Թուրքիա

Սիրիացի փախստականների համար Թուրքիային տրամադրվել է 2.3 մլրդ եվրո․ Եվրահանձնաժողով |ermenihaber.am|

ermenihaber.am: Եվրահանձնաժողովը հայտարարություն է տարածել, որ սիրիացի փախստականների համար նախատեսված 6 մլրդ եվրոյից 2.7 միլիարդն արդեն հատկացվել է Թուրքիային: Ըստ հայտարարության` Թուրքիայում ապաստանած սիրիացի փախստականների համար նախատեսվում է 6 մլրդ եվրո հատկացվել, որից 4.3 մլրդ եվրոյի շուրջ համաձայնագիրն արդեն ստորագրվել է, իսկ 2.3 մլրդ եվրոյի փոխանցումը Թուրքիային արդեն իրականացվել է: Սպասվում է, որ 2019թ. ավարտին ԵՄ-ն Թուրքիային տրամադրվող ֆինանսական աջակցությունը կհասցնի մինչև 3 մլրդ եվրոյի, իսկ 2020թ. ավարտին այդ ցուցանիշը կկազմի 4 մլրդ: Հատկացված գումարի ամբողջական վճարման վերջնական տարեթիվը սահմանվել է 2025 թվականը: 2016թ. Թուրքիայի և ԵՄ-ի միջև ստորագրվել է փախստականների հարցերի շուրջ համաձայնագիր, որով ԵՄ-ն պետք է Թուրքիային տրամադրեր 6 մլրդ եվրո ֆինանսական աջակցություն:

10:31 - 12 դեկտեմբերի, 2019

Պուտինն ու Էրդողանը հեռախոսազրույց են ունեցել, քննարկվել են նաև ռազմատեխնիկական ոլորտում համագործակցությանն առնչվող հարցեր |tert.am|

tert.am: Ռուսաստանի Դաշնության նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել, որի ընթացքում կողմ են արտահայտվել Սիրիայում ահաբեկչության դեմ պայքարին ուղղված համաձայնեցված ջանքերի ակտիվացմանը: «Հատուկ ուշադրություն է դարձվել Սիրիայում տիրող իրավիճակին: Առաջնորդներն ընդգծել են Իդլիբում և Սիրիայի հյուսիսային շրջաններում փոխգործակցության մասին ռուս-թուրքական պայմանավորվածությունների լիակատար իրագործման անհրաժեշտությունը»,- ТАСС գործակալությունը մեջբերում է Կրեմլի հաղորդագրությունը: Անդրադառնալով երկկողմ գործընկերության հարցերին՝ Պուտինն ու Էրդողանն ուշադրությունը կենտրոնացրել են էներգետիկայի և ռազմատեխնիկական ոլորտներում համագործակցության համատեղ ծրագրերի հետագա իրականացման վրա: Նշվում է, որ հեռախոսազրույցը տեղի է ունեցել թուրքական կողմի նախաձեռնությամբ:

05:17 - 12 դեկտեմբերի, 2019

«Անկարան չի ընդունի բալթյան երկրների պաշտպանությանն ուղղված ՆԱՏՕ-ի ծրագիրը, քանի դեռ դաշինքը չի ընդունել Թուրքիային ահաբեկչական վտանգից պաշտպանելու ծրագիր». Չավուշօղլու |tert.am|

tert.am: Թուրքիայի արտգործնախարար Մևլութ Չավուշօղլուն հայտարարել է, որ Անկարան չի աջակցի բալթյան երկրների և Լեհաստանի պաշտպանությանն ուղղված ՆԱՏՕ-ի ծրագրին, քանի դեռ դաշինքը չի ընդունել «Թուրքիային ահաբեկչական սպառնալիքից» պաշտպանելու մասին ծրագիր: Այս մասին տեղեկացնում է թուրքական NTV հեռուստաալիքի կայքը: «Մենք ստիպված էինք արգելափակել բալթյան երկրների մասին որոշումը: Ե՛վ մեր ծրագիրը, և՛ բալթյան երկրների ծրագիրը սպասում է հաստատման: Քանի դեռ չի հաստատվել մեր ծրագիրը, մյուս ծրագիրը նույնպես չի հաստատվի: Երկու ծրագրերն էլ պետք է հաստատվեն միաժամանակ: ՆԱՏՕ-ն պարտավոր է պաշտպանել Թուրքիային այնպես, ինչպես բալթյան երկրներին»,-ասել է Չավուշօղլուն: Նա հավելել է, որ Թուրքիայի անվտանգությունը պակաս կարևոր չէ, քան բալթյան երկրների անվտանգությունը: Թուրքիայի նախագահ Ռեջեփ Թայիփ Էրդողանի և նրա լիտվացի գործընկեր Գիտանաս Նաուսեդայի հանդիպումից հետո Անկարան որոշել էր ընդունել Լեհաստանի և բալթյան երկրների պաշտպանությանն ուղղված ՆԱՏՕ-ի ծրագիրը: Այս մասին հայտարարել էր նաև ՆԱՏՕ-ի գլխավոր քարտուղար Յենս Ստոլտենբերգը:

11:56 - 11 դեկտեմբերի, 2019

Էրդողանը հայտնել է, որ Պուտինը Թուրքիա կայցելի հունվարի 8-ին |ermenihaber.am|

ermenihaber.am: Թուրքիայի նախագահ Ռեջեփ Թայիփ Էրդողանը լրագրողների հետ հարցուպատասխանի ժամանակ hայտնել է Ռուսաստանի նախագահ Վլադիմիր Պուտինի` Թուրքիա կատարելիք այցի ժամկետները: Էրդողանը նշել է, որ Պուտինը 2020թ. հունվարի 8-ին մեկնելու է Ստամբուլ, որտեղ կմասնակցի «Թուրքական հոսք» գազատարի բացման արարողությանը: Լրագրողի «Լիբիայի հարցում ի՞նչ դիրքորոշում ունի Ռուսաստանը» հարցին ի պատասխան, Էրդողանը նշել է, որ այդ թեմայի շուրջ այս շաբաթ ցանկանում է հեռախոսազրույց ունենալ Պուտինի հետ: Թուրքիայի նախագահի խոսքով` քանի դեռ Լիբիայի հարցը «նոր սիրիական խնդրի» չի վերածվել, ցանկանում է Ռուսաստանի հետ քննարկել Լիբիայի ֆելդմարշալ Խալիֆա Հաֆթարի հարցը: Նշենք, որ Լիբիայում 8 տարի է` երկիշխանությունը է: Լիբիայի ազգային համաձայնության կառավարությունն ունի Արևմուտքի աջակցությունը, իսկ Հաֆթարի բանակը` Ռուսաստանի:

08:30 - 10 դեկտեմբերի, 2019

«Թուրքիայի ու Լիբիայի միջև կնքված պայմանագիրը սպառնալիք չէ այլ երկրների համար».Թուրքիայի ՊՆ |ermenihaber.am|

ermenihaber.am: Թուրքիայի ու Լիբիայի միջև կնքված ծովային պայմանագիրը սպառնալիք չէ այլ երկրների համար: Այս մասին հայտարարել է Թուրքիայի պաշտպանության նախարար Հուլուսի Աքարը՝ անդրադառնալով նշյալ պայմանագրի վերաբերյալ Հունաստանի հակազդեցությանը: «Սա երկրների իրավունքների ոտնահարում չէ: Սա 2 ինքնիշխան պետությունների իրավունքների շրջանակներում ստորագրված համաձայնության հուշագիր է»,- ասել է Թուրքիայի պաշտպանության նախարարը: Աքարը նշել է, որ իրենք շարունակելու են վճռականորեն պաշտպանել իրենց իրավունքներն ու շահերը Էգեյան ծովում, Միջերկրական ծովի արևելյան հատվածում ու Կիպրոսում: Նշենք, որ Թուրքիայի և Լիբիայի միջև Միջերկրական ծովի տարածքում գազի որոնողական և հորատման աշխատանքների շուրջ ձեռք բերված համաձայնությունը պատճառ է դարձել Հունաստանի և Լիբիայի, ինչպես նաև Հունաստանի ու Թուրքիայի միջև լարվածության աճի։ Փաստացիորեն Թուրքիայի ու Լիբիայի ծովային սահմանները որոշող ու միաժամանակ այդ սահմաններում 2 երկրներին տնտեսական գործունեություն իրականացնելու իրավունք տվող երկկողմանի համաձայնագրում ներառված ջրային տարածքն անցնում է անմիջապես հունական կղզիների կողքով:

11:21 - 09 դեկտեմբերի, 2019

Թուրք դիվանագետը նշել է, որ Հայաստանը Թուրքիայի հետ հարաբերություններ հաստատելու համար «պետք է կատարի Անկարայի պահանջները» |tert.am|

tert.am: Ադրբեջանում Թուրքիայի դեսպանատան մամուլի քարտուղար Հուսեյն Ալթընալանը հայտարարել է, որ Հայաստանը Թուրքիայի հետ հարաբերություններ հաստատելու համար «պետք է կատարի Անկարայի երեք պահանջները»: Այս մասին տեղեկացնում է «Թրենդ» գործակալությունը: Մամուլի քարտուղարի խոսքով՝ Հայաստանը պետք է «ազատի» Լեռնային Ղարաբաղը, «հրաժարվի» Հայոց ցեղասպանությունը ճանաչելու պահանջից և «չհավակնի թուրքական հողերին»: Թուրք դիվանագետը նշել է, թե Թուրքիան չի կարող դիվանագիտական հարաբերություններ հաստատել Հայաստանի հետ, որովհետև «Հայաստանը չի ճանաչում միջազգայնորեն ճանաչված սահմանները»:

13:07 - 04 դեկտեմբերի, 2019

Թուրքիայում դատարանը մերժել է պատրիարքական ընտրության վերաբերյալ Սիմոն Չեքեմի ներկայացրած հայցը |ermenihaber.am|

ermenihaber.am: Թուրքիայի ներքին գործերի նախարարությունը սեպտեմբերի 24-ին Պոլսի հայոց պատրիարքարան էր ուղարկել պատրիարքի ընտրության նոր կանոնադրությունը, որով սահմանափակվում էր արտասահմանաբնակ եպիսկոպոսների մասնակցությունը ընտրություններին: 85-րդ պատրիարքի ընտրությունը կազմակերպող Նախաձեռնարկ մարմինը որոշում էր կայացրել չբողոքարկել հիշյալ կանոնադրությունը: Կանոնադրությամբ պարտադրվող սահմանափակումը որոշակի դժգոհություն է առաջացրել պոլսահայ համայնքում, ինչպես նաև Նախաձեռնարկ մարմնի կազմում, ինչի հետևանքով վերջինիս անդամներից մի քանիսը հրաժարական են տվել: Ստամբուլի Բեյօղլու թաղամասի Երեք խորան հայկական եկեղեցուն առընթեր թաղային խորհրդի անդամ Սիմոն Չեքեմը Թուրքիայի ներքին գործերի նախարարության և Ստամբուլի նահանգապետարանի դեմ դատական հայց է ներկայացրել՝ նշելով, որ պատրիարքի ընտրությունները կազմակերպող Նախաձեռնարկ մարմինը չի կատարել իր ստանձնած պարտավորությունները: Աղբյուրի փոխանցմամբ` դատարանը մերժել է Սիմոն Չեքեմի հայցը՝ նշելով, որ Նախաձեռնարկ մարմինը չի ձևավորվել Թուրքիայի ներքին գործերի նախարարության կողմից և բողոքը պետք է ներկայացնել Նախաձեռնարկ մարմնի դեմ, այլ ոչ թե նախարարության: Սիմոն Չեքեմի կողմից ներկայացված դատական հայցում նշվել է, որ Թուրքիայի ներքին գործերի նախարարության հրապարակած կանոնադրությամբ սահմանափակվում է արտասահմանաբնակ եպիսկոպոսների մասնակցությունը Պոլսի հայոց պատրիարքի ընտրություններում: «Մինչ այդ նման սահմանափակում չի եղել և թեկնածություն առաջադրելու հնարավորություն էր ընձեռվում այն եպիսկոպոսներին, որոնք հոգևոր ծառայություն էին իրականացնում արտասահմանում և որոնց հայրերը ծնունդով Թուրքիայից էին: Դրանով կանխել են արտասահմանաբնակ թեկնածունների առաջադրումը»,-նշել է նա: Ըստ դատական հայցի` Նախաձեռնարկ մարմինը, չնայած վերոնշյալ սահմանափակմանը, որոշում է ընդունել շարունակել պատրիարքական ընտրությունների գործընթացը և չի կատարել իր պարտավորությունները:

08:11 - 04 դեկտեմբերի, 2019

Էրդողանի ընտանիքը յուրացնում է երկրի ռազմարդյունաբերությունը․ Թուրքիայի ընդդիմադիր «Ժողովրդահանրապետական կուսակցության» նախագահ |ermenihaber.am|

ermenihaber.am: Թուրքիայի ընդդիմադիր «Ժողովրդահանրապետական կուսակցության» նախագահ Քեմալ Քըլըչդարօղլուն Էրդողանին և նրա ընտանիքին մեղադրել է երկրի ռազմարդյունաբերության ոլորտը յուրացնելու մեջ։ «Էրդողանի ընտանիքը ջանում է իր ձեռքը վերցնել թուրքական ռազմական արդյունաբերությունը։ Եթե քաղաքական գործիչը ծառայում է ոչ թե ժողովրդին, այլ իր ընտանիքին և պետության ամենամեծ գործարաններն առանց հինգ կոպեկ վճարելու տալիս իր ընտանիքի անդամներին, ապա դրա անունը յուրացում է»։ Քըլըչդարօղլուն պնդել է, որ թուրքական «Tank Palet» գործարանի արժեքը 20 մլրդ դոլար է, մինչդեռ այն վաճառվել է առանց աճուրդի և ընդամենը 50 մլն դոլարով։ Ավելի վաղ Էրդողանն այդ գործարքի մասին հայտարարել էր, որ գործարանի բաժնեմասերի 50 տոկոսը գնում է Կատարին պատկանող մի ընկերություն։ «Իրականում ձեռք բերողը Էրդողանի ընտանիքն է։ Ես դա գիտեմ, ոչ մի վաճառք էլ չի եղել։ Ինչու՞ եք տալիս Կատարին։ Սա ոչ այլ ինչ է, քան հայրենիքի դավաճանություն։ Դե եթե դատական հայց չներկայացնեք, ուրեմն վախկոտ եք», - ասել է Քըլըչդարօղլուն։ Նա նաև դատապարտել է երկրում խոսքի ազատության դեմ կիրառվող ճնշումները։ Քըլըչդարօղուն մասնավորապես քննադատել է «BirGün» թերթի դեմ քրեական գործի հարուցումը, ինչպես նաև՝ հայտարարել, որ ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) նախկին համանախագահ Սելահաթթին ԴԵմիրթաշն անտեղի է ազատազրկված։ ԺՀԿ առաջնորդը կրկնել է Էրդողանի և նրա մերձավորների կողմից բրիտանական Մեն կղզի փողերի անօրինական տեղափոխման մասին նախկինում արված հայտարարությունները։ «Նրանք ասում են, թե այս մասին խոսք բացողի դեմ կրկին փոխհատուցման հայց կներկայացնեն։ Դե բացեք. թե չբացեք՝ վախկոտ եք։ Ես բոլոր գործերն էլ կշահեմ», - հավելել է նա։

07:10 - 04 դեկտեմբերի, 2019

Ցեղասպանության մասին հայտարարության համար հետաքննություն է սկսվել Դիարբեքիրի փաստաբանների պալատի դեմ |ermenihaber.am|

ermenihaber.am: Թուրքիայի արդարադատության նախարարությունը թույլատրել է Դիարբեքիրի փաստաբանական պալատի նախկին նախագահի և գործադիր խորհրդի անդամների դեմ հետաքննություն սկսել: Պատճառը 2018թ-ին ապրիլի 24-ի առիթով պալատի հրապարակված հայտարարությունն է: Կազմակերպության նախկին նախագահ Ահմեթ Օզմենին և ղեկավար խորհրդի 10 անդամի մեղադրանք է առաջադրվել քրեական օրենսգրքի 301-րդ հոդվածի հատկանիշներով՝ մասնավորապես «ժողովրդին հրապարակայնորեն ատելության և թշնամության հրահրելու, Թուրքիայի ազգային մեծ ժողովը նսեմացնելու» կետով: Դիարբեքիրի իրավաբանական ընկերակցության՝ 2018թ ապրիլի 24-ին «Կիսում ենք հայ ժողովրդի չապաքինվող մեծ ցավը» խորագրով հայտարարության մեջ նշվել էր. «Ժամանակին պատասխանատուները, նախ հայ մտավորականներին և առաջնորդներին ոչնչացնելով, իսկ հետո «Աքսորի մասին օրենքի» անվան տակ զինվորական ստորաբաժանումների և Հետախուզական կառույցի՝ Teşkilatı Mahsusa (Հատուկ կազմակերպություն) միջոցով մեկ միլիոնից ավել քաղաքացու դեպի Սիրիայի սահմաններ մահվան տանելով, դաժան քաղաքականություն են վարել: Տառապանքն այնքան մեծ է եղել, որ ՄԱԿ-ի Ցեղասպանության մասին կոնվենցիայում «ցեղասպանություն» եզրույթը ստեղծել են հայ ժողովրդի նկատմամբ կատարվածից ոգեշնչված: Ստամբուլում, Դիարբեքիրում, Վանում և Անատոլիայի մի շարք քաղաքաներում, որտեղ հայեր են ապրել, կոտորածի, աքսորի և տեղահանության առաջացրած ավերածությունը և խորը ցավը թարմ է մնում: Հարգանքով ոգեկոչում ենք ցեղասպանության ընթացքում զոհված քաղաքացիական անձանց և անմեղ բոլոր հայերին»:

12:41 - 02 դեկտեմբերի, 2019

Անկարայի պնդմամբ, C-400 համակարգերի նոր խմբաքանակի ձեռքբերումը տեղի կունենա մոտ ապագայում |azatutyun.am|

azatutyun.am։ «Ռուսական արտադրության C-400 (S-400) հակաօդային պաշտպանության համակարգերի երկրորդ խմբաքանակի ձեռքբերման հարցը զուտ ժամանակի խնդիր է»: «Ռիա Նովոստի» գործակալության հետ զրույցում այս մասին հայտնել են Թուրքիայի նախագահի աշխատակազմի ներկայացուցիչները: «C-400 համակարգերի նոր խմբաքանակի ձեռքբերման ժամկետների հստակեցումը զուտ տեխնիկական խնդիր է: Այդ գործարքի կնքումը, ըստ ամենայնի, շատ չի ուշանա», - նշել են գործակալության թուրքական աղբյուրները: Ռուսաստանում արտադրված սպառազինության արտահանմամբ զբաղվող «ՌոսՕբորոնԷքսպորտ» ընկերության պաշտոնյաների խոսքով՝ Մոսկվայում ակնկալում են, որ C-400 համակարգերի ձեռքբերման շուրջ նոր գործարքն Անկարայի հետ կկնքվի 2020 թվականի առաջին կեսին: C-400 զենիթահրթիռային համակարգերի մասին 2.5 միլիարդ դոլարի արժողության համաձայնագիրը Մոսկվան ու Անկարան ստորագրել էին 2017-ին։ Սա առաջին նման մեծ գործարքն էր ռուսական ռազմարդյունաբերության համար ՆԱՏՕ-ի անդամ պետության հետ։ Ընդ որում, այս գործարքի համար Ռուսաստանը Թուրքիային վարկ է տրամադրել, բացի այդ՝ խոստացել փոխանցել Անկարային ոչ միայն հրթիռները, այլև դրանց ստեղծման տեխնոլոգիաները։

11:03 - 02 դեկտեմբերի, 2019

Թուրքական մամուլն արձագանքել է Հայաստանի վրա հարձակման պլանի բացահայտումներին |ermenihaber.am|

ermenihaber.am: Շվեդիայում գրանցված «Nordic monitor» կայքը հրապարակել էր հոդված այն մասին, որ Թուրքիան Հայաստանի դեմ ռազմաօդային գործողությունների ծրագիր է մշակել, որը կրում է «ALTAY» ծածկագիրը։ Շվեդիայում գործող այս կայքը համակարգում են թուրք լրագրողները։ Ընդ որում նրանք բոլորն էլ համարվում են «Ֆեթուլլահական ահաբեկչական կազմակերպության» (FETÖ) անդամներ։ Թուրքական իշխանամետ մամուլն անդրադարձել է այդ հրապարակմանը՝ նշյալ տեղեկությունները հրապարակող լրագրողներին անվանելով դավաճաններ, որոնք մատնում են Թուրքիային և գործում պետական շահի դեմ։ Ուշագրավ է այն հանգամանքը, որ իշխանական մամուլը ոչ թե հերքում է «ALTAY» ծածկանվամբ Հայաստանի դեմ ռազմական արշավի ծրագրի առկայությունը և կասկածի տակ առնում նման ծրագրի գոյությունն ընդհանրապես, այլ այն հրապարակողներին մեղադրում է պետական դավաճանության մեջ։ Թուրքական մամուլը նույնպես ընդգծում է այդ տեղեկությունը հրապարակողների՝ գյուլենական շարժման անդամ լինելու հանգամանքը և անդրադառնում Հայաստանի ու Հունաստանի արձագանքներին։ Հունական մամուլում տեղ գտած մեկնաբանություններում կան այնպիսի տեսակետներ, ըստ որոնց՝ Սիրիայից հետո չի բացառվում, որ Թուրքիան հայացքն ուղղի դեպի Հայաստան։

08:34 - 02 դեկտեմբերի, 2019

Չավուշօղլուն պատասխանել է Փաշինյանին. «Կարգավորման գործընթացից դուրս եկած կողմը Թուրքիան չէ»․ Sputnik |ermenihaber.am|

ermenihaber.am։ Պոլսահայ պատգամավոր Կարո Փայլանը Հայաստանի վարչապետ Նիկոլ Փաշինյանի հայտարարության վերաբերյալ հարց էր ուղղել Թուրքիայի արտգործնախարար Մևլութ Չավուշօղլուին: Հայ պատգամավորը մասնավորապես հետաքրքրվել էր, թե արդյոք թուրքական կողմը պատասխանել է հայ-թուրքական հարաբերություններն առանց նախապայմանների կարգավորելու Հայաստանի պատրաստակամության մասին Փաշինյանի հայտարարությանը։ Հարցին գրավոր պատասխանած Չավուշօղլուն նշել է, որ Հարավային Կովկասում ամբողջական և համապարփակ կարգավորման հարցում Թուրքիայի նպատակը պահպանվում է և այդ առումով Հայաստան-Թուրքիա հարաբերությունների կարգավորման ցանկությունը չի փոխվել։ Ըստ աղբյուրի՝ Չավուշօղլուն նշել է, որ Հայաստանի՝ ցյուրիխյան արձանագրությունները խորհրդարանից հետ կանչելուց, ապա նաև դրանք առ ոչինչ հայտարարելուց հետո երկկողմ հարաբերությունների կարգավորումը ձախողվել է։ Թուրք նախարարի խոսքերով գործընթացից դուրս եկած կողմը Թուրքիան չէ։ Ըստ Չավուշօղլուի՝ հնարավոր կարգավորման գործընթացը կարող է կայուն և շարունակական լինել միայն մի դեպքում, եթե Հարավային Կովկսում համապարփակ խաղաղությանն ուղված հստակ քայլեր կատարվեն։ Այս համատեքստում հիշեցվել է, որ Թուրքիան Հայաստանի հետ սահմանը փակել է 1993թ․ «Ադրբեջանի հողերի բռնազավթման պատճառով», դրան հաջորդող 26 տարիների ընթացքում «Հայաստանի ագրեսիվ դիրքորոշումը շարունակվել է», որի արդյունքում Թուրքիայի որոշումը փոխելու համար համապատասխան պայմաններ չեն ձևավորվել։ Այս առնչությամբ նա մասնավորպես նշել է․ «Հետևաբար, Թուրքիա-Հայաստան հարաբերությունների կարգավորման հիմք ստեղծելու համար ԼՂ հիմնախնդրի լուծման ուղղությամբ հստակ քայլեր անելը էական է»։ Շարունակելով Արցախի թեման՝ Չավուշօղլուն ասել է. «Երբ վարչապետ Փաշինյանը 2018 մայիսին իշխանության եկավ ԼՂ խնդրի խաղաղ լուծման համար հուսադրող արտահայտությունների հետ մեկտեղ տուրք տվեց Հայաստանում կոշտ դիրքորոշում ունեցողներին և սփյուռքին ու աստիճանաբար խստացրեց տոնը։ Փաշինյանը օգոստոսի 5-ին բռնազավթված Խանքենդիում (Ստեփանակերտ-խմբ.) ելույթի ընթացքում ասել է ԼՂ-ն Հայաստան է, որը հստակ ցուցիչ է այն բանի, որ Հայաստանը սկսել է հեռանալ խաղաղ լուծումից։ Նաև, վարչապետ Փաշինյանը երբեմն-երբեմն հայտարարություն է անում, որ մեր երկրի հետ հարաբերությունների կարգավորելո համար պատրաստ է առանց նախապայմանների բանակցությունների, բայց միևնույն ժամանակ ՄԱԿ Գլխավոր անսամբլեայի 74-րդ նստաշրջանում ելույթ ունենալիս կարողացել է ասել, որ Թուրքիան Հայաստանի համար լուրջ սպառնալիք է»։ Չավուշօղլուն, կրկին Հայաստանին մեղադրել է «անհիմն պնդումներով» Թուրքիան թիրախավորելու համար՝ միաժամանակ հիշեցնելով պատմաբանների հանձնաժողով հիմնելու վերաբերյալ Թուրքիայի առաջարկը չընդունվելու մասին: «Չնայած այս ամենին, եթե հայկական կողմը ԼՂ հակամարտությունը լուծելու համար միջազգային հանրության սպասելիքները և միջազգային իրավունքի շրջանակներում հստակ և անկեղծ քայլեր սկսի անել, ապա Թուրքիայից դրական պատասխան կստանա»,- ասվում է Փայլանի հարցին Չավուշօղլուի գրավոր պատասխանի վերջում:

10:21 - 29 նոյեմբերի, 2019

Ստամբուլ-Երևան չվերթների դադարեցման պատճառով հայ ուղևորները մնացել են Ստամբուլում |tert.am|

tert.am: Թուրքական Atlas Global ավիաընկերությունը, որը Ստամբուլ-Երևան-Ստամբուլ չվերթը սպասարկող միակ ավիաընկերությունն է, նոյեմբերի 26-ին հայտարարել է բոլոր ուղղություններով թռիչքները մինչև դեկտեմբերի 21-ը դադարեցնելու մասին: Այս մասին տեղեկացնում է «Միլլիյեթ» լրատվականը: Թռիչքների դադարեցման պատճառ են հանդիսացել Թուրքիայում տնտեսական վայրիվերումների պատճառով ընկերության մոտ առաջացած ֆինանսական խնդիրները: Չնայած տարածած հայտարարությանը՝ ընկերությունը ժամանակին տեղյակ չի պահել ավիատոմսեր վաճառող ընկերություններին չվերթների դադարեցման մասին, ինչի պատճառով շատ ուղևորներ, այդ թվում նաև ՀՀ քաղաքացիներ, մնացել են Ստամբուլի օդանավակայանում և չեն կարողացել գալ Հայաստան: Ընկերությունը հայտարարել է, որ նախօրոք գնված տոմսերի վերադարձի կամ ամսաթվերի փոփոխության պահանջով դիմած անձանց համար ընկերության կայքում դեկտեմբերի 16-ին կտեղադրվի ուղեցույց, իսկ մինչ այդ՝ տոմսեր ամրագրելու բոլոր տարբերակներն այլևս փակ կլինեն:

07:46 - 28 նոյեմբերի, 2019

Թուրքիան արգելափակել է ՆԱՏՕ-ի ծրագրերից մեկը՝ սպառնալով չընդունել այն, քանի դեռ կառույցն իր պահանջը չի կատարել |armtimes.com|

armtimes.com։ Թուրքիան հրաժարվել է աջակցել ՆԱՏՕ-ի ծրագրին, որը նպատակ ունի պաշտպանել Բալթյան երկրները եւ Լեհաստանը Ռուսաստանի հնարավոր հարձակումից: ՆԱՏՕ-ի այս ծրագիրը կյանքի կոչելու համար պետք է կառույցի անդամ 29 երկրների համաձայնությունը: «Reuters» գործակալությունը, հղում անելով իր դիվանագիտական աղբյուրներին գրում է, որ Թուրքիան հրաժարվել է աջակցել այդ ծրագրին: Ծրագիրն իր երկրի կողմից ընդունելու համար Թուրքիայի ղեկավարությունը պահանջում է, որ ՆԱՏՕ-ն ավելի լայն քաղաքական աջակցություն ցուցաբերի Սիրիայի հյուսիսում ընդդեմ քրդական ուժերի ծավալած իր ռազմական գործողությանը: ՆԱՏՕ-ում Թուրքիայի ներկայացուցչին պետական մակարդակով կարգադրվել է չստորագրել փաստաթուղթը այնքան ժամանակ, մինչեւ ՆԱՏՕ-ն Սիրիայի քրդական «Ժողովուրդների ինքնապաշտպանության ջոկատներին» կճանաչի որպես ահաբեկչական կազմակերպություն: Նշվում է, որ Թուրքիան այս քայլով կարող է տապալել Լեհաստանում ՆԱՏՕ-ի դիրքերն ամրապնդելու գործընթացը: «Reuters»-ի փոխանցմամբ, Թուրքիան այսպիսով գրեթե «պատանդ է վերցնում» արևելյան Եվրոպայի երկրների բնակիչներին: Մեկ այլ աղբյուր էլ հայտնում է, որ Թուրքիայի այս քաղաքականությունը կարող է կործանարար հետեւանքներ ունենալ Հյուսիսատլանտյան դաշինքի համար: Չնայած այս ամենին, ՆԱՏՕ-ի անդամ հանդիսացող Գերմանիայի կանցլեր Անգելա Մերկելը հանդես է եկել Թուրքիայի պաշտպանությամբ՝ նշելով, որ կառույցն ունի Թուրքիայի պես գործընկերոջ կարիք: Բունդեսթագում այսօրվա ելույթի ժամանակ Գերմանիայի կանցլերը կարծիք է հայտնել, որ Եվրոպական միությունն ի վիճակի չէ ապահովել սեփական անվտանգությունն առանց ՆԱՏՕ-ի, ու նաեւ Գերմանիայի շահերից է բխում դաշինքի պահպանումը: Մերկելի խոսքերով, պաշտոնական Բեռլինը պետք է ջանք ու եռանդ չխնայի՝ կառույցի միասնականության համար. «Այո, Թուրքիան բարդ գործընկեր է, բայց նրան պետք է պահել ՆԱՏՕ-ում արդեն միայն համառազմավարական պատճառներով»,-ասել է կանցլերը: Թուրքիայի կողմից Բալթյան երկրները եւ Լեհաստանը Ռուսաստանի հնարավոր հարձակումից պաշտպանելու մասին ծրագիրը արգելափակելուն արձագանքել են նաեւ Ռուսաստանից: «Ռուսաստանը կանչում է» ֆորումի ժամանակ այսօր ՌԴ նախագահ Վլադիմիր Պուտինը, արձագանքելով ՆԱՏՕ-ի ծրագրին, ասել է, որ բոլորն էլ հրաշալի գիտակցում են՝ Ռուսաստանը ոչ ոքի վրա հարձակվել չի պատրաստվում, փոխանցում է TACC-ը: Նա հիշեցրել է, որ նախկինում ԱՄՆ-ը հայտարարել է, թե պաշտպանում է Եվրոպական երկրներին Խորհրդային Միության երկրների հարձակումներից եւ այդպիսով ստիպել վճարել իրեն: «Այսօր այդ նույն ծրագրերն այդքան էլ չեն աշխատում: Չնայած, որ այս պահին կան խնդիրներ Ուկրաինայի հետ, խառը իրավիճակ է Ղրիմի եւ Դոնբասի շուրջ, սակայն բոլորն էլ լավ գիտեն՝ Ռուսաստանի Դաշնությունը ոչ մեկի վրա հարձակվել չի պատրաստվում: Դա ուղղակի հիմարություն է, զառանցանք: Ռուսաստանից սպառնալիք տեսնելը այն մարդկանց հորինվածքն է, որոնք ուզում են բոնուսներ շահել եւ Եվրոպայի առաջատար երկրները սա հրաշալի գիտակցում են», -ասել է Պուտինը: Նա հավելել է, որ ԱՄՆ-ը ստիպված կլինի քայլեր ձեռնարկել ՆԱՏՕ-ի իր դաշնակիների հետ հարաբերությունները փոխելու համար, քանի որ պնդելը, թե «Մենք ձեզ պաշտպանում ենք՝ վճարեք», շատ քիչ է:

04:51 - 28 նոյեմբերի, 2019

Թուրքիայի անվտանգության խորհրդի նիստում քննարկվել է Հայոց ցեղասպանության հարցը |ermenihaber.am|

ermenihaber.am: Նոյեմբերի 26-ին նախագահ Ռեջեփ Թայիփ Էրդողանի գլխավորությամբ տեղի է ունեցել Թուրքիայի Ազգային անվտանգության խորհրդի նիստ: Չորս ժամ տևած նիստի ավարտին արդյունքներն ամփոփող հայտարարություն է արվել, որից պարզ է դարձել, որ նիստին քննարկվել է նաև տարբեր երկրների օրենսդրական մարմինների կողմից Հայոց ցեղասպանության ճանաչումների թեման: Հայտարարության՝ ցեղասպանության թեմայի վերաբերյալ հատվածում մասնավորապես ասվում է. «Խստորեն դատապարտվել է 1915-ի իրադարձությունների վերաբերյալ ընդունված այն որոշումները, որոնց համար հիմք են հանդիսացել պատմական ու իրավական հիմքից զուրկ, անհիմն պնդումները: Միջազգային հանրության ուշադրությունը հրավիրվել է այն բանի վրա, որ իրականությունը բացահայտելու ժամանակն է»: Նշենք, որ նիստի ընթացքում քննարկվել են նաև Սիրիայի հյուսիսում Թուրքիայի կողմից իրականացվող «խաղաղության ակունք» գործողության, անվտանգության գոտու հիմնման հետ կապված հարցեր: Նշվել է, որ «ահաբեկիչներին ոչնչացնելու ու տեղահանված սիրիացիների վերադարձի համար հարմար պայմաններստեղծելու նպատակով սկսված» գործողությունը շարունակվելու է այնքան ժամանակ, մինչև կհասնի իր նպատակին:

11:25 - 27 նոյեմբերի, 2019

Թուրք ժողովուրդն Իրանին բարեկամ երկիր է համարում․ Թուրքիայում Իրանի դեսպան |ermenihaber.am|

ermenihaber.am: Թուրքիայում Իրանի դեսպան Մոհամմադ Ֆարազմանդը հարցազրույց է տվել թուրքական հեռուստաալիքներից մեկին, որի ընթացքում ի թիվս այլ հարցերի՝ անդրադարձել է նաև Իրան-Թուրքիա փոխհարաբերություններին։ Դեսպանը մասնավորապես նշել է, որ Իրանի և Թուրքիայի հարաբերություններն ավելի քան 500 տարի է կայուն ու ամուր են, և ներկայումս էլ Թուրքիայի քաղաքական ուժերը Իրանի հարցում կոնսենսուս ունեն։ Ըստ Ֆարազմանդի՝ թուրք ժողովուրդն Իրանն ընկալում է որպես բարեկամ երկիր, Թուրքիայում ավելի մեծ է հետաքրքրությունը պարսկերենի նկատմամբ քան նույնիսկ Իրանում, ոչ ոք Իրանը չի դիտարկում որպես սպառնալիք, ուստի այս երկու երկրները կարող են լավ գործնկերներ լինել։ Խոսելով տնտեսական փոխհարաբերություններից՝ Մոհամմադ Ֆարազմանդն ասել է, որ 2018 թվականին Իրանի և Թուրքիայի միջև առևտրաշրջանառությունը կազմել է 9.3 միլիարդ դոլար, սակայն իրենք նպատակ ունեն այդ թիվը հասցնել 30 միլիարդի։ Իրանի դեսպանը շեշտել է նաև, որ երկու երկրների միջև առևտուր չի իրականացվում ամերիկյան դոլարով, այլ՝ եվրոյով կամ թուրքական լիրայով։ Ներկայումս առևտրի 35%-ն իրականացվում է տեղական արժույթներով և մտադրություն կա ավելացնելու թուրքական լիրայով և իրանական թումանով իրականացվող առևտրի մասնաբաժինը։

10:05 - 27 նոյեմբերի, 2019