Վլադիմիր Պուտին

Ռուսաստանի Դաշնության գործող նախագահ։ Ծնվել է 1952թ. հոկտեմբերի 7-ին։ 1975-1991թթ․ ծառայել է ՊԱԿ-ում (КГБ), զբաղեցրել հետախուզական պաշտոններ։ 1991թ. ըստ պաշտոնական տեղեկատվության սեփական զեկուցագրով զորացրվել է ՊԱԿ-ից։ 1990-1995թթ. զբաղեցրել է Լենինգրադի քաղաքային իշխանության տարբեր պաշտոններ։ 1996-1998թթ․ արագ վերելք է գրանցել Կրեմլի տարբեր պաշտոններում՝ ի վերջո ստանձնելով Նախագահի աշխատակազմի ղեկավարի տեղակալի պաշտոնը։ 1998-ին նշանակվում է ԱԴԾ (ФСБ) տնօրեն։

1999-ի օգոստոսին ընդունելով նախագահ Ելցինի առաջարկը ստանձնել է ՌԴ վարչապետի պաշտոնը։ 1999-ի դեկտեմբերի 31-ին հրաժարական տվեց Ելցինը եւ Պուտինը դարձավ նախագահի պաշտոնակատար։ 2000թ․ մարտին ընտրվեց նախագահ եւ պաշտոնավարեց առավելագույն երկու ժամկետով։ 2008-ին՝ վարչապետ Մեդվեդեւի նախագահ ընտրվելուց հետո Պուտինը ստանձնեց Վարչապետի պաշտոնը։ Այս դրվագը հանրային լայն շրջանակներում ընկալվեց որպես «փոխատեղում»։ 2012-ից ի վեր Պուտինը նորից նախագահի պաշտոնում է։

Եռակողմ հայտարարությունը հետևողականորեն կյանքի է կոչվում. Պուտին |armenpress.am|

armenpress.am: Ռուսաստանի Դաշնության նախագահ Վլադիմիր Պուտինը կարևորեց Լեռնային Ղարաբաղի հակամարտությունից տուժած անձանց համակարգված օգնություն ցույց տալը: Այս մասին Պուտինն ասաց դեկտեմբերի 2-ին ՀԱՊԿ Հավաքական անվտանգության խորհրդի առցանց նստաշրջանի ընթացքում՝ նշելով, որ այժմ հետևողականորեն կյանքի է կոչվում Լեռնային Ղարաբաղի վերաբերյալ Ռուսաստանի, Հայաստանի և Ադրբեջանի ղեկավարների միջև ստորագրված եռակողմ հայտարարությունը: «Բոլորին քաջ հայտնի է, որ անհրաժեշտ եղան Ռուսաստանի ակտիվ միջնորդական ջանքերը, որպեսզի կանխվի արյունահեղությունը Լեռնային Ղարաբաղի հակամարտության գոտում՝ հասնելու կրակի ամբողջական դադարեցման ու սկսելու կայունացման գործընթացը: Միաժամանակ մենք հետևել ենք ԵԱՀԿ Մինսկի խմբի համանախագահության միջոցով հասած անկյունաքարային պայմանավորվածություններին: Այժմ եռակողմ հայտարարությունը` Ռուսաստանի, Հայաստանի ու Ադրբեջանի, հետևողականորեն կյանքի է կոչվում: Հակամարտության գծով և Լաչինի միջանցքում տեղակայված են ռուս խաղաղապահները»,- ասաց Պուտինը: Վլադիմիր Պուտինը կարևորեց Լեռնային Ղարաբաղի հակամարտության գոտում տուժած անձանց համակարգված օգնություն ցույց տալը: «Կարևոր է օգնություն ցույց տալ` լուծելու հումանիտար խնդիրները, որոնք կապված են փախստականների վերադարձի, ավերված ենթակառուցվածքների վերանորոգման, մշակութային և կրոնական կոթողների պաշտպանության հետ: Ռուսական կողմը, Երևանի և Բաքվի հետ համագործակցելով, արդեն զբաղվում է այս բոլոր հարցերով»,- նշեց ՌԴ նախագահը:

14:19 - 02 դեկտեմբերի, 2020

ՀԱՊԿ Հավաքական անվտանգության խորհրդի նստաշրջանը տեղի կունենա Պուտինի նախագահությամբ |armenpress.am|

armenpress.am: Հավաքական անվտանգության պայմանագրի կազմակերպության Հավաքական անվտանգության խորհրդի նստաշրջանը տեղի կունենա Ռուսաստանի Դաշնության նախագահ Վլադիմիր Պուտինի նախագահությամբ: Այս մասին հայտնում է ՌԴ նախագահի պաշտոնական կայքը: «2020 թվականի դեկտեմբերի 2-ին Վլադիմիր Պուտինի նախագահությամբ տեղի կունենա Հավաքական անվտանգության պայմանագրի կազմակերպության Հավաքական անվտանգության խորհրդի նստաշրջանը: Նախատեսվում է կազմակերպության շրջանակներում դաշնակցային փոխգործակցության, ՀԱՊԿ-ի շարունակական արդյունավետության բարձրացման հարցերի քննարկումը, ինչպես նաև մտքերի փոխանակություն միջազգային ու տարածաշրջանային անվտանգության արդիական խնդիրների վերաբերյալ»,- ասված է հաղորդագրությունում: Նստաշրջանի առանցքային որոշումները կգրանցվեն ամփոփիչ հռչակագրում և մի շարք այլ փաստաթղթերում:

18:36 - 01 դեկտեմբերի, 2020

Նախագահ Արմեն Սարգսյանը նամակ է հղել Վլադիմիր Պուտինին

Հայաստանի Հանրապետության նախագահ Արմեն Սարգսյանը ադրբեջանական կողմում գտնվող ռազմագերիների, պատանդների վերադարձի հարցով դիմել է Ռուսաստանի Դաշնության նախագահ Վլադիմիր Պուտինին: Այս մասին տեղեկացնում է ՀՀ նախագահի աշխատակազմի հասարակայնության հետ կապերի վարչությունը: Նախագահ Սարգսյանի նամակում մասնավորապես նշվում է, որ Հայաստանի հասարակությունն ու սփյուռքը խիստ անհանգստացած են ադրբեջանական գերության մեջ հայտնված զինվորների և քաղաքացիական անձանց շուրջ ստեղծված իրավիճակով: Ռուսաստանի նախագահի միջնորդությունը մեծ աջակցություն կլինի Ադրբեջանի կողմից գերեվարված մեր զինվորականներին և քաղաքացիական անձանց, ինչպես նաև զոհվածների մարմինները վերադարձնելու չափազանց զգայուն խնդրի լուծման գործում:

15:26 - 30 նոյեմբերի, 2020

Պուտինը կարևորում է ՀԱՊԿ երկրների օրենսդրության ներդաշնակեցումը |azatutyun.am|

azatutyun.am: Ռուսաստանի նախագահ Վլադիմիր Պուտինի կարծիքով՝ կարևոր է ներդաշնակեցնել Հավաքական անվտանգության պայմանագրության կազմակերպության (ՀԱՊԿ) անդամ երկրների օրենսդրությունը թմրանյութերի ապօրինի վաճառքի, միջազգային ահաբեկչության և ծայրահեղականության դեմ պայքարի համար։ Այս մասին Կրեմլի ղեկավարը հայտարարել է ՀԱՊԿ Խորհրդարանական վեհաժողովի նիստի մասնակիցներին հղած ուղերձում։ «Մեզ համար ընդհանուր մարտահրավերների աճի պայմաններում, ինչպիսին են միջազգային ահաբեկչությունն ու ծայրահեղականությունը, թմրանյութերի ապօրինի շրջանառությունը և ապօրինի միգրացիան, մեծ նշանակություն ենք տալիս Խորհրդարանական վեհողովին՝ ՀԱՊԿ-ի շրջանակում ընդունված փաստաթղթերը ժամանակին վավերացնելու, անվտանգության ոլորտում ազգային օրենսդրությունը ներդաշնակեցնելու հարցում», - ասվում է Պուտինի ուղերձում։ ՀԱՊԿ ԽՎ նախագահ, ՌԴ Պետդումայի խոսնակ Վյաչեսլավ Վոլոդինը, իր հերթին, հորդորել է անել ամեն ինչ՝ որպես ահաբեկչական ճանաչված կազմակերպությունների միասնական ցանկ ձևավորելու համար։

