Հայոց ցեղասպանություն

Ցեղասպանության պատմության դասավանդումը պարտադիր կլինի ԱՄՆ Մասաչուսեթս նահանգում

16:04 - 14 հունվարի, 2022

Ստանիսլավ Զասն այցելել է Հայոց ցեղասպանության հուշահամալիր

Աշխատանքային այցով Հայաստան ժամանած Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը դեկտեմբերի 23-ին այցելել է Հայոց ցեղասպանության հուշահամալիր՝ ՀՀ ԱԳ նախարարի տեղակալ Արմեն Ղևոնդյանի և ՀԱՊԿ-ում Հայաստանի մշտական և լիազոր ներկայացուցիչ Վիկտոր Բիյագովի ուղեկցությամբ: Այդ մասին ասված է Հայոց ցեղասպանության թանգարան-ինստիտուտի Ֆեյսբուքի էջում: «Հյուրերին դիմավորեց և հուշահամալիրի ստեղծման պատմությունը ներկայացրեց Հայոց ցեղասպանության թանգարան-ինստիտուտի տնօրեն Հարություն Մարությանը: Ստանիսլավ Զասը ծաղկեպսակ դրեց Հայոց ցեղասպանության զոհերի հիշատակը հավերժացնող հուշակոթողին, այնուհետև հյուրերը ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության սրբադասված նահատակների հիշատակը»,- նշված է գրառման մեջ:

15:15 - 23 դեկտեմբերի, 2021

Եկեղեցիների հարցով Պաղեստինի բարձրագույն պատվիրակությունն այցելել է Հայոց ցեղասպանության հուշահամալիր |armenpress.am|

armenpress.am: Աշխատանքային այցով Հայաստանում գտնվող Պաղեստինի Եկեղեցիների հարցով բարձրագույն նախագահական կոմիտեի ղեկավար Մուին Էլիաս Յուսեֆ Խուրիի գլխավորած պատվիրակության անդամները դեկտեմբերի 12-ին այցելեցին Հայոց ցեղասպանության հուշահամալիր և հարգանքի տուրք մատուցեցին Հայոց ցեղասպանության զոհերի հիշատակին։ Պաղեստինից ժամանած հյուրերը ծաղկեպսակ դրեցին Հայոց ցեղասպանության զոհերի հիշատակը հավերժացնող հուշակոթողին, ապա շրջեցին Հայոց ցեղասպանության թանգարանում։ Պատվիրակության ղեկավար Մուին Էլիաս Յուսեֆ Խուրին և պատվիրակության անդամները գրառում կատարեցին Պատվավոր հյուրերի հուշամատյանում։

17:09 - 12 դեկտեմբերի, 2021

ՀՀ ԱԳՆ ներկայացուցիչները հարգանքի տուրք են մատուցել ցեղասպանությունների անմեղ զոհերի հիշատակին |armenpress.am|

armenpress.am: Ցեղասպանության հանցագործության զոհերի հիշատակի ու արժանապատվության և այդ հանցագործության կանխարգելման միջազգային օրվա առթիվ դեկտեմբերի 9-ին ՀՀ ԱԳ նախարարի տեղակալ Արմեն Ղևոնդյանը, ԱԳՆ գլխավոր քարտուղար Բորիս Սահակյանը և այլ պաշտոնատար անձինք հարգանքի տուրք են մատուցել Հայոց ցեղասպանության, Հոլոքոստի, ասորի և եզդի ժողովուրդների ցեղասպանությունների անմեղ զոհերի հիշատակին: Այս մասին հայտնում են Արտաքին գործերի նախարարությունից: 2015թ. սեպտեմբերի 11-ին ՄԱԿ-ի Գլխավոր ասամբլեայի 69-րդ նստաշրջանի ընթացքում միաձայն ընդունվել է Հայաստանի կողմից ներկայացված 69/323 բանաձևը, որով հռչակվել է Ցեղասպանության զոհերի հիշատակի և արժանապատվության և այդ հանցագործության կանխարգելման միջազգային օր:

15:08 - 09 դեկտեմբերի, 2021

Հունաստանի խորհրդարանի պատգամավորներն այցելել են Հայոց ցեղասպանության հուշահամալիր

