Էկոնոմիկայի նախարարություն

«ԵԱՏՄ 10 տարիները. հեռանկարներ և առաջնահերթություններ»․ Երևանում կանցկացվի երրորդ Եվրասիական տնտեսական ֆորումը

Սեպտեմբերի 30-ից հոկտեմբերի 1-ը Եվրասիական տնտեսական միության մարմիններում Հայաստանի Հանրապետության նախագահության շրջանակներում Երևանում կանցկացվի երրորդ Եվրասիական տնտեսական ֆորումը: Այս մասին հայտնում են ՀՀ էկոնոմիկայի նախարարությունից։ Այն նվիրված է Եվրասիական տնտեսական միության մասին պայմանագրի ստորագրման 10-ամյակին, ինչով պայմանավորված ֆորումի հիմնական թեման է՝ «ԵԱՏՄ 10 տարիները. հեռանկարներ և առաջնահերթություններ»։ Եվրասիական տնտեսական ֆորումի անցկացումն ուղղված է անդամ պետությունների և երրորդ երկրների խոշոր, միջին և փոքր բիզնեսի ղեկավարների, անդամ պետությունների բարձրաստիճան պաշտոնյաների, ԵԱՏՄ երկրների պետական մարմինների ղեկավարների, գիտական և կրթական կազմակերպությունների ներկայացուցիչների տնտեսական համագործակցության հետագա զարգացմանը, արտահանման ներուժի խթանմանը, տնտեսվարող սուբյեկտների միջև կոոպերացիոն կապերի ձևավորմանը և ներդրումային և նորարարական ներուժի համադրությամբ սիներգիկ էֆեկտին հասնելուն: Ֆորումի բիզնես ծրագիրը ներառում է շուրջ 30 միջոցառում։ Հիմնական թեմաները ԵԱՏՄ-ում ինտեգրացիոն գործընթացների ամենաարդիական և տարածված հարցերի վերհանումն է։ Ֆորումին մասնակցությունն անվճար է։ Մասնակցելու համար անհրաժեշտ է մինչև սեպտեմբերի 25-ը ժամը 13:00-ն գրանցվել հետևյալ հղումով։

10:20 - 12 սեպտեմբերի, 2024

Քննարկվել են Հայաստանի և ԱՄԷ-ի միջև ապրանքաշրջանառության ծավալների ավելացման հեռանկարները

ՀՀ էկոնոմիկայի նախարարի տեղակալ Նարեկ Տերյանը սեպտեմբերի 10-ին ընդունել է ԱՄԷ արտաքին գործերի նախարարության էներգետիկայի և կայուն զարգացման հարցերով նախարարի օգնական Աբդուլլա Ահմեդ Բալաային։ Հանդիպմանը մասնակցել է նաև Հայաստանի Հանրապետությունում Արաբական Միացյալ Էմիրությունների արտակարգ և լիազոր դեսպան Նարիման Մուհամմեդ Շարիֆ Ալ Մուլլան: Քննարկվել են երկու երկրների միջև ապրանքաշրջանառության ծավալների ավելացման հեռանկարները, երկու երկրների գործարար համայնքների համագործակցության հնարավորությունները։ Բարձր է գնահատվել հատկապես վերջին տարիներին էմիրաթական ընկերությունների կողմից Հայաստանի տնտեսությունում ակտիվորեն ներդրումներ իրականացնելու փաստը։ Մտքեր են փոխանակվել երկու երկրների միջև տնտեսական կապերի զարգացման և տարբեր ոլորտներում ներդրումային ծրագրերի իրականացման վերաբերյալ։ Հանդիպման ընթացքում կողմերն անդրադարձել են նաև սննդի անվտանգությանը և Արաբական Միացյալ Էմիրությունների՝ «Մասդար» ընկերության կողմից Հայաստանում արևային կայանի հիմնմանը վերաբերող հարցերի։

18:43 - 10 սեպտեմբերի, 2024

Հայաստանում կան աննախադեպ հնարավորություններ, որոնցից կարող են օգտվել նաև լիտվացի գործարարները. Պապոյան

Լիտվայի Հանրապետություն կատարած այցի շրջանակում ՀՀ էկոնոմիկայի նախարար Գևորգ Պապոյանը Վիլնյուսի առևտրաարդյունաբերական և արհեստների պալատում մասնակցել է հայ-լիտվական գործարար համաժողովի բացման արարողությանը, տեղեկացնում են ՀՀ էկոնոմիկայի նախարարությունից: Միջոցառմանը մասնակցել են նաև նախարարի տեղակալ Նարեկ Հովակիմյանը, Լիտվայում ՀՀ արտակարգ և լիազոր դեսպան Արա Մարգարյանը։ Ողջունելով համաժողովի մասնակիցներին՝ նախարարը ներկայացրել է Հայաստանի տնտեսության զարգացման մոդելը՝ նշելով, որ ներկայումս սպառման հաշվին աճող տնտեսական մոդելը փոխարինվում է ներդրումների հաշվին աճող տնտեսական մոդելով։ Նա նաև ավելացրել է, որ բազմաթիվ ծրագրեր են իրականացվում արդյունաբերության, լոգիստիկայի, անշարժ գույքի զարգացման, գյուղատնտեսության, զբոսաշրջության և այլ ոլորտներում, որոնք կարող են գրավիչ լինել լիտվացի գործարարների համար։ «Հայաստանում կան աննախադեպ հնարավորություններ, որոնցից կարող են օգտվել նաև լիտվացի գործարարները, և համոզված եմ, որ այսօրվա հանդիպումը ևս մեկ հնարավորություն է նոր, արդյունավետ կապեր հաստատելու ու հետագա համագործակցությունն ընդլայնելու համար»,- նշել է Գևորգ Պապոյանը։ Համաժողովին մասնակցել են տնտեսության տարբեր ոլորտներ ներկայացնող գործարարներ Հայաստանից և Լիտվայից։

12:08 - 10 սեպտեմբերի, 2024

Համագործակցության հեռանկարներ բիոէներգետիկայի ոլորտում․ Պապոյանն այցելել է լատվիական EggEnergy ընկերություն

Էկոնոմիկայի նախարարությունից հայտնում են՝ Լատվիայի Հանրապետություն կատարած այցի շրջանակներում նախարար Գևորգ Պապոյանը այցելել է «EggEnergy» ընկերություն, որը զբաղվում է շրջանաձև կանաչ տնտեսության զարգացմամբ՝ էներգիայի այլընտրանքային աղբյուրների և տեխնոլոգիական իննովացիաների կիրառմամբ։ Նախարարին ուղեկցել է նախարարի տեղակալ Նարեկ Հովակիմյանը։ Ընկերությունը թռչնաբուծական գոմաղբից արտադրում է բիոգազ, ստեղծում էներգետիկ կարողություններ, ինչպես նաև օրգանական պարարտանյութեր։ Նախարարը շրջել է ընկերության տարածքով, ծանոթացել արտադրական գործընթացներին և ներուժին։ Գևորգ Պապոյանը ընդգծել է շրջակա միջավայրի պաշտպանության տեսանկյունից կանաչ շրջանաձև գյուղատնտեսության անհրաժեշտությունը և կարևորությունը։ Երկուստեք պայմանավորվածություն է ձեռք բերվել սեպտեմբերին կազմակերպել ընկերության ներկայացուցիչների այց Հայաստանի Հանրապետություն՝ համագործակցություն հաստատելու և իրենց կողմից կիրառվող տեխնոլոգիաները ՀՀ-ում ներդնելու նպատակով։

18:00 - 08 սեպտեմբերի, 2024

Գևորգ Պապոյանը հանդիպում է ունեցել նաև Լատվիայի էկոնոմիկայի նախարար Վիկտորս Վալայնիսի հետ

Լատվիայի Հանրապետություն կատարած այցի շրջանակում սեպտեմբերի 6֊ին նախարար Գևորգ Պապոյանը հանդիպում է ունեցել նաև Լատվիայի Հանրապետության էկոնոմիկայի նախարար Վիկտորս Վալայնիսի հետ։ Հանդիպմանը ներկա են եղել նաև նախարարի տեղակալ Նարեկ Հովակիմյանը, Լատվիայում ՀՀ արտակարգ և լիազոր դեսպան Արա Մարգարյանը, պատվավոր հյուպատոս Մխիթար Մխիթարյանը։ Այս մասին տեղեկացնում են ՀՀ էկոնոմիկայի նախարարությունից։ Հանդիպման ընթացքում անդրադարձ է կատարվել համատեղ հետաքրքրություն ներկայացնող և համագործակցության հեռանկարներ ունեցող մի շարք ուղղությունների, մասնավորապես՝ արդյունաբերության, գյուղատնտեսության, զբոսաշրջության և այլ ոլորտներին առնչվող հարցերի։ Երկուստեք կարևորվել են երկու երկրների միջև առկա բարեկամական հարաբերությունները, որոնք նպաստում են փոխգործակցության շարունակական զարգացմանն ու ամրապնդմանը: Քննարկվել են արտահանման և ներմուծման նոր ուղիներ գտնելու հնարավորությունը, ապրանքաշրջանառության, արդյունաբերական նախագծերի համատեղ իրականացման և երկկողմ տնտեսական համագործակցության զարգացման վերաբերյալ մի շարք հարցեր։ Կողմերը հույս են հայտնել, որ այս հանդիպումը հնարավորություն կընձեռնի ամրապնդելու պոտենցիալ գործընկերությունը տնտեսության տարբեր ոլորտներում։

11:36 - 07 սեպտեմբերի, 2024

Գևորգ Պապոյանը Լատվիայի Հանրապետության գյուղատնտեսության նախարարությունում հանդիպում է ունեցել պետքարտուղար Գիրց Կրումինշի հետ

Սեպտեմբերի 6֊ին նախարար Գևորգ Պապոյանը Լատվիայի Հանրապետության գյուղատնտեսության նախարարությունում հանդիպում է ունեցել պետքարտուղար Գիրց Կրումինշի հետ։ Հանդիպմանը ներկա են եղել նաև նախարարի տեղակալ Նարեկ Հովակիմյանը, Լատվիայում ՀՀ արտակարգ և լիազոր դեսպան Արա Մարգարյանը։ Այս մասին հայտնում են ՀՀ էկոնոմիկայի նախարարությունից։ Քննարկվել են Հայաստանի և Լատվիայի միջև առևտրատնտեսական հարաբերությունների զարգացմանը, Հայաստանի տնտեսության դիվերսիֆիկացմանը, տնտեսության տարբեր ուղղություններով համագործակցության ընդլայնմանը վերաբերող հարցեր։ Առանձին անդրադարձ է կատարվել արտահանման ծավալների ընդլայնման հնարավորություններին։ Նախարարը լատվիական կողմին ներկայացրել է ՀՀ տնտեսության ոլորտում իրականացվող պետական քաղաքականությունն ու տնտեսավարողներին առաջարկվող պետական աջակցության գործիքակազմը։ Նախարարն իր խոսքում անդրադարձել է նաև գործարար կապերի ամրապնդման ու ընդլայնման անհրաժեշտությանը։

10:17 - 07 սեպտեմբերի, 2024

Էկոնոմիկայի փոխնախարարն ու Չու Դոնգյուն այցելել են Արմավիրի մարզում գտնվող խաղողի ազգային կոլեկցիոն այգի

ՀՀ էկոնոմիկայի նախարարի տեղակալ Արման Խոջոյանը ՄԱԿ Պարենի և գյուղատնտեսության կազմակերպության գլխավոր տնօրեն Չու Դոնգյուի հետ այցելել է Արմավիրի մարզում գտնվող խաղողի ազգային կոլեկցիոն այգի: Այցին մասնակցել է նաև Հայաստանի խաղողագործության և գինեգործության հիմնադրամի գործադիր տնօրեն Զարուհի Մուրադյանը։ Այս մասին տեղեկացնում են ՀՀ էկոնոմիկայի նախարարությունից: Այգին հիմնվել է 2016 թվականին՝ ՄԱԿ ՊԳԿ «Տեխնիկական աջակցություն խաղողի ֆիլոքսերադիմացկուն հավաստագրված տնկանյութի արտադրությանը» ծրագրի շրջանակներում։ Այն Հայաստանում խաղողի միակ ամբողջական կոլեկցիոն այգին է, որտեղ առկա են հայկական խաղողի շուրջ 400 գենոտիպեր։ Վերջին տարիներին հիմնովին վերատնկվել և բարեկարգվել են այգու հենասյուները, նորոգվել է տարածքի ցանկապատը, փոխվել են այգու շարքերի լարերը, պարբերաբար կատարվում են հողի հարթեցման ու փխրեցման և մի շարք այլ աշխատանքներ։ Չու Դոնգյուն և կազմակերպության մյուս անդամները ծանոթացել են այգում կատարված և շարունակական բնույթ կրող բարեկարգման աշխատանքներին։ Այցի ընթացքում Արման Խոջոյանն ու Չու Դոնգյուի գլխավորած պատվիրակությունը եղել են նաև ՄԱԿ ՊԳԿ աջակցությամբ Վեդու թիվ 1 հիմնական դպրոցում հիմնած ջերմատանն ու չրանոցում։

11:33 - 05 սեպտեմբերի, 2024

ՀՀ Էկոնոմիկայի նախարարության և Գերմանիայի միջազգային համագործակցության կազմակերպության (GIZ) միջև ստորագրվել է փոխըմբռնման հուշագիր

Սեպտեմբերի 4-ին էկոնոմիկայի նախարար Գևորգ Պապոյանը և Գերմանական միջազգային համագործակցության ընկերության (GIZ) հայաստանյան գրասենյակի ղեկավար Մադլեն Ռաուշենբերգերը ստորագրել են ՀՀ Էկոնոմիկայի նախարարության և Գերմանիայի միջազգային համագործակցության կազմակերպության (GIZ) միջև փոխըմբռնման հուշագիր։ Այդ մասին հայտնում են էկոնոմիկայի նախարարությունից: Հուշագրով 2023 թվականի հունվարից Էկոնոմիկայի նախարարության կողմից իրականացվող, Կառավարության 355-Լ որոշմամբ հաստատված բարձր որակավորում ունեցող մասնագետների ներգրավման նպատակային ծրագրի թվային հարթակի հեղինակային իրավունքը Գերմանիայի միջազգային համագործակցության կազմակերպության կողմից փոխանցվում է Էկոնոմիկայի նախարարությանը։ Թվային հարթակի մշակումը իրականացվել է Գերմանիայի միջազգային համագործակցության կազմակերպության ֆինանսավորմամբ։ Թվային հարթակի օգտագործումը էապես կբարձրացնի բարձր որակավորում ունեցող մասնագետների ներգրավման նպատակային ծրագրի իրականացման արդյունավետությունը՝ հեշտացնելով և պարզեցնելով կազմակերպությունների կողմից դիմումների ներկայացման և դրանց ստուգման գործընթացները։

