Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

Ոչ ոք շահագրգռված չէ Ռուսաստանի և Ուկրաինայի հարաբերությունների սրմամբ. Զաս |1lurer.am|

1lurer.am: Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասը հայտարարել է, որ ոչ ոք, այդ թվում՝ տարածաշրջանի մյուս պետությունները, շահագրգռված չէ Ռուսաստանի և Ուկրաինայի հարաբերությունների սրմամբ՝ գրում է ТАСС-ը։ «Ոչ ոք պատերազմ չի ուզում, ո՛չ Ռուսաստանը, ո՛չ էլ այս տարածաշրջանում ապրող այլ երկրներ: Իհարկե, սադրանքների ռիսկերը շատ մեծ են: Սա պետք է հաշվի առնել և խուսափել դրանցից»,- ասել է Զասը: Նա նաև ուշադրություն է հրավիրել այն փաստի վրա, որ «զորավարժությունները, որոնք կանցկացվեն Բելառուսի տարածքում, կրում են զուտ պաշտպանական բնույթ»։ «Դա Բելառուսի և Ռուսաստանի ներքին գործն է, որոնք այս զորավարժություններն անցկացնում են իրենց տարածքում»,- ասել է ՀԱՊԿ գլխավոր քարտուղարը։ «Դաշնակցային վճռականություն - 2022» ռուս-բելառուսական զորավարժությունները կանցկացվեն փետրվարի 10-20-ը Բելառուսի տարածքում՝ Միութենական պետության արձագանքման ուժերի ստուգումների շրջանակում։

12:14 - 31 հունվարի, 2022

ԱՄՆ-ն ակնկալում է Ուկրաինայի հարցով այսօր ՄԱԿ ԱԽ նիստ գումարել |azatutyun.am|

azatutyun.am: ԱՄՆ-ն ակնկալում է այսօր ՄԱԿ-ի Անվտանգության խորհրդի նիստ անցկացնել՝ քննարկելու Ուկրաինայի շուրջ ստեղծված իրավիճակը։ Արդյոք քննարկումը կկայանա, պարզ կդառնա դրա սկսվելուց անմիջապես առաջ, քանի որ, ըստ կանոնակարգի, Անվտանգության խորհրդի նիստում ցանկացած հարցի քննարկում ընթացակարգային քվեարկության արդյունքում կարող է արգելափակվել։ ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդն ասել է, որ ցանկանում է Ռուսաստանից հստակ պատասխան լսել Ուկրաինայի սահմանների մոտ կուտակումների վերաբերյալ, ինչը Մոսկվան երբեք չի հաստատել: Մինչդեռ Ուկրաինան շարունակում է օգնություն ստանալ արևմտյան երկրներից: Վերջինը, ով աջակցության երաշխիքներով ժամանել է Կիև, Կանադայի պաշտպանության նախարարն է։

12:13 - 31 հունվարի, 2022

Կանադան ժամանակավորապես հետ է կանչում Կիևում դեսպանատան աշխատակիցների մի մասին |azatutyun.am|

azatutyun.am: Կանադան ժամանակավորապես հետ է կանչում Կիևում իր դեսպանատան այն աշխատակիցներին, որոնք կատարում են գործառույթներ, առանց որոնց դեսպանատան գործունեությունը կարող է շարունակվել, ինչպես նաև դիվանագետների ընտանիքների մնացած անդամներին։ Կանադայի արտաքին գործերի նախարարությունը երեկ հայտարարություն է տարածել՝ Ուկրաինայի սահմանների մոտ ռուսական զորքերի կենտրոնացման շուրջ շարունակվող լարվածության ֆոնին: «Մինչ մենք շարունակում ենք ուշադիր հետևել իրավիճակին, կանադացիների անվտանգությունը մնում է մեր առաջնահերթությունը: Մեր պաշտոնյաները պատրաստ են հյուպատոսական օգնություն ցուցաբերել Կանադայի քաղաքացիներին, եթե պահանջվի», - հայտարարել է Կանադայի արտաքին քաղաքական գերատեսչությունը՝ նշելով՝ Կիևում դեսպանատունը մնում է բաց։

