«Հայրենիքի փրկության շարժում»

«Հայրենիքի փրկության շարժման» անդամները բողոքի ակցիա են անցկացնում ՀՀ նախագահի նստավայրի դիմաց |armenpress.am|

armenpress.am: «Հայրենիքի փրկության շարժում» նախաձեռնության անդամները բողոքի ակցիա են անցկացնում ՀՀ նախագահ Արմեն Սարգսյանի նստավայրի դիմաց: Շարժման անդամ Գերասիմ Վարդանյանը նշեց, որ ակցիայի նպատակն է ՀՀ վարչապետ Նիկոլ Փաշինյանի և նախագահ Արմեն Սարգսյանի հանդիպման ընթացքում ներկայացնել իրենց պահանջները: «Մենք առավոտյան Արտաքին գործերի նախարարության մոտ էինք, հիմա էլ տեղեկություններ ունեինք, որ Փաշինյանը գալու է նախագահական՝ նախագահի հետ հանդիպելու: Եկել ենք այստեղ, իրականացնում ենք մեր ակցիան»,- ասաց Գերասիմ Վարդանյանը:

15:49 - 13 մարտի, 2021

ՀՓՇ անդամներն ավարտեցին արտգործնախարարության դիմաց բողոքի ակցիան |armenpress.am|

armenpress.am: «Հայրենիքի փրկության շարժում» նախաձեռնության անդամներն ավարտեցին ՀՀ Արտաքին գործերի նախարարության շենքի դիմաց հրավիրված բողոքի ակցիան: ՀՓՇ անդամ Գերասիմ Վարդանյանը հայտարարեց, որ իրենք ակցիան համարում են ստացված, քանի որ տեղեկություն ունեն, թե ՀՀ վարչապետ Նիկոլ Փաշինյանը ԱԳՆ շենք է ժամանել նախատեսվածից մեկ ժամ շուտ, իսկ հետո աննկատ հեռացել: «Համարում ենք, որ մեր ակցիան ծառայեց իր նպատակին: Այսքանով համարում ենք մեր ակցիան ավարտված: Շարունակելու ենք մեր պայքարը: Շարունակելու ենք նրան (Փաշինյանին- խմբ.) ամեն քայլափոխի հետապնդել»,- ասաց Վարդանյանը:

14:14 - 13 մարտի, 2021

«Հայրենիքի փրկության շարժման» անդամները բողոքի ակցիա են անցկացնում ԱԳՆ շենքի դիմաց

«Հայրենիքի փրկության շարժում» նախաձեռնության անդամները բողոքի ակցիա են անցկացնում Արտաքին գործերի նախարարության շենքի դիմաց: ՀՓՇ անդամները նշել են, որ ցանկանում են իրենց ակցիայով դիմավորել ԱԳՆ շենք ժամանող ՀՀ վարչապետ Նիկոլ Փաշինյանին: «Եկել է ավելի շատ մարդ, քան մենք ակնկալում էինք: Սա փոքր ակցիա է: Ակցիաները տարբեր են լինում. լինում են 40-հազարանոց հանրահավաքներ և փոքրաթիվ ակցիաներ»,- լրագրողների հետ զրույցում ասաց ՀՓՇ անդամ Հայկ Մամիջանյանը:

12:46 - 13 մարտի, 2021

Իշխան Սաղաթելյանը ներկայացրեց «Հայրենիքի փրկության շարժման» պատասխանը Արմեն Սարգսյանի առաջարկին |armenpress.am|

