Իլհամ Ալիև

Պատրաստ եմ մեր ունեցած բոլոր քարտեզներն ինձ հետ տանել և Ադրբեջանի նախագահին կոչ եմ անում իր հետ բերել մեր բոլոր գերիներին. վարչապետ |armenpress.am|

21:45 - 03 հոկտեմբերի, 2021

Ալիևը համարժեք պատասխան է խոստացել Հայաստանի կողմից ականապատ տարածքների քարտեզները ստանալու դեպքում |armenpress.am|

armenpress.am: Ադրբեջանի նախագահ Իլհամ Ալիևը հայտարարել է, որ եթե Հայաստանն ադրբեջանական կողմին հանձնի Լեռնային Ղարաբաղում ականապատ հատվածների քարտեզները, Բաքվի պատասխանը համարժեք կլինի: Այս մասին Ալիևը խոսել է EFE-ին տված հարցազրույցում: «Եթե նրանք (խմբ.- հայկական կողմը) դա անեն, բարի կամք դրսևորեն, մենք դրան ադեկվատ պատասխան կտանք»,- ասել է Ալիևը: Նա ընդգծել է, որ ականապատ տարածքների քարտեզները չունենալու պատճառով նախորդ տարվա ընթացքում վիրավորվել կամ մահացել է 150 ադրբեջանցի զինծառայող կամ քաղաքացիական անձ:

15:05 - 02 հոկտեմբերի, 2021

Իլհամ Ալիևը պատրաստ է հանդիպել Նիկոլ Փաշինյանի հետ |azatutyun.am|

azatutyun.am: Ադրբեջանի նախագահ Իլհամ Ալիևը հայտարարել է, որ պատրաստ է հանդիպել Հայաստանի վարչապետ Նիկոլ Փաշինյանի հետ։ Այս մասին Ադրբեջանի ղեկավարը նշել է իսպանական EFE լրատվական գործակալությանը տված հարցազրույցում։ «Եթե հայկական կողմը պատրաստ է, ես ևս պատրաստ եմ։ Ես պատրաստ եմ պարոն Փաշինյանի հետ բանակցություններ անցկացնել ցանկացած պահի, երբ նա պատրաստ կլինի։ Ես բաց եմ քննարկումների համար և համարում եմ, որ դա կարող է լավ ցուցիչ դառնալ առ այն, որ պատերազմն ավարտված է, և մենք այդ էջը թերթել ենք», - նշել է Ալիևը։

14:28 - 02 հոկտեմբերի, 2021

ԵԱՀԿ Մինսկի խմբի այցը տարածաշրջան ևս մեկ անգամ հաստատում է, որ ԼՂ կոնֆլիկտը ավարտված չէ․ Արմեն Գրիգորյան

ԼՂ հակամարտությունը կարգավորված չէ, և ԵԱՀԿ Մինսկի խմբի՝ տարածաշրջան այցը ևս մեկ անգամ ապացուցում է դա։ Այս մասին երեկ՝ Հանրային հեռուստաընկերությանը տված հարցազրույցում հայտարարել է ՀՀ անվտանգության խորհրդի քարտուղար Արմեն Գրիգորյանը։ Գրիգորյանը նաև ասել է, որ Հայաստանի տարածքում չի կարող գոյություն ունենալ սուվերեն միջանցք։ «Միջանցքներ կամ ճանապարհներ հնարավոր է՝ բացվեն, որից նաև կարող են օգտվել ադրբեջանցիները, կամ Թուրքիան, որպեսզի Ադրբեջանի հետ կապվի, այդպիսի տարբերակ հնարավոր է, բայց այդ ճանապարհները լինելու են Հայաստանի սուվերեն տարածքի վերահսկողության տակ»։ Պետրոս Ղազարյանը հիշեցրել է, որ Ադրբեջանի նախագահ Իլհամ Ալիևը ցանկություն է հայտնել խաղաղության համաձայնագիր կնքել Հայաստանի հետ, ինչպես նաև պատրաստակամություն է հայտնել ԵԱՀԿ Մինսկի խմբի շրջանակում հանդիպել ՀՀ վարչապետ Նիկոլ Փաշինյանի հետ, ապա հետաքրքվել է ՝ Հայաստանը նույնպես պատրա՞ստ է հանդիպմանը։ «Մենք ավելի շուտ հայտարարել ենք, որ բարձրագույն մակարդակում պատրաստ ենք հանդիպել և քննարկել հարցեր։ Եթե իսկապես պատրաստակամություն լինի, հուսով ենք, որ ԵԱՀԿ Մինսկի խմբի շրջանակներում քննարկումներ տեղի կունենան, և հանդիպումը հնարավոր մոտ ապագայում կարող է տեղի ունենալ»,- պատասխանելով հարցին՝ նշել է ԱԽ քարտուղարը։ Անդրադառնալով այս տարվա մայիսի 12-ից ադրբեջանական զինուժի Հայաստանի Սյունիքի և Գեղարքունիքի մարզեր ներթափանցման վերաբերյալ հարցին, Գրիգորյանն ասել է․ «Մենք շարունակում ենք քննարկումները ՀԱՊԿ-ի հետ, որպեսզի փորձենք լուծում գտնել»,-հավելելով, որ փորձում են խաղաղ ճանապարհով կարգավորել հարցը։

14:16 - 02 հոկտեմբերի, 2021

Թեհրանը «զարմացած է» Ալիևի «զարմանքից» |civilnet.am|

civilnet.am: Թեհրանը զարմացած է Ադրբեջանի նախագահ Իլհամ Ալիևի՝ իրանական կողմի հասցեին արած հայտարարություններից և չի հանդուրժի իսրայելական ուժերի ներկայությունը իր սահմաններին․ այս մասին սեպտեմբերի 28-ին հայտարարել է Իրանի արտաքին գործերի նախարարության խոսնակ Սայիդ Խաթիբզադեն, հայտնում է Tehran Times-ը։ «Մի իրավիճակում, երբ երկու երկրներն ունեն լավ հարաբերություններ՝ հիմնված փոխադարձ հարգանքի վրա և ամենաբարձր մակարդակով գործում են կապի խողովակներ, նման հայտարարությունները զարմանք են առաջացնում»,- ասել է Խաթիբզադեն։ Վերջինս հստակեցրել է, որ սահմանային զորավարժությունների անցկացումը Իրանի ինքնիշխան իրավունքն է։ Սեպտեմբերի 27-ին Իլհամ Ալիևը թուրքական Anadolu լրատվականի հետ զրույցում զարմանք էր հայտնել Թեհրանի ձեռնարկած գործողությունների առնչությամբ․ «Ինչո՞ւ հիմա և ինչո՞ւ մեր սահմաններին։ Իրանը սահմանին վարժանքներ չի իրականացրել մոտ 30 տարի առաջ Ադրբեջանի անկախացումից ի վեր»։ Ադրբեջանի և Իրանի հարաբերությունները լարվել են այն բանից հետո, երբ Գորիս-Կապան միջպետական ճանապարհի Որոտանի հատվածում տեղակայված ադրբեջանական ոստիկանական ուժերը իրանական բեռնատարների վարորդներից սկսել են գումար գանձել իրենց տարածք մուտք գործելու համար։ Ադրբեջանցիներն անգամ երկու իրանցի վարորդի են ձերբակալել։ Anadolu-ի հետ զրույցում Ալիևը «պարզաբանել է», որ Իրանը տարիներով անտեսել է Ադրբեջանի կոչերը՝ դադարեցնել ապրանքների տեղափոխումը Լեռնային Ղարաբաղ։ Նրա խոսքով՝ ոչ մի իրանական բեռնատար չի մտել Ղարաբաղ այն բանից հետո, երբ իրենք սկսել են մուտքի գումար գանձել։ Սեպտեմբերի վերջին լրատվամիջոցները հայտնել են, որ Իրանը զորակազմ և զինտեխնիկա է տեղակայել Ադրբեջանի հետ սահմանին։ Իրանցի բարձրաստիճան պաշտոնյաները հայտարարել են, որ վարժանքներն իրականացվում են ի պատասխան Ադրբեջանի տարածքում իսրայելական ուժերի ներկայության։ Բաքվում Իրանի դեսպան Աբաս Մուսավին հավաստիացրել է, որ զորավարժությունները նախապես ծրագրված էին և որևէ սպառնալիք չեն ներկայացնում Ադրբեջանի համար։

