Ղազախստան

Պուտինն ու Տոկաևը ռազմավարական գործընկերության խորացման մասին հայտարարություն են ստորագրել |1lurer.am|

1lurer.am: Աստանայում տեղի է ունեցել Ռուսաստանի և Ղազախստանի նախագահների հանդիպումը: Պաշտոնական հաղորդագրությունների համաձայն՝ Վլադիմիր Պուտինն ու Կասիմ Ժոմարտ Տոկաևը քննարկել են փոխգործակցության զարգացման հեռանկարներն արդյունաբերության, էներգետիկայի, նավթագազային արդյունաբերության, էներգառեսուրսների տարանցման, մեքենաշինության, տրանսպորտի, ֆինանսների և այլ ոլորտներում: Հանդիպման ավարտին ստորագրվել է 20 փաստաթուղթ, այդ թվում՝ Նոր աշխարհակարգի պայմաններում ռազմավարական գործընկերության խորացման մասին համատեղ հայտարարությունը: Այն նախատեսում է միջպետական երկխոսություն՝ «երկու երկրների ինքնիշխանության, անկախության և տարածքային ամբողջականության փոխադարձ հարգանքի հիման վրա»: Ստորագրված այլ փաստաթղթերի թվում են երկաթուղային և տրանսպորտային ենթակառուցվածքների զարգացման գործում փոխգործակցության կազմակերպման, Ղազախստանին նավթի և նավթամթերքների մատակարարման ոլորտում համագործակցության երկարաձգման, Ռուսաստանի Քննչական կոմիտեի և Ղազախստանի ՆԳՆ-ի միջև համագործակցության և այլ համաձայնագրեր: Վլադիմիր Պուտինը Ղազախստանին պաշտոնապես հրավիրել է դառնալ BRICS-ի գործընկեր երկիր։ Հանդիպման ավարտին տեղի է ունեցել երկու նախագահների մասնակցությամբ մամուլի ասուլիս։ Տոկաևը նշել է, որ Պուտինի պետական այցը «պատմական իրադարձություն է, որը կարևոր հանգրվան է ղազախա-ռուսական հարաբերությունների զարգացման գործում»։ «Ղազախստանի համար Ռուսաստանը ռազմավարական գործընկեր է և հուսալի դաշնակից»,- ընդգծել է Տոկաևը, հավելել՝ երկու երկրների միջև որևէ վիճելի հարց չկա. Մոսկվան ու Աստանան «միշտ գտնում են հավասարակշռված լուծումներ, որոնք առավելագույնս հաշվի են առնում երկու պետությունների շահերը»։ Պուտինն էլ գոհունակություն է հայտնել բանակցություններից: Կրեմլի ղեկավարի խոսքով՝ միջազգային առանցքային խնդիրների վերաբերյալ Ռուսաստանի և Ղազախստանի դիրքորոշումները շատ մոտ են: Պուտինը Տոկաևին հրավիրել է Սանկտ Պետերբուրգ՝ դեկտեմբերի 24-25-ը մասնակցելու Եվրասիական տնտեսական բարձրագույն խորհրդի նիստին և ԱՊՀ ղեկավարների ոչ պաշտոնական հանդիպմանը:

Այսօր 11:42

ՌԴ նախագահ Պուտինը ժամանել է Ղազախստան |1lurer.am|

1lurer.am: Ռուսաստանի նախագահ Վլադիմիր Պուտինը պետական այցով ժամանել է Ղազախստան: Այցի ընթացքում ՌԴ նախագահը բանակցություններ կվարի իր ղազախ գործընկեր Կասիմ-Ժոմարտ Տոկաևի հետ, կստորագրվեն մի շարք երկկողմ փաստաթղթեր։ Կրեմլի մամուլի ծառայությունն ավելի վաղ հայտնել էր, որ բանակցությունների ընթացքում նախատեսվում է քննարկել ռուս-ղազախական ռազմավարական գործընկերության և դաշնակցային հարաբերությունների զարգացումը տարբեր ոլորտներում, այդ թվում՝ հաշվի առնելով ընթացիկ տարում Ղազախստանի նախագահությունը ՀԱՊԿ-ում, իսկ Ռուսաստանինը՝ ԱՊՀ-ում և ԲՐԻԿՍ-ում:

20:50 - 27 նոյեմբերի, 2024

Հայաստանի քաղաքացիները կկարողանան Ղազախստան այցելել նաև նույնականացման քարտերով. ԱԺ-ն վավերացրեց համաձայնագիրը |armenpress.am|

armenpress.am: Հայաստանի խորհրդարանը վավերացրեց ՀՀ քաղաքացիներին նաև նույնականացման քարտով Ղազախստան մուտք գործելու հնարավորություն տվող համաձայնագիրը: «Արմենպրես»-ի հաղորդմամբ՝ «Հայաստանի Հանրապետության կառավարության եւ Ղազախստանի Հանրապետության կառավարության միջեւ քաղաքացիների այցելությունների եւ գտնվելու կարգի մասին» համաձայնագիրը վավերացնելու մասին նախագիծն ընդունվեց միաձայն՝ ստանալով 95 կողմ ձայն: Համաձայնագրով փոփոխություն է կատարվել վավերական ճամփորդական փաստաթղթերի ցանկում։ Հայաստանի Հանրապետության քաղաքացիների համար ավելացել է նույնականացման քարտը, Ղազախստանի քաղաքացիների համար՝ անձը հաստատող վկայականը։ Համաձայնագիրն ուժի մեջ է մտնում կողմերի կողմից անհրաժեշտ ներպետական ընթացակարգերի կատարման մասին վերջին գրավոր ծանուցումը դիվանագիտական ուղիներով ստանալու օրվանից 30 (երեսուն) օր հետո: Ըստ նախագծի՝ 2024թ. հուլիսի 3-ի դրությամբ ղազախական կողմից չի ստացվել ծանուցում՝ համաձայնագրի ուժի մեջ մտնելու համար նախատեսված ներպետական ընթացակարգերի կատարման մասին:

19:36 - 15 նոյեմբերի, 2024

ՀՀ քաղաքացիները Ղազախստան կկարողանան մուտք գործել նաև նույնականացման քարտերով. համաձայնագիրը ԱԺ-ում է |armenpress.am|

armenpress.am: Արտաքին գործերի նախարարի տեղակալ Մնացական Սաֆարյանը Ազգային ժողովի վավերացմանը ներկայացրեց «ՀՀ կառավարության եւ Ղազախստանի Հանրապետության կառավարության միջեւ քաղաքացիների այցելության եւ գտնվելու կարգի մասին» համաձայնագիրը։ «Արմենպրես»-ի հաղորդմամբ՝ փոխնախարարը հիշեցրեց, որ համաձայնագիրը ստորագրվել է 2024 թվականի ապրիլի 15-ին Երևանում։ Նրա խոսքով՝ փաստաթղթով կանոնակարգվում է Հայաստանի և Ղազախստանի քաղաքացիների այցելությունների եւ պետության տարածքում գտնվելու կարգը: «Համաձայնագրով փոփոխություն է կատարվել վավերական ճամփորդական փաստաթղթերի ցանկում։ Հայաստանի Հանրապետության քաղաքացիների համար ավելացել է նույնականացման քարտը, Ղազախստանի քաղաքացիների համար՝ անձը հաստատող վկայականը։ Երկու պետությունների քաղաքացիները, անկախ բնակության վայրից, իրավունք ունեն մուտք գործել, դուրս գալ և տարանցմամբ անցնել, տեղաշարժվել և մյուս կողմի պետության տարածքում գտնվել մինչև 90 օր՝ մուտքի պետության պետական սահմանը հատելու օրվանից, վավերական ճամփորդական փաստաթղթերից մեկի հիման վրա»,- ասաց Սաֆարյանը։ Փոխնախարարը նշեց, որ համաձայնագիրը չի սահմանափակում կողմերից յուրաքանչյուրի իրավունքը՝ մերժելու մյուս կողմի պետության այն քաղաքացիների մուտքը կամ ձեռնարկելու նրանց վերադարձնելու միջոցները, որոնց ներկայությունն իրենց պետության տարածքում ցանկալի չէ:

21:01 - 14 նոյեմբերի, 2024

Ֆրանսիայի և Ղազախստանի նախագահները լիակատար աջակցություն են հայտնել Հայաստանի և Ադրբեջանի միջև հարաբերությունների կարգավորմանը |armenpress.am|

armenpress.am: Ֆրանսիայի նախագահ Էմանուել Մակրոնն ու Ղազախստանի նախագահ Կասիմ-Ժոմարտ Տոկաևը լիակատար աջակցություն են հայտնել Հայաստանի և Ադրբեջանի միջև հարաբերությունների կարգավորմանը և երկու երկրների միջև խաղաղության համաձայնագրի հնարավորինս շուտ ստորագրմանը։ Այս մասին հայտնում է Ղազախստանի նախագահի պաշտոնական կայքը՝ վկայակոչելով երկրի նախագահի և Ֆրանսիայի Հանրապետության նախագահի համատեղ հայտարարությունը երկու երկրների միջև ռազմավարական գործընկերության ամրապնդման վերաբերյալ։ «Նախագահները լիակատար աջակցություն են հայտնել Հայաստանի և Ադրբեջանի միջև հարաբերությունների կարգավորմանը և համաձայնագրի հնարավորինս շուտ ստորագրմանը, որը թույլ կտա տարածաշրջանում արդար և կայուն խաղաղություն հաստատել՝ հարգելով երկու պետությունների տարածքային ամբողջականությունը և հիմնվելով 1991 թվականի Ալմա-Աթայի հռչակագրի վրա»,- ասված է հայտարարության մեջ։ Հաղորդվում է, որ նախագահների համատեղ հայտարարության մեջ կողմերը նաև ընդգծել են Հարավային Կովկասում կայունության կարևորությունը Անդրկասպյան միջազգային տրանսպորտային երթուղու (Միջին միջանցք) զարգացման համար։ Ֆրանսիայի Հանրապետության նախագահ Էմանուել Մակրոնի հրավերով 2024 թվականի նոյեմբերի 4-ից 5-ը Ղազախստանի Հանրապետության նախագահ Կասիմ-Ժոմարտ Տոկաևը պետական այցով այցելել է Ֆրանսիա:

12:04 - 06 նոյեմբերի, 2024

Ղազախստանի և Ֆրանսիայի միջև պահպանվում է ակտիվ և վստահելի քաղաքական երկխոսությունը. Տոկաև |1lurer.am|

1lurer.am: Ղազախստանի նախագահ Կասիմ-Ժոմարտ Տոկաևը մեկնել է Փարիզ, հանդիպել Ֆրանսիայի նախագահ Էմանուել Մակրոնի հետ՝ հայտնում է Ղազախստանի նախագահի մամուլի ծառայությունը: Տոկաևը նշել է, որ բացառիկ կարևորություն է տալիս այդ այցին, որը նախանշում է Ղազախստանի և Ֆրանսիայի միջև ռազմավարական գործընկերության նոր հանգրվան: «Այսօր մեր երկրների միջև պահպանվում է ակտիվ և վստահելի քաղաքական երկխոսություն։ Ղազախստանը և Ֆրանսիան սերտորեն համագործակցում են միջազգային ասպարեզում, միասին առաջ են տանում խաղաղության և կայուն զարգացման գաղափարները բազմակողմ հարթակներում»,- ասել է Ղազախստանի նախագահը: Մակրոնն էլ նշել է, որ վերջին տարիներին Փարիզի և Աստանայի միջև գործընկերությունը զգալիորեն ամրապնդվել է: Բանակցությունների ընթացքում պետությունների ղեկավարները հանգամանալից քննարկել են մեքենաշինության, տրանսպորտի և լոգիստիկայի, գյուղատնտեսության, էներգետիկայի, արդյունաբերական, կլիմայի, թվային զարգացման և առողջապահության ոլորտներում համագործակցության հեռանկարները: Մտքեր են փոխանակվել նաև տարածաշրջանային և միջազգային օրակարգի հրատապ թեմաների շուրջ:

19:49 - 05 նոյեմբերի, 2024

Ղազախստանը կառուցողական դեր է խաղում տարածաշրջանային և միջազգային գործերում. Փաշինյանը՝ Տոկաևին

