Արմեն Աշոտյան

ՀՀ ԱԺ նախկին պատգամավոր, ՀՀԿ նախագահի տեղակալ, ընդդիմադիր քաղաքական գործիչ։ Ծնվել է 1975թ. հուլիսի 25-ին: 1998թ. ավարտել է Երեւանի պետական բժշկական համալսարանի բուժական ֆակուլտետը: 2000թ. ավարտել է ԵՊԲՀ կլինիկական օրդինատուրան «Դատական բժշկություն» մասնագիտությամբ: 2005թ. ավարտել է ԵԽ առընթեր Մոսկվայի քաղաքական հետազոտությունների դպրոցը: 2007թ. վերապատրաստվել է Միջազգային հարաբերությունների Մոսկվայի պետական ինստիտուտում գլոբալ գործընթացների կառավարում մասնագիտությամբ:

2002-2005թթ. աշխատել է ԵՊԲՀ ռեկտորի օգնական: 2005թ. աշխատել է ԵՊԲՀ ռեկտորի խորհրդական: 2003թ. աշխատում է ԵՊԲՀ կենսաքիմիայի ամբիոնում ասիստենտ: 2003-2005թթ. եղել է ՀՀԿ երիտասարդական կազմակերպության նախագահ: 2005-2007թթ. եղել է ՀՀ Ազգային ժողովի երրորդ գումարման պատգամավոր, Սոցիալական, առողջապահության եւ բնության պահպանության հարցերի մշտական հանձնաժողովի, ՀՀԿ խմբակցության անդամ:

2007թ. ընտրվել է ԱԺ պատգամավոր ՀՀԿ համամասնական ընտրացուցակով: ՀՀԿ խմբակցության անդամ: 2008թ. ընտրվել է ԱԺ գիտության, կրթության, մշակույթի եւ երիտասարդության հարցերի մշտական հանձնաժողովի նախագահ: 2009-2016թթ. -Հայաստանի Հանրապետության կրթության և գիտության նախարար: 2018թ. ԱԺ արտահերթ ընտրություններում ՀՀԿ-ի անցողիկ շեմը չհատելուց հետո ծավալում է ընդդիմադիր գործունեություն։

ԵՄ դիտորդական առաքելության գործառույթներն են նաև հրադադարի պահպանման մոնիթորինգը և հրադադարին վերաբերող զարգացումների մասին զեկույցները

Հայաստանի հանրապետական կուսակցության փոխնախագահ Արմեն Աշոտյանը երկու օր առաջ ֆեյսբուքյան ուղիղ եթերում «էժանագին սուտ» որակեց Նիկոլ Փաշինյանի խոսքերը՝ Եվրամիության (ԵՄ) դիտորդական առաքելության վերաբերյալ։ Նրա խոսքով, երբ Նիկոլ Փաշինյանին հարց է ուղղվել, թե ինչու ԵՄ առաքելությունը չի արձագանքել հայ-ադրբեջանական սահմանին ադրբեջանական կողմի վերջին խախտումներին, Նիկոլ Փաշինյանը սխալ է ներկայացրել դիտորդական առաքելության գործունեությունը: «Ինչ ա ասում, որ նրանք (ԵՄ դիտորդները) հրադադարի պահպանման մեխանիզմներ չեն իրականացնում, նրանց միսիայի էությունն ավելի խորն ա»,- նշեց Աշոտյանը։ Ապա հավելեց, որ ըստ Նիկոլ Փաշինյանի՝ դիտորդները եկել են ոչ թե հրադադարի մեխանիզմների պահպանման համար, այլ ավելի «խորը միսիայով»։ Որպես իր խոսքերի հաստատում Արմեն Աշոտյանը նաև կից հրապարակեց ԵՄ պաշտոնական հրապարակումն՝ առաքելության գործառույթների մասին, և ընթերցեց դրանից հատվածներ։ Ըստ Աշոտյանի՝ ԵՄ կայքում նշված է, որ առաքելությունը պետք է «սատարի վստահության կառուցման