ՀՖՖ

Հայաստանի ֆուտբոլի ֆեդերացիան (ՀՖՖ) հայկական ֆուտբոլը կառավարող մարմինն է։ Հիմնադրվել է 1992-ի հունվարի 18-ին։ ՖԻՖԱ-ի անդամ է 1992թ․-ից, ՈՒԵՖԱ-ի լիիրավ անդամ՝ 1993թ․-ից։

ՀՖՖ բարձրագույն մարմինը համագումարն է, որը 4 տարով ընտրում է նախագահ եւ գործադիր կոմիտեի անդամներ։ Աշխատանքային մարմինը գործկոմն է։ 2018թ․ սեպտեմբերի 22-ից ֆեդերացիայի նախագահ է ընտրվել ԱԱԾ տնօրեն, գնդապետ Արթուր Վանեցյանը։ 2019թ. դեկտեմբերի 23-ին ՀՖՖ նախագահ  է ընտրվել Արմեն Մելիքբեկյանը։

Ալեքսանդր Պետրակովը Ուելսի հետ խաղի արդյունքը կապում է վարպետության պակասի հետ
 |armenpress.am|

Ալեքսանդր Պետրակովը Ուելսի հետ խաղի արդյունքը կապում է վարպետության պակասի հետ |armenpress.am|

armenpress.am: Հայաստանի ֆուտբոլի ազգային թիմի գլխավոր մարզիչ Ալեքսանդր Պետրակովը Ուելսի հետ խաղի արդյունքը կապում է վարպետության պակասի հետ: «Այո, գրանցած արդյունքը կապված է վարպետության պակասի հետ: Ուելսն ուներ մեկ հնարավորություն և իրացրեց այն: Ես ֆուտբոլիստներից ոչ պահանջ չունեմ: Մեծ ձգտում ունեինք, սակայն ինքնագոլ ստացվեց: Բայց մոռանում ենք ու շարժվում առաջ»,-«Արմենպրես»-ի հաղորդմամբ` լրագրողների հետ զրույցում ասաց Պետրակովը: Վերջինիս խոսքով` Հայաստանի հավաքականը Ուելսի դեմ խաղում կոմպակտ ֆուտբոլ է ցուցադրել, ինչը նորմալ է մի թիմի դեմ, որի ֆուտբոլիստները հանդես են գալիս անգլիական Պրեմիեր լիգայում և այլ բարձրակարգ առաջնություններում: «Կարող էինք հաղթել այս խաղում: Չեմ ընդունում մեր բախտը չի բերել արտահայտությունը: Այդ բառը իմ բառապաշարում չկա»,-ասաց նա: Պետրակովն ընդգծեց, որ Ուելսի դեմ հանդիպումն Վարազդատ Հարոյանի այս ընտրական փուլի լավագույն խաղն էր: Ֆուտբոլի Եվրոպայի առաջնության ընտրական փուլի նախավերջին տուրում Հայաստանի ընտրանին Երևանում ընդունեց Ուելսի հավաքականին: Հանդիպումն ավարտվեց ոչ-ոքի 1:1 հաշվով:
21:56 - 18 նոյեմբերի, 2023
Հայաստանի ֆուտբոլի ազգային թիմը ոչ-ոքիով ավարտեց Ուելսի դեմ երևանյան հանդիպումը |armenpress.am|

Հայաստանի ֆուտբոլի ազգային թիմը ոչ-ոքիով ավարտեց Ուելսի դեմ երևանյան հանդիպումը |armenpress.am|

