armtimes.com: Արտաշես Շահինյանի անվան ֆիզիկամաթեմատիկական հատուկ դպրոցի դիմորդ աշակերտների ծնողները բաց նամակով դիմել են ՀՀ կրթության, գիտության, մշակույթի եւ սպորտի նախարար Արայիկ Հարությունյանին:

Նամակում, մասնավրապես, ասվում է.

«Պատահականություն, թե դիտավորություն.
Հարգելի պրն. Հարությունյան,
Հունիսի 22-ին Երեւանի պետական համալսարանին առընթեր Արտաշես Շահինյանի անվան ֆիզիկամաթեմատիկական հատուկ դպրոցում (Ֆիզմաթ դպրոց) տեղի է ունեցել 8-րդ դասարանի ընդունելության քննության առաջին փուլը:

16-րդ առաջադրանքի մեջ թույլ է տրվել սխալ, որն ուղղվել է միայն քննության ավարտից 10 րոպե առաջ: Աշակերտներից շատերը չեն հասցրել կողմնորոշվել եւ արդյունքում մեկական միավոր են կորցրել:

Քննության արդյունքները հայտարարելուց հետո պարզ է դարձել, որ 2-րդ տարբերակի աշակերտների գնահատականներին ավելացել են 1-ական միավոր, սակայն առաջին տարբերակի աշակերտների գնահատականներին այդ միավորը չեն ավելացրել:

Արդյոք սա միտումնավո՞ր է արվել, որ երեխաները դուրս մնան դպրոցից, քանի որ, ինչպես գիտեք, Ֆիզմաթ դպրոցում դասարանները գերհագեցած են աշակերտներով, ինչը հնարավոր է՝ պայմանավորված է այն հանգամանքով, որ դպրոցի անշարժ գույքի մի մեծ հատվածում ուսումնական գործունեություն է իրականացնում «Ուսում» հանրակրթական դպրոց ոչ պետական ուսումնական հաստատությունը (վճարովի դպրոց է, ղեկավարը ֆիզմաթ դպրոցի տնօրեն Հայկազ Նավասարդյանի կինն է` Սուսաննա Թամարյանը):
Ի դեպ, նույն պատկերն է եղել նաեւ հունիսի 21-ին տեղի ունեցած յոթերորդ դասարանի ընդունելության քննության ընթացքում:

Խնդրում ենք Ֆիզմաթ դպրոց ընդունվելու հետ կապված արդարությունը վերականգնել եւ հնարավորություն ընձեռել ֆիզիկամաթեմատիկական առարկաներից բարձր առաջադիմությամբ աշակերտներին սովորել Ֆիզմաթ դպրոցում»: