«Խնդրում եմ, որ լինի խաղաղություն»․ արցախցի փոքրիկների «Ձմեռ պապիկն» այս տարի մոսկվայաբնակ Թուխմանն ու Ալեքսանդրան են
«Ձմեռ պապիկից խնդրում եմ, որ լինի խաղաղություն, որպեսզի աշխարհում երբեք պատերազմ չլինի… Բոլոր արցախցիները վերադառնան իրենց տները»։
Սա արցախցի Ալենի նամակն է Ձմեռ պապիկին։ Ալենը պատերազմի ժամանակ Կարմիր Շուկայից տեղափոխվել էր Ստեփանակերտ․ այս տարի նրա նամակը, ինչպես շատ երեխաներինը, տարբերվում է նախորդներից։ Նամակներից շատերում նրանք ուզել են ոչ թե խաղալիքներ, այլ միայն իրենց տունը՝ Շուշիում, Ադրբեջանին հանձնված այլ բնակավայրերում։ Փոքրիկների այս անմեղ ցանկության հասցեատերն էլ է այսօր Ձմեռ պապը, այլ ոչ իրենց հարազատները, կառավարությունները։
Արցախցի շուրջ 300 երեխաների «Ձմեռ պապիկն» այս տարի մոսկվայաբնակ Թուխմանն ու Ալեքսանդրան են։ Նրանց միավորել է մեկ նպատակ՝ օգնել Արցախին։
«Help Artsakh» («Օգնել Արցախին») նախաձեռնությունը մեկ ամիս է, ինչ կյանքի է կոչվել։ Գաղափարը Թուխմանինն է, որը միավորեց 6 երիտասարդների, որոնք իրենց ուսերին պատասխանատվություն վերցրին՝ արցախցի երեխաներին ամանորյա փոքրիկ հեքիաթ պարգեւել։
Արցախցի տեղահանված երեխաների ցուցակները ստանալու հարցում նախաձեռնությանն օգնել է Արցախի կառավարությունը։ Help Artsakh նախաձեռնության երիտասարդները ստացել ու սոցցանցերում հրապարակել են 300-ից ավելի նամակ՝ հովանավորներ գտնելու ակնկալիքով։
Արձագանքն անսպասելի է եղել նույնիսկ նախաձեռնության անդամների համար։ Պարզվեց՝ երեխաներին նվերներ անելու ցանկություն ունեին շատերը․ սկսեցին օգնել նախաձեռնությանը ե՛ւ դրամական աջակցությամբ, ե՛ւ նամակներում երեխաների ուզած նվերները գնելով։
Սկզբում շուրջ 100 երեխա ստացավ իր նվերը՝ պատասխան նամակի հետ միասին։
Նախաձեռնությանն օգնեցին նաեւ դրամական աջակցությամբ․ հավաքվեց 2 մլն դրամից ավելի գումար, որը նույնպես ուղղվեց արցախցի երեխաների ամանորյա նվերներին։
Նկարում Տիգրանն է։ Նա այն 100 երեխաներից մեկն է, ում արդեն հասել է իր նվերը։ «Երբ կարդացի Տիգրանի նամակը, շատ հուզվեցի։ Գրել էր, որ հայրը գերի է ընկել, եւ ինքը ոչինչ չի ուզում՝ հորից բացի։ Գրել էր՝ Ձմեռ պապ, խնդրում եմ իմ հայրիկին վերադարձրու տուն։ Նույնիսկ չգիտեինք՝ ինչ տալ Տիգրանին, որովհետեւ հասկանում էինք, որ ինքն ուրիշ ոչինչ չի ուզում։ Որոշեցինք I-Pad նվիրել։ Նայում էի Տիգրանի աչքերի մեջ, հասկանում էի, որ ինքն ուրախ է նվերը ստանալու համար, բայց չի կարողանում նույնիսկ ժպտալ»,- պատմում էր Ալեքսանդրան։
Այսօր խումբը մեկնում է Արցախ․ Ստեփանակերտում շուրջ 200 երեխա սպասում է իր նվերներին։ Վաղն արդեն երեխաները կստանան իրենց ամանորյա նվերները։ Երեխաները չպետք է զրկվեն ամանորյա հեքիաթից՝ անկախ ամեն ինչից։
Նարեկ Մարտիրոսյան
18:24 - 29 դեկտեմբերի, 2020
