news.am:  Գերմանիայի կանցլեր Անգելա Մերկելի հետ Ստամբուլում հանդիպման ժամանակ Թուրքիայի նախագահ Ռեջեփ Թայիփ Էրդողանը միջազգային հանրությանը կոչ է արել ուժեղացնել ճնշումը լիբիական գեներալ Խալիֆա Խաֆթարի դեմ, տեղեկացնում է DW-ն։

«Ահաբեկչական կազմակերպությունները չպետք է նորից ուժեղացնեն իրենց դիրքերը»,- ասել է նա ուրբաթ՝ հունվարի 24-ին, նախազգուշացնելով Լիբիայում իրավիճակի նոր վատթարացման վտանգի մասին։

Էրդողանի խոսքով՝ քաոսի մթնոլորտը հյուսիսաֆրիկյան երկրում կարող է բացասական հետեւանքներ ունենալ միջերկրածովյան ողջ տարածաշրջանի համար։ Լիբիայում 2011 թվականից քաղաքացիական պատերազմի ընթացքում զոհվել է ավելի քան 2500 մարդ, վիրավորվել 7500-ը, նշել է նա՝ Խաֆթարին եւ նրա Լիբիական ազգային բանակը մեղադրելով քաղաքացիական բնակչության վրա հարձակումների մեջ։ Թուրքիայի նախագահը միաժամանակ գովաբանել է հունվարի 19-ին Բեռլինում կայացած լիբիական կարգավորման համաժողովի արդյունքները եւ ընդգծել Լիբիայում խաղաղ ուժերի աջակցության կարեւորությունը։

Իր հերթին, Մերկելն Անկարային հորդորել է ավելի շոշափելի ազատություններ տալ բուհերին եւ հետազոտական հաստատություններին։ «Որքան ավելի լայն լինի գիտական ազատությունը, այնքան ավելի բարձր կլինեն գիտական ձեռքբերումները»,- ասել է նա՝ Էրդողանի հետ միասին բացելով գերմանա-թուրքական համալսարանի նոր ճամբարը։ Կանցլերի խոսքով՝ Գերմանիայի Դեմոկրատական Հանրապետության ժամանակներում նա սեփական փորձով է իմացել, թե որքան շատ է ազատության պակասը խանգարում գիտությանը։

Երկու երկրների առաջնորդների խոսքով՝ գերմանա-թուրքական համալսարանը, որտեղ այժմ սովորում է մոտ 2300 ուսանող, բարձրագույն կրթության եւ գիտության ոլորտում երկկողմ համագործակցության օրինակ է:

Բացի այդ, Մերկելը ողջունել է ԵՄ-ի հետ համաձայնագրի շրջանակում ավելի քան 2 մլն սիրիացի փախստականներին ընդունելու Անկարայի համաձայնությունը: «Դա ձեռքբերում է, որն անհնար է գերագնահատել, այն արժանի է ճանաչման»,- նշել է նա:

Ավելի ուշ նույն օրը տեղի կունենան Մերկելի եւ Էրդողանի բանակցությունները: Բացի այդ, Գերմանիայի կանցլերը կհանդիպի Թուրքիայի քաղաքացիական հասարակության ներկայացուցիչների հետ:

Բեռլինում Լիբիայի հարցով համաժողովի ժամանակ Լիբիային զենքի մատակարարման արգելքի եւ այդ երկրում հակամարտող կողմերին ռազմական աջակցության դադարեցման մասին համաձայնություն է ձեռք բերվել: Փաստաթուղթը ստորագրել են 16 երկրներ եւ կազմակերպություններ: Բանակցությունների մասնակիցները միաձայն խոստովանել են, որ հյուսիսաֆրիկյան երկրում ձգձգվող հակամարտությունը չի կարող լուծվել ռազմական ճանապարհով: Բացի այդ, նպատակ է դրվել ներկայիս հրադադարի ռեժիմը վերածել երկարաժամկետ հաշտության:

Լիբիայում զինված հակամարտությունը սկսվել է 2011 թվականին Մուամար Քադաֆիի ռեժիմի տապալումից եւ նրա սպանությունից հետո: Տրիպոլիում միջազգայնորեն ճանաչված Ազգային համաձայնության կառավարությունը Ֆայիզ Սարաջի գլխավորությամբ վերահսկում է երկրի ոչ մեծ մասը, նրա դեմ է Քադաֆիի նախկին դաշնակից Խալիֆա Խաֆթարը, որին աջակցում են Եգիպտոսը, ԱՄԷ-ն եւ Ռուսաստանը: Խաֆթարի հսկողության տակ է գտնվում Լիբիայի տարածքների զգալի մասը, ներառյալ՝ նավթային հանքերի մեծամասնությունը: Թուրքիան աջակցում է Տրիպոլիի կառավարությանը: