Սիրիա

Թուրքիայի օդուժը թուրք-սիրիական սահմանից 30կմ խորացել է դեպի Սիրիայի տարածք |ermenihaber.am|

ermenihaber.am։ Թուրքիայի պաշտպանության նախարարությունը նոր տեղեկություններ է հայտնել Սիրիայի հյուսիս-արևելքում քուրդ զինյալների դեմ սկսված «Խաղաղության ակունք» ռազմական գործողության ընթացքի մասին: Ըստ Twitter-ում արված գրառման՝ Թուրքիայի զինված ուժերը շարունակում են շարժվել դեպի Եփրատ գետի արևելյան հատված։ Մինչ այս պահը կրակի տակ է առնվել քուրդ գրոհայինների 181 հենակետ։ Օդային հարվածներից բացի մարտի մեջ են մտել նաև թուրքական զինուժի ցամաքային ուժերը։ Նշվում է, որ գործողության շրջանակներում Թուրքիայի օդային ուժերը թուրք-սիրիական սահմանից 30կմ խորացել են դեպի Սիրիայի տարածք։ Օպերացիայի ընթացքում օգտագործվում են F-35 կործանիչներ, տանկեր։ Միջազգային այդ թվում և քրդական լրատվամիջոցները հայտնում են, որ Թուրքիայի բանակի գործողությունների հետևանքով արդեն զոհեր կան խաղաղ բնակչության շրջանում։ Թուրքական լրատվամիջոցները չեն հաստատում այդ տեղեկատվությունը։ Հիշեցնենք, որ քրդերի դեմ ռազմագործողությունը մեկնարկել էր հոկտեմբերի 9-ին։ Մինչ այդ ԱՄՆ-ի նախագահը հայտարարել էր, որ եթե Թուրքիան անցնի թույլատրելի սահմանը, ապա Վաշինգտոնը կոչնչացնի Թուրքիայի տնտեսությունը։ Թուրքական զինուժի ներխուժումը Սիրիա տեղի ունեցավ այն ժամանակ, երբ ամերիկյան զինված ստորաբաժանումները լքեցին Եփրատ գետի արևելյան հատվածը։

06:31 - 10 հոկտեմբերի, 2019

Թուրքական զորքերը Սիրիայի հյուսիսում ռազմական գործողություններ են սկսել, կրակի տակ են առնվել նաև Սիրիայի հայաբնակ բնակավայրերը.Մխիթար Հայրապետյան

ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Մխիթար Հայրապետյանը ֆեյսբուքյան իր էջում գրում է․ «Քիչ առաջ հեռախոսազրույց ունեցա Հալեպում ՀՀ գլխավոր հյուպատոս Արմեն Սարգսյանի հետ։ Ինչպես գիտեք, թուրքական զորքերը Սիրիայի հյուսիսում ռազմական գործողություններ են սկսել: Հաշվի առնելով այն հանգամանքը, որ կրակի տակ են առնվել նաև Սիրիայի հայաբնակ բնակավայրերը, կապ հաստատեցի հյուպատոս Արմեն Սարգսյանի հետ՝ իրավիճակի վերաբերյալ տեղեկատվություն ստանալու նպատակով: Այս պահին թուրքերը գնդակոծում են Թել Աբյադ քաղաքը, որտեղ 16 հայ ընտանիք կա: Նախատեսվում է շուտով կազմակերպել նրանց տարհանումը: Բացի այդ, Կամիշլին, որտեղ նույնպես մեծաթիվ հայեր կան, կրակի տակ է։ Մեր հյուպատոսին խնդրեցի զորակցությունս փոխանցել հայ համայնքին, և, առհասարակ, աղոթում եմ Սիրիայում ապրող մեր հայրենակիցների և մեր բարեկամ սիրիացի ժողովրդի համար»։

05:01 - 10 հոկտեմբերի, 2019

Սիրիայում մայիսին քիմիական հարձակման պատասխանատվությունը կրում է Ասադի ռեժիմը․ Փոմփեո |azatutyun.am|

azatutyun.am։ Սիրիայում այս տարվա մայիսին ենթադրյալ քիմիական հարձակման պատասխանատվությունը կրում է Բաշար ալ-Ասադի ռեժիմը, այսօր Նյու Յորքում հայտարարել է ԱՄՆ պետքարտուղար Մայք Փոմփեոն՝ հավելելով, որ հարձակման մանրամասներն ուսումնասիրել է ամերիկյան հետախուզությունը:Մայիսի 19-ին տեղի ունեցած հարձակումից անմիջապես հետո պաշտոնական Վաշինգտոնը Մոսկվային և Դամասկոսին մեղադրել է սիրիական քաղաքացիական օբյեկտները անխնա ռմբակոծելու համար:Լրագրողների հետ զրույցում Փոմփեոն հայտնել է նաև նոր պատժամիջոցների մասին, որոնք Միացյալ Նահանգները սահմանում է ռուսաստանյան երկու ընկերությունների նկատմամբ: Այդ ընկերությունները, ըստ Փոմփեոյի, սիրիական կառավարությանը վառելիք են մատակարարել:Պաշտոնական Մոսկվան «քաղաքական անխոհեմություն» է որակել Վաշինգտոնի այդ որոշումը՝ պնդելով, որ «սև ցուցակում» հայտնված ընկերությունները Սիրիա վառելիք են տեղափոխել ռուսաստանյան զինուժի համար:

10:04 - 27 սեպտեմբերի, 2019

Սիրիայի նախագահը ստորագրել է հրաման՝ համընդհանուր համաներման մասին |shantnews.am|

shantnews.am։ Սիրիայի նախագահ Բաշար Ասադը ստորագրել է հրաման՝ երկրում համընդհանուր համաներման մասին։ Այն կտարածվի հանցագործությունների վրա, որոնք կատարվել են մինչև 2019 թվականի սեպտեմբերի 14-ը։ Փաստաթուղթը հրապարակել է Սիրիայի պետական SANA գործակալությունը։ Մասնավորապես, նշվում է, որ մահապատիժը և ցմահ բանտարկությունը կփոխարինվեն 20 տարի ժամկետով տքնաջան աշխատանքով։Համաձայն հրամանի՝ ցանկացած պատժից լիովին ազատվում են անբուժելի հիվանդ դատապարտյալները, ովքեր հասել են 75 տարեկանի։Ինչպես ավելի վաղ հայտնել էինք, ՌԴ ԱԳ նախարար Սերգեյ Լավրովը հայտարարել էր, որ պատերազմը Սիրիայում ավարտվել է, և երկիրն աստիճանաբար վերադառնում է խաղաղ կյանքի։ Նրա խոսքով՝ լարվածության առանձին օջախները պահպանվում են միայն տարածքներում, որոնք չեն վերահսկվում Սիրիայի կառավարության կողմից։ Այդ տարածքների թվում են Իդլիբն ու Եփրատի արևելյան ափը։

05:25 - 16 սեպտեմբերի, 2019

Թուրքիան և ԱՄՆ-ը սկսել են համատեղ պարեկություն իրականացնել Սիրիայի հյուսիսում |azatutyun.am|

azatutyun.am։ Թուրքիայի և Միացյալ Նահանգների զինվորականները սկսել են համատեղ պարեկություն իրականացնել Սիրիայի հյուսիսում:Նախօրեին Թուրքիայի զինված ուժերի ստորաբաժանումները հատել են պետական սահմանը` միանալով Թել-Աբյադ քաղաքի շրջանում տեղակայված ամերիկացի զինվորականներին: Համատեղ թուրք-ամերիկյան պարեկության ներքո գտնվող այս շրջանը առավելապես արաբներով է բնակեցված, սակայն վերահսկվում էր սիրիացի քրդերի ջոկատների կողմից:Պաշտոնական Դամասկոսը թուրք-ամերիկյան համատեղ պարեկության մեկնարկը որակել է որպես «երկրի ինքնիշխանության և տարածքային ամբողջականության աղաղակող խախտում»:

08:57 - 09 սեպտեմբերի, 2019

Սիրիան դեմ է, որ ԱՄՆ-ն ու Թուրքիան իր տարածքում անվտանգության գոտի ստեղծեն |ermenihaber.am|

