Միացյալ Թագավորություն

Պետական կարգը՝ միապետություն
Մայրաքաղաքը՝ Լոնդոն
Տարածքը՝ 244 հզ. կմ
Բնակչությունը՝ 59,8 մլն
Պետական լեզուն՝ անգլերեն
Դրամական միավորը՝ ֆունտ ստեռլինգ

Միացյալ Թագավորությունն ունի մասամբ կարգավորվող շուկայական տնտեսություն։ Ըստ շուկայական փոխարժեքների՝ Միացյալ Թագավորությունը համարվում է աշխարհում 8-րդ և Եվրոպայում 2-րդ (Գերմանիայից հետո) ամենամեծ տնտեսություն ունեցող պետությունը։ Թագուհու գանձապետարանը, որը գլխավորում է կանցլերը, պատասխանատու է բրիտանական կառավարության կողմից հասարակական ֆինանսական և տնտեսական քաղաքականության մշակման և կիրառման համար։

Անգլիայի բանկը կամ Միացյալ Թագավորության կենտրոնական բանկը պատասխանատու է ազգային արտարժույթի՝ ֆունտ ստերլինգի թողարկման համար։ Տուրիզմը համարվում է բրիտանական տնտեսության ամենակարևոր մասը, և 2004թ․ 27 մլն զբոսաշրջիկներով պետությունը զբաղեցնում է 6-րդ տեղը համաշխարհային տուրիզմի շարքերում, իսկ Լոնդոնը համարվում է զբոսաշրջիկների կողմից ամենաշատ այցելվող քաղաքը աշխարհում։

Միացյալ Թագավորությունը Հայաստանին և Ադրբեջանին կոչ է արել հնարավորինս արագ ստորագրել խաղաղության համաձայնագիրը |armenpress.am|

18:01 - 27 մարտի, 2025

Արարատ Միրզոյանը և ՄԹ պետքարտուղարը քննարկել են տարածաշրջանային հարցեր

ՀՀ ԱԳ նախարար Արարատ Միրզոյանը հեռախոսազրույց է ունեցել Միացյալ Թագավորության արտաքին, համագործակցության և զարգացման հարցերով պետքարտուղար Դեյվիդ Լամմիի հետ։ Այս մասին տեղեկացնում են ՀՀ ԱԳՆ-ից։ Զրուցակիցները քննարկել են տարածաշրջանային հարցեր։ Հայաստանի և Ադրբեջանի միջև հարաբերությունների կարգավորման համատեքստում նախարար Միրզոյանն ընդգծել է երկու երկրների միջև խաղաղության ու միջպետական հարաբերությունների հաստատման մասին համաձայնագրի վերջնականացման ուղղությամբ գործադրված ջանքերը և համաձայնեցված տեքստով ստորագրման՝ ՀՀ առաջարկը։ Արարատ Միրզոյանը շնորհակալություն է հայտնել Դեյվիդ Լամմիին համաձայնագրի հնարավորիս սեղմ ժամկետներում կնքման և տարածաշրջանում խաղաղության հաստաման հարցում ՄԹ կողմից արտահայտված հստակ դիրքորոշման համար։ Հայաստանի և Ադրբեջանի սահմանին զինադադարի խախտումների վերաբերյալ Ադրբեջանից հնչող կեղծ մեղադրանքների առնչությամբ նախարար Միրզոյանը վկայակոչել է ՀՀ կողմից ներկայացված՝ հրադադարի ռեժիմի խախտման դեպքերի և/կամ այդ մասին տեղեկությունների հետաքննության համատեղ մեխանիզմ ստեղծելու առաջարկը, որի վերաբերյալ չի ստացվել ադրբեջանական կողմի դրական արձագանքը։ Նախարար Միրզոյանն ընդգծել է, որ ՀՀ կողմից ներկայացված այս և մյուս՝ մասնավորապես հաղորդակցությունների ապաշրջափակման ուղղությամբ առաջարկները կարող են լուրջ հիմք լինել փոխվստահության ձևավորման և կայունության ապահովման համար։ ՀՀ ԱԳ նախարար Արարատ Միրզոյանը և ՄԹ պետքարտուղար Դեյվիդ Լամմին մտքեր են փոխանակել միջազգային հարթակներում փոխգործակցության հարցերի շուրջ։ Մասնավորապես, նախարար Միրզոյանը ներկայացրել է COP17 համաժողովը Հայաստանում անցկացնելու ուղղությամբ իրականացվող նախապատրաստական աշխատանքներն՝ ընդգծելով այս ուղղությամբ ՄԹ հետ սերտ համագործակցության կարևորությունը։

21:20 - 21 մարտի, 2025

Բայրամովը կրկին խաղաղության պայմանագրի կնքման պայմաններն է հնչեցրել՝ ՀՀ Սահմանադրության փոփոխություն, ԵԱՀԿ Մինսկի խմբի լուծարում |factor.am|

factor.am: Ադրբեջանի արտաքին գործերի նախարար Ջեյհուն Բայրամովը և Մեծ Բրիտանիայի արտաքին գործերի, համագործակցության և զարգացման հարցերով պետքարտուղար Դեյվիդ Լամմին հեռախոսազրույց են ունեցել, որի ընթացքում քննարկել են երկու երկրների համագործակցության հարցեր, տարածաշրջանային ներկա իրավիճակը, ինչպես նաև Ադրբեջանի և Հայաստանի միջև խաղաղության գործընթացի վիճակը։ Ադրբեջանական կողմի հաղորդմամբ՝ տեղեկացնելով տարածաշրջանում տիրող իրավիճակի և խաղաղության գործընթացի մասին՝ Բայրամովը հայտարարել է, որ չնայած խաղաղության համաձայնագրի տեքստի շուրջ բանակցությունների ավարտին՝ այն ստորագրելու համար անհրաժեշտ է Հայաստանի Սահմանադրության մեջ համապատասխան փոփոխություն կատարել՝ իբր, «Ադրբեջանի նկատմամբ տարածքային պահանջները վերացնելու համար»։ Նաև ընդգծվել է ԵԱՀԿ Մինսկի խմբի և այլ համապատասխան կառույցների վերացման անհրաժեշտությունը։ Նախարարները մտքեր են փոխանակել փոխադարձ հետաքրքրություն ներկայացնող այլ հարցերի շուրջ։

18:28 - 19 մարտի, 2025

ԱԳ նախարարության գլխավոր քարտուղարը հանդիպել է Միացյալ Թագավորության արտաքին գործերի, համագործակցության և զարգացման գրասենյակի մշտական քարտուղարին

Մարտի 14-ին աշխատանքային այցով Մեծ Բրիտանիայում գտնվող ՀՀ ԱԳՆ գլխավոր քարտուղար Դավիթ Կարապետյանը հանդիպում է ունեցել Միացյալ Թագավորության արտաքին գործերի, համագործակցության և զարգացման գրասենյակի մշտական քարտուղար Օլիվեր Ռոբբինսի հետ: Այս մասին հայտնում են ԱԳՆ լրատվականից։ Հանդիպման ընթացքում կողմերը քննարկել են Հայաստան-Միացյալ Թագավորություն երկկողմ հարաբերությունների օրակարգին առնչվող հարցերի լայն շրջանակ՝ ընդգծելով փոխադարձ հետաքրքրություն ներկայացնող ոլորտներում երկու երկրների նախարարությունների միջև համագործակցության կարևորությունը: Դավիթ Կարապետյանն ու Օլիվեր Ռոբբինսը մտքեր են փոխանակել երկու երկրների դիվանագիտական դպրոցների միջև համագործակցության շուրջ։ Գլխավոր քարտուղարը զրուցակցին է ներկայացրել տարածաշրջանում կայունությանն ու անվտանգությանն առնչվող հարցերը, ընդգծելով երկխոսության և փոխադարձ վստահության անհրաժեշտությունը։

17:45 - 14 մարտի, 2025

Մոսկվան բրիտանացի երկու դիվանագետների մեղադրում է «դիվերսիոն հետախուզական աշխատանքի մեջ»․ նրանց վտարում են ՌԴ-ից |factor.am|

factor.am: Մոսկվան բրիտանացի երկու դիվանագետների զրկել է Ռուսաստանում հավատարմագրումից, նրանք երկու շաբաթվա ընթացքում պետք է լքեն երկիրը։ Այս մասին հայտնում է ՌԴ Ավտանգության դաշնային ծառայությունը, գրում է Meduza-ն։ Նշվում է, որ նրանք Մոսկվայում Մեծ Բրիտանիայի դեսպանատան երկրորդ քարտուղար Ալկեշ Օդեդրան և դեսպանատան քաղաքական բաժնի առաջին քարտուղար Թաբասում Ռաշդիի ամուսինը՝ Մայքլ Սքիներն են։ Ըստ ռուսական հատուկ ծառայության՝ Ռուսաստան մուտք գործելու թույլտվություն ստանալիս նրանք «դիտավորյալ կեղծ տեղեկություններ են տրամադրել՝ դրանով իսկ խախտելով ռուսական օրենքը»։ Բացի այդ, ԱԴԾ-ն հայտարարել է, որ հայտնաբերել է «հետախուզական և դիվերսիոն աշխատանքի նշաններ նշված դիվանագետների կողմից, որոնք սպառնում են Ռուսաստանի Դաշնության անվտանգությանը»: Արդյունքում, ՌԴ ԱԳՆ-ն որոշել է զրկել նրանց հավատարմագրումից և երկու շաբաթ է տվել երկիրը լքելու համար։ ԱԴԾ-ն այլ մանրամասներ չի հայտնում։ Բացի այդ, Մոսկվայում Մեծ Բրիտանիայի դեսպանատան ներկայացուցիչը կանչվել է ՌԴ ԱԳՆ։ «Մոսկվայում Մեծ Բրիտանիայի դեսպանատան ներկայացուցիչը կանչվել է ՌԴ ԱԳՆ՝ հետախուզական գործունեության նշանների համար հավատարմագրման չեղարկման հետ կապված»,- ասվում է հաղորդագրության մեջ։ Մեծ Բրիտանիայի արտաքին գործերի նախարարությունը դեռևս չի մեկնաբանել դիվանագետների արտաքսումը։

14:02 - 10 մարտի, 2025

Պաղեստինի դրոշով ակտիվիստը 16 ժամ է անցկացրել Բիգ Բեն-ի վրա |azatutyun.am|

azatutyun.am: Լոնդոնում Պաղեստինի դրոշով ակտիվիստը բարձրացել է Վեսթմինսթերյան պալատի ժամացույցի աշտարակի՝ Բիգ Բենի վրա, նրան այնտեղից հեռացրել են միայն 16 ժամ անց: Ինչպես գրում է The Independent-ը, փրկարարները երեք անգամ բանակցել են հրշեջ վերելակից և խնդրել ակտիվիստին իջնել, սակայն նա հրաժարվել է՝ ասելով, որ դա կանի միայն իր պայմաններով: Նա նաև սպառնացել է ավելի վեր բարձրանալ, եթե իրեն մոտենան։ Ակտիվիստը եթեր է վարել Instagram-ում, որտեղ ասել է, որ բողոքում է «ոստիկանական բռնաճնշումների և պետական բռնության դեմ»։ Նա իր արարքը բացատրել է բողոքի ցույցով՝ Բիգ Բենն անվանելով այսպես կոչված՝ «ժողովրդավարության կենտրոն» Մեծ Բրիտանիայում: Ակտիվիստը Բիգ Բեն է բարձրացել մարտի 8-ին՝ առավոտյան ժամը 7-ի սահմաններում, նրան այնտեղից իջեցրել են կեսգիշերին, իսկ հետո ձերբակալել։ Միջադեպի պատճառով փակվել է Վեսթմինսթերյան կամուրջը, ինչպես նաև չեղարկվել են բոլոր էքսկուրսիաները խորհրդարանի տարածքում։ «Ազատություն Պաղեստինին» և «դու հերոս ես» կարգախոսներով մի խումբ մարդիկ են հավաքվել Բիգ Բենի դիմաց այս ընթացքում:Լուսանկարը՝ Ջեֆ Մուր/AP

19:08 - 09 մարտի, 2025

Զելենսկին հանդիպել է Չարլզ երրորդի հետ

Լոնդոնում կիրակի օրը Կանադայի և եվրոպական մի շարք երկրների առաջնորդների հետ հանդիպումից հետո Ուկրաինայի նախագահ Վլադիմիր Զելենսկին հանդիպել է Մեծ Բրիտանիայի թագավոր Չարլզ երրորդի հետ: Չարլզ երրորդը Զելենսկուն ընդունել է Նորֆոլքի Սանդրինգհեմ թագավորական կալվածքում, ուր Ուկրաինայի նախագահը ժամանել է ուղղաթիռով Լոնդոնի գագաթնաժողովից հետո։ Թե կոնկրետ ինչ են քննարկել Մեծ Բրիտանիայի թագավորն ու Ուկրաինայի նախագահը, դեռևս հայտնի չէ։ Նախքան հանդիպումը, լրագրողների հետ հանդիպմանն, Ուկրաինայի նախագահն ասել է, որ ցանկանում է, որ «ուկրաինական դիրքորոշումը լսելի լինի»։ Նա հավելել է, որ Կիևը դեռ պատրաստ է Վաշինգտոնի հետ հազվագյուտ օգտակար հանածոների վերաբերյալ գործարք կնքել՝ չնայած ուրբաթ օրը Օվալաձև սենյակում ԱՄՆ նախագահ Դոնալդ Թրամփի հետ ունեցած թեժ քննարկմանը։

10:25 - 03 մարտի, 2025

Մեծ Բրիտանիան և Ֆրանսիան կաշխատեն Ուկրաինայի հետ խաղաղության համաձայնագրի վրա |azatutyun.am|

azatutyun.am: Մեծ Բրիտանիան և Ֆրանսիան կաշխատեն Ուկրաինայի հետ խաղաղության համաձայնագրի վրա և այն կներկայացնեն Դոնալդ Թրամփին, կիրակի օրը հայտարարել է Մեծ Բրիտանիայի վարչապետ Քիր Սթարմերը: Նա հույս ունի, որ եվրոպական «ցանկացողների կոալիցիան» կմիավորվի Կիևին աջակցելու համար, ապա հավելել, որ ցանկացած հրադադար պետք է աջակցի Միացյալ Նահանգները՝ կանխելու Ռուսաստանի նախագահ Վլադիմիր Պուտինի նոր ներխուժումը Ուկրաինա: «Մենք նախագահ Մակրոնի հետ աշխատում ենք այս ծրագրի վրա, որն այնուհետև կքննարկենք ԱՄՆ-ի հետ», - ասել է Սթարմերը: Նա կրկնել է իր պնդումը, որ Ուկրաինայում խաղաղության համաձայնագիրը կաշխատի միայն այն դեպքում, եթե հնարավոր Եվրոպական խաղաղապահ ուժերը անվտանգության երաշխիքներ ստանան Միացյալ Նահանգներից:Լուսանկարը՝ Փիթեր Նիքոլս/Getty Images

16:02 - 02 մարտի, 2025

Լոնդոնը հայտնել է Կիևին 2,84 միլիարդ դոլարի վարկ տրամադրելու մասին |azatutyun.am|

azatutyun.am: Մեծ Բրիտանիայի վարչապետ Քիր Սթարմերը երեկ իր նստավայրում Ուկրաինայի նախագահ Վլադիմիր Զելենսկիի հետ հանդիպելուց հետո հայտարարել Է Կիևին 2,26 միլիարդ ֆունտ ստեռլինգ (2,84 միլիարդ դոլար) վարկ տրամադրելու մասին։ Այս հայտարարությունը նա արել է Լոնդոնում սպասվող համաժողովից առաջ: Եվրոպական առաջնորդները կիրակի օրը կհանդիպեն՝ քննարկելու Ուկրաինայի համար խաղաղության ծրագիրը, իսկ հինգշաբթի օրը նրանք կմասնակցեն Եվրամիության գագաթնաժողովին: «Այս վարկը կբարձրացնի Ուկրաինայի պաշտպանունակությունը և կմարվի սառեցված ռուսական ակտիվների եկամուտների հաշվին», - բանակցություններից հետո գրել է Զելենսկին սոցիալական ցանցերում: Լոնդոնի համաժողովը նոր իմաստ ստացավ օվալաձև կաբինետում առճակատումից հետո, և ԱՄՆ-ի ու Ուկրաինայի նախագահներ Թրամփի և Զելենսկիի հարաբերությունների վերականգնումը, ամենայն հավանականությամբ, կդառնա օրակարգի առանցքային կետը: Վաշինգտոնում Զելենսկիի և Դոնալդ Թրամփի հանդիպումը թեժ վեճի էր վերածվել՝ Թրամփն ու ԱՄՆ փոխնախագահը Զելենսկիին մեղադրեցին «անշնորհակալ» և «անհարգալից» լինելու մեջ, արդյունքում հանդիպումն ավարտվեց առանց որևէ պայմանավորվածության, նաև չստորագրվեց ուկրաինական հանքերի համատեղ շահագործման համաձայնագիրը, որի շուրջ կողմերը շաբաթներ էին բանակցել:Լուսանկարում՝ Ուկրաինայի նախագահ Վլադիմիր Զելենսկիի և Մեծ Բրիտանիայի վարչապետ Քիր Սթարմերի հանդիպումը Լոնդոնում 2025 թվականի մարտի 1-ին: Լուսանկարը՝ Պիտեր Նիկոլս/WPA Pool/Getty

11:03 - 02 մարտի, 2025

Ռուս-ուկրաինական հակամարտությունը կա՛մ արագ կավարտվի, կա՛մ ընդհանրապես չի ավարտվի. Թրամփ |armenpress.am|

armenpress.am: ԱՄՆ նախագահ Դոնալդ Թրամփը հայտարարել է, որ եթե ռուս-ուկրաինական հակամարտությունը շուտափույթ լուծում չստանա, ապա այն կարող է ընդհանրապես չավարտվել։ Այս մասին նա ասել է Սպիտակ տանը Մեծ Բրիտանիայի վարչապետ Քիր Սթարմերի հետ համատեղ մամուլի ասուլիսում։ «Մենք շատ են աշխատում այդ պատերազմն ավարտին հասցնելու համար։ Կարծում եմ՝ մենք մեծ առաջընթաց ենք ունեցել և կարծում եմ, որ ամեն ինչ շատ արագ է առաջ ընթանում…. Մենք ձեզ կտեղեկացնենք ընթացքի մասին: Կա՛մ դա տեղի կունենա բավական արագ, կա՛մ ընդհանրապես տեղի չի ունենա», - ասել է Թրամփը: Ավելի վաղ Օվալաձև աշխատասենյակում Սթարմերի հետ միասին լրագրողների հետ հանդիպմանը ԱՄՆ ղեկավարին հարց էին ուղղել՝ արդյոք նա կարող է վստահել ՌԴ նախագահ Վլադիմիր Պուտինին։ «Վստահել և ստուգել», - ասել է Թրամփը՝ կրկնելով ԱՄՆ նախկին նախագահ Ռոնալդ Ռեյգանի տեսակետը Խորհրդային Միության հետ բանակցությունների մասին։ Թրամփի խոսքով՝ հարկավոր է ստուգել, որովհետև երբեք չգիտես, թե ինչ տեղի կունենա։ «Ես վստահ եմ, որ երբ մենք համաձայնագիր կնքենք, այն կպահպանվի», - ասել է Թրամփը։

09:58 - 28 փետրվարի, 2025

Բրիտանիան պատրաստ է ցամաքային և օդային ուժեր տեղակայել Ուկրաինայում հակամարտության ավարտից հետո |armenpress.am|

armenpress.am: Ռուս-ուկրաինական հակամարտության կարգավորումից հետո Մեծ Բրիտանիան պատրաստ է ցամաքային զորքեր և ավիացիա ուղարկել Ուկրաինա: Այս մասին հայտարարել է Մեծ Բրիտանիայի վարչապետ Քիր Սթարմերը ԱՄՆ նախագահ Դոնալդ Թրամփի հետ համատեղ մամուլի ասուլիսում։ «Ուզում եմ հստակեցնել, որ Մեծ Բրիտանիան պատրաստ է ուղարկել ցամաքային ուժեր և օդային ուժեր համաձայնագրի իրագործումն ապահովելու համար՝ աշխատելով մեր դաշնակիցների հետ, որովհետև դա միակ միջոցն է՝ համոզվելու, որ խաղաղությունը տևական կլինի», - ասել է Սթարմերը։ Նա ընդգծել է, որ խաղաղության համաձայնագիրը պետք է լինի «կոշտ և արդար»։ «Մենք այսօր քննարկել ենք մի ծրագիր՝ հասնելու խաղաղության, որը կոշտ է և արդար», - ասել է Սթարմերը՝ հավելելով, որ Ուկրաինան պետք է ուժեղ լինի, որպեսզի Ռուսաստանը նորից չհարձակվի։ Վաշինգտոն այցի ժամանակ Սթարմերը նաև Մեծ Բրիտանիայի թագավոր Չարլզ 3-րդի անունից հրավեր է փոխանցել Թրամփին՝ պետական այցի համար, ինչն ԱՄՆ նախագահն ընդունել է։

09:56 - 28 փետրվարի, 2025

Մակրոնը և Սթարմերը Թրամփին կառաջարկեն 30,000 խաղաղապահ տեղակայել Ուկրաինայի տարածքում. The Times |tert.am|

tert.am: Ֆրանսիայի նախագահ Էմանուել Մակրոնը և Մեծ Բրիտանիայի վարչապետ Քիր Սթարմերը ցանկանում են համոզել ԱՄՆ նախագահ Դոնալդ Թրամփին չշարունակել Ռուսաստանի հետ երկկողմ բանակցություններն ուկրաինական հակամարտության շուրջ։ Փոխարենը նրանք կառաջարկեն եվրոպական պարտավորություններ՝ ապահովելու Ուկրաինայի ապագա անվտանգությունը, հայտնում է The Times-ը՝ հղում անելով աղբյուրներին։ Մակրոնը Վաշինգտոն կժամանի այսօր՝ փետրվարի 24-ին։ Սթարմերը ԱՄՆ կայցելի հինգշաբթի՝ փետրվարի 27-ին: Հրատարակության համաձայն՝ երկու երկրների ներկայացուցիչները համաձայնել են համակարգել իրենց մոտեցումը՝ փորձելով ազդել Ուկրաինայում հակամարտությունը դադարեցնելու ԱՄՆ նախագահի ծրագրի վրա։ Նրանք համոզված են, որ սա «կրիտիկական պահ է» համաշխարհային անվտանգության համար։ Անվտանգության կոնկրետ ինչ երաշխիքներ կարող են տրամադրվել Կիևին, չի նշվում։ The Wall Street Journal-ը գրել է, որ Էմանուել Մակրոնը և Քիր Սթարմերը Թրամփին կառաջարկեն 30,000 խաղաղապահ տեղակայել Ուկրաինայի տարածքում «ԱՄՆ-ի աջակցությամբ»։ Բայց այս պլանի իրականացումը հնարավոր է, եթե Մոսկվան ու Կիևը համաձայնության գան հրադադարի շուրջ։ Պենտագոնը բազմիցս ասել է, որ Ուկրաինայում ամերիկյան զորքեր չեն լինի։ Փետրվարի 18-ին Էր Ռիադում հանդիպել են Ռուսաստանի և ԱՄՆ-ի ներկայացուցիչները։ Փետրվարի 23-ին ԱՄՆ նախագահի խորհրդական Մայք Ուոլցը հայտնել է, որ ԱՄՆ-ն վերանայում է Ռուսաստանի Դաշնության հետ համագործակցության և Ուկրաինային աջակցելու իր մոտեցումը։

10:13 - 24 փետրվարի, 2025

Լոնդոնը Ռուսաստանի դեմ պատժամիջոցների լայնածավալ փաթեթ կներկայացնի |azatutyun.am|

azatutyun.am: Լոնդոնը Ռուսաստանի դեմ պատժամիջոցների լայնածավալ փաթեթ կներկայացնի փետրվարի 24-ին՝ Ուկրաինայի դեմ պատերազմի տարելիցի օրը: Այդ մասին փետրվարի 23-ին հայտարարել է Մեծ Բրիտանիայի արտաքին գործերի նախարար Դեյվիդ Լամին: Նրա խոսքով՝ պատժամիջոցները կդառնան Ռուսաստանի դեմ միջոցառումների խոշորագույն փաթեթը պատերազմի առաջին սկզբից ի վեր: Դրանք ուղղված կլինեն «նրա ռազմական մեքենայի պայթեցմանը և եկամուտների կրճատմանը», ասվում է Լամիի հայտարարության մեջ: Նա նաև հաստատել է Կիևին ռազմական աջակցությունը Մեծ Բրիտանիայի կողմից, որը ներառում է տարեկան 3 միլիարդ ֆունտ ստեռլինգ (3,78 միլիարդ դոլար) և անհրաժեշտության դեպքում բրիտանական զորքերին խաղաղապահ ուժերի կազմում ներառելու պատրաստակամություն:

12:45 - 23 փետրվարի, 2025

Մեծ Բրիտանիան ՌԴ-ի կողմից խաղաղության ձգտում չի տեսնում․ ԱԳՆ ղեկավար |factor.am|

factor.am: Մեծ Բրիտանիայի արտաքին գործերի նախարար Դեյվիդ Լամմին հայտարարել է, որ չի տեսնում, թե Ռուսաստանը խաղաղության է ձգտում Ուկրաինայի հետ: Այս մասին նա Reuters-ին ասել է Յոհաննեսբուրգում G20-ի արտգործնախարարների փակ հանդիպումից հետո, որտեղ ելույթ է ունեցել ՌԴ նախարար Սերգեյ Լավրովը։ «Մենք անգամ մոտ չենք բանակցային կարգավորմանը»,- ասել է նա՝ պատասխանելով հարցին՝ արդյո՞ք Բրիտանիան կաջակցի Ուկրաինայում խաղաղապահների տեղակայմանը ԱՄՆ-ի կողմից անվտանգության երաշխիքների բացակայության դեպքում: «Ես պետք է ասեմ, որ երբ ես լսում եմ ռուսներին և այն, ինչ Լավրովը հենց նոր ասաց դահլիճում, չեմ տեսնում իրական ձգտում խաղաղության հասնելու համար»,- հավելել է Լամմին։ Նրա խոսքով՝ այժմ կրիտիկական պահ է, եվրոպական երկրները պետք է մեծացնեն պաշտպանության համար ծախսերը։ Նա նաև հաստատել է պաշտպանական ծախսերը ՀՆԱ-ի 2,5%-ին հասցնելու և Ուկրաինային աջակցությունը շարունակելու նպատակը։ «Մենք հավատարիմ ենք Ուկրաինային տարեկան 3 միլիարդ ֆունտ սթերլինգ տրամադրել այնքան ժամանակ, քանի դեռ պատերազմը շարունակվում է»,- ասել է Մեծ Բրիտանիայի արտգործնախարարը։

15:20 - 21 փետրվարի, 2025

Բրիտանիայի վարչապետը Զելենսկիին ասել է, որ «պատերազմի ընթացքում ընտրությունները կասեցնելը ողջամիտ է»

Մեծ Բրիտանիայի վարչապետ Քիր Սթարմերը հեռախոսազրույց է ունեցել Ուկրաինայի նախագահ Վլադիմիր Զելենսկիի հետ: Այս մասին հաղորդագրություն է տարածել Միացյալ Թագավորության կառավարությունը: Հեռախոսազրույցի ընթացքում Սթարմերը ընդգծել է, որ անհրաժեշտություն կա, որ բոլորը գործեն միասին: «Վարչապետը իր աջակցությունն է հայտնել նախագահ Զելենսկիին՝ որպես ժողովրդավար կերպով ընտրված առաջնորդի ու ասել, որ միանգամայն ողջամիտ է պատերազմի ընթացքում ընտրությունները կասեցնելը, ինչպես Միացյալ Թագավորությունն է արել Երկրորդ Համաշխարհային պատերազմի ժամանակ»,- ասվում է հաղորդագրության մեջ: Վարչապետը վերահաստատել է իր աջակցությունը Ուկրաինայում կայուն խաղաղության հաստատմանն ուղղված ԱՄՆ նախաձեռնած ջանքերին, որոնք Ռուսաստանին հետ են պահում հետագա ագրեսիայից։ Երեկ ԱՄՆ նախագահ Դոնալդ Թրամփը հայտարարել է, որ Ուկրաինային անհրաժեշտ են ընտրություններ ու նշես, որ Վլադիմիր Զելենսկիի վարկանիշը 4 տոկոս է: Ուկրաինայի նախագահն էլ պատասխանել է այս հայտարարությանը՝ նշելով, որ «Թրամփն ապատեղեկատվության պղպջակի մեջ է»:

09:59 - 20 փետրվարի, 2025

Սթարմերը հայտարարել է, որ պատրաստ է զորքեր տեղակայել Ուկրաինայում |azatutyun.am|

azatutyun.am: Մեծ Բրիտանիայի վարչապետ Քիր Սթարմերը հայտարարել է, որ ինքը «պատրաստ է և ցանկանում է» բրիտանական զորքեր տեղակայել Ուկրաինայում՝ օգնելու խաղաղ համաձայնագրի իրականացմանը, որը, նրա խոսքով, հնարավորություն կտա դադարեցնելու ռազմական գործողությունները։ Փետրվարի 16-ին Daily Telegraph-ում հրապարակված հոդվածում Սթարմերը նշել է, որ որոշումը «հեշտ» չի ընդունել, սակայն կարծում է, որ այն կարող է ապահովել Մեծ Բրիտանիայի և ամբողջ եվրոպական մայրցամաքի անվտանգությունը։ «Մեծ Բրիտանիան պատրաստ է առաջատար դեր խաղալ Ուկրաինայի անվտանգության երաշխիքների տրամադրման արագացման գործում։ Սա ներառում է շարունակական աջակցություն ուկրաինացի զինվորականներին, որոնց համար Բրիտանիան արդեն տարեկան 3 միլիարդ ֆունտ ստեռլինգ է տրամադրում առնվազն մինչև 2030 թվականը», - ասել է վարչապետը՝ շարունակելով․ - «Բայց սա նաև նշանակում է ցանկություն և պատրաստակամություն՝ նպաստելու Ուկրաինայի անվտանգության ապահովմանը`անհրաժեշտության դեպքում նաև սեփական զորքերի տեղակայմամբ, եթե դրա անհրաժեշտությունը կա»։ Սթարմերի այս հայտարարությունը հնչում է Ֆրանսիայում այսօր նախատեսված եվրոպական առաջնորդների գագաթնաժողովի ֆոնին, որտեղ կքննարկվի ուկրաինական պատերազմի հարց, ինչպես նաև այն մտահոգությունների ֆոնին, թե Սաուդյան Արաբիայում Վաշինգտոնը կարող է Մոսկվայի հետ գործարք կնքել, որը կարող է հակասել եվրոպական անվտանգության շահերին:

11:44 - 17 փետրվարի, 2025