Միացյալ Թագավորություն

Պետական կարգը՝ միապետություն
Մայրաքաղաքը՝ Լոնդոն
Տարածքը՝ 244 հզ. կմ
Բնակչությունը՝ 59,8 մլն
Պետական լեզուն՝ անգլերեն
Դրամական միավորը՝ ֆունտ ստեռլինգ

Միացյալ Թագավորությունն ունի մասամբ կարգավորվող շուկայական տնտեսություն։ Ըստ շուկայական փոխարժեքների՝ Միացյալ Թագավորությունը համարվում է աշխարհում 8-րդ և Եվրոպայում 2-րդ (Գերմանիայից հետո) ամենամեծ տնտեսություն ունեցող պետությունը։ Թագուհու գանձապետարանը, որը գլխավորում է կանցլերը, պատասխանատու է բրիտանական կառավարության կողմից հասարակական ֆինանսական և տնտեսական քաղաքականության մշակման և կիրառման համար։

Անգլիայի բանկը կամ Միացյալ Թագավորության կենտրոնական բանկը պատասխանատու է ազգային արտարժույթի՝ ֆունտ ստերլինգի թողարկման համար։ Տուրիզմը համարվում է բրիտանական տնտեսության ամենակարևոր մասը, և 2004թ․ 27 մլն զբոսաշրջիկներով պետությունը զբաղեցնում է 6-րդ տեղը համաշխարհային տուրիզմի շարքերում, իսկ Լոնդոնը համարվում է զբոսաշրջիկների կողմից ամենաշատ այցելվող քաղաքը աշխարհում։

Լոնդոնը և Կիևը կկարողանան պաշտպանական ոլորտում 2 մլրդ ֆունտ ստեռլինգի պայմանագրեր կնքել |1lurer.am|

1lurer.am: Ուկրաինայի նախագահը Լոնդոնում հանդիպել է Մեծ Բրիտանիայի նորընտիր վարչապետի հետ: Ուկրաինական կողմի տվյալով՝ Վոլոդիմիր Զելենսկին և Քիր Սթարմերը քննարկել են ռուս-ուկրաինական հակամարտությունը, մասնավորապես՝ իրավիճակը ռազմաճակատում: Այնուհետև Զելենսկու և Սթարմերի ներկայությամբ Ուկրաինայի պաշտպանունակությանը վարկային աջակցության մասին համաձայնագիր է ստորագրվել: Փաստաթղթով նախատեսվում է օգնություն տրամադրել հակաօդային պաշտպանության համակարգերի, զրահատեխնիկայի, զինամթերքի վերանորոգման և մասնակի արտադրության ոլորտում։ Լոնդոնը և Կիևը կկարողանան 2 միլիարդ ֆունտ ստեռլինգի պայմանագրեր կնքել: Ընդ որում՝ այս գումարը վերջնական չէ և, հնարավոր է, ավելանա:

20:13 - 19 հուլիսի, 2024

Նիկոլ Փաշինյանն այցելել է ՄԹ-ում ՀՀ դեսպանության նոր շենք

Աշխատանքային այցով Միացյալ Թագավորությունում գտնվող վարչապետ Նիկոլ Փաշինյանը տիկնոջ՝ Աննա Հակոբյանի հետ, ԱԳ նախարար Արարատ Միրզոյանի ուղեկցությամբ այցելել է ՄԹ-ում ՀՀ դեսպանության նոր շենք: Այն գտնվում է Լոնդոնի կենտրոնում: Վարչապետը շրջել է դեսպանությունում, ծանոթացել աշխատանքային պայմաններին:

18:24 - 19 հուլիսի, 2024

Արարատ Միրզոյանն ու Միացյալ Թագավորությանը ներկայացուցիչը մտքեր են փոխանակել տարածաշրջանային հարցերի շուրջ

