Ալեքսեյ Նավալնի

ԱՄՆ-ն Նավալնիի թունավորմանը կարձագանքի համաչափ․ Փոմփեո |azatutyun.am|

azatutyun.am: ԱՄՆ-ի պետքարտուղար Մայք Փոմփեոն գերմանական «Բիլդ» թերթի հարցազրույցում մեկնաբանել է ԱՄՆ-ի դիրքորոշումը ռուսաստանցի ընդդիմադիր գործիչ Ալեքսեյ Նավալնիի թունավորման հետ կապված։ Նա ասել է, թե որևէ հիմքեր չկան ենթադրելու, թե ԱՄՆ-ի կողմից միջոցներ չեն ձեռնարկվի, քանի որ Վաշինգտոնը անթույլատրելի է համարում քիմիական զենքի կիրառումը։ «Միացյալ Նահանգները կարձագանքի համաչափ, երբ ամերիկյան կողմի տրամադրության տակ լինեն բոլոր փաստերը», - ասել է Փոմփեոն՝ նշելով, որ ԱՄՆ-ն սպասում է քիմիական զենքի արգելման կազմակերպության հետազոտության արդյունքներին, ինչպես նաև սպասում է, որ Ռուսաստանը հետաքննություն վարի, ինչը թույլ կտա պարզելու՝ ինչպես է տեղի ունեցել Նավալնիի թունավորումը

15:17 - 22 սեպտեմբերի, 2020

Նավալնիի թունավորումը հզոր արձագանք պետք է ստանա. ՆԱՏՕ-ի գլխավոր քարտուղար |tert.am|

tert.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ռուս ընդդիմադիր գործիչ Ալեքսեյ Նավալնիի` «Նովիչոկ» տեսակի նյութով թունավորումը պետք է արժանանա միջազգային ուժեղ արձագանքի: Այս մասին գրում է korrespondent.net կայքը:Դաշինքի ղեկավարը Ռուսաստանի Դաշնությանը կոչ է արել լիարժեք և թափանցիկ հետաքննել միջադեպը՝ այն անվանելով հարձակում ժողովրդավարական իրավունքների դեմ:«Մենք կոշտ դատապարտել ենք Ալեքսեյ Նավալնիի դեմ «Նովիչոկ»-ով կատարված հարձակումը: Ես Ռուսաստանին կոչ եմ անում այս սարսափելի հարձակման վերաբերյալ լիարժեք և թափանցիկ հետաքննություն անցկացնել: Սա պարզապես հարձակում չէ մեկ անձի, սա հարձակում է ժողովրդավարական հիմնարար իրավունքների նկատմամբ: Բացի այդ, քիմիական զենքի օգտագործումը միջազգային օրենսդրության, մասնավորապես` զենքի վերահսկողության համաձայնագրի լրջագույն խախտում է»,-նշել է Ստոլտենբերգը:

13:42 - 22 սեպտեմբերի, 2020

Նավալնին պահանջել է վերադարձնել հագուստը, որով եղել է իր թունավորման օրը |azatutyun.am|

azatutyun.am: Ալեքսեյ Նավալնին պահանջել է վերադարձնել հագուստը, որով եղել է իր թունավորման օրը, քանի որ դա ամենակարևոր ապացույցն է, իսկ նախնական քննության համար օրենքով հատկացված 30 օրը լրացել է, և քրեական գործ չի հարուցվել: «Ես պահանջում եմ, որ հագուստս զգուշորեն փաթեթավորեն պոլիէթիլենային տոպրակի մեջ և վերադարձնեն ինձ: Իսկ հետո կարող եք շարունակել քննարկել թոք շոուներում, թե ես շաքարախտի նոպա եմ ունեցել, և դա, ամենայն հավանականությամբ, իմ դեմ կազմակերպել են Հակակոռուպցիոն հիմնադրամի աշխատակիցները», - հայտարարել է ռուսաստանցի ընդդիմադիր առաջնորդը:

10:48 - 22 սեպտեմբերի, 2020

Նավալնիի թունավորման հարցով հետաքննության հնարավորությունները սահմանափակ են․ Պեսկով |azatutyun.am|

azatutyun.am: Կրեմլի խոսնակ Դմիտրի Պեսկովն ասել է, թե ջրի շիշը, որն, ըստ Գերմանիայի և արևմտյան այլ պետությունների փորձագետների պնդումների, դարձել է Ալեքսեյ Նավալնիի թունավորման պատճառը, գուցեև կարող էր համարվել իրեղեն ապացույց, սակայն Նավալնիի աջակիցներն այն դուրս են տարել Ռուսաստանից: «Այստեղ ավելի շատ հարցեր են, քան պատասխաններ, դժբախտաբար, հետաքննություն կատարելու մեր հնարավորությունները խիստ սահմանափակված են, որոշ իրեր դուրս են տարվել Ռուսաստանից, մենք չունենք ստուգումների արդյունքներին ծանոթանալու որևէ հնարավորություն, դա է՛լ ավելի է բարդացնում հետաքննությունը»,- անցած ուրբաթ օրն ասել է Պեսկովը: Նավալնիի աջակիցների փոխանցմամբ, նրանք այդ շիշը և մի շարք այլ իրեր վերցրել են Տոմսկ քաղաքի հյուրանոցից, որում թունավորման նախօրեին հանգրվանել էր ընդդիմադիր գործիչը: Գերմանացի փորձագետները պնդում են, որ շշի վրա հայտնաբերել են «Նովիչոկ» տեսակի նյարդապարալիտիկ նյութի հետքեր: Ալեքսեյ Նավալնին հիմա բուժվում է Բեռլինի «Շարիտե» հիվանդանոցում: Արևմտյան երկրների ղեկավարները Մոսկվայից պահանջում են հետաքննել Նավալնիի թունավորման հանգամանքները: Նրանք Նավալնիի հետ տեղի ունեցածը համարում են ընդդիմադիր գործչին ֆիզիկապես ոչնչացնելու փորձ:

14:20 - 21 սեպտեմբերի, 2020

Եկեք պատմեմ, թե ինչպես է ընթանում ապաքինումս․ Ալեքսեյ Նավալնու գրառումը սոցցանցերում |civilnet.am|

civilnet.am: «Եկեք պատմեմ, թե ինչպես է ընթանում ապաքինումս։ Այն թեև երկար, բայց պարզ ճանապարհ է։ Ընթացիկ բոլոր խնդիրները, ինչպես օրինակ այն, որ հեռախոսն իմ ձեռքում անօգուտ է, ինչպես քարը, իսկ ջուր լցնելը՝ մի ամբողջ արարողակարգ, անհեթեթություն է»․ Ռուս ընդդիմադիր քաղաքական գործիչ Ալեքսեյ Նավալնին գրառում է կատարել սոցիալական ցանցերում՝ պատմելով իր կազդուրման մասին։ Давайте расскажу, как идёт мое восстановление. Это уже ясная дорога, хоть и неблизкая. Все текущие проблемы вроде того,...

14:51 - 19 սեպտեմբերի, 2020

Եվրախորհրդարանն այսօր կքննարկի իրավիճակը Նավալնիի շուրջ |azatutyun.am|

azatutyun.am: Այսօր Եվրախորհրդարանը կքննարկի իրավիճակը Ռուսաստանի ընդդիմադիր առաջնորդ Ալեքսեյ Նավալնիի շուրջ, ով, ըստ գերմանական իշխանությունների, թունավորվել է արգելված «Նովիչոկ» խմբի նյարդապարալիտիկ նյութով: Ակնկալվում է, որ պատգամավորները կողմ կքվեարկեն բանաձևին, թե ինչպես պետք է Եվիամիության իշխանություններն արձագանքեն տեղի ունեցածին: Եվրախորհրդարանի կայքը տարբեր խորհրդարանական խմբերի կողմից մշակված փաստաթղթերի նախագծեր է հրապարակել, որոնցից մեկը վերաբերում է Նավալնիի գլխավորած Կոռուպցիայի դեմ պայքարի հիմնադրամի հետաքննություններում հայտնված անձանց դեմ պատժամիջոցներ սահմանելուն: Մեկ այլ նախագծով առաջարկվում է դադարեցնել Ուկրաինան շրջանցող «Հյուսիսային հոսք-2» գազատարի կառուցումը, որով ռուսական վառելիքն առաքվելու է Եվրոպա, նաև առաջարկվում է կրկին դուրս թողնել Ռուսաստանին Եվրոպայի խորհրդի Խորհրդարանական վեհաժողովից: Կրեմլի կոշտ քննադատի ինքնազգացողությունը կտրուկ վատացել էր օգոստոսի 20-ին Տոմսկ-Մոսկվա չվերթն իրականացնող օդանավում, ինքնաթիռն արտակարգ վայրէջք էր կատարել Օմսկում, և Նավալնիին տեղափոխել էին տեղի շտապ օգնության հիվանդանոց: Երկու օր անց ընտանիքի համառ պահանջով նրան տեղափոխեցին Բեռլին, որտեղ Նավալնին ապաքինվում է «Շարիտե» հիվանդանոցում:

10:19 - 17 սեպտեմբերի, 2020

Մերկելն ու Թրյուդոն քննարկել են Բելառուսում ստեղծված իրավիճակն ու Նավալնու թունավորումը |tert.am|

tert.am: Կանադայի վարչապետ Ջասթին Թրյուդոն և Գերմանիայի կանցլեր Անգելա Մերկելը հեռախոսազրույցի ժամանակ քննարկել են Բելառուսում ստեղծված հետընտրական իրավիճակն ու ռուս ընդդիմադիր գործիչ Ալեքսեյ Նավալնուն առնչվող միջադեպը։ Այս մասին հաղորդում է ТАСС-ը՝ վկայակոչելով Կանադայի կառավարության լրատվական ծառայության տարածած հաղորագրությունը: «Երկրների ղեկավարներն անդրադարձել են Ռուսաստանի հետ հարաբերությունների թեմային և կրկին դատապարտել ռուս ընդդիմադիր գործիչ Ալեքսեյ Նավալնու թունավորումը, քննարկել Բելառուսում ստեղծված իրավիճակն ու կարևորել ժողովրդավարական փոփոխությունների անհրաժեշտությունը»- ասվում է հաղորդագրության մեջ:

09:18 - 16 սեպտեմբերի, 2020

Լավրովը Գերմանիայի ԱԳ նախարարին հորդորել է հրաժարվել Նավալնու հետ կապված դեպքի քաղաքականացումից |armenpress.am|

armenpress.am: Ռուսաստանի արտաքին գործերի նախարար Սերգեյ Լավրովը և Գերմանիայի ԱԳ նախարար Հայկո Մաասը հեռախոսազրույցում քննարկել են Ալեքսեյ Նավալնիի հետ կապված իրավիճակում փոխգործակցությունը։ Ռուսական կողմը վերահաստատել է իր պատրաստակամությունը համագործակցության ուղղությամբ։ Այդ մասին տեղեկացնում է ՌԴ ԱԳՆ-ն։ «Զրուցակիցներն անդրադարձել են ռուս-գերմանական հարաբերությունների հեռանկարներին, ինչպես նաև Նավալնիի շուրջ ստեղծված իրավիճակի հետ կապված երկկողմ և բազմակողմ միջազգային փոխգործակցությանը։ Ռուսական կողմը հաստատել է իր պատրաստակամությունը համագործակցելու այդ հարցում»,- ասված է հաղորդագրության մեջ։ ՌԴ ԱԳ նախարարը նաև հորդորել է Նավալնու հետ կապված իրավիճակի հետագա քաղաքականացումից։

22:33 - 15 սեպտեմբերի, 2020

Բորելն առաջարկում է Ալեքսեյ Նավալնիի անունով կոչել ԵՄ պատժամիջոցների նոր նախագիծը |azatutyun.am|

azatutyun.am: Եվրամիության դիվանագիտության ղեկավար Ժոզեպ Բորելը առաջարկել է Ալեքսեյ Նավալնիի անունով կոչել եվրոպական պատժամիջոցների նոր նախագիծը, որը կկիրառվի մարդու իրավունքների խախտումներին առնչություններ ունեցող ռուսաստանցիների նկատմամբ: Բորելը այս մասին հայտարարել է Եվրամիության խորհրդարանում։ Նրա խոսքերով՝ պաշտոնը ստանձնելու պահից սկսած նա սկսել է աշխատել ԵՄ պատժամիջոցների նոր մեխանիզմի վրա, որը կլինի ամերիկյան Մագնիտսկու ակտի նմանօրինակը: Նախագիծը նախատեսվում է ավարտին հասցնել այս աշնանը: «Հուսով եմ, որ այն, ինչ տեղի է ունեցել Նավալնիի հետ, կատալիզատոր կդառնա Եվրամիության բոլոր անդամ երկրների համար, որպեսզի նրանք խոսքից գործի անցնեն և հավանություն տան այդ պատժամիջոցների ռեժիմը։ Ամերիկյան Մագնիտսկու ակտի նմանօրինակով, մենք կարող ենք ունենալ «Նավալնիի պատժամիջոցների ռեժիմ», ինչը լավ հնարավորություն կդառնա ամփոփելու տեղի ունեցածը, և այնպես անել, որպեսզի Նավալնիի անունը ասոցացվի իրավախախտներին պատասխանատվության ենթարկելու հետ», - ընդգծել է Եվրամիության դիվանագիտական գերատեսչության ղեկավարը: «Մագնիտսկու ակտը» ընդունվել է ի հիշատակ Hermitage Capital-ի իրավաբան և աուդիտոր Սերգեյ Մագնիտսկու, ով 2008 թվականին, իրավապաշտպանների համոզմամբ, շինծու մեղադրանքով, ձերբակալվել և մեկ տարի անց մոսկովյան բանտում մահացել է: Մագնիտսկին հայտնի է ռուսաստանցի բարձրաստիճան պաշտոնյաների կողմից պետական միջոցների խոշոր յուրացումները բացահայտող հետաքննություններով: 2012-ին Միացյալ Նահանգներն ընդունել է «Մագնիտսկու օրենքը», որի նպատակն է պատժել մարդու իրավունքները ոտնահարող պաշտոնյաներին, ընդ որում՝ ոչ միայն Ռուսաստանում, այլև՝ ամբողջ աշխարհում:

20:20 - 15 սեպտեմբերի, 2020

Կրեմլում մեկնաբանել են Նավալնիի հնարավոր վերադարձը Ռուսաստան |shantnews.am|

shantnews.am: ՌԴ նախագահի մամուլի քարտուղար Դմիտրի Պեսկովը մեկնաբանել է քաղաքական գործիչ Ալեքսեյ Նավալնիի հնարավոր վերադարձը Ռուսաստան։ Газета պարբերականի փոխանցմամբ՝ Պեսկովը նշել է, որ Ռուսաստանի ցանկացած քաղաքացի կարող է հեռանալ երկրից և վերադառնալ։ Կրեմլի ներկայացուցիչը նաև շեշտել է, որ Օմսկի բժիշկները փրկել են Նավալնիի կյանքը, իսկ եթե Բեռլինի մասնագետները լրացուցիչ կբարելավեն նրա առողջությունը, ապա բոլորը միայն ուրախ կլինեն։ Պեսկովը նաև ափսոսանք է հայտնել, որ Կրեմլը չի կարող հետևել Նավալնիի վիճակի փոփոխություններին, քանի որ չի տիրապետում անհրաժեշտ տեղեկատվությանը։

19:51 - 15 սեպտեմբերի, 2020

Գերմանացի բժիշկների պնդմամբ` Նավալնին արդեն ի վիճակի է քայլել |azatutyun.am|

azatutyun.am: «Ռուսաստանցի ընդդիմադիր գործիչ Ալեքսեյ Նավալնու առողջական վիճակը շարունակում է բարելավվել», - այսօր հայտարարել են Բեռլինի «Շարիտե» հիվանդանոցի ներկայացուցիչները։ Գերմանացի բժիշկների խոսքով՝ Նավալնիին անջատել են արհեստական շնչառության սարքից, և նա այժմ «կարողանում է կարճ ժամանակով վեր կենալ անկողնուց»։

19:24 - 14 սեպտեմբերի, 2020

Նավալնիի օրգանիզմում «Նովիչոկի» խմբի թույնի առկայությունը հաստատել են Ֆրանսիայի և Շվեդիայի լաբորատորիաները |shantnews.am|

shantnews.am: Ֆրանսիայում և Շվեդիայում գտնվող լաբորատորիաներում կատարված հետազոտությունները հաստատել են ռուս քաղաքական գործիչ Ալեքսեյ Նավալնիի օրգանիզմում «Նովիչոկի» խմբի թույնի առկայությունը։ Այս մասին հաղորդում է Meduza պարբերականը։ Բեռլինում պարզաբանել են, որ Նավալնիից վերցված նմուշներն ուղարկվել են նշված երկու երկրներ անկախ հետազոտություն անցկացնելու համար։ Բացի դրանից՝ նմուշներն ուղարկվել են նաև Քիմիական զենքի արգելման կազմակերպություն, որը կանցկացնի իր սեփական հետազոտությունը։ Նավալնիի օրգանիզմում «Նովիչոկի» հետքեր էին հայտնաբերել Գերմանիայի Բունդեսվերի լաբորատորիայում։ ՌԴ իշխանությունները պնդում են, որ Օմսկում կատարված հետազոտությունները քաղաքական գործչի օրգանիզմում թունավոր նյութեր չեն հայտնաբերել։

14:48 - 14 սեպտեմբերի, 2020

Ռուսաստանի տեղական ընտրություններում Նավալնու կողմնակիցները զգալի հաջողություններ են արձանագրել Սիբիրում |azatutyun.am|

azatutyun.am: Ռուսաստանում ամփոփում են սեպտեմբերի 11-13-ը կայացած տեղական ընտրությունների արդյունքները։ Պաշտոնական տվյալների համաձայն` կիրակնօրյա ընտրություններում իշխող «Եդինայա Ռոսիա» կուսակցությունը զգալի հաջողությունների է հասել։ Երկրի 18 մարզերում և երկրամասերում գործող նահանգապետերին հաջողվել է վերընտրվել առաջին իսկ փուլում։ «Եդինայա Ռոսիա»-ն մեծամասնություն է ստացել նաև 11 մարզերում ընտրված տեղական խորհրդարաններում։ Ընտրական այս փուլում ևս ընդդիմադիր առաջնորդ Ալեքսեյ Նավալնու կողմնակիցները կյանքի են կոչել «Խելացի քվեարկության» մարտավարությունը՝ կոչ անելով ընտրողներին քվեարկել իշխող կուսակցությունը չներկայացնող և հաղթելու քիչ թե շատ լուրջ շանսեր ունեցող ցանկացած թեկնածուի օգտին։ Այս մարտավարությունը որոշակի հաջողություններ է արձանագրել Սիբիրում։ Ալեքսեյ Նավալնիի Տոմսկի և Նովոսիբիրսկի տեղական շտաբների ղեկավարներն ընտրվել են քաղաքային խորհուրդների կազմում։

14:26 - 14 սեպտեմբերի, 2020

Կրեմլի խոսնակը՝ Նավալնիի գործը քննելու և Պուտինի հետ Բելառուսի նախագահի հանդիպման մասին |factor.am|

factor.am: Կրեմլի խոսնակ Դմիտրի Պեսկովը վերահաստատեց Գերմանիայի կողմից Մոսկվային ուղղված հորդորը, որպեսզի ապացույցներ տրամադրեն Ռուսաստանի ընդդիմադիր առաջնորդ Ալեքսեյ Նավալնիին անցյալ ամիս թունավորվելու մասին. գրում է VOA-ն: Պեսկովն ասաց, որ լիարժեք քրեական գործ կարող է հարուցվել միայն այն դեպքում, երբ Ռուսաստանը թունավորման ապացույց տեսնի. «Մենք չէինք ցանկանա և չենք սիրում, երբ այլ երկրներ մեզ թելադրում են, թե ինչ դատական գործընթացներ սկսենք, երբ և ինչ հիմքերով»: Հարցին, թե արդյոք Նավալնիի թունավորումը կարող է ազդել առաջիկա տարածաշրջանային ընտրություններում Կրեմլի աջակցությունը վայելող թեկնածուների համբավի վրա, Պեսկովը պատասխանեց, որ կառավարությունը նման «մտահոգություններ» չունի:

14:22 - 13 սեպտեմբերի, 2020

Մինչև Ռուսաստանը Գերմանիայից անհրաժեշտ տեղեկություն չստանա, Նավալնիի գործի քննությունը չի սկսի․ ՄԱԿ-ում ՌԴ մշտական ներկայացուցիչ |tert.am|

tert.am: ՄԱԿ-ում Ռուսաստանի մշտական ներկայացուցիչ Վասիլի Նեբենզյան Անվտանգության խորհրդի նիստի ժամանակ հայտարարել է, որ Ռուսաստանն ընդդիմադիր գործիչ Ալեքսանդր Նավալնիի գործի քննությունը չի սկսի մինչև Գերմանիայից անհրաժեշտ տեղեկություններ չստանա, գրում է «ՌԻԱ Նովոստի» գործակալությունը «Նույնիսկ իրավաբանական համալսարանի առաջին կուրսի ուսանողը գիտի, որ ցանկացած հետաքննությանը պետք է նախորդեն մեզ հասանելի ցուցմունքների վրա հիմնված ապացույցներ և փաստեր, հակառակ դեպքում մեր իրավապահ մարմինները հետաքննություն սկսելու որևէ հիմք չունեն»,-նշել է Նեբենզյան և հավելել, որ Նավալնիի կյանքը փրկած ռուս բժիշկները նրա անալիզներում որևէ քիմիականն միացություններ չեն գտել։

10:50 - 11 սեպտեմբերի, 2020

Կրեմլն արձագանքել է Նավալնիի հետ կապված Պոմպեոյի խոսքերին |shantnews.am|

shantnews.am: Կրեմլի ներկայացուցիչ Դմիտրի Պեսկովն արձագանքել է ԱՄՆ պետքարտուղար Մայք Պոմպեոյի այն հայտարարություններին, որ ամենայն հավանականությամբ, Նավալնիին թունավորել են ՌԴ բարձրաստիճան պաշտոնյաները։ Այս մասին հաղորդում է Газета պարբերականը։«Եվս մեկ անգամ կրկնում եմ՝ մենք հետաքրքրված ենք տեղի ունեցածի պատճառները պարզելու հարցով։ Ռուսաստանի ցանկացած պաշտոնական ներկայացուցչի՝ տեղի ունեցածին առնչության մասին ցանկացած ուղղակի և անուղղակի ակնարկ անընդունելի է և ապրիորի սխալական, խեղաթյուրում է իրականությունը», – ասել է Պեսկովը։ ԱՄՆ պետքարտուղար Մայք Պոմպեոն հայտարարել էր, որ «մեծ հավանականություն կա», որ Նավալնիի ենթադրյալ թունավորումը պատվիրել են ՌԴ բարձրաստիճան պաշտոնյաները։ Նա հայտնել էր, որ միջազգային հանրությունը Ռուսաստանից ակնկալում է, որ միջադեպի մեղավորները պատասխանատվության կենթարկվեն։

15:52 - 10 սեպտեմբերի, 2020