Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։ 

Երևանն աղտոտող շինարարական մեքենաները կտուգանվեն. հսկողությունը կուժեղացվի

Երևանն աղտոտող շինարարական մեքենաները կտուգանվեն. հսկողությունը կուժեղացվի

Շինանյութեր տեղափոխող շատ բեռնատար մեքենաներ քաղաքում երթևեկում են ոչ սահմանված հատվածներով և, չպահպանելով նյութերի տեղափոխման կանոնները, աղտոտում են փողոցները: Աշխատանքային խորհրդակցության ժամանակ խնդրին անդրադարձել է քաղաքապետ Հայկ Մարությանը: Հանձնարարվել է ՃՈ հետ քայլեր ձեռնարկել՝ վարորդներին գտնելու և օրենքով սահմանված կարգով վարչական պատասխանատվության ենթարկելու համար: Բացի այդ, կսահմանվի լրացուցիչ հսկողություն:«Եթե վարորդներն անպատիժ մնան՝ վաղը կամ մյուս օրը դեպքը կարող է կրկնվել: Սահմանված տուգանքից բացի պետք է քննարկենք նաև ընթացքի ժամանակ աղտոտված փողոցների մաքրման ծախսի խնդիրը: Մենք ունենք նաև Կառավարության որոշմամբ սահմանված փողոցների ցանկ, մասնավորապես կենտրոնում, որտեղ արգելվում է բեռնատարների՝ առանց համապատասխան թույլտվության մուտքը: Պետք է հսկողություն սահմանենք և գործնականում կյանքի կոչենք այս որոշումը»,-նշել է քաղաքապետը: ***Երևան համայնքն իր միջոցներով շարունակելու է նոր աղբամանների ձեռքբերման գործընթացը: Խորհրդակցության ժամանակ քաղաքապետի հարցադրմանն ի պատասխան՝ արդյոք «Սանիթեք» ընկերությունը պատրաստվու՞մ է աղբահանության խնդիրը կարգավորելու նպատակով համագործակցել քաղաքապետարանի հետ և նոր մեքենաներ ու աղբամաններ ձեռք բերել, ընկերության ներկայացուցիչը նշել է, որ այս պահին «Սանիթեքում» նման հարց չեն քննարկում: Զեկուցվել է, որ այս շաբաթ քաղաքապետարանը «Սանիթեք»-ում կսկսի մեքենասարքավորումների տեխնիկական վիճակի և պայմանագրերին համապատասխանության ուսումնասիրություն (մոնիթորինգ): Արդյունքների մասին լրացուցիչ կտեղեկացվի:***Նախորդ շաբաթ շարունակվել են ստուգայցերը՝ արգելելու բացօթյա ապօրինի առևտուրը: Բացատրական աշխատանքներից հետո գործունեությունը չդադարեցնելու համար 20 դեպքում քաղաքացիները տուգանվել են:
12:17 - 13 օգոստոսի, 2019
Այս տարի 20 վերելակ կփոխարինվի նորերով

Այս տարի 20 վերելակ կփոխարինվի նորերով

Երևանի բազմաբնակարան բնակելի շենքերն ունեն շուրջ 4400 վերելակ, դրանց մեծ մասը փոխարինման կարիք ունի: Դրանք տեղադրվել են դեռևս 1956-1993թթ., թեպետ շահագործման սահմանված ժամկետը մինչև 25 տարի է: Այսինքն՝ գրեթե բոլոր վերելակները սպառել են այդ ժամկետը: 2007-2008թթ. պետական բյուջեից հատկացված 3 մլրդ դրամով Երևանում տեղադրվեց 35 նոր վերելակ, նորոգվեց շուրջ 2500-ը: Սակայն նորոգվածներն արդեն վերանորոգման կարիք ունեն, խնդիրը պահանջում է համապարփակ լուծում: Նշենք նաև, որ շենքերի մեծ մասի բնակիչներն այդքան միջոցներ չունեն: «Բազմաբնակարան շենքի կառավարման մասին» օրենքն ասում է. վերելակը ընդհանուր բաժնային սեփականության իրավունքով պատկանում է բնակարանների սեփականատերերին, այսինքն՝ բնակիչներին:Յուրաքանչյուր շենք ունի սպասարկող ընկերություն, որի ծառայությունների դիմաց բնակիչները սպասարկման վճար են տալիս: Եվ, եթե ընթացքի ժամանակ վերելակը փչացել է, հենց նրանց էլ պետք է դիմել: Հաշվի առնելով խնդրի սոցիալական կողմն ու քաղաքացիների կյանքին և առողջությանն սպառնացող վտանգը՝ Երևանի քաղաքապետարանը նախաձեռնել է վերելակների փոխարինման ընդգրկուն ծրագիր. խոսքը 3500 նոր վերելակի մասին է: Այս թվում ներառված չեն վթարային շենքերի, նորակառույցների, նաև շենքերի բեռնատար վերելակները: «Հունվարին հայտարարել էինք, որ մտնում էինք վերելակների փոխարինման համապարփակ նախագծի փուլ: Խոր ուսումնասիրություններ, դիտարկումներ, հարցումներ: Լուծումները ներառել ենք նախագծում, որը վերջերս ներկայացվեց Կառավարությունում և արժանացավ հավանության: Ստեղծվել է միջգերատեսչական խումբ»,-նշել է փոխքաղաքապետ Հայկ Սարգսյանը: Նախնական հաշվարկով՝ 3500 վերելակի փոխարինումը կտևի 4 տարի: Մնում է շենքերի բնակիչների մեծամասնության համաձայնությունը: «Քաղաքը, որպես առանձին բյուջետային միավոր, չունի այդ ֆինանսական հնարավորությունը, որովհետև խոսքը 32 մլրդ դրամի մասին է, իսկ, ինչպես գիտեք, դա մեր մեկ տարվա մուտքերի ծավալն է: Քաղաքապետի հանձնարարությամբ մենք նախնական փորձնական մի ծրագիր ենք իրականացնում, որի շրջանակում 20 վերելակ կփոխարինվի նորերով»:Շենքերն ընտրվել են տասը վարչական շրջաններից: Ընտրությունը կատարվել է՝ հաշվի առնելով վերելակների մաշվածությունը, խափանման հաճախականությունը, հորանների վիճակը, խցիկների մաշվածության աստիճանն ու ԱԻՆ-ի կողմից հաստատված մի շարք այլ չափորոշիչներ: «20 վերելակները կփոխարինվեն համայքնային միջոցներով՝ մոտավորապես 190 մլն դրամ է: Դա քաղաքի ու երկրի մասշտաբով աննախադեպ ծրագիր է: Մինչև տարեվերջ կունենանք տեղադրված վերելակները. օրեր առաջ մրցույթը տեղի ունեցավ և ամենաուշը դեկտեմբերին կունենանք նոր վերելակներ»,-նշել է Հայկ Սարգսյանը: Նախքան վերելակների փոխարինման ծրագրի ամբողջական իրագործումը՝ քաղաքը վերելակային ֆոնդի պահպանման և շահագործման ծախսերի առումով շարունակելու է աջակցել բնակիչներին: Այս տարի համայնքի բյուջեից այդ նպատակին տրամադրվել է շուրջ 121 մլն դրամ. ավելին՝ քան նախորդող տարիներին:
11:27 - 13 օգոստոսի, 2019
Երևանի համայնքային հիմնարկը կունենա 50 աղբատար մեքենա և 4400 աղբաման