armenpress.am: Ֆուտբոլի Եվրոպայի առաջնությանընտրական փուլի նախավերջին տուրում Հայաստանի հավաքականը Երևանում ընդունեց Ուելսի ընտրանուն: Վազգեն Սարգսյանի անվան Հանրապետական մարզադաշտում կայացած խաղի մեկնարկից ընդամենը 5 րոպե անց Հայաստանի ֆուտբոլի ազգային թիմը բացեց հանդիպման հաշիվը: Դիպուկ հարվածով աչքի ընկավ Լուկաս Սելարյանը: Բաց թողած գնդակից հետո Ուելսի հավաքականը տիրել էր նախաձեռնությանը, բայց անթերի էին գործում Հայաստանի ընտրանու պաշտպանները: Առաջին կեսի ավելացված րոպեին, սակայն, Ուելսը վերականգնեց հաշվի հավասարությունը: Ինքնագոլի հեղինակ դարձավ Նաիր Տիկնիզյանը: Առաջին կես` 1:1: Երկրորդ կեսում թիմերը փոխանակվում էին գրոհներով` չգտնելով միմյանց խոցելի օղակները: Խաղակեսի վերջնամասում Հայաստանի ազգային թիմը տիրում էր նախաձեռնությանը և շարունակաբար գրոհում էր: Պետրակովի սաներին այդպես էլ  չհաջողվեց բեկել հանդիպման ընթացքը: Հայաստան-Ուելս` 1:1: Հայաստանի ֆուտբոլի ազգային թիմը ընտրական փուլի վերջին հանդիպումը կանցկացնի նոյեմբերի 21-ին` հյուրընկալվելով Խորվաթիայի ընտրանուն: Այդ խաղը կմեկնարկի Երևանի ժամանակով 23:45-ին:  
19:59 - 18 նոյեմբերի, 2023
Հայաստանի ֆուտբոլի ֆեդերացիայի նախագահի ընտրությունը կկայանա դեկտեմբերի 23-ին

Հայաստանի ֆուտբոլի ֆեդերացիայի նախագահի ընտրությունը կկայանա դեկտեմբերի 23-ին

Նոյեմբերի 7-ին ՀՖՖ Տեխնիկական կենտրոն/Ֆուտբոլի ակադեմիայում կայացել է ՀՖՖ Գործադիր կոմիտեի հերթական նիստը: Ինչպես տեղեկացնում է ՀՖՖ մամուլի ծառայությունը՝ օրակարգի միակ հարցը ՀՖՖ 24-րդ հերթական ժողովի անցկացման վայրի, օրվա և ժամի հաստատումն է եղել: Որոշվել է ՀՖՖ հերթական ժողովն անցկացնել դեկտեմբերի 23-ին՝ ժամը 13:00-ին, ՀՖՖ գրասենյակում: «ՀՖՖ Նախագահի պաշտոնավարման ժամկետի լրացմամբ պայմանավորված՝ նախատեսվող ՀՖՖ 24-րդ հերթական ժողովն ընտրական է։ Համաձայն ՀՖՖ Կանոնադրության 30-րդ կետի 3-րդ ենթակետի՝ ՀՖՖ ժողովի յուրաքանչյուր Անդամ կարող է առաջարկել մեկ թեկնածու ՀՖՖ Նախագահի տեղի համար։ ՀՖՖ Նախագահի պաշտոնում առաջադրվելու համար թեկնածուները պետք է համապատասխանեն ՀՖՖ Կանոնադրության 30-րդ կետի 4-րդ ենթակետով սահմանված հետևյալ պահանջներին․ ա) մինչև թեկնածու առաջադրվելը վերջին հինգ տարիներից երկուսի ընթացքում ակտիվ դերակատարում ունենալ ՀՀ-ում ֆուտբոլի բնագավառում (Պաշտոնատար անձ (դիմելու պահին պաշտոնը չզբաղեցնող), նախկին ֆուտբոլիստ (դիմելու պահին կարիերան ավարտած), կամ սպորտում այլ կերպ ներգրավված անձ (մարզական լրագրող, մեկնաբան, իրավաբան և այլն), բ) լինել Հայաստանի Հանրապետության քաղաքացի և բնակվել պետության տարածքում, գ) լինել առնվազն 25 տարեկան և ունենալ ՀՀ-ում ընտրական իրավունք, դ) տվյալ պաշտոնի հետ անհամատեղելի որևէ հանցագործության համար նախկինում դատապարտված չլինել, ե) չգտնվել սնանկության գործընթացում: ՀՖՖ Նախագահի թեկնածու առաջադրելու համար Անդամները պետք է ՀՖՖ ներկայացնեն հետևյալ տեղեկությունները/փաստաթղթերը. 1.Կենսագրություն՝ ֆուտբոլի բնագավառում գործունեության մանրամասն նկարագրությամբ (մասնավորապես՝ վերջին հինգ տարիներից երկուսի ընթացքում), 2.Անձնագրի և/կամ նույնականացման քարտի պատճեն (նույնականացման քարտի կամ կենսաչափական անձնագրի տրամադրման դեպքում նաև տեղեկություններ բնակության հասցեի վերաբերյալ), 3.ՀՖՖ Անդամի համապատասխան իրավասու մարմնի կողմից հավաստագիր, որ ՀՖՖ Նախագահի պաշտոնում առաջադրված թեկնածուն համապատասխանում է Կանոնադրության 30-րդ կետի 4-րդ ենթակետով նախատեսված պահանջներին` համաձայն սույն Ծանուցմանը կից ներկայացված ձևի (Հավելված 3), 4.ՀՀ ԲԴԽ աշխատակազմ՝ դատական դեպարտամենտի կողմից տրամադրված դատվածության տեղեկանք, 5.ՀՀ ԲԴԽ աշխատակազմ՝ դատական դեպարտամենտի կողմից տրամադրված սնանկության գործընթացում չգտնվելու վերաբերյալ տեղեկանք»,- ասված է հայտարարության մեջ։ Նշվում է, որ ՀՖՖ Կանոնադրության 86-րդ կետի 4-րդ ենթակետի համաձայն՝ ՀՖՖ Նախագահի 2023թ. ընտրություններին 4 տարվա պաշտոնավարման ժամկետը կկրճատվի մինչև 3 տարի, որպեսզի մինչև 2026 թ․-ը Գործադիր կոմիտեի անդամների պաշտոնավարման ժամկետները հավասարեցվեն: Իսկ թեկնածուների՝ ՀՖՖ Ընտրական կոմիտեի կողմից հաստատված վերջնական և պաշտոնական ցուցակը տրամադրվում է ՀՖՖ Անդամներին ՀՖՖ Նախագահի ընտրության համար հրավիրվող ժողովից առնվազն 10 օր առաջ։
22:09 - 07 նոյեմբերի, 2023
ՀՖՖ-ն հայտարարություն է տարածել Հայաստան-Ուելս հանդիպման տոմսերի վերաբերյալ

ՀՖՖ-ն հայտարարություն է տարածել Հայաստան-Ուելս հանդիպման տոմսերի վերաբերյալ

ՀՖՖ-ն, ի պատասխան նոյեմբերի 18-ին Երևանում կայանալիք Հայաստան-Ուելս հանդիպման տոմսերի գների վերաբերյալ ԶԼՄ ներկայացուցիչների կողմից ստացված հարցումների, տեղեկացնում է.«Սեպտեմբերի 11-ին կայացած Հայաստան-Խորվաթիա հանդիպումից 2 ամիս առաջ ՀՖՖ-ն սկսեց այդ հանդիպման տոմսերի առցանց վաճառքը, որն ուղեկցվեց անակնկալ դրսևորումներով: Նախ՝ տոմսերը վաճառվեցին ընդամենը մի քանի ժամվա ընթացքում, իսկ հետո դրանց մի մասը հայտնվեց սև շուկայում և վերավաճառվեց շատ ավելի թանկ: Տեխնիկական խնդիրներ առաջացան նաև բուն վաճառքի հետ կապված. մեծ թվով իրական երկրպագուներ մնացին առանց տոմսի: Այս ամենը ստիպեց ՀՖՖ-ին վերանայել մոտեցումը և ձեռնարկել ստեղծված վիճակից դուրս գալու քայլեր:Ուելսի հետ առաջիկա խաղի համար սահմանվել են տոմսերի նոր գներ, որոնք պիտակվել են որպես «թանկացած» տոմսեր, թեև իրականում դրանք թանկացել են մասամբ: Նախևառաջ՝ պահպանվել է տոմսերի գնի նվազագույն շեմը՝ 1000 դրամ, ընդ որում՝ նույնիսկ այս տարվա ընթացքում եղել են հանդիպումներ, երբ տոմսերի նվազագույն շեմը կրկնակի գերազանցել է Ուելսի հետ խաղի տոմսերի նվազագույն շեմը (մասնավորապես, Թուրքիայի հետ խաղի ժամանակ ամենաէժան տոմսերի գինը եղել է 2000 դրամ, իսկ 2021 թ. նոյեմբերին կայացած Հայաստան-Գերմանիա հանդիպման ամենաէժան տոմսերի գինը՝ 3000 դրամ), սակայն որևէ մեկն այն ժամանակ չի խոսել տոմսերի թանկացման մասին:Միաժամանակ ՀՖՖ-ն տարբեր զեղչեր է սահմանել երկրպագուների տարբեր խմբերի համար, որոնք կարող են տոմսերը գնել իջեցված գներով: Կան նաև մշտապես իրականացվող այլ ծրագրեր, որոնք միտված են կարգավորելու սոցիալապես անապահով խավերի մուտքը մարզադաշտ: Նշենք, որ ՀՖՖ-ն յուրաքանչյուր խաղի համար հարյուրավոր տոմսեր է հատկացնում շահառուների տարբեր խմբերի, իսկ ֆան ակումբներին տոմսերը վաճառվում են կրկնակի էժան, եթե խոսքը չի գնում ամենաէժան տոմսերի մասին:Հաշվի առնելով, որ Հայաստան-Ուելս հանդիպման տոմսերի մեծ մասն արդեն սպառվել է, իսկ վաճառքն ընթացել է բնականոն հունով, կարելի է վստահաբար պնդել, որ գնային նոր քաղաքականությունն արդարացված է և, ամենայն հավանականությամբ, կիրառելի է լինելու նաև ազգային հավաքականի հաջորդ հանդիպումների համար: Այդուհանդերձ, ՀՖՖ-ն պատրաստվում է հաջորդ տարի կայանալիք հանդիպումների տոմսերի գների հարցը քննարկել ՀՖՖ շահառուների կոմիտեի անդամների հետ, որոնք էլ առաջարկ կներկայացնեն տոմսերի գնային քաղաքականության վերաբերյալ:Ընդգծենք, որ սոցցանցերում շրջանառվող տեղեկությունները 20-հազարանոց տոմսերի վերաբերյալ ճշգրիտ չեն, քանի որ տոմսերի այդ գինը սահմանվել է Ուելսի հավաքականի երկրպագուների, ինչպես նաև ՀՖՖ գործընկեր/հովանավորների  համար:Կարելի է փաստել, որ մեծ հաշվով Հայաստան-Ուելս հանդիպման տոմսերի գների որոշակի թանկացման վերաբերյալ դժգոհողներն առաջին հերթին վերավաճառողներն են: ՀՖՖ-ն սև շուկայում հայտնված տոմսերի հետ կապված գործողություն իրականացնելու որևէ լիազորություն չունի, բայց կարծում ենք, որ գնային նոր քաղաքականությամբ հնարավոր եղավ առնվազն նպաստել այս արատավոր երևույթի նվազեցմանը, ինչի մասին վկայում է սև շուկայում վաճառվող տոմսերի վերաբերյալ հայտարարությունների քանակի կտրուկ նվազեցումը:Իհարկե, դժգոհողների թվում են նաև իրական ֆուտբոլասերներ: Վստահեցնում ենք, որ տոմսային այս քաղաքականությունից չի տուժելու ոչ մի իրական ֆուտբոլասեր՝ հաշվի առնելով, որ ամենից արագ սպառվել են ամենաթանկ տոմսերը, իսկ 1000-դրամանոց տոմսերը, հոկտեմբերի 19-ի դրությամբ, դեռևս առկա էին վաճառքում: Ինչ վերաբերում է Հայաստան-Ուելս հանդիպման տոմսերի վաճառքից ստացված գումարներին, ապա տեղեկացնում ենք, որ ավելի բարձր գներով վաճառված բոլոր տոմսերի հասույթն ուղղվելու է Արցախից տեղահանված և ֆուտբոլով զբաղվող երեխաների կարիքներին, ինչպես նաև ՀՖՖ-ի կողմից իրականացվող, փախստականների և տեղահանված երեխաների համար նախատեսված Play for integrity ծրագրի իրականացմանը»,- ասված է հաղորդագրության մեջ:
14:56 - 20 հոկտեմբերի, 2023
Հայաստանի հավաքականը որակյալ ֆուտբոլ է ցուցադրում․ Խորվաթիայի հավաքականի մարզիչ |tert.am|

Հայաստանի հավաքականը որակյալ ֆուտբոլ է ցուցադրում․ Խորվաթիայի հավաքականի մարզիչ |tert.am|

