ԱՄՆ

Ամերիկայի Միացյալ Նահանգները դաշնային սահմանադրական հանրապետություն է Հյուսիսային Ամերիկայում, որը բաղկացած է որոշակի ինքնավարություն ունեցող 50 նահանգներից և դաշնային նշանակության Կոլումբիա մարզից։ Ամերիկայի Միացյալ Նահանգները հյուսիսում սահմանակցում է Կանադային, հարավում՝ Մեքսիկային, ծովային սահման ունի Ռուսաստանի հետ։

Մայրաքաղաքը՝ Վաշինգտոն, տարածքը 9,826,675 կմ² է։ 2019 թվականին դրությամբ բնակչությունը կազմում է 328 239 523 մարդ։ Գործող նախագահը Ջոզեֆ Բայդենն է։

Ամերիկայի Միացյալ Նահանգները ներկայումս անդամակցում է ՄԱԿ-ի Անվտանգության Խորհրդին, Հյուսիսատլանտյան դաշինքին, Առևտրի համաշխարհային կազմակերպությանը, Տնտեսական համագործակցության և զարգացման կազմակերպությանը և այլ միջազգային կազմակերպությունների։

Մենք պետք է վստահ լինենք, որ ԱՄՆ-ն այլևս երբեք Ադրբեջանին կամ Թուրքիային պատճառ չի տա հավատալու, որ նրանք կարող են բռնություն գործել՝ անպատիժ մնալով․ Ադամ Շիֆ

Լոս Անջելեսը Հայաստանի և Արցախի հայերի կողքին է, քանի որ նրանք ենթարկվում են Ադրբեջանի շարունակական հարձակումներին: Այս մասին Լոս Անջելեսի քաղաքապետարանի դիմաց տեղի ունեցած ասուլիսի ընթացքում ասել է կոնգրեսական Ադամ Շիֆը։ Վերջինս իր ելույթում նշել է․ «Ամերիկացիները պետք է հասկանան, թե ինչն է վտանգվում, երբ Արցախի ժողովուրդը սպանվում է, երբ ադրբեջանական ռումբերը և հրետանին թիրախավորում են քաղաքացիական բնակավայրերը, և սա տեղի է ունենում Թուրքիայի աջակցությամբ... Այս ամենը սպառնում է բոլորիս ազատությանը: Մենք պետք է բարձրաձայնենք այս մասին: Մենք պետք է վերջ դնենք այս հակամարտությանը և տառապանքներին՝ որքան հնարավոր է, ճնշում գործադրելով Ադրբեջանի և նրա թուրք հովանավորների վրա։ Եվ մենք պետք է վստահ լինենք, որ Միացյալ Նահանգներն այլևս երբեք Ադրբեջանին կամ Թուրքիային պատճառ չի տա հավատալու, որ նրանք կարող են այսպիսի բռնություն գործել՝ անպատիժ մնալով»:

03:00 - 06 հոկտեմբերի, 2020

«Հեռու մնացեք մեր հողից». Ֆիլադելֆիայի հայկական համայնքը բողոքի ակցիա է կազմակերպել՝ ի աջակցության Արցախի |hetq.am|

hetq.am: Երեկ ամերիկյան Փենսիլվանիա նահանգի Ֆիլադելֆիա քաղաքում հայկական համայնքը բողոքի ակցիա է կազմակերպել՝ ընդդեմ Հայաստանի եւ Արցախի նկատմամբ թուրք-ադրբեջանական ագրեսիայի: «Հեռու մնացեք մեր հողից», «Հայաստանն ուզում է խաղաղություն, Ադրբեջանն ուզում է Հայաստանը». այս եւ այլ կոչերով հայկական համայնքը բողոքի ակցիա է անցկացրել Ֆիլադելֆիայի քաղաքապետարանի դիմաց։ Ակցիայի մասնակիցները վանկարկում էին՝ Արցախը Հայաստան է, կեցցե՛ հայ զինվորը։ Ավելին՝ hetq.am-ում

01:35 - 06 հոկտեմբերի, 2020

ԱՄՆ-ի փոխպետքարտուղարը հեռախոսազրույցներ է ունեցել Ադրբեջանի ու Հայաստանի արտգործնախարարների հետ |amerikayidzayn.com|

amerikayidzayn.com: ԱՄՆ-ի փոխպետքարտուղար Բիգանն այսօր առանձին հեռախոսազրույցներ է ունեցել Ադրբեջանի պի Հայաստանի արտգործանախարարներ Ջեհուն Բայրամովի եւ Զոհրաբ Մնացականյանի հետ, եւ արտահայտել Լեռնային Ղարաբաղի հակամարտության շուրջ ծավալված ռազմական գործողությունների թեժացման փաստով իր անհանգստությունը: Փոխպետքարտուղարը կողմերին հորդորել է անհապաղ սկսել հրադադար ու Մինսկի խմբի համանախագահների հովանու ներքո վերսկսել հարատեւ լուծում գտնելու շուրջ բանակցությունները: ԱՄՆ-ի արտաքին գերատեսչության ղեկավարի տեղակալը շեշտել է, որ չկա Լեռնային Ղարաբաղի խնդիրը լուծելու ռազմական եղանակ:

00:03 - 06 հոկտեմբերի, 2020

ԱԳ նախարար Զոհրաբ Մնացականյան հեռախոսազրույցը է ունեցել ԱՄՆ պետքարտուղարի տեղակալ Սթիվեն Բիգանի հետ

ԱԳ նախարար Զոհրաբ Մնացականյան հեռախոսազրույցը է ունեցել ԱՄՆ պետքարտուղարի տեղակալ Սթիվեն Բիգանի հետ։ Հոկտեմբերի 5-ին տեղի ունեցավ ԱԳ նախարար Զոհրաբ Մնացականյանի հեռախոսազրույցը ԱՄՆ պետքարտուղարի տեղակալ Սթիվեն Բիգանի հետ։ Զրուցակիցները մտքեր փոխանակեցին Լեռնային Ղարաբաղի հակամարտության գոտում վերջին զարգացումների շուրջ: Նախարար Մնացականյանը պետքարտուղարի տեղակալ Բիգանին համապարփակ տեղեկատվություն հաղորդեց ադրբեջանական զինուժի կողմից խաղաղ բնակչության և քաղաքացիական ենթակառուցվածքների թիրախավորված հրետակոծման, դրա հետևանքով առաջացած մարդկային և նյութական կորուստների վերաբերյալ։ ԱԳ նախարարը Սթիվեն Բիգանի ուշադրությունը հրավիրեց Ադրբեջանի կողմից ռազմական գործողությունների ընթացքում միջազգային կոնվենցիաներով արգելված զինատեսակների կիրառմանը և խստորեն դատապարտեց այն։ ԱՄՆ պետքարտուղարի տեղակալ Բիգանը կարևորեց կրակի շուտափույթ դադարեցումը և այս ուղղությամբ ԵԱՀԿ Մինսկի համանախագահ երկրների սերտ համագործակցությունը:

20:02 - 05 հոկտեմբերի, 2020

Արմեն Սարգսյանը հանդիպել է ԱՄՆ դեսպանի հետ

Նախագահ Արմեն Սարգսյանն այսօր հանդիպում է ունեցել Հայաստանում ԱՄՆ դեսպան Լին Թրեյսիի հետ, հայտնում են նախագահի աշխատակազմից: Նախագահ Սարգսյանն անդրադարձել է Արցախում ու Հայաստանի սահմաններին Ադրբեջանի սանձազերծած ռազմական ագրեսիայի հետևանքով ստեղծված իրադրությանը և մասնավորապես մտահոգություն հայտնել Թուրքիայի կողմից Ադրբեջանին ցուցաբերվող բացահայտ ռազմաքաղաքական աջակցության առնչությամբ: Հանդիպմանն ընդգծվել է ԵԱՀԿ Մինսկի խմբի համանախագահ երկրների՝ ԱՄՆ-ի, Ռուսաստանի և Ֆրանսիայի նախագահների վերջին համատեղ հայտարարության կարևորությունը: Միաժամանակ, նախագահ Սարգսյանն իրավիճակի կարգավորման տեսանկյունից անհրաժեշտ է համարել ծավալվող գործողություններին Թուրքիայի մասնակցության անվերապահ դադարեցումը, այդ հարցում ընդգծել միջազգային հանրության կարևոր դերը:

17:22 - 05 հոկտեմբերի, 2020

Անհրաժեշտ է մտածել Ղարաբաղում արյունահեղությունը կանխելու հստակ քայլեր․ Լավրով |azatutyun.am|

azatutyun.am: Ռուսաստանի արտգործնախարար Սերգեյ Լավրովը հայտարարել է, թե անհրաժեշտ է մտածել Լեռնային Ղարաբաղում արյունահեղությունը կանխելու հստակ քայլեր։ Լավրովի խոսքով՝ ԵԱՀԿ Մինսկի խմբի համանախագահ երկրների դիվանագիտական գերատեսչությունների ղեկավարները համատեղ հայտարարություն են նախապատրաստում ղարաբաղյան հակամարտության հարցով: Ռուսաստանի արտգործնախարարը տեղեկացրել է, որ խնդրի շուրջ կապի մեջ է նաև Թուրքիայի և Իրանի հետ: Լեռնային Ղարաբաղում վերսկսված ռազմական գործողությունները դադարեցնելու մասին անցած շաբաթ համատեղ հայտարարությամբ էին հանդես եկել Վլադիմիր Պուտինը, Դոնալդ Թրամփը և Էմանյուել Մակրոնը: «Մենք կոչ ենք անում Հայաստանի և Ադրբեջանի ղեկավարներին անհապաղ և բարեխղճորեն կատարել ստանձնած պարտավորությունները և առանց նախապայմաններ ներկայացնելու վերսկսել բանակցությունները ԵԱՀԿ Մինսկի խմբի հովանու ներքո»,- ասվում է Մինսկի խմբի համանախագահ երկրների՝ Ռուսաստանի, ԱՄՆ-ի և Ֆրանսիայի ղեկավարների համատեղ հայտարարությունում:

17:06 - 05 հոկտեմբերի, 2020

Պաշտպանության նախարարն ընդունել է ՀՀ-ում ԱՄՆ արտակարգ և լիազոր դեսպանին

Հոկտեմբերի 5-ին ՀՀ պաշտպանության նախարար Դավիթ Տոնոյանն ընդունել է ՀՀ-ում ԱՄՆ արտակարգ և լիազոր դեսպան Լին Թրեյսիին: Պաշտպանության նախարարը ներկայացրել է ռազմական գործողությունների ներկայիս ընթացքը և ընդգծել Թուրքիայի աննախադեպ անմիջական ներգրավվածությունն ու աջակցությունը ադրբեջանական կողմին։ Դավիթ Տոնոյանն ընդգծել է նաև, որ իրավիճակի այս տեմպերով զարգացումը աղետալի կլինի ամբողջ տարածարջանի համար: ԱՄՆ դեսպանն իր անհանգստությունն է հայտնել ռազմական գործողությունների ընթացքում հումանիտար խնդիրների լուծված չլինելու կապակցությամբ, ինչի առնչությամբ Դավիթ Տոնոյանը նշել է, որ դրանք չեն կարգավորվում հակառակ կողմի շահագրգռվածության բացակայության պատճառով:

16:24 - 05 հոկտեմբերի, 2020

Բժշկագիտության Նոբելյան մրցանակին արժանացան երեք համաճարակաբաններ ԱՄՆ-ից և Մեծ Բրիտանիայից |azatutyun.am|

azatutyun.am: Բժշկագիտության բնագավառում Նոբելյան մրցանակին արժանացան երեք համաճարակաբաններ Միացյալ Նահանգներից և Մեծ Բրիտանիայից: Ամերիկացի Հարվի Ալթերը և Չարլզ Ռայսը, ինչպես նաև բրիտանացի Մայքլ Հաութոնը աշխարհի ամենահեղինակավոր այդ պարգևին են արժանանում «Հեպատիտ C» վարակի բացահայտման գործում ունեցած ավանդի համար: Նոբելյան մրցանակը 2020 թվականին կազմում է մոտ մեկ միլիոն ամերիկյան դոլար: COVID-19-ի համաճարակի պատճառով մրցանաբաշխության արարողությունը այս տարի անցկացվում է հեռավար` առանց մրցանակակիրների և հանդիսատեսի մասնակցության:

14:40 - 05 հոկտեմբերի, 2020

Մենք կանգնած ենք հայ ժողովրդի կողքին․ Լոս Անջելեսի քաղաքապետ |shantnews.am|

shantnews.am: Լոս Անջելեսի քաղաքապետ Էրիկ Գարսետին իր թվիթերյան էջում գրել է, որ Լոս Անջելեսը հպարտ է՝ լինելու հայկական ամենամեծ սփյուռքի տունը։ «Մենք կանգնած ենք հայ ժողովրդի կողքին։ Կոչ եմ անում Վաշինգտոնում մեր առաջնորդներին վարել հետևողական և խիստ դիվանագիտություն, որն անհրաժեշտ է Արցախում խաղաղության հաստատման համար: Թուրքիան պետք է դուրս գա (մարտից-խմբ․)»,-նշված է նրա թվիթերյան գրառման մեջ։

09:11 - 05 հոկտեմբերի, 2020

Լոս-Անջելեում կրկին բազմամարդ ցույց է. փակել են 101-րդ արագընթաց մայրուղին, շրջափակել CNN-ը |armtimes.com|

armtimes.com: ԱՄՆ-ի հայաշատ Լոս-Անջելես քաղաքում կրկին բազմամարդ ցույց է՝ ի պաշտպանություն Արցախի ու Հայաստանի: Հիմնական բողոքի ակցիան տեղի է ունենում Հոլիվուդում՝ CNN-ի շենքի դիմաց։ Լոս Անջելեսի հայկական համայնքը համախմբվել է աշխարհի խոշքրագույն լրատվամիջոցի դիմաց՝ պահանջելով Արցախյան պատերազմի արդար ու ամբողջական լուսաբանում։ Լոսանջելեսահայերը CNN-ից պահանջում են ամբողջությամբ ներկայացնել Թուրքիայի ու Աբրբեջանի կողմից իրականացվող արգրեսիան ու ահաբեկչությունը ինչպես առաջնագծում, այնպես էլ խաղաղ բնակչության նկատմամբ: Հայերի ցույցերը ուղիղ եթերում ներկայացնում է Fox 11-ը. տեսանյութը՝ Արամ Արարատյանի էջից

10:39 - 04 հոկտեմբերի, 2020

Միացյալ Նահանգները Թուրքիա է գործուղել վարչակազմի բարձրաստիճան պաշտոնյաներից մեկին |azatutyun.am|

azatutyun.am: Միացյալ Նահանգները Թուրքիա է գործուղել վարչակազմի բարձրաստիճան պաշտոնյաներից մեկին` Պետդեպարտամենտի Եվրոպական և եվրասիական բյուրոյի ղեկավար Ֆիլիպ Ռիկերին` տարածաշրջանային խնդիրները, այդ թվում` ղարաբաղյան հարցը քննարկելու համար: «Մենք ուզում ենք թուրքական կողմի հետ քննարկել այդ հարցը», - թուրքական «Անադոլու» գործակալությանն ասել է Պետդեպի բարձրաստիճան ներկայացուցիչը, հավելելով. - «Մենք կարող ենք նվազեցնել լարվածությունը»: Հաղորդվում է, որ դեսպան Ռիկերն արդեն ժամանել է Անկարա, հանդիպել նախագահ Էրդողանի խոսնակ Իբրահիմ Քալընին, առաջիկա երկու օրերին էլ բանակցելու է Թուրքիայի արտգործնախարարի և այլ պաշտոնյաների հետ: Մինչ նրա այցը ԱՄՆ պետքարտուղար Մայք Փոմփեոն կոչ էր արել կողմերին հրադադար հաստատել, ինչպես նաև դատապարտել երրորդ ուժերի միջամտությունը: «Մենք դեմ ենք, որ այս հակամարտությունը միջազգային բնույթ ստանա, և կարծում ենք, որ կողմնակի ուժերը պետք է հեռու մնան», - ասել էր Փոմփեոն Fox News-ին տված հարցազրույցում։