Երևանի համայնքային հիմնարկը կունենա 50 աղբատար մեքենա և 4400 աղբաման

Երևանի աղբահանությունն ու սանիտարական մաքրումն իրականացնող համայնքային հիմնարկը կունենա 50 աղբատար մեքենա: Համայնքային հիմնարկը ներկայումս արդեն 10 միավոր տեխնիկա ունի, և ամեն օր վաղ առավոտից աշխատակիցները դուրս են գալիս փողոց՝ մաքրելու աղբը: Այս պահին տեխնիկայի և աշխատակիցների համալրումը շարունակվում է: Աղբը Երևանի փողոցներից ու բակերից հեռացնելու համար համայնքը առնվազն 40 մասնագիտացված մեքենայի կարիք ունի: «Երևանի աղբահանություն և սանիտարական մաքրում» ՀՈԱԿ-ի տնօրեն Արմեն Գրիգորյանը նշել է, որ այժմ մի շարք վարչական շրջաններում աղբահանության խնդիր կա, որովհետև այնտեղ «Սանիթեք» ընկերության աղբատար մեքենա գրեթե չի մտնում:«Սանիթեք» ընկերության հետ կնքված պայմանագրի համաձայն` մայրաքաղաքում պետք է տեղադրված լիներ 16 հազար աղբաման, իսկ այսօր Երևանում տեղադրված է ընդամենը 4 հազար աղբաման, որոնց մեծ մասը շարքից դուրս է եկել: Համայնքը կունենա նաև սեփական աղբամաններ, որոնց առաջին խմբաքանակն արդեն Երևանում է` շուրջ 400 հատ: Դրանց թիվն առաջիկա ամիսներին կբազմապատկվի՝ հասնելով 4400-ի:   Երևանի քաղաքապետարան
11:03 - 05 օգոստոսի, 2019
Երևանում վերելակներին ուղղվող գումարները չեն կրճատվել |fip.am|

Երևանում վերելակներին ուղղվող գումարները չեն կրճատվել |fip.am|

fip.am: Երևանի քաղաքապետարանի դիմաց հուլիսի 31-ին բողոքի ակցիա էին իրականացնում Հայ հեղափոխական դաշնակցության ներկայացուցիչները, որոնք «դեղին քարտ» ցույց տվեցին Երևանի քաղաքապետ Հայկ Մարությանին՝ մատնանշելով քաղաքում չլուծված խնդիրները։ ՀՅԴ ներկայացուցիչ Արա Ռոստոմյանը, մասնավորապես, բարձրաձայնեց քաղաքի վերելակների խնդրի մասին՝ հայտարարելով, որ «գոնե մեկ վերելակ չի փոխվել, իսկ փոխարենը 71 տոկոսով կրճատվել է վերելակների վերանորոգման գումարը»։ Երևանի քաղաքապետարանի մամուլի քարտուղար Հակոբ Կարապետյանը, սակայն, հակադարձել է Ռոստոմյանի այս պնդմանը՝ նշելով, որ վերելակների սպասարկման, նորոգման համար նախատեսվող բյուջեն ոչ թե կրճատվել է 71 տոկոսով, այլ հակառակը՝ ավելացել է 20-ով։ «2019-ին 120 միլիոն 779 հազար դրամ՝ 2018 թվականի 96 միլիոն 528 հազար դրամի փոխարեն»,- ասել է Կարապետյանը։  Fip.am-ը որոշեց պարզել, թե իրականում որքա՞ն գումար է քաղաքային վարչակազմն ուղղել Երևանի վերելակների հիմնանորոգման համար, և արդյո՞ք նախատեսվում է քաղաքում նոր վերելակներ տեղադրել։ Ինչ վերաբերում է ՀՅԴ ներկայացուցչի հիշատակած վերելակների նորոգման համար նախատեսված բյուջեի՝ 71 տոկոսով կրճատվելուն, ապա, իսկապես, նախորդ տարի դեկտեմբերին հաստատված Երևան քաղաքի 2019 թվականի բյուջեով վերելակների հիմնանորոգմանն ուղղվող գումարը 30.7 մլն դրամ էր՝ 2018-ին ուղղված 108,7 մլնի դիմաց (կատարողականով՝ 96.6 մլն դրամ)։ Սակայն այս տարվա մարտին Երևանի քաղաքային վարչակազմը ներկայացրեց 2019 թ. բյուջեի լրամշակված տարբերակ (խմբ. քաղաքային բյուջեն ավելացվել էր 10 մլրդ դրամով), որով «Վերելակների հիմնանորոգում» ծրագրին ուղղվեց ևս 90 մլն դրամ՝ տարվա կտրվածքով կազմելով ավելի քան 120.7 մլն դրամ։ Այսպիսով, Հակոբ Կարապետյանի հայտարարած թվերը ճշգրիտ են։     Հատկանշական է, որ վերելակների թեմային հուլիսի 31-ին անդրադարձել էր նաև «Իրավունք» կայքը։ Լրատվականը գրել էր, թե իրենք չեն կարողանում գտնել «այդ 120 միլիոնը» քաղաքապետարանի կայքում ներկայացված մայրաքաղաքի բյուջեի մասին փաստաթղթում։ Ինչպես արդեն նշեցինք, սակայն, համապատասխան փաստաթուղթն առկա է քաղաքապետարանի պաշտոնական կայքում (https://www.yerevan.am/am/finance/, 9-րդ կետ): Նոր վերելակներ՝ Երևանում Ինչ վերաբերում է նոր վերելակներին, ապա Հակոբ Կարապետյանը 1in.am-ի հետ զրույցում նշել է, որ շուտով քաղաքում նոր վերելակների պիլոտային ծրագիր կիրականացվի։ «Այս պահին արդեն 20 վերելակ է փոխարինվելու Երևանի տարբեր վարչական շրջաններում։ Ծրագիրը պիլոտային է լինելու՝ հասկանալու, վեր հանելու հետագա խնդիրները։ Եթե չեմ սխալվում, մոտ օրերս այդ պիլոտային ծրագրի շրջանակներում մեկ վերելակ կտեղադրվի»,- նշել է քաղաքապետարանի մամուլի քարտուղարը։ Հավելենք, որ պետական գնումների armeps.am կայքում արդեն տեղադրվել է վերելակների գնման մրցույթի հայտարարությունը։
07:51 - 02 օգոստոսի, 2019
Մայրաքաղաքի երեք պոլիկլինիկայում ներդրվող էլեկտրոնային ընդունարանները բնակիչներին կազատեն հերթերից |armenpress.am|

Մայրաքաղաքի երեք պոլիկլինիկայում ներդրվող էլեկտրոնային ընդունարանները բնակիչներին կազատեն հերթերից |armenpress.am|

armenpress.am:  Երևանի քաղաքապետարանի ենթակայությամբ գործող պոլիկլինիկաներում հերթերի խնդիրը կարգավորելու նպատակով Երեւանի քաղաքապետարանի աշխատակազմի առողջապահության վարչությունը համագործակցում է «Էլեկտրոնային առողջապահության ազգային օպերատոր» ՓԲ ընկերության հետ՝ առայժմ մայրաքաղաքի երեք պոլիկլինիկաներում էլեկտրոնային ընդունարաններ ներդնելու ուղղությամբ: «Էլեկտրոնային առողջապահության ազգային օպերատոր» ՓԲ ընկերության տնօրեն Ավետ Մանուկյանը նշեց, որ քաղաքապետարանի աշխատակազմի առողջապահության վարչության հետ ձեռք բերված պայմանավորվածության համաձայն՝ «Պոլիկլինիկա դիմած պացիենտների Էլեկտրոնային եղանակով հերթագրման, վերջիններիս բժիշկների մոտ ուղեգրման» փորձարարական ծրագրի շրջանակում ներկայումս էլեկտրոնային ընդունարանների ներդրման աշխատանքներ են իրականացվում մայրաքաղաքի երեք՝ թիվ 1, թիվ 11 («Նոր Արաբկիր» առողջության կենտրոն ) և թիվ 17 պոլիկլինիկաներում: «Էլեկտրոնային ընդունարանը էլեկտրոնային առողջապահության ԱՐՄԵԴ համակարգի գործիքներից է, որի ներդրումը քաղաքացիների համար առաջին հերթին օգտակար է նրանց հերթերից ձերբազատելու առումով: Այսինքն, կոնկրետ պոլիկլինիկային կցագրված քաղաքացին հնարավորություն կունենա, զանգահարելով կամ այցելելով բուժհաստատություն, նախապես այց գրանցել, պոլիկլինիկայի ընդունարանում ադմինիստրատորը այն կընդունի կամ կառաջարկի այլ տարբերակ: Այսինքն՝ մի կողմից բնակչի համար ապահովվում է արագ սպասարկում, մյուս կողմից՝ բուժհաստատությունը կարողանում է ավելի արդյունավետ կառավարել իր մարդկային և նյութական ռեսուրսները: Մյուս առավելությունն այն է, որ պոլիկլինիկայի ղեկավարության և հիմնադրի համար շարժը դառնում է թափանցիկ»,-համակարգի ներդրման առավելություններն է ներկայացնում Ավետ Մանուկյանը: Էլեկտրոնային ընդունարանի ներդրումը նա համարում է կարևոր քայլ նաև էլեկտրոնային առողջապահության համակարգին անցնելու տեսանկյունից, երբ քաղաքացին կկարողանա այց գրանցել արդեն միանգամից առցանց եղանակով՝ հենց տնից և մի շարք ծառայություններից օգտվել էլեկտրոնային առողջապահության համակարգի միջոցով, ինչպես եվրոպական մի շարք երկրներում: Պոլիկլինիկաների համապատասխան մասնագետներն արդեն իսկ ներգրավված են Առողջապահության նախարարության և «Էլեկտրոնային առողջապահության ազգային օպերատոր» ՓԲ ընկերության նախաձեռնությամբ՝ Առողջապահության ազգային ինստիտուտում կազմակերպվող դասընթացներում, որի ընթացքում ծանոթանում են էլեկտրոնային առողջապահության համակարգից օգտվելու կանոններին: Հաստատություններն ապահովված են նաև անհրաժեշտ համակարգչային տեխնիկայով: Երեք պոլիկլինիկաներում էլեկտրոնային ընդունարանների ներդրման գործընթացը նախատեսվում է ավարտել առաջիկա շաբաթների ընթացքում, որից հետո արդեն կսկսվի պրակտիկ կիրառությունը: Հաջողության դեպքում համակարգը նախատեսվում է ներդնել նաև քաղաքապետարանի ենթակայությամբ գործող բոլոր մյուս պոլիկլինիկաներում։
06:21 - 01 օգոստոսի, 2019
Օգոստոսի 1-ից 48 համարի երթուղին չի գործի․ քաղաքապետարանն այլընտրանք է առաջարկում

Օգոստոսի 1-ից 48 համարի երթուղին չի գործի․ քաղաքապետարանն այլընտրանք է առաջարկում

Շահագործող ընկերության կողմից սպասարկումից հրաժարվելու պատճառով ս.թ. օգոստոսի 1-ից կդադարեցվի Երևանի ներքաղաքային միկրոավտոբուսային հ.48 երթուղու աշխատանքը: Երթուղին շահագործվում էր «Գրանդ Քենդի» ՓԲԸ -15-րդ թաղամաս ուղեգծով: Նշված երթուղուց օգտվող քաղաքացիների տրանսպորտային սպասարկումը մասնակիորեն ապահովելու նպատակով՝ ա) միկրոավտոբուսային հ.42 երթուղու ուղեգիծը Արշակունյաց պողոտայից կերկարացվի մինչև «Գրանդ Քենդի» ՓԲԸ (միկրոավտոբուսային հ.48 երթուղու վերջնակետ). բ) մասնակիորեն կփոփոխվի միկրոավտոբուսային հ.52 երթուղու ուղեգիծը. այն 15-րդ թաղամասից (Գ.Չաուշի հրապարակից) կշահագործվի միկրոավտոբուսային հ.48 երթուղու ուղեգծով՝ Բաշինջաղյան, Մարգարյան, Հալաբյան, Լենինգրադյան փողոցներով մինչև Սեբաստիայի փողոց, այնուհետև գործող ուղեգծով: Միկրոավտոբուսային հ.48 երթուղուց օգտվող մյուս ուղևորները կարող են օգտվել նշված երթուղուն զուգահեռ գործող այլ ներքաղաքային երթուղիներից: Պատճառվող անհարմարությունների համար հայցում ենք համաքաղաքացիների ներողամտությունը:
17:19 - 31 հուլիսի, 2019
Մայրաքաղաքի կանաչ գոտիների թերի ոռոգման հիմնական պատճառը ոռոգման ջրի անկանոն մատակարարումն է. քաղաքապետարան

Մայրաքաղաքի կանաչ գոտիների թերի ոռոգման հիմնական պատճառը ոռոգման ջրի անկանոն մատակարարումն է. քաղաքապետարան

Ամռան ամիսներին, երբ ջերմաստիճանը մայրաքաղաքում հաճախ հատում է 40 աստիճանի սահմանագիծը, կանաչ տարածքների պատշաճ և խնամված տեսքն ապահովելու համար անհրաժեշտ է կազմակերպել պարբերական ոռոգում: Ընդ որում, օդի չորության և անբարենպաստ հողային կառուցվածքի պայմաններում Երևանի ոռոգման համակարգը շուրջ 10-ն անգամ գերազանցում է, օրինակ, ԱՊՀ մյուս մայրաքաղաքների ցանցերը: Մեկ տարեշրջանի ընթացքում մայրաքաղաքում 1 հա կանաչ զանգված ոռոգելու համար անհրաժեշտ է 8-9 հազ. խմ ջուր, իսկ խիստ տապի պայմաններում՝ 12-14 հազ. խմ: Այնինչ, մի շարք պատճառներից ելնելով, որոնցից հիմնականներն են՝ ջրատարների ընթացիկ վերանորոգումը, ջրի ճնշման անկումը, ֆիզիկապես որոշակիորեն մաշված խողովակաշարերը, կանաչ գոտիները թերի են ոռոգվում, ինչն էլ իր հերթին ոչ միայն լիարժեք կանաչ տարածքներ չի ապահովում, այլև կարող է նպաստել հրդեհավտանգ իրավիճակի ի հայտ գալուն: Ջրի ոչ լիարժեք ապահովման պատճառներից մեկն էլ մի քանի վարչական շրջաններ սնուցման նույն աղբյուրից ոռոգման ջուր մատակարարելն է (Աջափնյակ-Դավթաշեն, Քանաքեռ-Զեյթուն-Արաբկիր-Կենտրոն): Ներկայումս նախագծանախահաշվային փաստաթղթեր են մշակվում՝ ոռոգման ցանցերն ըստ վարչական շրջանների հնարավորին առանձնացնելու համար: Մինչ այդ, Երևանի քաղաքապետարանը միջոցներ է ձեռնարկում առկա իրավիճակում մայրաքաղաքի կանաչ տարածքների ոռոգման պարբերականությունն ավելացնելու և կանաչ գոտիների տեսքն ու նպատակային նշանակությունը վերականգնելու նպատակով:   Երևանի քաղաքապետարան
12:08 - 30 հուլիսի, 2019
Երևանի քաղաքապետարանի աշխատակազմի առևտրի և սպասարկումների վարչությունը հայտնաբերել է պիտանիության ժամկետն անցած ապրանքներ

Երևանի քաղաքապետարանի աշխատակազմի առևտրի և սպասարկումների վարչությունը հայտնաբերել է պիտանիության ժամկետն անցած ապրանքներ

Մայրաքաղաքում գործող առևտրի օբյեկտներում պիտանիության ժամկետն անցած ապրանքների վաճառքի դեպքերը հայտնաբերելու, կանխարգելելու և արգելելու, ինչպես նաև բնակիչներին սննդային թունավորումներից զերծ պահելու նպատակով Երևանի քաղաքապետարանի աշխատակազմի առևտրի և սպասարկումների վարչությունը շարունակում է ստուգայցեր իրականացնել: Ձեռնարկված միջոցառումների ընթացքում 2019 թվականի հուլիսի 26-ին վարչության աշխատակիցները Սունդուկյան փողոցի թիվ 9 հասցեում գործող՝ «Եվա և Սյուզի» ՍՊ ընկերությանը պատկանող «Շիրակ» սուպերմարկետում հայտնաբերել են պիտանիության ժամկետն անցած բազմատեսակ և բազմաթիվ ապրանքներ, մասնավորապես` սննդամթերք։ «Շիրակ» սուպերմարկետի տնօրենը և աշխատակիցները փորձել են թաքցնել նշված ապրանքները, ինչից և պարզ է դարձել, որ վերջիններս գիտակցաբար իրացնում են ժամկետանց սննդամթերք։ Երևանի քաղաքապետարանը ևս մեկ անգամ կոչ է անում տնտեսվարողներին զերծ մնալ առանց պիտանիության ժամկետի կամ ժամկետն անցած ապրանքների իրացումից։
17:01 - 29 հուլիսի, 2019
Երևանում փակվում են բարձրահարկ շենքերի աղբամուղները. որոշումը բնակիչներինն է, կան նաև դժգոհողներ |armenpress.am|

Երևանում փակվում են բարձրահարկ շենքերի աղբամուղները. որոշումը բնակիչներինն է, կան նաև դժգոհողներ |armenpress.am|

armenpress.am։ Բնակիչների դիմումներով Երևանի բազմաբնակարան բարձրահարկ շենքերի 185 մուտքում փակվել և զոդվել են բոլոր աղբամուղները: Այս մասին ասաց Երևանի քաղաքապետարանի կոմունալ տնտեսության վարչության համատիրությունների հետ աշխատանքի կազմակերպման բաժնի պետ Հարություն Խաչատրյանը: «Բազմաբնակարան շենքերի աղբամուղները փակելու որոշում չկա և չի կարող լինել, քանի որ դրանք բնակիչների սեփականությունն են: Վերջիններն են որոշում, թե ինչպես օգտագործել ընդհանուր բաժնային սեփականությունը (գույքի նկատմամբ ընդհանուր սեփականությունը համարվում է բաժնային- խմբ.): Շենքերի սեփականատերերի ժողովի ժամանակ, եթե 51 տոկոսը որոշում կայացնի, որ պետք է աղբատարը փակվի, ապա այդ փաստն ունի իրավական ուժ: Բնակիչները կարող են իրենց կայացրած որոշումով դիմել կառավարման մարմին: Որոշումը կարող է լինել օրինակ՝ ստորագրության ձևով»,- նշեց Խաչատրյանը: Անդրադառնալով աղբամուղները փակելու նկատմամբ մարդկանց արձագանքին՝ նա նշեց, որ դժգոհություններ շատ չեն հնչել, հիմնականում հնարավոր է եղել բացատրել բոլորին, որ աղբամուղի փակելն ամենակարևորը կնպաստի շենքի մուտքի մաքուր լինելուն: «Երևան քաղաքի բազմաբնակարան շենքերի մոտ փակված է 185 աղբամուղ: Այս պահին գործընթացը մի փոքր ակտիվացել է, քանի որ ներկայում հավուր պատշաճի չի կատարվում աղբահանությունը: Այսօր խնդիր է առաջանում նաև բակերում կայանող մեքենաների պատճառով, քանի որ աղբատար մեքենաները չեն կարողանում բակեր մուտք գործել»,- նշեց Հարություն Խաչատրյանը: Նրա խոսքով՝ որոշ շենքերի աղբամուղները չփակելու դեպքում անհրաժեշտ է լինելու լուծել աղբատար փոքր մեքենաներ ունենալու խնդիրը, որպեսզի բակեր մտնելը հեշտ լինի. Երևանի քաղաքապետարանը ձեռք է բերել 10 փոքր աղբատար մեքենա: Նախապես մրցույթ է հայտարարված եղել, հաղթել է «Մուլտի մոթորս» կազմակերպությունը և մինչև հոկտեմբերի 15-ն այդ մեքենաները կլինեն Երևանում:
05:59 - 26 հուլիսի, 2019
Հոկտեմբերին Թբիլիսիում կվերականգնվի թումանյանական մթնոլորտը. փոխքաղաքապետ Վիրաբյանի այցը Վրաստան

Հոկտեմբերին Թբիլիսիում կվերականգնվի թումանյանական մթնոլորտը. փոխքաղաքապետ Վիրաբյանի այցը Վրաստան

Աշխատանքային այցով Թբիլիսիում գտնվող Երևանի փոխքաղաքապետ Տիգրան Վիրաբյանը հանդիպել է Թբիլիսիի քաղաքապետի տեղակալ Սոֆիո Խունտսարիայի հետ: Հանդիպման ընթացքում Տիգրան Վիրաբյանը քաղաքապետ Հայկ Մարությանի անունից ողջույններ է հղել քաղաքապետ Կախա Կալաձեին՝ հրավիրելով նրան մասնակցել սեպտեմբերի 29-ին կայանալիք Էրեբունի-Երևան տոնակատարությանը: Իր հերթին փոխքաղաքապետ Խունտսարիան փոխանցել է Թբիլիսիի քաղաքապետ Կալաձեի ողջույնները՝ Հայկ Մարությանին հրավիրելով հոկտեմբերի առաջին շաբաթվա ընթացքում կայանալիք Թբիլիսիի օրվա տոնախմբությանը: Զրուցակիցները քննարկվել են երկու մայրաքաղաքների մշակութային կապերին վերաբերող մի շարք խնդիրներ, մասնավորապես՝ 2020-ին փոխադարձաբար Երևանում՝ Թբիլիսիի և Թբիլիսիում՝ Երևանի մշակույթի օրերի կազմակերպմանն առնչվող: Այս երկու միջոցառումները նախապատրաստելու համար առաջիկայում աշխատանքային խմբեր կստեղծվեն: Հանդիպմանը առանձնապես կարևորվել է զբոսաշրջության ոլորտում Երևանի և Թբիլիսիի համագործակցությունը: Մասնավորապես նշվել է, որ պետք է այնպես անել, որ Վրաստան ժամանած զբոսաշրջիկներին տեղեկատվություն տրամադրվի նաև Հայաստանի զբոսաշրջային հնարավորությունների մասին և հակառակը՝ Հայաստան ժամանողները տեղեկացվեն Վրաստանի համապատասխան ուղղությունների մասին: Առաջարկվել է նաև ստեղծել միասնական հարթակ, որտեղ կներկայացվեն երկու մայրաքաղաքները՝ որպես զբոսաշրջային ամբողջական ուղղություն: *** Փոխքաղաքապետ Տիգրան Վիրաբյանը և փոխքաղաքապետ Սոֆիո Խունտսարիան քննարկել են նաև Հովհաննես Թումանյանի 150-ամյակին նվիրված համատեղ միջոցառումների ընթացքը: Տիգրան Վիրաբյանն իր գործընկերոջը փոխանցել է ՀՀ կրթության, գիտության, մշակույթի և սպորտի նախարարի տեղակալ Նարինե Խաչատուրյանի առաջարկն առ այն, որ Թբիլիսիի այն հասցեներում, որտեղ տարբեր տարիներին ապրել է բանաստեղծը, տեղադրվեն հուշատախտակներ՝ QR կոդերով, որոնք կներկայացեն տեղեկատվություն Թումանյանի մասին: *** Քաղաքապետարանում կայացած հանդիպումից հետո Տիգրան Վիրաբյանը այցելել է Թբիլիսիի Պետրոս Ադամյանի անվան պետական հայկական դրամատիկական թատրոն: Հայաստանից դուրս հայկական միակ պետական թատրոնի շենքը ներկայումս հիմնանորոգվում է, իսկ բացումը նախատեսվում է 2021 թվականին: Տիգրան Վիրաբյանը հանդիպել է գեղարվեստական ղեկավար Արմեն Բայանդուրյանի և թատրոնի ստեղծագործական անձնակազմի հետ, որոնց հետ քննարկվել է առաջիկայում հյուրախաղերով Հայաստանում հանդես գալու հեռանկարը: Այնուհետև տեղի է ունեցել այցելություն Թումանյանի տուն-գիտամշակութային կենտրոն, որտեղ քննարկվել է Թբիլիսիում Վերնատունը «Մեկ օր՝ Թումանյանի վերնատանը» նախագիծը: Համաձայն առաջ քաշված գաղափարի՝ հոկտեմբերի երկրորդ կեսին Հայաստանում, Վրաստանում և հայկական սփյուռքում ապրող մտավորականների մի խումբ մեկ օրով կհավաքվի Թբիլիսիում՝ նշանավոր Վերնատանը: Այսպիսով, Հովհաննես Թումանյանի հոբելյանի առթիվ մեծ բանաստեղծն իր հյուրընկալ հարկի տակ կրկին կհավաքի հայ մտավորականության սերուցքը:
16:47 - 25 հուլիսի, 2019
Երևանի թիվ 164 դպրոցի տնօրենի ընտրությունը հարցեր է առաջացրել․ քաղաքապետաանի և նախարարության ներկայացուցիչները չեն ներկայանում խորհրդի նիստերին

Երևանի թիվ 164 դպրոցի տնօրենի ընտրությունը հարցեր է առաջացրել․ քաղաքապետաանի և նախարարության ներկայացուցիչները չեն ներկայանում խորհրդի նիստերին

Երևանի Նվեր Սաֆարյանի անվան թիվ 164 դպրոցի տնօրենի թափուր տեղի համար ընտրություններ տեղի չեն ունեցել։ Այս մասին պնդում է դպրոցի անգլերենի ուսուցչուհի Մանուշ Գաբրիելյան, որը դպրոցի տնօրենի թեկնածուներից էր։ Տնօրենի մյուս հավակնորդը նախկին տնօրեն Արմինե Ներսիսյանն էր։Չկայացած ընտրություններից հետո՝ հուլիսի 12-ին, Հանրակրության վարչության պետ Աննա Ստեփանյանը թիվ 164 դպրոց է ուղարկել փաստաթուղթ, որում ասվում է, որ նախապատվությունը տրված է Արմինե Ներսիսյանին: Մանուշ Գաբրիելյանի կարծիքով՝ նման նշանակումը անօրինական է։ Ըստ նրա՝ նախկին տնօրենին քաղաքապետը վերանշանակեց՝ առանց պատշաճ ընտրություններ կազմակերպելու։ Մանուշ Գաբրիելյանը նաև պատմում է, որ նախկին տնօրենը՝ Արմինե Ներսիսյանը, բազմաթիվ անօրինություններ է կատարել։ Դպրոցի 22 ուսուցիչներով հուլիսի 10-ին նամակ են գրել՝ ուղղված ՀՀ կրթության, գիտության, մշակույթի և սպորտի նախարարությանը, որտեղ մանրամասնել են տնօրենի կառավարման տարիների ապօրինությունների մասին։ «Նախատեսված կարգով ընտրություններ պետք է լինեին հունիսի 26-ին։ Սակայն դպրոցի կառավարման խորհրդի երեք անդամ՝ երկուսը քաղաքապետարանից, մեկը նախարարությունից, չներկայացան։ Հաջորդ ընտրությունը նախատեսված էր հուլիսի 3-ին։ Այդ ժամանակ ևս կառավարման խորհրդի այդ անդամները քվեարկությունից մեկ ժամ առաջ տեղեկացրեցին, որ չեն կարող ներկայանալ ընտրությանը։ Ես սա համարում եմ միտումնավոր բոյկոտ իմ դեմ»,- ասում է Մանուշ Գաբրիելյանը։ Առկա իրավական կարգավորումների պարագայում դպրոցի տնօրենի ընտրությունների կարգը հետևյալն է․ դպրոցի կառավարման խորհուրդն է կատարում ընտրությունը։ Այն բաղկացած է ութ անդամից՝ երկուսը դպրոցի ներկայացուցիչ, երկուսը ծնողական խորհրդի ներկայացուցիչ, երկուսը քաղաքապետարանի և մեկը Կրթության, գիտության, սպորտի և երիտասարդության նախարարության ներկայացուցիչներ։ Դպրոցի կառավարման խորհուրդը չի կարող անսահմանափակ հավաքվել։ Եթե ընտրություն տեղի չի լինում, օրինակ՝ քվորում չի ապահովվում կամ այլ պատճառով տապալվում են ընտրությունները, ապա դրանից հետո Երևանի քաղաքապետարանի ենթակայության տակ գործող դպրոցների պարագայում ընտրություն է կատարում քաղաքապետը, իսկ մարզերի պարագայում՝ մարզպետը։ Չկայացած ընտրություններից հետո՝ հուլիսի 11-ին քաղաքապետարանում կազմակերպվում են լսումներ ավագանու անդամների նախաձեռնությամբ, որտեղ տնօրենի երկու հավակնորդները ներկայացնում են դպրոցի զարգացման իրենց ծրագրերը։ Դրանից հետո փոխքաղաքապետ Տիգրան Վիրաբյանը ներկայացնում է արդյունքները, ըստ որոնց՝ խորհրդատվական ձայներից վեցը հատկացվել են նախկին տնօրենին՝ Արմինե Ներսիսյանին, երեքը՝ Մանուշ Գաբրիելյանին։ «Այդպիսի բան կարգով նախատեսված չէ, որ, եթե երկու ընտրություն չի լինում, քաղաքապետը պետք է կազմակերպի լսում: Ես չէի ուզում գնալ, որովհետև դա կարգից շեղում է։ Կարգից ցանկացած շեղում արդեն խաղ է: Ինձ համոզեցին, որ գնամ՝ ասելով, թե սա արվում է իբր արդարության համար: Նրանք մեկնաբանեցին այսպես, որ չի եղել ընտրություն և իրենք ինչպե՞ս նախապատվություն տան երկուսիցս մեկին։ Նրանց խոսքով՝ պետք է լսեն մեր պատասխանները, դրա հիման վրա կատարեն ընտրություն։ Այդ լսումի ձայնագրությունները, սակայն, չկան։ Իսկ իմ ելույթի ժամանակ փոխքաղաքապետ Տիգրան Վիրաբյանը կեսից լքում է սրահը»,-պատմում է Մանուշ Գաբրիելյանը: Երևան քաղաքի ավագանու մշակույթի, կրթության և սոցիալական հարցերի մշտական հանձնաժողովի անդամ Սաթենիկ Մկրտչյանը նշում է, որ քաղաքապետարանում երկու տնօրեններին լսելու առաջարկությունն ավագանին է արել և դրա համար կազմակերպել են արտահերթ ժողով և տնօրենի երկու թեկնածուներին հրավիրել՝ ներկայացնելու իրենց ծրագրերը, տեսլականը՝ այդ կերպ փորձ անելով լրացուցիչ ինֆորմացիա տրամադրել քաղաքապետին ընտրություն կատարելու համար։ «Քանի որ մենք որևէ լիազորություն չունեինք քվերակություն անելու կամ որոշում կայացնելու, ավագանու վերահսկողական լիազորության շրջանակներում մենք լսեցինք թեկնածուներին, հարցեր ուղղեցինք։ Ամեն մեկս մեր պատկերացումները ասացինք, օրինակ մեկն այս առավելությունն ունի, մյուսը՝ այս, մեկի մոտ սա է թերի, մյուսի մոտ՝ սա և այլն։ Այսինքն կարծիքներ ենք արտահայտել։ Թե արդյունքում ինչպես տեղի ունեցավ հաշվարկը, թե ինչպես է փոխքաղաքապետը վեց-երեք ձայն հաշվարկել, չեմ կարող ասել»,- պատմում է նա։ Սաթենիկ Մկրտչյաննը ասում է, որ իրենց հանձնաժողովը մշտապես ուշադրության կենտրոնում է պահել այդ դպրոցում տեղի ունեցող զարգացումները։ «Մենք փորձում էինք պահպանել չեզոքություն։ Կային բողոքներ, որ նախկին տնօրենը կարող է գործադրել վարչական ռեսուրս։ Կամ թե, որ Կրթության վարչությունը նախապատվություն է տալիս նախկին տնօրենին և այլն։ Այդ գործընթացներից տեղյակ էինք»,- ասում է նա։ Երևան քաղաքի ավագանու մշակույթի, կրթության և սոցիալական հարցերի մշտական հանձնաժողովը հետաքրքրվել է նաև, թե ինչու դպրոցի կառավարման խորհրդի երկու ընտրություններին չեն ներկայացել քաղաքապետարանի ներկայացուցիչները, ինչի հետևանքով տապալվեն են ընտրությունները։ «Տարբեր մեկնաբանություններ են եղել, որ մեկի ամուսինն է հիվանդ եղել, մյուսը այլ խնդիր է ունեցել։ Այսինքն՝ խորհորդը կանոնակարգման խնդիր ունի․ քաղաքապետարանը իր ներկայացուցչին նշանակում է, բայց դա չի ենթադրում, որ այդ անձը քաղաքապետարանի ենթական է։ Չկան հստակ պարտականություններ, որոնք չկատարելու դեպքում ինչ-որ պատժիչ մեխանիզմներ լինեն։ Ակնհայտ է, որ վերջին րոպեին զանգել ասել, որ չենք կարող գնալ, հարցեր է առաջացնում»,- հավելում է Սաթենիկ Մկրտչյանը։ Ավագանու անդամը հավելում է, որ դպրոցի կառավարման խորհուրդը կանոնակարգված չէ, շատ դեպքերում այն ձևական բնույթ է կրում և խորհրդի անդամները շատ ժամանակ չեն պատկերացնում, թե ինչ պետք է անեն։ Ըստ նրա՝ դպրոցի տնօրենի ընտրության գործընթացը վերանայման կարիք ունի։ Նրա կարծիքով, գոյություն ունեցող կարգը թերի է և շատ բացեր ունի։ Կա օրենսդրական կարգավորման հարց տնօրենի ընտրության կարգի մեջ։ «Մենք երկար մտածում էինք, թե արդյո՞ք կա իրավական ճանապարհ, որպեսզի հարցը չթողնենք քաղաքապետի ընտրությանը, բայց չկար։ Ով էլ լինի քաղաքապետ, դժվար է ընտրություն կատարել 155 դպրոցի համար, տիրապետել թեկնածուների և դպրոցների մասին ամբողջական ինֆորմացիային։ Շատ հստակ է, որ շատ արագ է փոխանցվում ընտրության լիազորությունը քաղաքապետին կամ մարզպետին»,- ասում է նա։ Առաջիկայում Երևան քաղաքի ավագանու մշակույթի, կրթության և սոցիալական հարցերի մշտական հանձնաժողովը հանդես կգա առաջարկով՝ կանոնակարգելու դպրոցի տնօրենի ընտրությունները։ Սաթենիկ Մկրտչյանը նշում է, որ ընտրությունները պետք է այնպես կազմակերպել, որ տնօրնեի ընտրությունը այնուամենայնիվ մնա կառավարման խորհրդի վրա և շատ հազվադեպ փոխանցվի քաղաքապետին կամ մարզպետին։  Աստղիկ Գաուդյան
09:45 - 25 հուլիսի, 2019
Շինաղբն ապօրինի կուտակող մեքենաները կտարվեն տուգանային հրապարակ, իսկ վարորդները կտուգանվեն

