշվի առնելով ստեղծված իրավիճակը և մեծ ծավալի ներդրումները, թույլ կտանք, որ շահագործվի հանքը: Եթե տեսնենք, որ Սևանի կամ ջրահավաք ավազանի համար վտանգ կա, այլ ճանապարհով կգնանք». Նիկոլ Փաշինյան, 15.09.2018 Սա, սիրելի բարեկամներ, կոնկրետ ու հստակ դիրքորոշում է ու կոնկրետ ու հստակ խոստում։ Փորձաքննության եզրակացությունն արդեն ստացվել է, համաձայն որի ռիսկերը կառավարելի են, և կառավարության հետագա որոշումները, կարծում եմ, պետք է բխեն վարչապետի՝ անցած տարվա սեպտեմբերին արտահայտած դիրքորոշումից ու խոստումից։ Հարցը պիտի լուծվի տրամաբանության, փաստերի, կորուստների և ձեռքբերումների գնահատման և քաղաքական խոստումների կատարման հիման վրա և ոչ էմոցիաների»։  
11:13 - 16 օգոստոսի, 2019
ԵԱՀԿ ԽՎ բանաձևում կարողացանք ամրագրել ինքնորոշման իրավունքի սկզբունքը․ Ռուբինյան |shantnews.am|

ԵԱՀԿ ԽՎ բանաձևում կարողացանք ամրագրել ինքնորոշման իրավունքի սկզբունքը․ Ռուբինյան |shantnews.am|

shantnews.am։ Ազգային ժողովի «Իմ քայլը» խմբակցության անդամ, ԱԺ արտաքին հարաբերությունների հանձնաժողովի նախագահ Ռուբեն Ռուբինյանն իրենց հանձնաժողովի հաջողություններից է համարում ԵԱՀԿ ԽՎ վերջերս ընդունված բանաձևը։ Ռուբինյանը պնդում է, որ իրենք կարողացել են բանաձևից չեզոքացնել «հակահայկական տարրերը»։ Մեր պատվիրակությանը հաջողվել է ոչ միայն հանել հակահայկական, ոչ հայանպաստ ձևակերպումները, այլև առաջին անգամ վերջին 10 տարվա մեջ բանաձևում՝ հռչակագրում, ամրագրել ինքնորոշման իրավունքի սկզբունքն Արցախյան հակամարտության համատեքստում»,- ասաց Ռուբինյանը։ Պատգամավորի պնդմամբ՝ իրենք խորհրդարանական դիվանագիտության ընթացքում անդրադառնալու են ոչ միայն Արցախյան հակամարտությանն ու Հայոց ցեղասպանության ճանաչմանը, այլև համաեվրոպական ու համամարդկային հարցերի՝ ժողովրդավարությանը, մարդու իրավունքներին վերաբերող և տնտեսական հարցերի։
12:36 - 12 հուլիսի, 2019
Հայաստանի խորհրդարանի պատվիրակությունը ԱՄՆ կայցելի. «Իմ քայլը» |news.am|

Հայաստանի խորհրդարանի պատվիրակությունը ԱՄՆ կայցելի. «Իմ քայլը» |news.am|

Արտաքին հարաբերությունների հարցերով խորհրդարանական մշտական հանձնաժողովը խորհրդարանական ընդդիմության ներկայացուցիչների հետ զարգացնում է բավականին կառուցողական եւ դրական համագործակցություն: Հուլիսի 12-ին ԱԺ-ում իշխող «Իմ քայլը» դաշինքի պատգամավորների համատեղ մամուլի ասուլիսի ժամանակ այս մասին ասաց հանձնաժողովի նախագահ Ռուբեն Ռուբինյանը: Ընդ որում՝ նա նշեց, որ պատվիրակությունները՝ ԱԺ խոսնակի գլխավորությամբ այցելել են Ռուսաստան, Գերմանիա, Շվեդիա, Կիպրոս, իսկ առաջիկայում կայցելեն ԱՄՆ: «Հայաստան են այցելել տարբեր երկրների խորհրդարանական եւ կառավարական պատվիրակություններ: Հայկական պատվիրակությունների ուշադրության կենտրոնում էին ղարաբաղյան հակամարտության կարգավորման եւ Հայոց ցեղասպանության ճանաչման հարցերը»,- հայտնեց Ռուբինյանը:
10:58 - 12 հուլիսի, 2019
Ռուբեն Ռուբինյանը ԵԽԽՎ-ում պատահաբար դեմ է քվեարկել ռուսական պատվիրակության ձայնի վերականգման իրավունքին

