Էկոնոմիկայի նախարարություն

Հայկական կողմը հետաքրքրված է հակակարկտային պաշտպանության միջոցների կիրառման ՌԴ փորձի ուսումնասիրմամբ. Խոջոյան

Էկոնոմիկայի փոխնախարար Արման Խոջոյանը Ռուսաստանի Դաշնությունում աշխատանքային այցի շրջանակում հանդիպում է ունեցել ՌԴ գյուղատնտեսության փոխնախարար Սերգեյ Լևինի հետ։ Հանդիպմանը մասնակցել են ՌԴ գյուղատնտեսության նախարարության մի շարք ստորաբաժանումների ղեկավարներ, ինչպես նաև Անասնաբուժական և բուսասանիտարական վերահսկողության դաշնային ծառայության (Ռոսսելխոզնադզոր) բուսասանիտարական և սերմնաբուծական վերահսկողության վարչության պետ Նատալյա Սոլովյովան։ Ինչպես հայտնում են ՀՀ էկոնոմիկայի նախարարությունից, հանդիպման օրակարգում ընդգրկված էր գյուղատնտեության բնագավառում երկկողմ համագործակցության հեռանկարային թեմաների լայն շրջանակ, այդ թվում՝ Հայաստանի և Ռուսաստանի միջև առևտրատնտեսական հարաբերությունների զարգացմանը, ագրոարդյունաբերական արտադրանքի ծավալների ավելացմանը, սերմնաբուծության, ջերմոցաշինության, խաղողագործության ու գինեգործության և այլ ոլորտներին վերաբերող մի շարք հարցեր։ Ողջունելով ՀՀ էկոնոմիկայի փոխնախարարի այցը ՌԴ՝ Սերգեյ Լևինը կարևորել է Արման Խոջոյանի հետ հանդիպումը և նշել, որ նման հանդիպումների հաճախակի կազմակերպումը լրացուցիչ խթան կհանդիսանա գյուղատնտեսության ոլորտում հայ-ռուսական համագործակցության ընդլայնման և փոխգործակցության ինտենսիվ զարգացման համար։ Շնորհակալություն հայտնելով ջերմ ընդունելության համար՝ Արման Խոջոյանը համառոտ ներկայացրել է Հայաստանի գյուղատնտեսության ոլորտի ռազմավարական ուղղություններն ու առաջնահերթությունները, ինչպես նաև պետության կողմից տնտեսվարողներին տրամադրվող աջակցության մեխանիզմները։ Հանդիպման ընթացքում կողմերն անդրադարձել են Հայաստանի և Ռուսաստանի միջև ագրոարդյունաբերական արտադրանքի շրջանառությանը, որը 2019 թ․ կազմել է 692,4 մլն ԱՄՆ դոլար, իսկ 2020 թ․ աճել է 7,7 տոկոսով՝ կազմելով 745,8 մլն ԱՄՆ դոլար: Երկուստեք ընդգծվել է ագրոարդյունաբերական արտադրանքի շրջանառության ավելացման անհրաժեշտությունը։ Այս առումով հայտնաբերված խնդիրներից մեկը լոգիստիկ ենթակառուցվածքների սահմանափակ լինելը կամ բացակայությունն է, որի լուծումը հնարավորություն կընձեռի ավելի արդյունավետ տեսակավորել, սորտավորել և կազմակերպել կայուն ու կանխատեսելի մատակարարում։ Անդրադառնալով Հայաստանում սերմնաբուծության ոլորտի զարգացման միտումներին՝ Արման Խոջոյանը, մասնավորապես, նշել է, որ ներկայումս ՀՀ կառավարության թիրախային ուղղություններից է հատկապես հացահատիկային և հատիկաընդեղեն մշակաբույսերի արտադրության զարգացումը։ Էկոնոմիկայի փոխնախարարը կարևորել է նաև կարտոֆիլի սերմնաբուծությունը և ընդգծել, որ Հայաստանում կենսատեխնոլոգիական մեթոդներով կարտոֆիլի սերմնաբուծության և հավաստագրված տնկանյութի արտադրության զարգացումը հնարավորություն կտա ոչ միայն բավարարել հանրապետության ներքին պահանջարկը, այլև իրականացնել արտահանումներ դեպի Ռուսաստան և ԵԱՏՄ անդամ այլ պետություններ։ Զրուցակիցները քննարկել են հակակարկտային համակարգերի գործարկմանն ու արդյունավետ օգտագործմանն առնչվող հարցեր։ ՀՀ էկոնոմիկայի փոխնախարարն ընդգծել է, որ հայկական կողմը հետաքրքրված է հակակարկտային պաշտպանության միջոցների կիրառման Ռուսաստանի, ինչպես նաև այս բնագավառում վրացական և մոլդովական առաջադեմ փորձի ուսումնասիրմամբ և նախատեսվում է կազմակերպել միջգերատեսչական հանձնաժողովի այց ՌԴ՝ այս ոլորտում առկա փորձին տեղում ծանոթանալու նպատակով։ Քննարկված թեմաների թվում էր նաև երկկողմ համագործակցությունը խաղողագործության և գինեգործության ոլորտներում, որոնցում Հայաստանն ունի բավական մեծ փորձ։ Արման Խոջոյանն ընդգծել է, որ Հայաստանի ազգային ագրարային համալսարանում ներդրված ուսումնական համակարգը հնարավորություն է տալիս, որ արտերկրի ուսանողները նույնպես Հայաստանում կարողանան վերապատրաստվել։ Երկու երկրների գինեգործական արտադրանքի իրացման խթանման ու առաջմղման և առևտրատնտեսական համագործակցությունն ամրապնդելու համար ռուսական կողմին առաջարկվել է կազմակերպել գինեգործական արտադրանքի համատեղ շնորհանդեսներ, գինու համտեսներ, բլոգերների և լրատվամիջոցների ներկայացուցիչների համար շրջայցեր դեպի Հայաստանի և Ռուսաստանի գինու գործարաններ, դասընթացներ, վարպետության դասեր և այլ միջոցառումներ։ Քննարկվել են նաև գիտական ոլորտում փոխգործակցության խորացման հնարավորությունները։ Առանձին անդրադարձ է կատարվել այն ծրագրերին, որոնք արդեն իսկ իրականացվում են հայ և ռուս գործարար շրջանակների միջև։ Ռուսական կողմը պատրաստակամություն է հայտնել նպաստել համատեղ նախաձեռնությունների և պայմանավորվածությունների կյանքի կոչմանը։ Արծարծվել է երկուստեք հետաքրքրություն ներկայացնող հողերի արդյունավետ օգտագործման հարցը։ Ռուսաստանն այսօր բավական խիստ է մոտենում հողերի ոչ արդյունավետ օգտագործմանը և առաջիկայում նախատեսում է ավելի խստացնել իր մոտեցումները՝ նպաստելով հողերի օգտագործման արդյունավետության բարձրացմանը։ Քանի որ հողերի արդյունավետ օգտագործումը նաև ՀՀ կառավարության առաջնային խնդիրների շարքում է, պայմանավորվածություն է ձեռք բերվել այս հարցով ուսումնասիրել ռուսական փորձը և Հայաստանում հողային բարեփոխումներ իրականացնելիս ակտիվորեն համագործակցել ռուս գործընկերների հետ։ Հանդիպման ընթացքում զրուցակիցները դիտարկել են նաև գիտահետազոտական ինստիտուտների կարողությունների զարգացումն ու այս ուղղությամբ փոխգործակցության լայն հնարավորությունները։

17:17 - 13 մարտի, 2021

Պետք չէ խուճապահար լինել ինչ–որ մեկ ամսվա կտրուկ գնաճից․ էկոնոմիկայի նախարար |tert.am|

tert.am: Էկոնոմիկայի նախարար Վահան Քերոբյանը այսօր լրագրողների հետ զրույցում խոսել է գնաճի մասին՝ նշելով, թե կարիք չկա խուճապահար լինել։ «Պետք չէ խուճապահար լինել ինչ–որ մեկ ամսվա կտրուկ գնաճից, եթե նայենք, թե ինչ տենդենցներ են տեղի ունենում աշխարհում, ապա, իհարկե, շատ վատ է, որ գները աճում են, բայց նաև պետք է հասկանալ, թե որոնք են է դրա ֆունդամենտալ հիմքերը»,- ասել է նա։ Նախարարը նշել է, որ բազմաթիվ գործոններ են ազդում գների վրա, դա ոչ միայն Հայաստանի ներքին իրավիճակով է պայմանավորված, այլ նաև միջազգային շուկայով։ Նախարարն ասաց, որ ծովային բեռնափոխադրումների գները, ամբողջ աշխարհում սննդամթերքի գները կտրուկ ավելացել են, դրա համար դրա ազդեցությունը հայաստանյան շուկայի վրա էական է։ «Կենտրոնական բանկը և Կառավարությունը աշխատում են այն ուղղությամբ, որ հնարավորինս չհանդուրժեն կամ զսպեն գնաճը և այդ առումով Կենտրոնական բանկը գործիքակազմ ունի, որը կիրառում է»,– ասել է նա: Էկոնոմիկայի նախարարը նշեց, թե կարծում է, որ հաջորդ ամիսներին դրական դինամիկա կտեսնենք, և գնաճը կվերադառնա թիրախային միջակայքի։

14:38 - 12 մարտի, 2021

Նոր աշխատատեղեր, բիզնեսի ստեղծում. մեկնարկեց ՀՀ երեք մարզի զարգացմանն ուղղված ծրագիրը |armenpress.am|

armenpress.am: Հայաստանում Եվրոպական միության պատվիրակության ղեկավար, դեսպան Անդեա Վիկտորինը, ՀՀ էկոնոմիկայի նախարար Վահան Քերոբյանը և ՀՀ տարածքային կառավարման և ենթակառուցվածքների փոխնախարար Վաչե Տերտերյանը ազդարարեցին ԵՄ կողմից ֆինանսավորվող «Տեղական դերակատարների զորեղացում հանուն զարգացման» (LEAD) ծրագրի պաշտոնական մեկնարկը: Ծրագիրն իրականացնող գործընկերներն են ՄԱԿ-ի զարգացման ծրագիրը, ՄԱԿ-ի պարենի և գյուղատնտեսության կազմակերպությունը, Ավստրիական զարգացման գործակալությունը (ԱԶԳ) և Միգրացիոն քաղաքականության մշակման միջազգային կենտրոնը: Ծրագրի գործընկերները ներկայացրին LEAD ծրագրի հիմնական նպատակները, այն է՝ տեղական ակտիվ դերակատարների համատեղ ջանքերով համայնքների սոցիալ-տնտեսական զարգացմանն ուղղված նախաձեռնությունների իրականացմամբ նպաստել Հայաստանի երեք հյուսիսային մարզերի զարգացմանը և կյանքի որակի բարելավմանը: Ծրագրի արդյունքները բխում են «ԵՄ-ՀՀ համապարփակ և ընդլայնված գործընկերության համաձայնագրի» (CEPA) առաջնահերթություններից: «ՀՀ-ԵՄ համապարփակ և ընդլայնված գործընկերության համաձայնագրում հատուկ շեշտադրում է արված նաև տարածքային համաչափ զարգացման և համագործակցության վրա: Համաձայնագիրն ուժի մեջ է մտել Հայաստանի համար դժվար ժամանակներում, սակայն ԵՄ-ն պատրաստակամ է շարունակելու իր օժանդակությունը Հայաստանին՝ հաղթահարելու առկա մարտահրավերները և դրական փոփոխություն բերելու մարդկանց կյանքում: Ծրագիրը հնարավորություն է տալիս ժողովրդավարության և իրավունքների գերակայություն ունենալ, ամրապնդել մարդու իրավունքների պաշտպանությունը, ստեղծել նորանոր աշխատատեղեր, ստեղծել բիզնես և այլն»,- ասաց Վիկտորինը: 14.6 մլն եվրո բյուջե ունեցող 4-ամյա LEAD ծրագիրը բաղկացած է երեք ենթածրագրից: Ավստրիայի զարգացման համագործակցության կողմից համաֆինանսավորվող և ԱԶԳ-ի կողմից իրականացվող «Տեղական դերակատարների զորեղացում հանուն Շիրակի մարզի զարգացման» ծրագիրը, ինչպես նաև ՄԱԶԾ և ՊԳԿ-ի կողմից իրականացվող «Տեղական դերակատարների զորեղացում հանուն Լոռու և Տավուշի մարզերի զարգացման» ծրագիրը կենտրոնանալու են ՀՀ-ում: «Այս ծրագիրը շատ կարևոր է: Մեր ռազմավարությունն ու քաղաքականությունն է՝ օգնել մարդկանց, որպեսզի գյուղական բնակավայրերում բարելավվի կյանքը, որպեսզի ավելի շատ լինեն աշխատանքի և զբաղվածության հնարավորությունները: Այսպիսով, մարզերում ապրող մեր հայրենակիցները կկարողանան ոչ միայն գյուղատնտեսությամբ զբաղվել, այլև բիզնեսով: Ես անձամբ, հանձն եմ առնում ամեն ինչ անել այս ծրագրի հաջողության համար»,- ասաց Վահան Քերոբյանը: Վաչե Տերտերյանն ընդգծեց, թե խորհրդանշական է այն հանգամանքը, որ Եվրոպական միության կողմից ֆինանսավորվող և ՀՀ կառավարության հետ համատեղ իրականացվող ծրագրի մեկնարկը տրվում է համաձայնագրի պաշտոնապես ուժի մեջ մտնելուն զուգահեռ: «Համոզված եմ, որ սա շատ լավ նախադրյալ է, և մեր համատեղ ջանքերը՝ ուղղված այս ծրագրի իրագործմանը, որակապես նոր մակարդակ կտեղափոխեն ՀՀ-ում եվրոպական արժեքների տեղայնացումը: Հուսով եմ, որ ՀՀ երեք հյուսիսային մարզերում այս ծրագրի հաջող իրագործումը նաև ամուր նախադրյալ կստեղծի մնացած մարզերում ևս LEAD-ի փիլիսոփայության տեղայնացման և, ինչու չէ, այն մեր համատեղ ջանքերով իրականացնելու համար»,- նշեց Տերտերյանը: Երրորդ ենթածրագիրը՝ ՄՔՄՄԿ-ի կողմից իրականացվող «ԵՄ-ը հանուն միգրանտների ներուժի օգտագործման՝ ի նպաստ Հայաստանի զարգացման ծրագիրն ուղղված է միգրանտների և նրանց ընտանիքերի անդամների ներուժի մոբիլիզացմանը: Ծրագիրը նպատակ ունի խրախուսել արտերկրից դրամական փոխանցումների թիրախային օգտագործումը և վերադարձող միգրանտների կամ միգրանտների ընտանիքների անդամների ֆինանսավորման միջոցով նոր աշխատատեղերի ստեղծումն ու բիզնեսի զարգացումը: Ծրագրի իրականացման արդյունքում կստեղծվի առնվազն 250 նոր աշխատատեղ, աջակցություն կստանա ավելի քան 225 համայնքային զարգացման նախաձեռնություն, 160 գյուղական բիզնես և միգրանտների կողմից իրականացվող 150 բիզնես-նախաձեռնություն, առնվազն 500 շահառու կստանա ուսուցում՝ սեփական գործ սկսելու և բիզնեսի կառավարման վերբերյալ: Ընդհանուր թվով ավելի քան 9 000 շահառու կներգրավվի ծրագրի շրջանակում իրականացվելիք միջոցառումներում:

14:09 - 12 մարտի, 2021

Վահան Քերոբյանը Նորամուծության և ձեռներեցության ազգային կենտրոնի աշխատակիցներին ներկայացրել է նորանշանակ տնօրենին

ՀՀ էկոնոմիկայի նախարար Վահան Քերոբյանը և Սփյուռքի գործերի գլխավոր հանձնակատար Զարեհ Սինանյանը մարտի 11-ին այցելել են Նորամուծության և ձեռներեցության ազգային կենտրոն (ՆՁԱԿ)՝ աշխատակիցներին ներկայացնելու նորանշանակ տնօրեն Հայկ Մարգարյանին։ Ողջունելով կենտրոնի աշխատակիցներին և հյուրերին, Վահան Քերոբյանը նշել է, որ կարևորում է այս կառույցի առաքելությունը, այն է՝ գիտության առևտրայնացումը և տեխնոլոգիական տրանսֆերը։ Նա հավելել է, որ նախարարությունը փորձելու է նոր եռանդ և էներգիա հաղորդել կառույցին, քանի որ Հայաստանի ապագան տեսնում է տեխնոլոգիական զարգացման և գիտատար, գիտահեն տնտեսության կառուցման մեջ։ Հայկ Մարգարյանն ընտանիքի հետ Հայաստան է տեղափոխվել 2020 թվականի սեպտեմբերին՝ Սփյուռքի գործերի գլխավոր հանձնակատարի գրասենյակի «իԳործ» ծրագրով, որի շրջանակում 6 ամիս աշխատել է էկոնոմիկայի նախարարությունում։ Նկատելով Հայկի կարողությունները, Վահան Քերոբյանը նրան առաջարկել է Նորամուծության և ձեռներեցության ազգային կենտրոնի տնօրենի պաշտոնը։ «Այսօրվա հանդիպումը շատ հուզիչ է ինձ համար, որովհետև ես միշտ ընդգծել եմ, որ մեր արտերկրյա հայրենակիցները օդ ու ջրի պես անհրաժեշտ են Հայաստանին, որպեսզի թե՛ մարդկային կապիտալի, թե՛ գիտելիքի, թե՛ փորձի, թե՛ տեսահորիզոնի առումով հարստացնեն այն, ինչը մենք այսօր ունենք։ Այս առումով «իԳործ» ծրագիրը, որը ձեռնարկել է Սփյուռքի գլխավոր հանձնակատարի գրասենյակը, շատ կարևոր է, և այն մարդիկ, ովքեր եկել են Հայաստան, պետք է ստանան մեր աջակցությունը, որպեսզի կարողանան ինտեգրվել մեր հասարակության մեջ և իրենց մեծ օգուտը բերել մեր ազգին»,- ասել է Վահան Քերոբյանը: Էկոնոմիկայի նախարարը նաև շնորհակալություն է հայտնել ՆՁԱԿ-ի նախկին տնօրեն Սերգեյ Մադաթյանին կատարված աշխատանքի համար: Ի պատասխան, Սերգեյ Մադաթյանը պատրաստակամություն է հայտնել ամենայնս աջակցել նորանշանակ տնօրենին` փոխանցելով իր փորձը։ Սփյուռքի գլխավոր հանձնակատար Զարեհ Սինանյանը գոհունակությամբ տեղեկացրել է, որ «իԳործ» ծրագրով Հայաստան եկած մեր հայրենակիցներն արդեն մշտական աշխատանքի առաջարկ են ստացել՝ որպես դրա ամենալավ օրինակներից մեկը նշելով Հայկ Մարգարյանին։ Հաջողություն մաղթելով կենտրոնի աշխատակիցներին և նորանշանակ տնօրենին` Զարեհ Սինանյանն ասել է, որ Սփյուռքի գլխավոր հանձնակատարի գրասենյակը միշտ պատրաստ է աջակցել։ Հայկ Մարգարյանը շնորհակալություն է հայտնել վստահության համար և նշել, որ նպատակներին հասնելու համար շատ աշխատանք կա իրագործելու և գործընկերների հետ միասին պատրաստ է ծառայել Հայաստանին։ Սփյուռքի գործերի գլխավոր հանձնակատարի գրասենյակի «իԳործ» ծրագրով Էկոնոմիկայի նախարարությունում ներկայումս աշխատում է 8 սփյուռքահայ մասնագետ:

12:53 - 12 մարտի, 2021

Արցախի էկոնոմիկայի նախարարն ընդունել է ՀՀ էկոնոմիկայի նախարարության պատվիրակությանը

Արցախի Հանրապետության էկոնոմիկայի և գյուղատնտեսության նախարար Արմեն Թովմասյանը մարտի 10-ին ընդունել է ՀՀ էկոնոմիկայի նախարարի տեղակալ Ավագ Ավանեսյանի գլխավորած պատվիրակությանը: Քննարկվել են ԱՀ-ում իրականացվող և նոր ենթակառուցվածքային ծրագրերին առնչվող խնդիրները, ինչպես նաև ռազմական գործողությունների ընթացքում կորուստներ և վնասներ կրած ԱՀ հանրային կազմակերպություններին և ՓՄՁ-ին աջակցություն ցուցաբերելու հնարավորությունները: Խոսվել է Արցախի գյուղատնտեսության ոլորտին տրամադրվող աջակցության հնարավորությունների և ձևերի մասին: Հանդիպման վերջում կողմերը քննարկել են նաև ԱՀ հանրային հատվածի մասնագետների կարողությունների զարգացմանն ուղղված և համատեղ ուսուցման ու վերապատրաստման միջոցառումներին (ինչպես առցանց, այնպես էլ առերես տարբերակով) մասնակցելու հնարավորությունը: Քննարկումներին մասնակցել են ԱՀ տարածքային կառավարման և ենթակառուցվածքների նախարար Հայկ Խանումյանը, ինչպես նաև ԱՀ ԷԳՆ առաջին տեղակալ Ն.Մուսայելյանը, նախարարի տեղակալներ Վ.Ավետիսյանն ու Տ.Առստամյանը, ԱՀ ԷԳՆ աշխատակազմի տնտեսական զարգացման վարչության պետ Բ.Պետրոսյանը:

20:20 - 10 մարտի, 2021

ՀՀ էկոնոմիկայի նախարարի տեղակալը Մոսկվայում մի շարք հանդիպումներ է ունեցել ՌԴ և ԵՏՀ պաշտոնյաների հետ

ՀՀ էկոնոմիկայի նախարարի տեղակալ Արման Խոջոյանը մարտի 9-ից 12-ը գտնվում է Մոսկվայում՝ Եվրասիական տնտեսական միության արդյունաբերական և ագրոարդյունաբերական համալիրների զարգացման ծրագիրը, ինչպես նաև Ռուսաստանի Դաշնության հետ երկկողմ առևտրատնտեսական կապերի ընդլայնման հնարավորությունները և ուղղությունները քննարկելու նպատակով։ Մոսկվայում է նաև Enterprise Armenia հիմնադրամի պատվիրակությունը՝ գլխավոր տնօրեն Լևոն Օհանեսյանի գլխավորությամբ։ Այս մասին հայտնում են ՀՀ էկոնոմիկայի նախարարության Տեղեկատվության և հասարակայնության հետ կապերի վարչությունից, այցի շրջանակում Արման Խոջոյանը մի շարք հանդիպումներ կունենա Ռուսաստանի Դաշնության և Եվրասիական տնտեսական հանձնաժողովի (ԵՏՀ) բարձրաստիճան պաշտոնյաների, ՌԴ-ում ՀՀ դեսպան Վարդան Տողանյանի, Մոսկվայի գործարար համայնքի ներկայացուցիչների հետ: Մարտի 9-ին Արման Խոջոյանն առանձին հանդիպումներ է ունեցել ԵՏՀ ներքին շուկաների, տեղեկատվայնացման, տեղեկատվական-հաղորդակցական տեխնոլոգիաների հարցերով Կոլեգիայի անդամ (նախարար) Գեղամ Վարդանյանի, ԵՏՀ ագրոարդյունաբերական քաղաքականության վարչության տնօրեն Արմեն Հարությունյանի հետ։ Քննարկման կարևոր դրույթներից էր պարենային անվտանգության միասնական մոտեցումը ԵԱՏՄ անդամ երկրների միջև։ ՀՀ էկոնոմիկայի փոխնախարարը հանդիպել է ՌԴ Մոսկվայի մարզի ներդրումների, արդյունաբերության և գիտության նախարար Ելիզավետա Զինովևայի հետ։ Նույն օրը կայացել է Հայաստանի պատվիրակության հանդիպումը Մոսկվայի մարզի Ներդրումների, արդյունաբերության և գիտության նախարարի տեղակալ Անտոն Լոգինովի և Արտաքին տնտեսական գործունեության աջակցության հիմնադրամի գործադիր տնօրեն Ալեքսեյ Պլետնևի հետ: Հանդիպման ընթացքում ռուսական կողմին ներկայացվել են Enterprise Armenia հիմնադրամի գործունեությունն ու ծրագրերը, օտարերկրյա ուղղակի ներդրումների ներգարվման հիմնական գործիքակազմը, ներդրողներին մեկ պատուհանի սկզբունքով ծառայությունների մատուցման գործընթացը, ինչպես նաև հայկական արտադրանքի արտահանման խթանմանը միտված աշխատանքները: ՌԴ Մոսկվայի մարզի արտաքին տնտեսական գործունեության աջակցության հիմնադրամի գործընկերների հետ քննարկվել են համատեղ նախաձեռնությունների իրականացման հնարավորությունները` Հայաստանի Հանրապետության և Ռուսաստանի Դաշնության միջև առևտրատնտեսական կապերի զարգացման նպատակով: Քննարկման առանցքում է եղել նաև օտարերկրյա ուղղակի ներդրումների խթանման և արտահանման աջակցման գործիքակազմը, անդրադարձ է կատարվել համատեղ նախագծերի իրականացման հնարավորություններին: Ձեռք են բերվել պայմանավորվածություններ երկկողմ գործընկերային կապերը զարգացնելու և հետագա համագործակցության շրջանակն ընդլայնելու վերաբերյալ:

18:24 - 10 մարտի, 2021

Կայացել է արդյունաբերական կանեփի մշակության օրենսդրական կարգավորման համար ստեղծված աշխատանքային խմբի հանդիպումը

ՀՀ էկոնոմիկայի նախարարությունում մարտի 9-ին տեղի է ունեցել Հայաստանի Հանրապետությունում հեմփի մշակության իրականացման նպատակով անհրաժեշտ իրավական ակտերը մշակելու համար ստեղծված աշխատանքային խմբի առաջին հանդիպումը, որը վարել է նախարարի տեղակալ Տիգրան Գաբրիելյանը։ Այս մասին հայտնեցին ՀՀ էկոնոմիկայի նախարարության տեղեկատվության և հասարակայնության հետ կապերի վարչությունից: Աշխատանքային խմբում ընդգրկված են՝ ՀՀ փոխվարչապետ Տիգրան Ավինյանի գրասենյակի, ՀՀ էկոնոմիկայի, Առողջապահության, Տարածքային կառավարման և ենթակառուցվածքների նախարարությունների, Ազգային անվտանգության ծառայության, Ոստիկանության, Սննդամթերքի անվտանգության տեսչական մարմնի, Պետական եկամուտների կոմիտեի, Հայաստանի ազգային ագրարային համալսարանի ներկայացուցիչները։ Գործընթացն իրականացվելու է 2021 թ․ փետրվարի 4-ին ՀՀ կառավարության կողմից հաստատված Տնտեսական արձագանքման ծրագրի և գործողությունների պլանով նախատեսված գյուղատնտեսության ոլորտում բարձր ավելացված արժեք ստեղծող նոր մշակաբույսերի աճեցման ու վերամշակման շրջանակում, ինչն էականորեն կբարձրացնի գյուղատնտեսական նշանակության հողերի արդյունավետ օգտագործումը։ Ողջունելով հանդիպման մասնակիցներին՝ Տիգրան Գաբրիելյանը տեղեկացրել է, որ հեմփի մշակությունը որպես նոր, բարձրարժեք, արդյունաբերական բազմակի նպատականերով օգտագործվող արտադրանքների համար հումք հանդիսացող մշակաբույս, նախարարությունում դիտարկվել է դեռևս 2017 թվականից։ Ներկայացնելով գործընթացի իրականացման հիմնական փուլերն ու նախատեսվող գործողությունները՝ Էկոնոմիկայի նախարարության գյուղատնտեսության առաջնային արտադրանքի վարչության պետի տեղակալ Վարսիկ Մարտիրոսյանը նշել է, որ ներկայումս աշխարհի գրեթե 47 երկրներում թույլատրված է հեմփի մշակությունը, որպես գյուղատնտեսական մշակաբույս, և Էկոնոմիկայի նախարարությունը հանգամանորեն ուսումնասիրել է հեմփի աճեցման միջազգային փորձը և տարբեր երկրներում ոլորտը կարգավորող իրավական ակտերն ու առկա վերահսկողական մեխանիզմները։ Նրա խոսքով՝ Հայաստանում հեմփիի մշակությունը լինելու է խիստ վերահսկվող և լիցենզավորված գործունեություն։ Ծրագրի իրականացման առաջին տարում նախատեսվում է իրականացնել հեմփի գիտաարտադրական մշակություն, որի արդյունքում կընտրվեն Հայաստանի բնակլիմայական պայմանների համար առավել նպատակահարմար և տետրահիդրոկանաբինոլի սահմանված պարունակությամբ սորտեր և լիցենզավորված գործունեության շրջանակներում որոշ ընկերություններ կկարողանան կազմակերպել հեմփի մշակություն։ Ընդ որում, նախապատվությունը կտրվի այն ընկերություններին, որոնք մշակությունից բացի, կիրականացնեն նաև վերամշակում։ Հանդիպման ընթացքում աշխատանքային խումբը քննարկել է հեմփի մշակության արդյունավետության ապահովմանը, լաբորատոր փորձաքննությունների իրականացմանը, պետական մարմինների համագործակցությամբ վերահսկողության հատուկ մեխանիզմների կիրառմանը, արտադրվող հեմփի վերամշակմանը վերաբերող մի շարք հարցեր։

15:57 - 10 մարտի, 2021

Ակնհայտ է, որ գիտական միտքն օգնում է բիզնեսին, և հենց այս ուղղությամբ էլ մենք պետք է առաջ շարժվենք. Վահան Քերոբյան

ՀՀ էկոնոմիկայի նախարար Վահան Քերոբյանը մասնակցել է «Համագործակցային դոկտորական կրթություն․ լավագույն փորձի բացահայտում և ապագայի պլանավորում» խորագրով եռօրյա աշխատաժողովի եզրափակիչ քննարկումներին։ Այս մասին տեղեկացնում է Էկոնոմիկայի նախարարությունը: Ողջունելով աշխատաժողովի մասնակիցներին՝ Վահան Քերոբյանն իր ելույթում համոզմունք է հայտնել, որ գիտությունը Հայաստանի համար որևէ այլընտրանք չունի, քան զարգացումը՝ հենվելով տեխնոլոգիական առաջընթացի վրա: «Ակնհայտ է, որ միայն այդ դեպքում մենք կարող ենք բարձրարժեք արդյունք ստեղծել Հայաստանում և, որպես փոքր երկիր, ուժեղ տնտեսություն ունենալ, ինչպես, օրինակ, Իսրայելը, Շվեյցարիան և այլն: Իմ պաշտոնավարման երեք ամսվա ընթացքում, Կրթության, գիտության, մշակույթի և սպորտի նախարարության հետ համագործակցելով, մենք վերանայեցինք ասպիրանտական տեղերի պետպատվերի հատկացման մոտեցումը. առաջարկեցինք բիզնեսին ներկայացնել ծրագրեր, որոնք պետք է հետազոտվեն, և արդեն իսկ ընտրություն ենք կատարել: Կարծում ենք՝ մեզ սպասվում է շարունակական սերտ համագործակցություն: Ակնհայտ է, որ գիտական միտքն օգնում է բիզնեսին, և հենց այս ուղղությամբ էլ մենք պետք է առաջ շարժվենք», - ասել է Էկոնոմիկայի նախարարը: Առանձին աշխատանքային քննարկման ընթացքում ARMDOCT ծրագրի ներկայացուցիչները նախարարին և նախարարության աշխատակիցներին ներկայացրել են գիտություն-տնտեսություն կապի խթանման գործիքների վերաբերյալ հետազոտության արդյունքները, նշել խնդիրները և բարելավման հնարավորությունները։ Պայմանավորվածություն է ձեռքբերվել Էկոնոմիկայի նախարարին կից ստեղծել գիտական խորհուրդ, որը, այլ գերատեսչությունների հետ սերտ համագործակցությամբ, կմշակի գիտություն-տնտեսություն կապի ապահովման ճանապարհային քարտեզ։ Բուհերի ներկայացուցիչները հրատապ լուծման ենթակա խնդիրների շարքում ներկայացրել են գիտական հետազոտությունների համար ձեռքբերվող սարքավորումների և նյութերի հարկման խնդիրները՝ կարևորելով հարկային խթանների տրամադրումը (այդ թվում՝ ավելացված արժեքի հարկից ազատումը), ինչն էապես կխթանի ոլորտում ներդրումները և գործընթացի արդյունավետության բարձրացումը։ Առաջարկվել է նաև որոշակի գիտական բնագավառում գիտական կադրեր պատրաստելու համար շահագրգռված և համատեղ հետազոտոթյուններ իրականացնող կազմակերպություններին պետության կողմից ֆինանսապես խրախուսման մեխանիզմներ գործարկել, այդ թվում նաև հարկային արտոնություններ։ Կարևորելով առաջարկները՝ Վահան Քերոբյանը նշել է, որ խնդիրն առավել մանրամասն կուսումնասիրվի և համապատասխան նախագիծ կշրջանառվի առաջիկայում։ Նախարարը պատրաստակամություն է հայտնել ներգրավելու ռեսուրսներ և տրամադրելու ֆինանսական աջակցություն ակադեմիական «սփին-օֆ»-ներին։ Իրազեկության բարձրացման և տեղեկատվության տարածման, գիտնականների և գործարար ոլորտի համագործակցությունը խթանելու նպատակով, նախարարության ներկայացուցիչները պատրաստակամություն են հայտնել առաջիկայում ARMDOCT ծրագրի աշխատանքային խմբի հետ համատեղ կազմակերպել համաժողով։ Մասնագիտական կրթության որակի ապահովման ազգային կենտրոնի տնօրեն Ռուբեն Թոփչյանը բուհերի հավատարմագրման ընթացքում բացահայտված հիմնական խնդիրներից նշել է կիրառելի գիտելիքի պակասը։ Նա համոզմունք է հայտնել, որ այս ծրագիրը բավականին լուծումներ կտա՝ դոկտորական դպրոցներ ստեղծելով, ինչպես նաև բուհ-արդյունաբերություն կապի ապահովման միջոցով։ Նա կարևորել է նաև դոկտորական կրթության և մագիստրոսական կրթության հետ կապի ապահովումը: Աշխատաժողովի ընթացքում բուհերի և սոցիալական այլ գործընկերների կողմից ներկայացվել են համագործակցային դոկտորական ծրագրերի, բուհ-արդյունաբերություն համատեղ իրականացվող հետազոտական ծրագրերի օրինակներ։ Աշխատաժողովն ամփոփվել է համագործակցային դոկտորական կրթական ծրագրերի կազմակերպման վերաբերյալ քննարկումներով։ Ողջունելով աշխատաժողովի մասնակիցներին՝ Վահան Քերոբյանն իր ելույթում համոզմունք է հայտնել, որ գիտությունը Հայաստանի համար որևէ այլընտրանք չունի, քան զարգացումը՝ հենվելով տեխնոլոգիական առաջընթացի վրա:

12:39 - 09 մարտի, 2021

Վահան Քերոբյանը մասնակցել է եռօրյա աշխատաժողովի եզրափակիչ քննարկումներին

Վահան Քերոբյանը մասնակցել է «Համագործակցային դոկտորական կրթություն․ լավագույն փորձի բացահայտում և ապագայի պլանավորում» խորագրով եռօրյա աշխատաժողովի եզրափակիչ քննարկումներին։ Ողջունելով աշխատաժողովի մասնակիցներին՝ Էկոնոմիկայի նախարարն իր ելույթում համոզմունք է հայտնել, որ գիտությունը Հայաստանի համար որևէ այլընտրանք չունի, քան զարգացումը՝ հենվելով տեխնոլոգիական առաջընթացի վրա:«Ակնհայտ է, որ միայն այդ դեպքում մենք կարող ենք բարձրարժեք արդյունք ստեղծել Հայաստանում և, որպես փոքր երկիր, ուժեղ տնտեսություն ունենալ, ինչպես, օրինակ, Իսրայելը, Շվեյցարիան և այն: Իմ պաշտոնավարման երեք ամսվա ընթացքում Կրթության, գիտության, մշակույթի և սպորտի նախարարության հետ համագործակցելով, մենք վերանայեցինք ասպիրանտական տեղերի պետպատվերի հատկացման մոտեցումը. առաջարկեցինք բիզնեսին ներկայացնել ծրագրեր, որոնք պետք է հետազոտվեն, և արդեն իսկ ընտրություն ենք կատարել: Կարծում ենք՝ մեզ սպասվում է շարունակական սերտ համագործակցություն: Ակնհայտ է, որ գիտական միտքն օգնում է բիզնեսին, և հենց այս ուղղությամբ էլ մենք պետք է առաջ շարժվենք»,- ասել է Վահան Քերոբյանը: Առանձին աշխատանքային քննարկման ընթացքում ARMDOCT ծրագրի ներկայացուցիչները նախարարին են ներկայացրել գիտություն-տնտեսություն կապի խթանման գործիքների վերաբերյալ հետազոտության արդյունքները, նշել խնդիրները և բարելավման հնարավորությունները։ Պայմանավորվածություն է ձեռքբերվել Էկոնոմիկայի նախարարին կից ստեղծել գիտական խորհուրդ, որը, այլ գերատեսչությունների հետ սերտ համագործակցությամբ, կմշակի գիտություն-տնտեսություն կապի ապահովման ճանապարհային քարտեզ։ Բուհերի ներկայացուցիչները հրատապ լուծման ենթակա խնդիրների շարքում ներկայացրել են գիտական հետազոտությունների համար ձեռքբերվող սարքավորումների և նյութերի հարկման խնդիրները՝ կարևորելով հարկային խթանների տրամադրումը (այդ թվում՝ ավելացված արժեքի հարկից ազատումը), ինչն էապես կխթանի ոլորտում ներդրումները և գործընթացի արդյունավետության բարձրացումը։Առաջարկվել է նաև որոշակի գիտական բնագավառում գիտական կադրեր պատրաստելու համար շահագրգռված և համատեղ հետազոտոթյուններ իրականացնող կազմակերպություններին պետության կողմից ֆինանսապես խրախուսման մեխանիզմներ գործարկել, այդ թվում նաև հարկային արտոնություններ։ Կարևորելով առաջարկները՝ Վահան Քերոբյանը նշել է, որ խնդիրն առավել մանրամասն կուսումնասիրվի և համապատասխան նախագիծ կշրջանառվի առաջիկայում։ Նախարարը պատրաստակամություն է հայտնել ներգրավելու ռեսուրսներ և տրամադրելու ֆինանսական աջակցություն ակադեմիական «սփին-օֆ»-ներին։ Իրազեկության բարձրացման և տեղեկատվության տարածման, գիտնականների և գործարար ոլորտի համագործակցությունը խթանելու նպատակով, նախարարության ներկայացուցիչները պատրաստակամություն են հայտնել առաջիկայում ARMDOCT ծրագրի աշխատանքային խմբի հետ համատեղ կազմակերպել համաժողով։ Մասնագիտական կրթության որակի ապահովման ազգային կենտրոնի տնօրեն Ռուբեն Թոփչյանը բուհերի հավատարմագրման ընթացքում բացահայտված հիմնական խնդիրներից նշել է կիրառելի գիտելիքի պակասը։ Նա համոզմունք է հայտնել, որ այս ծրագիրը բավականին լուծումներ կտա՝ դոկտորական դպրոցներ ստեղծելով, ինչպես նաև բուհ-արդյունաբերություն կապի ապահովման միջոցով։ Նա կարևորել է նաև դոկտորական կրթության և մագիստրոսական կրթության հետ կապի ապահովումը: Աշխատաժողովի ընթացքում բուհերի և սոցիալական այլ գործընկերների կողմից ներկայացվել են համագործակցային դոկտորական ծրագրերի, բուհ-արդյունաբերություն համատեղ իրականացվող հետազոտական ծրագրերի օրինակներ։ Աշխատաժողովն ամփոփվել է համագործակցային դոկտորական կրթական ծրագրերի կազմակերպման վերաբերյալ քննարկումներով։

10:15 - 07 մարտի, 2021

Նոր ներդրումներ կաթի վերամշակման ոլորտում. Արման Խոջոյան

ՀՀ էկոնոմիկայի նախարարի տեղակալ Արման Խոջոյանը տեղեկացրել է, որ կաթի վերամշակման ոլորտում նոր ներդրումներ են իրականացվում: «Նոր ներդրումներ կաթի վերամշակման ոլորտում: «Բարի սամարացի» կազմակերպությունն արդեն կաթնամթերք էլ է արտադրելու՝ համաշխարհային առաջատար կազմակերպությունների տեխնոլոգիան ներդնելով հայկական արտադրության մեջ: Շուրջ 45 նոր աշխատատեղ և առաջիկա 2 ամսում ևս ավելացում: Հատկանշական է, որ կազմակերպությունն օրական 2-4 տոննա կաթ հետ է վերադարձնում ցածր որակի պատճառով»,- գրել է Արման Խոջոյանը Ֆեյսբուքի իր էջում:

16:32 - 06 մարտի, 2021

Լավ բիզնես հնարավորություններ հայ արտադրողների համար. Վահան Քերոբյան

Այսօր կայացել է Եվրասիական տնտեսական հանձնաժողովի խորհրդի նիստը, որին մասնակցել է փոխվարչապետ Մհեր Գրիգորյանը, այս մասին ֆեյսբուքյան իր էջում գրել է ՀՀ էկոնոմիայի նախարար Վահան Քերոբյանը: «Oրակարգում ընդգրկվել էր նաև ԵԱՏՄ սակագնային արտոնություններից օգտվող զարգացող երկրների ցանկից թվով 76 երկրներ, այդ թվում՝ Թուրքիան հանելու վերաբերյալ առաջարկը, որն ընդունվել է միաձայն և ուժի մեջ կմտնի որոշման հրապարակման պահից 6 ամիս հետո՝ համաձայն գործող ընթացակարգերի: Հայկական արտադրողները հնարավորություն կունենան բարելավել իրենց դիրքերը ոչ միայն հայկական, այլև ողջ ԵԱՏՄ տարածքում։ Էկոնոմիկայի նախարարությունն հաջորդ շաբաթ արդեն կպատվիրի մանրազննին հետազոտություն, որպեսզի ավելի կոնկրետ բացահայտի, թե որ ոլորտներում և որ արտադրողներով մենք կկարողանանք բարելավել մեր դիրքերը»,- գրել է նախարարը։

22:17 - 05 մարտի, 2021

Էկոնոմիկայի նախարարությունում կայացել է քննարկում խոշոր առևտրային ցանցերի ներկայացուցիչների հետ

ՀՀ էկոնոմիկայի նախարարության նախաձեռնությամբ, նախարարությունում կազմակերպվել է հանդիպում-քննարկում Հայաստանում գործող խոշոր առևտրային ցանցերի ներկայացուցիչների հետ, տեղեկացնում է նախարարության մամուլի ծառայությունը։Քննարկումը վարել է ՀՀ էկոնոմիկայի նախարարի տեղակալ Վարոս Սիմոնյանը։ Միջոցառմանը մասնակցել են նաև ՀՀ Պետական եկամուտների կոմիտեի նախագահի տեղակալ Արթուր Մանուկյանը, Գործարարության աջակցման գրասենյակի (BSO) ղեկավար Գևորգ Պողոսյանը, Տնտեսական մրցակցաության պաշտպանության պետական հանձնաժողովի (ՏՄՊՊՀ), ՀՀ էկոնոմիկայի նախարարության և Գործարարության աջակցման գրասենյակի պատասխանատու աշխատակիցները և խոշոր առևտրային ցանցերի ներկայացուցիչները: Փետրվարի 19-ին փոխվարչապետ Տիգրան Ավինյանի գլխավորությամբ կայացած ՓՄՁ զարգացման խորհրդի նիստի ընթացքում ադրադարձ է եղել խոշոր առևտրային ցանցերին վերաբերող հարցերին, այդ թվում՝ մատակարարումներին, տեղական արտադրանքի իրացմանը և այլ խնդիրների, որոնց հանդիպում են ՓՄՁ սուբյեկտները: Կազմակերպված քննարկման նպատակն էր՝ լսել խոշոր առևտրային ցանցերի ներկայացուցիչներին, ներկայացնել վերջիններիս մատակարար ընկերությունների կողմից բարձրաձայնված խնդիրները և համատեղ գտնել առկա խնդիրների լուծման տարբերակներ։ Կարծիքներ են փոխանակվել մատակարարումների դիմաց վճարման ժամկետներ սահմանելու, տեղական արտադրանքի իրացման, առևտրային ցանցերում գերփոքր և փոքր տնտեսվարողների կողմից առաջարկվող ապրանքների իրացման ժամանակ հարկման համակարգերի տարբերության պատճառով առաջացող խնդիրների, հարկման այլընտրանքային համակարգերի կիրառման հնարավորությունների, ապրանքների վերադարձելիության ժամկետների, մատակարարների հետ համագործակցության ընթացակարգերի վերաբերյալ: Հանդիպման մասնակիցները տեղեկացվել են նաև, որ ՏՄՊՊՀ-ի կողմից մշակվել է խորհրդատվական բնույթի ուղեցույց՝ առևտրային ցանցերի և մատակարար ընկերությունների միջև բարեխիղճ հարաբերությունների կարգավորման նպատակով, որում սահմանվում են համագործակցության ընթացակարգերը: Հանդիպման ավարտին նշվել է, որ բարձրաձայնված խնդիրները կհավաքագրվեն և կուսումնասիրվեն, նմանատիպ հանդիպում կանցկացվի նաև մատակարարների հետ՝ թե՛ մատակարարների և թե՛ խոշոր ցանցերի համար ձեռնտու լուծումներ գտնելու համար։

11:37 - 05 մարտի, 2021

Վահան Քերոբյանն ընդունել է «Էս Ջի Էս ինսպեքշն սերվիսիս լիմիթեդ» ընկերության ներկայացուցիչներին

ՀՀ էկոնոմիկայի նախարար Վահան Քերոբյանը մարտի 4-ին ընդունել է «Էս Ջի Էս ինսպեքշն սերվիսիս լիմիթեդ» ԲԸ գործադիր տնօրեն Ալի Էբրահիմզադեհին և հայաստանյան գրասենյակի ղեկավար Համիդռեզա Գոլիին։ Հանդիպմանը մասնակցել է նաև նախարարի տեղակալ Վարոս Սիմոնյանը։ Հյուրերը համառոտ ներկայացրել են «Էս Ջի Էս» (SGS) կազմակերպության գործունեությունը և նշել, որ այն հանդիսանում է աշխարհում ստուգման, զննման, վերահսկողության և հավաստագրման առաջատար ընկերություններից մեկը, որն ունի ավելի քան 2500 մասնաճյուղեր և լաբորատորիաներ ամբողջ աշխարհում: Նախարարին տեղեկացվել է, որ SGS ընկերության աշխատանքային ոլորտը բավականին ընդարձակ է՝ հանքարդյունաբերությունից մինչև տեքստիլ, սնունդ, խմիչք, դեղամիջոցներ և այլն: Ընկերությունը տրամադրում է ինչպես որակի, այնպես էլ քանակի, թե՛ միջազգային և թե՛ պետական չափանիշներին համապատասխանելիության հավաստագրեր: Հանդիպման ընթացքում քննարկվել են Հայաստանի տարածքով բեռնափոխադրումների արդյունավետ կազմակերպմանը, ՀՀ տարածքում և արտերկրում բեռնման և բեռնաթափման կետերում ապրանքի ստուգման ու վերահսկողության իրականացմանը, մաքսային ընթացակարգերի և ձևակերպումների դյուրացմանը, ինչպես նաև մաքսային արժեքի որոշման էլեկտրոնային համակարգերի ներդրմանն առնչվող հարցեր։ Առանձին անդրադարձ է եղել կազմակերպության կողմից Հայաստանում ներդրումների իրականացմանը և միջազգային չափանիշներին համապատասխան լայնածավալ փորձագիտական ծառայությունների մատուցման հնարավորությանը։

19:10 - 04 մարտի, 2021

Գործարարները կստանան անվճար խորհրդատվական աջակցություն հակակոռուպցիոն համապատասխանության վերաբերյալ