Շինաղբն ապօրինի կուտակող մեքենաները կտարվեն տուգանային հրապարակ, իսկ վարորդները կտուգանվեն

Երևանի  քաղաքապետարանը ոստիկանության Երևան քաղաքի վարչության հետ համատեղ ուժեղացված հսկողություն է իրականացնում շինաղբի ապօրինի կուտակման վայրերի մոտ: «Այսօր վաղ առավոտից արգելվել է մուտքը Շենգավիթի Ներքին Չարբախ թաղամասի տարածքում ձևավորված անօրինական աղբավայր: Բոլոր վարորդները զգուշացվել են և ուղղորդվել դեպի Նուբարաշենի աղբավայր: «Բոլոր այս հողատարածքները համայնքային սեփականության են, որտեղ ինքնակամ, օրենքի կոպիտ խախտումներով մարդիկ հիմնել են շինարարական աղբավայր: Շաբաթվա ընթացքում հարյուրավոր մեքենաներ մտնում են այստեղ և ամբողջ տարածքը լցվում է շինաղբով: Այս երևույթն ունի կազմակերպիչ, կան հսկիչներ, որոնք մեքենաներն ուղղորդում են այստեղ: Մայրաքաղաքում կա նման 6 մշտական վայր: Խնդիրը լուծելու համար անցնելու ենք կոշտ մեթոդների, ընդհուպ մեքենաները կտարվեն տուգանային հրապարակ, իսկ վարորդները կտուգանվեն»,-նշել է Երևանի քաղաքապետի խորհրդական Կամո Արեյանը և ընդգծել, որ բոլոր հասցեներում սահմանվելու է մշտական հսկողություն: Երևանի քաղաքապետարանը մեկ անգամ ևս շինարարական աղբ տեղափոխող բոլոր մեքենաների վարորդներին տեղեկացնում և հիշեցնում է, որ շինաղբի համար նախատեսված միակ օրինական վայրը Նուբարաշենի աղբավայրն է»,- ասված է հաղորդագրությունում:
11:59 - 23 հուլիսի, 2019