Բաբկեն Թունյան

8-րդ գումարման ԱԺ պատգամավոր՝ «Քաղաքացիական պայմանագիր» խմբակցությունից։

Ծնվել է 1980թ. սեպտեմբերի 6-ին Երեւանում։

2001թ. ավարտել է ԵՊՀ տնտեսագիտության ֆակուլտետը: 2003թ.՝ նույն ֆակուլտետի մագիստրատուրան: Տնտեսագիտության մագիստրոս։ 2007թ.՝ Լոնդոնի տնտեսագիտության դպրոցի (LSE) «Տնտեսագիտություն եւ հանրային կառավարում» երեքամսյա դասընթացը:

Մասնակցել է մի շարք վերապատրաստման դասընթացների՝ Կոնֆլիկտաբանություն եւ բանակցություններ (2006թ., Մարդկային զարգացման միջազգային կենտրոն, Երեւան), Թրեյնինգ՝ թրեյներների (դասախոսների) համար (2006թ., Լոնդոն), աշխատանքային պրակտիկա «BBC Parliament» հեռուստաալիքում (2007թ., Լոնդոն), Ընտրական պրոցեսներ, մամուլի ազատություն, Հայաստան-ԵՄ հարաբերություններ (2011թ., Փարիզ, Ստրասբուրգ), International Visitor Leadership ծրագիր (2011թ., ԱՄՆ)։

1998-1999թթ. եղել է Հայկական Կարմիր խաչի ընկերության փախստականների եւ միգրացիայի բաժին պետի օգնական: 2000-2002թթ.՝ Բնական ակտիվ նյութեր արտադրողների եւ արտահանողների հասարակական կազմակերպության նախագահի օգնական: 2005-2018թթ. աշխատել է «168 ժամ» թերթի եւ 168.am կայքի տնտեսական մեկնաբան, տնտեսական խմբագիր։ 2005-2006թթ.՝ «ԹիՎի 5» հեռուստաալիքի մարզական լուրերի թարգմանիչ եւ խմբագիր: 2007-2009թթ.՝ «3 Միլիոն» ամսագրի գլխավոր խմբագիր: 2009 -2012թթ.՝ «ԲԵ-ՎԻՏ» ընկերության հիմնադիր տնօրեն:

2015թ. հիմնադրել եւ մինչեւ 14.01.2019թ. ղեկավարել է B4B.am տեղեկատվական-վերլուծական հարթակը։

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, համապետական ընտրական ցուցակ): ԱԺ տնտեսական հարցերի մշտական հանձնաժողովի նախագահ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

