Սահմանադրական դատարան - ՍԴ

Ակտիվ քարոզչության փուլը մեկնարկելու է մարտի 2-ից և տևելու է մինչև ապրիլի 3-ը. Սուրեն Պապիկյան |aysor.am|

aysor.am: «Այո»-ի քարոզչությունը նախատեսել ենք իրականացնել մի քանի շերտով, այսօր տեղի ունեցած մամուլի ասուլիսի ժամանակ ասաց սահմանադրական հանրաքվեի «Այո»-ի նախընտրական շտաբի ղեկավար Սուրեն Պապիկյանը: «Ակտիվ քարոզչության փուլը մեկնարկելու է մարտի 2-ից և տևելու է մինչև ապրիլի 3-ը: Նպատակն է հանրութանը ներկայացնել այն կարևոր կետերը, որոնք շարժառիթ են հանդիսացել սահմանադրական փոփոխությունների համար», - ասաց նա:Սուրեն Պապիկյանը նշեց՝ այժմ արձակուրդում է, մի պահ կվերադառնա աշխատանքի՝ պայմանավորված Վրաստան այցով, այնուհետև կրկին արձակուրդ կվերցնի:«Նիկոլ Փաշինյանը ևս նախատեսում է մասնակցել քարոզարշավին և ըստ անհրաժեշտության կլինի արձակուրդում», - ասաց բանախոսը:

11:48 - 26 փետրվարի, 2020

«Քարոզչության ֆինանսավորման հիմնադրամի հաշվին կատարված մուծումների ընդհանուր գումարը չպետք է գերազանցի նվազագույն աշխատավարձի 100 000-ապատիկը․ Դանիել Իոաննիսյան

Իրազեկ քաղաքացիների միավորում հասարակական կազմակերպության ծրագրերի համակարգող Դանիել Իոաննիսյանը ֆեյսբուքյան իր էջում գրում է․ ««Այո»-ի դրամահավաքին հավաքագրվեց 205 մլն դրամ Հանրաքվեի մասին օրենքի հոդված 20-րդ հոդվածը սահմանում է.«Քարոզչության ֆինանսավորման հիմնադրամում մուծումներ կատարելու կարգը1. Հիմնադրամի հաշվին կատարված մուծումների ընդհանուր գումարը չպետք է գերազանցի նվազագույն աշխատավարձի 100 000-ապատիկը (100 մլն դրամը): ․․․...3. ... սույն հոդվածի 1-ին մասով սահմանված չափը գերազանցող մուծումները փոխանցվում են պետական բյուջե:» Հիմա հարց. արդյո՞ք հավաքագրված 205 միլիոնից 105-ը կփոխանցվի պետական բյուջե: Լրացում. Ոչ, չի փոխանցվի, քանի որ ֆորմալ առումով դրամահավաքը արել է ոչ թե «Այո»-ն, այլ «Քաղաքացիական պայմանագիր» կուսակցությունը: Եվ այստեղ մենք նորից գալիս ենք արդեն 10 տարուց ավել քննարկվող՝ ընտրությունների (ու հանրաքվեների) քարոզչության ֆինանսավորման կարգավորումների թերության խնդրին»:

11:38 - 26 փետրվարի, 2020

Սահմանադրական փոփոխությունների հանրաքվեի «Այո»–ի շտաբի ղեկավար Սուրեն Պապիկյանի ասուլիսը․ Ուղիղ |tert.am|

tert.am:

11:16 - 26 փետրվարի, 2020

Անկախ հանրաքվեի արդյունքներից, հաղթելու է ՀՀ հպարտ ու արժանապատիվ քաղաքացին. Փաշինյան |armenpress.am|