tert.am: Խորվաթիայի հավաքականի գլխավոր մարզիչ Զլատկո Դալիչը խոսել է Եվրո-2024-ի ընտրական փուլի 5-րդ տուրում Լատվիայի ընտրանու նկատմամբ հաղթանակի (5-0) և Հայաստանի հավաքականի հետ առաջիկա խաղի մասին։ «Մենք ասացինք, որ առաջին րոպեներից պետք է լուրջ լինենք, և այդպես էլ կա, և բարեբախտաբար վաղ գոլը հեշտացրեց մեր գործը։ Մենք որոշ խաղացողների հանգիստ էինք տվել: Կովաչիչն ու Մայերը մկանային խնդիրներ են զգացել, բայց կարծում եմ, որ դա մեծ խնդիր չէ և նրանք պատրաստ կլինեն Հայաստանի հավաքականի դեմ խաղին։ Մենք չէինք ուզում ռիսկի դիմել: Այժմ մեզ սպասվում է արտագնա խաղ, թերևս՝ ամենադժվարը: Երկուշաբթի օրը նույնպես պետք է լուրջ լինենք։ Հայաստանի հավաքականը որակյալ ֆուտբոլ է ցուցադրում։ Նրանք հաղթել էին նաև Ուելսին: Մեզ համար նրանց ոչ-ոքին լավ արդյունք է, բայց և արդյունք, որը ապացուցում է, որ պետք չէ թերագնահատել Հայաստանի հավաքականը և այնտեղ պետք է շատ զգույշ խաղալ»,- մեջբերում է Դալիչին Խորվաթիայի հավաքականի մամուլի ծառայությունը։ Հաջորդ՝ 6-րդ տուրում, Հայաստանի հավաքականը սեպտեմբերի 11-ին Երևանում կընդունի Խորվաթիայի ընտրանուն։ Երկու թիմերն էլ իրենց ակտիվում ունեն 7-ական միավոր։
12:16 - 09 սեպտեմբերի, 2023
Թուրքիա-Հայաստան հանդիպումը ոչ-ոքի է ավարտվել․ Պետրակովը գոհ է ֆուտբոլիստների նվիրվածությունից |panarmenian.net|

Թուրքիա-Հայաստան հանդիպումը ոչ-ոքի է ավարտվել․ Պետրակովը գոհ է ֆուտբոլիստների նվիրվածությունից |panarmenian.net|

panarmenian.net: Սեպտեմբերի 8-ին թուրքական Էսքիշեհիր քաղաքում Եվրո-2024-ի ընտրական փուլի շրջանակում Հայաստանի և Թուրքիայի հավաքականների ֆուտբոլային հանդիպումն ավարտվել է ոչ-ոքի՝ 1։1 հաշվով։ Առաջին խաղակեսում թիմերից ոչ մեկին չի հաջողվել բացել հաշիվը։ Հայաստանի հավաքականից դեպի դարպաս հարվածներով աչքի ընկան Բիչախչյանն ու Սպերցյանը։ Թուրքերը ևս մի քանի անգամ փորձեցին առաջ անցնել հաշվի մեջ, այստեղ էլ աչքի ընկավ դարպասապահ Չանչարևիչը։ Վերջինիս ուղղությամբ խաղի ընթացքում տրիբունայից շիշ նետեցին, ինչը առաջացրեց դարպասապահի բողոքը, որի հետևանքով նա մրցավարից նկատողություն ստացավ։ Երկրպագուների բողոքի առիթն այն էր, թե Չանչարևիչը երկար էր պահում գնդակը մինչ փոխանցում կատարելը։ Երկրորդ խաղակեսի մեկնարկին գոլի հեղինակ է դարձել Արտակ Դաշյանը, ինչից հետո սկսվեց Թուրքիայի հավաքականի հակահարձակումների շղթան։ Հայաստանի հավաքականը մի քանի անգամ խույս տվեց գոլից, լավ պաշտպանություն կազմակերպեց, սակայն 88-րդ րոպեին թուրքերին հաջողվեց հավասարեցնել հաշիվը։ Հայաստանի ազգային հավաքականի գլխավոր մարզիչ Ալեքսանդր Պետրակովը հետխաղային ասուլիսում ասել է, որ ֆուտբոլիստներից որևէ մեկն ուրախ չէր, բավարարված չէր հաշվով։ «Կարծում եմ՝ ոչ-ոքին այն արդյունքն էր, որը պետք է լիներ։ Գոհ եմ տղաների նվիրվածությունից։ Խաղից հետո, երբ մտա հանդերձարան, նրանք տխուր էին, գոհ չէին խաղից, բայց կարծում եմ, որ ճիշտ ուղու վրա ենք, ֆուտբոլիստները վստահում են մարզչական շտաբին ու կատարում են մեր ասածները»,- նշել է նա, հայտնում է Aysor.am-ը: Թուրք երկրպագուները սուլում և աղմկում էին Հայաստանի օրհներգի ժամանակ, նրանք նաև ամբողջ հանդիպման ընթացքում շշեր էին նետում հայ ֆուտբոլիստների ուղղությամբ։ Հայաստանի հետ ֆուտբոլային խաղից առաջ թուրք երկրպագուներին 32,000 դրոշ էր բաժանվել՝ մարզադաշտի նստատեղերի քանակով։ Նախաձեռնությունը իրականացվել էր Թուրքիայի ֆուտբոլի ֆեդերացիայի կողմից։ Հավաքականների առաջին հանդիպումը Երևանում ավարտվել էր Թուրքիայի ընտրանու հաղթանակով 1-2 հաշվով։ 4 խաղից հետո Հայաստանի հավաքականը 7 միավորով խմբի 2-3-րդ տեղերն է կիսում Խորվաթիայի ընտրանու հետ, որը նույնքան միավոր ունի 3 հանդիպումից հետո: Խմբի առաջատարը Թուրքիայի հավաքականն է՝ 10 միավորով։
10:56 - 09 սեպտեմբերի, 2023
Հայաստանի հետ խաղից առաջ թուրք երկրպագուներին բաժանվելու է 32․000 հատ Թուրքիայի դրոշ |factor.am|