Ինչո՞ւ են քաղաքացիները ստացել 68 հազար դրամից պակաս աջակցություն |fip.am|

fip.am: Կորոնավիրուսի տնտեսական հետևանքների չեզոքացման՝ կառավարության կողմից իրականացվող միջոցառումները, դրանց շրջանակում կատարված հատկացումները և շահառուների ընտրությունը վերջին շրջանում բուռն քննարկումների պատճառ են դարձել։ Միջոցառումներից 8-րդը և դրա շրջանակում տրամադրված աջակցությունը հատկապես քննարկվեց «Լուսավոր Հայաստան» կուսակցության ներկայացուցիչների կողմից։ Խնդրահարույց էր համարվում հատկապես միջոցառման շահառուներին տրամադրված աջակցության չափը։ «Փաստերի ստուգման հարթակն» ուսումնասիրել է 8-րդ միջոցառման իրականացման կարգը, շահառուների ընտրության մեխանիզմները և առկա խնդիրները։ Միջոցառման շահառուները Այս միջոցառման նպատակը կորոնավիրուսից տուժած ոլորտների աշխատակիցներին և անհատ ձեռնարկատերերին սոցիալական աջակցություն հատկացնելն է։ Միջոցառումը նպատակ ունի մեկանգամյա դրամային աջակցություն տրամադրել այն քաղաքացիներին, որոնք 2020 թ. մարտի 13-30-ն ընկած ժամանակահատվածում եղել են ծրագրի համար ընտրված ոլորտների վարձու աշխատողներ կամ անհատ ձեռնարկատերեր: Ընտրված ոլորտներից են հյուրանոցային և հյուրատնային բիզնեսը, հանրային սննդի ոլորտը, զբոսաշրջային ծառայությունների մատուցման ոլորտը, վարսավիրանոցները և գեղեցկության սրահները և այլն: Նախապես հաստատված ցանկն ընդլայնվեց ապրիլի 30-ին՝ կառավարության որոշմամբ: Որքա՞ն գումար է հատկացվել շահառուներին Ազգային ժողովի «Իմ քայլը» խմբակցության պատգամավոր Բաբկեն Թունյանը Ֆեյսբուքյան իր էջում, իսկ ավելի ուշ նաև Ազգային Ժողովում հայտարարեց, որ տուժած ոլորտների աշխատակիցները կստանան 68-136 հազար դրամի չափով աջակցություն, իսկ անհատ ձեռնարկատերերը՝ եռամսյակային շրջանառության 10%-ի չափով: Մայիսի 8-ի դրությամբ 8-րդ միջոցառման շահառու է շուրջ 95 հազար անձ, սակայն հրապարակված ցանկում անհատ ձեռնարկատերերը և աշխատողները որևէ կերպ առանձնացված չեն։ Սոցիալական ապահովության ծառայություն online.ssa.am կայքում հրապարակված պաշտոնական տվյալներից տեղեկանում ենք, որ տրամադրված աջակցության ընդհանուր չափը կազմել է շուրջ 6 միլիարդ 660 միլիոն դրամ։ Ուշագրավ է, սակայն, շահառուների մի մասին հատկացված գումարների չափը։ Այսպես, շուրջ 8000 շահառուի հատկացվել է 1000-ից 25 հազար դրամի աջակցություն, որից 815-ին հատկացված աջակցության չափը կազմել է 1000-5000 դրամ: Այս խմբի պարագայում, եթե շահառուն անհատ ձեռնարկատեր է, ապա ստացվում է, որ վերջիններիս եռամսյակային շրջանառությունը կազմել է 10,000 — 50,000 դրամ։ 25,000-40,000 դրամ աջակցություն ստացողների թիվը 11 հազար է։ Մոտ 12,600 քաղաքացի էլ ստացել է 40,000-68,000 դրամ աջակցություն։ Ինչ վերաբերում