Աշխատանքային այցով Հայաստան ժամանած Հունաստանի խորհրդարանի պատգամավոր, Հունաստան-Հայաստան բարեկամական խմբի ղեկավար Դիմիտրիոս Մարկոպուլոսի գլխավորած պատվիրակությունը նոյեմբերի 30-ին այցելել է Հայոց ցեղասպանության հուշահամալիր՝ ՀՀ ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանի ուղեկցությամբ: Այս մասին տեղեկացնում է Հայոց ցեղասպանության թանգարան-ինստիտուտը: Հյուրերին դիմավորել և հուշահամալիրի ստեղծման պատմությունը ներկայացրել է Հայոց ցեղասպանության թանգարան-ինստիտուտի տնօրեն Հարություն Մարությանը: Նա հյուրերին ներկայացրել է նաև Ծիծեռնակաբերդի տարածքում տեղադրված երեք խաչքարերի պատմությունը, որոնք նվիրված են անցյալ դարավերջին Ադրբեջանի տարածքում հայ բնակչության նկատմամբ իրականացված էթնիկ զտումների ընթացքում զոհված հայերի հիշատակին: Հունաստանից ժամանած պատվիրակության անդամները ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության սրբադասված նահատակների հիշատակը: Նրանք շրջեցին նաև Հայոց ցեղասպանության թանգարանում, ծանոթացան մշտական և ժամանակավոր ցուցադրություններին: Այցի ավարտին Դիմիտրիոս Մարկոպուլոսը գրառում կատարեց Պատվավոր հյուրերի հուշամատյանում: Շնորհակալություն հայտնելով Հունաստանի խորհրդարանի պատգամավոր, Հունաստան-Հայաստան բարեկամական խմբի ղեկավար Դիմիտրիոս Մարկոպուլոսին այցի և ցուցաբերած հետաքրքրության համար՝ Հարություն Մարությանը պատվավոր հյուրին նվիրեց ՀՑԹԻ վերջին հրատարակություններից:

15:07 - 30 նոյեմբերի, 2021

Ավստրալիայի խորհրդարանում կքննարկվի երկրի կողմից Հայոց ցեղասպանության ճանաչման հարցը |armenpress.am|

armenpress.am: Ավստրալիայի խորհրդարանի Ներկայացուցիչների պալատում առաջին անգամ նոյեմբերի 29-ին քննարկման է դրվելու բանաձև, որն ուղղակիորեն կոչ է անում կառավարությանը ճանաչելու Օսմանյան կայսրությունում իրականացված հայերի, ասորիների ու հույների ցեղասպանությունները: Այս մասին հայտնում է Հայ դատի Ավստրալիայի հանձնախումբը: Պատգամավոր Թրենթ Զիմերմանի առաջ քաշած բանաձևը հորդորում է Ավստրալիայի կառավարությանը հավատարիմ մնալ 1948 թվականի Ցեղասպանության հանցագործության կանխարգելման և դատապարտման մասին կոնվենցիային՝ ճանաչելով «Օսմանյան կայսրության կողմից 1915-1923 թվականների ընթացքում հայերի, հույների և մյուս քրիստոնյա փոքրամասնությունների դեմ իրականացված ցեղասպանությունը»: Եթե ելույթ ունեցողների մեծ մասը կողմ հանդես գա բանաձևին, ապա Ներկայացուցիչների պալատը կոչ կանի կառավարությանը կյանքի կոչել ժողովրդի կամքն ու ճանաչել հայերի, ասորիների ու հույների ցեղասպանությունները:

11:30 - 29 նոյեմբերի, 2021

Մեծ Բրիտանիայի Համայնքների պալատն առաջին ընթերցմամբ ընդունել է Ցեղասպանությունը ճանաչող բանաձևը |tert.am|

tert.am: Մեծ Բրիտանիայի խորհրդարանի Համայնքների պալատն առաջին ընթերցմամբ ընդունել է Հայոց ցեղասպանությունը ճանաչող բանաձևը, ինչի մասին իր ֆեյսբուքյան էջում հայտնել է Հայ Դատի Մեծ Բրիտանիայի գրասենյակը:«Այսօր պատմական օր է Հայկական հարցի համար։ Հայոց ցեղասպանության մասին օրինագծի առաջին ընթերցումն անցել է առանց առարկությունների։ Հաջորդ ընթերցումը տեղի կունենա 2022 թվականի մարտի 18-ին: Շնորհակալություն ենք հայտնում Թիմ Լաֆթոնին և բոլոր համահեղինակներին այս հաջողության համար»,-ասվում է հաղորդագրությունում:

21:40 - 09 նոյեմբերի, 2021

Իսրայելի խորհրդարանի ընդդիմադիր պատգամավորները Հայոց ցեղասպանությունը ճանաչելու օրինագիծ են ներկայացրել |armenpress.am|

armenpress.am: Իսրայելի խորհրդարանի մի խումբ ընդդիմադիր պատգամավորներ Հայոց ցեղասպանությունը պաշտոնապես ճանաչելու և ապրիլի 24-ը որպես հիշատակի օր նշելու օրինագիծ են ներկայացրել: Այս մասին հայտնում է Jerusalem Post-ը: Օրինագծի հեղինակներն են «Շաս» կուսակցությունը ներկայացնող պատգամավորներ Յաակով Մարգին, Հաիմ Բիտոնը, Մոշե Արբելը, ինչպես նաև «Լապիդ» կուսակցության պատգամավորներ Յուլի Էդելշտեյնը, Իսրայել Կացը և Յոավ Կիշը:

15:42 - 09 նոյեմբերի, 2021

Վրաստանի ՍԴ նախագահը հարգանքի տուրք է մատուցել Հայոց ցեղասպանության զոհերի հիշատակին

Վրաստանի սահմանադրական դատարանի նախագահ Մերաբ Տուրավան Հայաստանի Հանրապետության սահմանադրական դատարանի նախագահ Արման Դիլանյանի ուղեկցությամբ 2021 թվականի նոյեմբերի 5-ին այցելել է Ծիծեռնակաբերդի հուշահամալիր և հարգանքի տուրք մատուցել Հայոց ցեղասպանության զոհերի հիշատակին: Այս մասին տեղեկացնում է Սահմանադրական դատարանը:

16:49 - 05 նոյեմբերի, 2021

ԵԽԽՎ մոնիթորինգի հանձնաժողովի Հայաստանի հարցերով համազեկուցողներն այցելել են Հայոց ցեղասպանության հուշահամալիր

ԵԽԽՎ մոնիթորինգի հանձնաժողովի Հայաստանի հարցերով համազեկուցողներն այցելել են Հայոց ցեղասպանության հուշահամալիր: Հայոց ցեղասպանության թանգարանից հայտնում են, որ փաստահավաք առաքելությամբ Հայաստան ժամանած ԵԽԽՎ մոնիթորինգի հանձնաժողովի Հայաստանի հարցերով համազեկուցողներ Կիմո Կիլյունենը և Բորիանա Աբերգն այցելեցին Հայոց ցեղասպանության հուշահամալիր՝ ՀՀ ԱԺ պատգամավորներ Էդուարդ Աղաջանյանի և Նազելի Բաղդասարյանի ուղեկցությամբ: Նշվում է, որ հյուրերին դիմավորեց և հուշահամալիրի ստեղծման պատմությունը ներկայացրեց Հայոց ցեղասպանության թանգարան-ինստիտուտի գիտական աշխատանքների գծով փոխտնօրեն Էդիտա Գզոյանը: Տիկին Գզոյանը հյուրերին ներկայացրեց նաև Ծիծեռնակաբերդի տարածքում տեղադրված երեք խաչքարերի պատմությունը, որոնք նվիրված են անցյալ դարավերջին Ադրբեջանի տարածքում հայ բնակչության նկատմամբ իրականացված էթնիկ զտումների ընթացքում զոհված հայերի հիշատակին: Եվրոպայից ժամանած հյուրերը ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության սրբադասված նահատակների հիշատակը: Նրանք շրջեցին նաև Հայոց ցեղասպանության թանգարանում, ծանոթացան մշտական և ժամանակավոր ցուցադրություններին: Այցի ավարտին ԵԽԽՎ մոնիթորինգի հանձնաժողովի Հայաստանի հարցերով համազեկուցողներ Կիմո Կիլյունենը և Բորիանա Աբերգը նաև գրառում կատարեցին Պատվավոր հյուրերի հուշամատյանում:

13:54 - 05 նոյեմբերի, 2021

Բրիտանիայի Համայնքների պալատը նոյեմբերի 9-ին կքննարկի Հայոց ցեղասպանության ճանաչման օրինագիծ |azatutyun.am|

azatutyun.am: Մեծ Բրիտանիայի խորհրդարանի Համայնքների պալատում նոյեմբերի 9-ին առաջին ընթերցմամբ կքննարկվի Հայոց ցեղասպանության ճանաչման օրինագիծ։ Միացյալ Թագավորությունում Հայ դատի հանձնախմբի հաղորդագրության համաձայն՝ նախագիծը ներկայացրել է պահպանողական պատգամավոր Թիմ Լոթընը։ Եթե նախագիծն անցնի այս փուլը, Մեծ Բրիտանիան մեկ քայլ կմոտենա Հայոց ցեղասպանության պաշտոնական ճանաչմանը, նշում է Հայ դատի հանձնախումբը՝ շեշտելով, որ «չպատժված հանցագործությունը խրախուսված հանցագործություն է»:

10:45 - 04 նոյեմբերի, 2021

Ավստրալիայի իշխանությունները ուսումնասիրում են Հայոց ցեղասպանության ճանաչման հարցը |1lurer.am|

1lurer.am: Ավստրալիայի Սենատի արտաքին գործերի, պաշտպանության և առևտրի օրենսդրության կոմիտեի անցկացրած հանդիպման ժամանակ Կանաչ մայրցամաքի արտգործնախարար Մարիս Փեյնն անդրադարձել է Հայոց ցեղասպանության վերաբերյալ կառավարության դիրքորոշմանը: Նա նշել է՝ դա «այն հարցն է, որը մենք ուսումնասիրում ենք»: Ավստրալիայի վարչապետ, նախկին օրենսդիր Սքոթ Մորիսոնը դեռևս 2011-ին կոչ էր անում պաշտոնապես ճանաչել Հայոց ցեղասպանությունը, սակայն ապրիլին՝ Ցեղասպանության 106-րդ տարելիցի կապակցությամբ զոհերի հիշատակին նվիրված իր ուղերձում, ճշգրիտ չի բնութագրել 1915-ի իրադարձությունները: Ավստրալիայի արտգործնախարարը նշել է, որ երկրի իշխանությունները հետևում են այս հարցի հետ կապված՝ մյուս պետությունների գործողություններին և հաշվի նստում դրանց հետ:

13:30 - 12 հունիսի, 2021

Ադրբեջանը խախտում է ոչ միայն ԼՂ-ի, այլև Հայաստանի տարածքային ամբողջականությունը. Բրեդ Շերման |1lurer.am|

1lurer.am: ԱՄՆ կոնգրեսական Բրեդ Շերմանը ԱՄՆ նախագահ Ջո Բայդենի վարչակազմին կոչ է անում վերանայել Ադրբեջանին ռազմական օգնություն տրամադրող՝ «Ազատության աջակցության ակտ» օրենքի 907-րդ անխոհեմ բանաձևը: Շերմանը տեսաուղերձում մասնավորապես հայտարարել է. «2019-ին ԱՄՆ Կոնգրեսը ճանաչել է Հայոց ցեղասպանությունը: Ցեղասպանության փաստն այս տարի ապրիլին ճանաչել է նաև ԱՄՆ նախագահի վարչակազմը: Ամերիկյան վարչակազմը, սակայն, ընդունել է «Ազատության աջակցության ակտ» օրենքի 907-րդ բանաձև, որով թույլատրվում է Ադրբեջանին սպառազինության վաճառքը: Հուսով եմ, որ կվերանայեք այդ փաստաթուղթը, քանի որ Ադրբեջանը խախտում է ոչ միայն Լեռնային Ղարաբաղի, ինչը նույնպես շատ կարևոր է, այլև Հայաստանի տարածքային ամբողջականությունը»,- հայտարարել է ԱՄՆ կոնգրեսական Բրեդ Շերմանը:

11:57 - 08 հունիսի, 2021

Իտալիայի Ֆրիուլի Վենեցիա Ջուլիայի նահանգային խորհուրդը միաձայն կողմ է քվեարկել Հայոց ցեղասպանությունը ճանաչող բանաձևին

Իտալիայի Ֆրիուլի Վենեցիա Ջուլիայի նահանգային խորհուրդը միաձայն կողմ է քվեարկել Հայոց ցեղասպանությունը ճանաչող բանաձևին: Այս մասին հայտնում են Իտալիայում ՀՀ դեսպանությունից։ «Շնորհակալություն ենք հայտնում Ֆրիուլի Վենեցիա Ջուլիա նահանգային խորհրդին և խորհրդի անդամ Ալբերտո Բուդային»,- ասված է դեսպանության տարածած հաղորդագրության մեջ։

22:41 - 20 մայիսի, 2021

Բարսելոնայի քաղաքային խորհուրդը ճանաչել է Հայոց ցեղասպանությունը

Բարսելոնայի քաղաքային խորհուրդը ճանաչել է Հայոց ցեղասպանությունը։ Այս մասին հայտնում է Իսպանիայում ՀՀ դեսպանությունը: Դեսպանության «Ֆեյսբուք»-ի էջում հրապարակվել է նաև Բարսելոնայի քաղաքային խորհրդի կողմից Հայոց ցեղասպանության ճանաչման վերաբերյալ փաստաթուղթը:

15:29 - 20 մայիսի, 2021

Թուրքիայի մեջլիսի նախագահը Հայոց ցեղասպանության թեմայով նամակ է հղել Իսլանդիայի խորհրդարանի նախագահին |ermenihaber.am|

ermenihaber.am: Թուրքիայի խորհրդարանի (մեջլիս) նախագահ Մուստաֆա Շենթոփը նամակ է հղել Իսլանդիայի խորհրդարանի նախագահ Ստեյնգրիմուր Սիգֆուսոնին՝ խնդրելով չաջակցել խորհրդարան ներկայացված Հայոց ցեղասպանության բանաձևին։ Շենթոփը նամակում նշել է, որ այդ օրինագիծն օրակարգ է բերվել «որոշ շրջանակների դրդմամբ» և կարող է ստվեր գցել թուրք-իսլանդական հարաբերությունների վրա: Նամակում նա շարադրել է Հայոց ցեղասպանության ժխտող թուրքական քարոզչական թեզերը և փորձել դրանք ներկայացնել պատմաիրավական լույսի ներքո։ Շենթոփն իր իսլանդացի գործընկերոջը հանգամանորեն ծանուցել է պաշտոնական Անկարայի տեսակետի մասին՝ մասնավորապես նշելով, որ առաջին աշխարհամարտի ժամանակ «ծայրահեղական հայերը, զինվելով Օսմանյան կայսրության թշնամիների կողմից, հարձակումներ են գործել օսմանյան բանակի և մուսուլման բնակչության վրա։ Դրա համար էլ պետությունն ընդունել է «Տեղահանության և վերաբնակեցման մասին օրենքը», որի կիրառմամբ ռազմական տեսանկյունից ռազմավարական նշանակություն ունեցող վայրերում բնակվող հայերին տեղափոխել են պատերազմից հեռու գտնվող հարավային նահանգներ»: Թուրքիայի խորհրդարանի ղեկավարը նամակում նաև նշել է, որ օսմանյան կառավարության հանձնարարություններին չհետևած ու հայերի նկատմամբ հանցագործություն կատարած պաշտոնյաները և քաղաքացիները ռազմական դատարանների կողմից դատապարտվել են.1763-ը ազատազրկվել են, 67-ը՝ մահապատժի ենթարկվել։ Շենթոփի նամակում խոսք կա նաև այն մասին, որ «ցեղասպանություն» եզրույթը սահմանվել է 1948թ. ՄԱԿ-ի «Ցեղասպանությունների կանխարգելման և դատապարտման կոնվենցիայում», ըստ որի՝ որևէ գործողություն ցեղասպանություն անվանելու համար իրավասու դատարանի որոշում է անհրաժեշտ: «Իսկ ահա 1915-ի վերաբերյալ որևէ դատարանի որոշում չկա»,- դիմել է Շենթոփը Իսլանդիայի խորհրդարանի նախագահին։

19:56 - 18 մայիսի, 2021