factor.am: Իրանի ԱԳՆ խոսնակ Նասեր Քանանին այսօր ճեպազրույցում կրկին անդրադարձել է Ադրբեջանից հնչող հակաիրանական հայտարարություններին, գրում է Mehr գործակալությունը։

Նա նշել է, որ արդեն անդրադարձել են Ադրբեջանի պաշտոնյաների դիրքորոշումներին։ «Դուք տեղյակ եք, որ դիվանագիտական ​​համակարգի դիրքորոշումը պաշտոնապես ընդունվել է, և մենք պաշտոնապես արձագանքել ենք այդ կապակցությամբ։ Ադրբեջանի դեսպանն անմիջապես կանչվել է ԱԳՆ, Իրանը խստորեն բողոքել է այդ, ինչպես նաև ոչ կառուցողական դիրքորոշումների դեմ»,- ասել է նա։

Պաշտոնյայի խոսքով՝ Իրանի սկզբունքային քաղաքականությունը հիմնված է բարիդրացիության և բոլոր հարևանների հետ հարաբերությունների ընդլայնման քաղաքականության վրա, և Ադրբեջանի Հանրապետությունը բացառություն չէ այս կանոնից։

«Ոչ ոք իրավունք չունի սխալ հասկանալու այդ իմաստուն և պատասխանատու քաղաքականությունը։ Որոշ չհաշվարկված հայտարարությունների կամ սխալ հաշվարկների հետևանքով առաջացած հայտարարությունների վերաբերյալ Իրանի լռությունը չի նշանակում թուլություն, դա Իրանի հեղինակության, քաղաքականության, հզոր ու մեծ երկրի պատասխանատու պահվածքի արդյունք է։ Պատասխանատվությունը դրացիների վրա է։ Իրանը չի տառապում զգացմունքային պահվածքով ու հույզերով՝ տարբեր քամիներով պայմանավորված»,- հավելել է նա։

ԱԳՆ խոսնակն ասել է, որ Իրանի համբերությունը չպետք է շփոթել թուլության հետ։ «Ոչ ոք չպետք է մեկնաբանի Իրանի համբերությունը որպես թուլություն. տարածաշրջանի երկրների պատմությունը պարզ է ու խոսուն, այն չի կարելի խեղաթյուրել, պատմությունն ավելի լավ է ճիշտ կարդալ։ Մեր քաղաքականությունը մեր հարևանների հետ հարաբերություններում բարիդրացիական լինելն է, Իրանի ու նրա հարևանների միջև հարգանքն ու եղբայրական կապերը պահպանելը, հատկապես՝ Ադրբեջանի երկրի և ժողովրդի հետ»,- ասել է Քանանին։

Նա նշել է, որ տարածաշրջանից դուրս գտնվող ձեռքեր փորձում են քանդել Իրանի ու որոշ հարևանների հարաբերությունները և խորհուրդ է տվել տարածաշրջանային երկրին՝ այդ խաղերում չընդգրկվել։

Նշենք, որ Իրան-Ադրբեջան հարաբերությունները վերջին շրջանում լարված են։

Իրանի Իսլամական Հանրապետության հետախուզության նախարարությունը հայտարարեց, որ Շիրազ քաղաքի Շահ Չըրաղ դամբարանում ահաբեկչական գործողությունը կազմակերպողների թվում Ադրբեջանի քաղաքացի կամ քաղաքացիներ կան: Այնուհետև Բաքուն պնդեց, որ Նախիջևանում «սադրիչները» Իրանին միանալու մասին Թեհրանին ուղղված խնդրանքներ են տարածում։

Ավելի ուշ՝ նոյեմբերի 10-ին էլ Իրանում Ադրբեջանի դեսպան Ալի Ալիզադեն կանչվեց Իրանի ԱԳՆ. նրան բողոքի նոտա էր փոխանցվել հակաիրանական քարոզչության համար։ Ապա Իրանի դեսպան Սեյիդ Աբբաս Մուսավին կանչվեց Ադրբեջանի արտաքին գործերի նախարարություն։ ԱԳՆ-ն նշեց․ «Հանդիպման ընթացքում հնչեցվել է դժգոհություն և իրանական կողմին է ներկայացվել Բաքվի մտահոգությունը՝ կապված Իրանի բարձրաստիճան քաղաքական և ռազմական գործիչների կողմից հակաադրբեջանական քարոզչության, զրպարտչական արշավի, սպառնալից հռետորաբանության հետ, որը չի համապատասխանում երկու երկրների հարաբերություններին հռետորաբանությանը»։

Իսկ այսօր Ադրբեջանի պետական անվտանգության ծառայությունը հաղորդագրություն տարածեց, որ հայտնաբերել է Իրանի հատուկ ծառայությունների ստեղծած լրտեսական ցանց։