Միացյալ Թագավորություն

Պետական կարգը՝ միապետություն
Մայրաքաղաքը՝ Լոնդոն
Տարածքը՝ 244 հզ. կմ
Բնակչությունը՝ 59,8 մլն
Պետական լեզուն՝ անգլերեն
Դրամական միավորը՝ ֆունտ ստեռլինգ

Միացյալ Թագավորությունն ունի մասամբ կարգավորվող շուկայական տնտեսություն։ Ըստ շուկայական փոխարժեքների՝ Միացյալ Թագավորությունը համարվում է աշխարհում 8-րդ և Եվրոպայում 2-րդ (Գերմանիայից հետո) ամենամեծ տնտեսություն ունեցող պետությունը։ Թագուհու գանձապետարանը, որը գլխավորում է կանցլերը, պատասխանատու է բրիտանական կառավարության կողմից հասարակական ֆինանսական և տնտեսական քաղաքականության մշակման և կիրառման համար։

Անգլիայի բանկը կամ Միացյալ Թագավորության կենտրոնական բանկը պատասխանատու է ազգային արտարժույթի՝ ֆունտ ստերլինգի թողարկման համար։ Տուրիզմը համարվում է բրիտանական տնտեսության ամենակարևոր մասը, և 2004թ․ 27 մլն զբոսաշրջիկներով պետությունը զբաղեցնում է 6-րդ տեղը համաշխարհային տուրիզմի շարքերում, իսկ Լոնդոնը համարվում է զբոսաշրջիկների կողմից ամենաշատ այցելվող քաղաքը աշխարհում։

Իրանի ԱԳՆ են կանչել Մեծ Բրիտանիայի գործերի ժամանակավոր հավատարմատարին |armenpress.am|

armenpress.am: Մեծ Բրիտանիայի գործերի ժամանակավոր հավատարմատարին կանչել են Իրանի արտաքին գործերի նախարարություն՝ Լոնդոնի կողմից Իրանի Իսլամական Հանրապետության նավագնացային ընկերության դեմ նոր պատժամիջոցներ սահմանելու պատճառով: Այս մասին հաղորդում է IRNA գործակալությունը: «Իրանի կողմից Ռուսաստան բալիստիկ հրթիռներ ուղարկելու կեղծ պատրվակով Իրանի մի շարք ֆիզիկական և իրավաբանական անձանց, այդ թվում՝ Իրանի Իսլամական Հանրապետության նավագնացային ընկերության և «Iran Air»-ի դեմ Մեծ Բրիտանիայի կողմից ապօրինի պատժամիջոցներ սահմանելուց հետո Մեծ Բրիտանիայի գործերի ժամանակավոր հավատարմատարը (դեսպանի բացակայությամբ) նոյեմբերի 19-ի երեկոյան հրավիրվել է արտաքին գործերի նախարարություն, և նրան է փոխանցվել Իրանի վճռական բողոքը Մեծ Բրիտանիայի կառավարության այդ անօրինական և չարդարացված գործողության դեմ», - նշված է հրապարակման մեջ։ Արտաքին գործերի նախարարության Արևմտյան Եվրոպայի հարցերով գլխավոր տնօրենի օգնական Աբբաս Նադերին դատապարտել է Մեծ Բրիտանիայի այդ գործողությունները՝ դրանք համարելով միջազգային իրավունքին հակասող և նշելով, որ դրանք խախտում են նավագնացության և ծովային առևտրի ազատության սկզբունքը։ Աբբաս Նադերին հերքել է այն պնդումը, թե Իրանը բալիստիկ հրթիռներ է ուղարկել Ռուսաստան։ Նա նաև անընդունելի է անվանել «որոշ եվրոպական պետությունների, ներառյալ՝ Մեծ Բրիտանիայի միջամտությունը պաշտպանության ոլորտում այլ երկրների հետ Իրանի համագործակցությանը»: Բացի այդ, նոյեմբերի 19-ին Իրանի ԱԳՆ է կանչվել ԵՄ խորհրդում նախագահող Հունգարիայի դեսպանը։ Ըստ Իրանի ԱԳՆ-ի՝ նման քայլ է ձեռնարկվել՝ կապված Եվրամիության և Մեծ Բրիտանիայի կողմից Իրանի ֆիզիկական և իրավաբանական անձանց նկատմամբ ընդունված «անօրինական պատժամիջոցների»։

12:09 - 20 նոյեմբերի, 2024

Թուրքիայի և Մեծ Բրիտանիայի պաշտպանության նախարարները քննարկել են երկկողմ համագործակցությանը հարցեր |1lurer.am|

1lurer.am: Անկարայում կայացել է Թուրքիայի պաշտպանության նախարար Յաշար Գյուլերի և Մեծ Բրիտանիայի պաշտպանության նախարար Ջոն Հիլիի հանդիպումը, որը Թուրքիա է ժամանել պաշտոնական այցով: Այդ մասին հայտնել են թուրքական լրատվամիջոցները: Նախարարները բանակցություններ են վարել մամուլի համար փակ ռեժիմով: Նշվում է, որ կողմերը քննարկել են երկու երկրների պաշտպանական համագործակցությանը վերաբերող հարցեր: Որոշ աղբյուրներ նշում են, որ Անկարան և Լոնդոնը քննարկում են Թուրքիային 40 Eurofighter կործանիչի վաճառքի հարցը:

12:05 - 15 նոյեմբերի, 2024

Բլինքենն ու Լամմին քննարկել են Ուկրաինայի դեմ պատերազմում հյուսիսկորեական զորքերի մասնակցության հետևանքները |azatutyun.am|

azatutyun.am: ԱՄՆ պետքարտուղար Էնթոնի Բլինքենը չորեքշաբթի օրը Բրյուսելում հանդիպել է Մեծ Բրիտանիայի արտաքին գործերի նախարար Դեյվիդ Լամմիի հետ: Ըստ ԱՄՆ պետդեպարտամենտի՝ պետքարտուղարն ու արտգործնախարարը քննարկել են Ուկրաինայի դեմ պատերազմում հյուսիսկորեական զորքերի մասնակցության վերաբերյալ Ռուսաստանի որոշման հետևանքները: Չորեքշաբթի օրը ԱՄՆ Պետդեպարտամենտի փոխխոսնակ Վեդանտ Պատելը հայտարարեց, որ հյուսիսկորեական զորքը Կուրսկի մարզում արդեն մասնակցում է Ուկրաինայի դեմ ռուսական բանակի ռազմական գործողություններին։ Պատելն ասաց, որ Միացյալ Նահանգները «ծայրաստիճան անհանգստացած է» այդ փաստով և շարունակում է դաշնակիցների հետ խորհրդակցությունները Ռուսաստանի այդ որոշման հետևանքները վերլուծելու համար։ Բլինքենը Լամմիի հետ հանդիպմանն ընդգծել է Ուկրաինայի անվտանգությանը շարունակական աջակցության կարևորությունը՝ պաշտպանելու երկիրը Ռուսաստանի ագրեսիայից: Հանդիպումից հետո Լամին X-ում գրառում է արել՝ նշելով, որ հանդիպել է Բլինքենի ու ՆԱՏՕ-ի գլխավոր քարտուղարի տեղակալի պաշտոնակատար հետ, խոսել համատեղ անվտանգության առաջնահերթություններից։ «Մենք ամեն ինչ անում ենք Կրեմլին կաշկանդելու և Վլադիմիր Պուտինի անօրինական ներխուժման դեմ Ուկրաինային աջակցելու համար», - գրել է Մեծ Բրիտանիայի արտաքին քաղաքական գերատեսչության ղեկավարը։

11:27 - 14 նոյեմբերի, 2024

Ալիևը և Սթարմերը քննարկել են Հայաստան-Ադրբեջան կարգավորման գործընթացը |1lurer.am|

1lurer.am: Ադրբեջանի նախագահ Իլհամ Ալիևը հանդիպել է Մեծ Բրիտանիայի Միացյալ Թագավորության և Հյուսիսային Իռլանդիայի վարչապետ Քիր Սթարմերի հետ։ Ադրբեջանական լրատվամիջոցները հայտնում են, որ դա Սթարմերի առաջին այցն է Ադրբեջան։ Հանդիպման ընթացքում վարչապետ Սթարմերը հետաքրքրվել է Հայաստանի ու Ադրբեջանի միջև խաղաղ բանակցային գործընթացով։ Ալիևը նշել է, որ ներկայում բանակցությունները շարունակվում են, պայմանագրի զգալի մասն արդեն համաձայնեցված է, տեղի է ունեցել ավելի քան 12 կիլոմետր երկարության սահմանի սահմանագծում ու սահմանազատում, իսկ հանձնաժողովի վերջին հանդիպման ժամանակ պայմանավորվածություն է ձեռք բերվել այդ գործընթացը շարունակելու մասին։ Միևնույն ժամանակ Ադրբեջանի ղեկավարը հայտարարել է ՀՀ սահմանադրությունից «Ադրբեջանի նկատմամբ տարածքային հավակնությունների բացառման» կարևորությունը։ Ալիևն ընդգծել է ժողովուրդներին խաղաղության նախապատրաստման նշանակությունը՝ խաղաղության գործընթացի շարունակման ու խաղաղության պայմանագրի ստորագրման համար։

09:24 - 13 նոյեմբերի, 2024

Մեծ Բրիտանիայի վարչապետն ու Ֆրանսիայի նախագահը քննարկել են ձմռանն ընդառաջ Ուկրաինային աջակցելու հարցը |tert.am|

tert.am: Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը քննարկել են ձմռան ամիսներին Ուկրաինայի նախապատրաստմանն աջակցելու հարցը։ Ինչպես փոխանցում է ՏԱՍՍ-ը, այս մասին հայտարարել է բրիտանական կառավարության ղեկավարի գրասենյակը՝ Փարիզում Մեծ Բրիտանիայի վարչապետի և Ֆրանսիայի նախագահի հանդիպման արդյունքներով։ Նշվում է, որ Մակրոնն ու Սթարմերը բանակցությունները սկսել Ուկրաինայում տիրող իրավիճակի քննարկմամբ, այդ թվում՝ այդ երկրի դիրքերը մինչև ձմռան սկիզբ ամրապնդելու հարցի շուրջ: Բացի այդ, նրանք մտահոգություն են հայտնել Գազայի հատվածում և Լիբանանում տիրող իրավիճակի վերաբերյալ։ «Նրանք նաև ընդգծել են Հորդանան գետի Արևմտյան ափում կայունության անհրաժեշտությունը»,- նշել են Մեծ Բրիտանիայի վարչապետի գրասենյակից։ Քննարկման մեկ այլ թեմա է եղել Լա Մանշն ապօրինի հատող միգրանտների թվի կրճատման անհրաժեշտությունը։

20:28 - 11 նոյեմբերի, 2024

Ալիևի ներկայացուցիչը ՄԹ բարձրաստիճան պաշտոնյաների հետ քննարկել է Հայաստանի և Ադրբեջանի միջև խաղաղության պայմանագիրը

Ադրբեջանի նախագահի ներկայացուցիչ Էլչին Ամիրբեկովը հանդիպել է ՄԹ բարձրաստիճան պաշտոնյաների հետ։ Այդ մասին հայտնում են ադրբեջանական ԶԼՄ-ները։ Ամիրբեկովը հանդիպել է ՄԹ ազգային անվտանգության հարցերով խորհրդական Տիմոտի Բարոուի, Արտաքին գործերի, համագործակցության և զարգացման նախարար Սթիվեն Դաութիի և Թագավորության խորհրդարանի անդամների հետ։ Հաղորդագրության մեջ նշվում է, որ կողմերը քննարկել են Ադրբեջանի և ՄԹ երկկողմ հարաբերությունները, Հայաստանի հետ խաղաղության պայմանագիրը և COP29-ը։

22:51 - 29 հոկտեմբերի, 2024

Մեծ Բրիտանիայի արտգործնախարարը զրուցել է իրանցի և իսրայելցի գործընկերների հետ՝ «աղետալի պատերազմից խուսափելու համար» |news.am|

news.am: Մեծ Բրիտանիայի արտաքին գործերի նախարար Դևիդ Լեմին հայտարարել է, որ այսօր առանձին հեռախոսազրույցներ է ունեցել իր իսրայելցի և իրանցի գործընկերների հետ՝ ձգտելով խուսափել «աղետալի» տարածաշրջանային պատերազմից՝ Իրանի տարածքում գտնվող ռազմական օբյեկտներին Իսրայելի հարվածներից հետո: «Այսօր ես կարևոր հեռախոսազրույցներ ունեցա Իսրայելի արտգործնախարարի (Իսրայել Կաց) և Իրանի արտգործնախարարի (Աբաս Արաքչի) հետ։ Մեծ Բրիտանիան շարունակում է պնդել դեէսկալացիան և Լիբանանում և Գազայի հակամարտությունների դադարեցումը»,- ասվում է Լեմիի հայտարարության մեջ: «Տարածաշրջանային պատերազմն աղետալի կլինի և ոչ մեկի շահերից չի բխի»,- հավելել է նա։

09:33 - 28 հոկտեմբերի, 2024

ԱՄՆ-ն և Մեծ Բրիտանիան հարվածներ են հասցրել Եմենի Հոդեյդա քաղաքին |armenpress.am|

armenpress.am: ԱՄՆ-ն և Մեծ Բրիտանիան հարվածներ են հասցրել հութիների վերահսկողության տակ գտնվող Եմենի Հոդեյդա քաղաքին։ Այս մասին հայտնում են տեղի լրատվամիջոցները։ Հայտնի է Ռաս Իսա նավահանգստի տարածքում առնվազն երկու հարվածի մասին։ Տուժածների և ավերածությունների մասին չի հաղորդվում:

13:32 - 19 հոկտեմբերի, 2024

Բայդենը ժամանել է Գերմանիա՝ Շոլցի, Մակրոնի և Սթարմերի հետ բանակցությունների |armenpress.am|

armenpress.am: ԱՄՆ նախագահ Ջո Բայդենը հոկտեմբերի 17-ի երեկոյան կարճատև այցով ժամանել է Բեռլին՝ Գերմանիայի, Ֆրանսիայի և Մեծ Բրիտանիայի ղեկավարների հետ քննարկելու Ուկրաինայում և Մերձավոր Արևելքում տիրող իրադրությունը։ Այս մասին հաղորդում է Reuters գործակալությունը։ Հոկտեմբերի 18-ին Բայդենը հանդիպում կունենա Գերմանիայի նախագահ Ֆրանկ-Վալտեր Շտայնմայերի և կանցլեր Օլաֆ Շոլցի հետ, որից հետո արդեն բանակցություններ կանցկացնի Օլաֆ Շոլցի, Ֆրանսիայի նախագահ Էմանուել Մակրոնի և Բրիտանիայի վարչապետ Քիր Սթարմերի հետ։ Ի սկզբանե նախատեսված էր, որ անցյալ շաբաթ ԱՄՆ նախագահը 40 տարվա ընթացքում առաջին անգամ եռօրյա պետական այցով կլիներ Գերմանիայում և ԱՄՆ-ի Ռամշտայն ավիաբազայում ավելի մեծ կազմով հանդիպում կանցկացներ Ուկրաինային ռազմական օգնություն տրամադրող երկրների հետ: Սակայն Ջո Բայդենը չեղարկել էր այդ ուղևորությունը, որպեսզի կենտրոնանա ԱՄՆ-ին պատուհասած «Միլթոն» փոթորկի դեմ պայքարի վրա։ Այժմ նա բաց թողած այցը լրացնում է կարճատև այցով, իսկ Ռամշտայնի ձևաչափով հանդիպումը կանցկացվի նոյեմբերին՝ տեսակապի ձևով։

09:53 - 18 հոկտեմբերի, 2024

Մեծ Բրիտանիայի արտգործնախարարը կայցելի Չինաստան |armenpress.am|

armenpress.am: Մեծ Բրիտանիայի արտաքին գործերի նախարար Դեյվիդ Լեմին հոկտեմբերի 18-19-ը պաշտոնական այցով կլինի Չինաստանում։ Այդ մասին ճեպազրույցում հայտնել է Չինաստանի արտգործնախարարության պաշտոնական ներկայացուցիչ Մաո Նինը։ «Չինաստանի արտգործնախարար Վան Իի հրավերով Մեծ Բրիտանիայի արտաքին գործերի նախարար Դեյվիդ Լեմին հոկտեմբերի 18-19-ը պաշտոնական այց կկատարի Չինաստան», - Մաո Նինի խոսքերն է մեջբերում ՏԱՍՍ-ը։ Պաշտոնյան նաև նշել է, որ «Չինաստանի և Մեծ Բրիտանիայի միջև հարաբերությունների երկարաժամկետ և կայուն զարգացումը համապատասխանում է երկու կողմերի և միջազգային հանրության ընդհանուր շահերին, ինչպես նաև հեշտացնում է արձագանքումը գլոբալ մարտահրավերներին, նպաստում է խաղաղությանը և գլոբալ զարգացմանը»: Չինաստանի ԱԳՆ խոսնակը հայտնել է ՉԺՀ-ի պատրաստակամությունը՝ «համագործակցելու Մեծ Բրիտանիայի հետ՝ գործընկերության կարգավիճակի պահպանման, փոխշահավետության և երկկողմ հարաբերությունների կայունության և երկարաժամկետ զարգացմանը նպաստելու համար»:

13:38 - 17 հոկտեմբերի, 2024

Գերմանիայում կկայանա Բայդենի, Մակրոնի, Շոլցի և Սթարմերի հանդիպումը․ CNN |tert.am|

tert.am: ԱՄՆ նախագահ Ջո Բայդենն այս շաբաթ Գերմանիա այցի ընթացքում կհանդիպի Գերմանիայի կանցլեր Օլաֆ Շոլցի, Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Քիր Սթարմերի հետ, հայտնում է CNN-ը՝ հղում անելով աղբյուրներին։ Ղեկավարները պետք է բանակցություններ վարեին հոկտեմբերի 12-ին «Ռամշտայն» բազայում և քննարկեին Ուկրաինային օգնություն տրամադրելու հարցը, սակայն ԱՄՆ նախագահը չեղարկել էր այցը ԱՄՆ-ն պատուհասած «Միլթոն» փոթորիկի պատճառով։ CNN-ը չի հստակեցրել Բեռլինում նախատեսված հանդիպման մանրամասները։ Գերմանական լրատվամիջոցները գրել են, որ Ջո Բայդենի այցի ծրագիրը «էականորեն կրճատվել է»՝ ի սկզբանե նախատեսվածի համեմատ։ Նշվում էր, որ հոկտեմբերի 18-ին ԱՄՆ նախագահը պետք է հանդիպի Օլաֆ Շոլցի և Գերմանիայի նախագահ Ֆրանկ Վալտեր Շտայնմայերի հետ։

10:07 - 16 հոկտեմբերի, 2024

Մեծ Բրիտանիան սառեցրել է քաղաքական երկխոսությունը Վրաստանի հետ |azatutyun.am|

azatutyun.am: Բրիտանական կողմը որոշել է կասեցնել Վրաստանի հետ երկխոսությունը նախարարների մակարդակով, չեղարկվել են բարձր մակարդակի բանակցությունները պաշտպանության նախարարությունների շտաբների միջև և կասեցվել են կիբերանվտանգության նոր ծրագիրը, «Интерпрессньюс»-ին հայտնել է Վրաստանում Մեծ Բրիտանիայի դեսպան Գարեթ Ուորդը։Երկխոսությունը սկիզբ է առել 2014 թվականին և կոչվել է 1919-1921 թվականներին Վրաստանում առաջին բրիտանացի գերագույն հանձնակատարի՝ Օլիվեր Ուորդրոպի անունով:Դեսպանը հույս է հայտնել, որ ընտրություններից հետո, «անկախ նրանից, թե ով կլինի կառավարությունում», Վրաստանը կվերադառնա արևմտամետ ուղուն, և կողմերի միջև վստահությունը կվերականգնվի։«Ես ակնկալում էի, որ մենք միասին կաշխատենք՝ ամրապնդելու Վրաստանի դիմադրողականությունը և մեր ընդհանուր բարգավաճումը, սակայն անցած տարվա ընթացքում Վրաստանի կառավարությունն այլ ուղի ընտրեց, և Թբիլիսիում իմ առաջին ամիսներին ես ստիպված էի հստակ արտահայտել մեր մտահոգությունները՝ կապված ժողովրդավարական հետընթացի և հակաարևմտյան հռետորաբանության հետ: Հուսով եմ, որ Վրաստանի կառավարությունը կփոխի իր մոտեցումները, ինչն ինձ նույնպես լավատեսությունը վերականգնելու հնարավորություն կտա», - հայտարարել է դիվանագետը։Նրա խոսքով՝ Մեծ Բրիտանիայի և Վրաստանի, ինչպես նաև արևմտյան այլ գործընկերների հետ հարաբերությունները «խաթարվել են վրացական կառավարության այս տարվա գործողությունների պատճառով»:Վրաստանում խորհրդարանական ընտրությունները տեղի կունենան հոկտեմբերի 26-ին։ Իշխող «Վրացական երազանք» կուսակցությունը հայտարարում է Ռուսաստանի հետ առևտրատնտեսական հարաբերությունների կարևորության մասին՝ հակառակորդներին մեղադրելով երկիրը պատերազմի մեջ ներքաշելու փորձերի մեջ։ Ընդդիմությունն իր հերթին իշխանություններին մեղադրում է ռուսամետ լինելու մեջ։

13:09 - 15 հոկտեմբերի, 2024

Արարատ Միրզոյանը և Ստեֆան Դոութին մտքեր են փոխանակել տարածաշրջանային անվտանգությանն առնչվող հարցերի շուրջ

ՀՀ ԱԳ նախարար Արարատ Միրզոյանը հեռախոսազրույց է ունեցել Միացյալ Թագավորության Եվրոպայի, Հյուսիսային Ամերիկայի և անդրծովյան տարածքների հարցերով պետնախարար Ստեֆան Դոութիի հետ: Այս մասին տեղեկացնում են ՀՀ ԱԳՆ-ից: Զրուցակիցները քննարկել են երկկողմ հարաբերությունների օրակարգային հարցեր՝ միտված ՀՀ և ՄԹ միջև հաստատված ռազմավարական երկխոսության և փոխադարձ հետաքրքրություն ներկայացնող ուղղություններով համագործակցության հետագա խորացմանը: Արարատ Միրզոյանը և Ստեֆան Դոութին մտքեր են փոխանակել տարածաշրջանային կայունությանն ու անվտանգությանն առնչվող հարցերի շուրջ: Այս համատեքստում նախարար Միրզոյանը ներկայացրել է Հայաստանի և Ադրբեջանի միջև հարաբերությունների կարգավորման, մասնավորապես խաղաղության պայմանագրի կնքման ուղղությամբ վերջին զարգացումները՝ ընդգծելով տարածաշրջանում կայուն խաղաղության հասնելու ուղղությամբ ՀՀ ջանքերը և միջազգային գործընկերների հստակ դիրքորոշման ու աջակցության կարևորությունը:

20:02 - 11 հոկտեմբերի, 2024

Պապոյանն ու ՄԹ դեսպանը քննարկել են երկու երկրների միջև տնտեսական հարաբերությունների զարգացմանն առնչվող հարցեր

ՀՀ էկոնոմիկայի նախարար Գևորգ Պապոյանը հոկտեմբերի 4-ին ընդունել է ՀՀ-ում Միացյալ Թագավորության արտակարգ և լիազոր դեսպան Ջոն Գալագերին, Արևելյան Եվրոպայի և Կենտրոնական Ասիայի գծով գլխավոր հյուպատոս Քենան Պոլեոյին։ Հանդիպմանը մասնակցել է նաև նախարարի տեղակալ Նարեկ Հովակիմյանը։ Էկոնոմիկայի նախարարությունից տեղեկացնում են, որ քննարկվել են զբոսաշրջության, ծառայությունների, առևտրի, ենթակառուցվածքների զագացման, ներդրումների խրախուսման հնարավորությունները։ Կարևորվել է գործարար շրջանակների միջև անմիջական կապերի խթանումը։ Նախարարը շեշտել է, որ Հայաստանը բազմաթիվ հնարավորություններ է ընձեռում ներդրողների համար, և երկրի իրավական բազան ու պետական քաղաքականությունն ուղղված են ներդրումների ներգրավմանը։ Ներդրումային հնարավորությունների և կայուն տնտեսական զարգացման համատեքստում նախարար Պապոյանը զրուցակցին ներկայացրել է ՀՀ Կառավարության կողմից մշակված «Խաղաղության խաչմերուկ» ծրագրի մանրամասները։ Զրուցակիցները հանգամանալից քննարկել են երկու երկրների միջև տնտեսական հարաբերությունների զարգացմանն առնչվող հարցերի լայն շրջանակ։