armenpress.am: ՀՀ վարչապետ Նիկոլ Փաշինյանը երաշխավորեց, որ, անկախ Սահմանադրության փոփոխությունների հանրաքվեի արդյունքներից, հաղթելու է ՀՀ հպարտ ու արժանապատիվ քաղաքացին: Այս մասին Փաշինյանն ասաց փետրվարի 25-ին հանրաքվեի «Այո» քարոզչական կողմի կազմակերպած դրամահավաքի ընթացքում: «Մենք հույս ունենք, որ հանրաքվեի արդյունքներով «Այո»-ն կհաղթի, հանուն սրա գործադրելու ենք մեր լավագույն ջանքերը, անելու ենք մեզնից կախված ամեն ինչ: Կարող եմ երաշխավորել, թե ով է լինելու հանրաքվեի արդյունքում հաղթողի դերում: Այդ հանրաքվեում, անկախ արդյունքներից, հաղթելու է ՀՀ հպարտ և արժանապատիվ քաղաքացին: Այս քաղաքական թիմը կկտրի սեփական ձեռքերը, բայց մի քվեաթերթիկի կեղծիք թույլ չի տա: Ես անձամբ կկտրեմ սեփական ձեռքերս, բայց մեկ քվեաթերթիկի կեղծիք թույլ չեմ տա»,- ասաց Փաշինյանը: Վարչապետը հայտնեց, որ ինտենսիվ մասնակցելու է հանրաքվեի քարոզարշավին: «Առաջիկայում շատ ինտենսիվ քարոզարշավ ենք սկսելու: Ինքս անձամբ մասնակցելու եմ քարոզարշավին: Քարոզչական հանդիպումներ եմ ունենալու Հայաստանի Հանրապետության բոլոր քաղաքներում: Սա լինելու է շատ կարևոր խոսակցություն, որը լինելու է ոչ միայն մեր կողմից առաջարկվող Սահմանադրության փոփոխության տեքստի, այլև ենթատեքստի մասին»,- ասաց Փաշինյանը: Նիկոլ Փաշինյանը հավելեց, որ քարոզարշավի ընթացքում խոսվելու է նաև Արցախը հանձնողների ու չհանձնողների, հայրենիքը սիրելու ու չսիրելու, թալանածների ու չթալանածների մասին:

21:05 - 25 փետրվարի, 2020

Եկել է Սահմանադրական դատարանը որպես ինստիտուտ կայացնելու հերթը. Փաշինյան |armenpress.am|

armenpress.am: ՀՀ վարչապետ Նիկոլ Փաշինյանի խոսքով՝ եկել է Հայաստանում Սահմանադրական դատարանը՝ որպես ինստիտուտ կայացնելու հերթը: Այս մասին Փաշինյանն ասաց փետրվարի 25-ին Սահմանադրության փոփոխությունների հանրաքվեի «Այո» քարոզչական կողմի կազմակերպած դրամահավաքի ընթացքում: «Հայաստանի Հանրապետությունը հզոր, կենսունակ, ինքնիշխան և լիարժեք պետություն դարձնելու համար մեզ հարկավոր են ինստիտուտներ: 2018թ. մայիսին արձանագրվեց ինստիտուտներից կարևորագույնի՝ քաղաքացու հաղթանակը: Հաջորդ փուլում Հայաստանում վերահաստատվեց ընտրության ինստիտուտը, որովհետև մենք անշրջելիորեն փակեցինք ընտրությունները կեղծելու շրջանը: Հաջորդ փուլում մենք կայացրինք Ազգային ժողովը, որպես ինստիտուտ: Հաջորդ ինստիտուտը, որը կայացավ, կառավարությունն է, որովհետև ՀՀ-ն ընտրեց կառավարություն ու վարչապետ: Արդեն հստակ գծագրել ենք դատական համակարգի՝ որպես ինստիտուտի կայացման ճանապարհը, և հիմա եկել է հերթը՝ ՍԴ-ն որպես ինստիտուտ կայացնելու»,- ասաց Փաշինյանը: Վարչապետը նշեց, որ այս պահին գործող սահմանադրությամբ կա Սահմանադրական դատարանի շատ կոնկրետ նկարագրություն, բայց չկա այդպիսի ՍԴ: Սահմանադրության փոփոխությունների հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը: Սահմանադրության փոփոխությունների հանրաքվեն տեղի կունենա ապրիլի 5-ին: Սահմանադրության փոփոխությունների հանրաքվեի նախընտրական քարոզարշավը մեկնարկել է փետրվարի 17-ին:

20:35 - 25 փետրվարի, 2020

Բադասյանն առերևույթ խնդիր է տեսնում հանրաքվեի արդյունքների՝ ՍԴ-ում հնարավոր բողոքարկման հարցում |armenpress.am|

armenpress.am: ՀՀ արդարադատության նախարար Ռուստամ Բադասյանն առերևույթ խնդիր է տեսնում այն հարցում, որ ապրիլի 5-ի Սահմանադրության փոփոխությունների հանրաքվեի արդյունքները կարող է բողոքարկվել այն Սահմանադրական դատարանում, որի անդամներին պաշտոնավարման առնչությամբ է հանրաքվեն: Այս մասին Բադասյանն ասաց փետրվարի 25-ին Ազգային ժողովում պետական-իրավական հանձնաժողովի կողմից կազմակերպված «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին» (Կ-428-20.12.2019-ՊԻ-011/0) և հարակից օրենքների նախագծերի փաթեթի քննարկում» թեմայով խորհրդարանական լսումների ընթացքում, պատասխանելով խորհրդարանի «Բարգավաճ Հայաստան» խմբակցության անդամ Սերգեյ Բագրատյանի հարցին: Բագրատյանն Արդարադատության նախարարից նախ հետաքրքրվեց, թե որտեղ են բողոքարկվելու Սահմանադրության փոփոխությունների արդյունքները: «ՍԴ կարող են դիմել ԱԺ խմբակցությունները, եթե եղել են այնպիսի խախտումներ, որոնք կարող էին ազդել հանրաքվեի արդյունքների վրա։ Սա է միակ հիմքը: Սահմանադրական դատարանի անդամների ինքնաբացարկի կամ մասնակցության անհնարինության հարցն եք բարձրաձայնում, երբ բողոքարկման դիմումը կլինի, դա արդեն ներքին հարց է: Բավական բարդ հարց է, որի պատասխանը միանշանակ չէ»,- ասաց նախարարը։ Պատգամավորի երկրորդ հարցին, թե շահերի բախում չկա՞ արդյոք, որ ՍԴ 7 դատավորի հարցը լսելու են 9 դատավորները, որոնցից 7-ը շահագրգիռ կողմ են այդ հարցում, Բադասյանը նշեց, որ այո, առերևույթ խնդիր տեսնում է:

13:34 - 25 փետրվարի, 2020

«Ոչ»-ի շտաբին աջակցելու որևէ կարիք չկա, որովհետև «ոչ» քարոզչություն երկրում գոյություն չունի. Էդմոն Մարուքյան |aysor.am|

aysor.am: ԱԺ «Լուսավոր Հայաստան» խմբակցության ղեկավար Էդմոն Մարուքյանը հերքում է մամուլում տարածված լուրերն այն մասին, որ ՀՅԴ հետ լծվել են «ոչ»-ի քարոզարշավին: ««Ոչ»-ի շտաբին աջակցելու որևէ կարիք չկա, որովհետև «ոչ» քարոզչություն երկրում գոյություն չունի», - ասաց Մարուքյանը ֆեյսբուքյան ուղիղ եթերում: Նա նշեց՝ ընտրական գործընթացը պիտի կազմակերպվի և կան հանձնաժողովներ, որտեղ պետք է մարդիկ նշանակվեն աշխատելու համար: «ԼՀԿ-ն ասել է՝ դեմ չէ, որ իր միջոցով լիցենզիա ստացած մարդիկ գնան ու այդ օրն աշխատեն պետության համար: Դա ապաքաղաքական գործ է, նրանք քարոզիչ չեն, որ այդ օրը քարոզեն, հետևելու են արդարությանը: Իշխանական ճամբարից «հայ-հույ», խառնվել են իրար: Տպավորություն է մոտս, որ մարդիկ վախում են, որ հանձնաժողովներում գրագետ, կիրթ մարդիկ են ներգրավվում, կարո՞ղ ա ուզում եք կեղծեք հանրաքվեն՝ վախենում եք», - ասաց Մարուքյանը:

11:32 - 25 փետրվարի, 2020

ՀՀ Սահմանադրության փոփոխությունների հանրաքվեի շրջանակներում ՀՀ գլխավոր դատախազությունում աշխատանքային խումբ է ստեղծվել

2020թ. ապրիլի 5-ին կայանալիք ՀՀ Սահմանադրության փոփոխությունների հանրաքվեի նախապատրաստման և անցկացման ընթացքում հնարավոր ընտրական իրավախախտումների վերաբերյալ ԶԼՄ հրապարակումները, քաղաքացիների հաղորդումները և ՀՀ գլխավոր դատախազություն ստացված ահազանգերը գրանցելու, ուսումնասիրելու, դրանց քննարկման նկատմամբ դատախազական հսկողության արդյունավետությունը բարձրացնելու և այդ ոլորտում ՀՀ դատախազության գործունեությունը համակարգելու նպատակով ՀՀ գլխավոր դատախազի փետրվարի 24-ի հրամանով ստեղծվել է աշխատանքային խումբ: Աշխատանքային խումբն ուսումնասիրելու է ՀՀ Սահմանադրության փոփոխությունների հանրաքվեի նախապատրաստման և անցկացման ընթացքում հնարավոր ընտրական իրավախախտումների վերաբերյալ ստացված հաղորդումները, լուծելու է դրանց ենթակայության հարցը, գործնական աջակցություն է ցուցաբերելու դատախազության կառուցվածքային ստորաբաժանումներին և դատախազներին՝ ընտրական իրավախախտումների վերաբերյալ հաղորդումների քննարկման, նյութերի նախապատրաստման և հարուցված քրեական գործերի նախաքննության օրինականության նկատմամբ դատախազական հսկողություն իրականացնելիս: Հրամանով ՀՀ գլխավոր դատախազն աշխատանքային խմբին հանձնարարել է ընտրախախտումների վերաբերյալ տեղեկատվություն ստանալու, դրանցով նախաձեռնված քրեադատավարական գործընթացների վերաբերյալ պահանջվող տեղեկատվությունն օպերատիվ կերպով տրամադրելու շրջանակներում սերտորեն գործակցել ՀՀ ԿԸՀ-ի, հանրաքվեի ընթացքը լուսաբանող լրատվամիջոցների, դիտորդական առաքելություն իրականացնող և շահագրգիռ այլ կազմակերպությունների հետ: Խնդիր է դրվել ապահովել կատարված աշխատանքների հրապարակայնությունը, որի շրջանակներում իրականացվելու է ընտրական իրավախախտումների վերաբերյալ ԶԼՄ կողմից հրապարակվող տեղեկատվության մշտադիտարկում, ինչպես նաև կազմակերպվելու է քննարկման արդյունքների և կայացված որոշումների օպերատիվ լուսաբանում: Դատախազության կառուցվածքային ստորաբաժանումների և դատախազների առջև խնդիր է դրվել հնարավոր ընտրական իրավախախտումների վերաբերյալ հաղորդումները քննարկել և դրանց ընթացք տալ հնարավորին սեղմ ժամկետներում: Գործընթացը լինելու է ՀՀ գխավոր դատախազի անմիջական վերահսկողության ներքո:

11:15 - 25 փետրվարի, 2020

ԱԺ նախագահը հանրաքվեի դիտարկման առաքելությունների հրավերներ է հղել միջազգային կառույցներին

ՀՀ Ազգային ժողովի նախագահ Արարատ Միրզոյանը ապրիլի 5-ին կայանալիք Սահմանադրության փոփոխությունների հանրաքվեի դիտարկման առաքելությունների հրավերներ է հղել ԵԱՀԿ Խորհրդարանական վեհաժողովի, Անկախ պետությունների համագործակցության Միջխորհրդարանական վեհաժողովի, Եվրոպայի խորհրդի խորհրդարանական վեհաժողովի և Եվրախորհրդարանի նախագահներին: Այս մասին Միրզոյանը գրել է «Ֆեյսբուք»-ի իր էջում: «Ապրիլի 5-ին կայանալիք հանրաքվեն դիտարկող առաքելությունների հրավերներ հղեցի ԵԱՀԿ ԽՎ նախագահ Գեորգի Ծերեթելիին, ԱՊՀ ՄԽ նախագահ Վալենտինա Մատվիենկոյին, ԵԽԽՎ նախագահ Հենրիկ Դայմսին և Եվրախորհրդարանի նախագահ Դավիդ Սասոլիին»,-գրել է Միրզոյանը:

16:55 - 24 փետրվարի, 2020

Այս վտանգները չէին լինի, եթե ժամանակին տրվեր նախկին ռեժիմի գնահատականը, ներդրվեր վեթինգ. «Ժողովրդավարական հայրենիք»

