Ռոսսելխոզնադզորը սահմանափակումներ չի մտցրել հայկական պտուղ–բանջարեղենի համար, բայց հայկական կողմին խնդրել է դադարեցնել մի շարք արտադրողների մատակարարումները |arm.sputniknews.ru|
arm.sputniknews.ru: Ռոսսելխոզնադզորը սահմանափակումներ չի մտցրել հայկական պտուղ–բանջարեղենի համար, բայց հայկական կողմին խնդրել է դադարեցնել մի շարք արտադրողների մատակարարումները, որոնք բազմակի խախտումներ են թույլ տվել։ Այս մասին հայտնում են գերատեսչությունից` պատասխանելով Sputnik Արմենիայի հարցմանը։
ՍԱՏՄ-ն «Ռոսսելխոզնադզոր»-ից նամակ է ստացել, որ Հայաստանից ՌԴ արտահանվող պտուղ-բանջարեղենի ապրիլ-հունիս ամիսների խմբաքանակներում արձանագրել է խախտումներ և կայացրել հուլիսի 15-ից ՌԴ տարածք հայաստանյան 16 ընկերությունների արտադրանքի մատակարարումը ժամանակավորապես սահմանափակելու որոշում։ Այս մասին ավելի վաղ հայտնել էին գերատեսչությունից։
Ռոսսելխոզնադզորից հստակեցնում են, որ ավելի վաղ հայ գործընկերներին տեղեկություն են ուղարկել ևս 80 անհամապատասխանության մասին:
«Ռոսսելխոզնադզորը ոչ մի սահմանափակում չի մտցրել, այլ պարբերաբար բացահայտվող փաստերի առնչությամբ մտահոգություն է հայտնել` խնդրելով մինչև պատճառների հետաքննման ավարտը դադարեցնել ռուսական շուկա ապրանքների մատակարարումներն այն արտադրողներից, որոնք բազմակի խախտումներ են թույլ տվել», - ասված է հաղորդագրությունում։
Ռուսաստանյան գերատեսչությունն այս հարցով կապի մեջ է հայ գործընկերների հետ։ Հուլիսի 23-ին նախատեսված են բանակցություններ Ռոսսելխոզնադզորի և ՀՀ սննդամթերքի անվտանգության տեսչական մարմնի ղեկավարների տեղակալների մակարդակով:
19:27 - 19 հուլիսի, 2024