է Բաբկեն Թունյանի կողմից նշված 68-136 հազար դրամին, ապա այդ միջակայքում աջակցություն է հատկացվել մոտ 64,500 քաղաքացու։ Սա շահառուների ընդհանուր թվի շուրջ 67․8 տոկոսն է։ Նրանցից 11,700-ը ստանալու են առավելագույն՝ 136 հազար դրամ աջակցություն: Ինչպե՞ս է հաշվարկվում աջակցության չափը Ծրագրով նախատեսված է տրամադրվող աջակցության հաշվարկման մի քանի մեխանիզմ: Վարձու աշխատողներին տրամադրված աջակցության չափը հաշվվում է ըստ հունվար և փետրվար ամիսներին նրանց ստացած աշխատավարձերի: Այսպես՝ եթե երկու ամիսներին ստացած միջին աշխատավարձը գերազանցել է նվազագույն աշխատավարձի չափը (68 հազար դրամ), ապա տրամադրվող աջակցությունը միջին աշխատավարձի 50 տոկոսի չափով է, սակայն ոչ պակաս, քան 68,000 դրամը: Առավելագույն շեմը 136 հազար դրամն է: Եթե վարձու աշխատողը հունվար ամսին ստացել է 65,000 դրամ աշխատավարձ, փետրվարին՝ 90 հազար դրամ, ապա վերջինիս միջին աշխատավարձը կազմում է 77,500 դրամ։ Ըստ աջակցության 8-րդ ծրագրի՝ աշխատողին պետք է տրվի այս աշխատավարձի 50 տոկոսի չափով փոխհատուցում։ Բայց քանի որ, ըստ ծրագրի, աշխատողին տրվող աջակցությունը չի կարող պակաս լինել 68,000 դրամից, ապա վերջինս ստացել է հենց 68,000 դրամ։ Իսկ այն աշխատողները, որոնց երկու ամիսների միջին աշխատավարձը չի գերազանցել 68,000 դրամը, ստացել են միջին աշխատավարձի չափով աջակցություն: Օրինակ՝ եթե վարձու աշխատողի աշխատավարձը հունվարին կազմել է 20,000 դրամ, փետրվարին՝ 30,000 դրամ, ապա աջակցության չափը կկազմի 25,000 դրամ: Սակայն կառավարության հաստատած ծրագրում և դրա պարզաբանումներում ներկայացված և շահառուների ցուցակում հրապարակված թվերը որոշ հարցեր են առաջացնում։ Պատգամավոր Բաբկեն Թունյանն իր ֆեյսբուքյան էջում գրել էր, որ միջոցառման շրջանակում տուժած ոլորտների աշխատակիցները միանվագ աջակցություն կստանան 68-136 հազար դրամի չափով, իսկ Ա/Ձ-ները՝ եռամսյակային շրջանառության 10%-ի չափով։ Պատգամավորի այս գրառումից տպավորություն էր ստեղծվում, թե աջակցության նվազագույն շեմը 68,000 դրամն է։ Մինչդեռ վարչապետ Նիկոլ Փաշինյանի օգնական Նաիրի Սարգսյանն այս հարցի մասին խոսելիս պարզաբանել էր, որ այս ցանկում ընդգրկված են նաև այն աշխատողները, որոնց ամսական միջին աշխատավարձն ինչ-ինչ պատճառներով ցածր է նվազագույն աշխատավարձից, հետևաբար՝ ցանկում ընդգրկված անձանց մի մասին բաժին ընկած պետական աջակցությունը ցածր է 68 հազար դրամից։ Թե հրապարակված ցանկում մինչև 68,000 դրամ աջակցություն ստացած անձանցից քանի՞սն են համարվում աշխատողներ և քանիսը՝ անհատ ձեռնարկատերեր՝ դժվար է ասել, սակայն ակնհայտ է, որ այս ծրագրում ընդգրկված քաղաքացիների մեկ երրորդը ստացել է նվազագույն աշխատավարձից պակաս աջակցություն։ Անի Ավետիսյան