armenpress.am: «Հայրենիքի փրկության շարժման» համակարգող Իշխան Սաղաթելյանը ներկայացրեց Հանրապետության նախագահ Արմեն Սարգսյանի՝ քաղաքական ուժերին հանդիպման հրավիրելու առաջարկին շարժման պատասխանը: «Շարժումը վերահաստատում է ճգնաժամի հաղթահարման իր ճանապարհային քարտեզը՝ վարչապետի հրաժարական, ժամանակավոր կառավարության ձևավորում, արտահերթ խորհրդարանական ընտրություններ։ Հայտնում ենք նշված ձևաչափով և մեր առաջարկած օրակարգով քաղաքական խորհրդակցություններ անցկացնելու մեր պատրաստակամությունը։ Հանդիպումները պետք է անցկացվեն առաջնային մանդատով օժտված ՀՀ Ազգային ժողովում՝ հրապարակային, ուղիղ հեռարձակմամբ»,- հրավիրված ասուլիսում նշեց Սաղաթելյանը։ ՀՀ նախագահ Արմեն Սարգսյանը մարտի 10-ին տարածած հայտարարությամբ երկրում ստեղծված ներքաղաքական իրավիճակի քննարկման և ճգնաժամը հաղթահարելուն ուղղված փոխընդունելի լուծումներ գտնելու նպատակով ՀՀ վարչապետին, խորհրդարանական խմբակցությունների ղեկավարներին և Հայրենիքի փրկության շարժման ղեկավարներին մարտի 13-ին, ժամը 12:00-ին հրավիրել է հանդիպման նախագահական նստավայրում: ՀՀ ազգային ժողովի «Իմ քայլը» խմբակցությունը պատրաստակամ է մասնակցելու նախագահ Արմեն Սարգսյանի նախաձեռնած հանդիպմանը՝ երկրում ներքաղաքական իրավիճակի վերաբերյալ քննարկման և լուծումներ գտնելու համար: ՀՀ ազգային ժողովի «Լուսավոր Հայաստան» խմբակցությունն արդեն արձագանքել է նախագահի հրավերին: Խմբակցության ղեկավար Էդմոն Մարուքյանը նշել է, որ ընդունում են հրավերն ու պատրաստ են մասնակցել ցանկացած քննարկման, որտեղ հնարավոր կլինի վերականգնել քաղաքացիական համերաշխությունն ու ուղիներ գտնել երկիրը խորը ճգնաժամից հանելու համար: «Բարգավաճ Հայաստան» խմբակցությունը նախագահ Արմեն Սարգսյանի հանդիպման հրավերի վերաբերյալ որոշում դեռ չի կայացրել: «Հայրենիքի փրկության շարժման» անդամ Իշխան Սաղաթելյանն «Արմենպրես»-ին հայտնել էր, որ հանդիպման հրավերի մասին քննարկում դեռ չեն ունեցել, կքննարկեն, որից հետո, եթե հարկ համարեն, հանդես կգան հայտարարությամբ:

20:56 - 11 մարտի, 2021

Իրենց սև գործն արեցին երկուսով, հիմա հանդիպում են խնդրո՞ւմ. Իշխան Սաղաթելյանը՝ Արմեն Սարգսյանի հայտարարության մասին |1lurer.am|

1lurer.am: «Իրենց սև գործն արեցին երկուսով, հիմա հանդիպում են խնդրո՞ւմ»,- լրագրողների հետ զրույցում հայտարարել է ՀՅԴ ներկայացուցիչ Իշխան Սաղաթելյանը՝ արձագանքելով նախագահ Արմեն Սարգսյանի՝ իշխանությանն ու ընդդիմությանն ուղղված հրավերի հայտարարությանը: Սաղաթելյանը, սակայն, հավելել է, որ այդ հարցը դեռ պետք է քննարկեն «Հայրենիքի փրկության շարժման» գործընկերների հետ: Նա նաև նշել է՝ իրենց համար կարևոր է, թե հանդիպումն ինչ օրակարգով է լինելու:

20:12 - 10 մարտի, 2021

«Հայրենիքի փրկության շարժման» աջակիցները երթով շարժվում են դեպի Կառավարության շենք |armenpress.am|

armenpress.am: «Հայրենիքի փրկության շարժման» աջակիցները երթով շարժվում են դեպի Կառավարության շենք: Երթին զուգահեռ մի խումբ ակտիվիստներ շարունակում են փակ պահել Բաղրամյան պողոտան և Դեմիրճյան փողոցը: Ընդդիմադիր շարժման աջակիցները գիշերել են Ազգային ժողովի շենքի հարևանությամբ: Մարտի 9-ի երեկոյան շարժման անդամ Իշխան Սաղաթելյանը հանրահավաքի մասնակիցներին կոչ էր արել ավելի շատ վրաններ տեղադրել Դեմիրճյան փողոցում: Նպատակն այն է, որ թույլ չտան պատգամավորներին մուտք գործել Ազգային ժողովի շենք՝ ավելացնելով, թե «նրանք անելիք չունեն այնտեղ»:

18:40 - 10 մարտի, 2021

Նիկոլ Փաշինյանին թվում էր`եթե հանի Օնիկ Գասպարյանին, ամեն ինչ նորմալ կլինի, բայց բանակը վերահաստատեց իր կարծիքը, որ նա վտանգ է ներկայացնում ՀՀ անվտանգությանը. Վազգեն Մանուկյան |tert.am|

tert.am: Նիկոլ Փաշինյանին թվում էր, որ եթե հանի Օնիկ Գասպարյանին, ամեն ինչ նորմալ կլինի, բայց այդպես չէ, որովհետև բանակը վերահաստատեց իր կարծիքը, որ Նիկոլ Փաշինյանը վտանգ է ներկայացնում ՀՀ անվտանգությանը: Այս մասին լրագրողների հետ զրույցում ասաց «Հայրենիքի փրկության շարժման» վարչապետի թեկնածու Վազգեն Մանուկյանը: «Օնիկ Գասպարյանին հանելու ամենավճռական քայլն արեց ոչ թե Նիկոլ Փաշինյանը, այլ հանրապետության նախագահը, որովհետև իր իրավասության տակ էր Գասպարյանի ազատման առաջարկությունն ուղարկել ՍԴ, սակայն չուղարկեց: Այսինքն՝ հետագա գործողությունների համար Սարգսյանը կրում է պատասխանատվություն: Ընդ որոմ՝ հստակ էր, որ ինքն առաջին անգամ հայտարարեց, որ առաջարկությունը չի համապատասխանում Սահմանադրությանը, 3-4 օրում Սահմանադրությունը չէր փոխվել, բայց նույն բանը չհայտարարեց 2-րդ անգամ»,-նշեց նա՝ ընդգծելով, թե դա ցույց է տալիս, որ ինչպես ունենք մեր երկրի համար վնասակար վարչապետ, ունենք նաև այսպիսի նախագահ: Հարցին՝ իր կարծիքով՝ ՀՀ նախագահի վրա ճնշումներ եղե՞լ են, Մանուկյանը պատասխանեց. «Կարծում եմ՝ ճնշումներ եղել են, բայց եթե երկրի նախագահը, ճնշումներին ենթարկվելով, պետք է որոշումներ ընդունի, ում է պետք այդպիսի նախագահը»,-ասաց նա՝ նշելով, որ նախագահի հետ հանդիպման ժամանակ իր մոտ տպավորություն է եղել, թե Սարգսյանն առաջարկությունը կուղարկի ՍԴ: «Շատ զարմացա, որ չուղարկեց, բայց իրեն ճանաչողներն ինձ ասում էին՝ իզուր ես զարմանում»,-հավելեց նա: Հարցին՝ հնարավո՞ր է՝ նախագահի հրաժարականի հարցն էլ առաջ քաշվի, Մանուկյանն արձագանքեց, թե դա այս պահին երկրորդական է: «Նիկոլ Փաշինյանին ծառայող շատ մարդ կա, մի նախագահ ավել, մի նախագահ պակաս, դրանից շատ բան չի փոխվում»,-նշեց նա: Ինչ վերաբերում է Արտակ Դավթյանին ԳՇ պետի պաշտոնում նշանակելու Փաշինյանի առաջարկությանը, Մանուկյանը կարծիք հայտնեց՝ շատ հավանական է, որ Սարգսյանն այդ միջնորդությունը կստորագրի: «Նիկոլ Փաշինյանի օրոք արտահերթ ընտրությունների անցկացումն անհեթեթություն եմ համարում: Դրանք ոչ միայն կեղծ կլինեն, այլև կնշանակեն, որ նա մարսեց այն, ինչը մինչև հիմա եղել է»,-նշեց նա:

17:29 - 10 մարտի, 2021

Օնիկ Գասպարյանի պաշտպանը Սահմանադրությունն է, նա իրավունք ունի իրավական գործընթաց սկսել Վարչական դատարանում. Գ. Մանուկյան |tert.am|

tert.am: Ամբողջ գիշեր քաղաքացիների հոսքը չէր դադարում, բազմաթիվ քաղաքացիներ գալիս էին սատարելու, շատերը գիշերը մնացել են այստեղ նույնիսկ ընտանիքներով էին եկել, իսկ այսօր «Հայրենիքի փրկության շարժումը» հայտարարել է, որ ժամը 16:00-ին լինելու է հանրահավաք,Հայաստանում սահմանադրականության պաշտպանության, բանակի բարձրագույն հրամանատարական կազմին աջակցելու և Նիկոլ Փաշինյանի հրաժարականի պահանջով. Բաղրամյան փողոցում ասաց ՀՅԴ անդամ Գեղամ Մանուկյանը:Անդրադառնալով այսօրվա Կառավարության հայտարարությանը, որ ՀՀ ԶՈՒ Գլխավոր շտաբի պետ Օնիկ Գասպարյանը իրավունքի ուժով համարվում է ազատված զբաղեցրած պաշտոնից, Գեղամ Մանուկյանը նշեց, որ հայտնի չէ այդ հայտարարությունը պաշտոնապես գրավոր տեսքով փոխանցվե՞լ է Օնիկ Գասպարյանին, թե՞ ֆեյսբուքյան կառավարումը Հայաստանում շարունակվում է: «Կա շատ կարևոր դետալ՝ 2020 թվականին նախագահ Սարգսյանը դիմել է ՍԴ՝ ճշտելու իր գործառույթները, որոշման մեջ նշված է, որ նախագահն նշանակում և ազատում է, ԳՇ պետի դեպքում ՍԴ-ն արձանագրել է, որ Հայաստանի նախագահը նշանակում է, ԳՇ պետ ազատման մասին խոսքը չկա, որովհետև Սահմանադրական դատարանի նույն տրամաբանությամբ ԳՇ պետը նշանակվում է 5 տարով, կարող է պաշտոնազրկվել, եթե կորցրել է Հայաստանի քաղաքացիություն, մահացել է, քրեական հանցանք է կատարել կամ սեփական դիմումի համաձայն, այս չափորոշիչների մեջ Օնիկ Գասպարյանը չի տեղավորվում, նա շարունակում է մնալ ԶՈՒ ԳՇ պետ»,- ասաց նա: Հարցին, թե իշխանությունները կգնա՞ն ուժի կիրառման միջոցների, Մանուկյանն ասաց. «Հույս ունեմ, որ Ոստիկանությունում կլինեն խոհեմ սպաներ, որոնք չեն ենթարկվի մոլագարության հասնող վարչապետի պաշտոնը զբաղեցնողի բոլոր կամակորություններին՝ տուրք չեն տա նրա արյունոտ ցանկություններին և ուժ չեն կիրառի խաղաղ ցուցարարների նկատմամբ»:Անդրադառնալով հարցին, թե Կառավարության այսօրվա հայտարարությունից հետո Օնիկ Գասպարյանն ի՞նչ քայլեր պետք է անի, Մանուկյանն ասաց. «Օնիկ Գասպարյանի պաշտպանը ՀՀ Սահմանադրությունն է, և ոչ թե Կառավարության աշխատակազմում եղած մեկ-երկու կիսագրագետ իրավաբանները, Օնիկ Գասպարյանն իրավունք ունի իրավական գործընթաց սկսել Վարչական դատարանում»:

12:45 - 10 մարտի, 2021

Ընդդիմության կողմնակիցները գիշերն անցկացրել են Դեմիրճյան փողոցում |1lurer.am|

1lurer.am: Ազգային ժողովի շենքի մուտքերը երեկվանից փակ են: Ընդդիմության կողմնակիցների մի մասը գիշերն անցկացրել է Բաղրամյան պողոտայում և Դեմիրճյան փողոցում՝ վրանների մեջ: Ոստիկանության ծառայողներն ամբողջ գիշեր պահպանել են հասարակական կարգը: Հիշեցնենք՝ քաղաքացիները նախօրեին Դեմիրճյան փողոցը փակեցին «Հայրենիքի փրկության շարժման» առաջնորդ Վազգեն Մանուկյանի կոչով: Ընդդիմության պահանջը նույնն է՝ վարչապետ Նիկոլ Փաշինյանի հրաժարականը:

10:28 - 10 մարտի, 2021

«Հայրենիքի փրկության շարժման» անդամները մտադիր են գիշերել Ազգային ժողովի մուտքի մոտ |armenpress.am|

armenpress.am: «Հայրենիքի փրկության շարժում» նախաձեռնության անդամները մտադիր են գիշերն անցկացնել Ազգային ժողովի մուտքի մոտ՝ Բաղրամյան և Դեմիրճյան փողոցներում: Շարժման անդամ Իշխան Սաղաթելյանը հանրահավաքի մասնակիցներին կոչ արեց ավելի շատ վրաններ տեղադրել Դեմիրճյան փողոցում և ստեղծել պայմաններ՝ գիշերն այնտեղ անցկացնելու համար: «Ավելացնում ենք մեր վրանները, պայմաններ ենք ստեղծում, որպեսզի կարողանանք մնալ այստեղ: Առավոտյան այս խորհրդարան որևէ պատգամավոր չի մտնելու, որովհետև իրենք այլևս անելիք չունեն»,- ասաց Սաղաթելյանը:

20:31 - 09 մարտի, 2021

ՀՓՇ-ի անդամները վրաններ տեղադրեցին Դեմիրճյան փողոցում. ոստիկանությունն ուժեր է կուտակում |armenpress.am|

armenpress.am: «Հայրենիքի փրկության շարժում» նախաձեռնության անդամները վրաններ տեղադրեցին Ազգային ժողովի Դեմիրճյան փողոցի մուտքի դիմաց: Դեմիրճյան փողոցում ուժեր է կուտակում նաև ՀՀ ոստիկանությունը: Շարժման անդամները հայտարարում են, որ խորհրդարանի շենք մուտք գործելու մտադրություն չունեն և խորհրդարանի մուտքերը փակ են պահելու այնքան ժամանակ, մինչև հրաժարական ներկայացնի ՀՀ վարչապետ Նիկոլ Փաշինյանը: «Երևանի բոլոր փողոցները մշտապես շրջափակվելու են, այս իրավիճակը ունի միայն մեկ հանգուցալուծում»,- նշեց ՀՇՓ անդամ, «Բարգավաճ Հայաստան» խմբակցության պատգամավոր Նաիրա Զոհրաբյանը: Հանրահավաքի մասնակիցների կողմից փակված է նաև Բաղրամյան պողոտան:

19:33 - 09 մարտի, 2021

Իշխան Սաղաթելյանը հայտարարեց, որ չունեն խորհրդարանի շենք մտնելու մտադրություն |armenpress.am|

armenpress.am: «Հայրենիքի փրկության շարժում» նախաձեռնության անդամ Իշխան Սաղաթելյանը հայտարարեց, որ Դեմիրճյան փողոցում հավաքված անձինք Ազգային ժողովի շենք մտնելու մտադրություն չունեն: Սաղաթելյանը ոստիկաններին հորդորեց սադրանքների չդիմել: «Մենք խորհրդարանի շենք չենք մտնելու: Հիմա մենք մեկ քայլ հետ կգնանք, բայց ոստիկանությունը թող առաջ չգա: Մենք այստեղ հավաքվելու համար ունենք ընդամենը մեկ նպատակ, մենք տասը օր Բաղրամյան պողոտան փակել ենք, մեր բողոքն են արտահայտել, մենք այս փողոցը պետք է փակ պահենք, որովհետև այս Ազգային ժողովն այլևս անելիք չունի»,- ասաց Սաղաթելյանը: Իշխան Սաղաթելյանը հավաքվածներին կոչ արեց երկու վրան բերել և տեղադրել Դեմիրճյան փողոցում: Ավելի վաղ շարժման վարչապետի միասնական թեկնածու Վազգեն Մանուկյանը Բաղրամյան փողոցում հրավիրված հանրահավաքի մասնակիցներին կոչ էր արել փակել Ազգային ժողովի շենքի բոլոր մուտքերը, ինչից հետո քաղաքացիների մի մասը շարժվեց դեպի Դեմիրճյան փողոց:

19:11 - 09 մարտի, 2021

«Հայրենիքի փրկության շարժման» անդամներն այցելեցին «Եռաբլուր» զինվորական պանթեոն |armenpress.am|

armenpress.am: «Հայրենիքի փրկության շարժում» նախաձեռնության անդամներն այցելեցին «Եռաբլուր» զինվորական պանթեոն: Շարժման անդամները ծաղիկներ խոնարհեցին հայրենիքի համար իրենց կյանքը զոհած հայորդիների հիշատակին: Շարժման ներկայացուցիչները նշել էին, որ կանանց իրավունքների պաշտպանության միջազգային օրը ցանկանում են լինել այն կանանց, մայրերի և աղջիկների կողքին, որոնք Արցախյան վերջին պատերազմի հետևանքով կորցրել են իրենց որդիներին, ամուսիններին ու եղբայրներին: «Մարտի 8-ը պետք է, որ տոն լիներ, բայց տոնի մասին խոսելու ոչ բարոյական, ոչ հոգեկան մթնոլորտ չկա: Այսօր մեր հպարտությունն ու արժանապատվությունը վերագտնելու սահմանն անցնում է Եռաբլուրով»,- լրագրողների հետ զրույցում ասաց ՀՅԴ անդամ Լիլիթ Գալստյանը:

17:46 - 08 մարտի, 2021

Վազգեն Մանուկյանը կարծում է, որ արտահերթ ընտրությունները պետք է լինեն ոչ գործող իշխանության օրոք |armenpress.am|

armenpress.am: Երևանի գլխավոր պողոտաներից մեկում՝ Բաղրամյան փողոցում հանրահավաքի ընթացքում «Հայրենիքի փրկության շարժման» վարչապետի թեկնածու Վազգեն Մանուկյանը նշեց, որ համբերատար շարունակում են առաջ տանել պայքարը՝ պահանջելով ՀՀ վարչապետի հրաժարականը: «Հարգելի քաղաքացիներ, այս Հայրենիքը միայն մերը չէ, այն նաև ձերն է: Ուզում եք միանալ, միացեք, ուզում եք համագործակցել, ուրեմն համագործակցեք: Չեք ուզում համագործակցել, ուրեմն ստեղծեք ձեր կազմակերպությունները, որոշումներ ընդունեք: Որքան ցանցային լինի պայքարն, այնքան ավելի շուտ կհասնենք մեր նպատակին»,-ասաց Վազգեն Մանուկյանը: Նա ընդգծեց, որ պետք է կազմակերպել ընտրություններ, որպեսզի ժողովուրդը կատարի ընտրություն, սակայն դա պետք է արվի ոչ գործող իշխանությունների օրոք: Մեկ անգամ ևս հիշեցրեց, որ իրենց ծրագիրը հետևյալն է՝ ՀՀ վարչապետը հեռանում է, ձևավորվում է ժամանակավոր կառավարություն, երկրում իրավիճակը կայունանում է, որից հետո անցկացվում են ընտրություններ: «Այս անգամ պետք է կազմակերպենք մաքուր ընտրություն և այդ ժամանակ մեկդ մյուսիդ պետք է վերահսկի»,-ասաց Վազգեն Մանուկյանը: Անդրադառնալով ԳՇ-ի պետ Օնիկ Գասպարյանին պաշտոնից ազատելու գործընթացին՝ Վազգեն Մանուկյանը ընդգծեց, որ պետք է պահանջեն, որ ՀՀ նախագահը կատարի իր պարտականությունները: «Այո, պետք է լինենք համբերատար, բայց չափավոր: Ասում են, թե ժողովուրդն իրավունք չունի ապստամբություն անելու, իսկ ով ասաց: Ժողովուրդը պետք է կարողանա ոտքի կանգնել, ու անել այն ինչ ուզում է: Հավաքվեք, կազմակերպվեք, համագործակցեք միմյանց հետ ու մենք կհաղթենք»,-հավելեց Վազգեն Մանուկյանը:

18:05 - 06 մարտի, 2021

Նախագահը «Հայրենիքի փրկության շարժման» ղեկավարների հետ հանդիպում է խնդրել |tert.am|

tert.am: Հանրապետության նախագահ Արմեն Սարգսյանը «Հայրենիքի փրկության շարժման» ղեկավարների հետ հանդիպում է խնդրել: Այս մասին Բաղրամյան պողոտայում հրավիրված հանրահավաքի ժամանակ հայտարարեց ՀՅԴ ԳՄ ներկայացուցիչ, «Հայրենիքի փրկության շարժման» համակարգող Իշխան Սաղաթելյանը։ «Մենք տեղեկացանք, որ նախագահը վաղը կրկին շարժման ղեկավարների հետ հանդիպում է խնդրել։ Ձեր բոլորի անունից կդիմենք նախագահին՝ ասելով՝ Դուք անհատական և ամբողջական պատասխանատվություն ունեք երկրում ստեղծված իրավիճակի համար»,-ասաց Սաղաթելյանը։ Նա, դիմելով ՀՀ նախագահին, ասաց, որ Արմեն Սարգսյանը պարտավոր է կանգնել Սահմանդրության գլխին և մինչև երկուշաբթի դիմել ՍԴ՝ հակասահմանադրական ճանաչելով ԳՇ պետի պաշտոնանկությունը։

18:03 - 06 մարտի, 2021

Սաղաթելյանը ներկայացրեց, թե ինչու է ՀՓՇ-ն իր բողոքի ձայնը բարձրացնելու համար ընտրել Բաղրամյան պողոտան |armenpress.am|

armenpress.am: «Հայրենիքի փրկության շարժման» հանրահավաքի շարժման համակարգող, ՀՅԴ ԳՄ ներկայացուցիչ Իշխան Սաղաթելյանը պարզաբանեց, թե ՀՓՇ-ն և շարժմանը միացած անձինք ինչու են վրաններ տեղադրել և հանրահավաքներ անցկացնում հենց Բաղրամյան պողոտայում: Հանրահավաքին հարթակից հիշեցրեց, որ արդեն 1 շաբաթից ավել է, ինչ Բաղրամյան պողոտան գտնվում է իրենց տրամադրության տակ, և շատերն են հարցնում, թե ինչու հենց Բաղրամյան պողոտայում և ինչ հարց են լուծում անընդհատ քայլերով, երթերով, հանրահավաքներով: «Այս փողոցում է գտնվում 3 կարևորագույն ինստիտուտ՝ ԱԺ շենքը, նախագահական նստավայրը և Սահմանադրական դատարանը: Այս 3 կառույցների որոշումից կախված է շատ կարևոր և էական բան՝ մեր երկրի առաջիկա օրերի համար: Այս հարթակը Հայաստանի պայքարի հարթակն է, այս հարթակից անընդհատ այս 3 ինստիտուտները զգալու են և տեսնեն ժողովրդի ձայնը»,-ասաց Սաղաթելյանը: Նա նշեց, թե փորձում են քարոզչություն անել, թե այդ հարթակը նեղկուսակցական հարթակ է, ընդդիմադիր ուժերի հարթակն է, իշխանության համար պայքարի հարթակ է, երբեմն էլ ասում են, թե սա դարձել է նախընտրական հարթակ: «Ես շատ հստակ և ուղիղ ուզում եմ ևս մեկ անգամ ասել, որ սա հայ ազգի հարթակն է: Այս հարթակը բոլոր նրանց հարթակն է, ովքեր ասում են և գտնում են, որ Արցախը պետք է լինի ազատ և անկախ… »,-ասաց Սաղաթելյանն ու վստահեցրեց, որ այդ հարթակում չկան նախկիններ և նորեր: Նա քաղաքացիներին վստահեցրեց, որ իրենց հաղթանակը մոտ է, հորդորեց չհասթափվել:

17:39 - 06 մարտի, 2021