պրոցեսին Հայաստանի և Ադրբեջանի միջև՝ հրադադարի պահպանման մոնիթորինգ իրականացնելով»։ Նա ԵՄ հայտարարությունից մեջբերեց ևս մի հատված․ «ԵՄ մոնիթորինգային կարողությունը Հայաստանում պետք է զեկուցի միջազգայնորեն ճանաչված հայ-ադրբեջանական սահմանի հայկական կողմում հրադադարի պահպանմանը վերաբերող զարգացումների մասին»։ Ի՞նչ է ասել Նիկոլ Փաշինյանը Ուրբաթ օրը Նիկոլ Փաշինյանը հարցազրույց տվեց Հանրային հեռուստաընկերությանը։ Հարցազրույցի ընթացքում լրագրողը հարցրեց նրան, թե ինչպես կմեկնաբանի այն, որ ԵՄ դիտորդական առաքելության տեղակայումից հետո Ադրբեջանը խախտել է հրադադարը, բայց առաքելությունը չի արձագանքել։ Փաշինյանը պատասխանեց, որ չի կարծում, թե դիտորդներն «այստեղ են ամեն օր հայտարարություններ անելու համար»։ «Կարծում եմ, որ նրանք իրենց գործունեության արդյունքում ավելի խորը հետևություններ պիտի անեն, և այդ հետևություններն, իմիջիայլոց, պիտի փոխանցեն նաև դելիմիտացիայի գործընթացում ներգրավված անձանց, պաշտոնյաներին և միջազգային հանրությանը։ Վստահ եմ, որ այդ հետևությունները կլինեն օբյեկտիվ։ Այսինքն՝ նրանք հրադադարի ռեժիմի պահպանման մոնիթորինգ չեն իրականացնում, նրանց միսիայի էությունն ավելի խորն է»,- նշեց նա։ ԵՄ դիտորդական առաքելության տեղակայումը Այս տարվա սեպտեմբերի 13-ին Ադրբեջանը հարձակվեց Հայաստանի վրա՝ օկուպացնելով ՀՀ ինքիշխան տարածքից հատվածներ։ Սեպտեմբերի 14-ի երեկոյան հրադադար հաստատվեց։ Սակայն ըստ ՀՀ պաշտպանության նախարարության հաղորդագրությունների՝ Ադրբեջանը մինչև օրս էլ շարունակում է խախտել հաստատված հրադադարը։ Հոկտեմբերի 6-ին տեղի ունեցավ ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի, Ֆրանսիայի նախագահ Էմանուել Մակրոնի և Եվրոպական խորհրդի նախագահ Շառլ Միշելի հանդիպումը։ Հանդիպումից հետո հայտարարություն տարածվեց, որտեղ առաջին անգամ խոսվեց Հայաստան ԵՄ քաղաքացիական առաքելություն ուղարկելու մասին։ «Հայաստանն իր համաձայնությունը հայտնեց՝ խրախուսելու ԵՄ քաղաքացիական առաքելությունը Ադրբեջանի հետ սահմանի երկայնքով: Ադրբեջանը համաձայնեց համագործակցել նշյալ առաքելության հետ այնքանով, որքանով որ առնչություն կունենա: Առաքելությունն իր աշխատանքները կսկսի հոկտեմբերին առավելագույնը երկու ամիս ժամկետով: Առաքելության նպատակը կլինի վստահության կառուցումը և իր զեկույցների միջոցով սահմանային հանձնաժողովներին աջակցելը»,- նշվում էր հայտարարության մեջ։ Հոկտեմբերի 17-ին ԵՄ-ն հայտարարություն տարածեց, որ մինչև 40 մոնիթորինգային փորձագետների տեղակայումը նպատակ է ունենալու վստահություն ստեղծելու անկայուն իրավիճակում։ Հոկտեմբերի 27-ին ԵՄ դիտորդներն ուղևորվեցին հայ-ադրբեջանական սահման՝ պարեկություն իրականացնելու։ Ի՞նչ գործառույթներ ունի առաքելությունը Հոկտեմբերի 25-ին ԵՄ-ն հարցուպատասխանի ձևաչափով ներկայացրել էր, թե ինչ նպատակով է դիտորդական առաքելությունը գալու հայ-ադրբեջնական սահմանի հայկական հատված (ավելի վաղ Ադրբեջանը հայտարարել էր, որ մերժել է Եվրամիության՝ Ադրբեջան առաքելություն ուղարկելու փորձը)։ «Առաքելության մանդատը Հայաստանի և Ադրբեջանի սահմանային շրջաններում իրավիճակի մոնիթորինգն է` երկու երկրների միջև վստահության հաստատմանը նպաստելու և ԵՄ-ին սահմանային հանձնաժողովներին ավելի լավ աջակցելու հանարավորություն տալու համար»,- ասվում էր ԵՄ կայքում: Այնուհետև նշվում էր, որ Հայաստանում ԵՄ դիտորդական առաքելությունը կիրականացնի երկու հիմնական առաջադրանք. Կաջակցի Հայաստանի և Ադրբեջանի միջև վստահության ամրապնդմանը` հետևելով, թե արդյո՞ք երկու կողմերը պահպանում են հրադադարը։ Կանոնավոր և ըստ անհրաժեշտության ներկայացված զեկույցների միջոցով կվերահսկի իրավիճակը Հայաստանի և Ադրբեջանի միջազգայնորեն ճանաչված սահմանի հայկական կողմում: Դա թույլ կտա ԵՄ-ին ավելի լավ աջակցել երկու կողմերի սահմանային հանձնաժողովների աշխատանքին։ ԵՄ կայքում նաև նշվում է, որ դիտորդական առաքելությունը կզեկուցի Հայաստանի և Ադրբեջանի միջազգայնորեն ճանաչված սահմանի հայկական կողմում հրադադարին վերաբերող զարգացումների մասին։ Այս փաստաթղթում, որին էլ հենց հղվում էր Արմեն Աշոտյանը, փաստորեն արձանագրվում է, որ ԵՄ դիտորդական առաքելության գործառույթներն են նաև հրադադարի պահպանման մոնիթորինգը և հրադադարին վերաբերող զարգացումների մասին զեկույցները։ Ընդ որում՝ ԵՄ կայքում նշված է, որ, բացի կանոնավոր զեկույցներից, ըստ անհրաժեշտության՝ կներկայացվեն նաև այլ զեկույցներ։ Երեկ ՀՀ հատուկ հանձնարարություններով դեսպան Էդմոն Մարուքյանն իր թվիթերյան միկրոբլոգում գրել էր, որ Հայաստանում տեղակայված ԵՄ դիտորդական առաքելությունը Հայաստանի ինքնիշխան տարածքի վրա ադրբեջանական բանակի ամենօրյա հարձակումները փաստագրել է։ «Առաքելությունը ԵՄ և այլոց համար կհստակեցնի, որ այդ հարձակումները առանց որևէ պատճառի են ու լավագույն կերպով կազմակերպված են Ադրբեջանի կողմից՝ ընդդեմ հայկական պետականության»,- գրել էր Մարուքյանը։ Գլխավոր լուսանկարում ԵՄ առաքելության դիտորդներն են՝ Գեղարքունիքի մարզում, լուսանկարը՝ Գեղարքունիքի մարզպետի ֆեյսբուքյան էջից Աննա Սահակյան

14:18 - 15 նոյեմբերի, 2022

ՀՀ-ԵՄ հարաբերություններում Արմեն Աշոտյանի թվարկած խնդիրների հետքերով |fip.am|

fip.am: Հանրապետական կուսակցության փոխնախագահ Արմեն Աշոտյանը մայիսի 21-ին 168.am կայքի Review հաղորդման ժամանակ համոզմունք էր հայտնել, որ Եվրոպական միության հետ Հայաստանի հարաբերությունները, չնայած ներկայացվում են լավ, իրականում այդքան էլ լավ չեն։ Աշոտյանի խոսքով՝ ՀՀ-ԵՄ Համապարփակ և ընդլայնված գործընկերության համաձայնագիրը նորմալ կյանքի չի կոչվում։ «Դուք գլուխ էիք գովում, որ բոլորի հետ լավ եք, հատկապես եվրոպացիների հետ։ Դիցուկ դուք լավ եք… Եվրոպական համաձայնագիրը կյանքի չի կոչվում նորմալ, Եվրոպական խորհրդարանում Արևելյան գործընկերությունով լսումներ են գնում, մի հատ հիշատակում, հարց, արձանագրում Հայաստանի մասին չկա։ Վիզաների ազատականացման երկխոսությունը չգիտենք որտեղ ա բրախվել՝ իրականության մեջ, ոչ թե լոլոների»,- նշել էր Աշոտյանը։ «Փաստերի ստուգման հարթակը» փորձեց պարզել, թե ինչ փուլում է ԵՄ-ի հետ կնքված համաձայնագիրը, ինչ լսումների մասին է խոսքը ԵԽ-ում և ինչքան է եղել և հիմա ինչքան է կազմում ԵՄ ֆինանսական աջակցությունը։ ՀՀ-ԵՄ գործընկերության համաձայնագիրը շարունակում է մասնակի գործել, բայց գործընթացի ընթացքից ԵՄ դեսպանը գոհ է 2017 թ․-ին ստորագրված ՀՀ-ԵՄ Համապարփակ և ընդլայնված գործընկերության համաձայնագիրը (ՀԸԳՀ) 2018 թ. հունիսի 1-ից մասնակիորեն գործում է, բայց որպեսզի համաձայնագիրն ամբողջությամբ ուժի մեջ մտնի, այն պետք է վավերացնեն ԵՄ անդամ 28 երկրները և Եվրախորհրդարանը։ Ժամանակավորապես կիրարկվող հոդվածները կազմում են Համաձայնագրի մոտավորապես 80%-ը, իսկ մնացյալ 20%-ը (հիմնականում այն հոդվածները, որոնք գտնվում են ԵՄ անդամ երկրների իրավասության շրջանակում) ուժի մեջ կմտնեն ԵՄ անդամ բոլոր երկրների կողմից Համաձայնագրի վավերացումից հետո։ ՀՀ-ԵՄ համաձայնագիրը 27 երկրից (Մեծ Բրիտանիան լքել է ԵՄ-ն) մինչ օրս վավերացրել է 22 երկիր և Իտալիայի սենատը։ 2019 թ. հունիսի 1-ին հաստատվել է ՀԸԳՀ կիրարկման ճանապարհային քարտեզը։ Այն հստակ ժամանակացույցով նախատեսում է մինչև 2026 թ․ իրականացվելիք 152 միջոցառում. 2019 թ․ համար նախատեսված միջոցառումներն արդեն իրականացվել են, իսկ 2020 թ․ համար նախատեսվածներն իրականացման փուլում են։ 2020 թ. մայիսի 14-ին համաձայնագրի կատարման աշխատանքներին է անդրադարձել ՀՀ-ում ԵՄ դեսպան Անդրեա Վիկտորինը։ Վերջինս «Ազատություն» ռադիոկայանի հետ զրույցում հայտարարել է, որ նշանակալի առաջընթաց է եղել Հայաստանի ժողովրդավարական գործելակերպում, և նոր կոնտեքստն իրենց հնարավորություն է տալիս լիարժեքորեն իրականացնել Համապարփակ և ընդլայնված գործընկերության համաձայնագիրը։ Անդրեա Վիկտորին նաև անդրադարձել է վիզաների ազատականացման