ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

Պետական գույքը կվաճառվի գրավադրմամբ կամ առանց դրա. ինչպես նոր փոփոխությունները կազդեն ներդրումների վրա |hetq.am|

hetq.am: Կառավարությունն այսօրվա նիստում ընդունած որոշմամբ սահմանեց պետական գույքը վաճառելիս այն գրավադրելու պայմանները։ Ըստ փոփոխության՝ եթե որոշակի պարտավորությունների դիմաց (բացառությամբ գնի տարաժամկետ պարտավորությունների) պետական գույքը վաճառվել է գնահատված շուկայական արժեքի 75 տոկոսից ավելի գնով, այն չի համարվի գրավադրված։ Պետական գույքի առուվաճառքի պայմանագրի առարկան կհամարվի գրավադրված, եթե գույքը վաճառվել է գնահատված շուկայական արժեքի 75 տոկոսից ցածր գնով։ Տարաժամկետ վճարումների և պետական գույքի գնահատված շուկայական արժեքի 75 տոկոսից ցածր գնով վաճառելու, պայմանագրային պարտավորություններ իրականացնելու դեպքում պետական գույքը մասնավորեցնելիս այն չի համարվի գրավադրված, եթե գնորդը ներկայացնի տարաժամկետ վճարումների ընդհանուր արժեքի, գնահատված արժեքի և վաճառքի գնի տարբերության արժեքի չափով բանկային երաշխիք։ Գույքային փոխանակության դեպքում պետական գույքի մասնավորեցման ժամանակ գույքը չի համարվի գրավադրված, եթե հավանական գնորդը լիազոր մարմին ներկայացնի փոխանակության ենթակա գույքի գնահատված արժեքի 100 տոկոսի չափով բանկային երաշխիք։ Պայմանագրային պարտավորություններով ծանրաբեռնված գույքային գործարքի դեպքում մինչև պայմանագրային պարտավորությունների կատարումը վաճառված գույքի վերավաճառքի, գրավադրման դեպքում գնորդը պարտավոր է լինելու ստանալ լիազոր մարմնի գրավոր համաձայնությունը։ «Պետական գույքի վաճառքի երկար տարիների փորձը վկայում է, որ պայմանագրային պարտավորությունների դիմաց գույքի վաճառքի դեպքում գրավի կիրառումը հանդիսացել է գործուն միջոց ոչ բարեխիղճ գնորդների դեպքում պայմանագրային պարտավորությունների կատարումն ապահովելու համար»,-նախագծում նշել է Տարածքային կառավարման և ենթակառուցվածքների նախարարությունը։ Այս փոփոխությունները կատարվել են փոխվարչապետ Մհեր Գրիգորյանի նախաձեռնությամբ։ Նա առաջարկել է պետական գույքի օտարման գործընթացն առավել արդյունավետ դարձնելու նպատակով քննարկել պետական գույքի օտարման դեպքերում գրավի փոխարեն պարտավորության կատարման ապահովման այլ միջոց կիրառելու հարցը։ Ինչ ռիսկեր էր պարունակում պետական գույքի՝ առանց գրավադրմամբ վաճառքը Գույքն առանց գրավի կամ գրավադրմամբ մասնավորեցնելու վերը նշված պայմանները սահմանել է Տարածքային կառավարման և ենթակառուցվածքների նախարարությունը։ Նախարարությունը պարտավորությունների դիմաց պետական գույք վաճառելիս գրավ չկիրառելու գործընթացում նկատել է պարտավորություններ չկատարելու և պետությանը մեծ վնասներ հասցնելու ռիկսեր։ Մասնավորապես, որոշակի պարտավորությունների կատարման դիմաց գնահատված շուկայական արժեքից ցածր գնով գույքի վաճառքի և չգրավադրման դեպքում գնորդը ձեռք էր բերելու բոլոր իրավական հիմքերը, նյութական տեսանկյունից շահագրգռող լծակները՝ ավելի արագ, առանց ռիսկի գումար աշխատելու համար։ Այսինքն՝ շատ հավանական է, որ գնորդը ձեռք բերված գույքի գրավադրմամբ կստանա ավելի մեծ գումար և, տարբեր հիմնավորումներ բերելով, կամ կկատարի, կամ չի կատարի ստանձնած պայմանագրային պարտավորությունները։ Այդ իսկ պատճառով նախարարությունը որոշել է պետական գույքի վաճառքի դեպքում բացառել պարտավորությունների կատարման դիմաց վաճառքի գնի իջեցմամբ պետությանը վնաս հասցնելու ռիսկերը և գրավի կիրառման դեպքում ցուցաբերել տարբերակված մոտեցում։ Մասնավորապես՝ միայն գնահատված շուկայական արժեքին շատ մոտ գնով վաճառքի դեպքում կարելի է գույքի վրայից հանել գրավադրումը։ Նման մոտեցմամբ, ըստ նախարարության, կարելի է ինչ-որ չափով հիմնավորել, որ գնորդը վճարել է ձեռք բերված գույքի գինը, շահագրգռված է ներդրումներ կատարել և այդ ներդրումների իրականացման ճանապարհին գրավը հանելով՝ ներդրումների կատարման համար ստեղծվել են բոլոր հնարավորությունները։ Նարեկ Բաբայան. «Գործող կարգը հնարավորություն չէր տալիս տնտեսվարողին բանկերից միջոցներ ներգրավվել» Պետական գույքի կառավարման կոմիտեի նախագահ Նարեկ Բաբայանը «Հետքի» հետ զրույցում ասաց, որ պետական գույքը վաճառելիս այն գրավադրելու պահանջից ծագող խնդիրների մասին իրենց հետ հանդիպումներում հաճախ բարձրաձայնել են նաև գործարարները։ Հատկապես, երբ գույքi գնման արժեքն ու խոստացված ներդրումների ծավալը խոշոր են եղել։ Շարունակությունը՝ hetq.am-ում

