Խնդրում եմ դադարեցնել աջակցության գործողությունները և հավաստիացնում եմ, որ մեր համալսարանին և մեր դավանած արժեքներին որևէ բան չի սպառնում: Այս մասին ֆեյսբուքյան իր էջում գրել է Հայ-ռուսական Սլավոնական համալսարանի ռեկտոր Արմեն Դարբինյանը՝ դիմելով քաղաքացիներին: Դարբինյանի գրառումը՝ ստորև.
«Սիրելիներս,
Հայաստանի Հանրապետության արժանապատիվ քաղաքացիներ,
Սփյուռքի արժանապատիվ հայեր,
Իմ խորին երախտագիտությունն եմ հայտնում այս օրերին համացանցը ողողած սիրո և արժանապատվության շքերթի համար՝ ուղղված ինձ և համալսարանական արժեքների պաշտպանությանը: Անգամ անհարմար եմ զգում, որ նման դրսևորում տեղի է ունենում իշխանական մի ոհմակի հանդեպ, որը օրգանապես անհաղորդ է նման արժեքներին: Այդ իսկ պատճառով խնդրում եմ դադարեցնել աջակցության գործողությունները և հավաստիացնում եմ, որ մեր համալսարանին և մեր դավանած արժեքներին որևէ բան չի սպառնում: Իսկ Նիկոլ Փաշինյան անվանմամբ ազգային աղետը մենք կվերացնենք սահմանադրորեն, բայց իր սիրած ձևով՝ պինցետով:
Ստեղծված իրավիճակում սակայն բան ունի անելու ԱԱԾ տնօրեն Աբազյանը: Նա ունի երեք տարբերակ.
ա/Հրապարակային բացատրություն տալ ինձ ներկայացված վերջնագրի կապակցությամբ;
բ/Մասնավոր զրույցում ինձանից ներողություն խնդրել դրսևորված անհեռատեսության համար;
գ/վարչապետի խոսնակ օրիորդ Մանեի հրահանգով փորձել գործ կարել ինձ վրա:
Միանգամից ասեմ, որ ռեժիմի ոչնչացումը արագացնելու տեսանկյունից ես նախընտրում եմ երրորդ տարբերակը: Դե ձեզ տեսնեմ»:
Արմեն Դարբինյանը հայտարարել էր, որ Նիկոլ Փաշինյանն իր աշխատակազմի ու Կրթության, գիտության, մշակույթի և սպորտի նախարարության զգալի ուժերը լծել է իրեն «պաշտոնանկ անելու անբովանդակ նպատակի իրագործմանը։
Վերոնշյալից հետո Հայ-ռուսական համալսարանի դասախոսները և ուսանողները համալսարանի հիմնական մասնաշենքի առջև հանրահավաք իրականացրեցին՝ հաջակցություն բուհի ռեկտոր Արմեն Դարբինյանի:
comment.count (0)