հարցին՝ նշելով, որ Հայաստանը շուտով կկարողանա հասնել այն կետին, երբ արդեն ԵՄ բոլոր անդամները պատրաստ կլինեն մեկնարկել երկխոսությունը: ԵՄ մակրոտնտեսական աջակցության ծրագրից Հայաստանն առայժմ չի օգտվի Արմեն Աշոտյանը հարցազրույցում անդրադարձել էր նաև ԵՄ «մակրոտնտեսական աջակցություն» (MFA) գործիքին։ «Հիմա գանք այս ամենամեծ օգնությանը. այս կառավարության ֆինանսների նախարարը մի քանի անգամ՝ ԱԺ-ում էլ, ասաց, որ արտաքին պարտքը պետք է ավելացվի շուրջ 550 մլն դոլարով։ 250-ը Արժույթի միջազգային հիմնադրամից ստացել են, բայց ԵՄ-ն շատ ձրի փող ա տալիս, էս փող-ծրագիրը էլի վարկ է, բայց սիմվոլիկ տոկոսադրույքով, ինչի մասին ասաց նաև ԵՄ հարևանության և ընդլայնման հարցերով հանձնակատար Վարհեին։ Շատ մատչելի վարկեր են, ինչո՞ւ եք այն վարկը վերցնում, բայց ԵՄ-ինը չեք վերցնում, ես վստահ եմ, որ պայմանները ԵՄ վարկի ավելի լավն են»,- ասել էր նա՝ հավելելով, որ, ըստ ԵՄ իր աղբյուրների՝ ՀՀ-ին գումար առաջարկվել է, սակայն մերժվել է։ Հատկանշական է, որ այս թեմայով նախորդ հայտարարությունում Աշոտյանն այլ պնդում էր արել՝ նշելով, որ Հայաստանն ընդգրկված չի եղել այս ցուցակում, այսինքն՝ Հայաստանին չեն առաջարկել։ Fip.am-ը անդրադարձել էր նախորդ պնդմանը՝ մեջբերելով նաև Հայաստանի փոխվարչապետ Մհեր Գրիգորյանի խորհրդական Մանե Ադամյանի գրառումը, որ «ԵՄ մակրոֆինանսական աջակցության գործիքը վարկային մեխանիզմ է, որը առաջարկվել է նաև Հայաստանի Հանրապետությանը և կդիտարկվի՝ ըստ անհրաժեշտության»։ Ապրիլի 22-ին Եվրոպական հանձնաժողովը ներկայացրել էր 3 միլիարդ եվրոյի չափով աջակցության ծրագիր՝ հարևանության և ընդլայնման բանակցությունների 10 գործընկեր պետությունների համար: Առաջարկված մակրոֆինանսական աջակցությունը տրամադրվում է վարկային մեխանիզմով։ ԵՄ հայտարարության մեջ հստակ նշված է, որ «Մակրոֆինանսական աջակցությունը» հասանելի կլինի նաև այն երկրների համար, որտեղ կլինեն դժվարություններ վճարային հաշվեկշռի հետ կապված: Մանե Ադամյանը հարցազրույցում բացատրել էր, թե ինչու այս պահին վարկային միջոցներ ներգրավելու առաջարկը չեն ընդունել։ Ըստ նրա՝ ԵՄ-ն իր ներքին շուկայից վարկ է վերցնում և որպես հակաճգնաժամային գործիք ենթավարկավորում է գործընկեր երկրներն։ Այս օժանդակությունը ՀՀ-ին ևս առաջարկվել է և ցանկացած պահի կարիքի դեպքում կարող են դիմել և ստանալ։ Ավելին, բոլոր գործընկեր երկրների կողմից, նաև միջազգային բանկերի կողմից՝ Համաշխարհային բանկ, Ասիական զարգացման բանկ, Եվրասիական բանկ և այլն, նման առաջարկներ եղել են։ «Եվ մենք գիտենք, որ ինչ-որ պահի դրա կարիքը կունենանք և անպայման