Պաշտպանության եւ անվտանգության հարցերի մշտական հանձնաժողով

Արծրուն Հովհաննիսյանը նշանակվել է ԱԺ պաշտպանության և անվտանգության հարցերի հանձնաժողովի փորձագետ |armenpress.am|

armenpress.am: Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը հայտարարեց Արծրուն Հովհաննիսյանին հանձնաժողովի փորձագետ նշանակելու մասին։ Քոչարյանն ասաց, որ Հովհաննիսյանը հանձնաժողովին կօգնի ռազմական ոլորտի շատ հարցերում, որովհետև նա ոչ միայն դասավանդել է, այլ նաև կյանքի փորձ է անցել Զինված ուժերի ակունքներից սկսած։ «Յուրաքանչյուր մարդ, ով անկեղծ իր ներդրումն է առաջարկել և ձեռք է մեկնել է մեր երկրի ապագային միտված գործողությունների իրականացմանը, պետք է մեր հանձնաժողովի կողմից միշտ նկատված լինի՝ անկախ նրանից, թե ինչ շահարկումների միջով են փորձում անցկացնել նրան։ Շահարկումները և ֆեյքերը պետք է մի օր վերանան մեր կյանքից, և իրական գործընթացների մեջ իրական մարդը իր գիտելիքները պետք է ծառայեցնի մեր կարիքների համար»,- ասաց Քոչարյանը՝ շնորհակալություն հայտնելով Հովհաննիսյանին առաջարկն ընդունելու համար։ Քոչարյանը նշեց, որ 44-օրյա պատերազմի հանգամանքներն ուսումնասիրող քննիչ հանձնաժողովն օր օրի մոտենում է ձևավորման վերջնական փուլին և այնտեղ միասին շատ մեծ ճանապարհ պետք է անցնեն։ Հովհաննիսյանը նշեց, որ դեռևս տեղյակ չէ, թե արդյոք ինքն ընդգրկված լինելո՞ւ է քննիչ հանձնաժողովում, թե ոչ։ «Գիտեմ, որ Պաշտպանության և անվտանգության հարցերի հանձնաժողովում կա փորձագետի աշխատանք, և հենց հիմա իմ դեմ դրված են փաստաթղթեր, օրենքի նախագծեր, որոնց որպես փորձագետ պետք է գնահատական տամ՝ ռիսկերը, արդյունավետությունը և այլն»,- ասաց Հովհաննիսյանը։

13:04 - 09 նոյեմբերի, 2021

Ղազինյանը 11-րդ անգամ չընտրվեց պաշտպանության և անվտանգության հանձնաժողովի փոխնախագահի պաշտոնում

Այսօր Ազգային ժողովի Պաշտպանության և անվտանգության հարցերի մշտական հանձնաժողովի նիստում «Հայաստան» խմբակցության պատգամավոր Արթուր Ղազինյանը չընտրվեց հանձնաժողովի փոխնախագահ։ ԱԺ պաշտպանության հանձնաժողովի նախագահի տեղակալի պաշտոնում այսօր «Հայաստան» խմբակցությունը 11-րդ անգամ էր առաջադրել նրա թեկնածությունը։ «Քաղաքացիական պայմանագիր» խմբակցությունը կրկին դեմ քվեարկեց նրա թեկնածությանը: Ընդդիմադիրները և հենց Ղազինյանը ներկա չէին քվեարկությանը:

11:48 - 09 նոյեմբերի, 2021

ԱԻՆ-ի բյուջեն կմնա գրեթե անփոփոխ, ոստիկանությանը կավելանա մոտ 3 տոկոսով |armenpress.am|

armenpress.am: Հայաստանում 2022-ի պետական բյուջեի նախագծով նախատեսվում է Արտակարգ իրավիճակների նախարարությանը հատկացվող բյուջեն թողնել գրեթե անփոփոխ, իսկ Ոստիկանության բյուջեն 2021-ի համեմատ կավելանա մոտ 3 տոկոսով: Այս մասին ասաց ՀՀ ֆինանսների նախարար Տիգրան Խաչատրյանն ԱԺ պաշտպանության եւ անվտանգության ու Ֆինանսավարկային եւ բյուջետային հարցերի մշտական հանձնաժողովների համատեղ նիստում՝ բյուջետային քննարկումներում: Անդրադառնալով ԱԻՆ-ին՝ Խաչատրյանն ասաց. «Նախատեսվում է, որ պետք է իրականացվի 6 ծրագիր: 2022-ի բյուջետային նախագիծը ԱԻՆ-ի մասով նախատեսվում է 13 մլրդ 975,8 մլն դրամ ծախսեր, 2021-ի ճշտված բյուջեի գումարը կազմել է 14 մլրդ 216,7 մլն դրամ: Չնայած փոքր-ինչ նվազում նկատվում է, սակայն սա հիմնականում պայմանավորված է նորմատիվային համապատասխանեցման հարցով: Իրականում, կարող ենք ասել, որ բյուջեն եղել է առանց փոփոխության»: ԱԻ նախարար Անդրանիկ Փիլոյանը նշեց, որ 13 մլրդ 975.8 միլիոնից 12 մլրդ 520 մլն 800 հազար դրամը կամ 89.6 տոկոսը համակարգի աշխատակիցների աշխատավարձի ֆոնդն է, իսկ մնացած 10.4 տոկոսը կազմում է համակարգի ստորաբաժանումներ և հիմնարկների ընթացիկ պահպանման ծախսերը, ներառյալ՝ ՊՈԱԿ-ների գծով ավելացված արժեքի հարկը: Ներկայացված 6 ծրագրերն են՝ տեխնիկական անվտանգության կանոնակարգումը, արտակարգ իրավիճակների արձագանքման կարողությունների զարգացումը, սեյսմիկ պաշտպանությունը, փրկարարական ծառայությունները, ռազմավարական նշանակության պաշարների կառավարումը և արտակարգ իրավիճակների բնագավառի պետական քաղաքականության մշակումը: Անդրադառնալով ոստիկանության բյուջեին՝ ֆինանսների նախարարն ասաց, որ Ոստիկանությունը նախատեսում է 2022-ին իրականացնել 2 ծրագիր, որի շրջանում 11 միջոցառում: «2022-ի բյուջետային նախագծով նախատեսված է 66 մլրդ 585.6 մլն դրամ՝ ըստ նախագծի, 2021-ի հաստատված բյուջեն կազմել է 64 մլրդ 652 մլն դրամ, հաստատվածի նկատմամբ տարբերությունը մոտ 3 տոկոս է՝ աճի ուղղությամբ»,-ասաց Խաչատրյանը: Ծրագրերն են կրթական ծառայությունների ծրագիրը և ոստիկանության ոլորտի քաղաքականության մշակումը, կառավարումը, կենտրոնացված միջոցառումները, մոնիթորինգը և վերահսկողությունը: Հարգելի՛ ընթերցողներ, մենք հետազոտություն ենք իրականացնում՝ պարզելու ձեր նախասիրությունները և առաջարկելու ձեր կարիքներին առավել համապատասխան մեդիա բովանդակություն։ Խնդրում ենք տրամադրել 5-10 րոպե այս առցանց հարցմանը մասնակցելու համար։ Ձեր տրամադրած տեղեկությունն անանուն է և կօգտագործվի միայն հետազոտական նպատակներով։

11:22 - 01 նոյեմբերի, 2021

Ղազինյանն 9-րդ անգամ չընտրվեց ԱԺ պաշտպանության հարցերով հանձնաժողովի փոխնախագահ |armenpress.am|

armenpress.am: Ընդդիմադիր «Հայաստան» խմբակցության թեկնածու Արթուր Ղազինյանն 9-րդ անգամ չընտրվեց ՀՀ ազգային ժողովի պաշտպանության և անվտանգության հարցերի մշտական հանձնաժողովի նախագահի տեղակալի պաշտոնում: Նիստում հանձնաժողովի նախագահ Անդրանիկ Քոչարյանը հայտնեց, որ «Հայաստան» խմբակցության ղեկավար Սեյրան Օհանյանը կրկին ներկայացրել է Ղազինյանի թեկնածությունը: Նա նշեց՝ կցանկանար,որ Օհանյանը ներկա լիներ, որ հարց ուղղեր նրան: Նիստին չէր մասնակցում ոչ մի ընդդիմադիր պատգամավոր: Քվեարկությամբ Ղազինյանը կրկին չընտրվեց:

15:05 - 26 հոկտեմբերի, 2021

Քննարկվել է ՏՏ ոլորտում հանցագործությունների դեմ պայքարում ԱՊՀ պետությունների համագործակցությանը վերաբերող համաձայնագիրը

ԱԺ պաշտպանության և անվտանգության հարցերի մշտական հանձնաժողովն Անդրանիկ Քոչարյանի նախագահությամբ հոկտեմբերի 19-ի նիստում քննարկել է ««Անկախ պետությունների համագործակցության մասնակից պետությունների՝ տեղեկատվական տեխնոլոգիաների ոլորտում հանցագործությունների դեմ պայքարում համագործակցության մասին» համաձայնագիրը վավերացնելու մասին» օրենսդրական նախաձեռնությունը: ՀՀ ոստիկանության պետի տեղակալ Արա Ֆիդանյանը տեղեկացրել է, որ համաձայնագիրը ստորագրվել է Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի միջև, այն արդեն վավերացրել են Բելառուսը, Ղրղզստանը, Ղազախստանը և Ուզբեկստանը: Համաձայնագրի նպատակն է տեղեկատվական տեխնոլոգիաների ոլորտում հանցագործությունների դեմ պայքարում կողմերի իրավապահ մարմինների համագործակցության համար իրավական հիմքեր ստեղծել: Հարակից զեկույցում հանձնաժողովի անդամ Վահագն Ալեքսանյանն առաջարկել է գործընկերներին կողմ արտահայտվել: Օրենսդրական առաջարկն արժանացել է հանձնաժողովի դրական եզրակացությանը:

13:47 - 19 հոկտեմբերի, 2021

Անդրանիկ Քոչարյանը վստահեցնում է՝ ԶՈՒ բարեփոխումների փաթեթը մանրակրկիտ կքննարկվի ԱԺ հանձնաժողովում |armenpress.am|

armenpress.am: ՀՀ ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը վստահեցնում է, որ Զինված ուժերի կառուցվածքային բարեփոխումների առնչությամբ փաթեթը մանրակրկիտ կքննարկվի հանձնաժողովում, ինչից հետո՝ ԱԺ լիագումար նիստում: Քոչարյանն այս մասին ասաց հանձնաժողովի նիստում՝ անդրադառնալով «Պատիվ ունեմ»-ի պատգամավոր Տիգրան Աբրահամյանի՝ Պաշտպանության փոխնախարարին ուղղված հարցերին: Աբրահամյանը նշեց, որ 44-օրյա պատերազմի հետ կապված՝ ինքը գրություն է ուղարկել ՊՆ: «Ստացված պատասխանում նշվում է, որ ԳՇ-ն ամբողջական վերլուծությունը և ուսումնասիրությունը չի ավարտել, բայց հաջորդ նախադասությունում նշվում է, որ դրա արդյունքների հիման վրա այս պահին ԶՈՒ-ում կառուցվածքային փոփոխություններ և բարեփոխումներ են իրականացվում: Այսինքն՝ ստացվում է, որ չավարտված ուսումնասիրությունների հիման վրա իրականացվում են կառուցվածքային փոփոխություններ և ռեֆորմներ»,- ասաց պատգամավորն ու հարցրեց, թե ինչու՞ բարեփոխումների գործընթացը որևէ ձևով հրապարակման ենթակա չէ: Ըստ նրա՝ նաև ԱԺ համապատասխան հանձնաժողովը պետք է մաս կազմի այդ փոփոխությունների քննարկումներին: Հանձնաժողովի նախագահ Անդրանիկ Քոչարյանն արձագանքեց: «Հանձնաժողովն այդ բարեփոխումների փաթեթը մանրակրկիտ քննարկելու է, օրենսդրական հարցեր կան, որ առանց հանձնաժողովի չեն կարող ընդունվել: Կառուցվածքային բարեփոխումների փաթեթը պարտադիր պետք է այս հանձնաժողովով անցնի և գա ԱԺ, որ սկսվի դրա իրավական գործընթացը»,- նշեց Քոչարյանը: Տիգրան Աբրահամյանը հետաքրքրվեց նաև, թե ինչո՞ւ է պաշտպանության նախարարը ոչ նպատակահարմար համարել ԱԺ պաշտպանության և անվտանգության հանձնաժողովի անդամի՝ այսինքն իր այցը առաջնագիծ: Պաշտպանության փոխնախարար Արման Սարգսյանը, անդրադառնալով պատգամավորի մերժմանը, նշեց. «Պատասխանում ամեն ինչ կա: Ձեզ կատեգորիկ մերժման պատասխան չի տրվել, ներկա փուլում գտնվել է ոչ նպատակահարմար: Իսկ դրա պատասխանն ունեն ԶՈՒ-ն, ԳՇ-ն, վստահ եմ, որ վերլուծության գնահատման արդյունքում է Ձեզ տրվել այդ պատասխանը: Եվ ինչ-որ փուլում, երբ կգտնվի նպատակահարմար, բնականաբար, Ձեզ հնարավորություն կտրվի ուսումնասիրել նշված տեղամասը»,- ասաց նա:

12:21 - 19 հոկտեմբերի, 2021

Ընդդիմադիր պատգամավորները պահանջում են ՀՀ ԱԺ պաշտպանության և անվտանգության հարցերի մշտական հանձնաժողովի արտահերթ նիստ հրավիրել |armenpress.am|

14:01 - 12 հոկտեմբերի, 2021

Արթուր Ղազինյանը 7-րդ անգամ չընտրվեց ԱԺ հանձնաժողովի փոխնախագահ

Ազգային ժողովի «Հայաստան» խմբակցությունը Պաշտպանության եւ անվտանգության հարցերի մշտական հանձնաժողովի փոխնախագահի պաշտոնում 7-րդ անգամ առաջադրել է խմբակցության պատգամավոր Արթուր Ղազինյանի թեկնածությունը։ Հանձնաժողովի նիստին ընդդիմադիր պատգամավորները ներկա չեն․ նիստը վարում է հանձնաժողովի նախագահ Անդրանիկ Քոչարյանը՝ «Քաղաքացիական պայմանագիր» կուսակցության 5 պատգամավորների մասնակցությամբ։ ԱԺ կանոնակարգ օրենքի համաձայն՝ «Հայաստան» խմբակցության ղեկավար Սեյրան Օհանյանը պետք է ներկայացներ առաջադրած թեկնածուին, սակայն ոչ նա, ոչ էլ թեկնածուն չեն եկել նիստին՝ ըստ ամենայնի բոյկոտելով քննարկումը։ Բանն այն է, որ ՔՊ-ական պատգամավորներն անհամաձայնություն ունեն Ղազինյանի թեկնածության հետ, եւ արդեն վեց անգամ չեն ընտրել նրան՝ հայտարարելով, որ խնդրի հանգուցալուծման բանալին ընդդիմադիրների ձեռքում է՝ թող առաջադրեն այլ թեկնածու։ Ընդդիմադիրներն էլ պնդում են իրենց դիրքորոշումը։ Քանի որ թեկնածուն ներկա չէր, պատգամավորները, բնականաբար, նրան չէին կարող հարցեր ուղղել․ չնայած հնարավոր բոլոր հարցերը առաջին մի քանի քննարկումների ժամանակ արդեն իսկ հնչել էին։ Պատգամավորները նաեւ ելույթներին չունեցան՝ ի վերջո անցնելով քվեարկությանը, որի արդյունքը ենթադրելի էր․ Արթուր Ղազինյանը 7-րդ անգամ չընտրվեց հանձնաժողովի նախագահի տեղակալի պաշտոնում։

12:52 - 12 հոկտեմբերի, 2021

Արթուր Ղազինյանը վեցերորդ անգամ չընտրվեց պաշտպանության հարցերի հանձնաժողովի փոխնախագահի պաշտոնում

Ազգային ժողովի պաշտպանության եւ անվտանգության հարցերի մշտական հանձնաժողովը հերթական արտահերթ նիստն է գումարել՝ հանձնաժողովի նախագահի տեղակալի ընտրության հարցով։ Այս հարցը քննարկվում է վեցերորդ անգամ։ Ընդդիմադիր խմբակցությունները, ինչպես նախորդ անգամներին, այնպես էլ այս անգամ, հանձնաժողովի նախագահի տեղակալի պաշտոնում առաջադրել են «Հայաստան» խմբակցության պատգամավոր Արթուր Ղազինյանի թեկնածությունը։ «Քաղաքացիական պայմանագիրը» դեմ է նրա ընտրությանը։ Ղազինյանն անիմաստ համարեց մասնակցել իր ընտրության հարցով քննարկմանը՝ նշելով, որ ինքն արդեն երկու տասնյակի հասնող հարցերի ու նույնքան արձագանքների է պատասխանել։ Նա եւ ընդդիմադիր մյուս պատգամավորները լքեցին հանձնաժողովի սենյակը։ Ղազինյանը դուրս գալիս ասաց, որ ընդդիմությունը այդ պաշտոնը չի պատրաստվում զիջել մեծամասնությանը։ Հանձնաժողովի նախագահ Անդրանիկ Քոչարյանը, որ նիստը վարողն է, իր ելույթում ասաց, որ այս խնդիրը պետք է լուծում ստանա, ուստի իրենց խմբակցության պատգամավորները օրենսդրական նախաձեռնությամբ հանդես կգա՝ ԱԺ կանոնակարգ օրենքի շրջանակում հարցին լուծում տալու համար, որպեսզի ընդդիմադիրները նույն թեկնածուին անընդհատ չառաջադրեն։ «Քաղաքացիական պայմանագիր» խմբակցության պատգամավորները դեմ քվեարկեցին Ղազինյանի թեկնածությանը։ Նա վեցերորդ անգամ չընտրվեց։

14:13 - 05 հոկտեմբերի, 2021

Արթուր Ղազինյանը չորրորդ անգամ չընտրվեց ԱԺ հանձնաժողովի փոխնախագահ

ԱԺ պաշտպանության եւ անվտանգության հարցերի մշտական հանձնաժողովի փոխնախագահի պաշտոնում չորրորդ անգամ չընտրվեց «Հայաստան» խմբակցության պատգամավոր Արթուր Ղազինյանը։ Հանձնաժողովում հարցի քվեարկությունը տեղի ունեցավ առանց ընդդիմության ներկայացուցիչների, քանի որ վերջիններս, այդ թվում՝ Ղազինյանն ինքը, անիմաստ համարեցին մասնակցել քննարկմանը։ Հիշեցնենք, Ղազինյանի թեկնածությունն ընդդիմությունն առաջադրել էր չորրորդ անգամ։ ՔՊ խմբակցությունը նրա թեկնածության հետ անհամաձայնություն ունի, իսկ ընդդիմությունը պնդում է՝ հարցի լուծումը ՔՊ-ի ձեռքում է․ նրանք պետք է քաղաքական որոշում կայացնենք ու ընտրեն իրենց առաջադրած թեկնածուին։ Իսկ ՔՊ-ն հրաժարվում է այդպես վարվել։ Հանձնաժողովի նախագահ Անդրանիկ Քոչարյանը հայտնեց, 5-օրյա ժամկետում հանձնաժողովւ նորից արտահերթ նիստ կանի՝ չմոռանալով նաեւ օրակարգի այլ խնդիրներ, որոնք կապ ունեն մեր անվտանգային միջավայրի, խորհրդարանական վերահսկողության գործիքները ճիշտ օգտագործելու հետ։ Լուսանկարը՝ ԱԺ պաշտոնական կայքից

15:34 - 22 սեպտեմբերի, 2021

«Կամ բերեք նոր թեկնածու, կամ մենք էս օրակարգով դատապարտված ենք արտահերթ նիստ անել 5 տարի»․ ԱԺ հանձնաժողովը 4-րդ անգամ է քննարկում Ղազինյանի ընտրության հարցը

Ազգային ժողովի պաշտպանության եւ անվտանգության հարցերի մշտական հանձնաժողովը չորրորդ նիստն է անցկացնում, որի օրակարգում մեկ հարց է ներառված՝ Հանձնաժողովի փոխնախագահի ընտրությունը։ Նախորդ երեք նիստերի ժամանակ Հանձնաժողովի փոխնախագահի պաշտոնում չէր ընտրվել «Հայաստան» խմբակցության պատգամավոր Արթուր Ղազինյանը։ Այսօրվա նիստը եւս արտահերթ է, թեկնածուն՝ նույնը։ Նիստի սկզբում Ղազինյանը կարծիք հայտնեց, որ նիստի օրակարգում միայն մեկ հարց ունենալը չի արտացոլում այսօր ՀՀ-ի պաշտպանության եւ անվտանգության համակարգի առջեւ դրված իրական պատկերն ու մարտահրավերները։ Նա առաջարկեց ներառել մեկ հարց եւս՝ Հանձնաժողովի որոշմամբ ստեղծել աշխատանքային խումբ, որը պետք է ուսումնասիրի Հայաստանի հարավարեւելյան սահմանին տիրող իրավիճակը, պատճառահետեւանքային կապը՝ երկու ասպեկտով՝ ռազմաքաղաքական եւ սահմանադրաիրավական, որից հետո կներկայացնի ամփոփ հաշվետվություն, հետո պարզ կդառնան հետագա անելիքները․ «Սա, իմ կարծիքով, այսօր շատ ավելի լուրջ եւ քաղաքացիներին առավել հուզող հարց է»։ «Պատիվ ունեմ» խմբակցության պատգամավոր Տիգրան Աբրահամյանն էլ կարծիք հայտնեց, որ այսօրվա քննարկումն ընթանալու է նույն հունով, ինչպես նախորդ երեք արտահերթների ժամանակ․ «Ես իմաստ չեմ համարում մասնակցել նիստերին այնքան ժամանակ, քանի իշխանությունը չունի քաղաքական որոշում՝ ընտրել ընդդիմության առաջադրած թեկնածուին»,- ասաց Աբրահամյանը՝ համաձայնելով Ղազինյանի հետ, որ օրակարգում այլ հարցեր էլ պետք է ներառվեն։ Հանձնաժողովի նախագահի՝ Անդրանիկ Քոչարյանի համոզմամբ՝ խնդիրը միայն մեծամասնության քվեարկության մեջ չէ, եւ ընդդիմությունն ինքը կարող էր քայլ անել՝ չորրորդ անգամ նույն թեկնածուին չառաջադրելով։ Ղազինյանն անիմաստ համարեց չորրորդ անգամ մասնակցել հարցի քննարկմանն ու դուրս եկավ նիստերի սենյակից՝ առանց լսելու՝ գուցե պատգամավորները թեկնածուին հարցե՞ր ունեն, ինչը շարժեց նիստը վարող Անդրանիկ Քոչարյանի վրդովմունքը։ «Անընդհատ նույն թեկնածուն է առաջադրվում, որի հետ չպարզաբանված հարցեր են ծնվում, թեկնածուն դուռը շրխկացնելով դուրս է գալիս, որպես ի՞նչ։ Կամ բերեք նոր թեկնածու, կամ մենք հավերժ էս օրակարգով դատապարտված ենք արտահերթ նիստ անել հինգ տարի։ Եթե ընդդիմությունը չի կարողանում իր մեջ եւս մեկ թեկնածուի գտնի, ստացվում է՝ դուք պարոն Ղազինյանի գերի՞ն եք։ Ձեզ ազատագրե՞նք, ի՞նչ անենք»,- դիմելով ընդդիմությանը՝ ասաց Քոչարյանը։ Տիգրան Աբրահամյանն ասաց, որ ընդդիմությունը քաղաքական որոշումը կայացրել է, դրա համար է չորրորդ անգամ Ղազինյանին առաջադրել, իսկ եթե մեծամասնությունը չի ցանկանում քննարկել, ապա դա «Քաղաքացիական պայմանագրի» խնդիրն է։ Նիստերից սենյակից դուրս եկավ նաեւ Տիգրան Աբրահամյանը։ ՔՊ խմբակցության պատգամավոր Քրիստինե Պողոսյանն էլ քաղաքական բոյկոտ հայտարարեց՝ նշելով, որ քանի կբերվի Ղազինյանի թեկնածությունը, ինքը չի մասնակցի նիստերին։ Քոչարյանն ասաց, որ դա ձեռնտու է ընդդիմությանը, պետք է ձեւաչափ գտնել եւ անցնել այս հարցը։

15:26 - 22 սեպտեմբերի, 2021

Արթուր Ղազինյանին 3-րդ անգամ չընտրեցին ԱԺ պաշտպանության եւ անվտանգության հարցերի հանձնաժողովի փոխնախագահի պաշտոնում

14:59 - 13 սեպտեմբերի, 2021

Ընդդիմադիր «Հայաստան» խմբակցությունը Պաշտպանության հանձնաժողովի փոխնախագահի պաշտոնում կրկին առաջադրեց Ղազինյանին |azatutyun.am|

azatutyun.am: Մեկնարկել է Պաշտպանության և անվտանգության հարցերի մշտական հանձնաժողովի նիստը։ Ընդդիմադիր «Հայաստան» խմբակցությունը հանձնաժողովի փոխնախագահի պաշտոնում կրկին առաջադրեց Արթուր Ղազինյանին։ Իշխանական պատգամավորները նախորդ նիստում դեմ էին քվեարկել նրա թեկնածությանը, իսկ ընդդիմադիր «Պատիվ ունեմ» ու «Հայաստան» խմբակցության պատգամավորների կողմ ձայները բավարար չէին, որպեսզի Ղազինյանն ընտրվեր։ «Ես իրենց սրտի նախագահի տեղակալը չէի», - քվեարկությունից հետո, լրագրողների հետ ճեպազրույցում, ասել էր Ղազինյանը: Օրենքով այս պաշտոնը ընդդիմությանն է և ընդդիմությունը հնգօրյա ժամկետում պետք է նոր թեկնածու առաջադրեր։

12:29 - 06 սեպտեմբերի, 2021

Արփինե Դավոյանը տեղին չի համարում ԱԺ պաշտպանության հանձնաժողովին ուղղված քննադատությունը |armenpress.am|

armenpress.am: Ազգային ժողովի «Քաղաքացիական պայմանագիր» խմբակցության պատգամավոր Արփինե Դավոյանը Պաշտպանության և անվտանգության հարցերի մշտական հանձնաժողովին ուղղված քննադատություններ տեղին չի համարում: Խորհրդարանում Պաշտպանության և անվտանգության հարցերի մշտական հանձնաժողովի նախագահի պաշտոնում Անդրանիկ Քոչարյանի թեկնածության հարցի քննարկման ժամանակ իր ելույթում Արփինե Դավոյանը նշեց, որ քննադատողների մեծ մասը տեղյակ չէ, թե Պաշտպանության և անվտանգության հանձնաժողովն ամբողջ կազմով և Անդրանիկ Քոչարյանի ղեկավարությամբ ինչ գործունեությամբ է զբաղվել անցած 2.5 տարվա ընթացքում: «Դա պատճառը մեկն է: Մեր հարգելի գործընկերները ԱԺ գործունեության մասին տեղյակ են այնքանով, որքանով, որ մամուլում տեղ են գտել տարատեսակ հրապարակումներ՝ անձնական դիրքորոշումներով, որոնք կապ չեն ունեցել հանձնաժողովի աշխատանքների հետ: Մեր գործընկերները շատ են խոսում ԱԺ-ի վերահսկողական ֆունկցիաների մասին: Ուրախ եմ , որ այդքան կարևորություն եք տալիս դրան, սակայն չեմ կարծում, որ դուք տեղյակ եք եղել, թե մեր հանձնաժողովներն ինչ գործունեություն են ծավալել»,- ասաց Արփինե Դավոյանը: Պատգամավորն անդրադարձավ ընդդիմադիր խմբակցությունից նախորդ օրը հնչած այն դիտարկումներին, ըստ որոնց, պատերազմի ժամանակ քաոս և խառնաշփոթ էր ստեղծված: Արփինե Դավոյանը նշեց, որ այդ քաոսն ու խառնաշփոթը ստեղծված են որոշ մարդկանց կողմից ուղղորդված հրապարակումների շնորհիվ: «Ասում են, թե մեզ մոտ ինքնաքննադատություն չկա: Այս խորհրդարանում ու կառավարությունում այնքան ինքնաքննադատություն կա, որ չի եղել երբեք Հայաստանի ոչ մի կառավարությունում: Մենք բազմաթիվ անգամ նշել ենք ու խոսել ենք մեր սխալների մասին»,-ասաց Արփինե Դավոյանը:

10:40 - 10 օգոստոսի, 2021

ՔՊ-ն՝ ԱԺ Պաշտպանության և անվտանգության հարցերի մշտական հանձնաժողովի նախագահի պաշտոնում առաջադրեց Անդրանիկ Քոչարյանի թեկնածությունը |azatutyun.am|

azatutyun.am: «Քաղաքացիական պայմանագիր» խմբակցությունը Պաշտպանության և անվտանգության հարցերի մշտական հանձնաժողովի նախագահի պաշտոնում առաջադրեց Անդրանիկ Քոչարյանի թեկնածությունը, ով 7-րդ գումարման Ազգային ժողովում ևս ղեկավարում էր այս հանձնաժողովը։ Խորհրդարանը քննարկում է մշտական հանձնաժողովների ստեղծման հարցը։ Իշխող «Քաղաքացիական պայմանագիր»-ը Պետաիրավական հարցերի մշտական հանձնաժողովի նախագահի պաշտոնում էլ առաջադրել է Վլադիմիր Վարդանյանի թեկնածությունը։ 12 մշտական հանձնաժողովների 9 նախագահների թեկնածուների կառաջադրի իշխող «Քաղաքացիական պայմանագիր» խմբակցությունը, 3-ը՝ ընդդիմադիր «Հայաստան» խմբակցությունը:

13:22 - 09 օգոստոսի, 2021

Առաջարկվում է նվազեցնել Զինապահովագրության հիմնադրամին ուղղվող վճարների չափը |1lurer.am|

1lurer.am: ԱԺ պաշտպանության և անվտանգության հարցերի մշտական հանձնաժողովը քննարկեց և հավանություն տվեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխությունների նախագծին: Նախագծի համահեղինակ Գևորգ Պապոյանը նշեց, որ առաջարկվող փոփոխությամբ էականորեն կթեթևանա անհատ ձեռնարկատերերի վրա դրվող ֆինանսական բեռը, տնտեսության վերականգնման այս փուլում հնարավոր կլինի խրախուսել բիզնես գործունեությունը: Պատգամավորի խոսքով՝ եթե գործող կարգավորմամբ անհատ ձեռնարկատերերը տարեկան վճարում են 18.000-180.000 դրամ, ապա առաջարկվող կարգավորմամբ այդ բեռը տարեկան լինելու է 18.000-120.000 դրամ, ընդ որում, էականորեն ընդլայնվում է տարեկան 18.000 դրամ վճարողների շրջանակը: Եվ այսպես՝ մինչև 2.400.000 դրամ հաշվարկման բազայի դեպքում վճարելու են 18.000 դրամ. 2.400.001-ից մինչև 6.000.000 դրամ հաշվարկման բազայի դեպքում՝ 24.000 դրամ. 6.000.001-ից մինչև 12.000.000 դրամ հաշվարկման բազայի դեպքում՝ 48.000 դրամ. 12.000.001 դրամ և ավելի հաշվարկման բազայի դեպքում՝ 120.000 դրամ: Ֆիզիկական անձանց համար ևս էական բարելավում է նախատեսվում: Մասնավորապես, օրինակ՝ 100.001-ից մինչև 150.000 դրամ անվանական աշխատավարձ ստացողները վճարելու են ամսական ոչ թե 3000, այլ 2000 դրամ: 200.000-300.000 դրամ ստացողները վճարելու են ամսական ոչ թե 5500, այլ 3000 դրամ: Ամսական 500 դրամով կնվազի նաև 300.001-500.000 դրամ ստացողների վճարելիք գումարը: Պապոյանն ասաց, որ անհատ ձեռնարկատերերի կողմից դրական արձագանքներ են ստացվել: Նախագծի համահեղինակը նաև հավելեց, որ այս օրենսդրական նախագծի ընդունման դեպքում չի վտանգվի Զինծառայողների ապահովագրության հիմնադրամի գործունեությունը, այն չի ազդի հիմնադրամի վճարունակության և ֆինանսական կայունության վրա:

12:38 - 19 մայիսի, 2021