Վարչապետ Նիկոլ Փաշինյանը շնորհավորական ուղերձ է հղել Ղազախստանի Հանրապետության նախագահ Կասիմ-Ժոմարտ Տոկաևին՝ Հանրապետության օրվա առթիվ: Ուղերձում նշված է. «Հարգելի Կասիմ-Ժոմարտ Քեմելի, Ջերմորեն և սրտանց շնորհավորում եմ Ձեզ Ղազախստանի Հանրապետության ազգային տոնի՝ Հանրապետության օրվա առթիվ։ Այսօրվա տոնին առանձնահատուկ նշանակություն են տալիս հասարակական ներդաշնակության և հանդուրժողականության պայմաններում սոցիալ-տնտեսական և գիտատեխնիկական զարգացման ճանապարհին ունեցած Ձեր երկրի հաջողությունները։ Համաշխարհային ասպարեզում վայելելով արժանի հեղինակություն՝ Ղազախստանը կառուցողական դեր է խաղում տարածաշրջանային և միջազգային գործերում։ Այս ամենում ակնհայտ է Ձեր հետևողականությունն արդար պետություն կառուցելու հայեցակարգային կուրսն իրականացնելու հարցում։ Հայաստանը մեծապես կարևորում է Ղազախստանի հետ բոլոր ոլորտներում համագործակցության հետևողական ընդլայնումը, որն այս տարվա ապրիլին Հայաստան կատարած Ձեր պաշտոնական այցի արդյունքներով ստացել է ռազմավարական բնույթ։ Վստահ եմ, որ Երևանի և Աստանայի՝ մշտապես վստահության և փոխադարձ աջակցության վրա հիմնված համատեղ ջանքերի շնորհիվ հնարավոր է Հայաստանի և Ղազախստանի միջև բացել գործընկերության նոր հեռանկարներ, որոնք կհամապատասխանեն մեր պետությունների և ժողովուրդների նպատակներին։ Մաղթում եմ Ձեզ, հարգելի Կասիմ-Ժոմարտ Քեմելի, քաջառողջություն և նորանոր հաջողություններ, իսկ Ղազախստանի բարեկամ ժողովրդին՝ խաղաղություն և բարեկեցություն»:

12:08 - 25 հոկտեմբերի, 2024

Նպատակ ունենք Ղազախստանի համալսարաններից մեկում հայագիտական կենտրոն ունենալ. ԿԳՄՍ նախարար |armenpress.am|

armenpress.am: Հայաստանի կրթության, գիտության, մշակույթի և սպորտի նախարար Ժաննա Անդրեասյանը հայտնել է Ղազախստանի համալսարաններից մեկում հայագիտական կենտրոն հիմնելու նպատակի մասին։ Ղազախստանի մայրաքաղաք Աստանա կատարած այցի շրջանակներում «Արմենպրես»-ի թղթակցի հետ զրույցում ՀՀ կրթության, գիտության, մշակույթի և սպորտի նախարար Ժաննա Անդրեասյանն անդրադարձել է հայ-ղազախական միջմշակութային հարաբերություններին, կրթության և գիտության ոլորտում երկու երկրների միջև առկա գործընկերությանը և երկխոսությանը, դրանց զարգացման հեռանկարներին։ Նախարարի խոսքով՝ Ղազախստանում Հայաստանի մշակույթի օրերի անցկացումը ղազախ հանրությանը հնարավորություն կտա ավելի լայն պատկերացում կազմել ժամանակակից Հայաստանի մշակույթի մասին։ «Սա միանգամյա միջոցառում չէ, քանի որ մենք նախորդող տարիների ընթացքում շատ հետաքրքիր միջոցառումներ ենք ունեցել։ Մենք ակտիվ կերպով նաև նշել ենք ղազախ բանաստեղծների հոբելյաններ։ Երևանի պետական համալսարանում գործում է ղազախական կենտրոնը, որտեղ նաև համապատասխան թարգմանություններ են արվում։ Բացի այս, նպատակ ունենք նաև Ղազախստանի համալսարաններից մեկում հայագիտական կենտրոն ունենալ․ այժմ քննարկումների փուլում ենք», - հայտնեց Ժաննա Անդրեասյանը։ ԿԳՄՍ նախարարի խոսքով՝ այն բոլոր միջոցառումները, որոնք փոխադարձաբար իրականացվում են երկու երկրների կողմից, միտված են երկու ժողովուրդների մշակույթը միմյանց ներկայացնելուն և մարդկանց շրջանում իրազեկվածությունը բարձրացնելուն։ «Այդ իմաստով շատ կարևորում եմ, որ Հայաստանի մշակույթի օրերը, որոնք անց են կացվում Ղազախստանում, անցկացվում են Շառլ Ազնավուրի և Սերգեյ Փարաջանովի հարյուրամյակներին նվիրված միջոցառումների շրջանակներում։ Այստեղ ներկայացվում է մշակութային ժառանգություն, որը համաշխարհային է», - ասաց նախարարը։ Նախարարի խոսքով՝ ղազախական կողմը շատ հետաքրքրված է նաև Մատենադարանում պահվող ղփչաղերեն ձեռագրերով։ «Ղազախստանի նախագահի՝ Հայաստան կատարած այցի ընթացքում այց եղավ նաև Մատենադարան, որտեղ նախագահ Կասիմ-Ժոմարտ Տոկաևը հնարավորություն ունեցավ ծանոթանալ այդ ձեռագրերին։ Մենք այժմ համատեղ գիտական խումբ ենք ձևավորում, որը կզբաղվի ձեռագրերի ուսումնասիրությամբ»,-ասաց ԿԳՄՍ նախարարը։ Ժաննա Անդրեասյանի կարծիքով՝ հայ-ղազախական միջմշակութային հարաբերությունների զարգացման դինամիկան և պոտենցիալը տեսանելի են։ Նրա խոսքով՝ դա վերաբերում է նաև կրթության ոլորտում առկա համագործակցությանը, քանի որ երկու երկրների Կառավարման ակադեմիաները, Երևանի պետական համալսարանը, Հայաստանում սլավոնական և այլ բուհեր ևս շատ ակտիվ կերպով համագործակցում են ղազախական կրթական հաստատությունների հետ։ ՀՀ ԿԳՄՍ նախարար Ժաննա Անդրեասյանը Հանրապետության նախագահ Վահագն Խաչատուրյանի՝ Ղազախստան կատարած պաշտոնական այցի պատվիրակության կազմում հոկտեմբերի 14-16-ը եղել է Աստանայում՝ մասնակցելու Ղազախստանում Հայաստանի մշակութային օրերի բացմանը։

09:27 - 18 հոկտեմբերի, 2024

Նախագահ Վահագն Խաչատուրյանը Ղազախստանում այցելել է «Աստանա» միջազգային ֆինանսական կենտրոն

Հանրապետության նախագահ Վահագն Խաչատուրյանը Ղազախստանում այցելել է «Աստանա» միջազգային ֆինանսական կենտրոն և Ղազախստանի նախագահ Կասիմ-Ժոմարտ Տոկաևի հետ համատեղ շրջայց կատարել։ ՄՖԿ-ի տնօրեն Նուրխատ Կուշիմովը ներկայացրել է կենտրոնի գործունեության մանրամասները։ ՀՀ և ՂՀ նախագահների համատեղ շրջայցից հետո կենտրոնի տնօրենը հանդես է եկել ՄՖԿ-ի վերաբերյալ զեկույցով:

15:58 - 16 հոկտեմբերի, 2024

Վահագն Խաչատուրյանն ու Կասիմ-Ժոմարտ Տոկայևը ներկա են գտնվել Ղազախստանում Հայաստանի մշակութային օրերի բացմանը

Աստանայում տեղի ունեցավ Ղազախստանում Հայաստանի մշակույթի օրերի միջոցառումների մեկնարկն ազդարարող բացման հանդիսավոր համերգը՝ նվիրված Շառլ Ազնավուրի 100-ամյակին: Ղազախստանի Հանրապետություն կատարած պաշտոնական այցի շրջանակներում նախագահ Վահագն Խաչատուրյանը և Ղազախստանի նախագահ Կասիմ-Ժոմարտ Տոկաևը Կալիբեկ Կուանիշբաևի անվան Ղազախստանի ազգային երաժշտական-դրամատիկական թատրոնում մասնակցել են Ղազախստանում Հայաստանի մշակութային օրերի բացման արարողությանը: Միջոցառման ընթացքում ՀՀ կրթության, գիտության, մշակույթի և սպորտի նախարար Ժաննա Անդրեասյանը և Ղազախստանի մշակույթի և տեղեկատվության նախարար Աիդա Բալաևան հանդես են եկել ողջույնի խոսքով: Միջոցառման պաշտոնական բացմանը հաջորդել է մշակութային ծրագիր:

21:25 - 15 հոկտեմբերի, 2024

Աստանան պատրաստ է Երևանին և Բաքվին կրկին հարթակ առաջարկել խաղաղության բանակցությունների համար |hetq.am|

hetq.am: Ղազախստանը դարձյալ պատրաստ է Երևանին և Բաքվին Ալմաթիում հարթակ տրամադրել՝ խաղաղության պայմանագրի շուրջ բանակցություններ անցկացնելու համար։ Այդ մասին հայտարարել է Ղազախստանի նախագահ Կասիմ-Ժոմարտ Տոկաևը ՀՀ նախագահ Վահագն Խաչատուրյանի հետ հանդիպման ժամանակ։ «Կասիմ-Ժոմարտ Տոկաևը հաստատել է ղազախական կողմի պատրաստակամությունը հետագայում ևս Ալմա-Աթայի հարթակը տրամադրել Ադրբեջանի և Հայաստանի միջև խաղաղության պայմանագրի կնքման շուրջ բանակցությունների համար»,- ասված է Ղազախստանի նախագահի մամուլի ծառայության տարածած հաղորդագրության մեջ։ Ինչպես փոխանցել է ղազախական կողմը, Տոկաևն ու Խաչատուրյանը քննարկել են նաև երկկողմ հարաբերությունները։ «Ղազախստանում շատ են գնահատում Հայաստանի հետ բարեկամական հարաբերությունները։ Հայ ժողովրդի հանդեպ ղազախական հողում ջերմ զգացմունքներ են տածում։ Ղազախստանի համար Հայաստանը վստահելի և ժամանակի ընթացքում փորձված մերձավոր գործընկեր է»,- մամուլի ծառայությունը մեջբերել է Տոկաևի խոսքերը։ Իր հերթին Վահագն Խաչատուրյանը նշել է, որ Աստանան հուսալի գործընկեր է Երևանի համար։ «Եվ, իհարկե, ուզում եմ ընդգծել մեր հաջողությամբ զարգացող տնտեսական հարաբերությունները»,- նշել է ՀՀ նախագահը։ Հիշեցնենք, որ Վահագն Խաչատուրյանը Աստանա էր ժամանել նախօրեին։ Երեկ Տոկաևի հետ հեռախոսազրույց էր ունեցել նաև վարչապետ Նիկոլ Փաշինյանը։

18:40 - 15 հոկտեմբերի, 2024

Հայաստանի և Ղազախստանի նախագահները քննարկել են երկու երկրների համագործակցության զարգացման հեռանկարները |armenpress.am|

armenpress.am: Ղազախստանը շահագրգռված է Հայաստանի հետ համագործակցությանը նոր որակ հաղորդելու հարցում։ ՀՀ նախագահ Վահագն Խաչատուրյանի հետ բանակցությունների ընթացքում երեքշաբթի օրը Աստանայում հայտարարել է Ղազախստանի նախագահ Կասիմ-Ժոմարտ Տոկաևը: Ղազախստանի նախագահի պաշտոնական կայքի տեղեկացմամբ՝ երկու երկրների նախագահների բանակցությունները կայացել են «Ակորդա» նախագահական նստավայրում: Ջերմորեն ողջունելով պաշտոնական այցով Ղազախստան ժամանած ՀՀ նախագահին՝ Ղազախստանի ղեկավարը նշել է, որ իր երկիրը շահագրգռված է երկու պետությունների համագործակցությունը որակապես նոր մակարդակի հասցնելու հարցում։ «Վստահ եմ, որ այսօրվա պայմանավորվածությունները կնպաստեն երկկողմ հարաբերությունների ամրապնդմանը: Մենք կարևորում ենք բարձր մակարդակով պարբերաբար տեղի ունեցող հանդիպումները, որոնք ղազախ-հայկական գործընկերության ամուր հիմքն են: Ղազախստանում շատ են գնահատում Հայաստանի հետ բարեկամական հարաբերությունները: Ղազախական հողում ջերմ զգացմունքներ են տածում հայ ժողովրդի նկատմամբ: Ղազախստանի համար Հայաստանը հուսալի և ժամանակով փորձված սերտ գործընկեր է։ Մեր ժողովուրդները կապված են բարեկամության ամուր կապերով, ընդհանուր պատմությամբ և համանման մշակութային ու մարդասիրական արժեքներով։ Գոհունակությամբ եմ նշում, որ մեր երկկողմ հարաբերությունները դինամիկ և առաջանցիկ կերպով զարգանում են բոլոր ուղղություններով»,- ընդգծել է Կասիմ-Ժոմարտ Տոկաևը։ Նա ընդգծել է, որ այս տարի լրանում է Ղազախստանի և Հայաստանի միջև Բարեկամության և համագործակցության պայմանագրի ստորագրման 25-ամյակը, ձևավորվել է երկկողմ հարաբերությունների ամուր ինստիտուցիոնալ հիմք։ «Առևտրատնտեսական փոխգործակցությանը զուգահեռ ակտիվորեն զարգանում են մեր ժողովուրդների մշակութային և հումանիտար կապերը։ Անցյալ տարի Երևանում անցկացվել են Հայաստանում ղազախական թատրոնի օրերը։ Հաջորդ տարի ձեր երկրում նախատեսվում է կազմակերպել Ղազախստանի մշակույթի տասնօրյակ։ Այսօր հանդիսավոր կերպով կբացենք Ղազախստանում Հայաստանի մշակույթի օրերը»,- հայտարարել է Կասիմ-Ժոմարտ Տոկաևը: Հայաստանի և Ղազախստանի նախագահները բանակցությունների ընթացքում քննարկել են առևտրատնտեսական հարաբերությունների, տրանսպորտային և լոգիստիկ, գյուղատնտեսության, ֆինանսական, մշակութային և հումանիտար, ինչպես նաև թվայնացման ոլորտներում համագործակցության ամրապնդման հեռանկարները։ Անդրադարձ է կատարվել տարածաշրջանային և միջազգային օրակարգի ընթացիկ հարցերի։

15:27 - 15 հոկտեմբերի, 2024

Նիկոլ Փաշինյանը հեռախոսազրույց է ունեցել Կասիմ-Ժոմարտ Տոկաևի հետ

Տեղի է ունեցել վարչապետ Նիկոլ Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ: Այս մասին հայտնում են ՀՀ վարչապետի աշխատակազմից։ Քննարկվել են հարաբերությունների երկկողմ և տարածաշրջանային օրակարգի հարցեր: Վարչապետ Փաշինյանը բարձր է գնահատել Ղազախստանի նախագահի 2024թ. ապրիլին Հայաստան կատարած պաշտոնական այցի արդյունքները և ընդգծել այցի արդյունքներով Հայաստանի և Ղազախստանի հարաբերություններում ի հայտ եկած նոր դինամիկան: Զրուցակիցներն ընդգծել են Հայաստանի Հանրապետության նախագահ Վահագն Խաչատուրյանի պաշտոնական այցը Ղազախստանի Հանրապետություն, որը մեկնարկում է այսօր:

16:19 - 14 հոկտեմբերի, 2024

Ղազախստանում կանցկացվեն Հայաստանի մշակույթի օրեր

ՀՀ կրթության, գիտության, մշակույթի և սպորտի նախարար Ժաննա Անդրեասյանը հոկտեմբերի 14-16-ը ՀՀ նախագահ Վահագն Խաչատուրյանի՝ Ղազախստան կատարած պաշտոնական այցի պատվիրակության կազմում մեկնել է Աստանա` մասնակցելու Ղազախստանում Հայաստանի մշակույթի օրերի միջոցառումներին։ Այդ մասին հայտնում են ԿԳՄՍ նախարարությունից: Մշակույթի օրերի ծրագրում ներառված են մի շարք միջոցառումներ` hանդիսավոր համերգ Հայաստանի ջազ նվագախմբի (գեղարվեստական ղեկավար` Դավիթ Մելքոնյան) մասնակցությամբ, ֆոտոցուցահանդես՝ նվիրված Սերգեյ Փարաջանովին, հայկական կինոյի օրեր և Սոս Սարգսյանի անվան «Համազգային» թատրոնի (գեղարվեստական ղեկավար` Նարինե Գրիգորյան) հյուրախաղը։ Հայաստանի մշակույթի օրերի հիմնական միջոցառումները կանցկացվեն Ղազախստանի Քալիբեկ Կուանիշբաևի անվան ազգային երաժշտական դրամատիկական թատրոնում, որտեղ հոկտեմբերի 15-ին կկայանա մշակույթի օրերի բացման հանդիսավոր համերգը՝ նվիրված Շառլ Ազնավուրի 100-ամյակին։ Համերգային ծրագրում հիմնականում ընդգրկված են շանսոնիեի երգերը, բայց կհնչեն նաև Կոմիտասի և Առնո Բաբաջանյանի ստեղծագործությունները։ Հայաստանի ջազ նվագախմբի հետ միասին հանդես կգան Հայաստանի վաստակավոր արտիստուհի Ինգա Արշակյանը և միջազգային մրցույթների դափնեկիր Գոռ Սուջյանը։ Նույն օրը թատրոնի ճեմասրահում կբացվի Սերգեյ Փարաջանովի կյանքին ու գործունեությանը նվիրված լուսանկարչական ցուցահանդեսը, որը պատրաստվել է Ս. Փարաջանովի թանգարանի կողմից։ Հաջորդ օրը՝ հոկտեմբերի 16-ին, Ղազախստանի Քալիբեկ Կուանիշբաևի անվան ազգային երաժշտական-դրամատիկական թատրոնում հանդես կգա Սոս Սարգսյանի անվան «Համազգային» թատրոնը՝ «Լյու Բյոֆ» ներկայացմամբ։ Ղազախստանում Հայաստանի մշակույթի օրերի շրջանակում 7 IMAX KERUEN կինոթատրոնում կցուցադրվեն հայկական խաղարկային և անիմացիոն ֆիլմեր։

12:51 - 14 հոկտեմբերի, 2024

Ղազախստանը ողջունում է ՀՀ և Ադրբեջանի փոխադարձ քայլերն՝ ուղղված խաղաղության պայմանագրի կնքմանը. Տոկաև |tert.am|

tert.am: Ղազախստանը ողջունում է Հայաստանի և Ադրբեջանի փոխադարձ քայլերը, որոնք ուղղված են խաղաղության պայմանագրի կնքմանը: Այս մասին հայտարարել է Ղազախստանի նախագահ Կասիմ-Ժոմարտ Տոկաևը՝ ԱՊՀ ղեկավարների նեղ ձևաչափով գագաթնաժողովի ժամանակ․ «Մենք նաև գոհունակությամբ ենք նշում Կենտրոնական Ասիայի տարածաշրջանում միջպետական սահմանների առանձին հատվածների իրավական ձևակերպման ավարտի հարցում էական առաջընթացն»,- ասել է Ղազախստանի նախագահը։ Կասիմ-Ժոմարտ Տոկաևը նշել է, որ Ղազախստանի համար ԱՊՀ-ի՝ որպես 1991թ.Ալմա-Աթայի հռչակագրի հիման վրա ստեղծված հեղինակավոր միջազգային կազմակերպության ներուժի հետագա ամրապնդումն անվերապահ առաջնահերթություն է։

20:42 - 08 հոկտեմբերի, 2024

Ղազախստանում ավարտվել են ՀԱՊԿ «Անխորտակելի եղբայրություն-2024» զորավարժությունները |tert.am|

tert.am: Ղազախստանում ավարտվել են Հավաքական անվտանգության պայմանագրի կազմակերպության (ՀԱՊԿ) երկրների «Անխորտակելի եղբայրություն-2024» խաղաղապահ ուժերի զորավարժությունները։ Այս մասին հայտնել է Ղազախստանի պաշտպանության նախարարությունը՝ հավելելով, որ զորավարժությունների ընթացքում մշակվել է ՀԱՊԿ Հավաքական խաղաղապահ ուժերի կողմից խաղաղապահ գործողության նախապատրաստումն ու անցկացումը։ «Ղազախստանում ավարտվել են ՀԱՊԿ-ի խաղաղապահ ուժերի հետ հրամանատարաշտաբային զորավարժությունները։ Կոլեկտիվ խաղաղապահ ուժերը հաջողությամբ կատարել են իրենց հանձնարարված խնդիրները։ Զորավարժությունների ընթացքում մշակվել են խաղաղապահ գործողության նախապատրաստման և անցկացման հարցեր»,-նշված է Ղազախստանի ՊՆ հաղորդագրության մեջ։ Հաղորդվում է, որ զորավարժությունների ընթացքում հատուկ ուշադրություն է դարձվել ՀԱՊԿ երկրների պաշտպանության և այլ գերատեսչությունների միջև գործողությունների համակարգմանը, ներգրավվել են նաև ՄԱԿ-ի խաղաղապահ առաքելություններում վերապատրաստված հրահանգիչներ։ Ավելի վաղ հաղորդվել էր, որ հոկտեմբերի 1-ին Ղազախստանում սկսվել է «Անխորտակելի եղբայրություն-2024» խաղաղապահ ուժերի զորավարժությունների ակտիվ փուլը՝ Ալմաթիի մարզի «Բերեգ» ուսումնական զորավարժարանում: Հրամանատարաշտաբային զորավարժություններին մասնակցել են Բելառուսի, Ղազախստանի, Ղրղզստանի, Ռուսաստանի և Տաջիկստանի զորակազմերը։

20:56 - 05 հոկտեմբերի, 2024