ՀՀԿ - infocom.am

ՀՀԿ

Հայաստանի հանրապետական կուսակցությունը հիմնադրվել է 1990 թվականին։ Համաձայն կուսակցության պաշտոնական կայքի՝ կուսակցական գաղափարախոսությունը ազգային պահպանողական է։ Այն իրեն համարում է «Ազգային միացյալ կուսակցության» գաղափարական-քաղաքական ժառանգորդը։

Հիմնադրման օրվանից մինչեւ 1997թ. նոյեմբեր ՀՀԿ նախագահը Աշոտ Նավասարդյանն էր, որի մահվանից հետո՝ մինչեւ 2007թ. մարտ ամիսը, կուսակցությունը ղեկավարում էր Անդրանիկ Մարգարյանը, այնուհետեւ՝ մինչ օրս, Սերժ Սարգսյանը։

1990թ. ընտրված Գերագույն խորհրդում ՀՀԿ-ն ներկայացված էր մեկ պատգամավորով՝ Աշոտ Նավասարդյան, 1995թ. ընտրված առաջին գումարման Աժ-ում՝ 5 պատգամավորով, 1999թ. ընտրված երկրորդ գումարման խորհրդարանում ՀՀԿ-ն երեք տասնյակ պատգամավորներ ուներ:

1999թ. հոկտեմբերի 27-ի ողբերգական իրադարձություններից հետո վարչապետ նշանակվեց ՀՀԿ ներկայացուցիչ Արամ Սարգսյանը: Ավելի ուշ` 2000թ. մայիսին, ՀՀ վարչապետ նշանակվեց ՀՀԿ խորհրդի նախագահ, «Միասնություն» խմբակցության ղեկավար Անդրանիկ Մարգարյանը:

2003թ. մայիսի 25-ին տեղի ունեցած ԱԺ ընտրությունների արդյունքում ՀՀԿ-ն խորհրդարանում ուներ ամենամեծ խմբակցությունը` 40 պատգամավոր:

2006թ. հուլիսին կայացած կուսակցության 10-րդ արտահերթ համագումարը Հայաստանի Հանրապետական կուսակցությունը հռչակեց իբրեւ ազգային պահպանողական կուսակցություն։ Համագումարի որոշմամբ վերականգնվեց կուսակցության խորհրդի նախագահի պաշտոնը, որը հանվել էր 2005թ.։ ՀՀԿ խորհրդի նախագահ ընտրվեց Սերժ Սարգսյանը։

2007թ.՝ ՀՀԿ նախագահ Անդրանիկ Մարգարյանի մահից հետո, ՀՀԿ նախագահի պարտականությունները ստանձնեց Սերժ Սարգսյանը։ Ապրիլի 4-ին նա նշանակվեց նաեւ ՀՀ վարչապետ:

2007թ. մայիսի 12-ին տեղի ունեցած ՀՀ ԱԺ ընտրությունների արդյունքում ձեւավորվեց ՀՀԿ խմբակցություն՝ 64 պատգամավորով: ԱԺ նախագահ ընտրվեց ՀՀԿ փոխնախագահ Տիգրան Թորոսյանը:

2008թ. փետրվարին տեղի ունեցած նախագահական ընտրություններում Սերժ Սարգսյանը դարձավ ՀՀ Նախագահ:

2012թ. մայիսի 6-ին տեղի ունեցած ՀՀ ԱԺ ընտրությունների արդյուքներով մայիսի 31-ին ստեղծվեց ՀՀ ԱԺ 5-րդ գումարման ՀՀԿ խմբակցությունը, որում ընդգրկված 69 պատգամավորներից 53-ը ՀՀԿ անդամներ էին։

2013թ. փետրվարի 18-ին տեղի ունեցած նախագահական ընտրություններում Սերժ Սարգսյանը դարձավ ՀՀ Նախագահ:

2018-ի ապրիլ-մայիսյան իրադարձությունների արդյունքում Սերժ Սարգսյանը հրաժարական ներկայացրեց։ ՀՀԿ-ն մասնակցեց 2018թ․ դեկտեմբերի խորհրդարանական արտահերթ ընտրություններին։ Կուսակցության համապետական ցուցակը գլխավորում էր ՀՀ պաշտպանության նախկին նախարար Վիգեն Սարգսյանը։ Այս ընտրություններում ՀՀԿ-ն չհայտնվեց ԱԺ-ում՝ չհավաքելով անցողիկ շեմը։

ՀՀԿ-ն 2021 թ․ հունիսի 20-ի խորհրդարանական արտահերթ ընտրություններին «Հայրենիք» կուսակցության հետ մասնակցում էր «Պատիվ ունեմ» դաշինքով, որը 8-րդ գումարման ԱԺ-ում կունենա 7 պատգամավոր։

«Իմ քայլը»․ բարեկամներ, վաղեմի գործընկերներ, նախկին ՀՀԿ ու ԲՀԿ անդամներ |media.am|

media.am: Հայաստանում կուսակցությունները միշտ չէ, որ կազմվում են գաղափարական ընդհանրությունների վրա հիմնվելով։ Օրինակ, հուլիսին media.am-ը պարզել էր, որ ԱԺ խոշորագույն ընդդիմադիր ուժի՝ ԲՀԿ խմբակցության պատգամավորների մեծ մասը՝ 26-ից 14-ը, անձնական կամ գործնական կապերով կապված են Գագիկ Ծառուկյանի հետ։ Այժմ ուսումնասիրել ենք իշխող «Իմ քայլը» (այսուհետ՝ ԻՔ) խմբակցության կազմը, և պարզել որ նեպոտիզմը, հայերեն ասած՝ խնամի-ծանոթ-բարեկամ երևույթը, իշխող ուժին նույնպես բնորոշ է։ ԻՔ շարքերում կան Նիկոլ Փաշինյանի բարեկամները և նրա ղեկավարած թերթի նախկին աշխատակիցները։ Բայց ի տարբերություն ԲՀԿ-ի քաղաքական առաջնորդի հետ անձնական կամ գործնական կապ ունի ԻՔ պատգամավորների ավելի փոքր մասը։ ԻՔ պատգամավորների զգալի մասը՝ շուրջ 11% (13 անձ) նախկինում կապված են եղել այլ քաղաքական ուժերի, այդ թվում՝ ԲՀԿ-ի և ՀՀԿ-ի հետ, իսկ հեղափոխությունից հետո միացել են «Իմ քայլին»։ Խնամի, ծանոթ, բարեկամ «Իմ քայլը» դաշինքի երեք պատգամավոր Նիկոլ Փաշինյանի ազգականներն են։ Այդպես, ԻՔ պատգամավոր է Փաշինյանի եղբոր որդին՝ Սիփան Փաշինյանը, ինչպես նաև նրա կնոջ եղբայրը՝ Հրաչյա Հակոբյանը։ Պատգամավոր Վահե Ղալումյանը նույնպես անձնական կապ ունի վարչապետի ընտանիքի հետ։ Ղալումյանի եղբայրը՝ Հայկ Ղալումյանը, Փաշինյանի քավորն է և Իջևան համայնքի ղեկավարի ժամանակավոր պաշտոնակատարը։ Բոլոր երեքը նաև «Քաղաքացիական պայմանագիր» կուսակցության անդամներ են։ Գործնական կապեր Պատգամավոր Հայկ Գևորգյանը ավելի քան 20 տարի աշխատել է Փաշինյանների ընտանիքին պատկանող «Հայկական ժամանակ» (այսուհետ՝ ՀԺ) թերթում, նախ՝ որպես թղթակից, ապա որպես ՀԺ-ի հրատարակիչ «Դարեսկիզբ» ՍՊԸ տնօրեն։ Նույն պաշտոնը զբաղեցրել է նաև Վահագն Հովակիմյանը, ով «Դարեսկիզբ» ՍՊԸ տնօրեն էր մինչև 2013-ը։ Հովակիմյանը եղել է նաև ՀԺ թղթակից, պատգամավոր Նիկոլ Փաշինյանի օգնական։ Պատգամավոր է դարձել նաև «Դարասկիզբ» ՍՊԸ տնօրենի տեղակալ Հակոբ Սիմիդյանը։ 2009-2012 թթ․ նա աշխատել է ՀԺ-ում, ապա եղել է պատգամավոր Նիկոլ Փաշինյանի օգնականը։ Ի դեպ, ԱԺ կայքում տեղադրված պաշտոնական կենսագրության մեջ նշված է, որ Սիմիդյանը պատգամավորի օգտնական է աշխատել, բայց որ այդ պատգամավորը հենց Փաշինյանն էր, բայց է թողնված։ Այժմ նա «Իմ քայլը» խմբակցության քարտուղարն է։ Անկուսակցական պատգամավոր Վահագն Թևոսյանը նույնպես աշխատել է ՀԺ-ում։ Իսկ նրա կինը՝ Լուսինե Բարսեղյանը, եղել է ՀԺ-ի խմբագիրը։ Ի դեպ, այժմ Լուսինե Բարսեղյանը ԱԺ նախագահ Արարատ Միրզոյանի ռեֆերենտն է (այս պաշտոնը ենթադրում է տեղեկատվական-խորհրդատվական, վերլուծական աշխատանքներ)։ Գործադիրից՝ օրենսդիր Թավշյա հեղափոխությունից հետո պետական ծառայության անցած որոշ գործիչներ մի քանի ամիս անց թողեցին պաշտոնները՝ առաջադրվելով ԱԺ արտահերթ ընտրություններին։ Հայտնի է, որ պատգամավոր դարձան մի քանի նախարարներ, բայց այս շարքում կան նաև հենց Փաշինյանի աշխատակազմի ութ աշխատակիցներ։ Այդպես, պատգամավոր դարձան Փաշինյանի օգնականներից Արփինե Դավոյանը և Արեն Մկրտչյանը, ինչպես նաև օգնական Նաիրի Սարգսյանի եղբայրը՝ Հայկ Սարգսյանը։ Մանդատ ստացան նաև վարչապետի խորհրդականներ Նիկոլայ Բաղդասարյանը, Վարազդատ Կարապետյանը և Արտակ Մանուկյանը։ Նիկոլայ Բաղդասարյանը եղել է նաև ԵԼՔ դաշինքի պատգամավորի թեկնածու։ Նա փաստաբան է և պաշտպանում էր հեղափոխության ժամանակ ձերբակալված Նիկոլ Փաշինյանին և Արարատ Միրզոյանին։ Վարչապետի առաջին մամուլի քարտուղարը՝ Արման Եղոյանը, ինչպես նաև աշխատակազմի ղեկավարի տեղակալ Սարգիս Խանդանյանը նույնպես 2019-ի հունվարին ստանձնեցին ԱԺ պատգամավորի մանդատը։ ԲՀԿ, ՀՀԿ և ԼՀԿ նախկին անդամները հեղափոխությունից հետո միացան «Իմ քայլին» Չնայած որ «Իմ քայլը» հաճախ են մեղադրում քաղաքականության մեջ անփորձ լինելում, շատ պատգամավորների համար քաղաքական գործունեությունը բոլորովին նոր բան չէ՝ նրանք հասցրել են նույնիսկ կուսակցություն փոխել։ Այսպես, ԻՔ 13 անդամ մինչև հեղափոխությունը փոխկապակցված են եղել այլ քաղաքական ուժերի հետ։ 2018-ից հետո նրանցից 5-ը դարձան «Քաղաքացիական պայմանագիր» կուսակցության անդամ, 7-ը մնացին անկուսակցական, և միայն մեկը ԻՔ դաշինքում ներկայացրեց այլ կուսակցություն՝ «Հզոր Հայրենիք»-ը։ Շարունակությունը՝ media.am-ում