ՄԱԿ-ում Սիրիայի մշտական ներկայացուցիչ Բեշար Ջաֆերին հայտարարել է, որ պաշտոնական Դամասկոսը դեմ է Սիրիայի տարածքում ստեղծվելիք անվտանգության գոտուն, որի շուրջ նախնական համաձայնության են հասել ԱՄՆ-ն ու Թուրքիան։ Սիրիացի պաշտոնյան իր երկրի տարածքում Թուրքիայի և ԱՄՆ-ի անվտանգության գոտին ստեղծելու ծրագրերն անվանել է Սիրիայի անկախության դեմ ուղղված խախտում: Թեմային արձագանքել է ՄԱԿ-ի գլխավոր քարտուղարի հումանիտար հարցերով օգնական Մարկ Լոուքոքը։ Ըստ նրա՝ Սիրիայում անվտանգության գոտու ստեղծման շուրջ ԱՄՆ-ն և Թուրքիան ոչ մի բանակցություն չեն վարել ՄԱԿ-ի հետ։ Ըստ նրա՝ ՄԱԿ-ը թուրք-ամերիկյան համաձայնության մաս չի կազմել։

08:41 - 30 օգոստոսի, 2019

Պուտինն ու Էրդողանը այսօր հանդիպելու են մերձմոսկովյան Ժուկովսկի քաղաքում |azatutyun.am|

azatutyun.am։ Ռուսաստանի նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը այսօր հանդիպելու են մերձմոսկովյան Ժուկովսկի քաղաքում: Երկու երկրների ղեկավարները քննարկելու են սիրիական պատերազմի և ռուս-թուրքական հարաբերությունների զարգացման հետ կապված հարցեր։ Այս մասին հաղորդվում է Կրեմլի պաշտոնական կայքում հրապարակված հայտարարությունում։Էրդողանի այցը համընկնում է Սիրիայի զինված ուժերի կողմից Իդլիբ նահանգում ապստամբների դիրքերին ավիահարվածներ հասցնելու հետ, որտեղ Ռուսաստանը և Թուրքիան ապառազմականացված գոտիներ են ստեղծել:Նախօրեին Պուտինի հետ հեռախոսազրույցի ժամանակ Էրդողանն ասել է, որ Բաշար Ալ-Ասադի ռեժիմի կողմից Իդլիբում բռնությունների հետ կապված մտահոգություններ ունի և հույս կա, որ այս խնդիրները կլուծեն։Hurriyet Daily News- ի փոխանցմամբ Էրդողանը նաև ասել է, որ Թուրքական զինուժը շուտով կմտնի Սիրիա։Թուրքիան, որը պաշտպանում է սիրիական ապստամբ ուժերին, որոնք փորձում են տապալել Ասադի ռեժիմը, համագործակցում է ԱՄՆ-ի հետ Թուրքիայի սահմանի մերձակայքում անվտանգության գոտի ստեղծելու ուղղությամբ:Թուրքիան միաժամանակ ընդդիմանում է ԱՄՆ աջակցությանը Սիրիայի քրդերին։Մոսկվան և Իրանը Սիրիայի կառավարության հիմնական ռազմական աջակիցներն են: 2015 թվականից Ռուսաստանը էականորեն մեծացրել է իր ռազմական ներկայությունը Սիրիայում, ուղարկելով այնտեղ մոտ 4000 զինվորական և ռազմական կործանիչներ։

06:48 - 27 օգոստոսի, 2019

Էրդողանը խոսել է Սիրիայում հավանական նոր ռազմական գործողություն սկսելու մասին |ermenihaber.am|

ermenihaber.am: Թուրքիայի նախագահ Ռեջեփ Թայիփ Էրդողանը ելույթ է ունեցել 11-րդ անգամ անցկացվող դիվանագիտների կոնֆերանսի ընթացքում՝ անդրադառնալով երկրի արտաքին քաղաքականությանը, այդ թվում նաև Սիրիայում հավանական նոր ռազմական գործողություն սկսելուն և ԱՄՆ-ի հետ հարաբերություններին: Սիրիայի հարցի վերաբերյալ Էրդողանը նշել է, որ Թուրքիան պարտավոր է նախաձեռողականություն ցուցաբերել ոչ միայն սեփական ապագայի, այլև տարածաշրջանային խաղաղության և հանգստության համար: Նա շեշտել է, որ անհրաժեշտության դեպքում ուժի կիրառմամբ պաշտպանելու են երկրի ազգային շահերը և Սիրիայի հյուսիսում «ահաբեկչությունը» վերացնելը Թուրքիայի համար առաջնահերթ խնդիր է: Էրդողանն ակնարկել է նոր ռազմական գործունեություն սկսելու հավանականության մասին՝ նշելով. ««Եփրատի վահան» և «Ձիթենու ճյուղ» գործողություններով սկսված գործընթացը շատ մոտ ապագայում մեկ այլ մակարդակի կհասցնենք»: Էրդողանը, խոսելով Թուրքիայի կողմից գնված ռուսական S-400 ՀՕՊ համակարգերի շուրջ ստեղծված իրավիճակի և դրա պատճառով թուրք-ամերիկյան լարված հարաբերությունների մասին, նշել է, որ ԱՄՆ-ից ակնկալում են քայլեր, որոնք վայել են իսկական դաշնակցին։ Նա հետևյալ շեշտադրումներն է արել. «Չկան տվյալներ, որոնց համաձայն, S-400-ները վնաս են հասցնելու F-35-ներին և ՆԱՏՕ-ին։ S-400-ներ գնելով Թուրքիան իր անվտանգության հարցում ոչ թե ռազմավարական քայլ է արել, այլ զուտ բիզնես գործարք է կնքել։ Հենց մեր դաշնակիցների անզիջում վերաբերմունքն է ստիպել նման քայլի գնալ: Հույս ունեմ, որ Թրամփն իր ճիշտ դիրքորոշմամբ թույլ չի տա, որ մեր հարաբերությունները S-400-ների խնդրի պատանդը դառնան: ԱՄՆ-ից ակնկալում ենք, որ ինչպես FETÖ-ի առաջնորդներին (նկատի ունի ԱՄՆ-ում բնակվող իսլամի հայտնի քարոզիչ, գյուլենական համայնքի առաջնորդ Ֆեթուլլահ Գյուլենին) Թուրքիա արտահանձնելու, այնպես էլ PKK/YPG ահաբեկչական կազմակերպությանը (նկատի ունի Սիրիայի քրդական ուժերին, որոնց նույնականացնում են «Քուրդիստանի բանվորական կուսակցության» (PKK-ՔԲԿ) հետ) զինելու դադարեցման ուղղությամբ հստակ քայլեր կանի»:

07:24 - 07 օգոստոսի, 2019

Սիրիայի հյուսիսային Աֆրին շրջանում հարձակում է եղել. կա 3 զոհ |ermenihaber.am|

ermenihaber.am: Սիրիայի հյուսիսային Աֆրին նահանգի Բասուտե գյուղում թուրքական բանակի ուղղությամբ իրականացված հարձակման հետևանքով սպանվել է 1 թուրք զինվոր և Թուրքիայի աջակցությունը վայելող «Սիրիայի ազատ բանակի» (սիրիական ընդդիմադիր զինված խ,բավորում) 2 զինյալ: Այս մասին հայտնում է քրդական «ANF News» լրատվական կայքը:Քրդական կայքի փոխանցմամբ` դեռևս պարզ չէ, թե ում կողմից է թիրախավորվել այդ շրջանը:

12:43 - 06 օգոստոսի, 2019

Սիրիական որոշ զինված խմբավորումներ պատրաստ են Թուրքիայի հետ քրդերի դեմ ռազմական գործողություններ սկսել |ermenihaber.am|

ermenihaber.am: Թուրքիայի աջակցությունը վայելող «Սիրիայի ազատ բանակ»-ը (հակակառավարական զինված խմբավորում Սիրիայում) պատրաստ է Անկարային աջակցել Սիրիայի հյուսիսում քրդական ուժերի դեմ իրականացվելիք ռազմական գործողությանների ընթացքում: Հարցի վերաբերյալ խոսել է Սիրիայի ազատ բանակի խոսնակ Յուսուֆ Համուդը։ «14 հազար զինվորներ մեր տրամադրության տակ են, որ պատրաստ են Թուրքիայի բանակի հետ միասին ներխուժել Եփրատի արևելք»,- ասել է նա։ Համուդը հնարավոր գործողությունների վերաբերյալ կոնկրետ ժամկետներ չի նշել: Նշենք նաև, որ «Սիրիայի ազատ բանակ»-ից նման հայտարարություն է հնչում, Թուրքիայի նախագահ Ռեջեփ Թայիփ Էրդողանի ելույթից հետո, որտեղ նա խոսել էր Սիրիայի հյուսիսում նոր ռազմական գործողություն սկսելու մասին։

