19:22 - 29 փետրվարի, 2024
Փաշինյանի կոռուպցիոն հանցագործ լինելու փաստը ներկայացրել ենք դատախազին. Հայրիկյան |armeniasputnik.am|
Նիկոլ Փաշինյանի հրաժարականի պահանջով հանրահավաք է ընթանում Երևանի Ազատության հրապարակում։ Նախաձեռնողը «Միասին» շարժումն է։
«Այս ընդհանուր շարժման հոգուն և տրամադրությանը համահունչ` 12 քաղաքական ուժ համախմբվեց, և փետրվարի 21-ին Նիկոլ Փաշինյանի կոռուպցիոն հանցագործ լինելու փաստը ներկայացրինք դատախազին։ Վեց ամիս առաջ մենք մասամբ էինք ներկայացրել փաստաթուղթը` հայեցակարգերի ժամկետները խախտելու մասով, իսկ հիմա՝ սահմանադրական բարեփոխումների գործը 4 անգամ տապալելու մասին վերաբերյալ։ Նախագիծը պետք է ներկայացված լիներ 2023 թվականի հունիսին, բայց չի արվել, ավելին` մարդիկ դեռ աշխատում ու աշխատավարձ են ստանում»,– այս մասին հանրահավաքի ժամանակ հայտարարեց «Ազգային ինքնորոշում միավորում» կուսակցության առաջնորդ Պարույր Հայրիկյանը։
Նա ընդգծեց, որ իրավական ակտում ժամկետ է նշված եղել` հունիսին պետք է հանձնվեր կառավարությանը, այնինչ, 4 տարի շարունակ, հանձնաժողովի 7-15 անդամ մոտ 700 000 դրամ գումար է ստացել։ Հայրիկյանը վստահեցրեց` սա կազմակերպված կոռուպցիա է։
Ըստ քաղաքական գործչի` առաջիկա օրերին դատախազությունից պետք է պատասխանեն իրենց։ Ուղիղ 1 շաբաթից էլ պատրաստվում են գնալ դատախազության շենքի մոտ` պահանջելով ձերբակալել ՀՀ վարչապետ Նիկոլ Փաշինյանին, այնուհետև տանել դատարան և կալանավորել։
Հայրիկյանի պնդմամբ` Նիկոլ Փաշինյանը պետք է ոչ թե պաշտոնից հեռանա, այլ բանտ նստի։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)