16:21 - 26 օգոստոսի, 2020

Մուրացիկի սերունդ են դաստիարակել. ինչո՞ւ են դուրս եկել ՀՀԿ-ից եւ ինչ է պատասխանել Սերժ Սարգսյանը |araratnews.am|

araratnews.am: ՀՀԿ-ի շարքերը շարունակում են նոսրանալ: Մամուլն այսօր գրել է, որ ՀՀԿ-ից դուրս են եկել «հնաբնակներ» Լեռնիկ Ալեքսանյանն ու Ֆիրդուս Զաքարյանը՝ սփյուռքի նախարարության աշխատակազմի նախկին ղեկավարը: Araratnews.am-ը զրուցել է Ֆիրդուս Զաքարյանի հետ՝ ՀՀԿ-ից դուրս գալու եւ ներքաղաքական գործընթացների մասին: Պարոն Զաքարյան, մամուլը գրել է՝ դուրս եք եկել ՀՀԿ-ից: Հաստատե՞ք, թե՞ հերքեք տեղեկությունը: Հունվարի 13-ին մի քանի անդամներով ՀՀԿ-ից դուրս ենք եկել: Ի՞նչն էր պատճառը: Հեղափոխությունից հետո ՀՀԿ-ն այլեւս ակտուալ չէ՞ր, չուներ այն հզորությունը, որը կար նախկինում: Պատճառների մասին գրել ենք: Անհամաձայնություն կար այն իրավիճակի հետ, որը կար կուսակցությունում: ՀՀԿ-ը չի ցանկանում նորանալ, իր անցյալի հետ առերեսվել: Դա էլ մեր կողմից քննադատության է արժանացել: Ձեզ հետ դուրս է եկել նաև Լեռնիկ Ալեքսանյա՞նը: Այո, ես, Լեռնիկ Ալեքսանյանն ու Ռազմիկ Մարտիրոսյանը: Տեսել ենք՝ ոչինչ չի փոխվում, չեն էլ ուզում փոխվել, հին մեթոդներ, հին մոտեցումներ, խորհրդի նիստ էլ չեն հրավիրում, համագումար էլ չեն անում, այսինքն՝ մեռյալ վիճակ, քաղաքական գործունեությամբ չեն զբաղվում: Տարվա ընթացքում մի քանի անգամ զբաղվել են ուտուշխմուշային միջոցառումներով, որը մենք չէինք կարող հանդուրժել: Ես հոդվածներից մեկում գրել եմ՝ ՀՀԿ-ը դարձել է Սերժ Սարգսյանին գրպանային կուսակցություն, որը ապագա չունի, նմանվում է մի աչքը կույր, մի ոտքը կաղ կուսակցության, որը մի ծառի տակ կնստի ու կմնա: Կուսակցության մեջ կան ազնիվ մարդիկ, որոնք հեռու են մնացել այն երեւույթներից, որոնք արել է կուսակցության ղեկավարը մի խումբ մարդկանցով՝ իր սեփական շահի համար՝ թքած ունենալով կուսակցության շարքային անդամների հեղինակությանը ու մեր երկրի շահերին: Երբ այս ամենն ասացիք Սերժ Սարգսյանին ՀՀԿ-ում, ի՞նչ ասաց: Մի անգամ՝ ՀՀԿ-ի վերջին խորհրդի նիստում՝ 2018 թ-ի նոյեմբերին, երեքս էլ ելույթ ենք ունեցել, խոսել ենք, բայց արժանացել ենք բացասական վերաբերմունքի: Սերժ Սարգսյանը հեգնանքով ասաց՝ չեք ուզում, կարող եք դուրս գալ: Իսկ մյուս ՀՀԿ-ականներն ի՞նչ էին ասում՝ համեմատաբար երիտասարդները, օրինակ՝ Էդուարդ Շարմազանովը, Արմեն Աշոտյանը: Չգիտեմ: Հիմա մանրամասները չեմ հիշում: Դրանից հետո խորհրդի նիստ չի եղել: Մենք ուզում էինք՝ լինի եւս մի խորհրդի նիստ, որպեսզի առաջարկեինք Սերժ Սարգսյանին կուսակցության ղեկավարի պաշտոնից հեռանալ: Նիստն այդպես էլ տեղի չունեցավ, մեզ էլ հասկացրին՝ Սերժ Սարգսյանը չի թողնելու կուսակցությունը: Ձեր մեկնաբանությունն ընթերցելուց հետո ընթերցողները մոդայիկ հարց կտան՝ բա Սերժ Սարգսյանի ժամանակ ինչո՞ւ չէիք խոսում: Այն ամենը, ինչ Դուք հիմա եք ասում, ասե՞լ եք մինչեւ հեղափոխությունը Սերժ Սարգսյանին: Ես համարյա քաղաքականությունից հեռու եմ եղել՝ որպես քաղծառայող, որպես աշխատակազմի ղեկավար: Այսպես ասած «աջս քաշած» եմ պահել: Երբ մի սենյակի մեջ են, ծխում են, ծխի վնասակարությունը չես զգում: Հանկարծ պատուհանը բացվում է, թարմ օդից զգում ես՝ ինչ մթնոլորտում ես: Ապրիլյան հեղափոխությունն այդ հնարավորությունը տվեց: Այն գաղափարները, որոնք որդեգրել է ՀՀԿ-ը 1998-ին, ինձ խորթ չեն, դրանցից ես չեմ հեռացել: Մենք ՀՀԿ-ից դուրս գալուց հետո ձեւավորել ենք մի հասարակական կազմակերպություն՝ «Միասնություն» դաշինքի գաղափարակիրների ակումբ: Հիմա հասկացանք՝ Կարեն Դեմիրճյանի եւ Վազգեն Սարգսյանի ժառանգությունից ՀՀԿ-ն այնքան է հեռացել… Հասկացանք՝ ՀՀԿ-ն այսօրվա ղեկավարության պատճառով վաղուց հեռացել է այդ գաղափարներից, այլասերվել է, անգամ դավաճանել դրանց: Այսօրվա ՀՀԿ-ը դարձել է խոշոր բուրժուազիայի կուսակցություն, պաշտպանել դրա շահը, այսօր էլ պատրաստվում է պաշտպանել այն: Տեսեք՝ օլիգարխներից մի քանիսն են հավաքվել ՀՀԿ-ի շուրջը, հասարակ ժողովուրդ չկա: Մարդկանց համոզելով, խնդրելով բերում են, որ ցույց տան՝ իբր ՀՀԿ-ում մարդ է մնացել: ՀՀԿ-ի կողքին մնացել են մարդիկ, որոնք իրենց հարստությունը բազմապատկել են այս տարիներին: Սա վաղ թե ուշ կհասկանան նաև ՀՀԿ-ի շարքային անդամները, որոնք կամ դուրս կգան այդ կուսակցությունից, կամ կհարեն այլ գաղափարներով առաջնորդվող քաղաքական կառույցների: Ըստ Ձեզ՝ ՀՀԿ-ի վերածնունդ հնարավո՞ր է կուսակցությունից դուրս եկածների շնորհիվ: Ես հիմա նման բան չեմ տեսնում, քանի որ քաղաքական վերադասավորումներ են: Բայց եթե Սերժ Սարգսյանը թողներ կուսակցությունը, ինքնըստինքյան դա կլիներ: Շատերի հետ եմ զրուցել, բոլորն էին սպասում, որ Սերժ Սարգսյանը կհեռանա նաև կուսակցության ղեկավարի պաշտոնից, քանի որ թողել է նաև երկրի ղեկավարի պաշտոնը, հնարավորություն կտա երիտասարդներին, չվարկաբեկվածներին աշխատել, կուսակցությունը վերադարձնել ակունքներին: Սակայն դա տեղի չունեցավ: Որպես պետական ապարատի փորձառու աշխատակից՝ պատրա՞ստ եք աջակցել իշխանությանը՝ հանուն երկրի զարգացման: Երբ նոր նախարարը նշանակվեց (նկատի ունի Մխիթար Հայրապետյանին- հեղ.), դիմում գրեցի եւ դուրս եկա, քանի որ պարկեշտ չէ՝ նոր իշխանության հետ աշխատեր ՀՀԿ խորհրդի անդամը: Բայց նաև գրել եմ, որ պատրաստ եմ աջակցելու իշխանությանը, ողջունում եմ այս փոփոխությունները՝ անկախ նրանից՝ այս իշխանության վերեւում եմ, թե ներքեւում: Այս ընթացքում հանդես եմ եկել հրապարակային հոդվածներով: Այնպես, ինչպես ընկալում եմ երեւույթները, այդպես էլ արտահայտվում եմ: Հին նավը չեմ լքել, բայց հասկացել եմ՝ նավի ղեկավարությունը վաղուց դավաճանել է նավի անձնակազմին: Ինչքան էլ Դուք ձեր «աջը քաշած» եք եղել, որպես ՀՀԿ-ական, իշխանավոր՝ անուղղակի չունե՞ք պատասխանատվություն 10 տարիների իրավիճակի համար: Այն ժամանակ էլ, հիմա էլ ես պատասխանատու եմ ինձ համարում, ունեմ այդ մեղքի զգացումը: Ամեն ինչ չէ, որ իմացել եմ: Ամեն անգամ ընտրակաշառքներով ընտրություններից հետո իմ անձնական դրաման եմ ապրել ու չեմ արտահայտվել՝ այսպես ասած՝ խեցու մեջ փակված եմ եղել: Հարգում եմ նրանց, ովքեր բարձրաձայնել են: Ընտրակաշառքների առաջին հարվածը զգացել եմ իմ մաշկի վրա 2003 թ-ին, երբ համատարած փող բաժանելու պարագայում ես, իմ ընկերներն ինչպիսի անհարմար վիճակում էինք. ազգուտակ, բարեկամներ մի քանի հազար դրամի համար մուրացիկի պես վազում էին այն կենտրոնները, որտեղ այդ փողը բաժանում էին: Բայց հետագայում ինձ համարում եմ քաղաքականությունից հեռացած մարդ: Ռոբերտ Քոչարյանը, Սերժ Սարգսյանը, նրանց համակիրները հայտարարում են՝ այս իշխանությունը շուտով տապալվելու է, անում են ամեն ինչ՝ նորից իշխանություն ունենալու համար: Ինչպիսի՞ն է ձեր կարծիքն այս ամենի մասին, արդյոք հնարավոր է վերադարձի սցենարը: Մարդկանց մի տեսակ կա, որ անտառ մտնելիս այնքան է վախենում, որ սկսում է ձայներ հանել, մտածելով՝ կարող է վախեցնել դիմացինին: Վախից ինչ ձայներ ասես հանում են: Անկախություն սերունդ դաստիարակելու փոխարեն դաստիարակել են մուրացիկների սերունդ, որով մենք առաջ չենք գնա: Նոր իշխանությունը, ինչքան էլ վրիպումներ, բացթողումներ ունենա, մի շատ կարևոր հարց լուծեց՝ ժողովրդին վերադարձրեց գործոն լինելու իրավունքը: Այս առումով Սերժ Սարգսյանը, Ռոբերտ Քոչարյանն անելիք չունեն: Ովքեր հույս ունեն՝ պետք է վերադառնան, չեն վերադառնա այս զինակիցների տեսքով: Ինչ իրավիճակ էլ լինի, ժողովուրդը նորից գնալու՝ ոչ է ասելու, ասելու է մերժիր Ռոբերտին, Սերժին: Նրանք սպառել են իրենց, այնպիսի վերք են թողել մարդկանց հոգիներում, որ այս սերունդը, որ մի անգամ հավաքվել է հրապարակում, նորից կհավաքվի ու նորից կմերժի նրանց:

23:10 - 04 մարտի, 2020