11:12 - 06 օգոստոսի, 2019

Հայ մասնագետները Սիրիայում 28,063 քմ տարածք են ականազերծել

«Հումանիտար ականազերծման և փորձագիտական կենտրոն» ՊՈԱԿ-ը ֆեյսբուքյան էջում հայտարարում է․ «Սիրիայի Արաբական Հանրապետությունում հումանիտար առաքելություն իրականացնող հայ մասնագետների երկրորդ խմբի սակրավորները հունիսի 8-ից մինչև օգոստոսի 5-ը տեխնիկական հետազոտության և մաքրման աշխատանքների ժամանակ ականազերծել են 28063 քմ տարածք: Մարդասիրական խմբի բժիշկները նույն ժամանակահատվածում թերապևտիկ բնույթի բուժօգնություն են ցուցաբերել 335 քաղաքացու, ճառագայթային հետազոտությունների է ենթարկվել 638 հիվանդ, մանկաբույժը զննել է 267 երեխայի, անեսթեզիոլոգիական ծառայություններից օգտվել է 65 քաղաքացի, գինեկոլոգը հետազոտել է 280 հիվանդի։Ընդհանուր առմամբ 1625 քաղաքացի բժշկական աջակցություն է ստացել»։

07:21 - 06 օգոստոսի, 2019

Պետդեպն անհանգստացած է Սիրիայի տարածքում ռազմական գործողություն անցկացնելու Թուրքիայի մտադրությամբ |tert.am|

tert.am։ ԱՄՆ պետքարտուղարությունն անհանգստացած է թուրքական բանակի՝ Սիրիայի տարածքում ռազմական գործողություն անցկացնելու մտադրությամբ: Ինչպես հայտնում է tass.ru-ն, այդ մասին հայտարարել է գերատեսչության պաշտոնական ներկայացուցիչ Մորգան Օրտագուսը: «Նման միակողմանի ռազմական գործողությունները Սիրիայի հյուսիս-արևելքում լուրջ անհանգստություն են առաջացնում, հատկապես, երբ ամերիկացի զինծառայողները կարող են գտնվել մոտակայքում… Մենք յուրաքանչյուր նման գործողություն անընդունելի ենք համարում և կոչ ենք անում Թուրքիային աշխատել մեզ հետ համատեղ մոտեցման մշակման համար»,- ասել է նա: Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան ռազմական արշավ կսկսի Եփրատի արևելյան ափին և այդ մասին տեղեկացրել է Ռուսաստանին և ԱՄՆ-ին:

08:35 - 05 օգոստոսի, 2019

Թուրքիան ու ԱՄՆ-ն համաձայնության չեն գալիս Սիրիայում անվտանգության գոտի հիմնելու պայմանների շուրջ |ermenihaber.am|

ermenihaber.am։ Սիրիայում ԱՄՆ-ի հատուկ ներկայացուցիչ Ջեյմս Ջեֆրին հաստատել է, որ Թուրքիայի հետ կան մի շարք տարաձայնություններ Սիրիայում ստեղծվելիք անվտանգության գոտու հարցում։ «Թուրքիայի պաշտպանության նախարարը բավականին կոշտ դիրքորոշում է որդեգրել այս հարցում։ Թուրքիա ցանկանում է ավելի մեծ խորությամբ անվտանգության գոտի ստեղծել, իսկ մեզ համար ընդունելի է 5- 14 կմ խորություն ունեցող անվտանգության գոտին։ Այս հարցում կան անհամաձայնություններ, որոնք խոչընդոտում են անվտանգության գոտւ ստեղծմանը: Դիվանագիտական և ռազմական բանակցությունները շարունակվում են»,- ասել է ամերիկացի պաշտոնյան։ Ավելի վաղ Թուրքիայի պաշտպանության նախարարը հայտարարել էր, որ եթե ԱՄՆ-ն ու Թուրքիան Սիրիայի հյուսիսում ստեղծվելիք անվտանգության գոտու հարցում համաձայնության չգան, Թուրքիան այն միայնակ կհիմնի։

11:55 - 02 օգոստոսի, 2019

Սիրիայում արգելափակել են Ռուսաստանի դեսպանատան Twitter- յան հաշիվը |pastinfo.am|

pastinfo.am։ Twitter սոցիալական ցանցի աշխատակիցները արգելափակել են Սիրիայում Ռուսաստանի դեսպանատան պաշտոնական հաշիվը: Այս մասին հաղորդվում է Հարավային Աֆրիկայում Ռուսաստանի դեսպանատան պրոֆիլում: «Մտքերի ոստիկանությունն արդեն այստեղ է. Twitter- ը կասեցրել է Սիրիայում Ռուսաստանի դեսպանատան հաշվի գործունեությունը (!) այն բանից հետո, երբ այնտեղ հրապարակվել է «Սպիտակ սաղավարտների» փաստացի քննադատությունը», - ասվում է հաղորդագրության մեջ: Ըստ հրատարակության հեղինակների՝ սա ապացուցում է, որ «սովորական» հաշվառման գրառումները չեն կարող ունենալ տարբեր կարծիք: Ռուսաստանի արտաքին գործերի նախարարությունը ծառայության վարքը համարել է ցենզուրա և խոսքի ազատության դեմ ոտնձգություն: Դիվանագիտական տեսչությունը հարթակին առաջարկել է բացել պաշտոնական պրոֆիլը:

05:49 - 01 օգոստոսի, 2019

Թուրքիան ԱՄՆ-ին սպառնացել է միայնակ ստեղծել Սիրիայում անվտանգության գոտին |ermenihaber.am|

ermenihaber.am։ Թուրքիայի պաշտպանության նախարար Հուլուսի Աքարը հեռախոսազրույց է ունեցել Պենտագոնի նորանշանակ ղեկավար Մարք Էսփերի հետ, որի ընթացքում կողմերը քննարկել են տարածաշրջանային մի շարք խնդիրներ։ Զրույցի ժամանակ թուրք պաշտոնյան Էսփերին իրազեկել է տարածաշրջանային մի շարք հարցերում Անկարայի ակնկալիքների մասին։ Մասնավորապես Աքարի խոսքերով, «ԱՄՆ-ն պետք է դադարի աջակցել Թուրքիայի կողմից ահաբեկչական համարվող Սիրիայի քրդական ուժերին»։ Դրանից զատ Աքարը Էսփերին ասել է, որ, Թուրքիան երբեք թույլ չի տա, որ Սիրիայի հյուսիսում քրդական ուժերը ստեղծեն «ահաբեկչական միջանցք»։ Անկարան պահանջել է, Սիրիայի քրդական ուժերին նախկինում ԱՄՆ-ի կողմից տրամադրված զենքը և զինամթերքը հետ վերցվեն։ Անդրադառնալով Սիրիայի հյուսիսում ստեղծվելիք անվտանգության գոտու հարցին՝ Աքարը պնդել է, որ միակ երկիրը, որն ի զորու է վերահսկել նշյալ գոտին, Թուրքիան է։ Նա նշել է, որ ստեղծվելիք գոտւց Սիրիայի քրդական ուժերը պետք է դուրս գան ամբողջապես։Միևնույն ժամանակ Աքարն ասել է, որ, եթե հանկարծ ԱՄՆ-ու Թուրքիան Սիրիայում ստեղծվելիք անվտանգության գոտու պայմանների հարցում համաձայնության չհասնեն, թուրքական կողմը միայնակ կստեղծի նշյալ գոտին։

07:48 - 30 հուլիսի, 2019

Սիրիա է վերադարձել ավելի քան 1600 փախստական |aysor.am|

aysor.am: Անցած օրերի ընթացքում օտարերկրյա պետությունների տարածքից Սիրիա է վերադարձել ավելի քան 1600 փախստական, այս մասին տեղեկացնում են փախստականների ընդունման և տեղաբաշխման կենտրոնից։ Անցած օրերի ընթացքում օտարերկրյա պետությունների տարածքից Սիրիայի Արաբական Հանրապետություն է վերադարձել 1666 փախստական, այդ թվում՝ Լիբանանից՝ «Ջեյդեթ-Յաբուս» և «Թել-Քալահ» անցակետերով, 378 մարդ (113 կին, 193 երեխա), Հորդանանից՝ «Նասիբ» անցակետով, 1288 մարդ (386 կին, 657 երեխա):

11:37 - 29 հուլիսի, 2019