Թուրքիա

«Անատոլիայի հայերը 104 տարի է՝ արդարության են սպասում». Կարո Փայլանի գրառումը |tert.am|

tert.am: Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի՝ Դիարբեքիրից ընտրված պատգամավոր Կարո Փայլանն իր ֆեյսբուքյան էջում անմոռուկի նկար է տարածել և կից գրառում կատարել: «Հայոց ցեղասպանությունը 104 տարի առաջ այս օրը սկսվեց: Նախ հայ մտավորականները, հետո հայ ժողովուրդն իր պատմական հողերից աքսորվեց, սպանվեց: Անատոլիայի հայերը 104 տարի է՝ արդարության են սպասում: Եկեք այս մեծ աղետին առերեսվենք, եկեք բուժվենք»,-գրել է նա:

10:31 - 24 ապրիլի, 2019

Ստամբուլում տեղի իշխանություններն արգելել են Ցեղասպանության հիշատակի մեծ միջոցառում անցկացնել Սուլթան Ահմեդի մզկիթի մոտ |armtimes.com|

armtimes.com։ Ապրիլի 24-ին, Ստամբուլում տեղական իշխանությունները ոչ միայն արգելել են Ցեղասպանության հիշատակի մեծ միջոցառում անցկացնել Սուլթան Ահմեդի մզկիթի մոտ, այլ նաեւ մամուլի ասուլիս։ Շատ իրավապաշտպաններ անտեսել են այդ արգելքը, հայտարարել դրա մասին ու մամուլի ասուլիսը, թեպետ ընդհատումներով, բայց կայացել է։ Այս պահին խոսում է Թուրքիայի խորհրդարանի ընդդիմադիր հայ պատգամավոր Կարո Փայլանը։

10:28 - 24 ապրիլի, 2019

Թուրքիայի արտգործնախարարը հերքել է S-400-ները Ադրբեջանում տեղակայելու մասին լուրերը |ermenihaber.am|

Թուրքիայի արտգործնախարար Մևլութ Չավուշօղլուն հերքել է թուրքական և ադրբեջանական լրատվամիջոցներով տարածված այն ենթադրությունները, թե Թուրքիան Ռուսաստանի կողմից մատակարարվելիք S-400 զենիթահրթիռային ՀՕՊ համակարգեը կարող է ժամանակավորապես տեղակայել Ադրբեջանում և Կատարում։ «S-400-ները Կատարում կամ Ադրբեջանում տեղակայելու մասին հարց մեր օրակարգում չկա։ Նման հարց երբևէ օրակարգում չի էլ եղել։ Այդ հարցի շուրջ մամուլում տևական ժամանակ խոսվում է, սակայն նման հարց չկա։ Մենք Ռուսաստանի հետ պայմանագիր կնքեցինք։ Այժմ բանակցում ենք այդ համակարգերի հանձման շուրջ։ Եթե Ռուսաստանը մտադիր լիներ Ադրբեջանին վաճառեր այդ համակարգերը, ապա ուղիղ Ադրբեջանին կվաճառեր, միջնորդի կարիք չկա, չէ՞ որ երկու երկրների հարաբերությունները շատ լավ են», ասել է Չավուշօղլուն։ Նկատենք, որ ադրբեջանական լրատվամիջոցներում նման կեղծ լուրեր տարածվեցին այն բանից հետո, երբ թուրք վերլուծաբաններից մեկը այդ թեմայի մասին գրել էր իր հոդվածներից մեկում։ Նշյալ հոդվածում հեղինակը ընդամենը նման ցանկություն էր հայտնել, այնինչ ադրբեջանական լրատվամիջոցները դա լիովին այլ կերպ էին ներկայացրել։Բացի այդ էլ, երբ Թուրքիայի պաշտպանության նախարար Հուլուսի Աքարը հայտարարեց, որ այդ S-400 համակարգերը տեղակայվելու են Անկարայում ու Ստամբուլում, նա կարծես փաստացի հերքեց ադրբեջանական լրատվամիջոցների տարածած ապատեղեկատվությունը։