14:02 - 30 նոյեմբերի, 2020

Պուտինը ՌԴ անվտանգության խորհրդի անդամներին հայտնել է Փաշինյանի և Ալիևի հետ հեռախոսազրույցների մասին |armenpress.am|

armenpress.am: Ռուսաստանի Դաշնության նախագահ Վլադիմիր Պուտինը Ռուսաստանի անվտանգության խորհրդի մշտական անդամների հետ քննարկել է իրավիճակը Լեռնային Ղարաբաղում, ռուս խաղաղապահների գործունեության և ԼՂ-ում մարդասիական առաքելության հետ կապված հարցեր: Այս մասին հայտնում է Կրեմլի պաշտոնական կայքը: Նշվում է, որ այս համատեքստում ՌԴ նախագահը խորհրդակցության մասնակիցներին հայտնել է Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ ունեցած հեռախոսազրույցների մասին:

17:04 - 27 նոյեմբերի, 2020

Էդմոն Մարուքյանը հայ ռազմագերիների հարցով դիմել է Պուտինին

«Լուսավոր Հայաստան» խմբակցության ղեկավար Էդմոն Մարուքյանը ֆեյսբուքյան իր էջում գրում է․ «Սիրելի՛ քաղաքացիներ, Տեղեկացնում եմ, որ դիմել եմ ՌԴ նախագահ Վ․ Վ․ Պուտինին՝ խնդրելով նրա անմիջական միջամտությունը հայ ռազմագերիների խնդրի շուտափույթ լուծման կապակցությամբ»։

16:48 - 27 նոյեմբերի, 2020

Մարիա Զախարովան՝ ԼՂ հակամարտության գոտում վարձկանների ներգրավման մասին |1lurer.am|

1lurer.am: Արցախում ապօրինի զինված խմբավորումների մասնակցությամբ մշակութային կոթողների, գերեզմանների պղծման դեպքերի, այդ խմբավորումների անդամների քաղաքացիության վերաբերյալ հարցին ի պատասխան՝ Մարիա Զախարովան ճեպազրույցի ընթացքում ասել է. «Պետք է մենք ունենանք վանդալիզմի օրինակների տեսագրություններ, լուսանկարներ, որպեսզի կարողանանք հստակորեն որոշել տեղանքը և իսկությունը: Իսկ ինչ վերաբերում է վարձկանների քաղաքացիությանը, պետք է այդ հարցն ուղղեք այն երկրներին, որտեղից նրանք գալիս են: Ռուսաստանը նրանց հետ որևէ կապ չունի: Նոյեմբերի 17-ին լրատվամիջոցների հետ հանդիպման ժամանակ նախագահ Վլադիմիր Պուտինը՝ ասելով «ապօրինի զինված խմբավորումներ», նկատի է ունեցել Թուրքիայի կողմից Լեռնային Ղարաբաղի հակամարտության գոտի տեղափոխված անձանց: Այսինքն՝ խոսքն այն խմբավորումների մասին է, որոնց կարգավիճակը և գործողությունները չեն համապատասխանում միջազգային իրավունքի պահանջներին: Ստեղծված իրավիճակին իրավական գնահատական տալու մասով կարող եմ ընդգծել, որ նշված հակամարտության հանդեպ կիրառվում են 1977 թ. Ժնևյան կոնվենցիայի թիվ 1 արձանագրության նորմերը, որոնք վերաբերում են զինված հակամարտությունների զոհերի պաշտպանությանը: Նշված հակամարտության կոնտեքստում տեսափոխված զինյալները համարվում են վարձկաններ, քանի որ նրանք հավաքագրվել են այլ երկրի տարածքում՝ երրորդ երկրում զինված հակամարտության մեջ ներգրավվելու նպատակով, փաստացի մասնակցել են զինված գործողություններին, ինչի համար ստացել են բարձր վարձատրություն: Բաց աղբյուրներից հասանելի տեղեկության հիման վրա մենք իմացել ենք նաև այդ վարձատրության չափը՝ ամսական մինչև 2000 դոլար: Այդ մարդիկ հակամարտող որևէ կողմի քաղաքացի չեն եղել, չեն եղել հակամարտող կողմերից որևէ մեկի զինված ուժերի ծառայողներ, չեն բնակվել այն վայրերում, որոնք գտնվել են հակամարտող կողմերից որևէ մեկի վերահսկողության տակ, նրանք չեն եղել անձինք, որոնց երրորդ երկրներն ուղարկել են հակամարտության գոտի՝ որպես իրենց զինված ուժերի պաշտոնական ներկայացուցիչ»: Զախարովայի պնդմամբ՝ քանի որ վարձկանները չեն կարող համարվել զինված հակամարտության օրինական մասնակից, այդ պատճառով էլ ՌԴ նախագահը նրանց անվանել է «ապօրինի զինված խմբավորումներ»:

16:12 - 27 նոյեմբերի, 2020

Պուտինն ակտիվ երկխոսության մեջ է Հայաստանի և Ադրբեջանի նախագահների հետ. Պեսկով |tert.am|

tert.am: Ռուսաստանի Դաշնության նախագահի մամուլի քարտուղար Դմիտրի Պեսկովը հայտարարել է, որ նախագահ Վլադիմիր Պուտինն ակտիվ երկխոսության մեջ է գտնվում Հայաստանի և Ադրբեջանի նախագահների հետ, գրում է «ՌԻԱ Նովոստի» գործակալությունը:

14:44 - 27 նոյեմբերի, 2020

Նիկոլ Փաշինյանը Պուտինի հետ քննարկել է Լաչինի միջանցքի բնակավայրերի և այլ հարցեր

ՀՀ վարչապետ Նիկոլ Փաշինյանը ֆեյսբուքյան իր էջում գրում է․ «Վերջին մեկ ժամվա ընթացքում երկու անգամ հեռախոսազրույց ունեցա Ռուսաստանի Դաշնության նախագահ Վլադիմիր Պուտինի հետ: Քննարկման առանցքում էին Լաչինի միջանցքի բնակավայրերի, անհետ կորածների, որոնողական աշխատանքների, զոհվածների մարմինների, գերիների փոխանակման գործընթացի, խաղաղապահների տեղակայման եւ սահմանազատման, ինչպես նաեւ տարածաշրջանի տրանսպորտային կոմունիկացիաների ապաշրջափակման հետ կապված հարցեր: Նման քննարկումներ պարբերաբար են տեղի ունենում, երբեմն օրը մի քանի անգամ: Այս քննարկումների մասին միշտ չէ, որ հաղորդագրություններ ենք տարածում, հաշվի առնելով դրանց աշխատանքային բնույթը եւ հաճախությունը»։

09:21 - 27 նոյեմբերի, 2020

Բաբաջանյանը մանրամասներ է ներկայացրել վարչապետի և քաղաքական ուժերի՝ հոկտեմբերի 19-ի հանդիպումից |1lurer.am|