այդ վարժությունը կանենք, թե ումից ինչքան, ինչ չափով վերցնենք»,- նշել էր նա։ Բացի այս, ԵՄ-ն որևէ երկրի վարկային աջակցություն տրամադրելիս հիմնվում է տվյալ երկրի վարկունակության վերաբերյալ ԱՄՀ-ի տված գնահատականի վրա, և որպես կանոն՝ մակրոֆինանսական աջակցության գործիքը կիրառվում է ի լրումն ԱՄՀ-ի կողմից տրամադրվող ֆինանսական օժանդակության։ Ինչ վերաբերում է Աշոտյանի պնդմանը, թե ԵՄ մակրոֆինանսական աջակցության վարկն ավելի լավ պայմաններով է, քան Արժույթի միջազգային հիմնադրամից վերցրած 280 մլն դոլար վարկային միջոցները, ուղղակի ենթադրություն է, քանի որ ԵՄ-ն ամեն երկրի հետ առանձին պայմանավորվածությամբ է վարկը տրամադրելու։ ԵԽ-ում Արևելյան գործընկերության հարցով քննարկմանը Հայաստանի մասին խոսք չի եղել Եվրախորհրդարանի արտաքին հարաբերությունների հանձնաժողովի մայիսի 19-ի նիստի օրակարգային հարցերից մեկը վերաբերում էր Արևելյան գործընկերության քաղաքականության ապագային և Covid-19-ի հասցրած վնասների մեղմմանն ուղղված Եվրամիության ֆինանսական աջակցության ծրագրերին Հարևանության բոլոր երկրներում և Թուրքիայում։ Նիստին այս հարցով զեկուցող ԵՄ հարևանության և ընդլայնման հարցերով հանձնակատար Օլիվեր Վարհեին նախ հակիրճ ներկայացրել է 2020 թ․ մարտի 18-ին Եվրոպական խորհրդի, Եվրոպական միության խորհրդի, Եվրոպական տնտեսական և սոցիալական հանձնաժողովի, ինչպես նաև ռեգիոնների հանձնաժողովի համատեղ հաղորդումը Արևելյան գործընկերության ապագայի վերաբերյալ։ Առանձնացրել է այն հիմնական հինգ երկարաժամկետ նպատակները, որոնց ուղղությամբ պետք է աշխատեն 2020 թվականից սկսած ԱլԳ բոլոր գործընկերների հետ և առկա պայմանագրային բազայից զատ՝ չի առանձնացրել որևէ ԱլԳ երկրի անուն։ Զեկույցի երկրորդ մասը վերաբերել է Covid-19-ի դեմ պայքարի շրջանակում Հարևանության երկրներին տրամադրված աջակցությանը։ Հանձնակատարը հերթով թվարկել է, թե որ նպատակի համար ընդհանուր ինչքան գումար է տրամադրվել ԵՄ Արևելյան և Հարավային գործընկերներին միասին վերցրած, ու նաև նշել է, թե վերը նշված ՄՖԱ վարկային աջակցության գործիքով (որից, ինչպես նշեցինք, Հայաստանը առայժմ հրաժարվել է) որ երկիրն ինչքան է ստացել։ Դրանից հետո պատգամավորները հանձնակատար Վարհեիին իրենց հուզող հարցերն են ներկայացրել Արևելյան գործընկերության երկրներում առկա խնդիրների վերաբերյալ՝ հիմնականում մատնանշելով այդ երկրներում առկա խնդիրները։ ԱլԳ երկրների վերաբերյալ բարձրացվել են այնպիսի հարցեր, ինչպիսիք են, օրինակ, փողերի լվացման հետ կապված խնդիրները Մոլդովայում և դրա դեմ պայքարը, Ադրբեջանում քաղաքացիական հասարակության և ընդդիմության