Ռուբեն Ռուբինյանը ԵԽԽՎ-ում պատահաբար դեմ է քվեարկել ռուսական պատվիրակության ձայնի վերականգման իրավունքին

ԱԺ Արտաքին հարաբերությունների մշտական հանձնաժողովի նախագահ Ռուբեն Ռուբինյանը ԵԽԽՎ-ում պատահաբար դեմ է քվեարկել ռուսական պատվիրակության ձայնի վերականգման իրավունքին։ Նա իր ֆեյսբուքյան էջում գրում է․ «Ստրասբուրգում հայկական պատվիրակության անունից ողջունեցի վեհաժողով վերադարձած ռուսական պատվիրակությանը և վերջինիս ղեկավար Պյոտր Տոլստոյին։ Ուրախ էի կրկին հանդիպել նաև ՌԴ խորհրդարանի մեր գործընկեր հանձնաժողովի նախագահ Լեոնիդ Կալաշնիկովին, որը նույնպես պատվիրակության անդամ է։Տեղեկացնեմ նաև, որ երեկ տեղի ունեցած քվեարկության ժամանակ, իմ քվեն տեխնիկական պատճառով գրանցվել էր դեմ և ոչ թե կողմ, ինչի առնչությամբ այսօր հայտարություն արեցի ԵԽԽՎ լիագումար նիստի ժամանակ և հայտարարությունս կցվեց նիստի արձանագրությանը։Ի հեճուկս որոշ չարագուշակների, մեր և մեր ռուս գործընկերների միջև բացարձակապես ոչ մի խնդիր չի առաջացել, քննարկում ենք մերձեցման երեկո կազմակերպելու հարցը»։
10:08 - 25 հունիսի, 2019
Դեսպան նշանակվելու համար անհրաժեշտ կլինի 15 տարվա ստաժ |armenpress.am|

Դեսպան նշանակվելու համար անհրաժեշտ կլինի 15 տարվա ստաժ |armenpress.am|

armenpress.am։ ՀՀ ազգային ժողովի արտաքին հարաբերությունների հանձնաժողովի նախագահ Ռուբեն Ռուբինյանն ու անդամ Արման Բաբաջանյանն առաջարկում են սահմանափակել քաղաքական և այլ նկատառումներով դեսպանների նշանակումը: Նրանք առաջարկում են սահմանել պահանջ՝ դիվանագիտական ներկայացուցիչ, դեսպան նշանակվելու համար անձը պետք է ունենա դիվանագիտական ծառայության առնվազն 15 տարվա փորձ։ Ռուբինյանը ներկայացրեց «Դիվանագիտական ծառայության մասին» ՀՀ օրենքում փոփոխություն և լրացում կատարելու մասին օրենքի նախագծի նպատակն ու մանրամասները: «Նախկինում, ըստ էության, դիվանագիտական ներկայացուցիչ կարող էր նշանակվել գրեթե ցանկացած մեկը, դիվանագիտական ծառայող լինելու, փորձի նախապայման չի եղել: Կային մի քանի պահանջներ, սակայն դրանք շատ լայն չէին, և սա բերել էր նրան, որ հաճախ դեսպաններ նշանակվում էին քաղաքական, բիզնես նկատառումներից ելնելով:  Եվ այս ամենից տուժում էր դիվանագիտական ծառայությունը, իսկ ցածր ու միջին մասնագիտական մակարդակի դիվանագետներն աճի տեղ չունեին։ Հեղափոխությունից հետո հայտարարվեց, որ քաղաքական նշանակում չի լինելու, մինչև այսօր այդպիսի նշանակում չի եղել, և նախկին տրամաբանությամբ նշանակված դեսպաններն արդեն հետ են կանչվել: Եվ չնայած արդեն կա կամք՝ դիվանագետներին նշանակել որպես դեսպաններ, սակայն այս նախագծի նպատակն է բացառել արատավոր պրակտիկայի երբևէ կրկնությունը»,-ասաց Ռուբինյանն ու 15 տարվա դիվանագիտական ծառայության ստաժ սահմանելը համարեց տրամաբանական:Նրա կարծիքով՝ ցանկացած դիվանագետ դեսպանի մակարդակին հասնելու համար պետք է որոշակի ճանապարհ անցնի: Դա միտված է համակարգի առողջացմանն ու մասնագիտացմանը: Սակայն Ռուբինյանը տեղեկացրեց, որ քաղաքական նշանակումների համար սահմանվում է ընդհանուր դիվանագիտական ներկայացուցիչների թվի 15 տոկոս քվոտա, այսինքն՝ 15 տոկոսը կարող են դիվանագիտական ծառայության փորձ չունենալ: Նա նկատեց, որ աշխարհում կա նման պրակտիկա, որ որոշակի տոկոսը որոշակի պատճառներով կարող է դիվանագիտական ներկայացուցիչ, դեսպան նշանակվել արտաքին քաղաքական նպատակահարմարությամբ պայմանավորված:Հարցին՝ արդյոք նախադեպե՞րն են ստիպել նման նախագիծ կազմել՝Ռուբինյանը նշեց, որ նկատի են ունեցել վատ նախադեպերը: Շարունակությունը՝ armenpress.am
05:49 - 14 հունիսի, 2019
Ռուբեն Ռուբինյանը Վարշավայում հանդիպել է Հայաստանի հետ Լեհաստանի խորհրդարանական բարեկամության խմբի ղեկավարի հետ

Ռուբեն Ռուբինյանը Վարշավայում հանդիպել է Հայաստանի հետ Լեհաստանի խորհրդարանական բարեկամության խմբի ղեկավարի հետ

ՀՀ Ազգային ժողովի արտաքին հարաբերությունների մշտական հանձնաժողովի նախագահ, Հայաստան-Լեհաստան խորհրդարանական բարեկամական խմբի ղեկավար Ռուբեն Ռուբինյանը հունիսի 4-ին Վարշավայում հանդիպել է ՀՀ ԱԺ-ի հետ Լեհաստանի խորհրդարանական բարեկամության խմբի ղեկավար Թադեուշ Վոժնյակի հետ: Ինչպես հայտնեցին ՀՀ ԱԺ լրատվության և հանրության հետ կապերի վարչությունից, հանդիպման ընթացքում կողմերը քննարկել են խորհրդարանական կապերի ամրապնդման, միջազգային հարթակներում համագործակցության հնարավորություններին եւ օրենսդիրների փոխայցերին վերաբերող հարցեր:ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը գործընկերոջը ներկայացրել է նորընտիր ՀՀ Ազգային ժողովի օրակարգն ու առաջնահերթությունները:
09:23 - 05 հունիսի, 2019
Ռուբեն Ռուբինյանն անդրադարձել է Մամեդյարովի հայտարարությանը |news.am|

Ռուբեն Ռուբինյանն անդրադարձել է Մամեդյարովի հայտարարությանը |news.am|

news.am: Արցախի ԱԺ պատվիրակության հետ Երեւանում քննարկվել է, թե ինչպիսին պետք է լինի Հայաստանի ԱԺ-ի իրականացրած խորհրդարանական դիվանագիտությունը, ինչ փոխհարաբերության մեջ պետք է մտնի կառավարության իրականացրած արտաքին քաղաքականության հետ, որոնք են դրա վարման փիլիսոփայությունը, ձեւն ու մեխանիզմները, եւ թե ինչպես կարող են Հայաստանի եւ Արցախի խորհրդարանները համագործակցել այս համատեքստում: Այս մասին այսօր՝ մայիսի 17-ին, ԱԺ-ում լրագրողների հետ զրույցում նշեց ԱԺ Արտաքին հարաբերությունների հանձնաժողովի նախագահ Ռուբեն Ռուբինյանը:Դիտարկմանը, որ Ադրբեջանի ԱԳ նախարարը հայտարարել է, որ իրենց համար սկզբունքային է, որ Արցախը չմասնակցի բանակցություններին որպես կողմ, Ռուբինյանն արձագանքեց. «Մեզ համար էլ սկզբունքային է, որ Արցախը վերադառնա բանակցային սեղանի շուրջ»: Իսկ հարցին, թե արդյոք այդպիսով բանակցությունները չե՞ն մտնում փակուղի, նա արձագանքեց. «Ոչ, ես կարծում եմ, որ բանակցությունները եւ ընդհանրապես արտաքին քաղաքականությունը մեկ քայլանոց երեւույթ չէ եւ պետք չէ ամեն հանդիպումից կամ ամեն տարաձայնությունից հետո ակնկալել, որ խոսակցությունները կամ բանակցությունները մտել են փակուղի: Կա գործընթաց, մենք ունենք դիրքորոշումներ, սկզբունքներ եւ մենք դրանք հետեւողականորեն ներկայացնում ենք թե միջնորդներին, թե այլ բարեկամ երկրներին, թե Ադրբեջանին, թե բոլորին»:Ինչ վերաբերում է սահմանին լարվածությունը նվազեցնելու պայմանավորվածությանը, Ռուբինյանն ասաց. «Կա գործընթաց այդ առումով, կա ուղիղ կապ կողմերի միջեւ, ինչը թույլ է տվել վերջին ամիսներին նվազեցնել լարվածությունը: Պարբերաբար այդ ուղիղ կապի միջոցով խոսում են կողմերը: Բնականաբար, իրավիճակն այնպիսին է, որ միշտ էլ կա վտանգ, որ լարվածության աճ կլինի»:
11:22 - 17 մայիսի, 2019
Ծառուկյանը պետք է հստակեցումներ տա. Իմ քայլը դեռ որոշում չի կայացրել |lragir.am|

