Արման Ուդումյան

Արման Սամվելի Ուդումյանը 2018թ․հունիսից ՀՀ աշխատանքի եւ սոցիալական հարցերի նախարարի տեղակալն է։

Ծնվել է 1977թ. հունիսի 21-ին Տավուշի մարզի Այգեպար գյուղում: 1998թ. ավարտել է ԵՊՄՀ պատմության ֆակուլտետը։ 2009թ. ավարտել Է Լոնդոնի Տնտեսագիտության դպրոցը` ստանալով Եվրոպական սոցիալական քաղաքականության մագիստրոսի աստիճան։ 2011թ. ավարտել է «Հանրային քաղաքականություն եւ կառավարում» վեցամսյա ծրագիրը Ֆլետչերի անվան Իրավունքի եւ Դիվանագիտության Դպրոցում։ 1998–2000թթ. ծառայել Է հայկական զինված ուժերում:

2002-2003թթ. աշխատել է որպես Ծրագրի ղեկավարի օգնական «Նոր Հայաստան» հումանիտար աջակցության կենտրոն ՀԿ-ում: 2003-2005թթ. որպես կամավոր ներգրավված է եղել «Փարոս» երիտասարդական միություն եւ ՄԱԿ-ի Հայկական ասոցիացիա հկ-ների ծրագրերում։ 2004-2006թթ. աշխատել է որպես առաջատար, ապա գլխավոր մասնագետ ՀՀ ԱՍՀՆ «Նորք» տեղեկատվավերլուծական կենտրոնում: 2005-2006թթ. եղել է ՄԱԿ-ի հայկական ասոցիացիա ՀԿ-ի գործադիր տնօրենը: 2006-2007թթ․ աշխատել է որպես գլխավոր մասնագետ Սոցիալական ապահովության պետական ծառայությունում։ 2007-2008թթ. եղել է Սոցիալական ապահովության պետական ծառայության պետի օգնական։ 2009թ․ ապրիլ-օգոստոս ամիսներին աշխատանքային պրակտիկա է անցել Լոնդոնի Սիներջի կենտրոնում: 2010թ. որպես կենսաթոշակային հարցերով փորձագետ աշխատել է Հայաստանում ԵՄ խորհրդատվական խումբ ծրագրում: 2010-2014թթ․ եղել է ՀՀ Վարչապետին կից Երիտասարդական ազգային քաղաքականության խորհրդի անդամ: 2011-2012թթ. աշխատել է Կենսաթոշակային համակարգի իրազեկման կենտրոն հիմնադրամում: 2016-2017թթ. աշխատել է որպես դրամաշնորհային ծրագրերի պատասխանատու Հետազոտական ռեսուրսների կովկասյան կենտրոն-ՀԱՅԱՍՏԱՆ կազմակերպությունում։

ԱԺ-ն քննարկում է արտակարգ դրության ընթացքում գործատու-աշխատող հարաբերությունները հստակեցնող նախագիծը |armenpress.am|

armenpress.am: ՀՀ ազգային ժողովը քննարկում է կառավարության կողմից ներկայացված օրենքների նախագծերի փաթեթը, որով նախատեսում է հեռավար եղանակով աշխատելու պարագայում աշխատավարձն ամբողջությամբ վճարելու հնարավորություն, նաև արտաժամի ավելացում: ՀՀ աշխատանքային օրենսգրքում լրացումներ եւ փոփոխություններ կատարելու մասին և Վարչական իրավախախտումների վերաբերյալ ՀՀ օրենսգրքում լրացում կատարելու մասին օրենքների նախագծերի փաթեթն ԱԺ նիստում ներկայացրեց ՀՀ աշխատանքի և սոցիալական հարցերի փոխնախարար Արման Ուդումյանը: «Սահմանել ենք հեռավար եղանակով իրականացվող աշխատանքի հասկացությունը, և հեռավար եղանակով աշխատանքների կազմակերպման հնարավորության պարագայում աշխատավարձն ամբողջությամբ վճարելու հնարավորություն ենք նախատեսել: Բացի այդ նախատեսում ենք, որ հեռավար եղանակով աշխատանքների կազմակերպումը չհամարվի աշխատանքային պայմանագրի էական պայմանի փոփոխություն: Սրանով գործատուներին հնարավորություն կտանք լինել ճկուն: Հստակեցրել ենք, որ գործատուն կարող է նաև չվճարել աշխատողին հարկադիր պարապուրդի համար»,-ասաց նա: Ուդումյանը նշեց, որ այս պահին ևս կա հոդված, որ անհաղթահարելի ուժով պայմանավորված՝ գործատուն կարող է չվճարել աշխատողին, սակայն հիմա հստակեցում է արվում: «Եվ նախատեսում ենք, որ պարետի կողմից որոշակիորեն սահմանված ոլորտներում կգործի անհաղթահարելի ուժի սահմանումը»,-նշեց նա: Նախատեսվել է նաև, որ գործատուի ցանկության դեպքում հարկադիր պարապուրդի վճարը կարող է լինել ավելին, քան ներկայումս՝ միջին ժամային աշխատավարձի երկու երրորդը: Եվ այս մասով տրվել է նաև հետադարձ ուժ: Սահմանել է նաև, որ անհաղթահարելի ուժ համարվող պատճառներով առաջացած հարկադիր պարապուրդի համար գործատուն կարող է նաև իր ցանկությամբ վճարել: «Այսպիսով, մենք մի կողմից գործատուին հնարավորություն ենք տալիս չվճարել անհաղթահարելի ուժի ծագման պարագայում, մյուս կողմից կրկին հարցը թողնում ենք գործատու-աշխատող իրավահարաբերությունների ճշգրտմանը: Սահմանել ենք նաև, որ նախատեսվի գործատուի համար պարտադիր պահանջ, որ աշխատողի պահանջով աշխատողին տրամադրվի իր չօգտագործված արձակուրդը՝ անհաղթահարելի ուժի ծագման դեպքում»,-ասաց փոխնախարարը: Նախատեսվել է նաև, որ այս իրավիճակով պայմանավորված գործատուն իրավունք չունենա լուծել աշխատանքային պայմանագիրը կամ կարգապահական տույժ կիրառել այն աշխատակիցներին նկատմամբ, որոնք իրավիճակով պայմանավորված չեն կարողանում ներկայանալ աշխատանքի կամ ներակայանում են աշխատանքի ավելի ուշ: Այն ծնողների համար, որոնք նախաուսումնական, ուսումնական հաստատությունների փակման կամ արձակուրդների տեղափոխման արդյունքում ստիպված են մնալ տանը և խնամել իրենց երեխաներին, ապա 2 ժամ ուշանալու դեպքում, նրանց աշպատվարձը կվճարվի ամբողջությամբ, իսկ 2 ժամից հետո աշխատավարձը կվճարվի փաստացի կատարած աշխատանքին համարժեք կերպով: Ներկայիս կարգավորումով արտաժամյա աշխատանքը չի կարող լինել 4 ժամից ավելի՝ իրար հաջորդող երկու օրերի ընթացքում: Նոր կարգավորմամբ, նաև հաշվի առնելով, որ արտակարգ դրությամբ պայմանավորված որոշակի ոլորտներում գործատուները պահանջ ունեն աշխատուժի, արտաժամը ավելացվել է և հասցվել մինչև 8 ժամ՝ իրար հաջորդող 2 օրերի ընթացքում:

20:35 - 28 ապրիլի, 2020