առաջնորդների նկատմամբ կիրառվող ճնշումներն ու քաղբանտարկյալների հարցը, Բելառուսում ու Ադրբեջանում տիրող կոռուպցիան, լրագրողների, ակտիվիստների հետապնդումներն ու դրանց դեմ նախատեսվող քայլերը, Վրաստանում մինչ վերջերս առկա քաղաքական լարվածության հարցը և դրա ոչ ամբողջովին հարթված լինելը և այլն։ Արմեն Աշոտյանի դիտարկումը ճիշտ է, քանի որ այս համատեքստում Հայաստանի մասին որևէ անդրադարձ նիստում չի եղել։ ԵՄ կողմից տրամադրվող ֆինանսական աջակցության ծավալներն ըստ տարիների Խոսելով ԵՄ-ից Հայաստանին հատկացվող 92 մլն դրամ ֆինանսական աջակցության մասին՝ ՀՀԿ փոխնախագահը համոզմունք է հայտնում, որ այդ գումարը տրամադրվելու էր իրենց օրոք կնքված պայմանագրով. «Գնացեք ճշտեք, ընդամենը 10 տոկոս է ավելացել լավագույն դեպքում, պարզապես ԵՄ-ն այդ փողը պետք է տար այլ բարեփոխման համար մեր ստորագրածով, հիմա կորոնավիրուսի պատճառով այդ փողը բարեփոխումներից հանել են, վրան մի քիչ ավելացրել են և ասում են սա ձեզ կորոնավիրուսի դեմ պայքարում»։ 2017-2020 թվականների համար ԵՄ-ն, որպես գրանտ, ավելի քան 160 մլն եվրո աջակցություն է հատկացրել Հայաստանին, այսինքն՝ ստանձնած բարեփոխումների ծրագրերի համար տարեկան 40 մլն եվրո։ Սակայն տարեկան հատկացված գումարի ոչ ամբողջ մասն է պետությունը հասցրել ծախսել, և դրանք այս տարի ևս չօգտագործելու պարագայում ԵՄ-ն հետ կվերցնի։ 2019-ին «արժևորելով բարեփոխումների օրակարգին հետամուտ լինելու և ՀԸԳՀ արդյունավետորեն կիրարկելու Հայաստանի վճռականությունը», ԵՄ կողմից «Տարեկան գործողությունների ծրագրի» շրջանակում Հայաստանին տրամադրվել է հավելյալ 25 միլիոն եվրո, այսինքն՝ 65 մլն, որը տրամադրվում էր ԵՄ հովանոցային ֆոնդից՝ բացառապես քաղաքական որոշմամբ։ 2020-ին համաճարակի դեմ պայքարի շրջանակում ԵՄ-ն Հայաստանին կտրամադրի մոտ 92 մլն եվրո։ Այս թվի մեջ մտնում են վերաբաշխումներ՝ ինչպես 2017-2020 թ․ համար նախատեսված 160 միլիոն եվրո աջակցությունից, այնպես էլ 2018 թ․ հետո Հովանոցային ֆոնդից Հայաստանին հատկացված հավելյալ աջակցությունից։ Ի դեպ, Եվրոպական միության՝ ԱլԳ 6 երկրներին COVID-19-ի դեմ պայքարելու համար տրամադրած ֆինանսական աջակցության գումարները տեղաբաշխվել են հետևյալ կերպ․ — Հայաստան՝ 92 մլն եվրո — Ադրբեջան՝ 14 մլն եվրո — Բելառուս՝ 60 մլն եվրո — Վրաստան՝ 183 մլն եվրո — Մոլդովա՝ 87 մլն եվրո — Ուկրաինա՝ 190 մլն եվրո Այսպիսով, կարող ենք արձանագրել, որ Արմեն Աշոտյանի մատնանշած խնդիրները և համոզմունքը, որ ԵՄ-ի հետ հարաբերություններում առկա են խնդիրներ, մանիպուլյատիվ են և մեծամասամբ սխալ։ Նելլի Լազարյան

18:31 - 25 մայիսի, 2020