ԱՄՆ - infocom.am

ԱՄՆ

Ամերիկայի Միացյալ Նահանգները դաշնային սահմանադրական հանրապետություն է Հյուսիսային Ամերիկայում, որը բաղկացած է որոշակի ինքնավարություն ունեցող 50 նահանգներից և դաշնային նշանակության Կոլումբիա մարզից։ Ամերիկայի Միացյալ Նահանգները հյուսիսում սահմանակցում է Կանադային, հարավում՝ Մեքսիկային, ծովային սահման ունի Ռուսաստանի հետ։

Մայրաքաղաքը՝ Վաշինգտոն, տարածքը 9,826,675 կմ² է։ 2019 թվականին դրությամբ բնակչությունը կազմում է 328 239 523 մարդ։ Գործող նախագահը Ջոզեֆ Բայդենն է։

Ամերիկայի Միացյալ Նահանգները ներկայումս անդամակցում է ՄԱԿ-ի Անվտանգության Խորհրդին, Հյուսիսատլանտյան դաշինքին, Առևտրի համաշխարհային կազմակերպությանը, Տնտեսական համագործակցության և զարգացման կազմակերպությանը և այլ միջազգային կազմակերպությունների։

ԱՄՆ-ն կոչ է անում երկու կողմին անհապաղ դադարեցնել ռազմական գործողությունները և սկսել բանակցությունները. պետքարտուղարության ներկայացուցիչ |1lurer.am|

1lurer.am: Շարունակվում են միջազգային կազմակերպությունների և տարբեր երկրների օրենսդիր մարմինների ներկայացուցիչների այցելությունները Արցախ: Նրանք տեղում ականատես են լինում Ադրբեջանի, Թուրքիայի և ահաբեկիչների իրագործած պատերազմի հանցագործություններին, հանդիպում ղեկավարության, բնակիչների հետ, իրականացնում փաստահավաք աշխատանք: Արցախի մայրաքաղաքի տեղեկատվական կենտրոնում անցկացվող ճեպազրույցին մասնակցել են Եգիպտոսի «Մեկ ազատ աշխարհ» իրավապաշտպան կազմակերպության ղեկավար Մաջեդ Էլ Շաֆին, Իսլանդիայի խորհրդարանի անդամ, Կենտրոնական կուսակցության ներկայացուցիչ Բիրգիր Թորարինսոնը, Համաշխարհային քրեական արդարադատության հարցերի հատուկ հանձնարարություններով դեսպան, ԱՄՆ պետքարտուղարության ներկայացուցիչ Մորզե Թանը, Կանադայի խորհրդարանի պատգամավոր, Կանաչների կուսակցությունից Էլիզաբեթ Մեյը, Կանադայի խորհրդարանի պատգամավոր, Պահպանողական կուսակցության ներկայացուցիչ Բոբ Սարոյան: ԱՄՆ պետքարտուղարության ներկայացուցիչ Մորզե Թանը, որը ասուլիսին էր միացել հեռավար եղանակով, նշեց, որ Միացյալ Նահանգները խիստ մտահոգված է ենթակառուցվածքների ավերումով և՛ Հայաստանում, և՛ Ադրբեջանում: Բոլոր կողմերը պետք է հարգեն իրենց պարտավորությունները միջազգային իրավունքի առջև, որը ներառում է քաղաքացիական անձանց պաշտպանությունը: «Վայրագություններն ու սպանությունները պետք է դադարեցվեն Արցախում: Կոչ եմ անում, որ հարցը ստանա ոչ ռազմական լուծում: ԱՄՆ-ն կոչ է անում երկու կողմին ռազմական գործողություններն անհապաղ դադարեցնել և սկսել բանակցությունները»,- նշեց պետքարտուղարության ներկայացուցիչը՝ հիշեցնելով Թրամփի ուղղորդումը մարդասիրական բնույթի հրադադարի հաստատման համար: Լինելով ԵԱՀԿ Մինսկի խմբի համանախագահ երկիր՝ ԱՄՆ-ն շարունակում է կոչ անել երկու կողմերին հաստատել հրադադար դիվանագիտական ճանապարհով և այդ ամենը իրականացնել Հելսինկիի պայմանավորվածության շրջանակներում՝ հարգելով տարածքային ամբողջականության և ինքնորոշման իրավունքները: «Խիստ մտահոգված ենք քաղաքացիների շրջանում զոհերի աճող թվով և քաղաքացիական ենթակառուցվածքների և անձանց թիրախավորմամբ: Ուզում եմ շատ հստակ դիմել տարածաշրջանի երկրների ղեկավարներին: Բոլոր ներգրավված կողմերը, ներառյալ երկրների առաջնորդներն ու ռազմական ղեկավարները, պատասխանատվություն են կրում և պետք է ամեն ջանք ներդնեն, որ ոճրագործություններ տեղի չունենան»,- նշեց Մորզե Թանը:

16:53 - 03 նոյեմբերի, 2020