Նարեկ Սամսոնյանն ու Վազգեն Սաղաթելյանը կրկին կվարեն «Իմնեմնիմի» հաղորդումը

Վազգեն Սաղաթելյանի և Նարեկ Սամսոնյանի նկատմամբ «Իմնեմնիմի» հաղորդումը վարելու արգելքն այսօր վերացվել է։ Այս մասին «Ֆեյսբուքի» իր էջում տեղեկացրել է փաստաբան Արսեն Բաբայանը։

Նա նշել է, որ հաղորդման համահեղինակներն այսօր անձամբ կվարեն «Իմնեմնիմի» հաղորդումը:

«Դատարանը բավարարեց մեր միջնորդությունը և վերացրեց հաղորդաշարը վարելու արգելքը»,– գրել է Բաբայանը։

Նշենք, որ նրանց նկատմամբ նախաձեռնված քրեական հետապնդումից հետո հաղորդումը վարում էին հասարակական–քաղաքական տարբեր գործիչներ։

Հիշեցնենք, որ մարտի 22-ին ձերբակալվել էին «Քաղաքացիական գիտակցություն» ՀԿ նախագահ Նարեկ Սամսոնյանը և «Իմնեմնիմի» փոդքաստի համահեղինակ ու վարող Վազգեն Սաղաթելյանը :

Նրան ձերբակալվել էին ՀՀ քննչական կոմիտեում ՀՀ քրեական օրենսգրքի 297-րդ հոդվածի 2-րդ մասի 1-ին և 3-րդ կետերի հատկանիշներով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով խուլիգանությունը) քննվող քրեական վարույթի շրջանակներում։

Սամսոնյանը և Սաղաթելյանը կալանավորվեցին 2 ամսով: Նրանց նկատմամբ ընտրված խափանման միջոց կալանքը փոփոխվեց վարչական վերահսկողության սահմանմամբ։

Դատարանի որոշմամբ, նրանք երեք ամիս չեն կարողանա վարել «Իմնեմնիմի» փոդքասթն ու այլ հաղորդումներ։