Հաշվի առնելով ստեղծված անկայուն իրավիճակը եւ առկա վտանգները, ինչպես նաեւ նախկին գործընկերային հարաբերությունները Նիկոլ Փաշինյանի հետ «Ժողովրդավարական Հայրենիք» կուսակցությունը ժողովրդի կողմից իրականացված հեղափոխությունն անշրջելի դարձնելու համար աջակցում է սահմանադրական փոփոխության ներկայացված հոդվածներին: Այս մասին հայտարարություն է տարածել «Ժողովրդավարական Հայրենիք» կուսակցության քաղաքական խորհուրդը: Հայտարարությունում ասվում է. «Սահմանադրական դատարանը, ինչպես դատաիրավական, պետական կառավարման եւ ինքնակառավարման ամբողջ համակարգը, տասնամյակներ շարունակ սպասարկել են ժողովրդի իշխանությունը բռնազավթած խմբավորմանը։ 2018թ-ին իշխանափոխությունից հետո վերոթվարկված համակարգերը սահմանադրականության դաշտ բերելու եւ մեղավորներին պատասխանատվության ենթարկելու գործընթացը բավարար չէր եւ իրականացվում էր ոչ հեղափոխական մեթոդներով, որը հանգեցրել է գործող իշխանության տեղապտույտի եւ կառավարման համակարգի ճգնաժամի, ինչը շատ ավելի ցայտուն դրսեւորվեց Սահմանադրական դատարանի դեպքում։ Առնվազը մեկ տարի առաջ պետք է նախաձեռնվեր 2015թ-ի ժողովրդի կողմից մերժված Սահմանադրության համապարփակ փոփոխությունը, այդ դեպքում անհրաժեշտություն չէր առաջանա պետական սուղ միջոցները ներդնել լոկալ հանրաքվե անցկացնել, թեկուզ եւ կարեւոր հարցի շուրջ։ Հանրաքվեի գործընթացը լարվածության մեջ է պահելու ինչպես ամբողջ պետական կառավարման համակարգը, այնպես էլ ողջ ժողովրդին, բնականաբար նախկիններն իրենց հսկայական ֆինանսական ու մեդիա հնարավորությունները կօգտագործեն ապակողմնորոշելու ժողովրդին՝ էլ ավելի խորացնելով լարվածությունն ագրեսիվ փոքրամասնության եւ ժողովրդի լայն զանգվածների միջեւ, մեծացնելով առկա ատելության չափաբաժինը, միաժամանակ նախկիններին վերակենդանանալու լրացուցիչ լիցք է հաղորդվում, փորձելով կրկին սողոսկել քաղաքական դաշտ, ինչը գործող ական է դառնալու մեր պետականության համար։ Այս վտանգները չէր լինի, եթե ժամանակին՝ հեղափոխությունից անմիջապես հետո, տրվեր նախկին ռեժիմի իրավաքաղաքական գնահատականը, ներդրվեր վեթթինգ եւ անցումային արդարադատությունը, գողերին եւ ավազակներին պատասխանատվության ենթարկեին, վերադարձվեր պետությունից եւ ժողովրդից գողացված տասնյակ միլիարդավոր դոլարները։ Հաշվի առնելով ստեղծված անկայուն իրավիճակը եւ առկա վտանգները, ինչպես նաեւ նախկին գործընկերային հարաբերությունները Նիկոլ Փաշինյանի հետ «Ժողովրդավարական Հայրենիք» կուսակցությունը ժողովրդի կողմից իրականացված հեղափոխությունն անշրջելի դարձնելու համար աջակցում է սահմանադրական փոփոխության ներկայացված հոդվածներին, համոզված լինելով, որ հանրաքվեի այո արդյունքը լրացուցիչ լիցք կհաղորդի իշխանություններին հեղափոխությունը լիարժեք ու վերջնական հաղթանակի հասցնելու համար»:

15:27 - 24 փետրվարի, 2020

«Համերաշխություն» կուսակցությունը և համանուն շարժումը կոչ են անում չմասնակցել սահմանադրական հանրաքվեին

