Իլհամ Ալիև

Իլհամ Ալիևը Ադրբեջանի ներկայիս նախագահն է։ 1977 թվականին ընդունվել է Միջազգային հարաբերությունների Մոսկվայի պետական ինստիտուտ:

2003 թվականի հոկտեմբերի 15-ին ընտրվել է Ադրբեջանի Հանրապետության նախագահ: Վերընտրվել է 2008, 2013, 2018 թվականներին։

Թուրքիան անպայման պետք է ներկա լինի ԼՂ հակամարտության կարգավորման գործընթացում․ Թուրքիա |azatutyun.am|

Թուրքիան անպայման պետք է ներկա լինի ԼՂ հակամարտության կարգավորման գործընթացում․ Թուրքիա |azatutyun.am|

azatutyun.am: Թուրքիան անպայման պետք է ներկա լինի ղարաբաղյան հակամարտության կարգավորման գործընթացում, նման կարծիք է հայտնել Ադրբեջանի նախագահ Իլհամ Ալիևը թուրքական TRT Haber հեռուստաընկերության հետ զրույցում: «Թուրքիան ուժեղ պետություն է, մեծ պոտենցիալով, մեր հարևանը, Հայաստանի հարևանը, Հարավային Կովկասի հարևանը։ Այդ իսկ պատճառով, բնականաբար, Թուրքիան պետք է ակտիվ լինի այդ գործերում։ Հետագա խաղաղ գործընթացում Թուրքիան անպայման պետք է ներկա լինի»,- ասել է Ալիևը՝ հավելելով, որ խաղաղ գործընթաց կսկսի. - «Եվ որքան շուտ, այնքան լավ, պատերազմը չի կարող հարատև լինել»,- նաև հայտարարել է Ադրբեջանի առաջնորդը: Միջազգային կառույցներն ու խնդրի կարգավորմամբ զբաղվող երկրները հրադադարի կնքման օրվանից մինչ օրս պնդում են, որ որպես ղարաբաղյան հակամարտության կարգավորման միջնորդ միակ և ընդունելի ձևաչափը ԵԱՀԿ Մինսկի խումբն է:
18:37 - 05 հոկտեմբերի, 2020
Եթե միջազգային հանրությունը ճշգրիտ չգնահատի իրավիճակը՝ ուրեմն Եվրոպան պետք է Թուրքիային սպասի Վիեննայի մերձակայքում. վարչապետի հարցազրույցը «Բիլդ»-ին

Եթե միջազգային հանրությունը ճշգրիտ չգնահատի իրավիճակը՝ ուրեմն Եվրոպան պետք է Թուրքիային սպասի Վիեննայի մերձակայքում. վարչապետի հարցազրույցը «Բիլդ»-ին

Վարչապետ Նիկոլ Փաշինյանը հարցազրույց է տվել գերմանական առաջատար «ԲԻԼԴ» պարբերականին, որում անդրադարձել է ղարաբաղա-ադրբեջանական սահմանագոտում իրավիճակին և Ադրբեջանի սանձազերծած ռազմական գործողություններին։ Հարցազրույցի մասին հոդվածը ներկայացվում է ստորև. «Վարչապետը լարված տեսք ունի, երբ շաբաթ երեկոյան ընդունում է «ԲԻԼԴ»-ին Հայաստանի մայրաքաղաք Երևանում՝ իր նստավայրում։  Նիկոլ Փաշինյանը գրեթե չի քնում, պարբերաբար նոր սարսափելի տեղեկատվություն է ստացվում տուժածների, հերթական էսկալացիայի մասին։  Զոհերի թիվը հստակ չէ, անկախ տեղեկատվություն չկա: Բայց ակնհայտ է երևում, որ կորուստները շատ ավելին են, քան նախորդ էսկալացիաների դեպքում։  Մեկ շաբաթ է՝ մոլեգնում է պատերազմը Լեռնային Ղարաբաղի տարածաշրջանի շուրջ, որի համար արդեն տասնամյակներ շարունակ վեճեր և բախումներ են տեղի ունենում։ 1992 թվականից ի վեր ՄԱԿ-ը և ԵԱՀԿ-ն փորձում են միջնորդել. այժմ իրավիճակն ամբողջովին սրվել է, քանի որ Ադրբեջանը՝ Թուրքիայի նախագահ Էրդողանի աջակցությամբ ցանկանում է վերցնել տարածքը։  «Հենց նոր տիկին կանցլերի հետ հեռախոսազրույց ունեցա», – ներս մտնելիս ասում է Փաշինյանը։ Հայաստանը Եվրոպայից ակնկալում է ավելի շատ աջակցություն, ավելի հստակ հայտարարություններ։  «ԲԻԼԴ»-ը հարցնում է վարչապետին – Պարոն վարչապետ, Հայաստանի մասին խոսելու փոխարեն աշխարհը խոսում է Դոնալդ Թրամփի և կորոնավիրուսով նրա վարակվածության մասին։ Դա Ձեզ տխրեցնո՞ւմ է։ Վարչապետ Նիկոլ Փաշինյան – Ես կարծում եմ, որ մեր տարածաշրջանում տեղի ունեցող իրադարձությունները բավարար չափով ուշադրության արժանանում են միջազգային հանրության կողմից։ Գուցե նաև այն պատճառով, որ ղարաբաղյան հակամարտության գոտում են հայտնվել վարձկաններ և ահաբեկիչներ Սիրիայից։ «Բիլդ» պարբերական – Որտեղի՞ց գիտեք այդ մասին։ Վարչապետ Նիկոլ Փաշինյան – Նրանք հավաքագրվել և տեղափոխվել են Թուրքիայի կողմից՝ Ադրբեջանի օգտին Լեռնային Ղարաբաղի և Հայաստանի դեմ պատերազմելու նպատակով: Ես կարծում եմ, որ հիմա այլևս այս իրավիճակը միայն տեղային անվտանգային հարց չէ և գլոբալ օրակարգի անբաժանելի մասն է։ Որովհետև, ըստ էության, այն, ինչ տեղի է ունենում, միջազգային առումով 3 պատճառով է շատ կարևոր. Առաջինը, որովհետև արդեն ասացի, որ Սիրիայից ահաբեկիչներ են Թուրքիայի կողմից հավաքագրվել և տեղափոխվել՝ Լեռնային Ղարաբաղի և Հայաստանի դեմ կռվելու: Երկրորդը՝ Թուրքիայի զորքերը ներգրավված են այս գործընթացի մեջ, և դա Թուրքիայի կայսերական քաղաքականության արտահայտությունն է։ Դրանք թուրքական կայսրությունը վերականգնելու գործողություններ են, որոնք մտնում են մի շարքի մեջ Միջերկրական ծովում, Մերձավոր Արևելքում, Լիբիայում Թուրքիայի ծավալած գործողությունների հետ: Եվ երրորդը՝ կարծում եմ, որ Թուրքիան 100 տարի անց վերադարձել է Հարավային Կովկասի տարածաշրջան՝ հայերի ցեղասպանությունը շարունակելու համար, որը տեղի է ունեցել 1915 թվականին Օսմանյան Թուրքիայում:  «ԲԻԼԴ» պարբերական –Դուք հեռախոսազրույց եք ունեցել Թրամփի վարչակազմի ներկայացուցչի հետ՝ լարված իրավիճակի առնչությամբ։ Վարչապետ Նիկոլ Փաշինյան –  Ես հեռախոսային խոսակցություն եմ ունեցել նախագահ Թրամփի ազգային անվտանգության հարցերով խորհրդական պարոն Օբրայենի հետ։ Եվ այդ օրը երեկոյան էր, որ լսեցինք պարոն Թրամփի՝ կորոնավիրուսով վարակվելու մասին լուրը։ Բայց ամեն դեպքում մենք կապի մեջ ենք ամերիկյան գործընկերների հետ, որովհետև Միացյալ Նահանգները ԵԱՀԿ Մինսկի խմբի համանախագահող երկիր է, որն զբաղվում է Ղարաբաղի հարցի կարգավորմամբ: «ԲԻԼԴ» պարբերական – Միջազգային վերաբերմունքը հետևյալն է. «Ըստ միջազգային իրավունքի՝ Լեռնային Ղարաբաղը պատկանում է Ադրբեջանին, նաև ըստ ՄԱԿ-ի»… Վարչապետ Նիկոլ Փաշինյան – Գիտեք, իրականում դա տարօրինակ հայտարարություն է։ Եթե նայենք պատմությունը, կտեսնենք, որ Խորհրդային Միության ձևավորման ժամանակաշրջանում է, որ Լեռնային Ղարաբաղի ինքնավար մարզը հայտնվել է Խորհրդային Ադրբեջանի կազմում, և ընդ որում՝ Ստալինի կողմից կայացված կամայական որոշման հետևանքով, Խորհրդային Միության ձևավորման փուլում: Իսկ եթե վերադառնանք Խորհրդային Միության փլուզման փուլին, կտեսնենք, որ այնպես, ինչպես Ադրբեջանը, լինելով Խորհրդային Միության մաս, անկախություն է ստացել Խորհրդային Միությունից, այնպես էլ Լեռնային Ղարաբաղի ինքնավար մարզը, կրկին լինելով Խորհրդային Միության մաս, անկախություն է ստացել Ադրբեջանից՝ ընդ որում, օգտվելով Խորհրդային Միության օրենքներով և Սահմանադրությամբ առկա իրավունքից: Եվ, հետևաբար, ինչո՞ւ, օրինակ, Ադրբեջանը կարող էր Խորհրդային Միությունից անկախ դառնալ, իսկ Լեռնային Ղարաբաղի ինքնավար մարզը չէր կարող Խորհրդային Միությունից անկախ դառնալ: Շատերը կարող են ասել՝ բայց չէ՞ որ Խորհրդային Միությունն այլևս գոյություն չունի կամ գոյություն չուներ։ Միևնույն ժամանակ գոյություն չուներ նաև Խորհրդային Ադրբեջանը, երբ Լեռնային Ղարաբաղի ինքնավար մարզն անկախություն էր ստանում: Եվ, հետևաբար, եթե Լեռնային Ղարաբաղը պատկանում է Ադրբեջանին, ուրեմն Ադրբեջանն էլ պատկանում է Խորհրդային Միությանը: «ԲԻԼԴ» պարբերական – Ինչո՞ւ է Էրդողանն աջակցում Ադրբեջանին։ Վարչապետ Նիկոլ Փաշինյան – Ես արդեն ասացի, որ դա Թուրքիայի և Էրդողանի կայսերապաշտական քաղաքականության հետևանք է։ Եվ կարծում եմ, որ մեծ հավանականությամբ խնդիր է դրված, որպեսզի Ադրբեջան անկախ պետությունը գոյություն չունենա, և այն ամբողջապես կլանվի Թուրքիայի կողմից։ Այդպիսով նաև, երբ ես խոսում եմ հայերի նկատմամբ ցեղասպանության քաղաքականության մասին, ցանկանում եմ ընդգծել, որ դա ընդամենը միայն պատմական ատելության արտահայտություն չէ հայերի նկատմամբ: Խնդիրն  այն է, որ Հարավային Կովկասի հայերը վերջին խոչընդոտն են Թուրքիայի ճանապարհին դեպի հյուսիս, դեպի հարավ-արևելք և դեպի արևելք ծավալվելու համար։ Որովհետև Թուրքիայի կայսերապաշտական քաղաքականությունը շատ ավելի հեռուն է գնում, քան Հարավային Կովկասը: Եկեք տեսնենք Թուրքիայի գործունեությունը Միջերկրական ծովում, Լիբիայում, Մերձավոր Արևելքում, Իրաքում, Սիրիայում։ Եվ ես ցանկանում եմ ընդգծել, որ, իմ կարծիքով, Լեռնային Ղարաբաղը և Հայաստանն այսօր գտնվում են քաղաքակրթական առաջնագծում: Եվ եթե միջազգային հանրությունն այս փաստը պատշաճ արձագանքի չարժանացնի, ուրեմն անհրաժեշտ է Թուրքիային սպասել Վիեննայի մոտակայքում: «ԲԻԼԴ» պարբերական – Արդյոք Գերմանիան իրեն հեռո՞ւ է պահում, զսպվածություն է դրսևորո՞ւմ՝ զգուշանալով Էրդողանի արձագանքից։  Վարչապետ Նիկոլ Փաշինյան – Գիտեք, իմ խնդիրը չէ՝ մեկնաբանել Գերմանիայի քաղաքական գործիչների դիրքորոշումները: Ես պարզապես, օգտվելով այս առիթից, ցանկանում եմ ներկայացնել այն անհրաժեշտ տեղեկատվությունը, որ գուցե նաև Գերմանիայի քաղաքական գործիչներին անհրաժեշտ է պատշաճ արձագանքել: «ԲԻԼԴ» պարբերական – Ի՞նչ պետք է անի Գերմանիան։ Վարչապետ Նիկոլ Փաշինյան – Ես կարծում եմ, որ եվրոպական երկրները պետք է հստակ դատապարտեն բռնությունը, բռնությունների մեկնարկը և Ադրբեջանի, Թուրքիայի և ահաբեկիչների համատեղ հարձակումը Լեռնային Ղարաբաղի և Հայաստանի վրա: «ԲԻԼԴ» պարբերական – Կարո՞ղ է կանցլեր Մերկելն աջակցել։ Վարչապետ Նիկոլ Փաշինյան – Կարծում եմ, որ նման լիդերների ձայնը՝ ճշմարտությունից բխող, կարող է մեծ ազդեցություն ունենալ իրականության վրա: Գիտեք, ես կարող եմ ասել, որ Ֆրանսիայի նախագահ Էմանուել Մակրոնը  շատ հստակ արձանագրել է, որ Ադրբեջանն է եղել հարձակման հեղինակը։ Նա շատ հստակ արձանագրել է, որ Թուրքիան է քաջալերել Ադրբեջանի հարձակումն ընդդեմ Լեռնային Ղարաբաղի և Հայաստանի։ Նա շատ հստակ արձանագրել է, որ կան Սիրիայից վարձված վարձկաններ, որոնք Թուրքիայի կողմից տեղափոխվել են հակամարտության գոտի՝ Լեռնային Ղարաբաղի և Հայաստանի դեմ պատերազմելու: Ըստ էության, նույն բանը շատ հստակ՝ վարձկանների և նաև Թուրքիայի գործունեության մասով արձանագրել է Ռուսաստանը, թեկուզ ոչ այդպես շատ ուղիղ և միանշանակ։ Եվ, ըստ էության, վարձկանների մասով արձանագրում արել է նաև Իրանի Իսլամական Հանրապետությունը: Սա շատ կարևոր է: «ԲԻԼԴ» պարբերական – Գերմանիայում քննադատաբար են մոտենում նրան, որ Ռուսաստանը ձեր դաշնակիցն է, և Պուտինը պատերազմ է մղում Սիրիայում և Ուկրաինայում։ Վարչապետ Նիկոլ Փաշինյան – Գիտեք, ես Ձեր հարցի գնահատականները կթողնեմ առանց մեկնաբանության, որովհետև ամենատարբեր իրադարձությունները տարբեր կողմերից, տարբեր երկրներից և տարբեր տեսանկյուններից տարբեր կերպ են երևում: «ԲԻԼԴ» պարբերական – Հնարավո՞ր է՝ ռուսական բանակն օգնի ձեզ։ Վարչապետ Նիկոլ Փաշինյան – Հայաստանում ներկա է ռուսական 102-րդ ռազմաբազան, և մենք ունենք հակաօդային պաշտպանության համատեղ համակարգ, որի շուրջ պայմանագիրը հստակ ձևակերպում է, թե որ դեպքերում կարող է այդ զինուժն օգտագործվել նաև Հայաստանի անվտանգությունն ապահովելու համար: «ԲԻԼԴ» պարբերական – Ո՞ր դեպքում դա կարող է տեղի ունենալ։  Վարչապետ Նիկոլ Փաշինյան – Դա պայմանագրով նախատեսված կոնկրետ դեպքեր են, և համոզված եմ, որ եթե այդ դեպքերը վրա հասնեն, Ռուսաստանն իր պայմանագրային պարտավորությունները կկատարի: «ԲԻԼԴ» պարբերական – Հնարավո՞ր համարում եք Էրդողանի հետ խաղաղ բանակցությունները։ Վարչապետ Նիկոլ Փաշինյան – Ես տեղի ունեցածը համարում եմ ահաբեկչական հարձակում։ Եվ երբ տեղի է ունենում ահաբեկչական հարձակում, բնականաբար, ցանկացած երկրի համար առաջինը սեփական անվտանգությունը պաշտպանելուն ուղղված գործողություններ կատարելն է։ Մենք հիմա զբաղված ենք դրանով: «ԲԻԼԴ» պարբերական – Դուք հնարավորություն ունե՞ք դիմակայելու ընդդեմ բարձր տեխնոլոգիական զենքերի, որոնք կիրառում է Ադրբեջանը։ Վարչապետ Նիկոլ Փաշինյան – Կարծում եմ՝ Հայաստանը և հայ ժողովուրդն իրենց պաշտպանելու վճռականություն ունեն։ Մենք նույնպես ունենք սեփական արտադրության բարձր տեխնոլոգիական ապրանքներ, որոնք գուցե այդքան արտադրական հզորություններ չունեն։ Բայց մենք մտադրված ենք մեզ պաշտպանելու համար նաև զարգացնել տեխնոլոգիաները: «ԲԻԼԴ» պարբերական – Ի՞նչ կարող է հիմա անել Գերմանիան։ Վարչապետ Նիկոլ Փաշինյան – Գիտեք՝ ես արդեն ասզցի, որ հստակ դիրքորոշումներ եմ ակնկալում։ Եվ ասացի, որ եթե միջազգային հանրությունը ճշգրիտ չգնահատի այս իրավիճակի աշխարհաքաղաքական նշանակությունը, ուրեմն Եվրոպան պետք է Թուրքիային սպասի Վիեննայի մերձակայքում: «ԲԻԼԴ» պարբերական – Այսինքն՝ գերմանական կառավարությունը, ինչպես և Էմանուել Մակրոնը, պետք է հստակ արձանագրի՞, թե ով է սկսել այս պատերազմը։ Վարչապետ Նիկոլ Փաշինյան – Այո՛։ Եվ պետք է գնահատական տա տարածաշրջանում և հակամարտության մեջ ահաբեկիչների և վարձկանների ներգրավմանը Թուրքիայի կողմից, որոնք վարձվել են Սիրիայում: «Բիլդ» պարբերական – Շնորհակալություն, պարոն վարչապետ:
19:18 - 04 հոկտեմբերի, 2020
Հայաստանի հետ խնդիրը պետք է լուծվի երկխոսության միջոցով, բայց դրա համար պետք է հիմք լինի․ Իլհամ Ալիև |civilnet.am|

Հայաստանի հետ խնդիրը պետք է լուծվի երկխոսության միջոցով, բայց դրա համար պետք է հիմք լինի․ Իլհամ Ալիև |civilnet.am|

civilnet.am: Ադրբեջանի նախագահ Իլհամ Ալիևը «Ալ Արաբիա» հեռուստաընկերության հետ զրույցում հայտարարել է, թե Հայաստանի հետ հակամարտության լուծումը պետք է ընթանա երկխոսության միջոցով, սակայն պետք է բանակցությունների հիմք լինի: «Մենք համաձայն ենք այդ տեսակետի հետ, որ Հայաստանի հետ խնդիրը պետք է լուծվի երկխոսության միջոցով, բայց դրա համար պետք է հիմք լինի։ Հայաստանի վարչապետը պետք է հայտարարի, որ հավատարիմ է նախկին պայմանավորվածություններին, որոնց համաձայն Լեռնային Ղարաբաղի տարածքները ճանաչվել են ադրբեջանական օկուպացված տարածքներ», - ասել Է նա արաբական «Ալ Արաբիա» հեռուստաալիքին տված հարցազրույցում: Նա նշել է, որ Բաքվի ռազմական գործողությունները դադարեցնելու համար անհրաժեշտ է, որ Հայաստանի վարչապետը ներողություն խնդրի, որը «ադրբեջանական օկուպացված հողերը անվանել է Հայաստան»:
19:02 - 04 հոկտեմբերի, 2020
Մինսկի խումբը պետք է շարունակի աշխատանքը՝ պահպանելով չեզոքությունը. Ալիև |civilnet.am|

Մինսկի խումբը պետք է շարունակի աշխատանքը՝ պահպանելով չեզոքությունը. Ալիև |civilnet.am|

civilnet.am: Ադրբեջանի նախագահ Իլհամ Ալիևը Ալ Ջազիրայի հետ հարցազրույցում հայտարարել է, որ Ադրբեջանը կտրականապես դեմ է, որ ղարաբաղյան ճգնաժամը վերաճի տարածաշրջանային հակամարտության։ «ԵԱՀԿ Մինսկի խմբի համանախագահների «եռյակի» ձևաչափը պետք է պահպանվի, բայց դրա մեջ մտնող երկրների չեզոքության պահպանման պայմանով»,- ասել է նա։ «Մենք կարծում ենք, որ երեք երկրները (Ռուսաստան, ԱՄՆ և Ֆրանսիա) պետք է շարունակեն աշխատել միասին, եթե նրանք բոլորը պահպանեն չեզոքությունը։ Դա կարևոր է»,- ասել է Ադրբեջանի նախագահը հարցազրույցում, որի տեքստը հրապարակվել է նրա պաշտոնական կայքում։ Ալիևը նշել է, որ ադրբեջանական կողմի մոտ անհանգստություն են առաջացնում վերջին օրերին արված հայտարարությունները, որոնք «չեզոք դիրքորոշման մեջ որոշակի փոփոխություններ են ցուցադրում»: «Յուրաքանչյուր երկիր կարող է ունենալ իր դիրքորոշումը, դա նորմալ է։ Բայց եթե դուք միջնորդ եք նման զգայուն հարցում, ապա պետք է հանդես գաք նման [չեզոք] դիրքորոշմամբ։ Եթե դուք ուզում եք հանդես գալ ձեր ազգային դիրքորոշմամբ, ապա պետք է դուրս գաք Մինսկի խմբի համանախագահությունից։ Եթե դուք միջնորդ եք, ապա պետք է չեզոք լինեք»,- կարծում է Ալիևը։ «Մենք կտրականապես դեմ ենք, որ այդ [ղարաբաղյան] հակամարտությունը վերաճի տարածաշրջանային հակամարտության»,- ասել է Ալիևը: Նա վստահություն է հայտնել, որ տարածաշրջանի երկրները՝ Թուրքիան, Ռուսաստանն ու Իրանը, «երբեք թույլ չեն տա դա»: «Որովհետև մեր տարածաշրջանում անվտանգությունը ծառայում է բոլոր երկրների շահերին», - ասել Է Ալիևը:
13:04 - 03 հոկտեմբերի, 2020
Ռուսաստանն օբյեկտիվորեն ավելի մեծ դեր ունի ղարաբաղյան հակամարտության կարգավորման գործընթացում. Ալիև |civilnet.am|

Ռուսաստանն օբյեկտիվորեն ավելի մեծ դեր ունի ղարաբաղյան հակամարտության կարգավորման գործընթացում. Ալիև |civilnet.am|

civilnet.am: Ադրբեջանի նախագահ Իլհամ Ալիևը կարծում է, որ Ռուսաստանն օբյեկտիվորեն ավելի մեծ դեր ունի ղարաբաղյան հակամարտության կարգավորման գործընթացում, քան մյուս միջնորդները։ Այս մասին հայտարարել է Ադրբեջանի նախագահ Իլհամ Ալիևը Ալ-Ջազիրայի հետ հարցազրույցում։ «Ռուսաստանը Միացյալ Նահանգների և Ֆրանսիայի հետ միջնորդ երկրներից մեկն է։ < ... > Գործընթացում կա բավականին բարձր մակարդակի համակարգում։ Իհարկե, Ռուսաստանն ունի հատուկ դիրք, քանի որ նա Ադրբեջանի հարևան երկիրն է տարածաշրջանում, նա չունի պետական սահման Հայաստանի հետ։ Ռուսաստանը մի երկիր է, որը պատմական լավ հարաբերություններ ունի Ադրբեջանի և Հայաստանի հետ։ Դրա համար էլ միջնորդության համար նրանց (ռուսական կողմի) դերն ու հնարավորություններն օբյեկտիվ պատճառներով, իհարկե, ավելի բարձր են, քան նրանցը, ովքեր հեռու են տարածաշրջանից եւ, հնարավոր է, լիարժեք պատկերացում չունեն այն մասին, թե ինչ է կատարվում այստեղ վերջին տասնամյակում»,- ասել է Ալիևը Ալ Ջազիրայի հետ հարցազրույցում, որը հրապարակվել է շաբաթ օրը:
11:55 - 03 հոկտեմբերի, 2020
Ղարաբաղի շուրջ երկխոսության կոչերն անիմաստ են. Ալիև |civilnet.am|

Ղարաբաղի շուրջ երկխոսության կոչերն անիմաստ են. Ալիև |civilnet.am|

civilnet.am: Ադրբեջանի նախագահ Իլհամ Ալիևը հայտարարել է, որ Ղարաբաղի շուրջ բանակցությունները արդյունք չեն տվել, այժմ երկխոսության կոչերն անիմաստ են: Չորեքշաբթի նա հանդիպել է Ղարաբաղում մարտական գործողությունների ժամանակ վիրավորված զինծառայողների հետ Բաքվի կենտրոնական կլինիկական հոսպիտալում, հաղորդում է ՌԻԱ Նովոստին։ «Մենք հույս ունեինք (բանակցային գործընթացից)։ Մեզ այդ հույսը տվել էին, մեզ ազդաշաններ էին ուղարկել, թե՝ համբերեք, հարցը կլուծվի։ Բայց ես ասել եմ, որ Ադրբեջանի ժողովուրդը չի համակերպվի օկուպացիայի հետ։ Չէ՞ որ ես ասել եմ, որ բանակցություններում հաջողության բացակայության դեպքում Ադրբեջանն իրավունք ունի հարցը լուծել ռազմական ճանապարհով։ Այդ իրավունքը մեզ տվել են ադրբեջանցի ժողովուրդը և միջազգային իրավունքի նորմերը»,- ասել է Ալիևը: Ալիևն ասել է, թե Ղարաբաղում ռազմական գործողությունները կդադարեցվեն, «երբ Երևանն իր զորքերը հանի այնտեղից»։
18:03 - 30 սեպտեմբերի, 2020
Իրականում ոչ թե ես եմ Ադրբեջանի նախագահին խնդրանքով դիմել, այլ ինքը՝ ինձ․ Փաշինյանը մանրամասնում է, թե Ալիեւն ինչ է խնդրել Դուշանբեում

Իրականում ոչ թե ես եմ Ադրբեջանի նախագահին խնդրանքով դիմել, այլ ինքը՝ ինձ․ Փաշինյանը մանրամասնում է, թե Ալիեւն ինչ է խնդրել Դուշանբեում