ՀՀ ԱԳ նախարար Արարատ Միրզոյանը հանդիպում է ունեցել Միացյալ Թագավորության արտաքին, համագործակցության և զարգացման հարցերով պետքարտուղար Դեյվիդ Լամմիի հետ։ Այս մասին հայտնում են Արտաքին գործերի նախարարությունից: Քննարկվել են երկկողմ օրակարգի հարցեր։ Անդրադարձ է կատարվել ՀՀ-ՄԹ քաղաքական երկխոսության և փոխադարձ հետաքրքրություն ներկայացնող ոլորտներում հարաբերությունների խորացման հնարավորություններին՝ նախորդ տարի նոյեմբերին մեկնարկած ռազմավարական երկխոսությանը համահունչ: ՀՀ ԱԳ նախարարը ներկայացրել է Հայաստանի և Ադրբեջանի միջև հարաբերությունների կարգավորման գործընթացում վերջին զարգացումները՝ շեշտելով սեղմ ժամկետներում խաղաղության պայմանագրի ստորագրման հնարավորությունը և կարևորությունը: Նախարար Միրզոյանը շնորհակալություն է հայտնել խաղաղության գործընթացով ՄԹ հետաքրքրվածության և աջակցության համար:

18:43 - 18 հուլիսի, 2024

Նիկոլ Փաշինյանը ներկա է գտնվել Եվրոպական քաղաքական համայնքի 4-րդ գագաթնաժողովի բացմանը

Հայաստանի Հանրապետության վարչապետ Նիկոլ Փաշինյանը Միացյալ Թագավորությունում՝ Բլենհայմյան պալատում, մասնակցում է Եվրոպական քաղաքական համայնքի 4-րդ գագաթնաժողովին: Ինչպես տեղեկանում ենք ՀՀ վարչապետի աշխատակազմի տարածած հաղորդագրությունից, նախ տեղի է ունեցել պատվիրակությունների ղեկավարների դիմավորման արարողությունը: ՀՀ վարչապետին և մյուս երկրների առաջնորդներին դիմավորել է Մեծ Բրիտանիայի վարչապետ, սըր Քիր Սթարմերը: Այնուհետև տեղի է ունեցել միջոցառման բացման և մասնակիցների տեսալուսանկարահանման արարողությունը: Միջոցառման շրջանակում վարչապետը շարունակում է երկկողմ հանդիպումներ ունենալ այլ երկրների գործընկերների հետ:

16:25 - 18 հուլիսի, 2024

Նիկոլ Փաշինյանը հրաժարվել է Լոնդոնում Իլհամ Ալիևի հետ հանդիպել․ Հիքմեթ Հաջիև

Նիկոլ Փաշինյանը հրաժարվել է Ալիևի հետ հանդիպել Եվրոպական քաղաքական համայնքի գագաթնաժողովում։ Այս մասին, ադրբեջանական ԶԼՄ-ների փոխանցմամբ, հայտարարել է Ադրբեջանի նախագահ Իլհամ Ալիևի օգնական Հիքմեթ Հաջիևը։ «Հայաստանի՝ այս հանդիպումից հրաժարվելը համարում ենք երկխոսությունից և խաղաղության օրակարգն առաջ մղելուց հետ կանգնելու մտադրության դրսևորում»,- ասել է նա։ Ըստ Հաջիևի՝ հանդիպում անցկացնելու առաջարկով հանդես է եկել Մեծ Բրիտանիան։ Համաձայն առաջարկի՝ պետք է նախ տեղի ունենար Հայաստանի վարչապետի, Ադրբեջանի նախագահի և Մեծ Բրիտանիայի վարչապետի հանդիպումը, ապա շարունակվեր Հայաստան-Ադրբեջան ֆորմատով։

13:53 - 18 հուլիսի, 2024

Ալիևը մեկնել է Լոնդոն՝ Եվրոպական քաղաքական համայնքի գագաթնաժողովին մասնակցելու |factor.am|

factor.am: Ադրբեջանի նախագահ Իլհամ Ալիևը մեկնել է Լոնդոն։ Ադրբեջանական լրատվամիջոցների հաղորդմամբ՝ նա մասնակցելու է հուլիսի 17-ից 20-ը նախանշված Եվրոպական քաղաքական համայնքի 4-րդ գագաթնաժողովին։ Հիշեցնենք՝ Ալիևը հրաժարվել էր մասնակցել Եվրոպական քաղաքական համայնքի նախորդ գագաթնաժողովին, որն անցկացվել էր 2023 թվականի հոկտեմբերին իսպանական Գրանադայում կայացած։ Հավելենք, որ ՀՀ վարչապետ Նիկոլ Փաշինյանը նույնպես աշխատանքային այցով մեկնել է Լոնդոն՝ գագաթնաժողովին մասնակցելու։ Հայտնի է նաև, որ Թուրքիայի նախագահ Ռեջեփ Թայիփ Էրդողանը չի մասնակցելու գագաթնաժողովին։

12:07 - 17 հուլիսի, 2024

Փաշինյանը մեկնել է Լոնդոն՝ մասնակցելու Եվրոպական քաղաքական համայնքի գագաթնաժողովին

Վարչապետ Նիկոլ Փաշինյանը մեկնել է Լոնդոն՝ մասնակցելու Եվրոպական քաղաքական համայնքի չորրորդ գագաթնաժողովին, հայտնում են վարչապետի աշխատակազմից։ «Վարչապետ Նիկոլ Փաշինյանը տիկնոջ՝ Աննա Հակոբյանի հետ հուլիսի 17-20-ն աշխատանքային այցով մեկնել է Միացյալ Թագավորություն՝ Լոնդոն, որտեղ կմասնակցի Եվրոպական քաղաքական համայնքի չորրորդ գագաթնաժողովին: ՄԹ-ում նախատեսված են երկկողմ հանդիպումներ մի շարք միջազգային գործընկերների հետ»,- ասված է հաղորդագրությունում։

11:11 - 17 հուլիսի, 2024

Գարեթ Սաութգեյթը հրաժարական է ներկայացրել Անգլիայի հավաքականի գլխավոր մարզչի պաշտոնից |armenpress.am|

armenpress.am: Անգլիայի ազգային հավաքականի գլխավոր մարզիչ Գարեթ Սաութգեյթը հրաժարական է տվել։ Այս մասին հայտնում է BBC-ն։ Նշվում է, որ Գարեթ Սաութգեյթը հրաժարական է տվել Անգլիայի հավաքականի գլխավոր մարզչի պաշտոնից՝ Եվրոպայի վերջին երկու առաջնությունների եզրափակիչ խաղերում պարտվելուց հետո հիշեցնելով, որ 2021 թվականին կայացած Եվրոպայի առաջնության եզրափակիչ խաղում (խմբ․ Եվրոպայի առաջնությունը պետք է կայանար 2020 թվականի ամռանը, սակայն կորոնավիրուսի համավարակի պատճառով այն հետաձգեց և կայացավ մեկ տարի հետո) Սաութգեյթի գլխավորած Անգլիայի հավաքականը հետխաղյա 11 մետրանոց հարվածաշարում զիջել էր իտալացիներին, իսկ օրեր առաջ՝ եզրափակչում 2-1 հաշվով զիջեց Իսպանիայի հավաքականին։ «Որպես հպարտ անգլիացի՝ ինձ համար մեծ պատիվ է եղել Անգլիայի հավաքականում խաղալը և հավաքականը գլխավորելը։ Դա ինձ համար ամեն ինչ էր, և ես դրան տվել եմ ամեն ինչ։ Բայց հիմա փոփոխությունների և նոր էջ սկսելու ժամանակն է»,-ասել է Սաութգեյթը։ Անգլիայի հավաքականը գլխավորելու 8 տարիների ընթացքում 53-ամյա մասնագետը 103 խաղ է անցկացրել հավաքականի ղեկին։

15:16 - 16 հուլիսի, 2024

Իսպանիան նվաճեց ֆուտբոլի Եվրոպայի գավաթը, Արգենտինան՝ Ամերիկայի

«Եվրո-2024»-ի եզրափակիչում Իսպանիայի ազգային հավաքականը 2:1 հաշվով հաղթեց Անգլիայի ընտրանուն և հռչակվեց Եվրոպայի չեմպիոն: Հանդիպումը տեղի ունեցավ Բեռլինի Օլիմպիական մարզադաշտում: Հանդիպման բոլոր գոլերը արձանագրվեցին երկրորդ խաղակեսում: Խաղի հաշիվը 47-րդ րոպեին բացեց Նիկո Ուիլյամսը՝ առաջ մղելով իսպանացիներին: 73-րդ րոպեին Քոլ Պալմերի գոլի շնորհիվ Անգլիան կարողացավ հավասարեցնել հաշիվը: Սակայն 86-րդ րոպեին Միկել Օյարսաբալը խփեց Իսպանիայի հաղթական գնդակը: Հարկ է նշել, որ Իսպանիայի հավաքականը Եվրոպայի քառակի չեմպիոն է։ Իսպանիան «Եվրո»-ի հաղթող էր դարձել նաև 1964, 2008 և 2012 թվականներին: Իսպանիայի հավաքականի կիսապաշտպան Ռոդրին ճանաչվեց այս տարվա մրցաշարի լավագույն ֆուտբոլիստ, Լամին Յամալը՝ լավագույն երիտասարդ ֆուտբոլիստ։ Իսկ եզրափակիչ հանդիպման լավագույն ֆուտբոլիստ ճանաչվեց Նիկո Ուիլյամսը։ Երեկ տեղի ունեցավ նաև ֆուտբոլի Ամերիկայի գավաթը։ Արգենտինայի ֆուտբոլի ազգային հավաքականը հաղթեց Կոլումբիային և ռեկորդային 16-րդ անգամ նվաճեց Ամերիկայի գավաթը՝ գերազանցելով Ուրուգվայի ռեկորդը։ Եզրափակիչ հանդիպումը կայացել է ԱՄՆ-ի Մայամի քաղաքի «Հարդ Ռոք» մարզադաշտում և ավարտվել 1։0 հաշվով՝ հօգուտ արգենտինացիների։ Խաղի հիմնական ժամանակն ավարտվեց ոչ-ոքի՝ 0։0 հաշվով և խաղը տեղափոխվեց լրացուցիչ ժամանակ։ Հանդիպման 112-րդ րոպեին արգենտինացի հարձակվող Լաուտարո Մարտինեսը բացեց խաղի հաշիվը։ Այս գոլը նրա համար հինգերորդն էր Ամերիկայի գավաթի ընթացիկ խաղարկությունում: Հանդիպումն այդպես էլ ավարտվեց արգենտինացիների՝ նվազագույն հաշվով հաղթանակով: Արգենտինայի հավաքականի ավագ ու հարձակվող Լիոնել Մեսսին Արգենտինայի մեկնարկային կազմում էր, սակայն խաղի 36-րդ րոպեին ստացած վնասվածքի հետևանքով փոխարինվեց 66-րդ րոպեին։ Փոխարինումից հետո Մեսսին չի կարողացել զսպել հուզմունքն ու արտասվել է։ Խաղի մեկնարկը հետաձգվել էր 1 ժամ 22 րոպեով հանդիպումից առաջ մարզադաշտի տարածքում տեղի ունեցած անկարգությունների պատճառով։ Ականատեսների ու լրատվամիջոցների հաղորդմամբ՝ երկրպագուների մի մասը փորձել է մարզադաշտ մտնել առանց տոմսի։ Նշվում է, որ երկրպագուների հոսքի պատճառով մարզադաշտի մուտքի մոտ հրմշտոց է սկսվել, երկրպագուներից ոմանց կորցրել են գիտակցությունը։

09:37 - 15 հուլիսի, 2024

Բայդենը և Սթարմերը խոստացել են շարունակել աջակցությունն Ուկրաինային |armenpress.am|

armenpress.am: Վաշինգտոնում անցկացվող ՆԱՏՕ-ի գագաթնաժողովի շրջանակներում ԱՄՆ նախագահ Ջո Բայդենը Սպիտակ տանը երկկողմ հանդիպում է անցկացրել Մեծ Բրիտանիայի վարչապետ Քիր Սթարմերի հետ։ Այս մասին հաղորդագրություն է տարածել Սպիտակ տունը։ Բայդենը շնորհավորել է Սթարմերին խորհրդարանական ընտրությունների արդյունքներով Մեծ Բրիտանիայի վարչապետի պաշտոնը ստանձնելու համար և նշել, որ Բրիտանիան ԱՄՆ-ի կարևոր գործընկերն է։ «Ղեկավարները վերահաստատել են իրենց հանձնառությունը ԱՄՆ-Մեծ Բրիտանիա համագործակցությանը համաշխարհային մակարդակով, մինչ նրանք հասցեագրում են ընդհանուր մարտահրավերները և հնարավորությունները։ Նրանք ընդգծել են իրենց ընդհանուր հանձնառությունը Ուկրաինային աջակցությանը, մինչ երկիրը պայքարում է ռուսական ագրեսիայի դեմ», - նշված է Սպիտակ տան հայտարարությունում։ Իր հերթին Բրիտանիայի վարչապետի գրասենյակը հավելել է, որ կողմերը համաձայնել են անել ամեն բան Ուկրաինային աջակցության համար և երաշխավորել, որ ՌԴ նախագահ Վլադիմիր Պուտինը չհաղթի պատերազմում։ Կողմերը նաև ընդգծել են Իսրայելի և պաղեստինյան ՀԱՄԱՍ արմատական շարժման միջև հրադադարի կարևորությունը՝ շեշտելով իրենց հանձնառությունը երկու պետությունների ստեղծման միջոցով խնդրի լուծմանը։ Բրիտանիայի վարչապետի գրասենյակը նաև հայտարարություն է տարածել Ուկրաինային մինչև 2030-2031 ֆինանսական տարին տարեկան առնվազն 3 մլրդ ֆունտ ստեռլինգի (3,85 մլրդ դոլար) ռազմական աջակցությունը շարունակելու մասին, ինչպես խոստացել էր իր նախորդ Ռիշի Սունակը։

10:15 - 11 հուլիսի, 2024

Մեծ Բրիտանիան նոր արտգործնախարար ունի

Մեծ Բրիտանիայի նորանշանակ վարչապետ Կիր Ստարմերը լեյբորիստական նոր կառավարությունում արտգործնախարարի պաշտոնում նշանակել է Դևիդ Լեմիին: «Թագավորն ուրախ էր հաստատել Դևիդ Լեմիի թեկնածությունը արտաքին գործերի նախարարի պաշտոնում»,- հայտնել են Դաունինգ սթրիթից: 51-ամյա Լեմին Ստարմերի թիմում է հայտնվել 2020 թվականին, երբ վերջինս դարձել է Լեյբորիստական կուսակցության առաջնորդը։ 2020-2021 թվականներին զբաղեցրել է արդարադատության ստվերային նախարարի պաշտոնը, որից հետո ստացել է ստվերային արտաքին գործերի նախարարի պորտֆելը։

20:21 - 05 հուլիսի, 2024

Քիր Սթարմերը պաշտոնապես դարձել է Մեծ Բրիտանիայի վարչապետ |hetq.am|

hetq.am: Բուքինգհեմյան պալատում Չարլզ III թագավորի մոտ ընդունելությունից հետո՝ Լեյբորիստական կուսակցության ղեկավար Քիր Սթարմերը պաշտոնապես դարձել է Մեծ Բրիտանիայի 58-րդ վարչապետը։ Այդ մասին հայտնում է BBC-ն։ «Նախօրեին կայացած ընտրությունների ժամանակ Լեյբորիստական կուսակցության համոզիչ հաղթանակից հետո թագավորը սըր Քիրին առաջարկել է դառնալ վարչապետ և ձևավորել նոր կառավարություն»,- ասված է Բուքինգհեմյան պալատի տարածած հաղորդագրության մեջ։ Նախօրեին Մեծ Բրիտանիայում կայացած խորհրդարանական ընտրություններն ամբողջապես փոխել են Միացյալ Թագավորությունում առկա քաղաքական դրությունը։ BBC-ի տվյալներով՝ 647 ընտրական շրջաններում քվեաթերթիկների հաշվարկից հետո լեյբորիստները Համայնքների պալատում ստանում են 412 մանդատ, պահպանողականները՝ 120, լիբերալ դեմոկրատները՝ 71։ Խորհրդարանական մեծամասնության համար բավարար էր 326 մանդատը։ Հաղթող կուսակցության առաջնորդը զբաղեցնում է վարչապետի պաշտոնը և ձևավորում կառավարություն։ Ավելի վաղ, Մեծ Բրիտանիայի արդեն նախկին վարչապետ Ռիշի Սունաքն ընդունել էր պարտությունը և հայտարարել, որ կհեռանա պաշտոնից այն բանից հետո, երբ ավարտվեն իր իրավահաջորդի հանդիպումը միապետի հետ:

16:33 - 05 հուլիսի, 2024

Լեյբորիստները հաղթում են Մեծ Բրիտանիայի ընտրություններում, Սունակն ընդունել է պարտությունը |azatutyun.am|

azatutyun.am: Մեծ Բրիտանիայում երեկ կայացած խորհրդարանական ընտրություններում հաղթում է ընդդիմադիր Լեյբորիստական կուսակցությունը, հաղորդում է BBC-ն՝ վկայակոչելով էքզիթ փոլի տվյալները։ Գործող վարչապետ Ռիշի Սունակը հայտարարել է, որ ընդունում է ընտրություններում Պահպանողական կուսակցության պարտությունը: Դիմելով աջակիցներին Սունակը հայտարարել է․ - «Բրիտանացիներն այսօր սթափեցնող դատավճիռ են կայացրել, հետևություններ անելու շատ բան կա, ես կրում եմ կորստի պատասխանատվությունը»: Նախատեսվում է, որ Լեյբորիստները կստանան պատգամավորական 650 մանդատներից ավելի քան 500-ը, ինչը բացարձակ մեծամասնություն է, նրանք էլ կձևավորեն հաջորդ կառավարությունը, Լեյբորիստների առաջնորդ Կիր Ստարմերն էլ կփոխարինի Սունաքին Մեծ Բրիտանիայի վարչապետի պաշտոնում։ «Փոփոխությունները սկսվում են հենց այս պահից», - Լոնդոնի կենտրոնում, դիմելով աջակիցներին, հայտարարել է Կիր Ստարմերը՝ շարունակելով․ - «երկիրն արթնանում է հույսի արևի լույսից, որն այժմ փայլում է մի երկրի վրա, որը 14 տարի անց իր ապագան վերադարձնելու հնարավորություն ունի»։ Ռիշի Սունակն էր հանդես եկել Համայնքների պալատը ցրելու առաջարկով, Չարլզ 3-րդ թագավորն էլ համաձայնել էր այդ առաջարկին։ Մայիսի 24-ից բրիտանական խորհրդարանը դադարեցրեց աշխատանքը։

10:45 - 05 հուլիսի, 2024

Արմեն Գրիգորյանը իր 2 օգնականների հետ մեկնում է Լոնդոն՝ աշխատանքային հանդիպումներ ունենալու

10:29 - 04 հուլիսի, 2024

Ջուլիան Ասանժը ազատ է արձակվել բրիտանական բանտից և վերադառնում է իր հայրենիք Ավստրալիա

WikiLeaks-ի հիմնադիր Ջուլիան Ասանժը ազատ է արձակվել բրիտանական բանտից և վերադառնում է իր հայրենիք Ավստրալիա ԱՄՆ արտահանձնման համար 12 տարի տևած դատական գործից հետո։ Ասանժը 5 տարի անցկացրել է բրիտանական բանտում, իսկ դրանից առաջ մոտ 7 տարի՝ Լոնդոնում Էկվադորի դեսպանատանը՝ փորձելով խուսափել ձերբակալությունից, որը կարող էր հանգեցնել ցմահ ազատազրկման: Երկուշաբթի օրը Ասանժը համաձայնել է իրեն մեղավոր ճանաչել ծանր հանցագործության մեջ, որը կապված է ԱՄՆ կառավարության գաղտնի փաստաթղթերի արտահոսքի մեջ իր ենթադրյալ դեր ունենալու հետ։ Հիշեցնենք, որ նրան պատկանող կայքը հրապարակել էր ԱՄՆ կառավարության մոտ կես միլիոն գաղտնի ռազմական փաստաթղթեր Իրաքում և Աֆղանստանում ԱՄՆ պատերազմների վերաբերյալ։

09:44 - 25 հունիսի, 2024

Նախագահ Վահագն Խաչատուրյանը շնորհավորական ուղերձ է հղել Չարլզ Երրորդին ազգային տոնի առթիվ

Հանրապետության նախագահ Վահագն Խաչատուրյանը շնորհավորական ուղերձ է հղել Մեծ Բրիտանիայի և Հյուսիսային Իռլանդիայի Միացյալ Թագավորության թագավոր Չարլզ Երրորդին ազգային տոնի՝ Ձերդ Մեծության ծննդյան օրվա կապակցությամբ: Ողերձում ասվում է. «Ջերմորեն շնորհավորում եմ Մեծ Բրիտանիայի և Հյուսիսային Իռլանդիայի Միացյալ Թագավորության ազգային տոնի՝ Ձերդ Մեծության ծննդյան օրվա առթիվ՝ մաղթելով Ձեզ քաջառողջություն և արևշատություն, իսկ Միացյալ Թագավորության բարեկամ ժողովրդին՝ խաղաղություն և բարեկեցություն։ Հայաստանը մեծապես կարևորում է Միացյալ Թագավորության հետ փոխադարձ հարգանքի և վստահության վրա հիմնված հարաբերությունների զարգացումն ու խորացումը՝ ի շահ մեր ժողովուրդների: Օգտվելով առիթից՝ սիրով վերահաստատում եմ Ձերդ Մեծությանը հարմար ժամանակ Հայաստան այցելելու իմ հրավերը»։

15:06 - 15 հունիսի, 2024