01:16 - 04 հոկտեմբերի, 2020

ԱՄՆ դեսպանատունը դեսպանության աշխատակիցներին և նրանց ընտանիքի անդամներին հանձնարարել է Երևանից դուրս չգնալ. հայտարարություն |tert.am|

tert.am: Հայաստանում ԱՄՆ դեսպանատունը, վկայակոչելով Լեռնային Ղարաբաղում շարունակվող ռազմական առճակատումը, իր քաղաքացիներին, որոնք ներկայումս անվտանգ վայրում են, խուսափել երկրում անկարևոր ուղևորություններից: «ԱՄՆ դեսպանատունը դեսպանության աշխատակիցներին և նրանց ընտանիքի անդամներին հանձնարարել է չգնալ Երևանից դուրս: Նախկին անվտանգության նախազգուշացումներին համահունչ, Հայաստանում ԱՄՆ դեսպանությունը նաև շարունակում է հորդորել ԱՄՆ քաղաքացիներին խուսափել Երևանից հարավ, Սևանա լճից արևելք և Դիլիջան ազգային պարկից հյուսիս գտնվող M4 և M16 մայրուղիներից դեպի արևելք մինչև Տավուշի մարզում գտնվող Վրաստանի սահման», - ասվում է հայտարարության մեջ: Դիվանագիտական առաքելությունը զգուշացնում է չմեկնել Լեռնային Ղարաբաղ: Դեսպանատունը նաև հորդորում է ԱՄՆ քաղաքացիներին հետևել տեղական լուրերին: Դիվանագիտական առաքելությունը նաև կոչ է անում, մասնավորապես, խուսափել մարդկանց կուտակումներից և հանրահավաքներից, ինչպես նաև իրազեկել ընկերներին և ընտանիքներին իրենց անվտանգության մասին:

09:35 - 03 հոկտեմբերի, 2020

Կոնգրեսականները կոչ են արել դադարեցնել օգնությունն Ադրբեջանին ու պատժամիջոցներ կիրառել Թուրքիայի դեմ |armenpress.am|

armenpress.am: Ամերիկայի Միացյալ Նահանգների Կոնգրեսի և Ներկայացուցիչների պալատի անդամները նամակ են հղել Պետքարտուղար Պոմպեոյին` կոչ անելով դատապարտել Արցախի և Հայաստանի նկատմամբ Ադրբեջանի և Թուրքիայի ոտնձգությունները, դադարեցնել Ադրբեջանին ռազմական օգնությունն ու պատժամիջոցներ կիրառել Թուրքիայի դեմ: Այս մասին տեղեկացրին Ամերիկայի Հայ դատի հանձնախմբից: «Ամերիկահայերն ու Կոնգրեսում մեր դաշնակիցները պահանջում են պատժամիջոցներ կիրառել Թուրքիայի նկատմամբ և անհապաղ դադարեցնել ԱՄՆ-ի ռազմական օգնությունն Ադրբեջանին: Էրդողանն ու Ալիևը՝ երկու բռնապետեր, որոնք պայմանավորվել են ավարտել 1915թ. գործը, պետք է պատասխանատվության ենթարկվեն արդեն հիմա»,- ասել է Ամերիկայի Հայ դատի հանձնախմբի գործադիր տնօրեն Արամ Համբարյանը: Սենատի և Ներկայացուցիչների պալատի ավելի քան 35 անդամներ արդեն դատապարտել են Թուրքիայի և Ադրբեջանի հակահայկական հարձակումները։

20:10 - 02 հոկտեմբերի, 2020

Նիկոլայ Պատրուշևը և Ռոբերտ Օ’բրայենը քննարկել են Լեռնային Ղարաբաղում տիրող իրավիճակը |armenpress.am|

armenpress.am: Ժնեւում կայացած հանդիպմանը ՌԴ Անվտանգության խորհրդի քարտուղար Նիկոլայ Պատրուշևը եւ ԱՄՆ նախագահի ազգային անվտանգության հարցերով օգնական Ռոբերտ Օ’բրայենը քննարկել են Լեռնային Ղարաբաղում տիրող իրավիճակը: Ինչպես տեղեկացնում է «ՌԻԱ Նովոստի»-ն, այս մասին լրագրողներին հայտնել է ՌԴ Անվտանգության խորհրդի աշխատակազմի մամուլի քարտուղար Եվգենի Անոշինը: «Քննարկվել են Լեռնային Ղարաբաղում տիրող իրավիճակը, միջուկային զենքի չտարածման եւ սպառազինությունների վերահսկողության, տեղեկատվական-հաղորդակցական տեխնոլոգիաների օգտագործման ժամանակ անվտանգության ապահովման, ահաբեկչության դեմ պայքարի ոլորտում փոխգործակցության կատարելագործման հարցերը, ինչպես նաեւ փոխադարձ հետաքրքրություն ներկայացնող այլ հարցեր", - ասել է Անոշինը:

19:30 - 02 հոկտեմբերի, 2020

Մենք չենք ողջունում այս հակամարտության միջազգայնացումը․ Մայք Փոմպեո

Արցախի տեղեկատվական շտաբը հրապարակել է հատված ԱՄՆ պետդեպարտամենտի դիրքորոշումը․ «ԱՄԻ ՔԵԼՈԳ (FoxNews) — Ես կցանկանայի հարցնել Լեռնային Ղարաբաղի մասին, որն, ինչպես հասկանում ենք, ծագեց լրիվ հանկարծակի։ Ոմանք պնդում են, որ դա արտաքին խաղացողների պրովոկացիա էր։ Ի՞նչ եք Դուք կարծում այնտեղ կատարվողի մասին։ ՊԵՏՔԱՐՏՈՒՂԱՐ ՊՈՄՊԵՈ — … Մենք չենք ողջունում այս [հակամարտության] միջազգայնացումը։ Կարծում ենք, որ դրսի խաղացողները դրսում էլ պետք է մնան։ Կոչ ենք անում հրադադարի, որ երկու կողմերն էլ հետ կանգնեն։ Խոսել ենք երկու երկրների ղեկավարության հետ այս մասին…»

10:20 - 02 հոկտեմբերի, 2020

Ամերիկացի կոնգրեսականները Թրամփի վարչակազմից պահանջել են զսպել Ադրբեջանի ագրեսիվ գործողությունները |1lurer.am|

1lurer.am: Ամերիկացի 50 կոնգրեսական պետքարտուղար Մայք Պոմպեոյին հղված նամակում պահանջել են, որ Թրամփի վարչակազմը ձեռքի տակ եղած բոլոր ռեսուրսները ներդնի Ադրբեջանի հետագա ագրեսիվ գործողությունները զսպելու համար։ Հիշեցնելով, որ Ադրբեջանը ոչ վաղ անցյալում սպառնում էր հարվածել անգամ Հայաստանի ատոմակայանին՝ կոնգրեսականները հայտարարել են, որ փաստերը խոսում են վերջին հարձակման նախապես խնամքով ծրագրված լինելու մասին։ «Մտահոգության լրացուցիչ առիթ է Թուրքիայի նյութական օգնությունն ու քաջալերումը։ Թուրքական նեգրավվածությունը շարունակական տարածաշրջանային հակամարտության վտանգ է հարուցում, որը հումանիտար աղետի հետ կարող է վտանգել ԱՄՆ անվտանգության կարևոր առաջնահերթությունները»,- նշված է նամակում։ Կոնգրեսականները նկատել են, որ կողմերի միջև հավասարության քաղաքականությունը տապալվել է։ «Շատ երկար ժամանակ է, որ Միացյալ Նահանգներն ու ԵԱՀԿ Մինսկի խմբի մյուս անդամները հավասարության կեղծ նշաններ են դնում Հայաստանի և Ադրբեջանի միջև, նույնիսկ այն դեպքում, որ վերջինը սպառնում է պատերազմով ու մերժում դիտորդական առաքելությունը շփման գծի երկայնքով»։ Ֆրենք Փալոնը, Ադամ Շիֆը, Լինդա Սանչեզը և տասնյակ ուրիշ օրենսդիրներ պահանջել են աներկբա դատապարտել ադրբեջանական ագրեսիան, Բաքվին հարկադրել ընդունել կրակային մոնիտորինգի վերաբերյալ ամերիկյան օրենսդիրների առաջարկը և բարձր մակարդակով աշխատել թուրքական կողմի հետ` հստակեցնելու համար, որ Ադրբեջանին օգնելը սպառնալիք է տարածաշրջանային խաղաղությանը։

01:16 - 02 հոկտեմբերի, 2020