Օրենքով սահմանված կարգի խախտմամբ հավաք կազմակերպելու գործով ձերբակալված 12 անձինք ազատ են արձակվել, կատարվել են խուզարկություններ |hetq.am|
hetq.am: Նոյեմբերի 20-ին օրենքով սահմանված կարգի խախտմամբ հավաք կազմակերպելու և անցկացնելու գործով ձերբակալված բոլոր 12 անձինք ազատ են արձարկվել: Դատարանները նրանց ձերբակալման որոշումները ճանաչել են ոչ իրավաչափ։ Քննչական կոմիտեն ձերբակալված անձանց անունները չի հրապարակել, մենք պարզել ենք նրանցից 11-ի ինքնությունը։
Այսպես, ձերբակալված են եղել, ապա ազատ արձակվել «Ադեկվադ» միաբանության ղեկավար Արթուր Դանիելյանը, «ՎԵՏՕ նախաձեռնության անդամներ Նարեկ Մալյանը և Ռոբերտ Մելքոնյանը, ԱԺ ՀՀԿ խմբակցության նախկին պատգամավոր Միհրան Հակոբյանը, ՀՀԿ-ի անդամ Հայկ Մամիջանյանը, ԱԺ աշխատակազմի նախկին ղեկավար Արա Սաղաթելյանը, «Հայրենիք» կուսակցության անդամ Բաբկեն Հարությունյանը, ՀՅԴ-ի անդամներ Սևակ Նազարյանը, Գերասիմ Վարդանյանը, Աշոտ Հովհաննիսյանը և Սարգիս Կարապետյանը։
Քննչական կոմիտեի տեղեկատվության և հասարակայնության հետ կապերի բաժնի պետ Ռիմա Եգանյանը, «Հետք»-ի հարցին ի պատասխան, հայտնեց, որ քրեական գործով շարունակվում են կատարվել անհրաժեշտ քննչական և դատավարական գործողություններ, այդ թվում՝ խուզարկություններ։
Նշենք, որ օրենքով սահմանված կարգի խախմամբ հավաք կազմակերպելու և անցկացնելու՝ Քրեական օրենսգրքի 225.1 հոդվածի 1-ին մասով նախատեսված արարքը համարվում է ոչ մեծ ծանրության արարք, սանկցիան նվազագույն աշխատավարձի երկուհարյուրապատիկից երեքհարյուրապատիկի չափով տուգանք է կամ կալանք՝ առավելագույնը երկու ամիս ժամկետով։
Գործը քննվում է Երևան քաղաքի քննչական վարչության ծանր հանցագործությունների քննության բաժնում։ Քննչական կոմիտեից հայտնում են, որ այն վերաբերում է նոյեմբերի 20-ին՝ Սարյան և Դեմիրճյան փողոցներում, Բաղրամյան, Մաշտոցի պողատաներում, ինչպես նաև Հանրապետության հրապարակում և նոյեմբերի 19-ին՝ Երևան քաղաքի Ագաթանգեղոս-Տիգրան Մեծ պողոտա խաչմերուկում, Թբիլիսյան խճուղում, Մյասնիկյան, Բաղրամյան, Իսակովի, Գայի պողոտաներում, Ամիրյան փոցող-Մաշտոց պողոտա խաչմերուկում և հարակից տարածքներում հավաք կազմակերպելու և անցկացնելու դեպքերին։
Ինչպես արդեն վերը նշեցինք, քրեական գործի շրջանակներում խուզարկություներ են իրականացվել։ Դրանցից մեկը կատարվել է Միհրան Հակոբյանի բնակարանում։
Հակոբյանի պաշտպան Միքայել Շխիմյանը «Հետք»-ի հետ զրույցում ասաց, որ խուզարկություն իրականացնելու վերաբերյալ Քննչական կոմիտեի միջնորդությունը բավարարել է Երևանի ընդհանուր իրավասության դատարանի դատավոր Կարեն Ֆարխոյանը՝ հստակ նշելով, թե ում բնակարանում պետք է իրականացվի խուզարկությունը, ինչպես նաև, թե ով պետք է իրականացնի այն՝ ինչ առարկաներ փնտրելու նպատակով։
Ըստ դատարանի որոշման՝ խուզարկությունը պետք է իրականացներ ավագ քննիչ Լևոն Քաջազնունին՝ Հակոբյանի բնակարանում փնտրելով հավաք կազմակերպելուն առնչվող առարկաներ, օրինակ՝ բարձրախոս, թուղթ, որի վրա հավաքի մասնակիցների անուններ կլինեին, էլեկտրոնային կրիչ։
Խուզարկությունը, սակայն, իրականացրել է մեկ այլ քննիչ՝ Էդգար Խալաթյանը, այսինքն՝ ոչ այն անձը, ով, ըստ դատարանի որոշման, պետք է խուզարկություն իրականացներ, ըստ որում՝ առկա չի եղել որևէ գրություն այն մասին, որ Խալաթյանին է հանձնարարավել խուզարկությունն իրականացնել կամ որ այս գործով ձևավորվել է քննչական խումբ։
Կարդալ ավելին՝ hetq․am-ում։
18:55 - 24 նոյեմբերի, 2020