«Համերաշխություն» կուսակցությունը և համանուն շարժումը կոչ են անում չմասնակցել սահմանադրական հանրաքվեին, դրանով կասեցնել ազգակործան ծրագրերի իրականացման հերթական փուլը։ Այս մասին կուսակցությունը հայտարաություն է տարածել: «Սիրելի՛ հայրենակիցներ, «Համերաշխություն» կուսակցության և համանուն շարժման հազարավո՛ր կողմնակիցներ, Ինչպես տեսնում ենք, մեր երկու պետականությունները այս իշխանությունների ծրագրած և հետևողական գործողությունների արդյունքում ներքաշվում են պառակտումների և համընդհանուր քաոսի մեջ։ Ծրագրված հերթական քայլերից մեկը, այսպես կոչված, սահմանադրական հանրաքվեն է, որի բուն նպատակն է ժողովրդի անունը շահարկելով ճանապարհ բացել մեր հասարակության ձեռքերով, ավելի ճիշտ՝ «ակտիվ» մասնակցությամբ Ամուլսարի շահագործման և Ստամբուլյան կոնվենցիայի ընդունման, ԼԳԲՏ համայնքի կայացման, ռուսական ռազմաբազայի դուրս բերման, Իրանի հետ սահմանի փակման, Եկեղեցու վարկաբեկման, Արցախի հարցի ձախողման համար (չհաշված մեզ դեռևս անհայտ հակազգային գործողությունները)։ Սիրելի՛ հայրենակիցներ, «Համերաշխություն» կուսակցությունը և համանուն շարժումը կոչ են անում չմասնակցել սահմանադրական հանրաքվեին, դրանով կասեցնել ազգակործան ծրագրերի իրականացման հերթական փուլը։ Մենք կարծում ենք, որ շատ կարճ ժամանակահատվածում Հայաստանում կլինի բոլորովին այլ քաղաքական իրավիճակ: Աստված մեզ պահապան»,- ասվում է հայտարարությունում։

12:51 - 24 փետրվարի, 2020

Վահե Գրիգորյանի աշխատավարձի ու պարգևավճարների մասին սխալ ու ճիշտ պնդումները |fip.am|

fip.am: Մամուլը տևական ժամանակ գրում է, որ Սահմանադրական դատարանի դատավոր Վահե Գրիգորյանը դատավոր ընտրվելուց (2019 թ.-ի հունիսի 18) հետո, թեև չի մասնակցել որևէ նիստի, բայց լիարժեքորեն օգտվել է պետության կողմից օրենքով իրեն վերապահված հնարավորություններից՝ ծառայողական ավտոմեքենա, բենզին, պարգևավճար, աշխատավարձ: ՍԴ-ից հայտնել էին, որ Վահե Գրիգորյանին հատկացվել է Hyundai մակնիշի 006 ՕՏ 01 պետհամարանիշով ծառայողական ավտոմեքենա, որն իր կողմից շահագործման ընթացքում առաջացած անսարքությունների պատճառով վերանորոգվել է և վերստին հատկացվել նրան։ Բացի այդ, Վահե Գրիգորյանին նաև տրամադրվել է 1180 լիտրի համար նախատեսված բենզինի կտրոն։ Վահե Գրիգորյանը նշեց, որ ՍԴ-ի կողմից ներկայացված աշխատավարձի չափը (793.000 դրամ) չհարկված աշխատավարձն է, և փաստացի ինքը հարկումից հետո ստանում է շուրջ 600.000 դրամ։ Ինչ վերաբերում է պարգևավճարներին, ապա նա հաստատեց, որ բացառությամբ դեկտեմբեր և հունվար ամիսների, ստացել է պարգևավճար, բայց ոչ թե 1.746.100 դրամ, ինչպես ՍԴ-ն է ներկայացնում, այլ 1.254.000 դրամ՝ հարկումից հետո։ Անդրադառնալով Hyundai մակնիշի ծառայողական ավտոմեքենային՝ Վահե Գրիգորյանը հաստատեց, որ մեքենան ստացել է, բայց կարճ ժամանակ է օգտվել, որովհետև անսարք է եղել։ «Փաստացի, այդ մեքենան օգտագործել եմ 1,5-2 ամիս և ի տարբերություն մյուս ՍԴ անդամների՝ ես երբեք վարորդ չեմ վերցրել»,- ասաց նա՝ հավելելով, որ 1180 լիտրի համար նախատեսված բենզինի կտրոն ևս վերցրել է։ Գրիգորյանը նաև տեղեկացրեց, որ դեկտեմբեր ամսից դադարել են իրեն պարգևավճարներ և բենզին տրամադրել։ Խոսելով աշխատանքի չգնալու լուրերի մասին՝ Գրիգորյանն ասաց, որ այդ պնդումը բացարձակ սուտ է, քանի որ ինքն աշխատանքի չի հաճախել ընդամենը 7 աշխատանքային օր։ Նյութն ամբողջությամբ՝ այստեղ։

