ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

Բանակում նոր կարգով սնունդ մատուցող կազմակերպություններին կանխավճար կտրվի. վարչապետ |news.am|

14:02 - 02 ապրիլի, 2020

Վարչապետը ներկայացրեց բյուջետային եկամուտներն ու ընդգծեց հարկային կարգապահության կարևորությունը |armenpress.am|

armenpress.am: Հայաստանում 2020 թվականի առաջին եռամսյակի ցուցանիշներով՝ հարկային հավաքագրումները նախորդ տարվա առաջին եռամսյակի ցուցանիշները գերազանցում են 49,5 մլրդ դրամով կամ 16,5 տոկոսով։ Այդ մասին կառավարության նիստում հայտարարեց վարչապետ Նիկոլ Փաշինյանը՝ ավելացնելով, որ այս ցուցանիշներն ավելի կընդգծվեն, եթե նշվի, որ 2019 թվականի առաջին եռամսյակի հարկային հավաքագրումների ցուցանիշները 2018 թվականի նկատմամբ ավելի են եղել 60,5 մլրդ դրամով կամ 25,3 տոկոսով։ «Այսպիսով, կարող ենք ասել, որ մենք ճգնաժամի եզրին փաստորեն բավական լուրջ գերակատարումներ ենք ունեցել։ Եվ 2018 թվականի համեմատությամբ 2020 թվականի առաջին եռամսյակի եկամուտներն ավելացրել ենք ավելի քան 100 մլրդ դրամով: Իհարկե, բոլորս գիտակցում ենք, որ կորոնավիրուսի հետևանքով առաջացած ճգնաժամի պատճառով դեռ անորոշություններ շատ կան: Ակնհայտ է, որ մենք այս տեմպերը կկորցնենք, բայց մեծ հաշվով 2019 թվականի և 2020 թվականի առաջին եռամսյակի տնտեսական տեմպերն ապացուցում են այն փաստը, որ կառավարության տնտեսական քաղաքականությունն արդյունավետ է, և մենք տիրապետում ենք տնտեսության զարկերակին։ Իհարկե, ստեղծվել են նոր պայմաններ, նոր իրավիճակ, և ճգնաժամային իրավիճակում մենք պետք է նույնքան արդյունավետ կարողանանք տնտեսական որոշումներ կայացնել»,- ասաց վարչապետը։ Նիկոլ Փաշինյանը շնորհակալություն հայտնեց այն տնտեսավարողներին, որոնք պարտաճանաչ վճարում են իրենց հարկերը, ինչպես նաև ՊԵԿ-ին՝ հարկերի հավաքագրման գործը հաջողությամբ իրականացնելու համար։ Կառավարության ղեկավարը կրկին ընդգծեց, որ այս ճգնաժամը ոչ թե պետք է հարկային կարգապահությունը նվազեցնելու առիթ դառնա, այլ ընդհակառակը, ճգնաժամի պայմաններում առավել ևս պետք է հարկային կարգապահությունը խստանա։ «Եվ ուզում եմ անդրադառնալ այն, այսպես ասած, շրջիկ խոսակցությանը, որ կա՝ թե մարդիկ չեն աշխատում, իսկ դուք հարկեր եք պահանջում ու հավաքում:Ուզում եմ կրկին ընդգծել, որ հարկերը գոյանում են դրամաշրջանառության, եկամուտների և շահույթների առկայության պարագայում։ Այսինքն՝ գործնականում հնարավոր չէ հարկեր հավաքել այն մարդկանցից, ովքեր շրջանառություն և եկամուտներ չունեն։ Իհարկե, կան որոշակի հաստատագրված հարկերի տեսակներ, բայց ընդհանուր առմամբ նաև այդ հարկերի հավաքագրումն ապահովելու համար է, որ մենք լայն տնտեսական աջակցության ծրագրեր ենք իրականացնում։ Բայց ուզում եմ ասել, որ հարկային կարգապահությունը որևէ ձևով չպետք է թուլանա, այլ ընդհակառակը, պետք է ուժեղանա։ Առավել ևս այս ճգնաժամային պայմաններում բոլոր ոլորտներում կառավարության գործունեության արդյունավետությունը կախված է առկա բյուջետային միջոցներից։ Եվ մենք պետք է ամեն ինչ անենք, որպեսզի 2020 թվականի բյուջեն կատարենք հնարավոր առավելագույն ծավալներով»,- ասաց վարչապետը։

13:11 - 02 ապրիլի, 2020

Ապրիլյան պատերազմը տվել է հարցերից ամենակարևորի պատասխանը. Նիկոլ Փաշինյան |armenpress.am|

armenpress.am: Վարչապետ Նիկոլ Փաշինյանը կառավարության նիստի սկզբին անդրադարձավ 2016 թվականի ապրիլյան քառօրյա պատերազմին և նշեց, որ դրա վերաբերյալ կան ամենատարբեր գնահատականներ: Վարչապետն ընդգծեց, որ պատերազմը տվել է հարցերից ամենակարևորի պատասխանը: «Իսկ հարցը հետևյալն էր, թե անկախության սերունդը որքանո՞վ է ի վիճակի պաշտպանել սեփական հայրենիքի անվտանգությունն ու ինքնիշխանությունը: Այդ պատասխանը պերճախոս կերպով տրվեց, որովհետև մեր անկախության սերնդի զինվորները, իհարկե, ոչ միայն նրանք, դարձան անօրինակ սխրանքների օրինակներ, սրանով ի վերջո պատասխանելով հարցերից ամենակարևորին: Հայաստանը, Արցախը, հայ ժողովուրդը պետք է վստահ լինի, որ արցախյան ազատամարտի առաջին սերնդի մեր ներկայացուցիչներին եկել է համալրելու նոր սերունդը, որը նույնքան վճռական պատրաստ է կանգնել հայրենիքի պաշտպանության դիրքերում»,- ասաց Նիկոլ Փաշինյանը:

12:31 - 02 ապրիլի, 2020

Վարչապետը շնորհավորեց Արցախում տեղի ունեցած ընտրությունների առիթով և նշեց մի քանի խոսուն փաստեր |armenpress.am|

armenpress.am: Վարչապետ Նիկոլ Փաշինյանը կառավարության նիստում բոլորին շնորհավորեց Արցախում տեղի ունեցած ընտրությունների առիթով: Վարչապետի կարծիքով՝ կայացել են բարձր որակի ընտրություններ, ինչի մասին են վկայում ընտրությունների պաշտոնական արդյունքները: «Արձանագրենք, որ նախագահական ընտրությունների հանգուցալուծումն առաջին փուլով տալու համար թեկնածուներից մեկին՝ Արայիկ Հարությունյանին, նախնական արդյունքներով չի հերիքել մի քանի հարյուր ձայն: Այս փաստն ինքնին բավականին խոսուն է: Բավականին խոսուն է նաև նախագահի թեկնածուների ու Ազգային ժողովի ընտրություններին մասնակցող ուժերի աննախադեպ մեծ թիվը: Բավականին խոսուն է այն փաստը, որ խորհրդարանական ընտրությունների արդյունքներով 2-րդ և 3-րդ տեղերը զբաղեցրել են ոչ թե իշխանական, այլ ընդդիմադիր ուժեր»,- ասաց վարչապետը:

12:01 - 02 ապրիլի, 2020

Կառավարությունը հաստատեց կորոնավիրուսի տնտեսական հետևանքների չեզոքացման իններորդ միջոցառումը

11:50 - 02 ապրիլի, 2020

Այս պահի դրությամբ Հայաստանում 9 բժշկական հաստատություն զբաղվում են միայն կորոնավիրուսով վարակված պացիենտների բուժմամբ․ Արսեն Թորոսյան