16:15 - 03 սեպտեմբերի, 2024

«Կավկազ» նավահանգստում խորտակված լաստանավում հայկական բեռներ չեն եղել |armenpress.am|

armenpress.am: Ռուսական «Կավկազ» նավահանգստում հրթիռային գրոհի հետևանքով խորտակված լաստանավում հայկական ծագման կամ Հայաստանի համար նախատեսված բեռներ չեն եղել: Այդ մասին հայտնում են ՀՀ էկոնոմիկայի նախարարությունից: Գերատեսչությունում նշեցին նաև, որ ռուսական լաստանավի կործանումը որևէ կերպ չի անդրադառնա Հայաստանի տնտեսությանը: Ռուսական լրատվամիջոցների հաղորդմամբ՝ օգոստոսի 22-ի ցերեկը ուկրաինական զինուժը Storm Shadow թևավոր հրթիռով հարվածել է ՌԴ Կրասնոդարի երկրամասում գործող «Կավկազ» նավահանգստին, որտեղ գտնվող «Ակվատրեյդեր» լաստանավը բռնկվել ու կարճ ժամանակ անց խորտակվել է: Այն տեղափոխում էր 30 բաք վառելիք: Բռնկված հրդեհի ճիրաններում է հայտնվել մոտ 500 քառակուսի մետր տարածք: Նավահանգստին պատճառվել է զգալի վնաս: ՌԴ Արտակարգ իրավիճակների նախարարությունը հայտնել է լաստանավի անձնակազմի 17 անդամների փրկվելու մասին: Վերջին տեղեկություններով՝ 1 մարդու գտնվելու վայրը դեռևս մնում է անհայտ:

13:40 - 23 օգոստոսի, 2024

Գևորգ Պապոյանն ու Հայաստանի աուդիտորների և փորձագետ հաշվապահների պալատի նախագահը փոխըմբռնման հուշագիր են ստորագրել

ՀՀ էկոնոմիկայի նախարար Գևորգ Պապոյանը և «Հայաստանի աուդիտորների և փորձագետ հաշվապահների պալատ» հասարակական կազմակերպության նախագահ Թաթուլ Մովսիսյանը օգոստոսի 23-ին ստորագրել են «Հայաստանի Հանրապետության էկոնոմիկայի նախարարության և Հայաստանի աուդիտորների և փորձագետ հաշվապահների պալատի միջև գործարար միջավայրի բարելավմանն ուղղված համագործակցության մասին» փոխըմբռնման հուշագիր, տեղեկացնում են ՀՀ էկոնոմիկայի նախարարությունից։ «Էկոնոմիկայի նախարարությունից տեղեկացնում են, որ կողմերը կհամագործակցեն նախարարության լիազորությունների և Պալատի գործառույթների շրջանակներում, որը կներառի իրազեկման աշխատանքներ նախարարության կարգավորման ներքո գտնվող ոլորտում իրականացվող քաղաքականության և նախատեսվող միջոցառումների վերաբերյալ, տեխնիկական բնույթի խորհրդատվություններ։ Պալատի կողմից կտրամադրվեն ոլորտային իրավական ակտերի նախագծերի վերաբերյալ մեթոդական և նոր իրավական ակտերի նախագծերի մշակման օժանդակություն, ոլորտային խնդիրների վերաբերյալ վերլուծությունների իրականացում և այլն։ Նախաձեռնությունում առաջնայնություն կտրվի պետություն-մասնավոր հատված համագործակցությանը և այն նախաձեռնություններին, որոնք առավելագույն օգուտներ են ապահովում ոլորտում գործող տնտեսվարողների համար»,-ասված է հաղորդագրության մեջ։

12:33 - 23 օգոստոսի, 2024

Արտահանման մասով ճանապարհը բաց է, ոչ մի հերթ չկա, հերթերը վերադառնալիս են. Պապոյանը՝ Լարսի մասին |1lurer.am|