13:22 - 10 մայիսի, 2020

Քննարկվել են հարկային ոլորտին, պետական տուրքին ու ընդերքօգտագործմանն առնչվող մի շարք օրինագծեր

ՀՀ ԱԺ տնտեսական հարցերի մշտական հանձնաժողովը Բաբկեն Թունյանի նախագահությամբ ապրիլի 7-ին հրավիրած նիստում առաջին ընթերցմամբ քննարկել է Հայաստանի Հանրապետության Կառավարության ծրագրի 2019 թվականի կատարման ընթացքի եւ արդյունքների մասին զեկույցը: ՀՀ ֆինանսների նախարար Ատոմ Ջանջուղազյանը նշել է, որ հաշվետու ժամանակաշրջանում իրականացվել են նախատեսված ռազմավարական ծրագրերը, կատարողականները կազմել են 90-100 տոկոս: Ըստ այդմ` 2019 թվականը հետհեղափոխական կառավարության գործունեության առաջին լիարժեք տարին էր, եւ Կառավարությանը հաջողվել է գրանցել 2008 թվականից ի վեր ամենաբարձր տնտեսական աճի մակարդակը` 7.6%, որն ամենաբարձրն է ԵԱՏՄ անդամ, հարեւան բոլոր եւ եվրոպական տարածաշրջանի երկրների համեմատ: Հաշվետու տարում Հայաստանի տնտեսական աճն ուղեկցվել է տնտեսության ճյուղային կառուցվածքի բարելավմամբ, ցածր գնաճով, ֆինանսական կայուն ցուցանիշներով: Մշակող արդյունաբերությունում 2019 թվականին տնտեսական աճը կազմել է 12%` 2008 թվականից հետո առաջին անգամ ՀՆԱ-ի կառուցվածքում 12.1% կշռով դառնալով տնտեսության առաջատար ճյուղը: Հաշվետու ժամանակահատվածում ամենաբարձր տնտեսական աճն արձանագրել է կացության եւ հանրային սննդի ծառայությունների ոլորտը` նախորդ տարվա համեմատ աճելով 27.2%-ով, ինչը 2019 թվականի ընթացքում Հայաստան այցելած զբոսաշրջիկների թվի 14.7%-ով աճի կարեւոր արտահայտություններից է: Այնուհետեւ Կառավարության անդամներն ու գերատեսչությունների ղեկավարները հակիրճ ներկայացրել են տարբեր բնագավառներում 2019թ-ին իրականացրած ծրագրերը, անդրադարձել առկա խնդիրներին, կարեւորել դրանց հրատապ լուծումը: Առաջին ընթերցմամբ քննարկվել է ՀՀ ԱԺ պատգամավոր Մերի Գալստյանի հեղինակած «Ողջիի, Փխրուտի, Արծվանիկի պոչամբարներում կուտակված եւ կուտակվող, ինչպես նաեւ Զանգեզուրի պղնձամոլիբդենային կոմբինատ» փակ բաժնետիրական ընկերության գործունեության արդյունքում գոյացած եւ գոյացող արտադրական լցակույտերի մշակման ներդրումային ծրագրի մասին» ՀՀ օրենքն ուժը կորցրած ճանաչելու մասին» օրենքի նախագիծը: Ըստ պատգամավորի` գործող օրենքով թափոնների վերամշակումը պետք է իրականացներ «Ալյոտիգ» ՍՊԸ-ն, սակայն ընկերությունը կյանքի չի կոչել որեւէ ծրագիր: Մերի Գալստյանի հավաստմամբ` 2016 թվականին Գեղարքունիքի Ընդհանուր իրավասության դատարանը սնանկ է ճանաչել վերոհիշյալ ընկերությանը: Նա կարծիք է հայտնել, որ թափոնների վերամշակումը չպետք է կատարվի օրենքով: Կառավարության դիրքորոշումը հարցի վերաբերյալ դրական էր: Սակայն որոշ հարցեր հստակեցնելու նպատակով Մերի Գալստյանն առաջարկել է օրենքի նախագծի քվեարկությունը հետաձգել երկամսյա ժամկետով: Հանձնաժողովականներն առաջին ընթերցմամբ քննարկել են ԱԺ պատգամավոր Գեւորգ Պապոյանի հեղինակած «ՀՀ հարկային օրենսգրքում փոփոխություններ եւ լրացումներ կատարելու մասին» օրենքի նախագիծը, որի ընդունման անհրաժեշտությունը, ըստ պատգամավորի, պայմանավորված է ՀՀ-ում առցանց կամ շրջիկ վաճառքների իրականացման եւ շրջիկ ծառայությունների մատուցման խոչընդոտների վերացմամբ: Ակնկալվում է, որ կարգավորումը կբացառի առցանց վաճառք իրականացնող կազմակերպությունների ռիսկերը, կվերացնի շրջիկ առեւտրի իրականացման եւ ծառայությունների մատուցման պարագայում ՀԴՄ-ի կիրառման խոչընդոտը, կխթանի առցանց առեւտուրը եւ նոր բիզնեսի տեսակների աճը:Պատգամավորն ընդունել էր կառավարության ներկայացրած բոլոր առաջարկները: Նախագիծը ստացել է դրական եզրակացություն: «ՀՀ հարկային օրենսգրքում փոփոխություններ կատարելու մասին» օրինագծի առնչությամբ հեղինակը` ՀՀ ԱԺ պատգամավոր Միքայել Մելքումյանը, տեղեկացրել է, որ իր կողմից առաջարկվող փոփոխություններն արդեն իրականացվել են Կառավարության որոշմամբ, այդ իսկ պատճառով նա հետաձգել է նախագծի քվեարկությունը: Քննարկվել է նաեւ Կառավարության հեղինակած «ՀՀ հարկային օրենսգրքում փոփոխություններ կատարելու մասին» օրենքի նախագիծը: ՀՀ առողջապահական եւ աշխատանքի տեսչական մարմնի ղեկավար Հակոբ Ավագյանի հավաստմամբ` օրինագծի ընդունումը պայմանավորված է ԵԱՏՄ անդամ պետություններից ՀՀ ներմուծվող դեղերի նկատմամբ վերահսկողությունն ուժեղացնելու, դեղերի շուկայի նկատմամբ պատշաճ ու հնարավորինս ամբողջական վերահսկողություն սահմանելու անհրաժեշտությամբ: Քննարկման արդյունքում նախագիծը ստացել է դրական եզրակացություն` յոթերորդ գումարման չորրորդ նստաշրջանի օրակարգի նախագծում ընդգրկվելու համար: Պատգամավորները երկրորդ ընթերցմամբ քննարկել եւ դրական եզրակացություն են տվել ԱԺ պատգամավորներ Արտակ Մանուկյանի ու Բաբկեն Թունյանի ներկայացրած «Էներգետիկայի մասին» օրենքում լրացումներ կատարելու մասին» եւ ԱԺ պատգամավոր Սիսակ Գաբրիելյանի հեղինակած «Մաքսային կարգավորման մասին» օրենքում փոփոխություններ եւ լրացումներ կատարելու մասին» օրենքների նախագծերին: Առաջին ընթերցումից հետո երկու նախագծերի վերաբերյալ ներկայացվել էին տեխնիկական բնույթի առաջարկներ: Հեղինակների առաջարկով երկամսյա ժամկետով հետաձգվել է ՀՀ ԱԺ նախագահի տեղակալ Ալեն Սիմոնյանի եւ ԱԺ պատգամավոր Արտակ Մանուկյանի հեղինակած «Պետական տուրքի մասին» օրենքում փոփոխություններ կատարելու մասին» օրենքի նախագծի քննարկումը:

17:29 - 07 ապրիլի, 2020