Ապրիլի 2-ի դրությամբ Հայաստանում գրանցվել է կորոնավիրուսի վարակման 92 նոր դեպք։ Այսօր կառավարության հերթական նիստի ընթացքում Առողջապահության նախարար Արսեն Թորոսյանը նշեց, որ հաստատված դեպքերի մեծ մասը եղել են մեկուսացման մեջ կամ ի սկզբանե եղել են կասկածելի, քանի որ անմիջական շփում են ունեցել հաստատաված դեպքերի հետ։ «Կան նաև նոր դեպքեր, բայց դրանք մեծամասամբ բերովի դեպքեր են՝ թե՛ ցամաքային, թե՛ օդային ճանապարհով։ Կազմակերպվում է նաև նրանց շփման շրջանակի հայտնաբերման և մեկուսացման գործընթացները»,- ասաց նախարարը ։ Թորոսյանը տեղեկացրեց, որ կա 16 հաստատություն, որտեղ պահվում են այն պացիենտները, որոնց թեստի արդյունքները դրական են, բայց թեթև վիճակում են գտնվում և այն քաղաքացիները, որոնք շփվել են հաստատված կոնտակտների հետ։ «Այս պահի դրությամբ Հայաստանում 9 բժշկական հաստատություն զբաղվում են միայն կորոնավիրուսով վարակված պացիենտների բուժմամբ։Սուրբ Գրիգոր Լուսավորիչ բժշկական կենտրոնը այսօր կդատարկվի և կդառնա միայն կորոնավիրուսի դեմ պայքարի հիվանդանոց։Այնտեղից ռեանիմացիոն պացիենտները կտեղափոխվեն այլ հիվանդանոցներ, ինչը դեռ երկար ժամանակ թույլ կտա, որ մենք ունենանք բավարար մահճակալային ֆոնդ, որպեսզի բոլոր պացիենտները հոսպիտալացվեն։ Թեթև սիմպտոմներ ունեցող պացիենտները կտեղափոխվեն մեկուսացման այլ վայրեր , հյուրանոցներ և այլն»,- եզրափակեց նախարարը։

11:34 - 02 ապրիլի, 2020

Կառավարության նիստը․ Ուղիղ

11:04 - 02 ապրիլի, 2020

Վարչապետի գլխավորությամբ շարունակվել են քննարկումները՝ կորոնավիրուսի հետևանքով առաջացած սոցիալ-տնտեսական խնդիրների լուծումների վերաբերյալ

Վարչապետ Նիկոլ Փաշինյանի գլխավորությամբ կառավարությունում այսօր շարունակվել են քննարկումները՝ կորոնավիրուսի հետևանքով առաջացած սոցիալ-տնտեսական խնդիրների լուծումների վերաբերյալ: Այս մասին տեղեկանում ենք ՀՀ վարչապետի կայքէջից։ Նախ անդրադարձ է եղել կառավարության հաստատած միջոցառումների իրականացմանը: Ներկայացվել են ընթացիկ վիճակագրական տվյալներ, այդ թվում՝ կորոնավիրուսի տնտեսական հետևանքների չեզոքացման 3-րդ միջոցառման վերաբերյալ, որի նպատակը ՓՄՁ տնտեսվարողների մոտ կորոնավիրուսի տարածման հետևանքով կանխատեսվող ընթացիկ իրացվելիության հետ կապված ռիսկերի մեղմումն է: Նշվել է, որ Ներդրումների աջակցման կենտրոնն արդեն ստացել է 11 հայտ, և ՓՄՁ սուբյեկտ հանդիսացող տնտեսվարողների դիմումների գույքագրումը շարունակվում է: Արծարծվել են նաև մյուս ծրագրերի իմպլեմենտացիային առնչվող հարցեր: Վարչապետը հանձնարարել է շարունակել կորոնավիրուսի հետևանքների չեզոքացմանը միտված միջոցառումների մշտադիտարկումը, ինչը թույլ կտա կառավարությանը շարունակաբար բարձրացնել դրանց արդյունավետությունն ու հասցեականությունը: Հաջորդիվ քննարկվել են սոցիալական թիրախային օժանդակության շրջանակի ընդլայնման ուղղությամբ նոր միջոցառումների նախագծերը, մտքերի փոխանակության ընթացքում ներկայացվել են մի շարք գաղափարներ: Նիկոլ Փաշինյանը հանձնարարել է վերջնական տեսքի բերել քննարկված միջոցառումների նախագծերը և ներկայացնել կառավարության հաստատմանը:

19:45 - 01 ապրիլի, 2020

Տնտեսական գործունեության արգելված և թույլատրված տիրույթները՝ ըստ պարետի որոշման |armtimes.com|

17:41 - 01 ապրիլի, 2020

Լրագրողների համար գործատուն տեղեկանքը տալիս է մեկ անգամ․ վարչապետի խոսնակ |168.am|

168.am: ՀՀ փոխվարչապետ, արտակարգ դրության ռեժիմի պարետ Տիգրան Ավինյանը նոր որոշում է ընդունել Հայաստանի Հանրապետության ողջ տարածքում կիրառվող սահմանափակումների վերաբերյալ։ Կառավարության պաշտոնական կայքում հրապարակված որոշման մեջ նշվում է, որ Հայաստանի Հանրապետության ողջ տարածքում սահմանափակվում է մարդկանց ազատ տեղաշարժվելու իրավունքը և սահմանվում է անձանց պարտադիր ինքնամեկուսացում: Նոր որոշմամբ` աշխատանքի նպատակով ինքնամեկուսացման ռեժիմ խախտող անձինք իրենց մոտ պետք է ունենան գործատուի կողմից տրվող տեղեկանք, որն իր մեջ ներառում է այնպիսի տեղեկություններ, ինչպիսիք են աշխատողի անուն-ազգանունը, ընկերության անվանումը, աշխատողի անձը հաստատող փաստաթղթի համարը, աշխատողի զբաղեցրած պաշտոնը, աշխատանքի սկզբի և ավարտի ժամերը, տեղեկանքի գործողության ժամկետը: Ըստ էության այս սահմանափակումները տարածվում են նաև լրագրողների վրա, որոնք նախկինում կարողանում էին տեղաշարժվել ու իրենց աշխատանքը կատարել իրենց լրագրողական բեյջերով: Լրագրողների աշխատանքի վերաբերյալ որոշ պարզաբանումներ ներկայացրեց ՀՀ վարչապետի խոսնակ Մանե Գևորգյանը: Մանե Գևորգյանը նախ ասաց, որ նախկինում էլ, թեպետ լրագրողական բեյջը տեղաշարժի որոշ ազատություն տալիս էր, սակայն, այնուամենայնիվ, անհրաժեշտ էր նաև տեղաշարժի թերթիկի առկայությունը, և այժմ, փաստորեն, անհրաժեշտ է նաև գործատուի կողմից տրված տեղեկանքը, որը ձեռք բերելու ժամանակ լրագրողներն ունեն այսօր մինչև կեսգիշեր: Հարցին, թե ինչպե՞ս դա պետք է կազմակերպենք, եթե խմբագրությունը փակ է, և լրագրողները տնից են աշխատում, Մանե Գևորգյանը պատասխանեց, որ որևէ կերպ այդ տեղեկանքի ձեռքբերումը պետք է կազմակերպվի մինչև կեսգիշեր: «Կարող եք տպել, տանել տնօրենի մոտ, նա սարքի, տա: Կարող եք ուղղակի թերթիկի վրա գրել այդ անհրաժեշտ տվյալները, տանել տնօրենին, նա լրացնի, ստորագրի ու տա ձեզ` որպես լրագրողի»,- ասաց վարչապետի խոսնակը` հավելելով, որ լրատվամիջոցից ընդամենը մեկ հոգի կարող է գնալ գործատուի մոտ, բոլորի քանակով լրացվի ու ստորագրվի այդ, ու ինքն էլ մյուսներին բաժանի՝ ըստ անհրաժեշտության: Մեր ճշտող հարցին, թե այդ տեղեկանքը մեկ օրվա՞, թե՞ պարետի որոշմամբ սահմանափակումների բոլոր օրերի համար մեկ անգամ է տրվում, Մանե Գևորգյանը պատասխանեց, որ ամեն օր պետք չի լրացնել այդ տեղեկանքը, անհրաժեշտ է սոսկ մեկ անգամ գրել, թե որքան օրերի համար է տրվում տեղեկանքը, ու լրացնել մնացած տվյալները:

13:38 - 01 ապրիլի, 2020

Կորոնավիրուսի տնտեսական հետևանքների չեզոքացման երկրորդ և երրորդ ծրագրի շահառուներն արդեն կարող են դիմել աջակցության համար |lragir.am|

lragir.am: Կորոնավիրուսի տնտեսական հետևանքների չեզոքացման երկրորդ և երրորդ ծրագրի շահառուներն արդեն կարող են դիմել աջակցության համար։ Դրանք վերաբերում են ՓՄՁ-ին ու գյուղացիական տնտեսություններին աջակցելուն։ Երեկ ու այսօր հաստատվում են ծրագրին դիմելու կարգերը։ Աջակցության ծրագրերի համար գործում են թեժ գժեր՝ 8105 և 041 01-05-23 հեռախոսահամարներով։ Այսօր կառավարությունում հրավիրած ասուլիսում Էկոնոմիկայի փոխնախարար Նաիրա Մարգարյանը մանրամասնեց աջակցության երրորդ ծրագիրը։ «Այս միջոցառումը փոքր և միջին ձեռնարկությունների աջակցությանն է միտված։ Կարող են մասնակցել այն կազմակերպությունները, որոնք գործում են զբոսաշրջության, առողջապահության, կացության, հանրային սնունդի, մշակվող արդյունաբերության ոլորտում, որոնց 2019 թվականի շրջանառությունը եղել է 24-500 մլն դրամի շրջանակներում, որոնց մեկ եռամսյակի շրջանառությունն ամբողջ տարվա շրջանառության 10 տոկոսից ավելի է, որոնք ունեն բարվոք հարկային ու վարկային պատմություն։ Նրանք կարող են դիմել ու ստանալ անտոկոս վարկեր։ Մենք դրանք անվանում ենք արտոնյա վարկեր, 36 ամսով տրամադրվող վարկեր են, որոնց առաջին երկու տարվա, այսինքն՝ 24 ամիսների համար վարկը գործում է անտոկոս, վերջին մեկ տարվա համար՝ 12 տոկոս պայմանով»,- ասաց փոխնախարարը։ Նաիրա Մարգարյանի խոսքով՝ վարկը տրամադրվում է միայն անկանխիկ միջոցով և կարող է ծախսվել վարձակալության, աշխատավարձերի, հարկերի, հումքի, կոմունալների վճարների ուղղությամբ։ Վարկերն ունեն 6 ամիս արտոնյալ ժամկետ, այսինքն՝ վեց ամսվա ընթացքում շահառուն որևէ մարում չի անելու։ Իսկ 7-րդ ամսից սկսած հավասարաչափ մարումներ են գործելու։ Զբոսաշրջության և կացության ոլորտների համար կա լրացուցիչ պայման, եթե այդ շահառուն այդ երկու ոլորտից է և իր վերցրած վարկը չի գերազանցում 10 մլն դրամը, նորից մարման գրաֆիկը 7-12-րդ ամսում սահմանվում է հավասարաչափ, բայց ոչ ավելի, քան ամսական 70 հազար դրամ, որից հետո 13-րդ ամսից սկսած նորից հավասարաչափ մարումներ են լինելու։ Վաղաժամ մարումներ հնարավոր են, այդ դեպքում տուգանք նախատեսված չէ։ Բոլոր դիմումներն ընդունվելու են միայն առցանց` Ներդրումների աջակցման կենտրոնի կայքում։ Կայքում գործելու է նաև թեժ գիծ։ Պահանջվող փաստաթղթերի ցանկը պարզ է։ «Երկու կետ նշեմ, որը կարող է բարդություններ առաջացնել։ Որպեսզի մենք վարկային պատմությունը կարողանանք ճշտել, պետք է դիմենք ԱՔՌԱ համակարգին կամ շահառուն պետք է դիմի։ Որպեսզի ավելի արագ կարողանանք հայտադիմումը մշակել, առաջարկում ենք տրամադրել Ներդրումների աջակցման կենտրոնին լիազորագիր, որով կենտրոնը կարող է դիմել ԱՔՌԱ համակարգ։ Լիազորագրի օրինակն առցանց կա, այն պետք ստորագրված լինի էլեկտրոնային ստորագրությամբ։ Մենք նաև խնդրել ենք, որպեսզի շահառուները ներբեռնեն իրենց հարկային հաշվետվությունները»,- ասաց նա։

13:11 - 01 ապրիլի, 2020

Էկոնոմիկայի փոխնախարարներ Նաիրա Մարգարյանի և Արման Խոջոյանի ասուլիսը․ Ուղիղ

12:01 - 01 ապրիլի, 2020

ԱԺ-ն ամբողջությամբ ընդունեց կորոնավիրուսով վարակված անձանց կոնտակտավորներին հեռախոսազանգերի միջոցով տեղորոշելու վերաբերյալ նախագիծը

ԱԺ պատգամավորները երկրորդ ընթերցմամբ եւ ամբողջությամբ ընդունեցին «Արտակարգ դրության իրավական ռեժիմի մասին» ՀՀ օրենքում լրացումներ կատարելու մասին և «Էլեկտրոնային հաղորդակցության մասին» ՀՀ օրենքում լրացում կատարելու մասին օրենքների նախագծերի փաթեթը, որով նախատեսվում է Հայաստանում կորոնավիրուսով վարակված անձանց կոնտակտավորներին հնարավորինս շուտ գտնելու նպատակով ֆիքսել նրանց հեռախոսազանգերը։ Կողմ քվեարկեց 71 պատգամավոր, դեմ՝ 0, ձեռնպահ՝ 0։

22:49 - 31 մարտի, 2020

«Հետքին» արգելել են նկարահանում իրականացնել Աշտարակի բժշկական կենտրոնում |hetq.am|