Հայաստանի հետ խաղից առաջ թուրք երկրպագուներին բաժանվելու է 32․000 հատ Թուրքիայի դրոշ |factor.am|

factor.am: Այսօր՝ ժամը 22։45-ին, թուրքական Էսքիշեհիր քաղաքի մարզադաշտում Հայաստանի Ազգային հավաքականը Եվրո-2024-ի  ընտրական փուլի շրջանակներում հանդիպելու է Թուրքիայի ընտրանուն։ Տեղական լրատվամիջոցները հայտնում են, որ մարզադաշտում ավելի քան 32,000 դրոշ է բաժանվելու երկրպագուներին՝ նստատեղերի քանակով։ Նախաձեռնությունը իրականացվում է Թուրքիայի ֆուտբոլի ֆեդերացիայի կողմից։ «Մեր երկրպագուները, որոնք 32 հազար թուրքական դրոշներով կլցնեն տրիբունաները, կրկին կաջակցեն «Մեր երեխաներին»(նկատի ունեն ֆուտբոլի հավաքականին), որոնք հպարտությամբ կրում են կիսալուսինն ու աստղանշանը կրծքին»,- ասվում է հայտարարության մեջ։ Նշվում է, որ ներկայացվելու է Թուրքիայի Հանրապետության հիմնադրման 100-ամյակին նվիրված շոու։ Հիշեցնենք, որ ավելի վաղ մամուլում տեղեկություններ էին տարածվել, որ Թուրքիայի ֆուտբոլի ֆեդերացիան արգելել է Ադրբեջանի դրոշներով մուտքը մարզադաշտ, ոստիկանությունը խստորեն հսկելու է՝ դրանց մուտքը թույլ չտալու համար։
15:39 - 08 սեպտեմբերի, 2023
Պատրաստ ենք Թուրքիայի հետ հանդիպմանը. Ալեքսանդր Պետրակով