10:56 - 31 հունվարի, 2022

Ուկրաինայի շուրջ ստեղծված իրավիճակը գնալով ավելի մտահոգիչ է դառնում. Ջոնսոն |armtimes.com|

armtimes.com: Մեծ Բրիտանիայի վարչապետ Բորիս Ջոնսոնը կարծում է, որ իրավիճակը ուկրաինական սահմանին ավելի ու ավելի անհանգստացնող է դառնում: «Այս շաբաթվա սկզբին ես զեկույց ստացա ռազմական ղեկավարությունից ուկրաինական սահմանին տիրող իրավիճակի մասին: Պատկերը գնալով մտահոգիչ է դառնում. ես կոչ եմ անում Ռուսաստանին բանակցությունների մեջ մտնել և խուսափել անխոհեմ ու աղետալի ներխուժումից»,- գրել է նա Twitter-ում:

19:48 - 30 հունվարի, 2022

Կանադայի պաշտպանության նախարարը ժամանել է Ուկրաինա |azatutyun.am|

azatutyun.am: Կանադայի Ազգային պաշտպանության նախարար Անիտա Անանդը հունվարի 30-ին երկօրյա այցով ժամանել է Կիև։ Նախատեսված է նրա հանդիպումը Ուկրաինայի պաշտպանության նախարար Ալեքսեյ Ռեզնիկի հետ։ Ավելի վաղ Կանադայի կառավարությունը որոշում էր ընդունել անհապաղ 340 միլիոն դոլար տրամադրել Ուկրաինային աջակցելու նպատակով։

17:46 - 30 հունվարի, 2022

ԱՄՆ-ն կրկին կոչ է արել իր քաղաքացիներին լքել Ուկրաինան |factor.am|

factor.am: Կիևում ԱՄՆ-ի դեսպանատունը կրկին կոչ է արել իր քաղաքացիներին լքել Ուկրաինայի տարածքը՝ երկրում անվտանգության անկանխատեսելի իրավիճակից ելնելով՝ միաժամանակ նրանց առաջարկելով այն երկրների ցանկը, ուր հնարավոր է մեկնել։ Այս մասին ասվում է դիվանագիտական ներկայացուցչության հայտարարությունում, գրում է ՌԻԱ Նովոստին։«Իրավիճակը շարունակում է անկանխատեսելի մնալ ռուսական ռազմական գործողությունների աճող սպառնալիքի ֆոնին և կարող է վատթարանալ առանց նախազգուշացման:ԱՄՆ-ի դեսպանատունն Ուկրաինայում ԱՄՆ-ի քաղաքացիներին կոչ է անում մտածել այժմ հեռանալու մասին՝ օգտագործելով կոմերցիոն կամ մասնավոր ուղևորափոխադրումների տարբերակները»,-ասվում է դեսպանատան հայտարարության մեջ: Ամերիկյան դիվանագիտական առաքելությունն իր քաղաքացիներին առաջարկում է մեկնել հարևան երկրներ, ինչպես՝ Լեհաստան, Սլովակիա, Հունգարիա, Ռումինիա և Մոլդովա։ Միաժամանակ, դեսպանատունը խորհուրդ չի տալիս Մոլդովա մուտք գործել Պրիդնեստրովյեով, քանի որ այս դեպքում դիվանագիտական ներկայացուցչությունը կունենա «սահմանափակ մուտք» և այն չի կարողանա լիարժեք օգնություն ցուցաբերել քաղաքացիներին։ Դեսպանատունը նշում է, որ պատրաստ է վարկ տրամադրել այն քաղաքացիներին, որոնք չեն կարողանում դեպի ԱՄՆ թռիչքի տոմս գնել։ Նշենք, որ ավելի վաղ նույնպես ԱՄՆ-ի կողմից երկիրն անհապաղ լքելու կոչեր էին արվել։

16:13 - 30 հունվարի, 2022

Գերմանիայի և Ֆրանսիայի արտգործնախարարները կայցելեն Ուկրաինա |armenpress.am|

armenpress.am: Ֆրանսիայի արտաքին գործերի նախարար Ժան-Իվ Լը Դրիանը հայտարարել է, որ փետրվարի 7-ին և 8-ին Գերմանիայի իր գործընկեր Աննալենա Բուրբոկի հետ մեկնելու է Ուկրաինա։ Այս մասին հայտնում է «ՌԻԱ- Նովստի»-ն: «Ես պատրաստվում եմ այցելել Ուկրաինա փետրվարի 7-8-ին Գերմանիայի ԱԳ նախարար Աննալենա Բուրբոկի հետ»,- գրել է Լը Դրիանը Twitter-ի իր միկրոբլոգում։ Նա իր ուկրաինացի գործընկեր Դմիտրի Կուլեբային վստահեցրել է, որ ֆրանսիան լիովին համերաշխություն ու աջակցություն է հայտնում Ուկրաինային: «Մոբիլիզացիան շարունակվում է հատկապես նորմանդական ձևաչափում՝ լարվածությունը թուլացնելու նպատակով»,- հավելել է Ֆրանսիայի արտգործնախարարը։

17:21 - 29 հունվարի, 2022

ԱՄՆ-ում ՌԴ դեսպանատունը Վաշինգտոնին հորդորել է Կիևին չներքաշել պատերազմական գործողությունների մեջ |armenpress.am|

armenpress.am: ԱՄՆ-ում Ռուսաստանի դեսպանատունը Վաշինգտոնին կոչ է անում դադարեցնել Ուկրաինային սպառազինելը, որոնք Կիևի ռեժիմին հրահրում են Դոնբասի բնակիչների դեմ բռնի արկածախնդրության: Վկայակոչելով Радио Sputnik-ին, այս մասին ասվում է դիվանագիտական ներկայացուցչության հայտարարության մեջ։ «Ակնհայտ է, որ Վաշինգտոնի կողմից Կիևի ռեժիմին նոր զենքերով անդադար ապահովելն իրականում դրդում է ռազմական արկածախնդրության՝ Դոնբասի բնակիչների դեմ։ Այսօր Ուկրաինայի զինված ուժերը կրակ են բացել քաղաքի մերձակայքում գտնվող Յասնոյե գյուղի բնակելի շենքի վրա»,- ասվում է դեսպանատան ֆեյսբուքյան էջում։ Դիվանագիտական առաքելության ներկայացուցիչների խոսքով՝ Վաշինգտոնն ամենօրյա ռեժիմով «գովազդում» է իր գործունեությունը՝ հարյուրավոր տոննա ռազմական օգնություն տրամադրելով, պատրվակ բերելով Ռուսաստանի Դաշնության կողմից ենթադրյալ հարձակումը։

14:25 - 29 հունվարի, 2022

Բայդենը մտադիր է ԱՄՆ զորքերի ոչ մեծ զորակազմ տեղափոխել Արևելյան Եվրոպա |1lurer.am|

1lurer.am: ԱՄՆ իշխանությունները մտադիր են մոտ ապագայում ամերիկյան զորքերի լրացուցիչ զորակազմ ուղարկել Արևելյան Եվրոպա և ՆԱՏՕ-ի անդամ երկրներ: Այդ մասին հայտարարել է ԱՄՆ նախագահ Ջո Բայդենը, փոխանցում է The Guardian-ը։ Ավելի վաղ Պենտագոնի խոսնակ Ջոն Քիրբին հայտարարել էր, որ ԱՄՆ-ը պատրաստ է Եվրոպա ուղարկելու 8500 զինվորական, սակայն այդ հարցով վերջնական որոշում դեռևս չի կայացվել։ «Խոսքը մարտական, հետախուզական, ավիացիոն, բժշկական և տրանսպորտային ստորաբաժանումների մասին է»,- պարզաբանել է նա։ Քիրբին նաև ընդգծել է, որ ԱՄՆ-ը չի նախատեսում իր զորքերը տեղակայել ՆԱՏՕ-ի անդամ չհանդիսացող եվրոպական երկրների տարածքում։

13:28 - 29 հունվարի, 2022

Ադրբեջանը պատրաստ է արտակարգ իրավիճակում հավելյալ գազ մատակարարել Եվրոպային, եթե մատակարարումները խախտվեն Ռուսաստանի և Ուկրաինայի միջև լարվածության պատճառով |tert.am|

tert.am: Ադրբեջանը պատրաստ է արտակարգ իրավիճակում հավելյալ գազ մատակարարել Եվրոպային, եթե մատակարարումները խախտվեն Ռուսաստանի և Ուկրաինայի միջև հարաբերություններում տիրող լարվածության պատճառով: Minval.az-ի փոխանցմամբ՝ այս մասին հայտարարել է Մեծ Բրիտաիայում Ադրբեջանի դեսպան Էլին Սուլեյմանովը: «Թեև հավելյալ մատակարարումները բավական չեն լինի գլխավոր մատակարար Ռուսաստանին փոխարինելու համար, էներգակրիչներով հարուստ երկիրը կարող է ավելի մեծ ծավալներ ուղարկել մայրցամաք»,- ասել է Սուլեյմանովը:

13:10 - 29 հունվարի, 2022

Ուզում եմ համերաշխություն հայտնել Ուկրաինային, հուսով եմ, որ Ռուսաստանը չի կիրառի նույն ագրեսիան, որը ժամանակին կիրառեց Վրաստանի դեմ. Սալոմե Զուրաբիշվիլի |1tv.ge|

1tv.ge: Վրաստանի նախագահ Սալոմե Զուրաբիշվիլին համերաշխություն է հայտնել Ուկրաինային և նշել, որ հույս ունի, որ Ռուսաստանը ագրեսիվ գործողություններ չի ձեռնարկի նրա դեմ։ Ինչպես նշել է Վրաստանի նախագահը լրատվամիջոցների հետ հանդիպման ժամանակ, ագրեսիվ գործողությունները երբեք արդյունք չեն տալիս։ Սալոմե Զուրաբիշվիլին հույս ունի, որ գործընթացները կանցնեն երկխոսության ռեժիմի։ «Ուզում եմ համերաշխություն հայտնել Ուկրաինային։ Հուսով եմ, որ Ռուսաստանը չի կիրառի նույն ագրեսիան, որն իր ժամանակին կիրառեց Վրաստանի դեմ։ Այս գործողությունները արդյունք չեն բերում։ Այսօրվա աշխարհն այլ է, 20-րդ դարի գործողություններն արդեն անախրոնիստական են։ Այս ձևով և այս մոտեցումներով մենք՝ որպես ժողովրդավարական աշխարհ, Եվրոպա, չենք կարող հաղթահարել գլոբալ սպառնալիքները, որոնք բոլորս գիտենք, որ կան։ Այնպես որ, հուսով եմ, որ ամեն ինչ կտեղափոխվի երկխոսության ձեւաչափ»,- ասել է Սալոմե Զուրաբիշվիլին։

12:17 - 29 հունվարի, 2022

Բուխարեստը զորք չի ուղարկի Ուկրաինա՝ Ռուսաստանի հետ ռազմական հակամարտության դեպքում |1lurer.am|

1lurer.am: Բուխարեստը հայտարարել է, որ դիվանագիտորեն աջակցում է Կիևին, սակայն իր զորքը չի ուղարկի Ուկրաինա Ռուսաստանի հետ ռազմական հակամարտության դեպքում։ Այս մասին այսօր հայտարարել է Ռումինիայի արտգործնախարար Բոգդան Աուրեսկուն՝ հավելելով, որ իր երկիրն ընդունում է ԵՄ-ի և ՆԱՏՕ-ի բոլոր որոշումները, այդ թվում՝ Մոսկվայի դեմ պատժամիջոցները, հայտնում է EaDaily-ն: Ռումինիայի ԱԳՆ-ն հույս ունի, որ Ռուսաստանը լրջորեն կընդունի լարվածությունը թուլացնելու առաջարկները։ Ըստ Աուրեսկուի՝ ԱՄՆ և ՆԱՏՕ-ի փաստաթղթերը լրացնում են միմյանց: Աուրեսկուն խոստովանել է, որ անհամբեր սպասում են ներկայացված փաստաթղթերին Ռուսաստանի լուրջ և պատասխանատու գնահատականներին:

20:39 - 28 հունվարի, 2022

ՆԱՏՕ-ն մտադիր չէ զորք ուղարկել Ուկրաինա․Յենս Ստոլտենբերգ |azatutyun.am|

azatutyun.am: ՆԱՏՕ-ի գլխավոր քարտուղար Յեսն Ստոլտենբերգն այսօր Բրյուսելում հայտարարել է, որ դաշինքը զորք չի ուղարկի Ուկրաինա, քանի որ հավաքական պաշտպանության հոդվածը չի տարածվում կառույցից դուրս գտնվող պետությունների վրա: «ՆԱՏՕ-ի մասին Վաշինգտոնյան պայմանագրի 5-րդ հոդվածը չի գործում Հյուսիսատլանտյան դաշինքի անդամ չհանդիսացող պետության նկատմամբ, հետևաբար, ՆԱՏՕ-ն զորք չի ուղարկի Ուկրաինա»,- ասել է Ստոլտենբերգը: ՆԱՏՕ-ի հիմնադրման մասին Վաշինգտոնյան պայմանագրի 5-րդ հոդվածը սահմանում է, որ անդամ երկրներից մեկի վրա հարձակումը հավասարազոր է հարձակման ամբողջ դաշինքի վրա, և, հետևաբար, անդամ բոլոր երկրները պետք է հավաքական ջանքերով պաշտպանեն հարձակման ենթարկվածին: «Անհրաժեշտ է հստակ տարբերակել սեփական տարածքը պաշտպանելու ՆԱՏՕ-ի պատրաստակամությունը և Ուկրաինայի զինծառայողներին պատրաստելու, այդ երկրին նյութական օգնություն տրամադրելու գործընթացը»,- ասել է գլխավոր քարտուղարը: Միաժամանակ նա նշել է, թե «Ռուսաստանն իր սահմանների մոտ կտեսնի էլ ավելի մեծ թվով ՆԱՏՕ-ի ուժեր, եթե հարձակվի Ուկրաինայի վրա»:

19:48 - 28 հունվարի, 2022

Ջո Բայդենը Զելենսկիին հիշեցրել է Մինսկի պայմանավորվածությունների մասին․ ԱՄՆ-ը վերահաստատել է իր աջակցությունն Ուկրաինային |factor.am|

factor.am: ԱՄՆ նախագահ Ջո Բայդենը հեռախոսազրույց է ունեցել Վլադիմիր Զելենսկիի հետ։ Հեռախոսազրույցի վերաբերյալ հաղորդագրության մեջ, որը հրապարակվել է Սպիտակ տան կայքում, ասվում է, որ Ջո Բայդենը կրկին հաստատել է ԱՄՆ-ի պատրաստակամությունը՝ իր դաշնակիցների և գործընկերների հետ «ամբողջ վճռականությամբ արձագանքել», եթե Ռուսաստանը կրկին ներխուժի Ուկրաինա։ Բայդենը վստահեցրել է իր զրուցակցին Ուկրաինայի ինքնիշխանությանն ԱՄՆ-ի աջակցության մասին, ինչպես նաև ասել, որ ԱՄՆ-ն ուղիներ է փնտրում՝ Ուկրաինայի տնտեսությանը հավելյալ աջակցություն ցուցաբերելու համար, որը բացասական հետևանքներ է կրում սահմանների մոտ ռուսական զորքերի կուտակման պատճառով։ «Նախագահ Ջո Բայդենը Միացյալ Նահանգների անունից աջակցություն է հայտնել հակամարտությունը «նորմանդական քառյակի» ձևաչափով կարգավորելու ջանքերին, ինչպես նաև հույս է հայտնել, որ հունվարի 26-ին կողմերի կողմից 2020 թվականի հուլիսի հրադադարի պայմանների վերահաստատումը կօգնի նվազեցնել լարվածությունը և առաջ շարժվել մինսկյան պայմանավորվածությունների իրագործման հարցում»,- ասված է Սպիտակ տան հայտարարության մեջ։ Մինսկում ստորագրված համաձայնությունները, որոնք վերջ դրեցին Ուկրաինայի արևելքում ակտիվ ռազմական գործողություններին, ներառում են նաև սահմանադրական բարեփոխումներ, որը ենթադրում է երկրի ապակենտրոնացում, Դոնեցկի և Լուգանսկի շրջաններում անջատողական կազմավորումներին ինքնավարության տրամադրում և նրանց ընդգրկում Ուկրաինայի քաղաքական դաշտում։