Ծառուկյանը պետք է հստակեցումներ տա. Իմ քայլը դեռ որոշում չի կայացրել |lragir.am|

lragir.am։ ԱԺ Իմ քայլը խմբակցությունը դեռ չի որոշել, թե ինչ դիրքորոշում կհայտնի ԲՀԿ առաջնորդ Գագիկ Ծառուկյանին մադատից զրկելու ՔՈ կուսակցության պահանջի վերաբերյալ: Այս մասին ԱԺ նախագահ Արարատ Միրզոյանի մոտ փակ հանդիպումից հետո լրագրողներին ասաց Իմ քայլը խմբակցության պատգամավոր Ոուբեն Ռուբինյանը: “Ընդհանուր աշխատանքային քննարկում է եղել, առաջիկայում տեղի կունենա խմբակցության նիստ, և ըստ այդմ կտանք եզրակացություն”,- ասաց նա՝ հավելելով, որ կարծում է՝ ԱԺ նախագահն այօր այդ մասին հայտարարություն չի տարածի: Հարցին, թե ընդհանուր առմամբ իրենց դիրքորոշումը որն է, շահերի բախում տեսնո՞ւմ են Գագիկ Ծառուկյանի դեպքում, Ռուբինյանը կրկնեց, որ խմբակցությունը դեռ պետք է հստակեցնի իր դիրքորոշումը: «Եթե ձեզ հետաքրքիր է իմ անձնական դիրքորոշումը, դա այն է, որ պարոն Ծառուկյանի արած որոշ հայտարարություններ որոշակի տարակարծությունների կամ կասկածների տեղիք են տալիս, և արժե, որպեսզի ի վերջո հստակեցվի, թե ինչ են նշանակում այդ հայտարարությունները»,- հավելեց նա: Լրագրողները նաև հարցրին, թե ինչո՞ւ Իմ քայլի պատգամավորները ավելի վաղ չէին նախաձեռնում նման գործընթացը, Ռուբինյանը պատասխանեց, որ ամեն ինչ ունի իր ժամանակը: Հարցին, թե ի՞նչն է պատճառը, որ խմբակցությունն այսքան երկար է քննարկում այդ հարցը, չէ՞ որ փաստեր են ներկայացված, նա պատասխանեց. «Պատճառն այն է, որ ցանկացած քաղաքական որոշում կայացնելուց առաջ ահնրաժեշտ է քննարկել որոշման հետ կապված հանգամանքները և վտտահ լինել, որ ամեն ինչ կատարվում է տրամաբանության և լեգիտիմության շրջանակներում»: Ռուբեն Ռուբինյանը հավելեց, որ համակողմանի քննություն պետք է լինի՝ թե քաղաքական, թե իրավական: Գագիկ Ծառուկյանը, նրա խոսքով, հստակեցումներ պետք է մտցնի այս հարցի վերաբերյալ: Իր իսկ շահերից է բխում բացատրել, թե ինչ են նշանակում իր հայտարարությունները:
12:27 - 30 ապրիլի, 2019