1lurer.am: Արտահանման մասով ճանապարհը բաց է, ոչ մի հերթ չկա, հերթերը վերադառնալիս են, այսինքն՝ երբ մեր մեքենաները գնում են, դատարկում են իրենց բեռը, հետ են գալիս: Այդ մասին Կառավարության ճեպազրույցների ժամանակ ասաց ՀՀ էկոնոմիկայի նախարար Գևորգ Պապոյանը՝ պատասխանելով հարցին, թե եղե՞լ են դեպքեր, երբ արգելվել է հայկական կոնյակ արտադրողների ապրանքների արտահանումը Մոսկվա, ինչպես նաև անդրադառնալով Լարսում կուտակումներին: «Զբոսաշրջային մեծ հոսքեր ունեն իրենք Ռուսաստանից դեպի Վրաստան, Հայաստան, գուցե նաև Թուրքիա՝ չեմ կարող ասել: Այդ պատճառով, բնականաբար, այդ ճանապարհին միայն բեռնատարներ չեն, բազմաթիվ մարդատար մեքենաներ կան, ավտոբուսներ կան, որի հետևանքով, այո՛, հերթեր կան: Բայց ինձ փոխանցվող տեղեկության համաձայն՝ ամեն հաջորդ օր հերթն ավելի կարճ է, ավելի քիչ է, քան նախորդ օրը»,- ասաց նախարարը:

13:35 - 22 օգոստոսի, 2024

Չէի ուզենա, որ աջակցության փաթեթների հետ կապված քրեական գործերի փաթեթներ ստանանք. Փաշինյանը՝ հեղեղումներից տուժածների ծրագրի մասին |1lurer.am|

1lurer.am: Չէի ուզենա, որ աջակցության փաթեթների հետ կապված քրեական գործերի փաթեթներ ստանանք, տարբեր հավելագրումներ: Այդ մասին Կառավարության՝ օգոստոսի 15-ի նիստին հայտարարեց ՀՀ վարչապետ Նիկոլ Փաշինյանը՝ անդրադառնալով աղետի գոտում ոչնչացված կամ անկած գյուղատնտեսական կենդանիների փոխհատուցման համար նախատեսված ծրագրին: Այս համատեքստում Նիկոլ Փաշինյանը հետաքրքրվեց՝ հանձնաժողովն աշխատանք արե՞լ է, որ հետին թվով գյուղատնտեսական կենդանիների գլխաքանակներ չավելանան: Էկոնոմիկայի նախարար Գևորգ Պապոյանը նշեց՝ աջակցության տրամադրման համար կա պայման, որ հունվարի դրությամբ պետք է գյուղատնտեսական կենդանիները հաշվառված լինեն ծխամատյաններում: ՀՀ փոխվարչապետ Տիգրան Խաչատրյանն էլ հավելեց՝ համայնքային հանձնաժողովներն արձանագրել են՝ որտեղ ինչ կորուստներ են եղել, և այդ հանձնաժողովների եզրակացությունները հանրապետական հանձնաժողովների ձեռքի տակ են: «Մենք ասում ենք՝ ելակետը հանձնաժողովի եզրակացությունն է, դա ենք համեմատելու, տեսնենք՝ եթե այդ հանձնաժողովի եզրակացության մեջ գրված է, գրանցված է նաև ծխամատյանում, ապա որոշված արժեքի 100 տոկոսն ենք տալու: Եթե այդ հանձնաժողովները արձանագրել են, գիտեն հարևաններով, որ տանը 2 խոզ է եղել, նայում ենք, տեսնում ենք, որ ծխամատյաններում գրանցված չի եղել, հաշվի առնելով, որ ծխամատյանում գրանցելու ավանդույթն ընդունված չէ, այդ դեպքում կեսը կտանք ամբողջ արժեքի»,- ասաց փոխվարչապետը: Հիշեցնենք, որ աղետի գոտում ոչնչացված կամ անկած գյուղատնտեսական կենդանիների աջակցության ծրագրի համաձայն՝ աջակցություն է տրամադրվում համայնքների տնտեսությունների գրքերում հաշվառված, խոշոր եղջերավոր կենդանիների դեպքում՝ նաև «ԱՆԻ ՊԱՍ» էլեկտրոնային տեղեկատվական համակարգի տվյալների հետ համադրված, կենդանիների համար գնահատված արժեքի 100 տոկոսի չափով: Օրինակ՝ ցուլ (1 գլխի համար)՝ կտրամադրվի 650 հազար դրամ, կով՝ 550 հազար դրամ, հորթ՝ 110 հազար, խոզ՝ 100 հազար, խոճկոր՝ 40 հազար, ոչխար և այծ՝ 50 հազար, գառ՝ 40 հազար դրամ, ձի՝ 350 հազար դրամ, ավանակ՝ 80 հազար, ճագար՝ 3000 դրամ, հավ՝ 2500, բադ՝ 4000 դրամ, սագ՝ 5000, հնդկահավ՝ 7000, մեղվափեթակ՝ 60 հազար, ծիածանափայլ իշխանի մայրական կազմ՝ 2400 դրամ:

13:11 - 15 օգոստոսի, 2024

300 նոր աշխատատեղ կբացվի. Պապոյանն այցելել է Երասխից Արարատ տեղափոխված գործարան

ՀՀ էկոնոմիկայի նախարար Գևորգ Պապոյանն այցելել է Արարատում կառուցվող մետաղաձուլական գործարան։ Տեղեկությունը հայտնում է գերատեսչության մամուլի ծառայությունը։ «Մետաղագործական արտադրությունը գործարկվելու է հայ-ամերիկյան «Ջի Թի Բի Սթիլ» ՍՊԸ ձեռնարկության կողմից։ Գործարանը մասնագիտանալու է սև մետաղների, այդ թվում՝ ամրանների, պողպատե անկյունների, խողովակների արտադրության մեջ։ Այս գերժամանակակից կառույցը խոշոր ներդրում է Հայաստանի արդյունաբերական ենթակառուցվածքում և ակնկալվում է, որ էական ներդրում կունենա երկրի տնտեսության մեջ»,– նշված է հաղորդագրության մեջ: Նախատեսվում է առաջին փուլով 30 մլն դոլարի (երկրորդ փուլով՝ ևս 40 մլն դոլարի) ներդրում կատարել, ստեղծվելու է շուրջ 300 նոր աշխատատեղ։ Նախարարը շրջել է գործարանի տարածքով, ծանոթացել արտադրական կարողություններին և առաջադեմ տեխնոլոգիաներին, որոնք կկիրառվեն բարձրորակ պողպատե արտադրանքի արտադրության մեջ։ Նշենք, որ նախարարին ուղեկցել են նախարարի տեղակալ Նարեկ Տերյանը, Արարատի մարզպետ Սեդրակ Թևոնյանը և Արարատ խոշորացված համայնքի ղեկավար Ասլան Ավետիսյանը։

20:50 - 09 օգոստոսի, 2024

Լաստանավին զուգահեռ ՌԴ-ն մեծացրել է թողունակությունը Լարսի միջոցով, լաստանավի կարիքը չկա. Պապոյան |1lurer.am|

1lurer.am: Լաստանավին զուգահեռ ՌԴ-ն մեծացրել է թողունակությունը Լարսի միջոցով, որի պարագայում լաստանավի կարիքը չկա: Լաստանավը վարձակալվել է, բայց հիմա դրա կարիքը չկա: Այդ մասին Կառավարության նիստից հետո լրագրողների հետ ճեպազրույցում ասաց էկոնոմիկայի նախարար Գևորգ Պապոյանը: «Մեր տնտեսավարողները շարունակում են օգտվել այդ ճանապարհից, և թեկուզ հերթերի միջոցով դա ավելի նախընտրելի է, իմ կարծիքով դրանք առաջիկայում կքչանան, և այդ խնդիրները կլուծվեն: Կա տեխնիկատնտեսական ուսումնասիրություն չոր նավահանգստի հետ կապված, որտեղ նշված է, որ որոշակի պայմանների առկայության պարագայում այդ պրոյեկտն արդյունավետ է, որոշների պարագայում՝ ոչ: Մենք հետևում ենք գործընթացին, այն պահին, երբ որ մենք կհամարենք, որ նպատակահարմար է մտնել այդ գործընթացի մեջ՝ կմտնենք, քանի դեռ ոչ՝ ոչ»,- ասաց Պապոյանը:

14:11 - 08 օգոստոսի, 2024

Գևորգ Պապոյանի մոտ տեղի է ունեցել գործարարների և քաղաքացիների ընդունելություն

Օգոստոսի 3-ին Էկոնոմիկայի նախարար Գևորգ Պապոյանի մոտ տեղի է ունեցել գործարարների և քաղաքացիների ընդունելություն: Այս մասին հայտնում են ՀՀ էկոնոմիկայի նախարարությունից․ «Քաղաքացիների կողմից բարձրաձայնված հարցերը վերաբերում էին գյուղատնտեսության, արդյունաբերության, սոցիալական խնդիրներին և այլ թեմաների։ Նախարարը ծանոթացել է քաղաքացիների խնդիրներին և ներկայացրել պետական օժանդակության ծրագրերը, ծրագրերից օգտվելու պայմաններն ու ընթացակարգը, որոնք կարող են նպաստել նրանց գործունեության ընդլայնմանը։ Համապատասխան ստորաբաժանումներին տրվել են հանձնարարականներ՝ նախարարության իրավասության շրջանակներում գտնվող հարցերին հնարավոր լուծումներ տալու վերաբերյալ», - նշված է հայտարարությունում։

12:47 - 03 օգոստոսի, 2024

Գևորգ Պապոյանը և Ֆղանսուազ Ժակոբը քննարկել են տնտեսության ոլորտում իրականացվող ծրագրերը

Էկոնոմիկայի նախարար Գևորգ Պապոյանը օգոստոսի 2-ին ընդունել է Հայաստանում ՄԱԿ-ի մշտական համակարգող Ֆղանսուազ Ժակոբին։ Հանդիպմանը ներկա է եղել նաև նախարարի տեղակալ Նարեկ Հովակիմյանը։ Այդ մասին հայտնում են ՀՀ էկոնոմիկայի նախարարությունից: Հանդիպման սկզբում նախարարը շնորհավորել է Ֆղանսուազ Ժակոբին պաշտոնը ստանձնելու կապակցությամբ և մաղթել հաջողություններ Հայաստանի կայուն տնտեսական զարգացման ապահովմանն ուղղված բոլոր նախաձեռնություններում։ «Մեզ համար առաջնահերթ է ՄԱԿ-ի համապատասխան գործակալությունների հետ մեր համագործակցության ծրագրերի ընդլայնումը` աղքատության կրճատման, շրջակա միջավայրի պաշտպանության և Կայուն զարգացման նպատակներին հասնելու ուղղությամբ»,- նշել է Գևորգ Պապոյանը: Կողմերը քննարկել են տնտեսության ոլորտում իրականացվող ծրագրերը, տնտեսական զարգացմանը միտված համատեղ աշխատանքների շարունակականությունն ու համագործակցության ընդլայնման հնարավորությունները առևտրի, գյուղատնտեսության և մի շարք այլ ոլորտներում։ Անդրադարձ է կատարվել Լեռնային Ղարաբաղից բռնի տեղահանված անձանց կարիքների լուծման համար երկարաժամկետ կայուն կենսապայմանների ապահովմանն ուղղված աշխատանքներին։ Գևորգ Պապոյանը նշել է, որ ՀՀ կառավարությունը ջանքեր է գործադրում տարածաշրջանային հակամարտությունները հաղթահարելու ուղղությամբ և ցանկանում է ստեղծել մի նոր իրականություն, որտեղ բոլոր երկրները կապվելու են ակտիվ քաղաքական, տնտեսական և մշակութային կապերով։ Այս համատեքստում նախարարը ներկայացրել է Կառավարության կողմից ձեռնարկված «Խաղաղության խաչմերուկ» նախաձեռնությունը, որը կարող է դառնալ ինչպես տարածաշրջանային, այնպես էլ ավելի լայն տնտեսական համագործակցության կարևոր բաղկացուցիչ։

13:25 - 02 օգոստոսի, 2024