15:33 - 28 հունվարի, 2022

Եթե Ռուսաստանը ներխուժի Ուկրաինա, «Հյուսիսային հոսք 2»-ը չի գործարկվի. Նուլանդ |1lurer.am|

1lurer.am: ԱՄՆ-ը Գերմանիայի հետ նախազգուշացրել է Ռուսաստանին, որ եթե հարձակվի Ուկրաինայի վրա, «Հյուսիսային հոսք-2» գազատարն այլևս չի աշխատի։ Այդ մասին ասել է ԱՄՆ պետքարտուղարի քաղաքական հարցերով տեղակալ Վիկտորյա Նուլանդը՝ գրում է DW-ն։ Նա նշել է, որ Բեռլինի հետ Վաշինգտոնը համատեղ համաձայնագիր է կնքել, որը Գերմանիային հնարավորություն է տալիս միջոցներ ձեռնարկել՝ թույլ չտալու Ռուսաստանին որևէ խողովակաշար, ներառյալ «Հյուսիսային հոսք-2»-ը, օգտագործել ագրեսիվ քաղաքական նպատակների հասնելու համար: «Այլընտրանք Գերմանիայի համար» կուսակցության Բունդեսթագի պատգամավոր Շտեֆան Կեյթերն էլ կոչ է արել «Հյուսիսային հոսք-2» գազատարը, որը, նրա բնութագրմամբ, մասնավոր նախագիծ է, չօգտագործել որպես «քաղաքական խաղալիք»: Այդ մասին նա հայտնել է Известия-ին: «Ռուսաստանը միշտ հուսալիորեն գազ է մատակարարել Գերմանիային։ Ես կասկածելու հիմքեր չունեմ, որ այդպես էլ կշարունակվի: Գերմանիան և Ռուսաստանը պետք է ավելի սերտ համագործակցեն»,- ասել է պատգամավորը:

13:54 - 28 հունվարի, 2022

Ռուսաստանը մտադիր է շարունակել երկխոսությունը Ուկրաինայի վերաբերյալ՝ պաշտպանելով իր ազգային շահերը. ՌԴ ԱԳՆ |armenpress.am|

armenpress.am: Ռուսաստանն անկեղծորեն «կարմիր գծեր» է սահմանում և պատրաստակամություն է հայտնում քննարկել Ուկրաինայի հետ կապված խնդիրները՝ հիմնվելով իր ազգային շահերի պաշտպանության սկզբունքների վրա: Ինչպես հաղորդում է ՏԱՍՍ գործակալությունը, այս մասին հունվարի 27-ին լրագրողներին ասել է ՌԴ փոխարտգործնախարար Սերգեյ Վերշինինը: «Գիտեք, որ մենք սկսած Ռուսաստանի Դաշնության նախագահի մակարդակից, շատ հստակ արտահայտել ենք մեր դիրքորոշումը այս բոլոր հարցերի վերաբերյալ: Ավելին, ես կարծում եմ, որ առանձնահատկությունը այս հարցերում մեր քաղաքականության և դիրքորոշման մեջ այն է, որ մենք թափանցիկ ենք, այսինքն՝ բացարձակ անկեղծորեն ցույց ենք տալիս մեր «կարմիր գծերը» և երկխոսությունը շարունակելու մեր մտադրությունը: Բայց նշեմ, որ մենք վճռականորեն պաշտպանելու ենք նաև մեր ազգային դիրքորոշումները »,- ասել է Վերշինինը։

22:58 - 27 հունվարի, 2022