Իրականում ոչ թե ես եմ Ադրբեջանի նախագահին խնդրանքով դիմել, այլ Ադրբեջանի նախագահն է ինձ դիմել խնդրանքով։ Այս մասին լրագրող Պետրոս Ղազարյանի հետ զրույցում հայտարարել է ՀՀ վարչապետ Նիկոլ Փաշինյանը՝ մանրամասնելով, թե Իլհամ Ալիեւն ինչ է խնդրել իրենից։ Մինչ երկու տարի առաջ Դուշանբեում Ալիեւի հետ ունեցած հանդիպման ընթացքում ձեռք բերված պայմանավորվածություններին անդրադառնալը՝ Փաշինյանը նախ եւս մեկ անգամ վերահաստատեց, որ Արցախի հարցի վերաբերյալ բանակցություններ վարելու լիազորություն այսօրվա կառավարությունում հեղափոխությունից հետո ունեցել է երկու անձ՝ մեկը՝ Արտաքին գործերի նախարարը, մյուսը՝ ինքը․ «Որեւէ երրորդ անձ որեւէ բանակցություն վարելու, քննարկում վարելու լիազորություն չի ունեցել, եւ դա կատարյալ անհեթեթություն է։ Ընդգծեմ, որ եւս մի պաշտոնյա՝ Ազգային անվտանգության ծառայության տնօրենը, որոշակի դերակատարում է ունեցել ձեզ հայտնի օպերատիվ կապի ապահովման գործում՝ իմ եւ Ադրբեջանի նախագահի միջեւ։ Բայց դա եղել է որոշակի սպասարկող գործառույթ, այսինքն՝ նա լիազորություն չի ունեցել Ղարաբաղի հարցի վերաբերյալ բանակցելու»։ Փաշինյանը հիշեցրեց, որ ինքն իր անունից խոսել է կոնֆիդենցիալ տեղեկության մասին՝ ելնելով կոռեկտությունից ելնելով, բայց, հաշվի առնելով Ադրբեջանի նախագահի անհասկանալի պահվածքը, այսօր կարծում է՝ այդ մասին խոսելու ճիշտ ժամանակն է։ Վարչապետը նկատեց՝ Ալիեւն ասում է, թե ինքը Դուշանբեում եւ, ընդհանրապես, 2018 թվականի հեղափոխությունից հետո ժամանակ է խնդրել։ Փաշինյանը նկատեց՝ պարզ է, որ Հայաստանը շահագրգիռ է, որ հրադարարի ռեժիմը պահպանվի, ապա հարց հնչեցրեց՝ բա Ադրբեջանը եւ Ադրբեջանի նախագահը ինչո՞ւ էին շահագրգիռ, որ այդ պայմանավորվածությունը տեղի ունենա․ «Իրականում ոչ թե ես եմ Ադրբեջանի նախագահին խնդրանքով դիմել, այլ Ադրբեջանի նախագահն է ինձ դիմել խնդրանքով, եւ այդ խնդրանքի իմաստը եղել է հետեւյալը․ եթե հիշում եք՝ այդ ժամանակաշրջանում Երեւանի քաղաքապետի ընտրություններն էին, եւ գործնականում ամեն օր մենք հանրահավաքներ էինք ունենում։ Այնպես ստացվեց, որ մի շարք հանգամանքների բերումով դրանից առաջ էլ ես մի շարք ելույթներով անդրադառնում էի Ադրբեջանում տիրող իրավիճակին եւ փորձում էի, այսպես ասած, խոսակցություն ծավալել Ադրբեջանի ժողովրդի հետ եւ որոշակի քննադատական խոսքեր էի հնչեցնում Ադրբեջանում տիրող իրավիճակի վերաբերյալ։ Եւ Իլհամ Ալիեւի շահագրգռությունը, որ էնտեղ ինչ-որ համաձայնություն տեղի ունենա, մի բանի վերաբերյալ էր, որ ինքն ինձ խնդրի, որպեսզի ես Ադրբեջանի վերաբերյալ այդ ելույթներից ձեռնպահ մնամ»,- մանրամասնեց Փաշինյանն ու հարց հնչեցրեց՝ ինչո՞ւ, շատ պարզ պատճառով։ Վարչապետի խոսքով այդ շրջանում՝ Հայաստանում տեղի ունեցած հեղափոխությունից հետո, աշխարհը եւ տարածաշրջանի ընդդիմադիր ուժերը ոգեւորված էին, Ադրբեջանի սոցիալական ցանցերում քննարկվում էր, որ այս ալիքը շուտով կհասնի Ադրբեջան, եւ Ադրբեջանի ռազմաքաղաքական ղեկավարությունը մտավախություն ուներ, որ այդ ելույթներն իսկապես կարող են որոշակի քաղաքական պրոցեսներ հրահրել Ադրբեջանում․ «Ալիեւն անձամբ է խնդրել, եւ Դուշանբեի համաձայնությունների կետերը ես ինքս եմ ձեռագրով գրել բլոկնոտի վրա, եւ մենք այդ կետերը քննարկել ենք ու արձանագրել, որ եկանք համաձայնության։ Ես գոհ եմ, որ էդպիսի համաձայնություն է ձեռք բերվել, որովհետեւ նախ Ադրբեջանի ներքին հարցերն ամենեւին էլ իմ օրակարգի հարցերը չեն, եւ երկրորդը՝ դրա արդյունքում հայ զինվորների կյանքեր են խնայվել, եւ ես դրա համար գոհ եմ»։ Բայց այստեղ, Փաշինյանի համոզմամբ, ամբողջ կոնտեքստն այն բանի մեջ է, որ այսօր Ադրբեջանի նախագահն ասում է՝ ինքն այն ժամանակ չօգտվեց առիթից, մեծահոգաբար հնարավորություն տվեց Հայաստանին, որպեսզի հետհեղափոխական իշխանությունը կայանա։ Իրականում, ՀՀ վարչապետի վստահեցմամբ, հակառակն է։ Այդ ժամանակ Ալիեւի իշխանությունը ոչ Ղարաբաղի հարցով էր մտահոգված, ոչ էլ ուրիշ բաներով, նա մտահոգված էր մի բանով, որ հեղափոխական ալիքն Ադրբեջան չհասնի․ «Ե՛ւ այս փաստը, ե՛ւ հետագա փաստերն ի վերջո գալիս են ի ցույց դնելու, որ Ղարաբաղի հարցն Ադրբեջանի ռազմաքաղաքական ղեկավարության համար ոչ թե Ադրբեջանի ազգային շահերի հարց է, այլ ընդամենը սեփական իշխանությունը եւ բռնատիարական համակարգը պահպանելու միջոց, եւ մենք այսօր էլ ենք այդ իրավիճակը տեսնում»,- եզրափակեց ՀՀ վարչապետ Նիկոլ Փաշինյանը։
15:00 - 28 սեպտեմբերի, 2020
Իլհամ Ալիևի իշխանությունը մշտապես հիմնված է եղել սեփական հասարակությունում հայ ժողովրդի՝ որպես «հարմար թշնամի» կերպարի արմատավորման վրա. ՀՀ ԱԳՆ խոսնակ

Իլհամ Ալիևի իշխանությունը մշտապես հիմնված է եղել սեփական հասարակությունում հայ ժողովրդի՝ որպես «հարմար թշնամի» կերպարի արմատավորման վրա. ՀՀ ԱԳՆ խոսնակ

ՀՀ ԱԳՆ մամուլի խոսնակի մեկնաբանությունը Ադրբեջանի նախագահի՝ ՄԱԿ Գլխավոր ասամբլեայի նստաշրջանին ունեցած ելույթի վերաբերյալ․ «Տարածաշրջանի ժողովուրդները ժառանգել են բարդ հակամարտություն, որի վերջնական հանգուցալուծումը ենթադրում է այնպիսի տարբերակի համաձայնեցում, որն ընդունելի կլինի Հայաստանի ժողովրդի, Արցախի ժողովրդի և Ադրբեջանի ժողովրդի համար: Միայն այդ ժողովուրդների մանդատը վայելող իշխանություններն են ունակ արտահայտելու փոխզիջման հասնելու և խաղաղություն հաստատելու քաղաքական կամքը: Հայաստանում և Արցախում ձևավորվել են իշխանություններ, որոնք ստացել են ժողովրդական քվե և պատրաստ են երկխոսության մեջ մտնել Ադրբեջանի ժողովրդի մանդատը վայելող իշխանությունների հետ: Իշխանությունը հորից ժառանգած և մեկ ընտանիքի շրջանակներում այն կիսող Իլհամ Ալիևն այդպիսի առաջնորդ չէ: Նրա իշխանությունը մշտապես հիմնված է եղել հակամարտության շահարկման, սեփական հասարակությունում Հայաստանի և հայ ժողովրդի՝ որպես «հարմար թշնամի» կերպարի արմատավորման, այլ ոչ թե սեփական հասարակության կարիքների լուծման վրա: Իլհամ Ալիևի օրոք է Ադրբեջանը բաց թողել «նավթային բում»-ի միջոցով ժամանակակից երկիր և հասարակություն կառուցելու պատմական շանսը: Այսօր Ադրբեջանի իշխանությունն աշխարհում հանդես է գալիս որպես ավտորիտար և ռեպրեսիվ ռեժիմ, որն օգտագործում է բոլոր հնարավորությունները, այդ թվում՝ կորոնավիրուսային համավարակը, սեփական ժողովրդին հարստահարելու և լռեցնելու համար: Տարածաշրջանում գործ ունենք իշխանական մի համակարգի հետ, որտեղ արժեքները փոխարինված են անձի, դինաստիայի և սեփական հարստության պաշտամունքով, իսկ շահերը ենթադրում են ժառանգականության վրա հիմնված իշխանության պահպանումն ամեն գնով: Ցավալի է, որ այդ «ամեն գինը» վճարել և վճարում է ձայնից զրկված Ադրբեջանի ժողովուրդը»:
16:48 - 25 սեպտեմբերի, 2020
Ալիևի կեղծ հայտարարությունները՝ ՄԱԿ-ի Գլխավոր ասամբլեայի նստաշրջանում |fip.am|

Ալիևի կեղծ հայտարարությունները՝ ՄԱԿ-ի Գլխավոր ասամբլեայի նստաշրջանում |fip.am|

fip.am: Ադրբեջանի նախագահ Իլհամ Ալիևը Միավորված ազգերի կազմակերպության (ՄԱԿ) հիմնադրման 75-ամյակի առթիվ ՄԱԿ-ի Գլխավոր ասամբլեայի նստաշրջանի ժամանակ ունեցած հեռավար ելույթում մի շարք մանիպուլյատիվ և սխալ հայտարարություններ է արել Հայաստանի և Արցախյան հակամարտության վերաբերյալ։ Սակայն մինչ Ալիևի հայտարարություններին անդրադառնալը, հարկ է նշել, որ դրանցից որոշներն ադրբեջանական իշխանությունների կողմից շահարկվում են պարբերաբար և կրում են այն հիմնական թեզերը, որոնց լույսի տակ է փորձում պաշտոնական Բաքուն միջազգային հանրությանը ներկայացնել Արցախյան հակամարտությունը։ Այդպիսի թեզերից են 1993 թվականին՝ Ղարաբաղում ակտիվ ռազմական գործողությունների ժամանակ ՄԱԿ-ի Անվտանգության խորհրդի ընդունած չորս բանաձևերը, որոնց բովանդակությունը պարբերաբար ենթարկվում է մանիպուլյացիաների։ Այս անգամ էլ Գլխավոր ասամբլեայում իր հեռավար ելույթի ժամանակ Իլհամ Ալիևը նշել է, թե Անվտանգության խորհրդի չորս բանաձևերով Հայաստանի Հանրապետությունից պահանջվում էր «ամբողջությամբ, անհապաղ և անպայման դուրս բերել Հայաստանի զինված ուժերն Ադրբեջանի օկուպացված հողերից»։ ՄԱԿ բանաձևերը Այդ չորս բանաձևերում, սակայն, խոսք չկա Հայաստանի զինված ուժերի մասին։ Ինչպես արդեն նշեցինք, ՄԱԿ-ի Անվտանգության խորհրդի բանաձևերն ընդունվել են Ղարաբաղում ակտիվ ռազմական գործողությունների փուլում՝ 1993 թվականին, և, ընդհանուր առմամբ, ուղղված են եղել հակամարտության գոտում մարտական գործողությունների դադարեցմանն ու հրադադարի հաստատմանը։ 822 բանաձևում ասվում է, որ Անվտանգության խորհուրդը մտահոգված է Ադրբեջանի Քելբաջարի շրջանի «տեղի հայկական ուժերի կողմից ներխուժմամբ»։ Բանաձևում որևէ խոսք չկա ՀՀ զինված ուժերի մասին։ Փոխարենը, «պատասխանատվությունը» դրվում է «տեղի հայկական ուժերի» վրա։ Պատկերն ավելի հստակ է դառնում մյուս բանաձևերում։ Այսպես, օրինակ, արդեն 853 բանաձևում ՄԱԿ Անվտանգության խորհուրդը «կոչ է անում Հայաստանի Հանրապետության կառավարությանը շարունակել կիրառել իր ազդեցությունը՝ Ադրբեջանի` Լեռնային Ղարաբաղի տարածաշրջանի հայերի կողմից 822 բանաձևի և սույն բանաձևի պահանջները կատարելու, և նրանց կողմից ԵԱՀԿ Մինսկի խմբի առաջարկներն ընդունելու ուղղությամբ»։ Այսինքն, այստեղ ևս Անվտանգության խորհուրդը չի խոսում ՀՀ զինված ուժերի մասին, այլ միայն արցախցիների վրա Հայաստանի կառավարության ունեցած ազդեցության մասին։ Նույն պատկերն է նաև մյուս երկու բանաձևերի դեպքում։ 874 բանաձևում խոսվում է «վերջերս օկուպացված տարածքներից զինված ուժերի դուրսբերման ու տրանսպորտի և հաղորդակցության խոչընդոտների վերացման ուղղությամբ» մասին՝ կրկին չհասցեավորելով ՀՀ-ն։ 884 բանաձևում կոչ է արվում Հայաստանի կառավարությանը «Ադրբեջանի Լեռնային Ղարաբաղի տարածաշրջանի հայերի կողմից 822, 853 և 874 (վերոնշյալ) բանաձևերի պահանջները կատարելու նպատակով գործածել իր ազդեցությունը և ապահովել, որ իրենց զինված արշավը շարունակելու համար ներգրավված ուժերին չտրամադրվեն միջոցներ»։ Գերեվարված սպան Իր հեռավար խոսքում Իլհամ Ալիևն անդրադարձել է նաև այս տարվա հուլիսին Տավուշի սահմանում տեղի ունեցած մարտական գործողություններին և օգոստոսի 22-ին գերեվարված հայ սպա Գուրգեն Ալավերդյանին։ Ըստ Ալիևի, Ալավերդյանը, իբր, եղել է դիվերսիոն խմբի հրամանատար։ «Դիվերսիոն խումբը փորձել է անցնել շփման գիծը։ 2020 թվականի օգոստոսի 23-ին այդ խմբի ղեկավարը ձերբակալվել է ադրբեջանցի զինծառայողների կողմից։ Նա խոստովանել է, որ խմբավորումը ծրագրում էր ահաբեկչական գործողություններ իրականացնել ադրբեջանցի զինվորականների և քաղաքացիական անձանց դեմ»։ Այս հայտարարության առնչությամբ նախ պետք է նշել, որ հայկական կողմը հերքել է Գուրգեն Ալավերդյանի՝ դիվերսանտ լինելու մասին ադրբեջանական կողմի հաղորդագրությունները։ Ըստ Հայաստանի Հանրապետության