09:36 - 24 ապրիլի, 2019

«Չկա որևէ հարց, որ 800 տարի միասին ապրած հայերն ու թուրքերը չկարողանան լուծել երկխոսելու ճանապարհով». Թուրքիայի նախագահականի պաշտոնյա |tert.am|

tert.am: Թուրքիայի նախագահական նստավայրի հանրային կապերի բաժնի ղեկավար Ֆահրեթթին Ալթունը կոչ է արել 1915 թվականի «հայերի ջարդերի» թեման «գործիք չդարձնել քաղաքական օգուտներ ստանալու համար»: Այս մասին տեղեկացնում է թուրքական T24 կայքը: «Չկա որևէ հարց, որ երկխոսելու ճանապարհով չկարողանան լուծել 800 տարի միասին ապրած թուրքերն ու հայերը: Միայն պետք է թույլ չտալ, որ պատմությունը քաղաքականացվի»,-ասել է նա:

09:11 - 24 ապրիլի, 2019

Ստամբուլում ցեղասպանության տարելիցի կապակցությամբ 2 միջոցառում կանցկացվի |ermenihaber.am|

ermenihaber.am: Թուրքիայի Ստամբուլ քաղաքում ապրիլի 24-ին Հայոց ցեղասպանության անմեղ զոհերի հիշատակին նվիրված 2 միջոցառում կանցկացվի: Ստամբուլի մարդու իրավունքների պաշտպանության միությունը հայտարարել է, որ ապրիլի 24-ին, որը համարվում է Փոքր Ասիայում և Հյուսիսային Միջագետքում հայերի, ասորիների և հույների դեմ իրականացված ցեղասպանության սկիզբը, Ստամբուլում հիշատակի միջոցառում կանցկացվի: Նշվել է, որ միջոցառումն անցկացվելու է ժամը 12-ին Սուլթանահմեթ հրապարակում գտնվող Թուրքական և իսլամական արվեստի թանգարանի շենքի առջև: Ըստ հայտարարության՝ 1915թ այդ շենքը բանտ է եղել և Ստամբուլի հայերը մինչև աքսորվելը պահվել են այնտեղ: Ապրիլի 24-ին ժամը 19:00-ին Ստամբուլի Շիշհանե հրապարակում «Ապրիլի 24-ի հիշատակի պլատֆորմի» կողմից մամուլի ասուլիս կկազմակերպվի:Ստամբուլի Շիշլի թաղամասի հայկական գերեզմանատանը ժամը 14:30-ին տեղի կունենա հիշատակի միջոցառում՝ նվիրված 2011թ. ապրիլի 24-ին թուրք ծառայակցի արձակած կրակոցից սպանված պոլսահայ Սևակ Բալըքչըի հիշատակին:

06:50 - 24 ապրիլի, 2019

Ցյուրիխում Թուրքիայի գլխավոր հյուպատոսությունը հարձակման է ենթարկվել |news.am|

news.am: Թուրքիայի գլխավոր հյուպատոսությունը Ցյուրիխում ենթարկվել է հարձակման։ Անհայտ անձանց մի խումբ շենքի վրա պայթուցիկ խառնուրդով շշեր է նետել։ Ինչպես տեղեկացրել է Անատոլիական գործակալությանը Թուրքիայի գլխավոր հյուպատոս Ասիե Նուրջան Իփեքչին, միջադեպը տեղի է ունեցել տեղի ժամանակով ժամը 02.51-ին։Նրա խոսքով՝ Թուրքիայի գլխավոր հյուպատոսությունը Ցյուրիխում առաջին անգամ չէ, որ նման գրոհների է ենթարկվում։ Խմբավորումներից ոչ մեկն առայժմ իր վրա չի վերցրել հարձակման պատասխանատվությունը, նշել է գլխավոր հյուպատոսը։ «Ոստիկանությունը տեղեկացրել է այս գործով երեք կասկածյալի կալանելու մասին։ Նրանց անուններն առայժմ չեն նշվում։ Կարծում եմ, որ իրավիճակը կպարզվի առաջիկա օրերին»,- ասել է Իփեքչին։ Գլխավոր հյուպատոսը նշել է, որ դիվանագիտական առաքելության շենքին վնաս չի հասցվել, քանի որ մեկ շշի պարունակությունը չի այրվել, մյուսն էլ կոտրվել է պարսպին հարվածվելով։

07:18 - 23 ապրիլի, 2019

Իրաքի մուսուլմանների առաջնորդը կոչ է արել Թուրքիային ճանաչել Հայոց ցեղասպանությունը |tert.am|

tert.am։Իրաքի Ազգային կրոնական խորհրդի նախագահ շեյխ Յուսիֆ ալ Նասրին հայտարարել է, որ Թուրքիան պետք է հայերից ներողություն խնդրի «իր արարքների համար»՝ նկատի ունենալով Հայոց ցեղասպանությունը, գրում է asbarez.com-ը: Ապրիլի 17-ին ալ Նասրին հանդիպում է ունեցել Իրաքում Հայաստանի դեսպան Հրաչյա Փոլադյանի հետ: Հոգևորականը հանդիպման ժամանակ դատապարտել է Օսմանյան կայսրության իրագործած «անմարդկային ոճիրը»՝ կոչ անելով Թուրքիայի իշխանություններին ներողություն խնդրել իրենց իսկ սերունդի անունից:

07:13 - 18 ապրիլի, 2019

Անկարայում կայացել է Լուկաշենկոյի և Էրդողանի հանդիպումը

ermenihaber.am Անկարայում կայացել է Թուրքիայի և Բելառուսի նախագահների համատեղ մամուլի ասուլիսը։ Ինչպես հայտնի էր, Բելառուսի նախագահ Ալեքսանդր Լուկաշենկոն Թուրքիայի նախագահ Ռեջեփ Թայիփ Էրդողանի հրավերով մեկնել էր Անկարա։ Սա 23 տարվա մեջ Լուկաշենկոյի առաջին պաշտոնական այցն է Թուրքիա։ Էրդողանն ասուլիսի ժամանակ հույս է հայտնել, որ 2 երկրների հարաբերությունները բոլոր ոլորտներում ավելի կզարգանան: Թուրքիայի նախագահը առանձնացրել է տնտեսական համագործակցությունը, մասնավորապես կապի, տրանսպորտի և ՏՏ ոլորտներում: Տեղեկացրել է, որ կողմերը նպատակ ունեն առևտրաշրջանառությունը հասցնել 1.5 միլիարդ դոլարի: Ըստ Էրդողանի՝ երկուստեք խրախուսվելու են գործարար ներդրումները: Ուշագրավ է այն, որ Էրդողանը Լուկաշենկոյին շնորհակալություն է հայտնել գյուլենական համայնքի դեմ պայքարում աջակցելու համար: Հիշյալ կառույցը Թուրքիայում համարվում է ահաբեկչական:Նշվում է, որ հանդիպման շրջանակներում Թուրքիայի և Բելառուսի միջև 6 պայմանագիր է ստորագրվել, որոնցից մեկը վերաբերում է ռազմարդյունաբերական համագործակցությանը:

05:35 - 18 ապրիլի, 2019

ԱՄՆ-ն եւ Թուրքիան չեն կարողացել հարթել Ս-400-ի հետ կապված տարաձայնությունները |news.am|