15:29 - 23 փետրվարի, 2020

ՀՅԴ-ն ու ԼՀԿ-ն պատրաստվում են օգնել «ոչ»-ին տեղամասային հանձնաժողովներում անդամներ նշանակելու հարցում |pastinfo.am|

pastinfo.am: «Ոչ»-ի շտաբի լիազոր ներկայացուցիչ, իրավապաշտպան Ռուբեն Մելիքյանը խնդրանքով դիմել է չորս քաղաքական ուժերի, որպեսզի տեղամասային հանձնաժողովի անդամի նշանակման ենթակա անձանց մասով օգնեն շտաբին։ «Ես ինքս դիմել եմ այն քաղաքական ուժերին, որոնք ունեն համակարգված տվյալներ ընտրական տեղամասերում հանձնաժողովների անդամ իրավունք ունեցող անձանց մասին»,-այս մասին ասաց Մելիքյանը։ Նա նշեց, որ այդ չորս քաղաքական ուժերն են՝ «Հայ Յեղափոխական Դաշնակցությունը», «Լուսավոր Հայաստան» կուսակցությունը, «Բարգավաճ Հայաստան» կուսակցությունն ու «Հայաստանի հանրապետական» կուսակցությունը։ «Խոսքն այս 4 քաղաքական ուժերին է վերաբերում, քանի որ նրանք են հանդես եկել «այո»-ն բացառող հայտարարություններով»,-հայտեց Մելիքյանը։ Մելիքյանի փոխանցմամբ, իր խնդրանքին դեռևս արձագանքել են «Լուսավոր Հայաստան» կուսակցությունն ու «Հայ Յեղափոխական Դաշնակցությունը» և պատրաստակամություն են հայտնել օգնել «ոչ»-ին տեղամասային հանձնաժողովներում անդամներ նշանակելու հարցում։ Շարունակությունը՝ pastinfo.am-ում

12:56 - 22 փետրվարի, 2020

Կոչ ենք անում ՀՀ քաղաքացիներին ձեռնպահ մնալ հակասահմանադրական այս միջոցառմանը մասնակցելուց․ «Վերնատուն» հասարական-քաղաքական ակումբ

«Վերնատուն» հասարական-քաղաքական ակումբը հայտարարություն է տարածել հանրաքվեի վերաբերյալ։ «Ապրիլի 5-ին կազմակերպվող հանրաքվեն հակասահմանադրական է, հակաիրավական ու հակաժողովրդավարական։ Հանրաքվեի է դրված Սահմանադրության արդեն իսկ ուժը կորցրած 213–րդ հոդվածում փոփոխություններ անելու հարցը, ինչն իրավական առումով նոնսենս է։ Հանրաքվեի որոշումը խոցելի է և՛ ձևի, և՛ բովանդակության առումով։ Այս հակասահմանադրական գործընթացի մեջ իշխանությունը ներքաշել է խորհրդարանական մեծամասնությանը և ուզում է ներքաշել նաև ՀՀ քաղաքացիներին։ Հարկ է ընդգծել, որ իր լիազորությունների շրջանակներում այս քաղաքական արկածախնդրությունը կարող էր կանխել ՀՀ նախագահը, ով, սակայն, նախընտրեց այլ տարբերակ՝ դրանով կիսելով հետագա զարգացումների պատասխանատվությունը։ Մենք արձանագրում ենք, որ․ –հանրաքվեի օգնությամբ փորձ է արվում ոչնչացնել իշխանությունների բաժանման ու հավասարակշռման սկզբունքը, –Սահմանադրական դատարանը դարձնել գործադիր իշխանության կցորդ, –ուղիղ ժողովրդավարության գաղափարի արժեզրկմամբ ու շահարկմամբ հաստատել մեկ անձի իշխանություն։ Սահմանադրական հանրաքվեն կեղծ օրակարգ է և ոչինչ չի տալու շարքային քաղաքացուն։ Հանրաքվեով շեղում են հանրային ուշադրությունն Արցախի շուրջ տեղի ունեցող վտանգավոր զարգացումներից, ինչպես նաև ձեռնասուն ՍԴ ստեղծելու միջոցով ուզում են դակել քաղաքական, տնտեսական բնույթի վիճահարույց որոշումները, այդ թվում՝ հանրային հնչեղություն ստացած միջազգային համաձայնագրերը։ Ելնելով վերը նշվածից՝ ակումբը կոչ է անում ՀՀ քաղաքացիներին ձեռնպահ մնալ հակասահմանադրական այս միջոցառմանը մասնակցելուց։ Պետք է մերժել ոչ լեգիտիմ հանրաքվեն և մաս չկազմել բռնապետական ռեժիմի հաստատման գործընթացին»,-ասված է հայտարարությունում։

