1 ժամ էինք տվել՝ գերեվարված 6 զինծառայողներին վերադարձնելու համար, բայց մեր ռուս գործընկերներն ասացին Բաքվի հետ քննարկում են վերադարձի հարցը․ ԶՈւ ԳՇ պետի տեղակալ
Օպերատիվ-մարտավարական իրավիճակը ներկա դրությամբ հարաբերական լարված է, Ադրբեջանի ԶՈՒ ստորաբաժանումները փորձում են մի քանի ուղղություններում վարել սադրիչ, հարկադրական գործողություններ, իսկ մեր ԶՈՒ ստորաբաժանումները նույնպես, հակագործողություններ վարելով, փորձում են ՀՀ տարածք ներթափանցած հակառակորդի ուժերը և միջոցները վտարել մեր տարածքից՝ սահմանից այն կողմ։ Այս մասին այսօր հրավիրված մամուլի ասուլիսի ընթացքույմ ասաց ԶՈՒ ԳՇ պետի տեղակալ Էդվարդ Ասրյանը։
Վերջինս տեղեկացրեց, որ գիշերային իրավիճակը հատկապես իր լարվածության գագաթնակետին է հասել ժամը 5-ի դրությամբ։ Ինչու՞։ Որովհետև հայկական կողմը, դիտարկելով և գրանցելով, որ հակառակորդի ներթափանացած, մխրճված ստորաբաժանումները, որոնք գտնվում էին մեր պետական սահմանից 1.5-2.5 կմ խորությամբ, 2 ուղղությամբ փորձում էին իրենց ուժերը միավորել և ստեղծել ավելի նպաստավոր իրադրություն իրենց համար։
«Գնահատելով այդ իրավիճակը՝ հրամանատարության կողմից որոշում է կայացվել տեղադրել մեկ նոր մարտական դիրք, որը իր թևահար դիրքով կարող է կասեցնել հակառակորդի գործողությունները։ Նշված գործողության ընթացքում հակառակորդը իր օդային հետախուզության արդյունքներով հայտնաբերել է մեր գործողությունները և իր ստորաբաժանումներով շրջափակել մեր գործողությունը իրականացնող խումբը։ Ու նրան հաջողվել է գերեվարել 6 զինծառայողի»,- հավելեց Ասրյանը։
Ասրյանը պատասխանեց այն հարցին, թե նչու՞ մեր զինծառայողները զենք չեն կիրառել։ Նա ընդգծեց, որ 16 օր հայտնի է, որ նշված իրավիճակը ռազմաքաղաքական ղեկավարությունը փորձում է հարթել, կասեցնել առանց զենքի, առանց ուժի կիրառման։ Երեկ մոտենալով մեր զինծառայողներին՝ (4 հոգի կատարում էին համապատասխան աշխատանքներ), զենք ուղղելով մեր զինծառայողների վրա հրամայել են հանձնվել, և մեր երկու զինծառայողները, որոնք գտնվում էին որոշակի հեռավորության վրա, բանակցային գործընթաց սկսելու պատրվակով մոտեցել են հակառակորդին, բայց փաստորեն հակառակորդը, լինելով նենգ, դավադիր, որդեգրած լինելով իր նենգ քաղաքականությունը, զինաթափել և գերեվարել են մեր 6 զինծառայողներին։
«Արդեն իսկ մեր սկզբի ժամկետը հատել է, մենք սկզբնական ժամանակահատվածում տվել էինք մեկ ժամ`վերադարձնելու ՀՀ տարածքից գերեվարված 6 զինծառայողներին։ Մեկ ժամն անցնելուց անմիջապես հետո մեզ հետ կապի են դուրս եկել մեր ռուս գործընկերները, որոնք գտնվում են Ստեփանակերտում և ներկայացրել, որ Բաքվում արդեն իրենք անկացնում են խորհրդակցություն և քննարկում են մեր գերեվարված զինծառայողների վերադարձի հարցը։ Դրա համար այդ մեկ ժամից հետո մենք համապատասխան գործողությունների չենք գնացել։ Եթե հակառակորդը մեր զինծառայողների վերադարձի պայմանը չկատարի, ապա մշակվում են համապատասխան պլաններ, որոնք ես այստեղ ներկայացնել չեմ կարող»,- նշեց ԳՇ պետի տեղակալը, հավելելով, որ հակառակորդը ներկայացրել է մի շարք պայմաններ յուրային և իրենց ուժերի ետքաշման պայմանով, իսկ մենք ներկայացրել ենք մեր պայմանը։
«Մենք մեր առաջ քաշած ստորաբաժանումները, որոնք ժամը 5-ից մինչև ժամը 10-ը լրիվ ծավալով զբաղեցրել են իրենց դիրքերը, ետ կքաշենք այն պայմանով, որ իրենք վերադարձնեն մեր գերեվարված զինծառայողներին։ Այլ պայման մեր համար ընդունելի չէ։ ԶՈՒ ստորաբաժանումները նշված ուղղությունում զբաղեցրած դիրքերում պատրաստ են իրենց առջև դրված խնդիրները կատարելու։ Եթե մենք գնում ենք այս իրավիճակի հանգուցալուծման և մեր պետական սահմանով դրության վերականգնման ճանապարհով, մենք ունենք երկու ուղի։ Առաջինը՝ զենք չկիրառել, պայքարել, հարկադրել, բանակցել, ապացուցել և նրանց ետ շպրտել։ Եվ ունենք երկրորդ ճանապարհ․ կիրառել ուժ, ստիպել հակառակորդին նահանջելու, իսկ գերեվարել այս կողմից, այն կողմից զինծառայողների, դա նույնպես ռազմական ուղի է, որը լուծման չի բերի։ Կարող ենք գնալ այդ ճանապարհով, գերեվարել հակառակորդին, նույնը կկատարի ինքը, կկատարենք մենք, և կստեղծվի իմ ներկայացրած երկրորդ ուղղությունը՝ ռազմական բախում»,- եզրափակեց Ասրյանը։
16:49 - 27 մայիսի, 2021