12:09 - 29 սեպտեմբերի, 2021

Ալիևը հայտարարել է, թե Ադրբեջանը «վերադարձրել է պատերազմի ժամանակ գերի ընկած բոլոր զինվորականներին» |tert.am|

tert.am: Ադրբեջանի նախագահ Իլհամ Ալիևը France 24 հեռուստաալիքին տված հարցազրույցում հայտարարել է, որ Ադրբեջանը «վերադարձրել է պատերազմի ժամանակ գերի ընկած բոլոր զինվորականներին»:«Հայաստանի կառավարությունը կարող է հաստատել դա: Մենք վերադարձրել ենք նրանց զինծառայողներին դեռևս, նախքան նրանք վերադարձել էին մեր զինվորականներին: Այն անձինք, որոնց նկատի ունի Human Rights Watch-ը, մարդիկ են, որոնք մեր դիրքեր են ուղարկվել Հայաստանի ռազմական հրամանատարության կողմից պատերազմի ավարտից և նոյեմբերյան համաձայնագրի ստորագրումից երկու շաբաթ անց»,- ադրբեջանական աղբյուրի փոխանցմամբ՝ ասել է Ալիևը՝ պատասխանելով իրավապաշտպան կազմակերպության հնչեցրած մեղադրանքների մասին հարցին, որոնց համաձայն՝ Ադրբեջանը կտտանքների է ենթարկում հայ ռազմագերիներին:

22:42 - 28 սեպտեմբերի, 2021

Ալիևը հայտնել է, որ առարկություն չունի ՄԽ համանախագահների միջնորդությամբ Փաշինյանի հետ հանդիպելու հարցում |armenpress.am|

armenpress.am: Ադրբեջանի նախագահ Իլհամ Ալիևը France24-ին տված հարցազրույցում նշել է, որ չի առարկի ՀՀ վարչապետ Նիկոլ Փաշինյանի հետ հանդիպման հարցում։ Այս մասին Ալիևն ասել է France24-ին։ Ալիևը հարցազրույցում նշել է, որ եթե ԵԱՀԿ Մինսկի խմբի միջնորդները (Ֆրանսիա, ԱՄՆ և Ռուսաստան) հանդիպում կազմակերպեն ՀՀ վարչապետ Նիկոլ Փաշինյանի հետ, ապա ինքը առարկություն չի ունենա:

17:08 - 28 սեպտեմբերի, 2021

Ալիևը հայտարարել է, որ զանգվածային աշխատանքներ են սկսվել «Զանգեզուրի միջանցքի» ստեղծման ուղղությամբ |tert.am|

tert.am: Ադրբեջանի նախագահ Իլհամ Ալիևն ընդգծել է Հարավային Կովկասում հաղորդակցությունների ապաշրջափակման հարցով Ադրբեջանի, ՌԴ-ի և Հայաստանի փոխվարչապետերի մակարդակով եռակողմ ձևաչափով համագործակցության կարևորությունը:«Այդ խմբում աշխատանք է տարվել Զանգեզուրի միջանցքի բացման ուղղությամբ, սակայն հունիսի սկզբին Հայաստանը դադարեցրել է իր մասնակցությունն այդ խմբին՝ ընտրություններով պայմանավորված: Օգոստոսի կեսերին այդ խումբը հերթական հանդիպումն է անցկացրել: Նրանք կրկին կհանդիպեն հաջորդ ամիս: Կարծում եմ՝ այդ խումբը կարևոր ձևաչափ է, քանի որ թեև արդյունք չկա, այնուամենայնիվ շփում կա: Շփումն անհրաժեշտ գործիք է տվյալ իրավիճակում, և շատ հարցեր կարող են կարգավորվել այդ շփումների օգնությամբ»,- ասել է Ալիևը թուրքական «Անադոլու» գործակալությանը տված հարցազրույցում:Վերջինս հավելել է, որ Ադրբեջանում «զանգվածային աշխատանքներ են մեկնարկել Զանգեզուրի միջանցքի ստեղծման ուղղությամբ:

15:40 - 27 սեպտեմբերի, 2021

Ալիևը դրական է գնահատել ռուս խաղաղապահների գործունեությունը Լեռնային Ղարաբաղում |tert.am|

tert.am: Ադրբեջանի նախագահ Իլհամ Ալիևը հայտարարել է, որ Բաքուն, ընդհանուր առմամբ, դրական է գնահատում ռուս խաղաղապահների գործունեությունը Լեռնային Ղարաբաղում:«Ընդհանուր առմամբ, ռուս խաղաղապահ ուժերի գործունեությունը կարելի է դրական գնահատել: Իհարկե, կան պահեր, որոնք մեզ ձեռք չեն տալիս, որոնց շուրջ մենք հարցեր ունենք: Առաջին հերթին, դա կապված է օտարերկրյա քաղաքացիների՝ մեր հողեր անօրինական այցերի հետ»,- «ՌԻԱ Նովոստի»-ի փոխանցմամբ՝ ասել է Ալիևը թուրքական «Անադոլու» գործակալությանը տված հարցազրույցում:

15:17 - 27 սեպտեմբերի, 2021

Ալիևը խոսել է նոյեմբերի 9-ի, ռուս խաղաղապահների և հայերի ու ադրբեջանցիների հաշտեցման մասին |hetq.am|

12:37 - 24 սեպտեմբերի, 2021

Ալիևը ՄԱԿ-ի ելույթում հայտարարել է, որ Լեռնային Ղարաբաղ անունով տարածքային միավոր ու հակամարտություն գոյություն չունի |factor.am|

factor.am: Ադրբեջանի նախագահ Իլհամ Ալիևը ՄԱԿ-ի Գլխավոր Վեհաժողովի 76-րդ նստաշրջանի իր ելույթում հերթական անգամ հայտարարել է, որ Ադրբեջանը ռազմաքաղաքական ճանապարհով կարգավորել է Արցախյան հակամարտությունը և «վերականգնել իր տարածքային ամբողջականությունն ու պատմական արդարությունը»։ Նա կրկին ասել է, որ, իբր, Լեռնային Ղարաբաղի հակամարտությունը մնացել է անցյալում, hաղորդում են ադրբեջանական լրատվամիջոցները։ «Ադրբեջանում այլևս չկա Լեռնային Ղարաբաղ անունով վարչատարածքային միավոր»,- ասել է նա։ Շարունակությունը՝ factor.am-ում

12:26 - 24 սեպտեմբերի, 2021

Ադրբեջանը պատրաստ է Հայաստանի հետ խաղաղ պայմանագրի շուրջ բանակցություններ սկսել, սակայն Հայաստանի կողմից դրական արձագանք չենք տեսնում. Ալիևի ելույթը ՄԱԿ-ի ԳՎ-ում |tert.am|

tert.am: Ադրբեջանի նախագահ Իլհամ Ալիևը հաստատել է իր երկրի պատրաստակամությունը՝ Հայաստանի հետ խաղաղ պայմանագրի շուրջ բանակցություններ սկսելու՝ հորդորելով Երևանին ընտրություն կատարել համագործակցության և տարածքային պահանջների միջև, գրում է ՏԱՍՍ-ը:«Հակամարտությունն ավարտված է, ուստի Ադրբեջանն արդեն հայտարարել է Հայաստանի հետ խաղաղ պայմանագրի շուրջ բանակցություններ սկսելու պատրաստակամության մասին` սահմանների սահմանազատման և սահմանագծման սկզբունքի, միմյանց ինքնիշխանության և տարածքային ամբողջականության փոխադարձ ճանաչման հիման վրա: Նման համաձայնագիրը կարող է մեր տարածաշրջանը վերածել խաղաղության և համագործակցության տարածաշրջանի: Այնուամենայնիվ, մենք դեռ չենք տեսնում Հայաստանի կողմից դրական արձագանք մեր առաջարկին», - ասել է Ալիևը ՄԱԿ-ի Գլխավոր վեհաժողովի 76-րդ նստաշրջանում:Նրա խոսքով՝ տրանսպորտային նախագծերը կարող են դառնալ խաղաղությանն ու համագործակցությանը ծառայող ոլորտներից մեկը: Ադրբեջանի նախագահը նշել է, որ «Զանգեզուրի միջանցքը, որն Ադրբեջանի հիմնական մասը կկապի Նախիջևանի ինքնավար հանրապետության հետ, այս համատեքստում նոր հնարավորություններ կստեղծի տարածաշրջանի համար»:

10:39 - 24 սեպտեմբերի, 2021