Պատրաստ ենք Թուրքիայի հետ հանդիպմանը. Ալեքսանդր Պետրակով

«Բոլորս էլ գիտենք, թե որքան կարևոր խաղ է սա մեզ համար: Այս պահին մենք մրցաշարային աղյուսակի 2-րդ հորիզոնականում ենք: Այս խաղը կարևոր է նաև մրցաշարային աղյուսակի տեսանկյունից»,- ՈՒԵՖԱ Եվրոպայի 2024 թվականի առաջնության որակավորման խմբային փուլի Թուրքիա-Հայաստան հանդիպմանն ընդառաջ՝ սեպտեմբերի 7-ին «Յենի Էսքիշեհիր» մարզադաշտի մամուլի ասուլիսների սրահում կայացած նախախաղային մամուլի ասուլիսում ասել է Հայաստանի ազգային հավաքականի կիսապաշտպան Էդուարդ Սպերցյանը։ Հարցին՝ վաղը մարզադաշտը լեփ-լեցուն է լինելու, և բոլորը երկրպագելու են մրցակցին, հայ երկրպագուներ ներկա չեն լինելու խաղին, դա որևէ ճնշում կամ ազդեցություն կունենա՞ ձեր խաղի վրա, նա պատասխանել է.  «Ընդհանրապես ֆուտբոլիստները միշտ էլ սիրում են խաղալ լեփ-լեցուն տրիբունաների ներքո: Հուսով ենք, որ այն փաստը, որ վաղը մարզադաշտը լի է լինելու երկրպագուներով, մեզ վրա մեծ ազդեցություն չի թողնի: Մենք ունենք մեր խաղի պլանը և կփորձենք խաղալ հենց մեր ֆուտբոլը: Հայաստանի ազգային հավաքականի գլխավոր մարզիչ Ալեքսանդր Պետրակովն ասել է. «Կարծում եմ, որ շատ կարևոր խաղ է վաղը մեզ սպասվում: Եթե Թուրքիայի հավաքականը կարողանա հաղթել, ապա 90 տոկոսով կկարողանա լուծել Եվրո-2024-ի եզրափակիչ դուրս գալու հարցը: Իսկ այդ պարագայում մենք կբարդացնենք մեր խնդիրը»։  Նա նշել է, որ բոլոր խաղացողներն առողջ են և պատրաստ են վաղվա հանդիպմանը: Եվրո-2024-ի ընտրական փուլի 5-րդ տուրում Հայաստանի հավաքականը կհյուրընկալվի Թուրքիային։ Հանդիպումը կկայանա սեպտեմբերի 8-ին և կմեկնարկի Երևանի ժամանակով 22։45-ին։ Սեպտեմբերի 11-ին արդեն Երևանում մեր ընտրանին կխաղա Խորվաթիայի դեմ:
09:52 - 08 սեպտեմբերի, 2023
Հայաստանի ազգային հավաքականը սկսել է մարզական հավաքը Թուրքիայի և Խորվաթիայի հետ խաղերին ընդառաջ

Հայաստանի ազգային հավաքականը սկսել է մարզական հավաքը Թուրքիայի և Խորվաթիայի հետ խաղերին ընդառաջ

Հայաստանի ազգային հավաքականը սկսել է մարզական հավաքը ՀՖՖ Տեխնիկական կենտրոն/Ֆուտբոլի ակադեմիայում:  Այս մասին հաղորդագրություն է տարածել Հայաստանի ֆուտբոլի ֆեդերացիան։  Սեպտեմբերի 3-ին հավաքին միացել էին հետևյալ ֆուտբոլիստները՝ Օգնյեն Չանչարևիչ - «Ալաշկերտ»  Արսեն Բեգլարյան - «Արարատ-Արմենիա»  Վարազդատ Հարոյան - «Աստանա»Կամո Հովհաննիսյան - «Աստանա»Ժիրայր Մարգարյան - «Ուրարտու» Էրիկ Փիլոյան - «Ուրարտու» Սերգեյ Մուրադյան - «Նոա» Տարոն Ոսկանյան - «Ալաշկերտ»Վբեյմար Անգուլո - «Ալաշկերտ» Արտակ Դաշյան - «Փյունիկ» Հովհաննես Հարությունյան - «Փյունիկ» Արթուր Սերոբյան - «Կասա-Պիա»Ավելի ուշ թիմին միացել են Գեորգի Հարությունյանը (Կրասնոդար), Էդուարդ Սպերցյանը (Կրասնոդար), Ուգոչուկվու Իվուն (Ռուբին) և Ստանիսլավ Բուչնևը (Փյունիկ)։ Սեպտեմբերի 4-ին թիմին կմիանան Հրանտ-Լեոն Ռանոսը (Բորուսիա), Նաիր Թիկնիզյանը (Լոկոմոտիվ), Լուկաս Սելարայանը (Ալ-Ֆաթեհ) և Նորբերտո Բրիասկո Բալեկյանը (Բոկա Խունիորս): Սեպտեմբերի 5-ին հավաքականի շարքերը կհամալրեն Անդրե Չալըշըրը (Բրոմապոյկարնա), Ստյոպա Մկրտչյանը (Օսիեկ), Տիգրան Բարսեղյանը (Սլովան), Վահան Բիչախչյանը (Պոգոն) և Սարգիս Ադամյանը (Քյոլն): Ֆուտբոլի Եվրոպայի առաջնության որակավորման փուլի շրջանակներում Հայաստանի ազգային հավաքականը սեպտեմբերի 8-ին մրցակցի հարկի տակ կխաղա Թուրքիայի հավաքականի դեմ, իսկ սեպտեմբերի 11-ին սեփական հարկի տակ կընդունի Խորվաթիայի հավաքականին։ 
11:26 - 04 սեպտեմբերի, 2023