ԱԺ «Հայաստան» խմբակցության պատգամավոր Սեյրան Օհանյանը այսօր՝ խորհրդարանական ճեպազրույցների ընթացքում, անդրադարձավ հարցին, թե ինչու խմբակցությունը չի մասնակցել նիստերին, որոնց ընթացքում քննարկվում էր Սեյրան Օհանյանի և Արմեն Չարչյանի նկատմամ քրեական հետապնդում հարուցելու մասին Գլխավոր դատախազի միջնորդագրերը։
«Կարծում էինք, որ առաջինը՝ բոլոր այդ գործերը վաղեմության ժամկետն անցած են և եթե մենք ստորագրեինք, ուրեմն չէին լինի այդ միջնորդագրերը, իսկ մենք հրաժարվել ենք ստորագրելուց, քանի որ գտնում ենք, որ մեղավոր չենք, և այդ գործերը շինծու են: Որևիցե մի շահ որևիցե հարցում չենք ունեցել, որևիցե մի շրջանակի հետ մենք պայմանավորվածություններ չենք ունեցել»։
Օհանյանը նշեց՝ չեն մասնակցել, որովհետև անվտանգային հարցերը այս իշխանությունների համար առաջնահերթություն չեն, և սա իրականացվել է հանրության ուշադրությունը շեղելու համար․ «Բացի այդ, ըստ Օհանյանի, իշխանությունները այս հարցը, ինչպես մնացած հարցերը, «դակելու է»․ «Մենք պատասխանատու չենք իշխանությունների, հատկապես, ՔՊ-ական մեծամասնության առջև։ Մեղադրանքը առաջադրվել է, գործերը գտնվում են դատաիրավական համակարգում, և մենք այնտեղ կապացուցենք մեր անմեղությունը»։
Անդրադառնալով միջնորդագրերից մեկի բովանդակությանը, որը վերաբերում է զորամասերից մեկի օտարման գործարքին, Սեյրան Օհանյանը ասաց․ «Նախ, այնտեղ զորամաս չէ, հենց մի քանի անգամ զորամաս անվանելով, իշխանությունը փորձում է նորից շեղել մեր հանրության ուշադրությունը։ Դրանք հին, շահագործումից դուրս գտնվող հողամաս և ավերված շինություններ են։ Բանակի ձևավորման սկզբնական ժամանակահատվածում ցանկացած շինություն օգտագործվել է ժամանակավոր զորանոցների, կացարանների փոխարեն, բայց Զինված ուժերի զարգացմանը զուգահեռ, մենք ստեղծել ենք ավելի լավ շինություններ, ավելի մշտական տեղակայման վայրեր, և այդ հողակտորները, քանդված շինությունները դուրս են մնացել։ Դրանք ավելորդ ծախսերի աղբյուր են եղել, նրանց պահպանման համար ավելի մեծ ծախսեր էին իրականացվում, քան հիմանական գներն էին։ Եվ այն ձևակերպվել է պետության համապատասխան օրգանների կողմից։ Այնպես որ, այդ մեղադրանքը չենք ընդունում, հատկապես, որ Դատախազության կողմից ներկայացվածը ոչ թե միջնորդություն էր, այլ, կարելի է ասել մեղադրանք, իսկ մեղադրանքը իրականացնում են իրավապահ մարմինները, որոնց առաջ էլ մենք պատասխանատու ենք լինելու հետագայում»։
Հիշեցնենք, որ Ազգային ժողովը անցած շաբաթ համաձայնություն տվեց ԱԺ ընդդիմադիր խմբակցության պատգամավոր Սեյրան Օհանյանի և Արմեն Չարչյանի նկատմամբ քրեական հետապնդում իրականացնելու վերաբերյալ միջնորդագրերին։
comment.count (0)