Մարտի 4-ին ՀՀ էկոնոմիկայի նախարարության և «Կորպորատիվ Կառավարման Կենտրոն» հիմնադրամի միջև ստորագրվել է մտադրությունների մասին հուշագիր։ Այս մասին հայտնում են ՀՀ էկոնոմիկայի նախարարության տեղեկատվության և հասարակայնության հետ կապերի վարչությունից: Հուշագիրը ստորագրել են ՀՀ էկոնոմիկայի նախարար Վահան Քերոբյանը և «Կորպորատիվ Կառավարման Կենտրոն» հիմնադրամի տնօրեն Նարինե Մելիքյանը։ Հուշագրի նպատակն է համատեղ ջանքերով նպաստել Հայաստանի գործարար հատվածում հակակոռուպցիոն համապատասխանության պահանջների ընդունմանը, խթանել «պետություն և գործարար համայնք» համագործակցությունը հակակոռուպցիոն համապատասխանության ապահովման հարցերում։ Հուշագրով կողմերը պարտավորվում են աջակցել Հայաստանի գործարար համայնքին հակակոռուպցիոն համապատասխանության պահանջների ընկալման հարցում։ Այդ նպատակով համատեղ կկազմակերպվեն գործարար համայնքի ներկայացուցիչների իրազեկվածության բարձրացմանը միտված միջոցառումներ (դասընթացներ, սեմինարներ, կլոր սեղաններ, համաժողովներ և այլն)։ Կորպորատիվ Կառավարման Կենտրոնի կողմից գործարար համայնքի ներկայացուցիչները կստանան անվճար խորհրդատվական աջակցություն հակակոռուպցիոն համապատասխանության վերաբերյալ, իսկ Բիզնեսի բարեվարքության ակումբի միջոցով կխթանվի հակակոռուպցիոն հավաքական նախաձեռնությունների զարգացումը Հայաստանում։ Կիրականացվեն նաև այլ գործողություններ և միջոցառումներ, որոնք միտված կլինեն Հայաստանի գործարար համայնքում հակակոռուպցիոն համապատասխանության պահանջների ընդունմանը։ «Էկոնոմիկայի նախարարությունը և Կորպորատիվ կառավարման կենտրոնը՝ ստորագրելով այս հուշագիրը, մեկտեղում են ջանքերը, որպեսզի միասին ապահովեն բարեվարքության կանոնների լայն տարածումը և հակակոռուպցիոն համապատասխանության ընկալումը Հայաստանի գործարար միջավայրում։ Հայաստանի համար շատ կարևոր է, որ բիզնեսները վստահեն միմյանց, և վստահեն նաև պետությանը։ Այս առումով Կորպորատիվ կառավարման կենտրոնը շատ մեծ առաքելություն է ստանձնել, և մենք պատրաստ ենք աջակցել իրեն», - հուշագրի ստորագրումից հետո նշել է Վահան Քերոբյանը։ «Մեր կազմակերպությունն արդեն տարիներ շարունակ իր առաքելությունն է իրականացնում կորպորատիվ կառավարման լավ մշակույթը Հայաստանում տարածելու ուղղությամբ։ Մինչ այս փաստաթղթի ստորագրումը, մենք համագործակցել ենք Էկոնոմիկայի նախարարության հետ, սակայն նման փաստաթղթավորում դեռ չէր եղել։ Մի շատ կարևոր նախաձեռնությամբ է հանդես եկել կենտրոնը, դա բիզնեսի բարեվարքության ակումբի ձևավարումն է, որում ունենք 23 անդամ՝ բիզնեսի ներկայացուցիչներ, անձինք, ովքեր կորպորատիվ կառավարման հանձնառություն ունեն։ Մենք համատեղ ուժերով, ինչպես փորձագիտական, այնպես էլ պետական ու հասարակական կազմակերպությունների հետ համագործակցելով, պետք է օժանդակենք այդ խնդիրների լուծմանն ու դաշտն ավելի թափանցիկ, պատասխանատու և ազնիվ դարձնենք», - ասել է Կորպորատիվ կառավարման կենտրոնի տնօրեն Նարինե Մելիքյանը։

18:08 - 04 մարտի, 2021

Վահան Քերոբյանն ընդունել է ՀԲ Հարավային Կովկասի տարածաշրջանային տնօրենի պատվիրակությանը

ՀՀ էկոնոմիկայի նախարար Վահան Քերոբյանն ընդունել է Համաշխարհային բանկի Հարավային Կովկասի տարածաշրջանային տնօրեն Սեբաստիան Մոլինեուսի գլխավորած պատվիրակությանը։ Այս մասին հայտնեցին ՀՀ էկոնոմիկայի նախարարության տեղեկատվության և հասարակայնության հետ կապերի վարչությունից: Էկոնոմիկայի նախարարը համառոտ ներկայացրել է Հայաստանի տնտեսության ներկայիս զարգացումները և կառավարության կողմից ընդունված առաջնահերթությունները, որի շրջանակներում ՀՀ էկոնոմիկայի նախարարության կողմից մշակվող նոր տնտեսական քաղաքականությունը այժմ վերջնականացման փուլում է։ Կողմերը քննարկել են Համաշխարհային բանկի համագործակցությամբ հանրային ներդրումների կառավարման, պետություն-մասնավոր գործընկերության (ՊՄԳ), ենթակառուցվածքային ծրագրերում իրականացվող համատեղ աշխատանքների, գյուղատնտեսության և զբոսաշրջության ոլորտներում ծրագրերի ընթացքը։ Սեբաստիան Մոլինեուսի կողմից առաջարկվել է նախանշել այն ոլորտները, իրավական կարգավորումները, ուղղությունները կամ ծրագրերը, որտեղ Հայաստանին Համաշխարհային բանկը կարող է աջակցություն ցուցաբերել։ Հանդիպման ավարտին երկուստեք պայմանավորվածություն է ձեռք բերվել շարունակել քննարկումները ջրային ենթակառուցվածքների, ինչպես նաև այլ ուղղություններով՝ համագործակցության նոր համատեղ ծրագրերի իրականացման նպատակով։

16:04 - 04 մարտի, 2021

Ընդլայնվում է հակաճգնաժամային 25-րդ միջոցառման շահառուների ցանկը |1lurer.am|

1lurer.am: Կառավարության այսօրվա նիստում էկոնոմիկայի նախարար Վահան Քերոբյանը ներկայացրեց Հայաստանի Հանրապետության Կառավարության 2020 թ. սեպտեմբերի 22-ի N 1549-Լ որոշման մեջ փոփոխություններ և լրացումներ կատարելու մասին հարցը, որը վերաբերում է կորոնավիրուսի դեմ պայքարի հետևանքների չեզոքացման 25-րդ միջոցառմանը, որը վերաբերում էր տուրիստական ոլորտի տրանսպորտային ընկերությունների վարկերի տոկոսների փոխհատուցման նախագծին: «Ընտրված ընկերությունների շրջանակը բավականին նեղ է եղել, և նախատեսված 250 միլիոն օժանդակության ծրագրից ընդամենը մոտ 36 միլիոնն է տրվել շահառուներին: Այժմ մի փոքր ընդլայնում ենք շրջանակը՝ ընդգրկելով նաև մարդատար ավտոմոբիլների և թեթևաքաշ փոխադրամիջոցների վարձույթ և լիզինգ դասիչի ներքո աշխատող ընկերություններին, որովհետև նրանք նույնպես տուրիստական ոլորտի տրանսպորտային ընկերություններ են»,- նշեց Քերոբյանը՝ հավելելով, որ շտկումներ են իրականացվել նաև գրանցման և ընկերությունների գործունեության ծավալման ժամանակահատվածի մասով: Վարչապետ Նիկոլ Փաշինյանը հավելեց, որ եթե նախկինում մինչև 7 նստատեղ ունեցող ավտոմեքենաներով բիզնես անողները չէին կարող օգտվել ծրագրից, այս փոփոխությամբ արդեն կարող են:

11:52 - 04 մարտի, 2021