hetq.am: «Հետք»-ը մի քանի հոդված է հրապարակել՝ ներկայացնելով, թե ինչպիսին է առկա վիճակը մարզերի հիվանդանոցներում, ինչքանով են դրանք պատրաստ կորոնավիրուսով վարակված հիվանդներ ընդունելու: Հրապարակված նյութերից մեկի ֆեյսբուքյան մեկնաբանություններում մի քաղաքացի խնդրում էր անդրադառնալ նաև Աշտարակի հիվանդանոցին: «Մի հատ եկեք Աշտարակինը պալատներով, բանով նկարեք, խնդրում եմ։ Տոտալ խայտառակություն ա...»,-գրել էր քաղաքացին: Այցելեցինք Աշտարակի հիվանդանոց՝ տեղում պարզելու իրավիճակը։ Հիվանդանոցի տնօրեն Արգիշտի Հովհաննիսյանը կոպիտ տոնով ասաց, որ չի կարող մեզ ընդունել, քանի որ զբաղված է ավելի կարևոր գործերով: «Ես ձեզ չեմ ընդունելու, չեմ խոսելու»,-ասաց Ա. Հովհաննիսյանը և փակեց ընդունարանի դուռը: Հետո աշխատակցի միջոցով փոխանցեց, որ գնանք իր մոտ: Դարձյալ ընդունարանի մուտքի մոտ կանգնելով՝ ասաց, որ ընդամենը մեկ նախադասություն է ասելու՝ «Ամեն ինչ նորմալ է, բնականոն աշխատում ենք»: Քանի որ Աշտարակի բժշկական կենտրոնը մարզային ենթակայության բժշկական հաստատություն է, զանգահարեցինք Արագածոտնի մարզպետի ընդունարան, որպեսզի մարզպետին ներկայացնենք իրավիճակը: Գործավարուհին ասաց, որ մարզպետը տեղում չէ, և խորհուրդ տվեց դիմել մարզպետարանի առողջապահության և սոցիալական ապահովության վարչություն: Վերջինիս աշխատակցուհին նախ հետաքրքրվեց, թե ինչու ենք այցելել հիվանդանոց, ապա, լսելով պատասխանը, նշեց. «Նորմալ է ամեն ինչ»: Մենք պնդեցինք, որ ցանկանում ենք տեղում պարզաբանումներ ստանալ հիվանդանոցի տնօրենից։ Մարզպետարանի աշխատակցուհին ասաց, որ կզանգահարի քիչ ուշ: Հիվանդանոցի բակում 40 րոպե սպասելուց և մարզպետարանից զանգ չստանալուց հետո որոշեցինք գնալ մարզպետարան և տեղում ստանալ պատասխանը: Մինչ մարզպետարան գնալը զանգահարեցինք նաև վարչապետի մամուլի խոսնակ Մանե Գևորգյանին՝ ներկայացնելու իրավիճակը: Պարզաբանեցինք, որ քաղաքացիներից բողոք ենք ստացել, նյութը գրելու ենք, պարզապես ցանկանում ենք տեղում պարզաբանում ստանալ: Ասաց, որ չի կարող ստիպել հիվանդանոցի տնօրենին, որպեսզի նա պարզաբանում տա, սակայն հիշեցնելով նախկինում հրապարակած մեր հոդվածները՝ ակնարկեց, թե նպատակահարմար չեն նմանատիպ հրապարակումները: Մարզպետարանի մուտքի մոտ մեզ դիմավորեց պաշտպանիչ միջոցներ չկրող մի տղամարդ: Մարզպետարանից փոխանցեցին, թե նա պահակն է: Տղամարդը ոչ ձեռնոց ուներ, ոչ էլ՝ պաշտպանիչ դիմակ: Ասաց, որ չենք կարող առաջ գնալ և որ ինքը առողջապահության և սոցիալական ապահովության վարչությունից կճշտի պատասխանը և կփոխանցի: «Ապեր, դու դրսում սպասի»,-ասաց պահակը: Որոշ ժամանակ անց ենթադրյալ պահակը մոտեցավ և ներկայացրեց առողջապահության և սոցիալական ապահովության վարչության պատասխանը. «Ասում են՝ պարետն արգելել է հիվանդանոցը նկարել, չեք կարող գնալ ու նկարել»: Թյուրիմացությունից խուսափելու նպատակով խնդրեցինք, որ այդ ամենը մեզ փոխանցեն հենց վարչության աշխատակիցները: Պահակը նշեց, թե հիմա կզանգեն ու կասեն: Մարզպետարանի բակում 30 րոպե սպասելուց հետո որևէ մեկն այդպես էլ չզանգեց: Դարձյալ զանգահարեցինք նշված վարչություն: Աշխատակիցը, ով չներկայացավ, նշեց, թե մեզ պետք է զանգահարեր բաժնի պետը: «Հիմա կասեմ կզանգի, եթե ազատ լինի»,-ասաց աշխատակցուհին դեռևս ժամը 15:00-ին: Մինչ այս պահը Արագածոտնի մարզպետարանից որևէ զանգ չենք ստացել: Ավելին՝ կարդացեք Հետք-ում։