news.am: Վաշինգտոնն ու Անկարան այս շաբաթ տեղի ունեցած խորհրդակցությունների ժամանակ չեն կարողացել հարթել տարաձայնությունները, որոնք վերաբերում են Թուրքիայի կողմից ռուսական Ս-400 զենիթահրթիռային համալիրների ձեռքբերմանը, հայտնում է The Wall Street Journal-ը: «Պաշտոնատար անձանց խոսքով՝ ԱՄՆ-ն եւ Թուրքիան չեն կարողացել դուրս գալ փակուղուց, որն առաջացել է այս ամռանը ռուսական ՀՕՊ համալիրներ տեղակայելու Անկարայի ծրագրերի հետեւանքով: Պենտագոնի հայտարարությամբ՝ դրանք կարող են տարածաշրջանում սպառնալիք ներկայացնել ամերիկյան կործանիչներին»,- արձանագրված է հոդվածում: Նշվում է, որ ԱՄՆ եւ Թուրքիայի ներկայացուցիչները Վաշինգտոնում այս թեման քննարկել են այս շաբաթ ավելի վաղ: Դրան, մասնավորապես, անդրադարձել են երկուշաբթի տեղի ունեցած ԱՄՆ նախագահ Դոնալդ Թրամփի եւ Թուրքիայի ֆինանսների նախարար Բերաթ Ալբայրաքի հանդիպման ժամանակ: Հոդվածում բերվում է Թուրքիայի նախագահի պաշտոնական ներկայացուցիչ Իբրահիմ Քալընի խոսքը: Նա հույս էր հայտնել, որ ամերիկյան կողմը Անկարայի դեմ պատժամիջոցներ չի սահմանի Ս-400-ները գնելու պատճառով: «Պատժամիջոցները հակաարդյունավետ կլինեն եւ բացասական հետեւանքների կհանգեցնեն»,- ասել էր նա: «Բոլորը պետք է հասկանան, որ Թուրքիան անվտանգության հետ կապված հիմնավոր մտավախություններ ունի»,- հավելել էր Քալընը: Քալընը նշել էր, որ Անկարան չի բացառում նաեւ ամերիկյան Patriot ԶՀՀ ձեռք բերելու հավանականությունը: «Հետաքրքիր կլիներ ստուգել, թե դրանցից որն է լավագույնը»,- հոդվածում մեջբերվել է նրա խոսքը: Քալընը վստահ է, որ «Ս-400-ները Թուրքիա կմատակարարվեն»:

07:04 - 17 ապրիլի, 2019

Թուրքիայի իշխող կուսակցությունը վիճարկում է ՏԻՄ ընտրությունների արդյունքները Ստամբուլում |azatutyun.am|

azatutyun.am: Թուրքիայի իշխող «Արդարություն և զարգացում» կուսակցությունը վիճարկում է մարտի վերջին տեղի ունեցած տեղական ինքնակառավարման մարմինների ընտրությունների արդյունքները Ստամբուլ քաղաքում: «Անադոլու» գործակալության հաղորդմամբ՝ կուսակցությունը դիմել է Կենտրոնական ընտրական հանձնաժողով (ԿԸՀ)՝ պահանջելով չեղյալ համարել քվեարկության արդյունքները և կրկնել ընտրությունները: «Արդարություն և զարգացում» կուսակցության փոխնախագահ Ալի Իհսան Յավուզը ԿԸՀ-ին դիմում ներկայացնելուց հետո լրագրողներին ասել է, թե այս քայլով ուզում են փարատել ընտրությունների արդյունքների շուրջ կասկածները: «Կենտրոնական ընտրական հանձնաժողովը մերժեց ձայների ամբողջական վերահաշվարկի մեր պահանջը, և մենք ստիպված ենք ընդունել այդ որոշումը: Սակայն տեխնիկական սխալների ուղղումից և ձայների միայն 10 տոկոսի վերահաշվարկից հետո տեսանք, որ թեկնածուների հավաքած քվեների տարբերությունը 29 հազարից նվազեց 13 հազար 900-ի: Պնդում ենք, որ ձայների ամբողջական վերահաշվարկի պարագայում ընտրությունների արդյունքները մեր օգտին կլինեին: Մենք գնում ենք արտակարգ բողոքարկման ճանապարհով, պետք է փարատել բոլոր կասկածները», - ասել է Յավուզը՝ բերելով ընտրախախտումների մի շարք օրինարկներ:

06:13 - 17 ապրիլի, 2019

Ֆրանսիան վերջին երկիրն է, որ պետք է Թուրքիային դասախոսություն կարդա ցեղասպանության ու պատմության մասին․ Մեվլութ Չավուշողլու

«Ֆրանսիան վերջին երկիրն է, որ պետք է Թուրքիային դասախոսություն կարդա ցեղասպանության ու պատմության մասին։ Ֆրանսիան պետք է հիշի իր մութ պատմությունը Ռուանդայում ու Ալժիրում», - ասել է Թուրքիայի արտաքին գործերի նախարար Մեվլութ Չավուշողլուն ՆԱՏՕ-ի շրջանակում այսօր Անթալիայում տեղի ունեցած հանդիպման ժամանակ։