15:06 - 04 հոկտեմբերի, 2024

ԵՄ-ն և Մեծ Բրիտանիան պայմանավորվել են համագործակցել |1lurer.am|

1lurer.am: Մեծ Բրիտանիայի վարչապետ Քիր Սթարմերը հոկտեմբերի 2-ին Բրյուսելում Եվրահանձնաժողովի նախագահ Ուրսուլա ֆոն դեր Լայենի հետ հանդիպմանը հայտարարել է Եվրամիության հետ հարաբերությունների «նոր մեկնարկի» մասին։ Սթարմերը նշել է, որ բրիտանական հասարակությունը ցանկանում է վերադառնալ «խելամիտ առաջնորդության» իր անմիջական հարևանների հետ հարաբերություններում, որպեսզի «Բրեքսիթը գործի և համապատասխանի իրենց շահերին»,- գրում է AFP լրատվականը: Ինչպես և սպասվում էր, Սթարմերը որպես համագործակցության հնարավոր ոլորտներ է նշել տնտեսական աճը, էներգետիկ անվտանգությունը և անօրինական միգրացիան: Միաժամանակ Մեծ Բրիտանիայի վարչապետն ընդգծել է, որ ԵՄ-ի հետ հարաբերությունների բարելավումը չի ենթադրում սահմանների բացում և վերադարձ միասնական շուկա։ Ֆոն դեր Լայենն էլ ասել է, որ Եվրամիությունը և Մեծ Բրիտանիան պետք է «ուսումնասիրեն ավելի սերտ համագործակցության հնարավորությունները»՝ միաժամանակ կենտրոնանալով գործող համաձայնագրերի «լիարժեք և բարեխիղճ իրականացման» վրա: 2016 թվականին Քիր Սթարմերը դեմ էր արտահայտվել Եվրամիությունից Մեծ Բրիտանիայի դուրս գալուն։ Իր նախընտրական քարոզարշավի ընթացքում գործող վարչապետը երկար ժամանակ չէր մեկնաբանում Brexit-ի որոշումը չեղարկելու հնարավորությունը, սակայն ի վերջո բացառել է Լոնդոնի վերադարձը Եվրամիություն։

15:28 - 03 հոկտեմբերի, 2024

Մի շարք երկրներ իրենց քաղաքացիներին Լիբանանից կա՛մ տարհանում են, կա՛մ երկիրը լքելու կոչ անում |azatutyun.am|

azatutyun.am: Լիբանանում Իսրայելի ռազմական գործողությունների ֆոնին մի շարք երկրներ իրենց քաղաքացիներին տարհանելու մասին են հայտարարում, կամ Լիբանանը լքելու կոչեր հնչեցնում։ Associated Press-ը, վկայակոչելով Չինաստանի պաշտոնական «Սինհուա» լրատվական գործակալությունը, հաղորդել է, որ Չինաստանի 146 քաղաքացիներ և նրանց ընտանիքի հինգ անդամները Լիբանանից չարտերային չվերթով այսօր ժամանել են Պեկին։ Լիբանանում Չինաստանի դեսպանատունը կշարունակի իր գործունեությունը։ Քաղաքացիներին տարհանելու մասին հայտարարել են նաև Մեծ Բրիտանիան, Գերմանիան, Բուլղարիան։ Երեկ ուշ երեկոյան իսրայելական կողմը հայտարարեց՝ Իրանը հրթիռներ է արձակել Իսրայելի ուղղությամբ՝ ավելի ուշ հստակեցնելով՝ մոտ 180 հրթիռ է արձակվել։ Իրանի ղեկավարությունը Իսրայելի վրա հրթիռային հարձակումն անվանել է վրեժ ԱՄՆ-ի և ԵՄ-ի կողմից ահաբեկչական ճանաչված պաղեստինյան արմատական «Համաս»-ի և Լիբանանում տեղակայված «Հեզբոլահ»-ի առաջնորդների սպանության համար: Իրանը «մեծ սխալ է գործել և կվճարի դրա համար», երեկ ուշ երեկոյան, կառավարության նիստի ժամանակ,հայտարարել է Իսրայելի վարչապետ Բենիամին Նեթանյահուն՝ շեշտելով․ - «Մենք հավատարիմ կմնանք մեր հաստատած կանոններին՝ «ով մեզ վրա հարձակվի, մենք էլ նրա վրա կհարձակվենք»։ Իրանն այսօր հայտարարարել է Իսրայելի վրա հարձակումն ավարտելու մասին։

13:17 - 02 հոկտեմբերի, 2024