13:36 - 24 սեպտեմբերի, 2020

Նիկոլ Փաշինյանի մոտ քննարկվել է ՔՏՀԱ տեսչական մարմնի 2019-2020թթ. գործունեության հաշվետվությունը

Վարչապետ Նիկոլ Փաշինյանի մոտ սեպտեմբերի 23-ին քննարկվել է Քաղաքաշինության, տեխնիկական և հրդեհային անվտանգության տեսչական մարմնի 2019թ. գործունեության հաշվետվությունը և 2020թ. առաջին 8 ամսվա աշխատանքների կատարողականը: Այս մասին հայտնում են ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, Տեսչական մարմինների աշխատանքների համակարգման գրասենյակի ղեկավար Արթուր Ասոյանը նշել է, որ այս տեսչական մարմինը ձևավորվել է նախկինում գործող 5 տեսչության օպտիմալացման արդյունքում և իրականացնում է տեսչական գործառույթներ՝ քաղաքաշինության, տեխնիկական, հրդեհային անվտանգության, տրանսպորտի, էներգետիկայի, հողօգտագործման և քարտեզագրման բնագավառներում: Կատարվել են օրենսդրական փոփոխություններ, կարգավորվել են տեսչական մարմնի կողմից վարչական պատասխանատվության միջոցներ կիրառելու շրջանակը և լիազորությունները: Ինչպես տեսչական մյուս մարմիններում, այստեղ ևս ամբողջովին ներդրվել է ռիսկի վրա հիմնված ստուգումների համակարգ: Ապա Քաղաքաշինության, տեխնիկական և հրդեհային անվտանգության տեսչական մարմնի ղեկավար Գեղամ Շախբազյանը զեկուցել է հաշվետու ժամանակահատվածում կատարված աշխատանքները: Նրա խոսքով՝ 2019թ. տեխնիկական և հրդեհային անվտանգության ոլորտում ստուգումներ են իրականացվել 1200-ից ավելի դպրոցներում, այժմ ՏԻՄ հետ քննարկումներ են ընթանում ազդանշանման ինքնաշխատ համակարգերի և հրդեհաշիջման կահավորանքի թերությունները վերացնելու ուղղությամբ: Վարչապետի հանձնարարությամբ իրականացվել է 135 ստուգում, բացահայտվել է գրեթե 1200 խախտում, տնտեսվարող սուբյեկտներին տրամադրվել են խորհրդատվություն և խախտումները վերացնելու կարգադրագրեր: Հրդեհատեխնիկական հետազոտություններ են իրականացվել ՀՀ գործող բոլոր մանկական ճամբարներում և կարուսելներում, կրկնայցերի շրջանակում պարզվել է, որ խախտումների մեծ մասը վերացված է։ Քաղաքաշինության ոլորտում՝ 2700-ից ավելի դիտարկումների ընթացքում հայտնաբերվել է 411 ինքնակամ կառույց, տրանսպորտի անվտանգության ոլորտում իրականացվել է մշտադիտարկում կանոնավոր ուղևորափոխադրումների կազմակերպման գործընթացի, տրանսպորտային միջոցների շահագործման և տեխզննության անցկացման կայանների գործունեության նկատմամբ, էներգետիկայի ոլորտում՝ էներգատեղակայանքներում իրականացվել են տեխնիկական ստուգումներ: Ներկայացվել են արձանագրված թերությունները շտկելու և խախտումների վերացնելու վերաբերյալ առաջարկներ: Հողօգտագործման ոլորտում՝ ստուգում է իրականացվել մարզային 21 համայնքում, արձանագրվել է 339 խախտման դեպք, կազմվել է 21 ակտ, որոշ խախտումների մասով հարուցված են քրեական գործեր։ Գեղամ Շախբազյանը նշել է, որ COVID-19-ով պայմանավորված՝ ՏՄ2020թ. գործունեության տարեկան ծրագրով սահմանված մի շարք միջոցառումներ կատարվել են ոչ ամբողջ ծավալով: Այնուամենայնիվ, տեսչական գործառույթները շարունակաբար իրականացվել են նշված բոլոր ոլորտներում և ուղղություններով: Կորոնավիրուսային համավարակով պայմանավորված՝ ստեղծվել է 11 աշխատանքային խումբ, և Ոստիկանության հետ համատեղ իրականացվում են ամենօրյա մշտադիտարկումներ տրանսպորտի ոլորտում, որոնց արդյունքում արդեն կազմվել է 1797 արձանագրություն։ Ստուգումներ են իրականացվել պայթյունավտանգ օբյեկտներում: Հաշվետվությունը լսելուց հետո վարչապետն անդրադարձել է մի շարք հարցերի՝ մասնավորապես, հետաքրքրվել է հակահրդեհային կանոնների խախտումների արձանագրումից հետո տարվող աշխատանքով: Պարզաբանումներ են ներկայացվել տարբեր նշանակության ռիսկային օբյեկտներում իրականացված ուսումնասիրությունների արդյունքների և ձեռնարկված միջոցառումների մասին: Քննարկվել է հակահրդեհային ապահովագրության համակարգի ներդրման հարցը: Կառավարության ղեկավարը խոսել է նաև գազի ներտնային սպասարկմանն առնչվող ռիսկերի մասին՝ կարևորելով չափանիշների սահմանումը և արդյունավետ վերահսկողությունը: Վարչապետն անդրադարձել է հանրապետության տարածքում առկա ինքնակամ կառույցների խնդրին՝ հետաքրքրվելով մշակվող լուծումներով: Պատասխանատուները զեկուցել են, որ այդ նպատակով մշակվել և շրջանառվում է համապատասխան օրենսդրական կարգավորումների փաթեթ: Նիկոլ Փաշինյանը կարևորել է հանրության շրջանում այն մոտեցման տարածումը, որ ցանկացած շինարարություն իրականացնելու համար պետք է համապատասխան նախագիծ ունենալ և ընդգծել, որ օրենսդրական դաշտի ապահովումը ևս կնպաստի այսուհետ ինքնակամ շինարարության բացառմանը: Քննարկվել են նաև վտանգավոր թափոնների կառավարմանը և պայթյունավտանգ օբյեկտներին վերաբերող հարցեր: Վարչապետ Փաշինյանը քննարկման արդյունքներով հանձնարարականներ է տվել պատասխանատուներին: Հաջորդիվ ներկայացվելու են Սննդամթերքի անվտանգության և Բնապահպանության և ընդերքի տեսչական մարմինների գործունեության հաշվետվությունները:

18:40 - 23 սեպտեմբերի, 2020