պաշտպանության նախարարության հայտարարության, Գուրգեն Ալավերդյանն ադրբեջանական կողմում է հայտնվել եղանակային խիստ անբարենպաստ պայմանների պատճառով շփոթվելու և մոլորվելու հետևանքով։ Արդեն մի քանի օր անց ադրբեջանցիները հրապարակել էին մի տեսանյութ, որում Գուրգեն Ալավերդյանը, իբր, խոստովանում է, որ Ադրբեջան է ներթափանցել դիվերսիոն գործողություններ իրականացնելու նպատակով։ Տեսանյութում, սակայն, միանշանակ երևում է, որ հայ սպան իր խոսքերը կարդում է տեքստից՝ աչքերը տողերի վրա անցկացնելով և առանց համապատասխան առոգանության։ Բայց նույնիսկ այդ դեպքում Ադրբեջանի նախագահի հայտարարությունը չի համապատասխանում Ալավերդյանի ընթերցած տեքստին, քանի որ վերջինս ոչ մի բառ չի ասում ահաբեկչական գործողությունների մասին։ Հայկական աշխարհազորը Իր խոսքում Ադրբեջանի նախագահը ցույց է տալիս հայաստանյան իրադարձությունների վերաբերյալ որոշակի իրազեկվածություն, օրինակ՝ որ Հայաստանում քննարկվում է աշխարհազոր ստեղծելու հարցը։ «Հայաստանի վարչապետը հայտնել է զինված աշխարհազոր ստեղծելու մասին, որը կազմված է լինելու տասնյակ հազարավոր քաղաքացիական անձանցից, որոնց ստիպելու են մասնակցել Ադրբեջանի դեմ ռազմական գործողություններին»,- ասել է Իլհամ Ալիևը։ Նախ, թերևս, պետք է սկսել նրանից, որ Հայաստանի վարչապետ Նիկոլ Փաշինյանը չի հայտնել աշխարհազոր ստեղծելու մասին։ Աշխարհազոր ստեղծելու հարցը հանրային քննարկման ներկայացնելու մասին առաջինը հայտնել է Պաշտպանության նախարարությունը։ Ներկայում հարցը գտնվում է հանրային քննարկումների փուլում։ Ինչ վերաբերում է նրան, թե «քաղաքացիական անձանց ստիպելու են մասնակցել Ադրբեջանի դեմ ռազմական գործողություններին», ապա դա ամբողջությամբ կեղծ է, և աշխարհազորին անդամակցումը լինելու է բացառապես կամավորության սկզբունքով, ինչի մասին հայտնել է նաև պաշտպանության փոխնախարար Գաբրիել Բալայանը։ Ըստ Պաշտպանության նախարարության ներկայացրած նախագծի, աշխարհազորը Հայաստանի վրա զինված հարձակման, դրա անմիջական վտանգի առկայության կամ ռազմական գործողությունների պայմաններում Հայաստանի զինված պաշտպանությանը կամավորության սկզբունքով քաղաքացիների մասնակցության համակարգ է: Այսինքն, այստեղ որևէ խոսք չկա պարտադիր կամ ստիպողական մասնակցության մասին։ Փաշինյանի յոթ պայմանները Անդրադառնալով Արցախյան հակամարտության բանակցային գործընթացին՝ Ալիևը ելույթի ժամանակ նշել է, թե Հայաստանի վարչապետ Նիկոլ Փաշինյանն անհիմն պայմաններ է ներկայացնում բանակցային գործընթացում։ «Ադրբեջանին նրա առաջ քաշած պայմանները մեր կողմից մերժվել են»,- ասել է Ալիևը։ Թե ի՞նչ պայմաններ է նկատի ունեցել Ալիևը՝ կարելի է միայն կռահել։ Միգուցե խոսքը հուլիսյան մարտերից հետո Նիկոլ Փաշինյանի ներկայացրած՝ Հայաստանի դիրքորոշման մասին է, որը նա ձևակերպել էր յոթ կետերով։ Այդ կետերը դժվար է համարել պայման բանակցային գործընթացը սկսելու, վերսկսելու կամ շարունակելու համար։ Դրանցից որոշները, օրինակ, առաջին կետը՝ «Հայաստանի և Արցախի ընդհանուր անվտանգության համակարգը պետք է առավել ամրապնդել․․․», ընդհանրապես վերաբերելի են միայն Հայաստանին կամ Արցախին և հասցեավորված չեն Ադրբեջանին կամ միջնորդներին։ Այսպիսով Իլհամ Ալիևն իր ելույթում արել է այլ մանիպուլյատիվ և իրականությանը չհամապատասխանող հայտարարություններ ևս՝ կապված, օրինակ, Հայաստանում իբր ֆաշիստական գործիչ Գարեգին Նժդեհի մեծարման, Հայաստանի ազգային անվտանգության ռազմավարությունում իբր հակաադրբեջանական հայտարարությունների և Հայաստանում Ադրբեջանի նկատմամբ ատելություն սերմանելու մասին։ Ընդհանուր առմամբ՝ Ալիևի հայտարարությունները ձևակերպումներից մեկն է ադրբեջանական պաշտոնական դիրքորոշման, որը մեծամասամբ հիմնված է ապատեղեկատվության և մանիպուլյացիայի վրա և ուղղված է միջազգային հանրությանը՝ Բաքվին շահեկան կերպով ներկայացնելու և աղավաղելու Արցախյան հակամարտության էությունը։  Վահե Ղուկասյան
17:22 - 23 սեպտեմբերի, 2020