11:53 - 12 ապրիլի, 2019

Թուրքիայի պաշտպանության նախարարը մտահոգված է ապրիլի 24-ի մասին Մակրոնի հրամանագրով

ermenihaber.am: Թուրքիայի պաշտպանության նախարար, գեներալ Հուլուսի Աքարի և Ֆրանսիայի պաշտպանության նախարար Ֆլորանս Պարլիի միջև հեռախոսազրույց է տեղի ունեցել:Քննարկվել են Սիրիայում տիրող իրավիճակի, ռազմական ոլորտում թուրք-ֆրանսիական համագործակցության հարցեր: Կողմերը խոսել են նաև Մակրոնի հրամանագրի մասին, որով ապրիլի 24-ը Ֆրանսիայում ճանաչվել էր որպես Հայոց ցեղասպանության հիշատակի ազգային օր։ Աքարը ֆրանսիացի գործընկերոջը փոխանցել է այդ հրամանագրի ստորագրության կապակցությամբ թուրքական կողմի ունեցած մտահոգությունը:

10:40 - 12 ապրիլի, 2019

Թուրքիայում չեղարկել են քրդամետ կուսակցության հաղթանակն ընտրություններում և մանդատներ չեն տվել |panarmenian.net|

Թուրքիայում չեղարկել են քրդամետ կուսակցության հաղթանակն ընտրություններում և մանդատներ չեն տվել: Ընդդիմադիր Ժողովրդների ժողովրդավարական կուսակցությունը բողոք է հայտնել տեղական կառավարման մարմինների մարտի 31-ի ընտրություններում իր թեկնածուների հաղթանակի չեղարկման վերաբերյալ: Ըստ կուսակցության ներկայացուցիչների, Թուրքիայի Բարձրագույն ընտրական հանձնաժողովը «ծուղակ է պատրաստել»՝ արգելելով թեկնածուներին մանդատներ ստանալ, թեև նրանց պաշտոնապես թույլատրվել էր մասնակցել ընտրություններին:Կուսակցության ֆեյսբուքյան էջում տեղադրվել է կուսակցության ներկայացուցիչ Սարուխան Օլուչի մամուլի ասուլիսի տեսագրությունը, որտեղ նա հայտարարել է, որ ընտրահանձնաժողովը կուսակցության դեմ քաղաքական դավադրության մասնակից է, գրում է Deutsche Welle-ն: Թուրքիայի Բարձրագույն ընտրական հանձնաժողովն արգելել է պատգամավորական մանդատ ստանալ այն քաղաքական գործիչներին, որոնք կորցրել էին իրենց պաշտոնները արտակարգ դրության ժամանակ, որը հայտարարվել էր 2016-ի հուլիսին, երկրում անհաջող ռազմական հեղաշրջման փորձից հետո: Եթե նրանք մեծամասնություն են ստացել, ապա նրանց մանդատը փոխանցվում է երկրորդ տեղը զբաղեցրած թեկնածուին: Ըստ Ժողովրդների ժողովրդավարական կուսակցության հաշվարկների, կչեղարկվի իր թեկնածուներից 8-ի մանդատը, որոնք հաղթել են առավելապես քրդաբնակ շրջաններում: Մանդատները հիմնականում կանցնեն Էրդողանի կուսակցության՝ ԱԶԿ-ի անդամներին:

10:01 - 12 ապրիլի, 2019

Թուրքիայի արտգործնախարարն արձագանքել է Հայոց ցեղասպանության բանաձևի ընդունմանը |ermenihaber.am|

ermenihaber.am: Իտալիայի խորհրդարանի պատգամավորների պալատի կողմից ապրիլի 10-ին Հայոց ցեղասպանության ճանաչման մասին բանաձևի ընդունումը անհանգստություն է առաջացրել Թուրքիայի իշխանական շրջանակներում։ Թուրքիայի նախագահականի աշխատակազմի հանրային կապերի բաժնի ղեկավար Ֆահրեթթին Ալթունից և Թուրքիայի նախագահի մամուլի խոսնակի կոշտ արձագանքներից հետո թեմային անդրադարձել է արտգործնախարար Մևլութ Չավուշօղլուն։ Ինչպես և նախորդ թուրք պաշտոնյաները, Չավուշօղլուն ևս Twitter-ի էջում գրառում է կատարել.«Իտալիայի պատգամավորների պալատի որոշումն իրավական ուժ չունի ճիշտ այնպես, ինչպես պատմությունը քաղաքակացնելու բոլոր փորձերը»։

06:53 - 11 ապրիլի, 2019

Թուրքիայի նախագահականի արձագանքը՝ Հայոց ցեղասպանության վերաբերյալ Իտալիայում ընդունված բանաձևին |ermenihaber.am|

ermenihaber.am։ Թուրքիայի նախագահի աշխատակազմի հանրային կապերի բաժնի ղեկավար Ֆահրեթթին Ալթունն արձագանքել է Իտալիայի պատգամավորների պալատի կողմից նախօրեին Հայոց ցեղասպանության վերաբերյալ բանաձևի ընդունմանը։Թեմայի շուրջ թուրք պաշտոնյան Twitter-ի էջում գրառում է կատարել, որում մասնավորապես նշված է. «Մենք խստորեն դատապարտում ենք մեր ազգի պատմությունն աղավաղելու և քաղաքականացնելու Իտալիայի խորհրդարանի ջանքերը։ Սա անօգուտ, թշնամական և ցավալի մոտեցում է։ Միմյանց հիշողությունների նկատմամբ հարձակում գործելու փոխարեն, մենք բոլորս պետք է միասին աշխատենք, որպեսզի երաշխավորենք, որ ճշմարտությունը գերակայություն ունենա հորինվածքի նկատմամբ»։ Հիշեցնենք, որ Իտալիայի Պատգամավորների պալատն ապրիլի 10-ին ընդունել է բանաձևը, որով երկրի կառավարությանը կոչ է արվում «պաշտոնապես ճանաչել Հայոց ցեղասպանությունը» և խնդրին տալ միջազգային գնահատական։ Բանաձևը ստացել է 382 կողմ և 0 դեմ ձայներ, 43 պատգամավոր ձեռնպահ է մնացել։

05:40 - 11 ապրիլի, 2019

ԱՄՆ-ում ցանկանում են արգելել թուրք որոշ պաշտոնյաների մուտքը |ermenihaber.am|

ermenihaber.am: ԱՄՆ-ում ցանկանում են արգելել այն թուրք բարձրաստիճան պաշտոնյաների մուտքը, որոնք կապ ունեն Թուրքիայում ԱՄՆ-ի քաղաքացիների ձերբակալությունների հետ։ Նույն օրինագծով առաջարկվում է վերոնշյալ թուրք բարձրաստիճան պաշտոնյայի հաշիվներն ԱՄՆ-ում առգրավել։ Օրինագիծը ներկայացվել է հանրապետական սենատոր Ռոջեր Վիքերի և դեմոկրատ սենատոր Բեն Քարդինի կողմից։ Օրինագծի տակ իրենց ստորագրությունն են դրել ևս 4 սենատորներ։ Նման օրինագծի պատճառն այն է, որ ըստ ամերիկացի սենատորների՝ ԱՄՆ-ի մի շարք քաղաքացիներ Թուրքիայում անօրինական կերպով են կալանավորվել և նրանց առաջադրվել են անարդարացի մեղադրանքներ։ Մասնավորապես նրանք հիշատակել են Թուրքիայում ԱՄՆ-ի հյուպատոսարանի աշխատակից, ազգությամբ թուրք Մեհմեթե Թոփուզին, ով շարունակվում է կալանավորված մնալ Թուրքիայում։ Նա մեղադրվում է Թուրքիայում ահաբեկչական համարվող «գյուլենական համայնքին» աջակցելու մեջ։ Հիշատակվել են նույն մեղադրանքով Թուրքիայում կալանավորված ամերիկացի հոգևորական Էնդրյու Բրանսոնը, ով պահվում էր թուրքական բանտում։ Սակայն վերջինս Վաշինգտոնի կողմից թուրքական իշխանությունների նկատմամբ կիրառած ճնշումներից հետո ազատ արձակվեց։

05:30 - 11 ապրիլի, 2019