22:23 - 31 մարտի, 2020

Քննարկվել են տնտեսության առանձին ճյուղերում նպատակային ներդրումային ծրագրերին օժանդակության քայլերը

Վարչապետ Նիկոլ Փաշինյանի գլխավորությամբ կառավարությունում կայացել է հերթական խորհրդակցությունը, որի ընթացքում քննարկվել են կորոնավիրուսի հետևանքների չեզոքացման հակաճգնաժամային միջոցառումները: Մասնավորապես, ներկայացվել են տնտեսության առանձին ճյուղերում՝ վերամշակող արդյունաբերության, բարձր տեխնոլոգիաների, գյուղատնտեսության, առողջապահության ոլորտներում նպատակային ներդրումային/զարգացման ծրագրերի իրականացմանն ու խթանմանը վերաբերող տարբեր առաջարկությունների փաթեթներ: Մանրամասն անդրադարձ է կատարվել օժանդակության գործիքակազմերին և հետագա գործողություններին: Ինչպես տեղեկացրին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, ի լրումն կառավարության նախորդ նիստում հավանության արժանացած ծրագրերի, ներկայացվել են նաև սոցիալական առանձին խմբերին աջակցություն ցուցաբերելու վերաբերյալ առաջարկություններ: Վարչապետ Փաշինյանը հանձնարարել է ներկայացված առաջարկությունների հիման վրա պատրաստել գործողությունների հստակ քայլեր և միջոցառումներ, որոնք կառավարության որոշումների տեսքով կյանքի կկոչվեն: Նիկոլ Փաշինյանը պատասխանատուներին հանձնարարել է ավարտել բոլոր նախապատրաստական աշխատանքները, որպեսզի վաղվանից կառավարության հակաճգնաժամային փաթեթների մի մասից, ինչպես հայտարարվել էր գործադիրի մարտի 26-ի նիստում, շահառուները կարողանան օգտվել:

19:37 - 31 մարտի, 2020

Չարենցավան ելումուտն արգելող որոշումը ելք չպետք է լիներ, խնդիրը տեխնիկական է. դա ընդամենը պլանային աշխատանքների տրամաբանությամբ ծրագիր էր․ Տիգրան Ավինյան |tert.am|

tert.am: Չարենցավան համայնք անձանց և տրանսպորտային միջոցների մուտքն ու ելքը արգելող որոշումը ելք չպետք է լիներ, միակ խնդիրը տեխնիկական է եղել։ Այս մասին Կառավարության մամուլի սրահում տեղի ունեցած ասուլիսին հայտարարեց պարետ, փոխվարչապետ Տիգրան Ավինյանը։ «Այսինքն, դուրս է եկել որպես կատարման ծրագիր և շատ արագ տեղ է հասել, սկսել է կատարվել, բայց այդ ծրագիրն ընդամենը պլանային աշխատանքների տրամաբանությամբ ծրագիր է եղել, և այլ ծրագրերի հետ համատեղ, եղել է մեր համակարգում»,- հայտնեց պարետը։ Տիգրան Ավինյանի խոսքով՝ պարետատունը տարբեր իրավիճակների համար ունի մշակած մարտավարություն. «Մենք ունենք տարատեսակ նախապատրաստած պլաններ տարբեր քաղաքների վերաբերյալ և ունենք ծրագրեր, որոնք ժամանակ առ ժամանակ փոփոխվում են: Ամեն օր մենք ունենք գործողությունների կիրառման մի շարք փաթեթներ, որոնք այս կամ այն փուլում կարող են մտնել ուժի մեջ»,- ասաց նա։

17:50 - 31 մարտի, 2020