1lurer.am: ԱԺ անկախ պատգամավոր Արման Բաբաջանյանը խորհրդարանում իր ելույթի ժամանակ պատմեց վարչապետ Նիկոլ Փաշինյանի հետ խորհրդարանական ուժերի հանդիպումից, որի ժամանակ հարց է ուղղվել վարչապետին՝ սա կապիտուլյացիա՞ է, ինչին կառավարության ղեկավարը չի հակադարձել: «Այդ օրը վարչապետն ասաց, որ ինքը զանգել է ՌԴ նախագահ Վլադիմիր Պուտինին և հարցրել, թե ի՛նչը կարող է կանգնեցել պատերազմը: Պուտինն ասել է՝ Լավրովի պլանը: Մեր հանդիպումից հետո պիտի տեղի ունենար Փաշինյանի հեռախոսազրույցը Ռուսաստանի նախագահի հետ, որտեղ Փաշինյանն ուներ որոշում, որ Հայաստանը գնում է Լավրովի պլանի շուրջ բանակցությունների: Հետո միայն պարզ դարձավ, որ Ադրբեջանն այլևս չի համաձայնել կանգնեցնել պատերազմը»,- նշեց Բաբաջանյանը:

17:39 - 26 նոյեմբերի, 2020

Ըստ Էրդողանի՝ Ռուսաստանը, Թուրքիան և Ադրբեջանը կդառնան Հարավային Կովկասում անվտանգության երաշխավորը |azatutyun.am|

azatutyun.am: Ռուսաստանը, Թուրքիան և Ադրբեջանը կդառնան Հարավային Կովկասում անվտանգության երաշխավորը, հայտարարել է Թուրքիայի նախագահ Ռեջեփ Էրդողանը խորհրդարանում։ «Մենք մեծ ներդրում ունեցանք անարդարության վերացման գործում, որ տիրում էր Ադրբեջանում 30 տարի», - պնդել է Էրդողանը, ընդգծելով՝ Անկարան շարունակելու է ջանքերն այս ուղղությամբ։ «Ես երեկ քննարկել եմ [հրադադարի պահպանման] հարցը Ռուսաստանի նախագահ Պուտինի հետ, մենք համատեղ դա կարող ենք երաշխավորել, բայց նաև հնարավորություն ունենք բարելավել այդ գործընթացը», - ասել է Թուրքիայի նախագահը՝ մանրամասնելով․ - «Եթե ներգրավենք նաև տարածաշրջանային չորրորդ կամ հինգերորդ երկիրը, կարող ենք բոլորովին այլ իրավիճակ ստեղծել»։ Թե հատկապես որ երկրների մասին է խոսքը, Էրդողանը չի հստակեցրել։ Կրեմլի խոսնակ Դմիտրի Պեսկովն այսօր հրաժարվել է մեկնաբանել Թուրքիայի նախագահի այս հայտարարությունները։

16:06 - 25 նոյեմբերի, 2020

Պուտինն ու Էրդողանը քննարկել են Արցախի, Սիրիայի և Լիբիայի հարցերը |1lurer.am|

1lurer.am: ՌԴ նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ, որի ընթացքում, մասնավորապես, քննարկվել է Լեռնային Ղարաբաղում ռուս-թուրքական համատեղ մոնիթորինգի կենտրոն ստեղծելու հարցը: Այս մասին հայտնում է TACC գործակալությունը: Բանակցությունների ընթացքում նախագահները քննարկել են երկու երկրների միջև հարաբերությունների բարելավմանն ուղղված քայլերը, առաջին հերթին` Թուրքիայի և Ռուսաստանի միջև ապրանքաշրջանառության ծավալը մեծացնելու հարցը: Քննարկվել է նաև իրավիճակը Լեռնային Ղարաբաղում, Սիրիայում և Լիբիայում:«Էրդողանը հույս է հայտնել, որ մոնիթորինգի կենտրոնը, որը Թուրքիան կստեղծի Ռուսաստանի հետ համատեղ, կսկսի գործել հնարավորինս շուտ՝ որպես Լեռնային Ղարաբաղի հիմնախնդրի լուծման և տարածաշրջանում շարունակական հիմունքներով կայունության ապահովման քայլ»,- ասվում է հայտարարության մեջ:

00:17 - 25 նոյեմբերի, 2020

Պուտինը Փաշինյանի և Ալիեւի հետ քննարկել Է Բաքու եւ Երեւան ՌԴ պատվիրակության այցի արդյունքները |armenpress.am|

armenpress.am: Վլադիմիր Պուտինը նոյեմբերի 23-ին եւ 24-ին հեռախոսազրույց է ունեցել Հայաստանի Հանրապետության վարչապետ Նիկոլ Փաշինյանի եւ Ադրբեջանի Հանրապետության Նախագահ Իլհամ Ալիեւի հետ: Ինչպես հաղորդում է Կրեմլի պաշտոնական կայքը, մանրամասն քննարկվել են Ռուսաստանի միջգերատեսչական պատվիրակության նոյեմբերի 21-ին Երեւան եւ Բաքու այցի արդյունքները, ինչպես նաեւ երեք երկրների ղեկավարների նոյեմբերի 9-ի հայտարարության դրույթների կատարման ընթացքը: Քննարկվել են Լեռնային Ղարաբաղի շրջանում ռուս խաղաղապահների աշխատանքի մոդալությունները եւ բնակչությանը մարդասիրական օգնություն ցուցաբերելու հետագա քայլերը: Անդրադարձ է կատարվել նաեւ տարածաշրջանում տնտեսական փոխգործակցության եւ տրանսպորտային հաղորդակցությունների ապաշրջափակման հարցերին:

18:41 - 24 նոյեմբերի, 2020

Պուտինը հավանություն է տվել ԼՂ-ում Կարմիր խաչի աշխատանքին աջակցելու նպատակով 2 մլն եվրո կամավոր ներդրում անելու առաջարկին. Լավրով |tert.am|

tert.am: Կարմիր խաչի միջազգային կոմիտեի (ԿԽՄԿ) նախագահ Պետեր Մաուրերի՝ Մոսկվա կատարած այցի ժամանակ ՌԴ նախագահ Վլադիմիր Պուտինը հավանության է արժանացրել Լեռնային Ղարաբաղում ԿԽՄԿի աշխատանքին աջակցելու նպատակով 2 միլիոն եվրոյի չափով կամավոր ներդրում անելու առաջարկը։Այս մասին երեքշաբթի՝ նոյեմբերի 24-ին, լրագրողների հետ հանդիպման ժամանակ ասել է ՌԴ ԱԳՆ ղեկավար Սերգեյ Լավրովը, որի մամուլի ասուլիսը հեռարձակվում էր «Ռոսիա-24» հեռուսաալիքով։«Վերջերս Կարմիր խաչի նախագահն այցելեց Մոսկվա և մեզ հետ կիսվեց այդ տարածաշրջանում կյանքի կոչվող նախագծերի շուրջ իր ծրագրերով։ Նախագահ Պուտինը հավանության արժանացրեց առաջարկն այն մասին, որ երկու միլիոն եվրոյի չափով հերթական կամավոր ներդրումը, որը Ռուսաստանը փոխանցում է ԿԽՄԿ-ին, նպատակաուղղվի Լեռնային Ղարաղաղում և դրա շուրջն այս կառույցի աշխատանքներին», - նշել է Լավրովը։Խոսելով այդ տարածաշրջանի հումանիտար կարիքների մասին՝ Լավրովը նաև ընդգծել է Մոսկվայի ամենօրյա աշխատանքը տասնյակ միջազգային կազմակերպությունների և հատկապես ՄԱԿ-ի մասը կազմող կառույցների հետ։«Դա ՄԱՓԳՀ-ն է, Մարդասիրական հարցերի գրասենյակը, ՅՈՒՆԵՍԿՕ-ն, ՄԱԿ-ի Մանկական հիմնադրամը, Համաշխարհային պարենային ծրագիրը, ՄԱԿ-ի Զարգացման ծրագիրը։ Նրանք բոլորի համար էլ գործ ու տեղ կգտնվի, որպեսզի մասնակցեն այն ջանքերին, որոնց կարիքն ունեն Լեռնային Ղարաբաղի ու հարակից տարածքների բնակիչները», - շեշտել է նա։Նախարարը նաև հատուկ շնորհակալություն է հայտնել ԿԽՄԿ-ին, որը երբեք չի դադարեցրել իր աշխատանքը ո’չ Երևանում, ո’չ Ստեփանակերտում և ո’չ էլ Բաքվում։

18:26 - 24 նոյեմբերի, 2020

Վլադիմիր Պուտինը գնահատել է Լեռնային Ղարաբաղում ստեղծված իրավիճակը |1lurer.am|

1lurer.am: ՌԴ նախագահ Վլադիմիր Պուտինը գնահատել է Լեռնային Ղարաբաղում ստեղծված իրավիճակը՝ փոխանցում է РИА Новости-ն: Կրեմլի ղեկավարի հավաստմամբ՝ Լեռնային Ղարաբաղում իրավիճակն ընդհանուր առմամբ կայունանում է, ռուս խաղաղապահներն ապահովում են խաղաղ բնակչության անվտանգությունը: «Այժմ տարածաշրջան ուղարկված ռուսական խաղաղապահ զորակազմը վերահսկում է հրադադարի ռեժիմի պահպանումը, ապահովում է խաղաղ բնակիչների, քաղաքացիական անձանց անվտանգությունը, ուղեկցում է վերադարձող փախստականներին ու մարդասիրական բեռները: Ընդհանուր իրավիճակը կայունացել է»,- այս մասին Վլադիմիր Պուտինը հայտարարել է օտարերկրյա դեսպաններին հավատարմագրեր հանձնելու արարողության ժամանակ: ՌԴ նախագահը խոսել է նաև Լեռնային Ղարաբաղում իրավիճակի կարգավորման գործում Ռուսաստանի ջանքերի մասին: «Եռանդուն ջանքեր ենք գործադրել Լեռնային Ղարաբաղում ռազմական գործողությունները դադարեցնելու համար, որոնք հանգեցրել են մեր բարեկամ Ադրբեջանի և Հայաստանի հազարավոր քաղաքացիների զոհերի: Ընդ որում՝ հետևել ենք ԵԱՀԿ Մինսկի խմբի ձեռք բերված առանցքային պայմանավորվածություններին: Մասնավորապես, իր համանախագահների` Ռուսաստանի, ԱՄՆ-ի և Ֆրանսիայի միջև: Գլխավոր ձեռքբերումը արյունահեղության դադարեցումն է, որն ամրագրված է Ռուսաստանի ու Ադրբեջանի նախագահների և Հայաստանի վարչապետի՝ հրադադարի հաստատման եռակողմ հայտարարության մեջ»,- հայտնել է Կրեմլի ղեկավարը:

16:19 - 24 նոյեմբերի, 2020

ՌԴ նախագահը ստորագրել է առանց մաքսատուրքի ՀՀ-ին նավթային խեժ մատակարարելու արձանագրությունը |1lurer.am|

1lurer.am: ՌԴ նախագահ Վլադիմիր Պուտինն այսօր ստորագրել է «Ռուսաստանի Դաշնության կառավարության և Հայաստանի Հանրապետության կառավարության միջև Հայաստանի Հանրապետության բնական գազի, նավթամթերքների և չմշակված բնական ադամանդների մատակարարման գործում 2013 թվականի դեկտեմբերի 2-ի համագործակցության» արձանագրության վավերացման մասին դաշնային օրենքը՝ տեղեկացնում է ՌԴ նախագահի պաշտոնական կայքը: Դաշնային օրենքը Պետական դումայի կողմից ընդունվել է 2020 թվականի նոյեմբերի 11-ին, իսկ Դաշնության խորհրդի կողմից հաստատվել է 2020 թվականի նոյեմբերի 18-ին: Արձանագրությունը նախատեսում է նավթային խեժի մատակարարում Հայաստանի Հանրապետություն՝ առանց արտահանման մաքսատուրքերի գանձման:

18:26 - 23 նոյեմբերի, 2020