Վրաստան

Վրաստանի Հանրապետություն ինքնիշխան պետություն Հարավկովկասյան տարածաշրջանում, որը միջանկյալ դիրք է զբաղեցնում Արևելյան Եվրոպայի և Հարավարևմտյան Ասիայի միջև։ Գտնվում է Առաջավոր Ասիայում՝ Մեծ Կովկասի լեռնային համակարգի արևմտյան և կենտրոնական հատվածներում:

Զբաղեցնում է 69 700 կմ քառ․ տարածք, իսկ բնակչությունը՝ ըստ 2019 թվականի մարդահամարի տվյալների, կազմում է 3 723 500 մարդ։ Բնակչության ճնշող մեծամասնությունը կազմում են վրացիները, գլխավոր ազգային փոքրամասնություններն են ադրբեջանցիներն ու հայերը։ Վրաստանը խորհրդարանական կառավարման համակարգով սահմանադրական, բազմակուսակցական հանրապետություն է։

Զուրաբիշվիլին 7 օր ժամանակ է տվել Վրաստանի իշխանություններին նոր խորհրդարանական ընտրություններ նշանակելու համար |tert.am|

tert.am: Վրաստանի նախագահ Սալոմե Զուրաբիշվիլին մեկ շաբաթ ժամանակ է տվել երկրի կառավարությանը՝ նոր խորհրդարանական ընտրություններ նշանակելու համար։ Այս մասին նա հայտարարել է կիրակի երեկոյան՝ ելույթ ունենալով Թբիլիսիում տեղի ունեցած բողոքի ցույցի ժամանակ: Ելույթ ունենալով Թբիլիսիում` նախագահը կոչ է արել «Վրացական երազանք»-ի ոչ պաշտոնական առաջնորդ Բիձինա Իվանիշվիլիին և իշխող կուսակցության մյուս առաջնորդներին բանակցել նոր ընտրությունների ամսաթիվ նշանակելու շուրջ։ Հիշեցնենք, որ Սալոմե Զուրաբիշվիլիին չի ցանկանում մինչև դեկտեմբերի 29-ը (նոր նախագահ Միխեիլ Կավելաշվիլիի երդմնակալության օր) վայր դնել լիազորությունները և լքել նստավայրը։ Նա հայտարարել էր, որ խորհրդարանական ընտրությունների քվեարկությունը համարում է ոչ լեգիտիմ։ Ավելի վաղ Վրաստանի վարչապետ Իրակլի Կոբախիձեն հայտարարել էր, որ եթե Վրաստանի նախագահ Սալոմե Զուրաբիշվիլին որոշի երկրում նոր խորհրդարանական ընտրություններ նշանակել, որոնց համար իրավական հիմքեր չկան, դա նրա համար քրեական պատասխանատվություն կառաջացնի։

09:51 - 23 դեկտեմբերի, 2024

Վրաստանի վարչապետը նախագահին սպառնացել է քրեական պատասխանատվությամբ, եթե նա նոր ընտրություններ նշանակի |armenpress.am|

armenpress.am: Եթե Վրաստանի նախագահ Սալոմե Զուրաբիշվիլին որոշի երկրում նոր խորհրդարանական ընտրություններ նշանակել, որոնց համար իրավական հիմքեր չկան, դա նրա համար քրեական պատասխանատվություն կառաջացնի: Այս մասին ճեպազրույցի ժամանակ հայտարարել է Վրաստանի վարչապետ Իրակլի Կոբախիձեն։ «Կարծում եմ, որ Սալոմե Զուրաբիշվիլին բավականաչափ խելամտություն կունենա և՛ քրեական օրենսգիրքն անձամբ չխախտելու, և՛ ոչ ոքի թույլ չտալու խախտել այնպիսի նորմերը, որոնք նախատեսում են երկարաժամկետ ազատազրկում»,-ասել է Կոբախիձեն։ Կառավարության ղեկավարն ընդգծել է նաև, որ ոչ ոք չի ցանկանում 72-ամյա կնոջը բանտ ուղարկել, բայց եթե նա, այնուամենայնիվ, գնա այս քայլին, կդատապարտի իրեն և բոլոր այն մարդկանց, ովքեր իր կողքին կլինեն երկրի ղեկավարի նստավայրում. պետություն. Շարունակությունը՝ սկզբնաղբյուր կայքում։

17:10 - 22 դեկտեմբերի, 2024

ԵԱՀԿ/ԺՀՄԻԳ-ի եզրակացությունից պարզ է դառնում, որ ընտրություններն անցել են ազատ և մրցակցային․ Իրակլի Կոբախիձե |1tv.ge|

14:22 - 21 դեկտեմբերի, 2024

Եվրահանձնաժողովն առաջարկում է դադարեցնել վիզային արտոնությունները Վրաստանի պաշտոնյաների համար

Եվրահանձնաժողովն ուրբաթ օրն առաջարկել է դադարեցնել վիզային արտոնությունները Վրաստանի պաշտոնյաների համար՝ երկրում եվրոպամետ բողոքի ցույցերի բռնի ճնշելու պատճառով: «Այսօր մենք քայլեր ենք ձեռնարկում Վրաստանի իշխանություններին պատասխանատվության ենթարկելու խաղաղ ցույցերի բռնաճնշումների համար», - ասել է ԵՄ բարձրաստիճան դիվանագետ Կայա Կալլասը: Առաջարկվող նախագծով Վրաստանի դիվանագետներն ու պաշտոնյաները Եվրամիություն մեկնելու համար ստիպված կլինեն վիզա ստանալ, մինչդեռ սովորական քաղաքացիները դեռևս կկարողանան կարճատև այցով ԵՄ մեկնել առանց վիզայի։Շարունակությունը՝ սկզբնաղբյուր կայքում։

19:48 - 20 դեկտեմբերի, 2024

Վրաստանի իշխանությունները խոստացել են ուղղումներ մտցնել «Օտարերկրյա ազդեցության թափանցիկության մասին» օրենքում |armenpress.am|

armenpress.am: Եվրոպայի խորհրդի գլխավոր քարտուղար Ալեն Բերսեն հայտարարել է Վրաստանի հետ համատեղ աշխատանքային խումբ ստեղծելու մասին՝ «Օտարերկրյա ազդեցության թափանցիկության մասին» վրացական օրենքում ուղղումները որոշելու համար: Այս մասին հաղորդում է «ՌԻԱ Նովոստի» գործակալությունը: «Ես ողջունում եմ (Վրաստանի) կառավարության հավաստիացումներն, այսպես կոչված, արտաքին ազդեցության թափանցիկության մասին օրենքում ուղղումներ մտցնելու վերաբերյալ: Այժմ մենք աշխատանքային խումբ կստեղծենք Վրաստանի ու Եվրոպայի խորհրդի, Վենետիկի հանձնաժողովի փորձագետների հետ՝ որոշելու այն փոփոխությունները, որոնք կարվեն այս օրենքում», - ասել է նա Թբիլիսիում կայացած մամուլի ասուլիսում: «Ես հույս եմ հայտնում, որ նմանատիպ գործընթացներ կարող են իրականացվել նաև այլ ուղղություններում», - հավելել է Բերսեն։ Վրաստանի իշխանություններն ավելի վաղ ընդունել են երկու օրենք՝ «Ընտանեկան արժեքների և անչափահասների պաշտպանության մասին», որը նաև հայտնի է որպես ԼԳԲՏ քարոզչությունն արգելելու մասին օրենք և «Օտարերկրյա ազդեցության թափանցիկության մասին», որը հայտնի է նաև որպես օտարերկրյա գործակալների մասին օրենք։ Դրանք բազմահազարանոց բողոքի ցույցերի առիթ են դարձել երկրում։ Եվրամիությունը քննադատել է այդ օրենքները և Թբիլիսիից պահանջել չեղարկել դրանք՝ սպառնալով կասեցնել ԵՄ-ին անդամակցության գործընթացը, դադարեցնել ֆինանսական աջակցությունը և նույնիսկ կասեցնել անայցագիր ռեժիմի ազատականացումը Վրաստանի քաղաքացիների համար։ Եվրախորհրդարանի անդամները, դժգոհ լինելով Թբիլիսիի քաղաքականությունից, հոկտեմբերի սկզբին «Վրաստանում ժողովրդավարությունից նահանջելու և քաղաքական բազմակարծության սպառնալիքների մասին» բանաձևում կոչ արեցին ԵՄ-ին պատժամիջոցներ սահմանել Վրաստանի իշխանությունների նկատմամբ, ինչպես նաև սառեցնել այս երկրի ֆինանսավորումը Եվրամիության կողմից։

15:53 - 20 դեկտեմբերի, 2024

Դիվանագիտական անձնագիր ունեցողների համար վիզային ռեժիմի սահմանումը հակավրացական քայլ է. Կոբախիձե |1lurer.am|

1lurer.am: Իրակլի Կոբախիձեն արձագանքել է Եվրամիության արտաքին հարաբերությունների խորհրդի որոշմանը՝ կապված Վրաստանի դիվանագիտական անձնագիր ունեցողների համար վիզային ռեժիմի սահմանման հանձնարարականի հետ: Վրաստանի վարչապետը նշել է, որ թեպետ այդ որոշումը «խորհրդանշական է», «այն պետք է գնահատել որպես անկասկած հակավրացական քայլ, որը խաթարում է եվրոպական կառույցների հեղինակությունը վրացական հասարակության ընկալումներում»։ «Նման որոշումների հետևանքը վրացական հասարակության ընկալումներում եվրոպական կառույցների շարունակական արժեզրկումն է, ինչը լուրջ խնդիր է։ Վերջերս Եվրամիությունն իրականացրել է «Եվրոբարոմետր» հետազոտությունը, որի համաձայն՝ վերջին վեց ամսվա ընթացքում Վրաստանում եվրոպական կառույցների նկատմամբ վստահությունը նվազել է 6 տոկոսով: Հենց նման որոշումներն են նվազեցնում վրացական հասարակության վստահությունը Եվրոպական կառույցների նկատմամբ»,- ասել է Կոբախիձեն։ Նա հայտնել է, որ Վրաստանի նկատմամբ ԵՄ պատժամիջոցներին դեմ են հանդես եկել Հունգարիան, Իսպանիան, Իտալիան, Ռումինիան և Սլովակիան:

13:31 - 17 դեկտեմբերի, 2024

«Վրացական երազանքն» իր գործողություններով խարխլում է Վրաստանում ժողովրդավարության վիճակը. Միլլեր |1lurer.am|

1lurer.am: ԱՄՆ պետքարտուղարության խոսնակը մեկնաբանել է Վրաստանում զարգացումները: Մեթյու Միլլերը լրագրողների հետ ճեպազրույցում հայտարարել է՝ Վաշինգտոնին անհանգստացնում է, որ իշխող «Վրացական երազանք» կուսակցությունն իր գործողություններով խարխլում է Հանրապետությունում ժողովրդավարության վիճակը: Նա հիշեցրել է, որ օրերս ամերիկյան կողմը վիզային սահմանափակումներ է կիրառել կառավարության հետ կապ ունեցող 20 անձի նկատմամբ: «Առաջիկա շաբաթներին պատրաստ ենք նոր քայլեր ձեռնարկել»,- նախազգուշացրել է Միլլերը:

12:22 - 17 դեկտեմբերի, 2024

Հունգարիան և Սլովակիան արգելափակեցին Վրաստանի առաջնորդների դեմ ԵՄ պատժամիջոցների ընդունումը |azatutyun.am|

azatutyun.am: Հունգարիան և Սլովակիան դեկտեմբերի 16-ին արգելափակեցին վրացի պաշտոնյաների դեմ պատժամիցներ սահմանելու Եվրամիության առաջարկած փաթեթը։ Հունգարիայի և Սլովակիայի գործողությունները խոչընդոտում են նաև վրացի պաշտոնյաների դեմ մուտքի արտոնագրի արգելքի և ակտիվների սառեցման գործընթացին։ ԵՄ առաջնորդները ձգտում են պատժել Վրաստանի իշխանություններին այլախոհների նկատմամբ դաժան ճնշումների և ռուսամետ քաղաքականության համար: Եվրամիության դիվանագիտության ղեկավար Կայա Կալլասն նախքան Եվրոպական միության արտաքին հարաբերությունների խորհուրդի երեկվա նիստը հայտարարել էր, որ պատժամիջոցների ցանկն արդեն պատրաստ է։ «Իհարկե, բոլոր իրադարձությունները, որոնք տեղի են ունենում Վրաստանում, չեն գնում այն ուղղությամբ, որով պետք է շարժվի ԵՄ թեկնածու երկիրը։ Հետևաբար մենք պատրաստվում ենք քննարկել, թե ինչ հետևանքներ կլինեն վրացական կառավարության համար, որը բռնաճնշումներ է կիրառում ընդդիմության դեմ՝ օգտագործելով տարատեսակ գործիքներ», - ասել է ԵՄ բարձր ներկայացուցիչը: Հունգարիայի արտաքին գործերի նախարար Պետեր Սիյարտոն օրերս հայտարարել էր, որ Բուդապեշտը դեմ է վրացի պաշտոնյաների դեմ ցանկացած պատժամիջոց կիրառելու առաջարկին և վետո կկիրառի: Թբիլիսիում շարունակվում են իշխանությունների հրաժարականի պահանջով զանգվածային ցույցերը, որոնք սկսվեցին, երբ վարչապետ Իրակլի Կոբախիձեն հայտարարեց, որ ժամանակավորապես կասեցվում են Եվրոպական միության հետ անդամակցության բանակցությունները: Հազարավոր քաղաքացիներ Թբիլիսիի փողոցներում այս օրերին ցույցեր էին անում, որոնք ուղեկցվում են ուժայինների հետ բախումներով։

09:52 - 17 դեկտեմբերի, 2024

ԵՄ-ն կդադարեցնի առանց վիզայի ռեժիմը Վրաստանի դիվանագիտական անձնագիր ունեցողների համար |1lurer.am|

1lurer.am: ԵՄ ԱԳ նախարարների խորհրդի անդամները դեկտեմբերի 16-ին քննարկել են Վրաստանում տիրող իրավիճակը և որոշում ընդունել վրացական դիվանագիտական անձնագիր ունեցողների համար առանց մուտքի արտոնագրի ռեժիմը դադարեցնել։ Այս մասին հայտարարել է Եվրամիության արտաքին գործերի և անվտանգության քաղաքականության բարձր ներկայացուցիչ Կայա Կալլասը։ Նա նաև տեղեկացրել է, որ խորհրդի նիստում քննարկվել է վրաց բարձրաստիճան պաշտոնյաների նկատմամբ պատժամիջոցներ կիրառելու հարցը։ «Վրաստանում իրավիճակը զարգանում է բնակչության համար ոչ դրական ուղղությամբ։ Ընդդիմության նկատմամբ ճնշում է գործադրվում, տեղի է ունենում մեդիայի աշխատանքի սահմանափակում։ Մենք դադարեցնում ենք Վրաստանի կառավարության հետ քաղաքական շփումները և ֆինանսավորումը»,- ասել է նա։ Կալլասը տեղեկացրել է, որ շուտով խորհուրդը հայտարարությամբ հանդես կգա վրացական դիվանագիտական անձնագրեր ունեցողների համար առանց վիզային ռեժիմը չեղարկելու մասին։ «Մենք կշարունակենք աջակցել Վրաստանի ժողովրդին։ Օգնությունը, որը մենք ցուցաբերել ենք իշխանություններին, կհատկացվի քաղաքացիական հասարակությանն ու անկախ մեդիային։ Ինչպես Սիրիայում իր ապագան որոշողը սիրիացի ժողովուրդն է, այնպես էլ Վրաստանում երկրի բնակչությունը պետք է որոշի, թե ինչպիսին է լինելու իր ապագան»,- ասել է նա։

09:23 - 17 դեկտեմբերի, 2024

Թբիլիսիում ցուցարարները փակել են Ռուսթավելի պողոտան |aliq.ge|

aliq.ge: Թբիլիսիի կենտրոնական Ռուսթավելիի պողոտայում՝ խորհրդարանի մերձակայքում ցույցը վերսկսվել է. ցույցերի 19-րդ օրն: Ցույցին են միացել գրականության ոլորտի ներկայացուցիչներ, այդ թվում՝ գրողներ, խմբագիրներ, հրատարակիչներ, գրքերի դիզայներներ, գրավաճառներ, գրականության հետ առնչվող մարդիկ։ Ռուսթավելիի պողոտայում երթևեկությունը կաթվածահար է: Ցուցարարների պահանջն է՝ նշանակել նոր ընտրություններ և ազատ արձակել բողոքի ակցիայի ժամանակ ձերբակալված քաղաքացիներին։ Նշենք, որ այսօր միացվել են Թբիլիսիի գլխավոր տոնածառի և քաղաքի մնացյալ տոնական լույսերը՝ առանց որևէ միջոցառման։ Քաղաքացիները բողոքում են «Վրացական երազանք»-ի կառավարության որոշման դեմ, ըստ որի՝ Վրաստանը Եվրամիության հետ բանակցություններ սկսելու հարցն օրակարգում չի ներառի մինչև 2028 թվականը։

21:08 - 16 դեկտեմբերի, 2024

ԵՄ արտաքին հարաբերությունների խորհուրդը պատրաստվում է քննարկել Վրաստանի դեմ պատժամիջոցների հարցը |azatutyun.am|

azatutyun.am: Եվրամիության դիվանագիտության ղեկավար Կայա Կալլասը հայտարարում է, որ դաշինքի արտաքին հարաբերությունների խորհուրդը պատրաստվում է քննարկել Վրաստանի դեմ պատժամիջոցների սահմանման և ազատ վիզայի ռեժիմի սահմանափակման հարցերը։ «Իհարկե, բոլոր իրադարձությունները, որոնք տեղի են ունենում Վրաստանում, չեն գնում այն ուղղությամբ, որով պետք է շարժվի ԵՄ -ի թեկնածու երկիրը։ Հետևաբար մենք պատրաստվում ենք քննարկել, թե ինչ հետևանքներ կունենա վրացական կառավարության համար, որը բռնաճնշումներ է կիրառում ընդդիմության դեմ՝ օգտագործելով տարատեսակ գործիքներ»,- հայտարարել է Կալլասը՝ շեշտելով, որ պատժամիջոցների ցանկը արդեն պատրաստ է, քննարկումները, սակայն, դեռ շարունակվում են։ Հունգարիան անցած օրերին հայտարարել է, որ չի աջակցի Վրաստանի դեմ անհատական պատժամիջոցների առաջարկին։

13:44 - 16 դեկտեմբերի, 2024

Վրաստանը պատասխան պատժամիջոցներ չի կիրառի Լիտվայի և Էստոնիայի դեմ |hy.armradio.am|

hy.armradio.am: Թբիլիսին պատասխան պատժամիջոցներ չի կիրառի Լիտվայի և Էստոնիայի դեմ, ասվում է Վրաստանի կառավարության հայտարարության մեջ։ «Վրացական իշխանություններն իրավունք ունեն և հնարավորություն ունեն պատասխան քայլերով հակազդել Լիտվայի և Էստոնիայի կառավարությունների հակավրացական որոշումներին։ Մեր որոշումն է երկու պետությունների հետ մնալ միակողմանի բարեկամության ռեժիմում, չվտանգելու համար վրացի, էստոնացի և լիտվացի ժողովուրդների ավանդական բարեկամություը»,- ասվում է հայտարարության մեջ։ Լիտվայի իշխանությունները պատժամիջոցներ են կիրառել Վրաստանի «Վրացական երազանք»-ի վարչապետ Իրակլի Կոբախիձեի և ևս 16 անձանց նկատմամբ: Լիտվայի արտաքին գործերի (ԱԳ) նոր նախարար Կեստուտիս Բուդրիսը սոցիալական հարթակում գրել է, որ Էստոնիայի հետ համաձայնեցնելով` ընդլայնել են պատժամիջոցների ենթարկված վրացի քաղաքական գործիչների ցանկը և ավելացրել ևս 17 անձի, այդ թվում՝ Իրակլի Կոբախիձեին։ «Մենք չենք հանդուրժի բռնությունն ու ճնշումը խաղաղ ցուցարարների, լրագրողների և ընդդիմության նկատմամբ», — X-ում գրել է նախարար Բուդրիսը։ Նա Եվրամիությանը համատեղ գործողությունների կոչ է արել: Դրանից ժամեր առաջ Էստոնիայի ԱԳ նախարար Մարգուս Ցահկնան հայտարարել է պատժամիջոցների ցանկն ընդլայնելու որոշման մասին և Իրակլի Կոբախիձեի հետ ընդգրկել է ևս 13 պաշտոնյաների։ «Էստոնիան պատժամիջոցներ է կիրառել ևս 14 վրացի պաշտոնյաների, այդ թվում՝ վարչապետ Կոբախիձեի նկատմամբ։ Ցուցարարների, լրագրողների և ընդդիմության առաջնորդների նկատմամբ իշխանությունների բռնությունը հանցագործություն է և մարդու իրավունքների ոտնահարում։ Կոչ եմ անում ԵՄ բոլոր երկրներին արձագանքել և քայլեր ձեռնարկել», — գրել է Ցահկնան։ Դեկտեմբերի 2-ին Լիտվան, Էստոնիան և Լատվիան վիզային պատժամիջոցներ են կիրառել 11 բարձրաստիճան պաշտոնյաների՝ Բիձինա Իվանիշվիլիի և ներքին գործերի նախարարության (ՆԳՆ) 10 բարձրաստիճան պաշտոնյաների նկատմամբ։

11:36 - 16 դեկտեմբերի, 2024

Լիտվան պատժամիջոցներ է կիրառել Վրաստանի 17 պաշտոնյաների, այդ թվում՝ վարչապետ Իրակլի Կոբախիձեի նկատմամբ

Լիտվան պատժամիջոցներ է կիրառել Վրաստանի 17 պաշտոնյաների, այդ թվում՝ վարչապետ Իրակլի Կոբախիձեի նկատմամբ։ Այս մասին սոցցանցում գրում է Լիտվայի արտաքին գործերի նախարար Կյաստուսիս Բուդրիսը։ «Լիտվան աջակցում է վրաց ժողովրդին և նրա եվրոպական երազանքին։ Էստոնիայի հետ համաձայնեցնելով՝ մենք ընդլայնել ենք պատժամիջոցների ենթարկված վրացի քաղաքական գործիչների ցանկը՝ ներառելով 17 լրացուցիչ անձանց, այդ թվում՝ վարչապետ Իրակլի Կոբախիձեին։ Մենք թույլ չենք տա բռնություն և ճնշում խաղաղ ցույցերի մասնակիցների, լրագրողների և ընդդիմության նկատմամբ: Եկել է Եվրամիության մակարդակով համատեղ գործողությունների ժամանակը»,- գրել է Կյաստուսիս Բուդրիսը սոցցանցում։Հիշեցնենք, որ ավելի վաղ Էստոնիան էր պատժամիջոցներ սահմանել Վրաստանի 14 պաշտոնյաների նկատմամբ, այդ թվում՝ Վրաստանի վարչապետ Իրակլի Կոբախիձեի նկատմամբ։

18:44 - 15 դեկտեմբերի, 2024

Էստոնիան պատժամիջոցներ է սահմանել վրացի 14 պաշտոնյաների նկատմամբ |shantnews.am|

shantnews.am: Տալլինը պատժամիջոցներ է սահմանել Վրաստանի 14 պաշտոնյաների նկատմամբ, այդ թվում՝ վարչապետ Իրակլի Կոբախիձեի նկատմամբ։ Էստոնիայի արտաքին գործերի նախարար Մարգուս Ցահկնան «X» սոցիալական ցանցի իր էջում գրել է. «Էստոնիան պատժամիջոցներ է սահմանել Վրաստանի ևս 14 պաշտոնյաների, այդ թվում՝ վարչապետ Կոբախիձեի նկատմամբ»,-ասել է Ցախկնան։ Նա նաև կոչ է արել ԵՄ մյուս երկրներին արձագանքել և քայլեր ձեռնարկել Վրաստանի իշխանությունների դեմ։

16:12 - 15 դեկտեմբերի, 2024

Վրաստանի լեգիտիմ նախագահը Սալոմե Զուրաբիշվիլին է. ԵՄ քաղգործիչներ |aliq.ge|

aliq.ge: Եվրոպացի քաղաքական գործիչները քննադատել են «Վրացական երազանք»-ին՝ նախագահի պաշտոնում Միխեիլ Կղավելաշվիլիին ընտրելու կապակցությամբ։ Գերմանիայի Բունդեսթագի արտաքին հարաբերությունների հանձնաժողովի նախագահ Միխայիլ Ռոթի խոսքով «իշխող կուսակցությունը խորացնում է պառակտումը Վրաստանում, ծրագրում է հեղաշրջում՝ ոչնչացնում լիբերալ ժողովրդավարությունը: Ռոթն ընդգծել է՝ «Վրաստանի լեգիտիմ նախագահը Սալոմե Զուրաբիշվիլին է»: «Վրաստանի նոր նախագահ Միխեիլ Կղավելաշվիլիի «ընտրությունը» Վրաստանի բոլոր սահմանադրական ինստիտուտների «գլաիխշալտունգ» է (Gleichschaltung-ֆաշիստների կողմից ստեղծված տերմինն է՝ նկարագրելու տոտալիտար ռեժիմի ամրապնդումը Գերմանիայում-հեղ.)», — X-ում գրել է Ռոթը: Եվրախորհրդարանի լիտվացի պատգամավոր Ռասա Յուկնևիչենեն գրել է, որ «Իվանիշվիլին շարունակում է գրավել պետությունը»։ «Այսօր Վրաստանում իրական ընտրություններ տեղի չունեցան, այն, ինչին ականատեղ եղանք, ֆարս էր, ինչպես Ռուսաստանում, Բելառուսում և այլ ավտորիտար պետություններում»,- գրել է լիտվացի քաղաքական գործիչը. նա դեկտեմբերի 11-13-ը ևս վեց պատգամավորների հետ Վրաստան էր ժամանել: Յուկնևիչենեն հավելել է՝ «Վրաստանում միակ լեգիտիմ պաշտոնյան նախագահը Զուրաբիշվիլին է՝ ընտրված ազատ ընտրությունների արդյունքում»:Շարունակությունը՝ սկզբնաղբյուր կայքում։

12:25 - 15 դեկտեմբերի, 2024

Վրաստանում գտնվող հնդկական ռեստորանում 11 օտարերկրյա և Վրաստանի 1 քաղաքացի մահացած են հայտնաբերվել. Վրաստանի ՆԳՆ

Վրաստանի Գուդաուրի քաղաքում գտնվող հնդկական ռեստորանում ենթադրյալ վթարի հետևանքով 11 օտարերկրյա և 1 Վրաստանի քաղաքացի մահացած են գտել։ Այս մասին հայտնում է Վրաստանի ՆԳՆ-ն։ Նշվում է, որ առաջին հայացքից դիակների վրա բռնության հետքեր չկան։ Ըստ հետաքննության նախնական տեղեկությունների, փակ տարածքում տեղադրված է եղել գեներատոր, որը միացվել է՝ հավանաբար օբյեկտի էլեկտրամատակարարումը դադարեցնելուց հետո։

10:14 - 15 դեկտեմբերի, 2024