12:16 - 22 փետրվարի, 2020

Պատրա՞ստ ենք մինչև 2035թ.-ը համբերել, ես՝ ոչ․ սահմանադրությունը պետք է իրականություն դառնա |24news.am|

24news.am: «Մենք չենք հանդուրժի, որ ՍԴ-ում տեղի ունենան երևույթներ, որոնք կանգնեցնելու կամ խաթարելու են այն կարևորագույն ռեֆորմների ճանապարհը, որը բերելու ենք։ Հիմա գործում է մի ՍԴ, որը չի արտացոլում այսօրվա իրականությունը և չի կարողանալու անաչառ արբիտր լինել»,- այս մասին ասել է ԱԺ «Իմ քայլը» խմբակցության պատգամավոր Արման Բոշյանը։ «Մենք պատրա՞ստ ենք մինչև 2035թ․-ը համբերել, որ այսօրվա գործող սահմանադրությունն իրականության հետ համապատասխանի։ Ես պատրաստ չեմ, կարծում եմ՝ քաղաքացիներն էլ։ Թույլ փաստարկ է, թե ՍԴ-ի հարցը փոքր խնդիր է։ Հարցը մեկ նախադասության մեջ չէ։ Խոսքը պրոցեսը վերականգնելու մասին է, իսկ սրան անվանել փոքր խնդիր, ընդունելի չեմ համարում»,- ասել է պատգամավորը։

10:26 - 22 փետրվարի, 2020

Վերջնական քաղաքական որոշում չունենք այդ առումով և դեռ ժամանակ ունենք. Լիլիթ Մակունցը՝ Վենետիկի հանձնաժողով դիմելու մասին |aysor.am|

aysor.am: Քաղաքական ուժերը, որոնք հանրաքվեն բոյկոտելու կամ չմասնակցելու կոչ են անում դրանով իսկ անթաքույց իրականացնում են «ոչ»-ի քարոզարշավ, լրագրողներին ասաց «Իմ քայլը» խմբակցության ղեկավար Լիլիթ Մակունցը: «Չնայած հայտարարվել է, որ «ոչ»-ի քարոզ չի իրականացվում, այն քաղաքական ուժերը, որոնք բոյկոտի կամ չմասնակցելու կոչ են անում դրանով իսկ անթաքույց իրականացնում են «ոչ»-ի քարոզարշավ: Ինձ համար անհասկանալի է՝ ինչու այս պարագայում քաղաքական պատասխանատվություն չեն ստանձնում և չեն իրականացնում քարոզարշավ», - ասաց Մակունցը: Հարցին՝ ինչո՞ւ սահմանադրական փոփոխությունների վերաբերյալ նախագիծը չի ուղարկվել Վենետիկի հանձնաժողով՝ եզրակացության համար, այն դեպքում, որ ՍԴ դատավորների վաղ կենսաթոշակի նախագիծն ուղարկվել էր, գուցե չկա՞ վստահություն հանձնաժողովի նկատմամբ՝ Մակունցը պատասխանեց. «Այն, ինչ մենք նախատեսում ենք անել՝ վերականգնելն է մոդելը, որը 2015թ.-ի սահմանադրական փոփոխությամբ հաստատվել է, սակայն այս պահին չի գործում: Հիմա չի գործում այն Սահմանադրական դատարանը, որի մոդելը հաստատել են միջազգային կառույցները: Պիտի ասեմ, որ մենք վերջնական քաղաքական որոշում չունենք այդ առումով և դեռ ժամանակ ունենք, բայց տարակուսանք է առաջանում, որովհետև գործ ունենք փաթեթի հետ, որն արդեն իսկ հաստատվել է, որովհետև մենք ընդամենը վերականգում ենք այդ՝ հավանության արժանացած փաթեթը»:

15:57 - 21 փետրվարի, 2020